Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32010R1236

Kooperazzjoni internazzjonali fil-ġejjieni dwar is-sajd fl-Atlantiku tal-Grigal

Datatal-aħħarreviżjoni:
13/03/2018
Data tal-ħolqien inizjali:
05/04/2018
Dokument(i) mqassar/mqassra:
Awtur:
Uffiċċju tal-Pubblikazzjonijiet tal-Unjoni Ewropea
Entita(jiet) responsabbli:
Id-Direttorat Ġenerali għall-Affarijiet Marittimi u s-Sajd

Kooperazzjoni internazzjonali fil-ġejjieni dwar is-sajd fl-Atlantiku tal-Grigal

 

SOMMARJU TA’:

Regolament (UE) Nru 1236/2010 dwar sistema ta’ kontroll u infurzar dwar iż-żona tas-sajd fl-Atlantiku tal-Grigal

Konvenzjoni dwar il-kooperazzjoni fis-sajd tal-Atlantiku tal-Grigal

X’INHU L-GĦAN TAR-REGOLAMENT?

Huwa għandu l-għan li jippromwovi l-kooperazzjoni internazzjonali dwar il-konservazzjoni, il-kontroll u l-ġestjoni tajba tas-sajd fiż-żona tal-Atlantiku tal-Grigal.

Huwa jippromulga l-Konvenzjoni dwar il-Kooperazzjoni Multilaterali dwar is-Sajd fl-Atlantiku tal-Grigal li tistabbilixxi regoli għall-kooperazzjoni dwar il-konservazzjoni u l-ġestjoni tas-sajd.

B’mod partikolari, ir-Regolament jimplimenta l-Iskema ta’ Kontroll u Infurzar tan-NEAFC, li tipprevedi

  • miżuri ta’ kontroll u infurzar għal bastimenti li jtajru l-bandiera tal-partijiet kontraenti tagħhom;
  • arranġamenti għal spezzjonijiet fuq il-baħar;
  • sorveljanza; u
  • proċeduri kontra l-ksur.

PUNTI EWLENIN

L-iskema toħloq sistema ġdida għall-kontroll mill-istat tal-port, li effettivament se tagħlaq il-portijiet Ewropej għall-ħatt l-art u għat-trażbord* ta’ ħut iffriżat li ma jkunx ġie vverifikat li huwa legali.

Il-pajjiżi tal-UE jeħtiġilhom:

  • jaħtru awtorità kompetenti li taġixxi bħala l-punt ta’ kuntatt li jirċievi r-rapporti ta’ sorveljanza u spezzjoni, disponibbli 24 siegħa kuljum;
  • jibagħtu lill-Kummissjoni Ewropea lista tal-bastimenti kollha li jtajru l-bandiera tagħhom u rreġistrati fl-UE li huma awtorizzati li jistadu fiż-żona koperta mir-Regolament;
  • jagħmlu ħilithom biex jirkupraw, fuq bażi regolari, irkaptu tas-sajd mitluf ta’ bastimenti li jtajru l-bandiera tagħhom.

Il-kaptani tal-bastimenti jeħtiġilhom:

  • iniżżlu kull dħul u ħruġ miż-żona regolatorja*, stima tal-qabdiet kumulattivi, l-ammont ta’ ħut mormi, u l-fond tas-sajd;
  • jibagħtu rapporti dwar il-qabdiet liċ-Ċentru tagħhom tal-Monitoraġġ tas-Sajd*, li mbagħad jistgħu jiġu aċċessati mill-Kummissjoni.

Il-kaptani tal-bastimenti li jipproċessaw u/jew jiffriżaw il-qabda tagħhom jeħtiġilhom jirreġistraw l-ispeċijiet u t-tip ta’ prodott u jaħżnu l-prodotti tal-ħut fl-istiva b’mod li jippermetti li minn pjan tal-istiva miżmum abbord, tkun tista’ tiġi identifikata kull speċi. Meta jiġi ffriżat, il-ħut kollu jeħtieġlu jiġi identifikat b’tikketta jew timbru li jistgħu jinqraw b’mod ċar.

Meta aktar minn 10 bastiment tas-sajd tal-UE jkunu involuti f’attivitajiet tas-sajd* li jsiru fiż-żona regolatorja, għandu jkun hemm bastiment ta’ spezzjoni preżenti.

Kull pajjiż tal-UE jeħtieġlu jispezzjona mill-inqas 5 % tal-kwantitajiet ta’ ħut frisk li jinħatt jew li jiġi ttrażbordat u mill-inqas 7.5 % tal-ħut iffriżat fil-portijiet tiegħu matul kull sena ta’ rapportar.

Meta l-ispetturi jaqbdu bastiment tas-sajd involut f’attività kontrarja għall-miżuri ta’ konservazzjoni u ta’ mmaniġġar tan-NEAFC, huma għandhom jirreġistraw u jirrapportaw il-ksur.

Ksur serju jinkludi:

  • sajd mingħajr awtorizzazzjoni;
  • sajd mingħajr kwota;
  • l-użu ta’ rkaptu pprojbit tas-sajd;
  • nuqqasijiet fir-reġistrazzjoni tal-qabdiet tal-ħut;
  • falsifikazzjoni jew ħabi tal-marki jew tal-identità tal-bastimenti;
  • żamma ta’ spettur mit-twettiq ta’ dmirijietu.

L-ispetturi tal-pajjiżi tal-UE jeħtiġilhom jirrapportaw kull bastiment mhux awtorizzat li jirreġistraw lill-Kummissjoni.

MINN META JIBDA JAPPLIKA R-REGOLAMENT?

Dan beda japplika mill-1 ta’ Jannar 2011.

SFOND

L-Atlantiku tal-Grigal huwa waħda mill-aktar żoni tas-sajd abbundanti fid-dinja. Il-Konvenzjoni dwar il-Kooperazzjoni Multilaterali dwar is-Sajd fl-Atlantiku tal-Grigal daħlet fis-seħħ f’Novembru 1982. Il-partijiet kontraenti għall-Konvenzjoni huma l-UE, il-Gżejjer Faroe, Greenland, l-Iżlanda, in-Norveġja u l-Federazzjoni Russa, u ż-żona koperta tinfirex mill-ponta tan-Nofsinhar ta’ Greenland, lejn l-Lvant tal-Baħar ta’ Barents u lejn in-Nofsinhar tal-Portugall.

Fl-2006, il-Kummissjoni tas-Sajd tal-Atlantiku tal-Grigal (NEAFC) adottat rakkomandazzjoni li tistabbilixxi skema ta’ kontroll u infurzar fuq il-bastimenti tas-sajd li joperaw fiż-żona koperta mill-Konvenzjoni.

Hija inkludiet ukoll regoli għall-bastimenti li jtajru l-bandiera ta’ parti mhux kontraenti biex tiżgura rispett sħiħ tal-miżuri ta’ konservazzjoni u ta’ mmaniġġjar adottati min-NEAFC.

In-NEAFC irrakkomandat it-tneħħija ta’ numru ta’ bastimenti li kienu involuti f’sajd illegali, mhux irrapportat u mhux irregolat.

Regoli simili jinsabu fis-seħħ fl-ilmijiet tal-UE taħt il-politika komuni tas-sajd.

TERMINI EWLENIN

Trażbord: it-trasferiment ta’ qabda minn dgħajsa tas-sajd lejn oħra li mbagħad tinkorporaha f’lott akbar għal kunsinna.
Żona regolatorja: l-ilmijiet koperti mill-konvenzjoni li jinsabu lil hinn mill-ilmijiet taħt il-ġurisdizzjoni tas-sajd tal-partijiet kontraenti. Ara l-mappa.
Ċentru tal-Monitoraġġ tas-Sajd: ċentru operazzjonali bbażat f’pajjiż tal-UE li jista’ jirċievi, jipproċessa u jibgħat data dwar is-sajd.
Attivitajiet tas-sajd: sajd, operazzjonijiet tal-ipproċessar tal-ħut, it-trażbord jew il-ħatt tal-ħut jew ta’ prodotti tal-ħut u kull attività kummerċjali oħra bi tħejjija għas-sajd jew li għandha x’taqsam miegħu, inklużi l-imballaġġ, it-trasport, ir-riforniment tal-fjuwil jew ir-riforniment tal-provvisti.

DOKUMENTI EWLENIN

Regolament (UE) Nru 1236/2010 tal-Parlament Ewropew u tal-Kunsill tal-15 ta’ Diċembru 2010 li jistabbilixxi skema ta’ kontroll u infurzar applikabbli fiż-żona koperta mill-Konvenzjoni dwar il-Koperazzjoni Multilaterali fil-Ġejjieni dwar is-Sajd fl-Atlantiku tal-Grigal u li jħassar ir-Regolament tal-Kunsill (KE) Nru 2791/1999 (ĠU L 348, 31.12.2010, pp. 17-33)

Emendi suċċessivi għar-Regolament (UE) Nru 1236/2010 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

Konvenzjoni dwar il-Kooperazzjoni Multilaterali fil-Ġejjieni dwar is-Sajd fl-Atlantiku tal-Grigal (ĠU L 227, 12.8.1981, pp. 22-35)

DOKUMENTI RELATATI

Regolament tal-Kunsill (UE) Nru 2018/120 tat-23 ta’ Jannar 2018 li jistabbilixxi l-opportunitajiet tas-sajd għall-2018 għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tal-Unjoni, f’ċerti ilmijiet mhux tal-Unjoni, u li jemenda r-Regolament (UE) 2017/127 (ĠU L 27, 31.1.2018, pp. 1-168)

Komunikazzjoni mill-Kummissjoni lill-Parlament Ewropew, il-Kunsill, il-Kumitat Soċjali u Ekonomiku Ewropew u l-Kumitat tar-Reġjuni dwar id-Dimensjoni Esterna tal-Politika Komuni tas-Sajd (COM(2011) 424 final, 13.7.2011)

Regolament tal-Kunsill (KE) Nru 1224/2009 tal-20 ta’ Novembru 2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (ĠU L 343, 22.12.2009, pp. 1-50)

Ara l-verżjoni konsolidata.

Deċiżjoni tal-Kunsill 81/608/KEE tat-13 ta’ Lulju 1981 li tirrigwarda l-konklużjoni tal-Konvenzjoni dwar il-Koperazzjoni Multilaterali fil-Ġejjieni dwar is-Sajd fl-Atlantiku tal-Grigal (ĠU L 227, 12.8.1981, p. 21)

l-aħħar aġġornament 13.03.2018

Fuq