Ftehim ta’ kooperazzjoni bejn l-UE u l-Iżvizzera dwar il-programmi tas-Sistema Ewropea ta’ Navigazzjoni bis-Satellita

 

SOMMARJU TA’:

Ftehim ta’ kooperazzjoni bejn l-UE, l-Istati Membri tagħha u l-Iżvizzera dwar il-programmi tas-Sistema Ewropea ta’ Navigazzjoni bis-Satellita

Id-Deċiżjoni 2014/20/UE dwar l-iffirmar u l-applikazzjoni proviżorja tal-ftehim ta’ kooperazzjoni bejn l-UE, l-Istati Membri tagħha u l-Iżvizzera dwar il-programmi tas-Sistema Ewropea ta’ Navigazzjoni bis-Satellita

X’INHU L-GĦAN TAL-FTEHIM U TAD-DEĊIŻJONI?

• Il-ftehim għandu l-għan li jħeġġeġ, jiffaċilita u jsaħħaħ kooperazzjoni bejn l-Unjoni Ewropea (UE) u l-Iżvizzera fin-navigazzjoni satellitari taħt kontroll ċivili, u partikolarment billi l-Iżvizzera tieħu sehem f’programmi tas-sistema ċivili globali ta’ navigazzjoni bis-satellita(GNSS).
• Deċiżjoni 2014/20/UE tapprova l-iffirmar u l-applikazzjoni proviżorja tal-ftehim f’isem l-UE.

PUNTI EWLENIN

Prinċipji ta’ kooperazzjoni

L-UE u l-Iżvizzera jaqblu li japplikaw l-prinċipji li ġejjin għall-kooperazzjoni GNSS tagħhom:

• li jakkwistaw benefiċċju reċiproku abbażi ta’ bilanċ ta’ drittijiet u obbligi inklużi l-kontribuzzjonijiet reċiproki flimkien ma’ aċċess għas-servizzi GNSS Ewropej kollha koperti bil-ftehim u għall-programm Galileo servizz pubbliku regolat (PRS) suġġett għal ftehim separat
• opportunitajiet reċiproki għal kooperazzjoni fuq proġetti tal-UE u Żvizzeri GNSS;
• qsim ta’ informazzjoni fil-ħin li tista’ taffettwa l-kooperazzjoni;
• protezzjoni tad-drittijiet tal-proprjetà intellettwali
• libertà li jiġu pprovduti servizzi ta’ navigazzjoni satellitari fit-territorji taż-żewġ partijiet;
• negozjar fil-prodotti GNSS mingħajr restrizzjoni fit-territorji taż-żewġ partijiet.

L-ambitu tal-kooperazzjoni

Il-partijiet jaqblu li jikkooperaw fis-setturi li ġejjin:

• spettru tar-radju, protezzjoni tal-ispettru tan-navigazzjoni bir-radju minn tfixkil u interferenza, u kooperazzjoni kontinwa u appoġġ reċiproku bħala parti mill-Unjoni Internazzjonali tat-Telekomunikazzjoni (ITU);
• riċerka xjentifika u taħriġ, il-promozzjoni ta’ attivitajiet ta’ riċerka konġunta u ta’ taħriġ, u l-kontribuzzjoni għal ippjanar futur ta’ żviluppi GNSS;
• akkwist, li jsegwi impenji eżistenti bejn l-UE u l-Iżvizzera, u taħt il-Ftehim dwar l-Akkwist tal-Gvern tal-Organizzazzjoni Dinjija tal-Kummerċ (WTO);
• kooperazzjoni industrijali inklużi impriżi konġunti, parteċipazzjoni trasversali u promozzjoni ta’ applikazzjonijiet u servizzi Galileo;
• drittijiet ta’ proprjetà intellettwali, biex tiffaċilita l-kooperazzjoni industrijali u tiżgura li d-drittijiet huma protetti fl-oqsma rilevanti, konformi mal-Ftehim dwar id-Drittijiet tal-Proprjetà Intellettwali relatati man-Kummerċ (TRIPS);
• kontroll tal-esportazzjoni u non-proliferazzjoni ta’ teknoloġiji, data u punti maħsuba b’mod speċjali għal programmi GNSS Ewropej, ekwivalenti għal dawk fis-seħħ fl-UE;
• żvilupp ta’ kummerċ u suq, inkluż il-promozzjoni ta’ kummerċ u investiment fl-infrastruttura tan-navigazzjoni satellitari tal-UE u tal-Iżvizzera, pożizzjonament u tagħmir tas-sinkronizzazzjoni, u l-użu tal-forum futur tal-utent GNSS biex tidentifika u tirrispondi b’mod effettiv għal ħtiġijiet tal-utent;
• standards, ċertifikazzjoni u regolament li jenfasizzaw l-interoperabbiltà ta’ Galileo ma’ sistemi oħra GNSS u li jippromwovu l-użu innovattiv tiegħu għal skopijiet miftuħa, kummerċjali u siguri għal ħajja bħala standard dinji ta’ navigazzjoni u ta’ sinkronizzazzjoni;
• sigurtà,, inklużi sistemi ta’ protezzjoni kontra użu ħażin, interferenza, tfixkil u atti ostili biex tassikura l-kontinwità, is-sigurtà u s-sikurezza ta’ servizzi ta’ navigazzjoni satellitari, infrastruttura relatata u assi kritiċi fit-territorji tal-partijiet;
• qsim ta’ informazzjoni kkllassifikata, li tippermetti lill-Iżvizzera biex taqsam informazzjoni dwar il-programmi Ewropej GNSS ma’ dawk l-Istati Membri tal-UE li magħhom għandha ftehimiet bilaterali rilevanti, u biex tistabbilixxi qafas legali li jippermetti skambji ta’ informazzjoni kklassifikata fuq il-professjoni fit-teknoloġija tal-informazzjoni Galileo;
• aċċess għal servizzi li jagħti lill-Iżvizzera aċċess għas-servizzi kollha GNSS Ewropej koperti mill-ftehim u għas-servizz pubbliku regolat Galileo (PRS) suġġett għal ftehim separat.

Parteċipazzjoni tal-Iżvizzera

• L-Iżvizzera għandha d-dritt li tipparteċipa fl-Aġenzija Ewropea GNSS, li mill-2021, bdiet tissejjaħ l-Aġenzija tal-Unjoni Ewropea għall-Programm Spazjali (EUSPA).
• Rappreżentanti Żvizzeri jistgħu jipparteċipaw bħala osservaturi f’kumitajiet imwaqqfa biex jiġġestjonaw il-programmi Ewropej GNSS, inkluż il-Kumitat tal-Programm GNSS u l-Bord tas-Sigurtà GNSS u l-gruppi ta’ ħidma u t-task forces tagħhom.

Kumitat konġunt u finanzjament

• Il-Kumitat GNSS tal-UE/Żvizzera jikkonsisti f’rappreżentanti tal-partijiet. Dan hu responsabbli għal ġestjoni tal-ftehim, biex jagħmel rakkomandazzjonijiet u jilħaq deċiżjonijiet bi ftehim komuni.
• L-Iżvizzera tikkontribwixxi għall-programm Ewropew GNSS ibbażat proporzjonalment fuq il-prodott domestiku gross tal-pajjiż relattiv għal dawk tal-Istati Membri.

DATA TAD-DĦUL FIS-SEĦĦ

Il-ftehim applika b’mod proviżorju mill-1 ta’ Jannar 2014.

SFOND

Għal aktar informazzjoni, ara:

• X’inhu GNSS? (Il-Programm Spazjali tal-Aġenzija tal-Unjoni Ewropea)
• Galileo hu s-sistema globali Ewropea ta’ Navigazzjoni bis-Satellita (Programm Spazjali tal-Aġenzija tal-Unjoni Ewropea)
• Il-Programm spazjali tal-Unjoni(Il-Programm Spazjali tal-Aġenzija tal-Unjoni Ewropea)
• Galileo (Aġenzija Spazjali Ewropea)
• Il-futur tal-pożizzjonament, navigazzjoni u sinkronizzazzjoni (Aġenzija Spazjali Ewropea).

DOKUMENTI PRINĊIPALI

Ftehim ta’ Kooperazzjoni bejn l-Unjoni Ewropea u l-Istati Membri tagħha, fuq in-naħa waħda, u l-Kondeferazzjoni Żvizzera, fuq in-naħa l-oħra, fuq il-Programmi Ewropej tan-Navigazzjoni Satellitari (ĠU L 15, 20.1.2014, pp. 3–17).

Id-Deċiżjoni tal-Kunsill 2014/20/UE tat-23 Settembru 2013 dwar l-iffirmar, f’isem l-Unjoni, u l-applikazzjoni proviżorja tal-Ftehim ta’ Kooperazzjoni bejn l-Unjoni Ewropea u l-Istati Membri tagħha, minn naħa waħda, u l-Konfederazzjoni Svizzera, min-naħa l-oħra, dwar il-Programmi Ewropej tan-Navigazzjoni bis-Satellita (ĠU L 15, 20.1.2014, pp. 1–2).

DOKUMENTI RELATATI

Ir-Regolament (UE) 2021/696 tal-Parlament Ewropew u tal-Kunsill tat-28 ta’ April 2021 li jistabbilixxi l-Programm Spazjali tal-Unjoni u l-Aġenzija tal-Unjoni Ewropea għall-Programm Spazjali u li jħassar ir-Regolamenti (UE) Nru 912/2010, (UE) Nru 1285/2013 u, (UE) Nru 377/2014 u d-Deċiżjoni Nru 541/2014/UE (ĠU L 170, 12.5.2021, pp. 69–148).

Informazzjoni dwar id-data tal-iffirmar tal-Ftehim ta’ kooperazzjoni bejn l-Unjoni Ewropea u l-Istati Membri tagħha, fuq in-naħa waħda, u l-Konfederazzjoni Żvizzera, fuq in-naħa l-oħra, dwar il-prgrammi Ewropej ta’ Navigazzjoni bis-Satellita (ĠU L 101, 4.4.2014, p. 1).

l-aħħar aġġornament 02.06.2023