Investiment fit-tfal: niksru ċ-ċiklu tal-iżvantaġġ

 

SOMMARJU TA’:

L-Artikolu 3 tat-Trattat dwar l-Unjoni Ewropea (TUE)

L-Artikolu 153 tat-Trattat dwar il-Funzjonament tal-Unjoni Ewropea (TFUE)

Ir-Rakkomandazzjoni 2013/112/UE dwar l-investiment fit-tfal

X’INHUMA L-GĦANIJIET TAR-RAKKOMANDAZZJONI, TAL-ARTIKOLU 3 (TUE) U TAL-ARTIKOLU 153 (TFUE)?

Bħala parti mill-pakkett ta’ investiment soċjali għat-tkabbir u l-koeżjoni (SIP) tagħha, il-Kummissjoni Ewropea adottat rakkomandazzjoni dwar investiment soċjali favur it-tfal. L-għan tagħha huwa li tipprovdi lill-pajjiżi tal-UE gwida kif dwar għandhom jindirizzaw il-faqar fost it-tfal u jippromwovu l-benessri tat-tfal, kif ukoll biex isibu modi komuni ta’ kif għandhom jindirizzaw dawn l-isfidi.

L-Artikolu 3 tat-TUE jsemmi b’mod speċifiku l-ħarsien tad-drittijiet tat-tfal bħala wieħed mill-għanijiet u l-valuri tal-UE.

L-Artikolu 153 tat-TFUE jelenka l-oqsma tal-politika soċjali li fihom l-UE tappoġġja u tikkomplementa l-attivitajiet proprji tal-pajjiżi tal-UE. Dawn l-oqsma jinkludu l-ġlieda kontra l-esklużjoni soċjali.

PUNTI EWLENIN

Ir-rakkomandazzjoni titlob li jittieħed approċċ favur id-drittijiet tat-tfal u li jiġu stabbiliti strateġiji integrati bbażati fuq 3 pilastri.

• 1.
  L-aċċess għal riżorsi xierqa biex jitnaqqsu l-faqar monetarju u l-privazzjoni materjali billi:

  • tiġi appoġġjata l-parteċipazzjoni tal-ġenituri fis-suq tax-xogħol u jiġi żgurat li x-xogħol tagħhom jagħti “frott tajjeb”;
  • jiġu previsti standards tal-għajxien xierqa permezz ta’ taħlita ta’ benefiċċji tat-tfal u tal-familja, li għandhom jitqassmu mill-ġdid fost il-faxex kollha ta’ dħul iżda jiġu evitati n-nases tal-inattività u l-istigmatizzazzjoni.
• 2.
  L-aċċess għal servizzi ta’ kwalità affordabbli biex jiżdiedu l-opportunitajiet tal-ħajja tat-tfal u jittejjeb l-iżvilupp tagħhom billi:

  • jittejjeb l-aċċess għal servizzi affordabbli ta’ indukrar u edukazzjoni fl-ewwel snin tat-tfulija bil-għan li titnaqqas l-inugwaljanza f’età żgħira;
  • jittejjeb l-impatt tas-sistemi edukattivi fuq l-opportunitajiet indaqs billi jiġi żgurat li t-tfal kollha jirċievu edukazzjoni inklużiva ta’ kwalità għolja;
  • tittejjeb ir-responsività tas-sistemi tas-saħħa biex jiġu indirizzati l-ħtiġijiet tat-tfal żvantaġġjati;
  • it-tfal jingħataw akkomodazzjoni u ambjent ta’ għajxien sikuri u xierqa;
  • jittejjeb l-appoġġ familjari u l-kwalità ta’ strutturi ta’ kura alternattivi.
• 3.
  Id-dritt tat-tfal li jipparteċipaw billi:

  • tiġi appoġġjata l-parteċipazzjoni tat-tfal kollha fil-logħob, fir-rikreazzjoni, u f’attivitajiet sportivi u kulturali — opportunitajiet ta’ tagħlim informali barra mill-kuntest tal-iskola;
  • jiġu implimentati mekkaniżmi li jippromwovu l-parteċipazzjoni tat-tfal fit-teħid ta’ deċiżjonijiet li jaffettwawlhom ħajjithom.

Barra minn hekk, il-Kummissjoni titlob li jiġu żviluppati arranġamenti ta’ governanza, implimentazzjoni u monitoraġġ billi:

• jissaħħu s-sinerġiji bejn is-setturi;
• jittejjeb l-użu ta’ żvilupp tal-politika bbażat fuq evidenza u l-innovazzjoni tal-politika soċjali.

Fl-aħħar, ir-rakkomandazzjoni tenfasizza li jeħtieġ li jsir użu sħiħ mill-istrumenti rilevanti tal-UE billi:

• tiġi mmobilizzata l-firxa ta’ għodod u indikaturi disponibbli fi ħdan l-istrateġija Ewropa 2020 biex jingħata impetu ġdid għall-isforzi konġunti biex jiġu indirizzati l-faqar fost it-tfal u l-esklużjoni soċjali; u
• jsir użu xieraq mill-opportunitajiet ipprovduti mill-istrumenti finanzjarji tal-UE biex jiġu appoġġjati l-prijoritajiet ta’ politika deskritti hawn fuq.

SFOND

Għal aktar informazzjoni, ara:

• L-investiment fit-tfal (Il-Kummissjoni Ewropea).

DOKUMENTI EWLENIN

Verżjoni konsolidata tat-Trattat dwar l-Unjoni Ewropea — Titolu I — Dispożizzjonijiet komuni — Artikolu 3 (ex Artikolu 2 TUE) (ĠU C 202, 7.6.2016, p. 17)

Verżjoni konsolidata tat-Trattat dwar il-Funzjonament tal-Unjoni Ewropea — It-Tielet Parti — Politika u Azzjonijiet interni tal-Unjoni — Titolu X — Politika Soċjali — Artikolu 153 (ex Artikolu 137 TKE) (ĠU C 202, 7.6.2016, pp. 114-116)

Ir-Rakkomandazzjoni tal-Kunsill 2013/112/UE tal-20 ta’ Frar 2013: L-investiment fit-tfal: niksru ċ-ċiklu tal-iżvantaġġ (ĠU L 59, 2.3.2013, pp. 5-16)

DOKUMENTI RELATATI

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Lejn Investiment Soċjali għat-Tkabbir u l-Koeżjoni — inkluża l-implimentazzjoni tal-Fond Soċjali Ewropew 2014–2020 (COM(2013) 83 final, 20.2.2013)

Il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Aġenda tal-UE dwar id-Drittijiet tat-Tfal (COM(2011) 60 final, 15.2.2011)

EWROPA 2020 — Strateġija għal tkabbir intelliġenti, sostenibbli u inklussiv (COM(2010) 2020 final, 3.3.2010)

l-aħħar aġġornament 17.05.2019