EUR-Lex Access to European Union law
This document is an excerpt from the EUR-Lex website
Fond ta’ Koeżjoni (2014-2020)
Dan ir-Regolament jistabbilixxi l-objettivi għall-Fond ta’ Koeżjoni tal-UE għall-perjodu ta' finanzjament 2014-2020. Il-Fond huwa wieħed mill-istrumenti finanzjarji tal-UE li jimmira li jnaqqas id-diskrepanzi fl-iżvilupp bejn ir-reġjuni.
ATT
Regolament (UE) Nru 1300/2013 tal-Parlament Ewropew u tal-Kunsill dwar il-Fond ta’ Koeżjoni u li jħassar ir-Regolament tal-Kunsill (KE) Nru 1084/2006.
SOMMARJU
Il-Fond ta’ Koeżjoni jipprovdi appoġġ għar-reġjuni ifqar tal-UE bil-għan li jippromwovi t-tkabbir, l-impjiegi u l-iżvilupp sostenibbli. L-Istati Membri bi Dħul Nazzjonali Gross (GNI) għal kull abitant inqas minn 90% tal-medja tal-UE huma eleġibbli għal finanzjament mill-Fond ta’ Koeżjoni. L-ogħla limitu għall-kontribuzzjoni tal-Fond ta' Koeżjoni għall-infiq pubbliku fl-Istati Membri hija stabbilita għal 85%.
Oqsma ta' attività
Il-Fond ta’ Koeżjoni jikkofinanzja azzjoni sabiex:
— |
jiġu żviluppati netwerks tat-trasport trans-Ewropej;
|
— |
isir approfondiment tal-objettivi ambjentali tal-UE, jiġifieri l-promozzjoni ta' effiċjenza fl-użu tal-enerġija u enerġija rinnovabbli u appoġġ għal proġetti tat-trasport sostenibbli li ma jiffurmawx parti min-netwerks tat-trasport trans-Ewropej;
|
— |
tipprovdi assistenza teknika.
|
Prijoritajiet ta' investiment jinkludu proġetti li jippromwovu:
— |
ekonomija b'ammont baxx ta' karbonju;
|
— |
adattament għat-tibdil fil-klima, prevenzjoni u ġestjoni tar-riskji;
|
— |
protezzjoni ambjentali/konservazzjoni ambjentali;
|
— |
trasport sostenibbli u t-tneħħija ta' intoppi.
|
Fil-perjodu ta' finanzjament 2014-2020 sejjer ikun hemm disponibbli total ta' EUR 10 biljun sabiex jiġu kofinanzjati proġetti ta' infrastruttura tat-trasport ta' valur miżjud Ewropew imsemmijin fir-Regolament dwar il-Faċilità ta' Konnessjoni tal-Ewropa (Nru 1316/2013).
Infiq eleġibbli
L-eleġibilità tiġi deċiża fuq livell nazzjonali. Madankollu, it-tipi ta' nfiq li ġejjin mhumiex eleġibbli għall-finanzjament tal-Fond ta’ Koeżjoni:
— |
it-tħaddim għall-ewwel darba jew il-bini ta' stazzjonijiet ta' enerġija nukleari;
|
— |
l-investiment sabiex jintlaħaq tnaqqis ta' emissjonijiet ta' gassijiet serra minn attivitajiet koperti mill-Iskema ta' Kummerċjalizzazzjoni tal-Emissjonijiet (ETS);
|
— |
akkomodazzjoni (għajr għal effiċjenza fl-użu tal-enerġija jew użu ta' enerġija rinnovabbli);
|
— |
il-manifattura, l-ipproċessar u l-kummerċjalizzazzjoni tat-tabakk;
|
— |
għajnuna biex jiġu megħjunin kumpaniji f'diffikultà;
|
— |
investiment fl-infrastruttura ta' ajruporti (sakemm ma jkunx relatat mal-protezzjoni ambjentali jew akkumpanjat minn miżuri li jtaffu l-impatt ambjentali negattiv).
|
Ir-Regolament għandu jiġi rivedut sal-31 ta' Diċembru 2020.
REFERENZI
Att |
Dħul fis-seħħ |
Skadenza għat-traspożizzjoni fl-Istati Membri |
Il-Ġurnal Uffiċjali |
Ir-Regolament (KE) Nru 1300/2013 |
21.12.2013 |
- |
ĠU L 347 tal-20.12.2013 |
ATTI RELATATI
Deċiżjoni ta’ Implimentazzjoni tal-Kummissjoni 2014/99/UE li tistabbilixxi l-lista ta’ reġjuni eliġibbli għal finanzjament mill-Fond Ewropew għall-Iżvilupp Reġjonali u l-Fond Soċjali Ewropew u ta’ Stati Membri eliġibbli għall-finanzjament mill-Fond ta’ Koeżjoni għall-perjodu 2014-2020. [ĠU L 50 tal-20.2.2014].
Ir-Regolament (UE) Nru 1303/2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament (KE) Nru 1083/2006.
L-aħħar aġġornament: 17.04.2014