Miżuri ta’ nonproliferazzjoni tal-missili ballistiċi

L-att jappoġġa l-azzjoni internazzjonali kontra l-proliferazzjoni tal-missili ballistiċi.

ATT

Deċiżjoni tal-Kunsill 2014/913/PESK tal-15 ta’ Diċembru 2014 b’appoġġ għall-Kodiċi ta’ Kondotta tal-Aja u n-nonproliferazzjoni tal-missili ballistiċi fil-qafas tal-implimentazzjoni tal-Istrateġija tal-UE kontra l-Proliferazzjoni tal-Armi ta’ Qerda Massiva.

SOMMARJU

L-att jappoġġa l-azzjoni internazzjonali kontra l-proliferazzjoni tal-missili ballistiċi.

X’TAGĦMEL ID-DEĊIŻJONI?

Din tipprovdi appoġġ tal-UE:

• b'mod speċifiku għall-Kodiċi ta’ Kondotta tal-Aja (HCoC) u s-Sistema ta’ Kontroll tat-Teknoloġija tal-Missili (MTCR);
• b’mod ġenerali sabiex tippromwovi n-nonproliferazzjoni mad-dinja kollha.

Id-deċiżjoni timplimenta miżuri fl-Istrateġija tal-UE kontra l-Proliferazzjoni tal-Armi ta’ Qerda Massiva tal-UE, li għandha l-għan li tindirizza l-proliferazzjoni tal-AQM billi taħdem flimkien ma’ organizzazzjonijiet internazzjonali u pajjiżi ewlenin.

PUNTI EWLENIN

Id-deċiżjoni tipprovdi EUR 990 000 bħala finanzjament għall-proġetti mill-Fondazzjoni għar-Riċerka Strateġika sabiex:

• tissensibilizza dwar it-theddida tal-proliferazzjoni
• iżżid il-kapaċità tal-organizzazzjonijiet internazzjonali li jindirizzaw din it-theddida;
• tħeġġeġ lill-pajjiżi kollha b’kapaċitajiet ta’ missili ballistiċi sabiex jissottoskrivu għall-Kodiċi tal-Aja;
• tappoġġa l-implimentazzjoni tal-Kodiċi u tippromwovi l-aderenza għal-linji gwida tal-MTCR.

Speċifikament, il-proġetti se jipproduċu jew jorganizzaw:

• attivitajiet ta’ sensibilizzazzjoni:
  • erba’ seminars fil-marġini tal-laqgħat tal-Kodiċi tal-Aja u avvenimenti rilevanti tan-NU;
  • seminars fi tliet reġjuni ewlenin, speċjalment fil-Lvant Nofsani, fl-Asja tal-Grigal u fl-Asja tax-Xlokk;
  • missjonijiet ta’ esperti f’10 pajjiżi ewlenin, immirati lejn l-industrija, xjentisti, esperti tal-kontroll tal-esportazzjoni, il-militar.
• materjal promozzjonali għall-Kodiċi tal-Aja (1 000 ktejjeb, 1 500 fuljett, websajt).
• erba’ dokumenti esperti (pereżempju li jeżaminaw il-miżuri tal-bini ta’ fiduċja, il-kontrolli fuq l-esportazzjonijiet, it-trasferiment tal-għarfien).

SFOND

• MTCR - assoċjazzjoni volontarja ta’ pajjiżi bl-għan li tiġi ristretta l-proliferazzjoni ta’ sistemi li kapaċi jġorru AQM.
• Kodiċi tal-Aja - regoli ta’ kondotta għal missili ballistiċi, eż. rekwiżiti għal pajjiżi ssottoskritti li jiddikjaraw il-politiki tal-missili ballistiċi tagħhom u li joħorġu notifiki qabel l-ittestjar.

l-aħħar aġġornament 20.08.2015