RAPPORT TAL-KUMMISSJONI LILL-PARLAMENT EWROPEW U LILL-KUNSILL

Mediċini Aħjar għat-Tfal — Mill-Kunċett għar-Realtà

Rapport ġenerali dwar l-esperjenza miksuba b'riżultat tal-applikazzjoni tar-Regolament (KE) Nru 1901/2006 dwar prodotti mediċinali għal użu pedjatriku

(Test b'rilevanza għaż-ŻEE)

1.           Introduzzjoni

“Mediċini Aħjar għat-Tfal” kien it-titolu ambizzjuż ta’ dokument ta’ konsultazzjoni ta’ Frar 2002, li fih il-Kummissjoni Ewropea ppreżentat il-viżjoni tagħha għal azzjonijiet regolatorji dwar mediċina għall-użu pedjatriku[1]. F’dak iż-żmien, ħafna mill-prodotti użati għat-tfal ma kinux speċifikament studjati jew awtorizzati għat-tfal. Minflok, it-tobba ta' spiss użaw prodotti awtorizzati għall-adulti, xi kultant b’dożi differenti, bir-riskji assoċjati ta' effikaċja u/jew reazzjonijiet avversi.

Id-dokument ta’ konsultazzjoni bena fuq proċess ta’ diskussjoni ta’ ħames snin li beda fl-1997 b'laqgħa dwar mejda tonda fil-bini tal-Aġenzija Ewropea għall-Mediċini (EMA) u sar il-bażi għall-att leġiżlattiv sussegwenti. Id-dokument ippreżenta bosta mill-miżuri li jinsabu fir-Regolament Pedjatriku (ir-Regolament (KE) Nru 1901/2006 tal-Parlament Ewropew u tal-Kunsill dwar prodotti mediċinali għall-użu pedjatriku[2], minn hawn’ il quddiem “ir-Regolament”).

Ir-Regolament ġie adottat madwar ħames snin wara d-dokument ta' konsultazzjoni, fit-12 ta’ Diċembru 2006. Daħal fis-seħħ fis-26 ta’ Jannar 2007 u d-dispożizzjonijiet ewlenin tiegħu kienu applikabbli mis-26 ta’ Lulju 2008 (l-Artikolu 7) u s-26 ta’ Jannar 2009 (l-Artikolu 8), rispettivament.

Ħames snin wara, wasal iż-żmien biex jitqiesu l-iżviluppi u jingħata rapport lill-Parlament Ewropew u lill-Kunsill dwar l-esperjenza miksuba b'riżultat tar-Regolament, skont l-Artikolu 50(2) tiegħu. Effettivament, qegħdin diġà naraw l-emerġenza ta' “mediċini aħjar għat-tfal” ?

Dan ir-rapport għadu ma jipprovdix tweġiba komprensiva, minħabba li huwa soġġett għal ċerti limitazzjonijiet; għalhekk għandu jitqies bħala rapport interim li jippreżenta l-ewwel impressjoni tal-esperjenza miksuba. Minħabba ċ-ċikli tal-iżvilupp tal-prodotti mediċinali, se ndumu mill-inqas għaxar snin biex niksbu fehim sħiħ tal-impatt tal-leġiżlazzjoni. Dan il-fattur diġà tniżżel f’leġiżlazzjoni li titlob lill-Kummissjoni li fl-2017 tipprovdi rapport ieħor aktar komprensiv, li, skont l-Artikolu 50(3) tar-Regolament, għandu jinkludi analiżi tal-impatt ekonomiku tal-gwadanji u l-inċentivi, flimkien ma’ analiżi tal-implikazzjonijiet tar-Regolament għas-saħħa pubblika, bil-ħsieb li jiġu proposti l-emendi li jkunu meħtieġa. Madankollu f’dan l-istadju jistgħu jsiru xi analiżi u konklużjonijiet interim.

Dan id-dokument tħejja b’konsultazzjoni mal-Istati Membri, l-EMA u partijiet interessati. Il-Kummissjoni b’mod partikolari tħaddan “Ir-Rapport ta’ Ħames (5) snin lill-Kummissjoni Ewropea" li jippreżenta l-fehmiet tal-EMA u l-Kumitat Pedjatriku tagħha[3], u t-tweġibiet għall-konsultazzjoni pubblika li l-Kummissjoni wettqet fi tmiem l-2012[4].

2.           Il-Kumitat Pedjatriku

Fl-2010 madwar 21 % mill-Ewropej kienu tfal, li rrappreżentaw iktar minn 100 miljun persuna. It-tfal jirrappreżentaw grupp vulnerabbli tal-popolazzjoni, differenti mill-adulti fl-aspetti relatati mal-iżvilupp, il-fiżjoloġija u l-psikoloġija. Dawn mhumiex biss "adulti żgħar". Ir-riċerka marbuta mal-età u mal-iżvilupp, u d-disponibbiltà ta’ prodotti mediċinali adattati, għaldaqstant hija partikolarment importanti.

Studji mwettqa qabel ma ġie adottat ir-Regolament urew li aktar minn 50 % tal-mediċini li jintużaw għat-tfal ma kinux ittestjati għall-użu f’dan il-grupp ta’ età speċifiku. Barra minn hekk, hemm biss numru limitat ta' prodotti mediċinali li ġew żviluppati speċifikament għat-tfal. Xi kumpaniji diġa kienu żviluppaw firxa ta' prodotti kontra għadd ta' mardiet qabel ir-Regolament Pedjatriku, partikolarment fis-setturi bħall-immunizzazzjoni għat-tfal permezz tat- tilqim. Madankollu, id-disponibbiltà ta’ mediċini adattati għat-tfal kienet ġeneralment mhux sodisfaċenti. Għaldaqstant, ir-Regolament kien ikkunsidrat bħala tweġiba għan-nuqqas ta’ għadd suffiċjenti ta’ prodotti mediċinali awtorizzati, b’dożaġġi u forom farmaċewtiċi xierqa, biex jittrattaw il-kundizzjonijiet ta' mard fit-tfal fl-Unjoni Ewropea (UE).

Hemm diversi raġunijiet għal dan in-nuqqas ta’ mediċina pedjatrika. Madankollu, huwa simpliċistiku wisq li wieħed iqiegħed il-ħtija fuq il-kumpaniji farmaċewtiċi għax ma wettqux biżżejjed riċerka u żvilupp (R&D) biex jadattaw il-prodotti mediċinali għall-ħtiġijiet tal-popolazzjoni pedjatrika. Din l-eżitazzjoni fir-rigward ta' riċerka bħal din ilha għal ħafna żmien tirrifletti l-mudell etiku ġenerali mifrux fis-soċjetà li t-tfal ikunu protetti mir-riċerka klinika. Huwa biss fl-aħħar żewġ deċennji li kien hemm bidla lejn il-konsensus kurrenti li t-tfal jiġu protetti iktar permezz ta’ riċerka klinika.

Il-fatturi ekonomiċi ċertament għamlu ir-riċerka u l-iżvilupp pedjatriku inqas attraenti f’termini ta' redditu adegwat fuq l-investiment. It-tfal mhumiex sottogrupp omoġenju — is-subpopolazzjonijiet ivarjaw minn trabi tat-twelid għall-adolexxenti, b’karatteristiċi bijoloġiċi u farmakoloġiċi differenti. Riċerka adattata għall-età tagħmel il-proċess iktar għali u kumpless għall-organizzazzjonijiet li huma attivi f’dan is-settur.

Madankollu, in-nuqqas ta’ prodotti speċifikament ittestjati ta' spiss ħallew il-professjonisti tal-kura tas-saħħa b’ebda alternattiva ħlief li jużaw prodotti “bla tikketta”, li jista' jkollhom riskji mhux negliġibbli ta' ineffiċjenza jew ta’ reazzjonijiet avversi. Sitwazzjoni bħal din kienet tmur kontra l-għan ġenerali li jiġu pprovduti prodotti mediċinali ta’ kwalità għolja lill-popolazzjoni kollha tal-UE.

Sabiex tiġi indirizzata din il-problema, ir-Regolament jistabbilixxi sistema ta’ obbligi, ta' gwadanji u ta' inċentivi, flimkien ma’ miżuri orizzontali biex jiżgura li l-mediċini huma regolarment riċerkati, żviluppati u awtorizzati biex jissodisfaw il-bżonnijiet terapewtiċi tat-tfal. Minbarra r-Regolament dwar il-prodotti mediċinali orfni[5], li huwa llimitat għall-provvista ta’ diversi inċentivi, ir-Regolament Pedjatriku għandu impatt dirett fuq l-infiq tal-kumpaniji għar-Riċerka u l-Iżvilupp. Filwaqt li ma jmerix li l-iżvilupp mediċinali huwa xprunat mill-kumpaniji, ir-Regolament iħajjar lill-kumpaniji jikkunsidraw il-potenzjal tal-użu pedjatriku tal-prodotti mediċinali li jiżviluppaw.

L-għanijiet ta’ dan ir-Regolament huma:

· li jiggarantixxi r-riċerka ta' kwalità għolja fl-iżvilupp ta' mediċini għat-tfal;

· li jiżgura, maż-żmien, li l-maġġoranza tal-mediċini użati mit-tfal ikunu speċifikament awtorizzati għat-tali użu f'forom u formulazzjonijiet xierqa;

· li jiżgura d-disponibbiltà tal-informazzjoni ta' kwalità għolja dwar l-użu tal-prodotti mediċinali mit-tfal.

Il-miżuri ewlenin inklużi fir-Regolament huma:

· it-twaqqif ta’ kumitat ta’ esperti fi ħdan l-EMA: il-Kumitat Pedjatriku;

· l-obbligu li l-kumpaniji jissottomettu dejta dwar l-użu ta’ mediċina għat-tfal skont pjan miftiehem ta’ investigazzjoni pedjatrika meta japplikaw għal awtorizzazzjoni ta’ kummerċjalizzazzjoni għal mediċini u estensjonijiet ta' linji għal mediċini eżistenti li huma mħarsa permezz ta' privattiva;

· sistema ta’ derogi mir-rekwiżit għal mediċini li t-tfal mhux probabbli li se jibbenefikaw minnhom u sistema ta’ diferimenti marbuta maż-żmien magħżul għar-rekwiżit, sabiex ikun żgurat li l-mediċini jiġu ttestjati fuq it-tfal biss meta jkun sikur li jsir dan, u sabiex jiġi evitat li r-rekwiżiti jdewmu l-awtorizzazzjoni ta’ mediċini għall-adulti;

· kumpens għal konformità mar-rekwiżit fil-forma ta’ estensjoni ta’ sitt xhur għaċ-Ċertifikat ta’ Protezzjoni Supplimentari;

· kumpens, fir-rigward ta’ mediċini orfni, għall-konformità, fil-forma ta’ żieda ta’ sentejn ta' esklussività tas-suq miżjuda mal-għaxar snin eżistenti mogħtija skont ir-Regolament dwar il-Mediċini Orfni tal-UE;

· tip ġdid ta’ awtorizzazzjoni ta' kummerċjalizzazzjoni, l-Awtorizzazzjoni tal-Kummerċjalizzazzjoni għall-Użu Pedjatriku (PUMA), biex tattira indikazzjonijiet pedjatriċi ġodda għal prodotti li mhumiex imħarsa minn privattiva;

· miżuri li jimmassimizzaw l-impatt ta’ studji eżistenti dwar il-mediċini għat-tfal;

· inventarju tal-UE tal-bżonnijiet terapewtiċi tat-tfal biex jagħti attenzjoni lir-riċerka, l-iżvilupp u l-awtorizzazzjoni tal-mediċini;

· netwerk tal-UE ta’ investigaturi u ċentri ta’ prova biex iwettqu r-riċerka u l-iżvilupp meħtieġa;

· sistema ta’ parir xjentifiku b’xejn għall-industrija, ipprovduta mill-EMEA;

· bażi ta' dejta pubblika ta’ studji pedjatriċi;

· dispożizzjoni dwar il-finanzjament tal-UE biex ir-riċerka tistimula l-iżvilupp u l-awtorizzazzjoni ta’ mediċini għat-tfal li mhumiex protetti bi privattiva.

Ir-Regolament jagħti lill-EMA u lill-Kumitat Pedjatriku tagħha r-responsabbiltà primarja li jittrattaw pjanijiet ta’ investigazzjoni pedjatrika, id-differimenti u d-derogi. Dan jipprovdi lill-Aġenzija b'setgħat konkreti ta’ teħid ta’ deċiżjoni.

L-ispejjeż operattivi tar-Regolament Pedjatriku huma parzjalment koperti b’kontribuzzjoni mill-baġit tal-UE (ara t-Tabella 8), billi l-attivitajiet prinċipali tagħha ma jattiraw l-ebda tariffa. Għall-perjodu mill-2007 sal-2012, il-kontribuzzjoni tal-baġit tal-UE kienet tammonta għal aktar minn EUR 39 miljun. Barra minn hekk, l-awtoritajiet nazzjonali kompetenti tal-Istati Membri jikkontribwixxu riżorsi in natura, speċjalment il-ħin tal-persunal għall-valutazzjoni tal-pjanijiet ta' investigazzjoni pedjatrika (ara t-Tabella 12).

3.           Il-kisbiet ewlenin fl-Implimentazzjoni ta’ dan ir-Regolament

Biex jiġi implimentat b’suċċess ir-Regolament Pedjatriku, kien meħtieġ li jiġu adottati miżuri kumplimentari u azzjoni supplimentari kif stipulat fil-leġiżlazzjoni.

L-Aġenzija implimentat ir-Regolament f'waqtu. Il-Kumitat Pedjatriku b'hekk kien stabbilit u kellu l-ewwel laqgħa tiegħu fl-1 u t-2 ta’ Lulju 2007, u ltaqa' kull xahar minn dakinhar. Il-linji gwida tal-Kummissjoni dwar il-format u l-kontenut tal-applikazzjonijiet għal pjan ta’ investigazzjoni pedjatrika (Artikolu 10) ġiet ippubblikata f’Settembru 2008[6]. L-Aġenzija stabbiliet il-proċeduri meħtieġa u bażi tad-dejta għall-evalwazzjoni xjentifika ta’ pjanijiet ta’ investigazzjoni pedjatrika u għall-adozzjoni ta’ deċiżjonijiet skont ir-Regolament.

In-Netwerk Ewropew għar-Riċerka Pedjatrika tal-EMA (Enpr-EMA) twaqqaf wara li l-Bord tat-Tmexxija tal-EMA adotta l-istrateġija tal-implimentazzjoni fl-2008, tnieda fl-2009 u ilu jiltaqa’ regolarment sa mill-2010 (Artikolu 44).

Ir-riżultati tal-istħarriġ dwar l-użi eżistenti kollha ta’ prodotti mediċinali fil-popolazzjoni pedjatrika tal-UE ġew ippubblikati f’Diċembru 2010[7] (l-Artikolu 42) u ntużaw bħala bażi għall-inventarju tal-ħtiġijiet terapewtiċi (Artikolu 43).

F’Marzu 2011, il-Bażi ta' Dejta tal-Unjoni Ewropea dwar Provi Kliniċi (EudraCT) ġiet immodifikata u saret pubblikament aċċessibbli permezz tal-websajt pubbliku "clinicaltrialregister.eu", għal informazzjoni marbuta mal-protokoll tal-provi pedjatriċi inklużi fi pjanijiet ta’ investigazzjoni pedjatrika jew sottomessi skont l-Artikolu 46. Informazzjoni dwar ir-riżultati għandhom ikunu disponibbli sa tmiem l-2013. Għal dan l-għan, fl-2009, il-Kummissjoni ppubblikat gwida dwar l-informazzjoni li tikkonċerna l-provi kliniċi pedjatriċi li jridu jiddaħħlu fl-EudraCT u dwar l-informazzjoni li għandha tkun ippubblikata mill-EMA[8]. Fl-2012 u l-2013, segwew aktar speċifikazzjonijiet dwar il-preżentazzjoni u l-pubblikazzjoni ta’ informazzjoni marbuta mar-riżultati[9] u l-format ta’ kaxex tad-dejta[10] (Artikolu 41). Suġġett għal avviż ta’ konferma mill-Aġenzija, l-isponsers tal-prova klinika għandhom jippreżentaw ir-riżultati kollha tal-provi pedjatriċi lill-Aġenzija mingħajr dewmien, irrispettivament jekk dawn sarux ġewwa jew barra l-UE, bl-iskop li jkunu ppubblikati fil-websajt “clinicaltrialregister.eu”[11].

Ir-Regolament tal-Kummissjoni (KE) Nru 658/2007[12] ġie emendat fl-2012[13] (l-Artikolu 49) biex il-Kummissjoni titħalla timponi penali finanzjarji għall-ksur tar-Regolament Pedjatriku.

F’dak li għandu x’jaqsam mat-tikkettar tal-prodotti mediċinali b’indikazzjoni pedjatrika b’simbolu (l-Artikolu 32), il-Kumitat Pedjatriku ta parir lill-Kummissjoni kontra l-użu tiegħu billi t-tifsira preċiża ta’ simbolu tista’ tinftiehem ħażin mill-ġenituri jew min jieħu ħsieb it-tfal. Din hija r-raġuni għaliex il-Kummissjoni infurmat lill-partijiet interessati fl-2008 li mhijiex f’pożizzjoni li tagħżel simbolu.

Meta l-prodotti mediċinali eżistenti jiġu awtorizzati għal indikazzjoni pedjatrika ġdida skont ir-rekwiżiti tar-Regolament, id-detentur tal-awtorizzazzjoni għat-tqegħid fis-suq għandu jqiegħed il-prodott ma’ din l-indikazzjoni pedjatrika l-ġdida fis-suq fi żmien sentejn. Għal dan l-għan, fl-2013 l-Aġenzija stabbiliet reġistru[14] tal-iskadenzi applikabbli (l-Artikolu 33).

Ir-Regolament Pedjatriku sfortunatament għadu ma ġiex inkorporat fil-Ftehim dwar iż-Żona Ekonomika Ewropea billi l-UE u t-tliet Stati taż-ŻEE-EFTA — l-Iżlanda, il-Liechtenstein u n-Norveġja — ma setgħux jaqblu fuq t-termini xierqa ta’ adattament, speċjalment fir-rigward tal-Artikolu 49(3) tar-Regolament.

4.           Il-kisbiet ewlenin

4.1.        Riċerka aħjar u aktar sikura

Qabel ma r-Regolament Pedjatriku daħal fis-seħħ, bosta kumpaniji farmaċewtiċi qiesu l-popolazzjoni adulta bħala s-suq ewlieni tagħhom. Ir-riċerka dwar l-użu potenzjali ta’ mediċini għall-adulti għall-popolazzjoni pedjatrika kienet tiġi ta’ spiss mwarrba jew mhix ikkunsidrata għal kollox. Is-sitwazzjoni nbidlet permezz tal-obbligi li ġew introdotti mir-Regolament, li jġiegħlu lill-kumpaniji li jiskrinjaw kull prodott ġdid (għall-adulti) għall-potenzjal tal-użu pedjatriku tiegħu. Ir-reazzjonijiet mill-kumpaniji jikkonfermaw bidla fundamentali ta’ kultura: l-impriżi issa qed jikkunsidraw l-iżvilupp pedjatriku bħala parti integrali mill-iżvilupp ġenerali ta’ prodott.

Ir-rekwiżit li l-pjan ta’ investigazzjoni pedjatrika jiġi żviluppat u diskuss mal-Kumitat Pedjatriku, li normalment għandu jkun sottomess mhux aktar tard minn meta jitlestew l-istudji farmokinetiċi umani li jsiru fuq l-adulti, tobbliga lill-kumpaniji jaħsbu dwar l-użu pedjatriku minn kmieni sabiex jiġi evitat kull dewmien fl-iżvilupp tal-prodott in ġenerali. Il-pjan iġib miegħu programm ta’ riċerka u żvilupp li għandu l-għan li jiżgura li tiġi ġġenerata d-dejta meħtieġa għall-awtorizzazzjoni tal-indikazzjonijiet pedjatriċi.

Sal-aħħar tal-2012, l-Aġenzija kienet ftiehmet dwar 600 pjan ta’ investigazzjoni pedjatrika (ara t-Tabella 1). Minn dawn, 453 kienu għal mediċini li kienu għadhom mhumiex awtorizzati fl-UE (l-Artikolu 7), filwaqt li l-bqija kienu relatati ma’ indikazzjonijiet ġodda għal prodotti li huma mħarsa mill-privattiva (Artikolu 8) jew awtorizzazzjonijiet għall-kummerċjalizzazzjoni għall-użu pedjatriku (Artikolu 30).

Dawn il-pjanijiet ikopru firxa wiesgħa ta’ oqsma terapewtiċi. L-endokrinoloġija, il-ginekoloġija, il-fertilità, il-metaboliżmu (11 %), il-mard infettiv (11 %) u l-onkoloġija (11 %) huma l-oqsma ewlenin, iżda l-ebda qasam partikolari ma jiddomina fil-klassifika (ara Tabella 3).

Sabiex jittieħed kont ta’ informazzjoni ġdida matul l-iżvilupp tal-mediċini, jeħtieġ li jiġu modifikati l-pjanijiet miftiehma ta’ investigazzjoni pedjatrika. L-istatistika turi li jiġu sottomessi bosta talbiet għall-modifika għal kull pjan miftiehem (ara t-Tabella 2). S’issa, il-Kumitat diġà ħejja iktar opinjonijiet dwar modifiki milli fuq il-ftehim inizjali tal-pjan ta' investigazzjoni.

Sa tmiem l-2012, tlestew 33 mill-pjanijiet kollha ta’ investigazzjoni pedjatrika approvati (ara t-Tabella 4), li wasslu għall-approvazzjoni ta’ mediċini ġodda b’indikazzjonijiet pedjatriċi speċifiċi.

4.1.1.     Finanzjament tal-Unjoni Ewropea bħala appoġġ għar-riċerka

L-UE tappoġġja r-riċerka dwar il-mediċina għall-użu pedjatriku permezz tal-Programm Qafas Multiannwali tagħha għar-Riċerka u l-Iżvilupp Teknoloġiku. Skont l-Artikolu 40 tar-Regolament, l-Unjoni għandha l-obbligu speċifiku li tiffinanzja r-riċerka fi prodotti mediċinali li mhumiex protetti bi privattiva. L-appoġġ jingħata lil proġetti li tkun saritilhom b’suċċess evalwazzjoni bejn il-pari minn esperti indipendenti bi tweġiba għas-sejħiet għall-proposti, imħabbra regolarment mill-Kummissjoni. Sabiex jiġi żgurat li l-fondi jiġu diretti lejn ir-riċerka tal-prodotti mediċinali bl-akbar ħtiġijiet, il-Kumitat Pedjatriku adotta lista prijoritarja ta’ sustanzi attivi mhux koperti bi privattiva[15] li għalihom jinħtieġu l-istudji.

Sal-lum, 16-il proġett li jkopru tal-anqas 20 sustanza attiva mhux protetti bit-trejdmark ngħataw finanzjament mill-UE, appoġġ li jammonta għal total ta’ EUR 80 miljun (ara l-Anness III).

4.1.2.     Pariri Xjentifiċi

L-applikanti jistgħu jitolbu pariri xjentifiċi mingħand l-EMA u/jew l-awtoritajiet kompetenti nazzjonali dwar kwistjonijiet farmaċewtiċi, kliniċi jew mhux kliniċi marbuta mal-iżvilupp ta’ mediċini. Il-parir xjentifiku huwa proċedura magħrufa u ppruvata sew biex twieġeb mistoqsijiet speċifiċi f’kull stadju tal-proċess ta’ riċerka u żvilupp. Mid-dħul fis-seħħ tar-Regolament Pedjatriku, il-pariri u l-assistenza ta’ protokoll marbuta mal-użu pedjatriku mill-Grupp ta’ Ħidma ta’ Konsulenza Xjentifika - li huma pprovduti mingħajr ħlas - żdiedu b’mod sinifikanti (ara t-Tabella 5) minkejja l-fatt li kwistjonijiet farmaċewtiċi, kliniċi jew mhux kliniċi marbuta mal-iżvilupp ta’ mediċini jagħmlu wkoll parti mid-diskussjonijiet ta’ pjan ta’ investigazzjoni pedjatrika. Biex tiġi ffaċilitata l-kollaborazzjoni mal-Kumitat Pedjatriku, inħalqu proċeduri konġunti fi ħdan l-EMA.

4.1.3.     Provi kliniċi fuq it-tfal

Il-mediċini maħsuba għall-użu fit-tfal jeħtieġu li jiġu ttestjati b’formulazzjonijiet xierqa fuq il-popolazzjoni pedjatrika biex jiġi żgurat l-użu sikur u effettiv tagħhom. Għalhekk huwa ġeneralment aċċettat li r-Regolament Pedjatriku se jwassal għal aktar provi kliniċi fuq it-tfal. Iċ-ċifri li jirriżultaw mill-bażi ta' dejta tal-EudraCT għadhom ma wrewx żieda fil-provi pedjatriċi. In-numru baqa’ stabbli bejn l-2006 u l-2012, b’medja ta’ 350 prova fis-sena b’xi varjazzjonijiet (ara t-Tabella 6). Ta' min jinnota, madankollu, li filwaqt li l-għadd ta’ provi pedjatriċi baqa’ stabbli, l-għadd ta’ provi kliniċi fuq il-popolazzjonijiet kollha naqas bejn l-2007 u l-2011.

Barra minn hekk, sa ftit ilu l-bażi tad-dejta tal-EudraCT kienet limitata għall-provi pedjatriċi li jinbdew fl-UE. Dejta dwar provi pedjatriċi li jagħmlu parti mill-pjan ta’ investigazzjoni pedjatrika u jitwettqu barra l-UE saru disponibbli għall-pubbliku mir-rebbiegħa tal-2011.

Ta' min jinnota wkoll li l-inizzazzjoni ta’ perċentwal konsiderevoli ta’ provi kliniċi inklużi fi pjan ta’ investigazzjoni pedjatrika ġiet differita sabiex jiġi evitat dewmien fl-awtorizzazzjoni tal-prodott mediċinali li jikkorrispondi għall-adulti. Għaldaqstant, l-impatt tar-Regolament Pedjatriku dwar provi pedjatriċi se jsir aktar evidenti fl-EudraCT fis-snin li ġejjin. Kien hemm, madankollu, żieda evidenti fl-għadd ta' parteċipanti fi studji pedjatriċi, b’mod partikolari għal grupp ta’ età minn 0 sa 23 xahar, li normalment ma kinux ikunu inklużi fi provi qabel l-2008 (ara t-Tabella 7). Li t-trabi tat-twelid u t-trabi jitħallew jibbenefikaw mir-riċerka huwa sinjal pożittiv minħabba li dawn kienu l-aktar gruppi li ġew ittraskurati s’issa.

4.1.4.     Qafas ottimizzat u koordinazzjoni

Ir-Regolament Pedjatriku jrawwem netwerk komprensiv ta’ għarfien espert fi kwistjonijiet pedjatriċi fi ħdan l-UE. F’dan il-kuntest ir-rwol tal-Kumitat Pedjatriku huwa kruċjali billi jgħaqqad livell għoli ta’ ħila u ta' kompetenza.

Il-Kumitat ikkontribwixxa għal-linji gwida xjentifiċi ppubblikati mill-EMA u s’issa sejjaħ 22 sessjoni ta' ħidma għall-esperti dwar l-iżvilupp tal-mediċini għat-tfal.

Barra minn hekk, fl-2009 twaqqaf in-Netwerk Ewropew għar-Riċerka Pedjatrika tal-EMA (Enpr-EMA). Għalkemm kien jeżisti diġà netwerk ta’ esperti li jaħdmu b'mod omoġenju qabel l-introduzzjoni tar-Regolament f’oqsma tal-mard bħall-onkoloġija pedjatrika, l-Enpr-EMA jipprovdi l-valur miżjud ta’ approċċ ħolistiku billi jressaq flimkien netwerks nazzjonali u Ewropej, u investigaturi u ċentri b’kompetenza speċifika fit-tfassil u t-twettiq ta’ studji ta' kwalità għolja dwar it-tfal.

Madankollu, wieħed xorta jista' jistaqsi jekk din il-kompetenza tissarrafx f’kapaċità suffiċjenti fi ħdan l-UE biex tmexxi provi f’ambjenti ta’ investigazzjoni speċjalizzata. In-netwerks ta’ riċerka żviluppati sew li huma kapaċi jiffaċilitaw ir-riċerka meħtieġa biex jiġu sodisfatti l-impenji inklużi fi pjanijiet ta’ investigazzjoni pedjatrika jeżistu f’xi Stati Membri, iżda mhux f'kollha.

4.1.5.     Kooperazzjoni internazzjonali

Fuq livell internazzjonali, l-EMA żviluppat rabtiet internazzjonali ma’ aġenziji tal-mediċini fl-Istati Uniti, il-Kanada u l-Ġappun. Ta’ interess partikolari hija l-kooperazzjoni mal-US Food and Drug Administration peress li, fl-aħħar tas-snin disgħin, l-Istati Uniti diġà kienet introduċiet leġiżlazzjoni li stimulat l-iżvilupp ta’ prodotti mediċinali għall-użu pedjatriku permezz ta’ taħlita ta’ inċentivi u obbligi. Din il-kooperazzjoni hija wkoll ta’ interess kbir għall-partijiet interessati billi tista’ tagħti l-possibbiltà lill-kumpaniji li jissodisfaw il-leġiżlazzjoni fiż-żewġ reġjuni bl-istess studji.

Barra minn hekk, l-EMA tipparteċipa b’mod attiv fin-netwerk regolatorju tal-mediċina pedjatrika[16] li nħolqot fl-2010 bħala parti tal-inizjattiva Mediċini Aħjar għat-Tfal tad-WHO.

4.2.        Aktar mediċini disponibbli għat-tfal

Fuq 12-il sena (mill-1995 sal-2006), 108 mit-317 indikazzjoni minn 262 mediċina awtorizzata ċentralment inkludew il-popolazzjoni pedjatrika. Minn meta daħal fis-seħħ ir-Regolament Pedjatriku, 31 minn 152 mediċina ġdida ġew awtorizzati għall-użu pedjatriku; 10 minnhom issodisfaw il-kundizzjonijiet tal-Artikolu 7. Dan mhuwiex ħlief "ritratt" tal-effetti tar-Regolament billi din iċ-ċifra x’aktarx li se tiżdied fil-ġejjieni, billi għadd konsiderevoli ta’ mediċini ġodda, diġà awtorizzati, huma suġġetti għal investigazzjoni fejn it-tlestija tal-pjan tkun ġiet iddifferita biex jiġi evitat dewmien fl-awtorizzazzjoni ta’ prodotti għall-adulti. Minn dan isegwi li fis-snin li ġejjin ħafna aktar minn dawk il-152 mediċina ġdida huma mistennija li jiġu awtorizzati għall-użu pedjatriku.

Rapporti annwali dwar studji pedjatriċi differiti ta’ mediċini awtorizzati jindikaw li l-maġġoranza tal-pjanijiet ta’ investigazzjoni pedjatrika qed iżommu mal-iskeda. Ir-riċerka pedjatrika tinsab għaddejja bl-istess ritmu fl-oqsma terapewtiċi bħall-onkoloġija, it-tilqim u l-immunoloġija, ir-rewmatoloġija u t-trapjanti.

Barra minn hekk, sa tmiem l-2011, 72 indikazzjoni pedjatrika ġdida ġew approvati għal mediċini diġà awtorizzati, inklużi 30 indikazzjoni (18 ċentralizzati) li jirriżultaw mill-obbligazzjoni fl-Artikolu 8. Barra minn hekk, ġew awtorizzati 26 forma farmaċewtika ġdida għall-użu pedjatriku, inklużi 18-il forma adattati għal mediċini awtorizzati ċentralment.

Fir-rigward tal-Awtorizzazzjoni ta’ Tqegħid fis-Suq għall-Użu Pedjatriku, sal-lum ingħatat biss awtorizzazzjoni waħda. Din ma tilħaqx l-aspettattivi inizjali.

Inventarju ddettaljat tal-prodotti awtorizzati ċentralment huwa provdut fl-Anness II.

– Kumpensi u inċentivi

Il-kumpaniji li jikkonformaw mal-obligazzjonijiet tar-Regolament jistgħu jibbenefikaw minn kumpens ladarba l-prodott ikkonċernat ikun awtorizzat jew l-informazzjoni dwar il-prodott tiġi emendata. Il-kumpens jieħu l-forma ta’ estensjoni ta' sitt xhur taċ-ċertifikat ta’ protezzjoni supplimentari (SPC) previst fir-Regolament (KE) Nru 469/2009[17] jew, fil-każ ta’ prodott mediċinali orfni, permezz ta’ estensjoni tal-perjodu ta’ għaxar snin ta’ esklussività tas-suq orfni għal tnax-il sena.

L-ebda kumpens orfni ma ngħata s’issa. F’dan ir-rigward huwa osservat li xi kumpaniji rtiraw id-denominazzjoni orfni ta’ prodott sabiex jikkwalifikaw għal kumpens SPC minflok kumpens orfni, li jidher li, minn perspettiva ekonomika, huwa aktar attraenti. Safejn huma kkonċernati l-estensjonijiet SPC, l-uffiċċji nazzjonali tal-privattivi f’16-il Stat Membru, sal-aħħar tal-2011, kienu taw estensjonijiet ta’ sitt xhur lil 11-il prodott mediċinali, li rriżultaw f’total ta’ aktar minn 100 SPC nazzjonali.

Għandu jiġi rrimarkat li deċiżjoni tal-Qorti Ewropea tal-Ġustizzja żiedet ulterjorment il-valur tal-kumpens pedjatriku, billi ċċarat li ċ-ċertifikat inizjali jista’ jkollu tul ta’ żmien negattiv jew null, li jista’ mbagħad isir pożittiv, ladarba tkun ingħatat l-estensjoni pedjatrika[18].

4.3.        Iktar informazzjoni dwar mediċini li jintużaw għat-tfal

Biex tiġi pprovduta informazzjoni aħjar dwar l-użu ta’ prodotti mediċinali fit-tfal, l-Artikolu 45 tar-Regolament Pedjatriku jeħtieġ li l-kumpaniji li diġà għandhom dejta dwar is-sikurezza jew l-effikaċja tal-prodotti mediċinali awtorizzati fil-popolazzjoni pedjatrika jissottomettu dawn l-istudji lill-awtoritajiet kompetenti. B’dan il-mod id-dejta tkun tista’ tiġi vvalutata u, fejn xieraq, tiġi emendata l-informazzjoni dwar il-prodott mediċinali awtorizzat. L-Artikolu 46 tar-Regolament jesiġi wkoll li l-kumpaniji jissottomettu dejta pedjatrika ġġenerata reċentement.

Mill-2008 ’l hawn, ġew sottomessi ’l fuq minn 18 000 rapport ta’ studju dwar bejn wieħed u ieħor 2 200 prodott mediċinali - dan jiżvela l-ammont kbir ta’ informazzjoni pedjatrika eżistenti li hemm disponibbli fil-livell tal-kumpaniji.

Dawn ir-rapporti ta’ studju kienu, u qed ikomplu jiġu evalwati mill-awtoritajiet kompetenti, bis-saħħa ta’ proġett impressjonanti ta' tqassim tal-ħidmiet (ara t-Tabelli 10 u 11). Għal prodotti awtorizzati nazzjonalment, dan wassal għall-pubblikazzjoni tar-rapporti ta’ valutazzjoni li jkopru aktar minn 140 sustanza attiva u, f’għadd konsiderevoli ta’ każijiet, għal rakkomandazzjonijiet għall-bidliet lis-sommarji tal-karatteristiċi tal-prodott tal-prodotti awtorizzati, li jirriżultaw f’65 tibdiliet attwali. Għal prodotti awtorizzati ċentralment, sal-2011 l-Aġenzija kienet lestiet il-valutazzjoni tad-dejta kollha mogħtija skont l-Artikolu 45, li jkopri 55 sustanzi attivi f’61 prodotti mediċinali approvati ċentralment. Is-sommarji tal-karatteristiċi tal-prodott tat-12-il prodott mediċinali tbiddlu wara l-evalwazzjoni.

5.           Tagħlim miksub

5.1.        Aċċess aħjar għat-trattament

Waħda mill-miri tar-Regolament Pedjatriku huwa li jiżdied l-għadd ta’ prodotti li jiġu riċerkati, żviluppati u awtorizzati għall-użu fit-tfal, u biex jitnaqqas l-użu ta’ prodotti mediċinali bla tikketta fil-popolazzjoni pedjatrika.

L-għodda ewlenija biex jinkiseb dan ir-riżultat huwa li l-kumpaniji jkollhom l-obbligu li jistabbilixxu pjan ta’ investigazzjoni pedjatrika għal kull prodott żviluppat reċentement jew għall-estensjoni ta' linja ta’ prodott diġà awtorizzat li għadu taħt il-protezzjoni tal-privattiva. Il-pjan hu maħsub li jiżgura — taħt is-superviżjoni tal-Kumitat Pedjatriku — li tiġi ġġenerata d-dejta meħtieġa sabiex jiġu ddeterminati l-kondizzjonijiet li skonthom prodott mediċinali jista’ jkun awtorizzat għall-kura tat-tfal. Mill-2008 ’l hawn, ġew approvati ’l fuq minn 600 pjan ta’ investigazzjoni pedjatrika. Madankollu, minoranza biss minnhom ikunu tlestew sa dik id-data; il-maġġoranza l-kbira għadhom għaddejjin. Dan huwa minħabba ċikli twal ta’ żvilupp ta’ prodotti mediċinali, li ħafna drabi jdumu iktar minn għaxar snin u d-differiment kważi sistematiku tal-istudji pedjatriċi. Jista' jkun li għall-bidu ma kienx mistenni dan l-għadd kbir ta’ differimenti, iżda bħalissa dawn huma realtà, billi għall-biċċa l-kbira tal-prodotti mediċinali li ġew awtorizzati s’issa, il-programm tar-Riċerka u Żvilupp ikun inbeda qabel id-dħul fis-seħħ tar-Regolament. Konsegwentement, ir-rekwiżiti pedjatriċi ma setgħux jitqiesu mill-bidu tal-iżvilupp tal-prodott.

Filwaqt li Regolament Pedjatriku wassal għal xi awtorizzazzjonijiet ġodda li jinkludu indikazzjonijiet pedjatriċi, dan l-istrument regolatorju huwa reċenti, u se jkun hemm bżonn mill-inqas għaxar snin qabel ma r-Regolament jkun jista’ jiġi ġġudikat f’termini ta’ dak li jipproduċi. F’termini ta’ forom farmaċewtiċi, hemm madankollu diġà impatt pożittiv viżibbli.

F’dan il-kuntest, saret kritika li esprimiet li r-Regolament se jonqos milli jiżgura żvolta ġdida f’oqsma ta’ bżonn partikolari fil-linja pedjatrika, bħall-onkoloġija pedjatrika. Dan l-argument huwa relatat mal-fatt li l-punt tat-tluq għall-maġġoranza tal-pjanijiet ta’ investigazzjoni pedjatrika hu programm kontinwu ta' Riċerka u Żvilupp għal prodotti mediċinali għall-adulti. Konsegwenza intrinsika ta’ dan l-approċċ huwa li dawn il-prodotti huma primarjament immirati lejn il-kundizzjonijiet tal-adulti. Dawn huma żviluppati fl-oqsma fejn hemm il-bżonn (jew is-suq) fil-popolazzjoni adulta. Din il-ħtieġa fost il-popolazzjoni adulta ma tikkorrispondix neċessarjament għall-ħtieġa tal-popolazzjoni pedjatrika.

Barra minn hekk, ir-Regolament jagħti derogi mill-obbligi tiegħu meta l-marda jew il-kondizzjoni li għaliha hu maħsub il-prodott mediċinali speċifiku sseħħ biss fil-popolazzjonijiet adulti. Dan l-approċċ leġiżlattiv joħloq frizzjoni fil-każ ta’ mardiet li huma speċifiċi u esklussivi għat-tfal. Jillimita wkoll is-setgħat u l-possibbiltajiet tal-Kumitat Pedjatriku meta jirrevedi u jaqbel ma’ pjan ta’ investigazzjoni pedjatrika fir-rigward tal-ambitu ta’ studji li l-Kumitat jista’ jitlob mingħand l-applikanti wara li tkun saret valutazzjoni objettiva bbażata fuq ix-xjenza tal-kompost ikkonċernat[19].

Wieħed għandu jqis dawn il-limitazzjonijiet u restrizzjonijiet biex japprezza l-impatt li r-Regolament huwa probabbli li jkollu. Barra minn hekk, l-effett ta’ strumenti bħalma huma r-Regolament dwar il-Mediċini Orfni għandhom jitqiesu peress li, pereżempju, il-kanċers pedjatriċi kollha huma mardiet rari u jaqgħu taħt il-qafas ta’ politika tal-UE dwar il-mard rari.

Kollox ma’ kollox, il-kisbiet enfasizzati fil-Kapitolu 4 ta’ dan ir-rapport u l-għadd tal-prodotti b'indikazzjonijiet pedjatriċi ġodda juru li hemm xi sinjali inkoraġġanti wara dan l-ewwel perjodu ta’ ħames snin; huwa madankollu kmieni wisq għal tweġibiet komprensivi.

5.2.        Il-kunċett PUMA: diżappunt

Ir-Regolament Pedjatriku introduċa tip ġdid ta’ awtorizzazzjoni tal-kummerċjalizzazzjoni — l-Awtorizzazzjoni tal-Kummerċjalizzazzjoni għall-Użu Pedjatriku (PUMA). Bħala inċentiv biex titwettaq ir-riċerka dwar il-potenzjal tal-użu pedjatriku ta’ prodotti mediċinali li skaditilhom il-privattiva li ġew awtorizzati għall-adulti, din l-awtorizzazzjoni ta' kummerċjalizzazzjoni toffri tmien (8) snin ta’ dejta u 10 snin ta’ esklussività fis-suq għal kwalunkwe prodott mediċinali ġdid li tkun skadietlu l-privattiva li jkun żviluppat esklussivament għall-użu tal-popolazzjoni pedjatrika. Għalhekk, l-għan ewlieni tal-kunċett PUMA huwa li jħeġġeġ ir-riċerka fi prodotti eżistenti. Din l-iskema ġiet appoġġata mill-finanzjament tal-UE permezz tal-Programmi Qafas tal-UE għar-Riċerka u l-Iżvilupp Teknoloġiku.

Madankollu, sal-lum ingħatat biss PUMA waħda, u hemm xi proġetti oħra li qegħdin jitħejjew bħalissa.

La l-industrija u lanqas in-netwerks akkademiċi ma laqgħu din l-opportunità bis-sħiħ kif kienet l-intenzjoni tar-Regolament. Jidher li l-inċentiv tal-esklussività tad-dejta u tas-suq ma jaħdimx għal dawn il-prodotti, jew tal-anqas li l-opportunitajiet tas-suq f’dan is-settur bħalissa huma kkunsidrati insuffiċjenti biex jegħlbu r-riskji ekonomiċi inerenti tal-iżvilupp farmaċewtiku. Ir-riċerkaturi mhumiex jidħlu għal provi tal-mediċini li ilhom is-snin fis-suq. Il-kumpaniji jidhru li jibżgħu li l-esklussività tas-suq ma tipprevjenix lit-tobba milli jkomplu jużaw il-prodotti kompetituri bl-istess ingredjent attiv bla tikketta, b’inqas spejjeż, jew li sseħħ sostituzzjoni għal forom irħas ta' prodotti għall-adulti fil-livell tal-ispiżeriji. Barra minn hekk, ħafna drabi r-regoli nazzjonali dwar l-iffissar ta' prezzijiet u r-rimborżi fl-Istati Membri ma jippermettux li ssir ir-riċerka addizzjonali meħtieġa sabiex tinkiseb il-PUMA waqt in-negozjati dwar il-prezz[20].

F'dan il-kuntest, il-kunċett PUMA naqas milli jissodisfa l-aspettativi inizjali.

L-EMA fil-futur se taċċetta pjanijiet ta’ investigazzjoni pedjatrika għal PUMA li jkopru biss ċerti gruppi ta’ età u mhux popolazzjoni pedjatrika sħiħa. Dan jista’ jikkontrobilanċja xi riżervi li attwalment ifixklu approvazzjoni ikbar tal-kunċett PUMA.

5.3.        L-ebda impatt fuq l-iżvilupp tal-adulti

Studji ta’ qabel l-adozzjoni tar-Regolament ssuġġerew li jeżisti riskju teoretiku li r-rekwiżiti għar-riċerka fuq it-tfal jistgħu jtawlu l-perjodu totali tal-proċess tal-iżvilupp tal-mediċina[21]. Dan ir-Regolament laqa' dan ir-riskju direttament. Sabiex jiġi evitat id-dewmien fl-awtorizzazzjoni tal-mediċini għall-popolazzjonijiet l-oħra, ir-Regolament jippermetti li jingħataw diferimenti relatati mal-inizzazzjoni jew it-tlestija ta' xi miżuri jew il-miżuri kollha li jinsabu fil-pjan ta' investigazzjoni pedjatriku.

L-esperjenza turi li d-diferiment huwa strument użat b’mod wiesa’, li jissuġġerixxi li r-riskju ta’ dewmien fl-ipproċessar ta’ applikazzjonijiet tal-adulti huwa minimu. Kien hemm xi problemi tranżitorji f’każijiet fejn programm tal-adulti diġà ġie stabbilit meta r-Regolament daħal fis-seħħ, iżda dawn il-kwistjonijiet jidhru li ġew solvuti.

Tħassib li tqajjem inizjalment kien li xi kumpaniji jibdew isibuha bi tqila biex jiżviluppaw l-indikazzjonijiet ġodda, il-formoli farmaċewtiċi u r-rotot ta’ amministrazzjoni ġodda fis-swieq iż-żgħar u għal prodotti bi ftit bejgħ, biex jevitaw li jkunu marbuta bl-obbligazzjoni pedjatrika skont l-Artikolu 8 tar-Regolament. Madankollu, m’hemm l-ebda evidenza ta’ tali effett. Barra minn hekk, wieħed jista’ jargumenta wkoll li l-inċentiv ta’ potenzjal ta' estensjoni ta’ sitt xhur tal-SPC serva biex jikkontrobilanċja tali effett billi seta' wassal lill-kumpaniji biex jeżaminaw aktar fid-dettall il-benefiċċji ta’ estensjoni ta' linja, filwaqt li jqisu wkoll il-valur ekonomiku tal-kumpens pedjatriku.

Madankollu, il-partijiet interessati tal-industrija jgħidu li f’każijiet rari l-iżvilupp għal prodotti mediċinali ġodda ddewwem jew ġie abbandunat fl-istennija jew bħala konsegwenza ta’ spejjeż u rekwiżiti addizzjonali assoċjati mal-iżvilupp pedjatriku. B’mod ġenerali, madankollu, m’hemm l-ebda prova li r-Regolament għandu impatt negattiv konsiderevoli fuq il-prodotti għal popolazzjonijiet oħra.

Minflok, hemm xi tħassib li r-rekwiżiti skont ir-Regolament jistgħu jikkawżaw dewmien fl-awtorizzazzjoni ta’ prodotti b’indikazzjonijiet għall-użu pedjatriku biss, peress li jżidu l-kumplessità għar-Riċerka u l-Iżvilupp u l-proċess regolatorju għal prodotti li diġà huma direttament immirati lejn it-tfal. Il-valur miżjud tas-sottomissjoni ta’ pjan ta’ investigazzjoni pedjatrika f’dawn il-każijiet se jiġi vvalutat aktar fir-rapport tal-2017.

5.4.        It-tgawdija mill-benefiċċji ta' informazzjoni eżistenti

Kien hemm spekulazzjoni mifruxa sew qabel l-adozzjoni tar-Regolament Pedjatriku dwar kemm studji kienu se jiġu sottomessi mill-kumpaniji farmaċewtiċi skont l-Artikoli 45 u 46. Il-fatt li l-awtoritajiet kompetenti rċevew aktar minn 18 000 studju juri l-ammont konsiderevoli ta’ informazzjoni pedjatrika li kienet teżisti fil-livell tal-kumpaniji.

Ċertament, huwa veru li mhux l-informazzjoni kollha mressqa laħqet ir-rekwiżiti moderni għad-dejta xjentifika u r-riċerka klinika, u li l-proċess tal-qsim tax-xogħol ta’ evalwazzjoni tal-informazzjoni huwa pjuttost twil u jirrikjedi ħafna riżorsi.

Madankollu, meta mqabbla mal-kunċett PUMA, din l-iskema kienet aktar ta’ suċċess f’termini ta’ produzzjoni, u fir-rakkommandazzjoni u l-implimentazzjoni tat-tibdil fis-sommarju tal-karatteristiċi tal-prodotti mediċinali awtorizzati. Fil-konsultazzjoni pubblika tagħha, il-Kummissjoni sejħet l-Artikoli 45 u 46 "il-ġojjelli moħbija” tar-Regolament.

Żvantaġġ wieħed li jibqa’, madankollu, huwa n-nuqqas ta’ rieda mid-detenturi tal-awtorizzazzjoni ta’ kummerċjalizzazzjoni biex jaġġornaw is-sommarju tal-karatteristiċi tal-prodott fuq bażi volontarja. Minkejja dan, ir-Regolament fih mekkaniżmi biex jegħlbu tali nuqqas ta' rieda peress li jagħti s-setgħa lill-awtoritajiet kompetenti li jaġġornaw direttament is-sommarju u jvarjaw l-awtorizzazzjoni tal-kummerċjalizzazzjoni bħala konsegwenza ta’ dan. Barra minn hekk, f’konformità mal-Artikolu 23 tad-Direttiva 2001/83/KE[22] u l-Artikolu 16 tar-Regolament (KE) Nru 726/2004[23], id-detenturi tal-awtorizzazzjoni għat-tqegħid fis-suq huma obbligati li jiżguraw li l-informazzjoni dwar il-prodott tinżamm aġġornata mal-għarfien xjentifiku attwali. Filwaqt li għandha tingħata preferenza lill-approċċi kooperattivi, l-għodod ta’ infurzar jistgħu jinħtieġu li jintużaw jekk il-kumpaniji ma jegħlbux ir-riżervi tagħhom.

B’mod ġenerali, ir-rekwiżiti tal-Artikoli 45 u 46 ipprovdew strument effiċjenti u xieraq għall-ġbir u l-valutazzjoni tal-istudji pedjatriċi eżistenti.

5.5.        Provi kliniċi fuq it-tfal

Huwa ġeneralment aċċettat li r-Regolament Pedjatriku se jwassal għal aktar provi kliniċi li jinvolvu t-tfal, iżda li l-għanijiet tiegħu għandhom jintlaħqu mingħajr ma t-tfal jiġu suġġetti għal provi kliniċi li mhumiex meħtieġa.

L-iżgħar subsettijiet ta' età pedjatrika, inklużi t-trabi tat-twelid, huma partikolarment sensittivi. Din se tkun sfida kostanti biex jiġu bbilanċjati l-ħtiġijiet terapewtiċi ta’ dawn il-gruppi ta’ età, bil-vulnerabbiltà speċifika tagħhom meta wieħed jikkunsidra u jiddeċiedi dwar l-adegwatezza ta’ provi kliniċi speċifiċi jew postijiet speċifiċi ta’ studji f’dan is-subsett ta' età. Għalhekk qed isiru sforzi kontinwi biex jiġu esplorati mezzi alternattivi, eż. l-użu ta’ estrapolazzjoni, l-immudellar u tekniki ta’ simulazzjoni biex jitnaqqas kemm jista’ jkun l-għadd ta’ suġġetti ta’ studju. Il-Kumitat Pedjatriku qed jikkontribwixxi attivament biex jiffaċilita l-iżvilupp u l-użu ta’ dawn il-mezzi, inkluż l-ippjanar tal-prova mhux konvenzjonali.

Sfida oħra hija kif tista' tkun evitata d-duplikazzjoni ta’ provi għal pjanijiet ta’ investigazzjoni pedjatrika differenti minn diversi applikanti. Kumpaniji li jkunu qed jaħdmu fuq l-iżvilupp tal-prodott f’oqsma simili jistgħu jkunu meħtieġa mill-pjan ta’ investigazzjoni pedjatrika miftiehem biex iwettqu studji f’ambjenti simili. Filwaqt li approċċi kollaborattivi bejn il-kumpaniji huma ferm mixtieqa, u seħħew f'okkażjonijiet rari, dawn spiss jikkonfliġġu man-nuqqas ta' rieda min-naħa tal-kumpaniji biex jiskambjaw id-dejta mal-kompetituri fl-istadji bikrin tal-iżvilupp tal-prodott u jipparteċipaw f’paraguni diretti. Din is-sitwazzjoni tista’ twassal għal kompetizzjoni fost il-kumpaniji biex isibu investigaturi u parteċipanti ta’ studju kif ukoll id-duplikazzjoni ta’ provi li mhumiex neċessarji mil-lat xjentifiku u etiku.

Il-Kumitat Pedjatriku huwa kapaċi jidderoga r-rekwiżiti għal prova pedjatrika meta l-prodott mediċinali speċifiku ma jirrappreżentax benefiċċju terapewtiku sinifikanti iktar minn trattament eżistenti għal pazjenti pedjatriċi, inkluż ladarba l-prodott jiġi awtorizzat (Artikolu 11). Madankollu, din l-għażla ma tipprovdix mezz biex wieħed ikun jista' jabbanduna l-proġett fl-istadji bikrin tal-iżvilupp tal-prodott, meta l-Kumitat għandu jiżgura trattament ugwali u approċċi mhux diskriminatorji.

Il-qofol biex jiġu evitati tali provi bla bżonn huwa t-trasparenza fir-rigward ta' provi li għadhom għaddejjin u li tlestew. Is-sitwazzjoni qed tkompli tkun immonitorjata.

Fl-aħħar nett, huwa fl-interess tal-UE li l-provi pedjatriċi li joħorġu minn pjanijiet ta’ investigazzjoni pedjatrika jitwettqu fi ħdan l-UE. Dan għandu anqas x’jaqsam mal-istandards li skonthom titmexxa prova, peress li l-provi kliniċi mwettqa barra l-UE jridu jissodisfaw ir-rekwiżiti etiċi u xjentifiċi tad-dispożizzjonijiet tal-UE dwar il-provi kliniċi[24], milli mal-fatt li l-istudji fi ħdan l-UE jistgħu jipprovdu lill-pazjenti fl-UE b'aċċess bikri għal mediċini innovattivi. Sal-lum, m’hemmx biżżejjed dejta dwar il-proporzjon bejn il-provi pedjatriċi mwettqa ġewwa u barra l-UE. Madankollu, minħabba l-funzjonalitajiet imtejba tal-bażi tad-dejta tal-EudraCT, huwa mistenni li fl-2017 se jkun hemm aktar dejta disponibbli għat-tieni rapport.

5.6.        It-tixrid tal-aħbar — nakkwistaw informazzjoni ġdida għall-pazjenti u l-professjonisti tal-kura tas-saħħa

Jekk ir-Regolament għandu jirnexxi, mhuwiex biss meħtieġ li tinġabar id-dejta dwar l-użu ta’ prodott speċifiku fil-popolazzjoni pedjatrika, iżda li din id-dejta mbagħad tiġi kkomunikata wkoll b’mod xieraq, u użata mill-pedjatra fix-xogħol tagħhom ta’ kuljum għall-benefiċċju tal-pazjenti tagħhom.

F’dan ir-rigward xi studji ppubblikati fil-letteratura medika jissuġġerixxu nuqqas min-naħa tal-prattikanti biex jirrikonoxxu l-ammont reali ta' mediċini bla tikketta li qed jiġu preskritti għat-tfal. Barra minn hekk, huwa sostnut li d-drawwiet ta' preskrizzjoni tal-prattikanti ħafna drabi huma influwenzati ħafna mill-esperjenza personali aktar milli minn informazzjoni bbażata fuq evidenza għall-mediċina pedjatrika[25].

Dawn l-istudji, meta għamlu l-ġeneralizzazzjonijiet tagħhom, setgħu ma kkunsidrawx l-eteroġeneità tal-professjonisti tal-kura tas-saħħa, li r-riċettività tagħhom tvarja ħafna skont l-ambjent tax-xogħol u l-qasam speċifiku ta’ speċjalizzazzjoni tagħhom. Fl-istess ħin, dawn l-osservazzjonijiet jistgħu jindikaw ostaklu sostanzjali fil-ksib tal-objettiv tar-Regolament Pedjatriku.

L-awtoritajiet nazzjonali kompetenti kif ukoll l-organizzazzjonijiet tal-professjonisti tal-kura tas-saħħa jidhru partikolarment ikkwalifikati biex jikkunsidraw metodi xierqa biex jiżguraw fluss xieraq ta’ informazzjoni. Xi Stati Membri diġà stabbilixxew għadd ta’ għodod biex jikkomunikaw b’mod effettiv u effiċjenti ma’ professjonisti tal-kura tas-saħħa, eż. permezz ta’ laqgħat regolari, fuq is-sistemi ta' tixrid informazzjoni bbażati fuq l-internet jew formularji nazzjonali.

5.7.        Il-piż huwa akbar mill-benefiċċji?

Ma jista’ jkun hemm l-ebda dubju li r-Regolament Pedjatriku jqiegħed piż żejjed konsiderevoli fuq il-kumpaniji farmaċewtiċi permezz tal-obbligazzjonijiet tiegħu rigward ir-riċerka dwar il-prodotti għall-użu fuq it-tfal. Madanakollu, din l-istrateġija kienet adottata għax il-forzi tas-suq waħidhom urew li mhumiex biżżejjed biex jistimolaw riċerka adegwata.

Ir-Regolament jeħtieġ li l-kumpaniji jissottomettu pjanijiet ta’ investigazzjoni pedjatrika fi stadju bikri tal-iżvilupp tal-prodott. Madankollu, ir-riċerka fuq uħud mis-sustanzi attivi jistgħu jitwaqqfu fi stadji aktar tard jekk studji ulterjuri jonqsu milli juru potenzjal fir-rigward tas-sikurezza u l-effikaċja tal-prodott. Għal kull prodott mediċinali awtorizzat b'suċċess hemm ħafna li jonqsu milli jaslu sal-finali.

Għalhekk, mhux il-pjanijiet ta’ investigazzjoni pedjatrika kollha li jkunu approvati se jkunu tlestew, billi l-kumpaniji jistgħu jiddeċiedu li jwaqqfu l-iżvilupp korrispondenti għall-adulti. Huwa kmieni wisq biex tinkiseb statistika affidabbli li turi l-proporzjon bejn il-pjanijiet ta’ investigazzjoni pedjatriċi li jkunu tlestew u dawk li ma tlestewx, iżda fil-kuntest attwali mhux il-pjanijiet kollha approvati eventwalment se jwasslu għal mediċina approvata b’indikazzjoni pedjatrika.

F’termini ta’ produzzjoni, dan ifisser li se jkun hemm xi sforz bla bżonn fil-ġbir u l-iskrinjar tal-pjanijiet ta’ investigazzjoni pedjatrika. Sa liema punt dan huwa bbilanċjat mill-benefiċċju ta’ preżentazzjoni bikrija, li tiżgura li l-iżvilupp pedjatriku jaqbel mingħajr diffikultajiet b’mod ġenerali mal-iżvilupp kumplessiv tal-prodott, jeħtieġ aktar sorveljanza.

Punt ieħor ta’ tħassib huwa l-għadd kbir ta’ modifiki għal pjanijiet ta’ investigazzjoni pedjatrika. Iċ-ċifri jidhru li jindikaw li kważi l-pjanijiet kollha jkollhom jiġu mmodifikati mill-inqas darba. Madankollu, konċettwalment din mhix sorprendenti, fid-dawl tas-sottomissjoni bikrija tal-pjanijiet ta’ investigazzjoni pedjatrika, it-tul ta’ żviluppi adulti u dawk pedjatriċi u d-diferimenti sostanzjali mogħtija. Pjanijiet ta’ riċerka u żvilupp ta' spiss ikollhom jiġu adattati jew emendati biex iqisu r-riżultati inizjali. Problemi ta’ reklutaġġ jew tibdiliet fid-disinn meħtieġa fil-provi jistgħu wkoll iwasslu għal modifiki. Filwaqt li huwa rikonoxxut li emendi sostanzjali jew modifiki fil-pjan għandhom ikunu suġġetti għal diskussjonijiet mal-Kumitat Pedjatriku, dan huwa inqas ovvju għal bidliet żgħar. F’dan il-kuntest, il-livell ta’ dettall meħtieġ mill-EMA ġie ikkritikat ripetutament. F’dawn l-aħħar ħames snin, l-EMA u l-Kumitat Pedjatriku tagħha għamlu sforzi biex jintegraw ftit flessibbiltà fil-pjan sabiex jitħalla marġni għall-manuvrar li jqis l-inċertezzi marbuta ma’ ċerti parametri tal-provi kliniċi.

Fi kwalunkwe każ, il-Kummissjoni biħsiebha tirrevedi l-Komunikazzjoni tagħha dwar il-format u l-kontenut tal-applikazzjonijiet għall-approvazzjoni jew il-modifika ta’ pjan ta’ investigazzjoni pedjatrika biex titqies l-esperjenza miksuba, inkluż l-għadd konsiderevoli ta' talbiet għall-modifika.

Fuq nota pożittiva, ta' min jinnota li l-kumpaniji qed japplikaw għall-kumpensi previsti mir-Regolament, primarjament l-estensjoni ta' sitt (6) xhur taċ-Ċertifikat ta’ Protezzjoni Supplimentari, li ġew introdotti sabiex jiġi bbilanċjat il-piż addizzjonali. Il-valur ekonomiku tal-kumpens jiddependi mill-fatturat tal-prodott ikkonċernat. Fil-każ ta’ prodotti tal-mediċina popolari ħafna l-ammont jista' jkun konsiderevoli, filwaqt li għal prodotti speċjalizzati, l-effett huwa żgħir.

Valutazzjoni fil-fond tal-impatt ekonomiku se jkun inkluż fir-rapport tal-2017 sabiex jinħarġu konklużjonijiet dwar il-bilanċ bejn il-piż u l-benefiċċji, u l-benefiċċji għas-saħħa pubblika.

6.           Prospettiva — Nistgħu nħarsu 'l quddiem għal tmiem tal-ħrejjef?

“Mediċini Aħjar għat-Tfal — Mill-Kunċett għar-Realtà” huwa t-titolu ta’ dan ir-rapport. Il-qarrejja għandhom mnejn jissuġġerixxu li, abbażi tal-evalwazzjoni msemmija hawn fuq, ikun aktar xieraq li wieħed iżid il-punt interrogatorju. Huwa evidenti li huwa kmieni wisq biex issir dikjarazzjoni soda. Minkejja aktar minn ħames snin ta’ esperjenza, l-impatt reali tar-Regolament dwar is-saħħa tat-tfal ser isir evidenti biss maż-żmien minħabba li l-esperjenza tiġi akkumulata fuq medda itwal ta’ żmien.

Madankollu hemm sinjali ta’ inkoraġġiment. L-iżvilupp pedjatriku sar parti iktar integrali mill-iżvilupp ġenerali tal-prodotti mediċinali fl-UE. Għadd ta’ prodotti ġodda b’indikazzjonijiet pedjatriċi u forom farmaċewtiċi adattati għall-età ġew awtorizzati u huma disponibbli għal pazjenti. Għadd kbir mill-pjanijiet miftiehma ta’ investigazzjoni pedjatrika jindikaw li qegħdin jitħejjew aktar prodotti.

Madankollu, jeħtieġ li jiġi enfasizzat li jkun żbaljat li wieħed jistenna li r-Regolament ikun kapaċi jsolvi l-problemi kollha. Minflok, huwa katalist ewlieni biex itejjeb is-sitwazzjoni ta’ pazjenti żgħar.

Fl-aħħar nett, saru evidenti ukoll xi dgħufijiet u nuqqasijiet f’dawn l-aħħar ħames snin. L-impatt tagħhom fuq il-prestazzjoni ġenerali tar-Regolament għandu jkun immonitorjat mill-qrib. Abbażi tal-azzjonijiet spjegati hawn fuq, il-Kummissjoni biħsiebha torqom l-implimentazzjoni attwali flimkien mal-EMA.

Anke jekk il-mediċini aħjar għat-tfal għadhom ma sarux realtà, għandha tkun l-ambizzjoni tal-partijiet interessati kollha involuti li din il-biċċa leġiżlazzjoni tkun għall-ġid aħħari tat-tfal, sabiex fir-rapport tal-2017, id-diskussjoni ma tiffokax fuq jekk għandux jiżdied punt interrogatorju fit-titolu tar-rapport, iżda fuq jekk għandux ikun hemm punt esklamattiv minflok!

Anness I — Ċifri u Tabelli

Tabella 1: Il-pjanijiet miftiehma ta’ investigazzjoni pedjatrika (PIPs) 2007-2012

Sors: Bażi ta' dejta pedjatrika tal-EMA. In-numri fuq il-PIPs li hemm ftehim dwarhom jikkorrispondu għad-deċiżjonijiet tal-EMA.

Tabella 2: Il-pjanijiet miftiehma ta’ investigazzjoni pedjatrika (PIPs) meta mqabbla ma’ eżenzjonijiet sħaħ u modifiki 2007-2012

Sors: Bażi ta' dejta pedjatrika tal-EMA. In-numri fuq il-PIPs li hemm ftehim dwarhom u l-eżenzjonijiet jikkorrispondu għad-deċiżjonijiet tal-EMA.

Tabella 3: Żoni terapewtiċi indirizzati minn pjanijiet ta’ investigazzjoni pedjatrika (2007-2011)

Sors: Bażi ta' dejta pedjatrika tal-EMA. *Minbarra prodotti minn allerġeni. ** Applikazzjonijiet li jindirizzaw esklussivament l-użu fit-trabi tat-twelid.

Tabella 4: In-numru ta’ opinjonijiet ta' konformità adottati mill-Kumitat Pedjatriku kull sena

Sors: Bażi ta' dejta pedjatrika tal-EMA.

Tabella 5: Pariri xjentifiċi u għajnuna fil-Protokoll, inkluż is-segwitu (pprovduti mill-Grupp ta’ Ħidma tal-Pariri Xjentifiċi u l-Kumitat għall-Prodotti Mediċinali Umani tal-EMA, kull sena)

Sors: Bażijiet tad-dejta tal-EMA. * Sena ta’ ittra ta’ parir. ** Sena tal-bidu ta’ proċedura.

Tabella 6: Provi kliniċi pedjatriċi skont is-sena tal-awtorizzazzjoni

|| 2005 || 2006 || 2007 || 2008 || 2009 || 2010 || 2011 || 2012

Il-provi pedjatriċi (numru) || 254 || 316 || 355 || 342 || 404 || 379 || 334 || 332

Il-provi pedjatriċi li huma parti mill-PIP miftiehem* || 2 || 1 || 2 || 6 || 16 || 30 || 76 || 76

Proporzjon tal-provi pedjatriċi li huma parti mill-PIP miftiehma fost il-provi pedjatriċi * || 1 % || 0 % || 1 % || 2 % || 4 % || 8 % || 23 % || 23 %

Numru totali ta’ provi (adulti u/jew tfal) || 3 350 || 3 979 || 4 749 || 4 512 || 4 445 || 4 026 || 3 809 || 3 698

Proporzjon tal-provi pedjatriċi tal-provi kollha || 8 % || 8 % || 7 % || 8 % || 9 % || 10 % || 9 % || 9 %

Sors: Maħżen tad-Dejta EudraCT bl-użu ta’ mistoqsija predefinita fis-6 ta’ Marzu 2013 u billi tingħadd biss l-ewwel prova awtorizzata, fil-każ ta’ aktar minn Stat Membru wieħed.

* Dan it-tagħrif parzjali jeħtieġ li l-isponsers jużaw formola ta’ Applikazzjoni tal-Prova Klinika li kienet disponibbli biss minn Novembru 2009, għal użu mal-verżjoni 8 tal-EudraCT (disponibbli mill-2011).

Tabella 7: Għadd ta’ tfal li jkunu rreġistrati fi provi kliniċi

Numru ta’ suġġetti || 2006 || 2007 || 2008 || 2009 || 2010 || 2011 || 2012

It-trabi tat-twelid prematuri || 0 || 0 || 0 || 207 || 82 || 2 281 || 1 712

It-trabi tat-twelid || 0 || 0 || 5 || 64 || 169 || 1 105 || 1 172

Trabi u tarbija li għadha kemm telqet timxi || 330 || 21 || 20 || 59 || 351 || 2 788 || 3 141

Tfal || 2 142 || 181 || 200 || 2 230 || 2 055 || 10 325 || 20 677

Adoloxxenti || 368 || 111 || 205 || 1 577 || 2 861 || 9 054 || 13 193

It-totali ta’ hawn fuq || 2 840 || 313 || 430 || 4 137 || 5 517 || 25 553 || 39 895

Referenza: numru ta’ provi pedjatriċi || 316 || 355 || 342 || 404 || 379 || 334 || 332

Sors: Maħżen tad-dejta EudraCT bl-użu ta’ mistoqsija predefinita fis-6 ta’ Marzu 2013, immodifikata billi jiġu esklużi studji għal “prodotti mediċinali immunoloġiċi”

Tabella 8: Kontribuzzjoni mill-baġit tal-UE lir-Regolament Pedjatriku u n-nefqa tal-EMA

Tabella 9: Perċentwal tal-Aġenzija Ewropea għall-Mediċini ta’ ħidma tar-riżorsi umani fil-qasam pedjatriku mill-2006 (qalba) sal-2012 (ċirku estern)

Tabella 10: L-Istati Membri li jaġixxu bħala relaturi għall-valutazzjoni ta’ studji ppreżentati skont l-Artikolu 46 (proċeduri ta' tqassim ta' xogħol fil-pedjatrija)

Tabella 11: L-Istati Membri li jaġixxu bħala relaturi għall-valutazzjoni tal-istudji ppreżentati skont l-Artikolu 45 (proċeduri ta' tqassim ta' xogħol fil-pedjatrija)

Tabella 12: L-Istati Membri li jaġixxu bħala relaturi/pari analizzaturi fil-proċeduri tal-Kumitat Pedjatriku tal-EMA (PIP inizjali/tneħħija jew modifika minn PIP miftiehem)

Anness II — Inventarju dettaljat ta' prodotti mediċinali awtorizzati ċentralment għall-użu pedjatriku mid-dħul fis-seħħ tar-Regolament Pedjatriku

Tabella 13: Prodotti mediċinali awtorizzati ċentralment mill-2007, li jinkludu indikazzjoni għal użu pedjatriku

Sustanza/i Attiv/i || Isem kummerċjali || Sena ta’ awtorizzazzjoni || Rekwiżit li jiġi ssodisfat ir-Regolament Pedjatriku fl-ewwel awtorizzazzjoni? || L-indikazzjoni hija pedjatrika biss jew ‘imħallta’ (adulta u pedjatrika)?

Retapamulina || Altargo || 2007 || Le || Imħallta

Nelarabina || Atriance || 2007 || Le || Imħallta

Tilqima kontra l-virus tal-papilloma uman [it-tipi 16, 18] || Cervarix || 2007 || Le || Imħallta

Idrossokobalamina || Cyanokit || 2007 || Le || Imħallta

Idursulfażi || Elaprase || 2007 || Le || Imħallta

Gadoversetamid || Optimark || 2007 || Le || Imħallta

Betaina anidruża || Cystadane || 2007 || Le || Imħallta

Stiripentolu || Diakomit || 2007 || Le || Pedjatrika biss

Mekasermina || Increlex || 2007 || Le || Pedjatrika biss

Rufinamid || Inovelon || 2007 || Le || Imħallta

Idrossikarbamid || Siklos || 2007 || Le || Imħallta

Immunoglobulina umana normali għal amministrazzjoni ġol-vini (IGIV) || Flebogamma DIF || 2007 || Le || Imħallta

Furoat tal-flutikażon || Avamys || 2008 || Le || Imħallta

Immunoglobulina umana normali || Privigen || 2008 || Le || Imħallta

Lakożamid || Vimpat || 2008 || Le || Imħallta

mikafungin || Mycamine || 2008 || Le || Imħallta

sapropterina || Kuvan || 2008 || Le || Imħallta

Sugammadeks || Bridion || 2008 || Le || Imħallta

Tokofersonal, suċċinat tad-d-alfa-tokoferil polietilen glikol || Vedrop || 2009 || Le || Pedjatrika biss

Mifamurtid || Mepact || 2009 || Le || Imħallta

Rilonaċept || Rilonacept regeneron || 2009 || Le || Imħallta

Takrolimus || Modigraf || 2009 || Le || Imħallta

Tilqim ikkonjugat tal-polisakkarida pnewmokokkali (adsorbit) || Synflorix || 2009 || Le || Pedjatrika biss

Canakinumab || Ilaris (PIP li jkunu għadhom ma tlestewx) || 2009 || Iva || Imħallta

Tilqima konjugata polisakkaridika pnewmokoċċika (13-valenti, adsorbita) || Prevenar 13 (PIP li jkunu għadhom ma tlestewx) || 2009 || Iva || Pedjatrika biss

Tilqima konjugata kontra l-gruppi meningokoċċiċi a, c, w135 u y || Menveo || 2010 || Iva || Imħallta

Velagluċerażi alfa || Vpriv (PIP li jkunu għadhom ma tlestewx) || 2010 || Iva || Imħallta

Tilqima kontra l-influenza (attenwata ħajja, nażali) || Fluenz (rinunzja) || 2011 || Iva || Pedjatrika biss

Inibitur C1 (uman) || Cinryze (PIP li jkunu għadhom ma tlestewx) || 2011 || Iva || Imħallta

Fosfat tal-piperakin /diidroartemisinin || Eurartesim (PIP li jkunu għadhom ma tlestewx) || 2011 || Iva || Imħallta

Midażolam || Buccolam || 2011 || Iva (PUMA) || Pedjatrika biss

Everolimus || Votubia (PIP li jkunu għadhom ma tlestewx) || 2011 || Iva || Imħallta

Tobramiċina || Tobi Podhaler (PIP li jkunu għadhom ma tlestewx) || 2011 || Iva || Imħallta

nomegestrolu/estradjolu || Zoely IOA, || 2011 || Iva || Imħallta

Kolistimetat tas-sodju || Colobreathe || 2012 || Iva || Imħallta

Merkaptopurina || Xaluprine || 2012 || Le || Imħallta

Katridekakog || Novothirteen || 2012 || Iva || Imħallta

Efavirenz || Efavirenz Teva || 2012 || Le || Imħallta

Ivakaftor || Kalydeco || 2012 || Iva || Imħallta

Desloratadina || Desloratadine Ratiopharm || 2012 || Le || Imħallta

Desloratadina || Desloratadine Actavis || 2012 || Le || Imħallta

perampanel || Fycompa || 2012 || Iva || Imħallta

Tabella 14: Lista ta’ prodotti mediċinali ċentralment awtorizzati u li l-indikazzjoni terapewtika għalihom ġiet estiża jew emendata għall-popolazzjoni pedjatrika

Sustanza/i Attiv/i || Isem kummerċjali || Data || Suġġett tal-estensjoni

Levetiraċetam || Keppra || 2007/ 2009 || Estensjoni tal-indikazzjoni biex tinkludi terapija aġġuntiva fit-trattament ta’ attakki toniċi-kloniċi primarji ġġenerralizzati (PGTC) fl-adulti u l-adoloxxenti minn 12-il sena 'l fuq b'epilepsija ġġeneralizzata idjopatika; Estensjoni tal-indikazzjoni biex tinkludi trattament aġġuntiv ta’ attakki parzjali bi jew mingħajr l-ġeneralizzazzjoni sekondarja fit-tfal minn xahar sa <4 snin

Tilqima konjugata sakkaridika pnewmokoċċika, adsorbita || Prevenar || 2007 || Estensjoni tal-indikazzjoni biex tinkludi informazzjoni ġdida dwar l-effikaċja kontra l-mard ikkawżat mis-serotipi tal-istreptococcus pneumoniae 4, 6B, 9V, 14, 18C, 19F u 23F f’media otitis; Estensjoni tal-indikazzjoni minn immunizzazzjoni attiva kontra l-pulmonite batteremika sa immunizzazzjoni attiva kontra l-pnewmonja.

Infliksimab || Refmicade || 2007 || Estensjoni tal-indikazzjoni biex tinkludi t-trattament tal-marda gravi attiva tal-Crohn fit-tfal ta’ bejn is-6 snin u 17-il sena.

Darbepoetin alfa || Aranesp || 2007 || Estensjoni tal-indikazzjoni għall-pazjenti CRF, li ristrinġiet l-użu tan-Nespo għal suġġetti pedjatriċi ≥ 11-il sena

Fożamprenavir || Telzir || 2007 || Estensjoni ta’ indikazzjoni ta’ Telzir flimkien ma’ ritonavir għat-trattament għall-adulti infettati bil-virus uman tal-immunodefiċjenza tat-Tip 1 (HIV-1) flimkien ma’ prodotti mediċinali oħra antiretrovirali li jinkludu tal-popolazzjonijiet pedjatriċi

Lamivudina/żidovudina || Combivir || 2007 || Estensjoni tal-indikazzjoni biex tinkludi pazjenti pedjatriċi u s-sostituzzjoni ta’ pilloli miksija b'rita b'pilloli miksija b'rita mnaqqxin.

Desloratadina || Aerius || 2007 || Estensjoni tal-indikazzjoni minn “urtikarja kronika idjopatika” għal “urtikarja”.

Insulin gluliżina || Apidra || 2007 || L-estensjoni tal-indikazzjoni biex jinkludu tfal ta' 6 snin u akbar fl-età fuq il-bażi tar-riżultati ta' żewġ studji pedjatriċi.

Tilqima kontra l-virus tal-papilloma uman [Tipi 6, 11, 16, 18] (rikombinanti, b'aġġuvant, adsorbita) || Gardasil || 2008 || L-estensjoni tal-indikazzjoni biex tinkludi l-prevenzjoni ta’ leżjonijiet displastiċi vaġinali ta’ grad għoli (VaIN 2/3).

Adalimumab || Humira || 2008/2011 || L-estensjoni tal-indikazzjoni biex tinkludi t-trattament ta’ artrite idjopatika ġuvenili li tibda f'forma poliartikulata fl-adolexxenti minn 13 sa 17-il sena. L-estensjoni tal-indikazzjoni biex tinkludi t-trattament ta’ artrite idjopatika ġuvenili li tibda f'forma poliartikulata fil-popolazzjoni pedjatrika ta' età bejn 4 u 12-il sena.

Kaspofunġina || Cancidas || 2008 || L-estensjoni tal-indikazzjoni biex tinkludi l-popolazzjoni pedjatrika.

Etanerċept || Enbrel || 2008/2011 || L-estensjoni tal-indikazzjoni biex tinkludi t-trattament ta’ psorjasi plakka kronika qawwija fit-tfal u fl-adolexxenti mill-età ta’ sitt snin li huma huma kkontrollati b’mod inadegwat minn, jew huma intolleranti għal terapiji sistemiċi oħra jew fototerapiji. Estensjoni tal-indikazzjoni biex tinkludi firxa aktar baxxa ta’ età għall-artrite idjopatika ġuvenili li tibda f'forma poliartikulata “mill-età ta’ erba’ snin” għal “mill-età ta’ sentejn”.

Miglustat || Zavesca || 2009 || Estensjoni tal-indikazzjoni biex tinkludi t-trattament ta’ manifestazzjonijiet newroloġiċi progressivi f'pazjenti adulti u pazjenti pedjatriċi bil-marda Niemann-Pick tat-tip-Ċ

Takrolimus || Protopic || 2009 || Estensjoni tal-indikazzjoni għal "trattament ta' manteniment” wara t-tlestija ta’ studju wieħed dwar pazjenti adulti u wieħed dwar pazjenti pedjatriċi.

Tipranavir || Aptivus || 2009 || Estensjoni tal-indikazzjoni biex tinkludi t-trattament tal-infezzjoni HIV-1 f'adolexxenti pre-trattati ta' 12-il sena jew aktar b’virus reżistenti għal diversi inibituri proteażi.

Omaliżumab || Xolair || 2009 || Estensjoni tal-indikazzjoni għal tfal minn 6 sa <12 sena bħala terapija addizzjonali0 biex jittejjeb il-kontroll tal-ażma allerġika.

Aripiprażolu || Abilify || 2009 || Estensjoni tal-indikazzjoni biex tinkludu t-trattament tas-skizzofrenija fl-adolexxenti minn 15-il sena ‘l fuq.

Peginterferon alfa-2b || PegIntron || 2009 || Estensjoni tal-indikazzjoni tat-terapija kkombinata peginterferon alfa-2b u ribavirin biex tinkludi t-trattament tal-popolazzjoni pedjatrika.

Ribavirina || Rebetol || 2009 || Estensjoni tal-indikazzjoni tat-terapija kkombinata peginterferon alfa-2b u ribavirin biex tinkludi t-trattament tal-popolazzjoni pedjatrika.

Abataċept || Orencia || 2010 || Estensjoni tal-indikazzjoni biex tinkludi t-trattament ta’ artrite idjopatika ġuvenili li tibda f'forma poliartikulata minn moderata sa severa ta' pazjenti pedjatriċi ta' età ta’ 6 snin u ikbar li kellhom reazzjoni insuffiċjenti għal DMARDs oħra li jinkludu tal-inqas inibitur TNF wieħed.

Sulfat tal-atażanavir || Reyataz || 2010 || Estensjoni tal-indikazzjoni għall-kapsuli Retayaz biex tinkludi t-trattament tat-tfal infettati bl-HIV u l-adolexxenti 'l fuq l-età ta’ 6 f’kombinazzjoni ma’ prodotti mediċinali antiretrovirali oħra.

Tilqima kontra l-ħosba, il-gattone u r-rubella (ħajja) || M-M-RVAXPRO || 2010 || Estensjoni tal-indikazzjoni biex tinkludi l-amministrazzjoni għat-tfal b’saħħithom minn 9 xhur.

Ossidu nitriku || Inomax || 2011 || Estensjoni tal-indikazzjoni biex tinkludi t-trattament ta’ ipertensjoni pulmonari ta’ qabel u wara l-kirurġija tal-qalb fit-tfal.

Fumarat tat-tenofovir disoproksil || Viread || 2011 || Emenda tal-indikazzjoni ibbażata fuq ir-riżultati ta' studju dwar is-sigurtà u l-effikaċja fl-adolexxenti li għaddew minn trattamenti ta’ età minn 12 sa 18-il sena

Paliperidon || Invega || 2011 || Estensjoni tal-indikazzjoni biex tinkludi t-trattament ta' sintomi psikotiċi jew maniċi ta' disturb skizoaffettiv.

Sildenafil || Revatio || 2011 || Estensjoni tal-indikazzjoni għal pazjenti pedjatriċi bejn sena u 17-il sena b’ipertensjoni pulmonari arterjali.

Immunoglobulina umana normali għal amministrazzjoni ġol-vini (IGIV) || Kiovig || 2011 || Estensjoni tal-indikazzjoni biex tinkludi t-trattament ta’ newropatija motriċi multifokali u ipogammaglobulinemija f'pazjenti wara trapjant ematopojetiku alloġeniku ta’ ċelloli staminali fl-adulti u fit-tfal

Tokuliżumab || RoActemra || 2011 || Estensjoni tal-indikazzjoni biex tinkludi t-trattament ta’ artrite idjopatika ġuvenili sistemika attiva f'pazjenti ta' sentejn jew aktar, li jkollhom reazzjoni inadegwata għal terapija preċedenti bl-NSAIDs u l-kortikosterojdi sistemiċi.

Tilqim ikkonjugat tal-polisakkarid tal-pnewmokokkus (adsorbit) || Synflorix || 2011 || Estensjoni tal-indikazzjoni biex jiżdied il-limitu tal-età massima ta’ trabi u tfal minn sentejn sa 5 snin.

Insulina detemir || Levemir || 2011 || Estensjoni tal-indikazzjoni bħala terapija addizzjonali għat-trattament liraglutide. Estensjoni tal-indikazzjoni għal tfal ta’ 2 sa 5 snin

Ekuliżumab || Soliris || 2011 || L-estensjoni tal-indikazzjoni li jinkludu s-sindrome uremika emolitika atipika (aHUS). Rakkomandazzjoni addizzjonali ta' tilqim u profilassi antibijotiċi ġew miżjuda wkoll fit-taqsima 4.2 għat-trattament ta’ aHUS fl-adulti u t-tfal.

Tilqima kontra l-vajrus tal-papilloma uman [it-tipi 16, 18] (rikombinanti, b'aġġuvant, adsorbita) || Cervarix || 2011 || Estensjoni tal-indikazzjoni għal tfal ta’ 9 snin

Etanerċept || Enbrel || 2012 || Estensjoni tal-indikazzjoni tal-artrite idiopatika ġuvenili (JIA) li tinkludu t-tfal u l-adoloxxenti oligoartikulart estiża mill-età ta’ sentejn, it-tfal u l-adolexxenti b’artrite assoċjata ma' entesite (ERA) mill-età ta’ 12-il sena, u t-tfal u l-adoloxxenti mal-artrite psoriatika (PSA) mill-età ta’ 12-il sena.

Tilqima kontra l-ħosba, il-gattone, ir-rubella u l-variċella (ħajja) || Proquad || 2012 || Estensjoni tal-firxa tal-etajiet fl-indikazzjoni għat-tfal minn 9 xhur ‘l quddiem f'ċirkostanzi speċjali, jiġifieri kontroll tat-tifqigħ.

Għal inventarju iżjed dettaljat, inkluża informazzjoni fuq prodotti awtorizzati nazzjonalment u rotot ġodda ta’ amministrazzjoni jew forma farmaċewtika ġdida, jekk jogħġbok irreferi għall-Anness II tar- “Rapport ta' 5 snin lill-Kummissjoni Ewropea" tal-EMA.

ANNESS III — Lista ta’ proġetti ffinanzjati

Lista ta’ proġetti dwar mediċini li skaditilhom il-privattiva ffinanzjati mill-Kummissjoni Ewropea permezz tal- Programm ta' Qafas tal-UE dwar is-Saħħa: riżultati tal-qasam 4.2, sejħiet għal mediċini li skaditilhom il-privattiva 2, 3, 4 u 5.

· HEALTH-2007-4.2-1 Li jadatta mediċini li skaditilhom il-privattiva għall-ħtiġijiet speċifiċi tal-popolazzjonijiet pedjatriċi.

· HEALTH-2009-4.2-1 Li jadatta mediċini li skaditilhom il-privattiva għall-ħtiġijiet speċifiċi tal-popolazzjonijiet pedjatriċi.

· HEALTH.2010.4.2-1 Mediċini li Skaditilhom il-Privattiva għat-Tfal. FP7-HEALTH-2010-stadju-uniku.

· HEALTH.2010.4.2-2 Inizjattiva pedjatrika internazzjonali. Netwerk ta’ Eċċellenza.

· HEALTH.2011.4.2-1 Provi kliniċi għat-tfal immexxija mir-riċerkaturi dwar mediċini li tkun skaditilhom il-privattiva.

Tabella 15: Proġetti ffinanzjati ta' mediċini mhux protetti bi privattiva (li bdew sal-1 ta’ Jannar 2012) u PIPs miftiehma, jekk disponibbli.

Nru. || Akronimu || Sena ta' bidu || Għanijiet || PIP miftiehem

1 || KIEKIDS || 2011 || Biex tiġi żviluppata formolazzjoni pedjatrika ta’ etossuċċimid flessibbli, innovattiva u sikura għat-trattament ta’ assenza u ta’ epilessiji mijokloniċi fit-tfal. || MA

2 || NEO-CIRC || 2011 || Biex tiġi pprovduta dejta sikura u effikaċi għad-dobutamina, sabiex jitwettqu studji pre-kliniċi, jiġi/u żviluppat/i bijomarkatur(i) tal-pressjoni baxxa u tiġi adattata formulazzjoni għat-trabi tat-twelid || EMEA-001262-PIP01-12

3 || TAIN || 2011 || Għall-iżvilupp ta’ formulazzjoni għat-trabi tat-twelid ta’ idrokortiżon għat-trattament ta’ insuffiċjenza adrenali konġenitali u akkwistati u għall-użu fl-onkoloġija (tumuri fil-moħħ u lewkimja). || EMEA-001283-PIP01-12

4 || GRIP || 2011 || Biex tiġi implimentata matriċi ta' infrastruttura sabiex tistimula u tiffaċilita l-iżvilupp u l-użu bla periklu ta’ mediċina għat-tfal || MA

5 || DEEP || 2011 || Biex tiġi vvalutata l-farmakokinetika (PK) & il-farmakodinamika (PD) ta’ deferipron fi tfal ta' bejn 2-10 snin sabiex jiġi prodott pjan ta’ investigazzjoni pedjatriku approvat biex jintuża għal skopijiet regolatorji || EMEA-001126-PIP01-10

6 || TINN2 || 2011 || Biex jiġu evalwati l-PK u l-PD tal-ażitromiċina kontra l-urea plażma u fil-BPD fit-trabi tat-twelid. || EMEA-001298-PIP01-12

7 || Prova HIP || 2010 || Biex tiġi vvalutata l-effikaċja, is-sikurezza, il-PK, u l-PD tal-adrenalina u d-dopamina fil-ġestjoni tal-pressjoni baxxa ta’ trabi ta’ twelid fit-trabi tat-twelid prematuri u għall-iżvilupp u l-addattar ta’ formulazzjoni tat-tnejn adattata għal trabi tat-twelid sabiex tkun tista' ssir applikazzjoni għall-awtorizzazzjoni tal-kummerċjalizzazzjoni għall-użu pedjatriku (PUMA). || NA / EMEA-001105-PIP01-10

8 || PERS || 2010 || Tiffoka fuq żewġ indikazzjonijiet, l-użu ta’ risperidon fit-tfal u l-adolexxenti bi problemi ta' kondotta li mhumiex mentalment ritardjati, u l-użu tar-risperidone fl-adolexxenti li jbatu mill-iskiżofrenija. || EMEA-001034-PIP01-10

9 || NeoMero || 2010 || Netwerk multiċentrali Ewropew biex jevalwa l-farmakokinetika, is-sigurtà u l-effikaċja ta’ meropenem fis-spesis u l-meningitis fit-trabi tat-twelid. || EMEA-000898-PIP01-10

10 || NEMO || 2009 || Biex tiġi vvalutata l-effikaċja, is-sikurezza, il-PK, il-PD, u l-mekkaniżmi ta’ azzjoni tal-bumetanid f’attakki fit-trabi tat-twelid, inkluż l-effett fuq in-newrożvilupp u għall-iżvilupp u l-addattar ta' formulazzjoni bumetanid xierqa għal trabi tat-twelid sabiex tkun tista' ssir applikazzjoni għall-Awtorizzazzjoni ta' Kummerċjalizzazzjoni għal Użu Pedjatriku. || MA

11 || NEUROSIS || 2009 || L-effikaċja tal-budeżonid fit-taffija tad-displażija bronkopulmonari || EMEA-001120-PIP01-10

12 || EPOC || 2009 || Biex tiġi vvalutata l-farmakokinetika u dinamika farmakoloġika tad-doksorubiċina. || MA

13 || LOULLA & PHILLA || 2008 || L-iżvilupp ta' formolazzjonijiet likwidi orali ta' metotreksat u 6-merkaptopurina għal-lewkimja limfoblastika akuta pedjatrika. || NA/NA

14 || NeoOpioid || 2008 || Biex jitqabblu l-morfina u l-fentanil għat-taffija tal-uġigħ fit-trabi li jitwieldu qabel il-waqt. || EMEA-000712-PIP01-09

15 || O3k || 2008 || Il-formulazzjonijiet likwidi orali ċiklofosfamid u temożolomid. || EMEA-000530-PIP02-11 / NA

16 || TINN || 2008 || Għandu l-għan li jevalwa l-PK u l-PD taċ-ċiprofloksaċina u flukonażol fit-trabi tat-twelid. || MA

MA = mhux disponibbli jew mhux applikabbli

· HEALTH.2011.2.3.1-1 Provi kliniċi mmexxija mir-riċerkaturi ta’ antibijotiċi li skaditilhom il-privattiva

Tabella 16: Provi kliniċi mmexxija mir-riċerkaturi ta’ antibijotiċi li skaditilhom il-privattiva

Nru. || Akronimu || Bidu tas-sena || Għanijiet || PIP miftiehem

1 || MAGICBULLET || 2012 || L-ottimizzazzjoni tat-trattament ma’ aġenti antimikrobiċi li skaditilhom il-privattiva ma' pulmonite assoċjata ma' ventilazzjoni mekkanika || MA

2 || AIDA || 2011 || Valutazzjoni ta’ effikaċja klinika permezz ta’ approċċ farmakokinetiku/farmakodinamiku biex jottimizza l-effikaċja u jnaqqas ir-reżistenza għall-antibijotiċi li skaditilhom il-privattiva. || MA

MD = mhux disponibbli

[1]               http://ec.europa.eu/health/files/pharmacos/docs/doc2002/feb/cd_pediatrics_en.pdf.

[2]               ĠU L 378, 27.12.2006, p. 1; emendat bir-Regolament (KE) Nru 1902/2006 tal-Parlament Ewropew u tal-Kunsill tal-20 ta’ Diċembru 2006 (ĠU L 378, 27.12.2006, p. 20).

[3]               Ir-rapport ta' ħames (5) snin lill-Kummissjoni Ewropea — Rapport ġenerali dwar l-esperjenza miksuba b'riżultat tal-applikazzjoni tar-Regolament Pedjatriku, imħejji mill-Aġenzija Ewropea tal-Mediċini mal-Kumitat Pedjatriku tagħha, http://ec.europa.eu/health/files/paediatrics/2012-09_pediatric_report-annex1-2_en.pdf.

[4]               http://ec.europa.eu/health/human-use/paediatric-medicines/developments/2013_paediatric_pc_en.htm.

[5]               Ir-Regolament (KE) Nru 141/2000 tal-Parlament Ewropew u tal-Kunsill tas-16 ta’ Diċembru 1999 dwar il-prodotti mediċinali orfni, ĠU L 18, 22.1.2000, p. 1.

[6]               Komunikazzjoni mill-Kummissjoni — Linji gwida dwar il-format u l-kontenut tal-applikazzjonijiet għall-approvazzjoni jew il-modifika ta’ pjan ta’ investigazzjoni pedjatrika u talbiet għal derogi jew differimenti, ĠU C 243, 24.9.2008, p. 1.

[7]               http://www.ema.europa.eu/docs/en_GB/document_library/Report/2011/01/WC500101006.pdf.

[8]               ĠU C 28, 4.2.2009, p. 1.

[9]               Linji gwida tal-Kummissjoni – Gwida dwar il-preżentazzjoni u l-pubblikazzjoni ta' informazzjoni marbuta mar-riżultati dwar il-provi kliniċi fir-rigward tal-implimentazzjoni tal-Artikolu 57(2) tar-Regolament (KE) Nru 726/2004 u l-Artikolu 41(2) tar-Regolament (KE) Nru 1901/2006, ĠU C 302, 6.10.2012, p. 7.

[10]             http://ec.europa.eu/health/files/eudralex/vol-10/2013_01_22_tg_en.pdf.

[11]             https://www.clinicaltrialsregister.eu.

[12]             Ir-Regolament tal-Kummissjoni (KE) Nru 658/2007 tal-14 ta’ Ġunju 2007 li jikkonċerna l-penalitajiet finanzjarji għall-ksur ta’ ċerti obbligi fir-rigward ta’ awtorizzazzjoni għat-tqegħid fis-suq li ngħataw skont ir-Regolament (KE) Nru 726/2004 tal-Parlament Ewropew u tal-Kunsill (ĠU L 155, 15.6.2007, p. 10).

[13]             Ir-Regolament tal-Kummissjoni (UE) Nru 488/2012 tat-8 ta’ Ġunju 2012 (ĠU L 150, 9.6.2012, p. 68).

[14]             Reġistru ta' skadenzi biex jitqiegħed prodott fis-suq (EMA/137292/2013).

[15]             http://www.ema.europa.eu/docs/en_GB/document_library/Other/2009/10/WC500004017.pdf.

[16]             http://www.who.int/childmedicines/paediatric_regulators/en/.

[17]             Ir-Regolament (KE) Nru 469/2009 tal-Parlament Ewropew u tal-Kunsill tas-6 ta’ Mejju 2009 dwar iċ-ċertifikat ta’ protezzjoni supplimentari għal prodotti mediċinali (ĠU L 152, 16.6.2009, p. 1). Dan ir-Regolament huwa kodifikazzjoni tar-Regolament tal-Kunsill (KEE) Nru 1768/92.

[18]             Każ c-125/10 Merck Sharp & Dohme v Deutsches Patent- und Markenamt, li għadu ma ġiex ippubblikat fl-ECR, paragrafu 37: "jekk l-applikazzjoni SPC kellha tiġi rrifjutata minħabba li l-kalkolu previst fl-Artikolu 13(1) tar-Regolament Nru 1768/92 ikun irriżulta f'perjodu ta' żmien negattiv jew null, id-detentur tal-privattiva bażika ma jistax jikseb estensjoni ta' protezzjoni mogħtija minn privattiva bħal din anke jekk ikun mexxa l-istudji kollha skont il-pjan ta' investigazzjoni pedjatriku approvat, skont l-Artikolu 36 tar-Regolament Nru 1901/2006. Rifjut bħal dan x'aktarx jgħamel impatt negattiv fuq l-effett utli tar-Regolament Nru1901/2006 u jista' jhedded l-għanijiet ta' dan ir-Regolament, speċjalment il-kumpens għall-isforz li jkun sar biex jiġu evalwati l-effetti pedjatriċi tal-prodott mediċinali inkwistjoni."

[19]             Każ t-52/09 Nycomed V EMA, li għadu ma ġiex ippubblikat.

[20]             Ara r-riżultati ta’ din il-konsultazzjoni pubblika li saret mill-Kummissjoni bi tħejjija għal dan ir-rapport.

[21]             Ara d-Dokument ta’ Ħidma tal-Persunal tal-Kummissjoni. Proposta għal Regolament tal-Parlament Ewropew u tal-Kunsill dwar prodotti mediċinali għall-użu pedjatriku u li jemenda r-Regolament (KEE) Nru 1786/92, id-Direttiva 2001/83/KE u r-Regolament (KE) Nru 726/2004. Valutazzjoni tal-Impatt Estiż (Extended Impact Assessment) (COM/2004/599/F).

[22]             Id-Direttiva tal-Parlament Ewropew u tal-Kunsill 2001/83/KE tas-6 ta' Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (ĠU L 311, 28.11.2001, p. 67).

[23]             Ir-Regolament (KE) Nru 726/2004 tal-Parlament Ewropew u tal-Kunsill tal- 31 ta' Marzu 2004 li jistabbilixxi proċeduri Komunitarji għall-awtorizzazzjoni u s-sorveljanza ta' prodotti mediċinali għall-użu mill-bniedem u veterinarju u li jistabbilixxi l-Aġenzija Ewropea għall-Mediċini (ĠU L 136, 30.4.2004, p. 1).

[24]             Id-Direttiva 2001/20/KE tal-Parlament Ewropew u tal-Kunsill dwar l-approssimazzjoni tal-liġijiet, regolamenti u disposizzjonijiet amministrattivi tal-Istati Membri li jirrelataw għall-implimentazzjoni ta' prattika korretta ta' klinika fit-twettiq ta' provi kliniċi fuq prodotti mediċinali għall-użu mill-bniedem (ĠU L 121, 1.5.2001, p. 34).

[25]             Ir-rapport ta' ħames (5) snin lill-Kummissjoni Ewropea (ara n-nota f'qiegħ il-paġna 3), paġna 41.