IL-KUMMISSJONI EWROPEA

Brussell, 9.6.2021

COM(2021) 279 final

KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL EMPTY

Lejn sajd aktar sostenibbli fl-UE: is-sitwazzjoni attwali u l-orjentazzjonijiet għall-2022

{SWD(2021) 122 final}

KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL

Lejn sajd aktar sostenibbli fl-UE: is-sitwazzjoni attwali u l-orjentazzjonijiet għall-2022

1.Daħla

Din il-Komunikazzjoni tirrapporta dwar il-progress li sar lejn il-kisba tas-sajd sostenibbli fl-UE, u tirrieżamina l-bilanċ bejn il-kapaċità tas-sajd u l-opportunitajiet tas-sajd, il-prestazzjoni soċjoekonomika tas-settur, u l-implimentazzjoni tal-obbligu ta’ ħatt l-art.

Imbagħad tippreżenta l-orjentazzjonijiet ewlenin li se jsawru l-proposti u l-konsultazzjonijiet tal-Kummissjoni ma’ pajjiżi terzi dwar l-opportunitajiet tas-sajd għall-2022.

2.Progress dwar is-sajd sostenibbli

Fil-Grigal tal-Atlantiku, il-pressjoni tas-sajd naqset u l-istokkijiet tal-ħut żdiedu bejn l-2003 u l-2019. Sabiex jiġu żgurati stokkijiet tal-ħut b’saħħithom għall-ġenerazzjonijiet futuri, il-proporzjon tal-indikatur tal-mortalità mis-sajd (użat biex titkejjel is-sostenibbiltà tal-attività tas-sajd) ma jistax ikun ogħla minn wieħed, jiġifieri ma nistgħux naqbdu aktar ħut milli jistgħu jerġgħu jipproduċu l-istokkijiet tal-ħut kull sena. Fil-bidu tas-snin 2000, l-indikatur medjan tal-mortalità mis-sajd kien aktar minn 1,7 darbiet aktar mir-rendiment massimu sostenibbli (MSY), iżda dan naqas, u mill-2011 stabbilizza ruħu taħt il-1,2 u wasal qrib il-1 fl-2019.

Għall-istokkijiet ġestiti biss mill-UE fl-Atlantiku, fil-Baħar Baltiku u fi Skagerrak/Kattegat, kompla jsir progress tajjeb bl-adozzjoni tal-opportunitajiet tas-sajd għall-2021. Il-qabdiet totali permissibbli (TACs) ġew stabbiliti skont ir-rendiment massimu sostenibbli (MSY) għall-istokkijiet kollha tal-ħut b’parir dwar l-MSY, ħlief għall-aringi tal-Punent tal-Baltiku. Hawnhekk l-UE implimentat miżuri stretti ħafna f’konformità mal-pjan pluriennali għall-Baltiku (MAP) 1 . Għal żewġ TACs li qabel kienu stabbiliti fuq l-MSY (il-marlozz tan-Nofsinhar fil-Grigal tal-Atlantiku u s-salamun fil-Baltiku), il-Kunsill Internazzjonali għall-Esplorazzjoni tal-Baħar (ICES) ma pprovdiex parir dwar l-MSY, għalhekk dawn l-istokkijiet m’humiex inklużi fl-analiżi ta’ din is-sena.

L-għadd ta’ TACs (12 minn 21) stabbilit mill-Kunsill f’konformità mal-parir ta’ prekawzjoni tal-ICES 2 ukoll żdied ħafna. U ttieħdu miżuri addizzjonali għall-bakkaljaw tal-Kattegat, għall-aringi tal-Punent tal-Baltiku u għall-bakkaljaw tal-Lvant tal-Baltiku 3 .

Dan juri li l-UE għadha żżomm l-ambizzjonijiet tagħha dwar is-sajd sostenibbli għall-istokkijiet ġestiti mill-UE biss. Aħna nistinkaw biex niksbu l-istess standard għoli għall-istokkijiet innegozjati ma’ pajjiżi terzi.

Għall-istokkijiet kondiviżi tal-kavalli u l-aringi tan-Norveġja li jorqoq fir-Rebbiegħa, l-Istati kostali rilevanti ftehmu dwar il-livelli tat-TAC wara l-parir tal-MSY. Għall-istokkafixx, l-Istati kostali segwew l-istrateġija ta’ ġestjoni fit-tul għall-iffissar tat-TAC. Għall-ebda waħda minn dawn it-TACs ma huwa assigurat sajd fil-livelli miftiehma tat-TACs peress li ma għadx hemm stabbiliti arranġamenti ta’ kondiviżjoni tal-kwoti għal ebda waħda mit-tliet TACs. L-UE se żżid l-isforzi biex tindirizza l-kwistjoni fil-kuntest tal-Istati kostali. Dwar il-kavalli u l-aringi, l-UE tirrispetta s-sehem preċedenti skont l-aħħar arranġamenti ta’ kondiviżjoni.

L-UE, in-Norveġja u r-Renju Unit ftehmu li jistabbilixxu t-TACs għall-aringa, għall-barbun tat-tbajja’, għall-merlangu u għall-pollakkju iswed tal-Baħar tat-Tramuntana f’konformità mal-parir tal-ICES dwar l-MSY. Dwar il-merluzz tal-linja sewda, it-TAC ġiet stabbilita f’livell inqas minn dak fil-parir tal-ICES biex jiġi limitat l-impatt fuq il-bakkaljaw li huwa eżawrit u li jinġabar fl-istess sajda. Dwar il-bakkaljaw, filwaqt li l-UE fittxet li ssegwi l-parir tal-ICES, fil-kuntest tal-kompromess ġenerali dwar il-konsultazzjonijiet dwar it-TACs kien possibbli biss ftehim dwar it-TACs f’livelli (kemxejn) ogħla mill-parir ta’ punt uniku tal-MSY. Il-partijiet qablu li jkomplu bil-miżuri ta’ rimedju addizzjonali. It-TACs għal Skagerrak b’mod ġenerali jixbħu lil dawk għall-Baħar tat-Tramuntana, u dwar il-gambli u l-merlangu, l-UE u n-Norveġja ftehmu li jsegwu l-parir tal-ICES.

L-UE indirizzat Note Verbale lin-Norveġja fejn esprimiet li ma kinitx taqbel mal-kwota tal-bakkaljaw tal-Artiku stabbilita min-Norveġja, li hija inqas mis-sehem tradizzjonali tal-UE ta’ dan l-istokk, hija inqas mill-kwota unilaterali adottata mill-UE u mhijiex riflessa għall-bastimenti Norveġiżi/Russi. L-UE talbet lin-Norveġja tirtira d-dispożizzjonijiet diskriminatorji u esprimiet li kienet lesta tieħu kontromiżuri ta’ rimedju xierqa biex tiżgura d-drittijiet leġittimi tagħha.

Bil-ħruġ tar-Renju Unit mill-UE, l-għadd ta’ TACs ġestiti mill-UE waħedha fl-Atlantiku, fil-Baħar Baltiku u fi Skagerrak/Kattegat naqas drastikament għal 35 TACs biss (10 fil-Baltiku, erba’ fi Skagerrak/Kattegat u 21 fl-Atlantiku).

Il-Ftehim dwar il-Kummerċ u l-Kooperazzjoni (TCA) mar-Renju Unit ġie konkluż lejn tmiem l-2020 4 . Dan ma ħalliex biżżejjed żmien biex jiġu konklużi l-konsultazzjonijiet bejn l-UE u r-Renju Unit dwar il-kwoti tal-ħut għall-2021. Barra minn hekk, il-konsultazzjonijiet bejn ir-Renju Unit, in-Norveġja u l-UE u bejn l-UE u n-Norveġja kienu diffiċli u sal-mument tal-adozzjoni ta’ din id-dikjarazzjoni ta’ politika kienu għadhom ma ġewx konklużi. Sakemm jintlaħaq ftehim dwar l-istokkijiet kondiviżi, ġew stabbiliti TACs proviżorji, abbażi ta’ parir xjentifiku, għall-perjodu sal-31 ta’ Marzu 2021. Sussegwentement dawn ġew estiżi sal-31 ta’ Lulju 2021 5 , filwaqt li l-konklużjonijiet ta’ konsultazzjonijiet oħra (UE-UK-NO, UE-NO, stati kostali) iddaħħlu fir-Regolament dwar it-TACs għas-sena kollha. Għal xi stokkijiet b’ċirkostanzi speċifiċi (parir dwar 0-TAC, sajd imħallat u sitwazzjonijiet ta’ kwoti limitanti (meta l-kwota disponibbli għal speċi tkun eżawrita (ħafna) qabel il-kwoti għal speċijiet oħra maqbuda flimkien f’sajd imħallat) il-parir xjentifiku ġie segwit safejn jeħtieġu r-rekwiżiti tal-leġiżlazzjoni applikabbli tal-UE 6 u f’konformità magħhom. Eżenzjonijiet oħrajn mill-approċċ huma marbutin mal-istaġjonalità tas-sajd, l-aktar għall-istokkijiet pelaġiċi. Il-miżuri ta’ rimedju relatati meħtieġa skont il-MAPs (eż. għall-istokkijiet tal-bakkaljaw u tal-merlangu fil-Baħar Ċeltiku) ġew riportati wkoll mill-2020. 7

Fil-Baħar Mediterran u fil-Baħar l-Iswed, il-proporzjon tal-indikatur tal-mortalità mis-sajd naqas għal madwar 2,1. Għalkemm dan xorta waħda huwa aktar minn darbtejn ogħla mil-livelli sostenibbli, xi ftit titjib żgħir kien hemm. Jeħtieġ li jitkomplew l-isforzi qawwija ta’ konservazzjoni, b’mod partikolari bl-implimentazzjoni tal-MAP għall-Punent tal-Mediterran (West Med) 8 u d-Dikjarazzjonijiet ta’ MedFish4Ever 9 u Sofia 10 . L-impatt tal-miżuri ta’ ġestjoni li ttieħdu fl-2019 u fl-2020 se jidher fid-data tas-sena d-dieħla, peress li l-indikaturi ta’ monitoraġġ ikopru l-perjodu sal-2018.

L-adozzjoni tar-Regolament dwar l-Opportunitajiet tas-Sajd awtonomu għall-2021 11 għal dawn il-baċiri tal-baħar huwa pass importanti lejn ġestjoni sostenibbli tas-sajd. Dan jittrasponi pakkett sostanzjali ta’ miżuri adottati fl-2018 u fl-2019 mill-Kummissjoni Ġenerali tas-Sajd għall-Mediterran (GFCM), u jkompli bl-implimentazzjoni tal-MAP għall-Punent tal-Mediterran.

L-implimentazzjoni tal-ewwel sentejn tal-MAP għall-Punent tal-Mediterran rat tnaqqis kumulattiv ta’ 17,5 % fl-isforz tas-sajd, u aktar ħidma biex jiġu kkonsolidati u żviluppati żoni ta’ għeluq li jiżguraw tnaqqis fil-qbid inċidentali ta’ frieħ tal-ħut u ħut li jorqoq, tiġi żgurata selettività aħjar tal-irkaptu u tinġabar data dwar is-sajd rikreattiv. Il-Kummissjoni għandha l-għan li tkompli tnaqqas l-isforzi tas-sajd f’konformità mal-parir xjentifiku biex l-MSY jintlaħaq sa mhux aktar tard mill-1 ta’ Jannar 2025.

Ix-xogħol intensiv taħt il-GFCM, immexxi mill-pożizzjoni konsistenti tal-UE fl-organizzazzjonijiet reġjonali tal-ġestjoni tas-sajd (RFMOs) wassal għall-adozzjoni tal-MAP għas-sajd demersali fl-Adrijatiku 12 , li kien jinvolvi tnaqqis ta’ 12% fl-isforz għall-bastimenti bix-xbieki tat-tkarkir bid-diriġenti u tnaqqis ta’ 16% fl-isforz għall-bastimenti tat-tkarkir bit-travu fl-ewwel sentejn. Il-ġestjoni tal-istokkijiet pelaġiċi żgħar tal-Adrijatiku kompliet bi tnaqqis ta’ 15 % fil-qabdiet tul tliet snin. Ġew introdotti limiti tal-kapaċità tal-flotot għall-ispeċijiet demersali u pelaġiċi żgħar u ġiet iffriżata l-kapaċità tas-sajd għall-gambli tal-ilma fond fil-Baħar Levantin u Jonju. Ġew stabbiliti limiti tal-ħsad għall-qroll aħmar u kompliet l-implimentazzjoni tal-miżuri għas-sallura. Għall-ispeċijiet tal-Baħar l-Iswed, it-TACs ġew stabbiliti għall-barbun imperjali skont il-pjan tal-GFCM, u ġiet stabbilita kwota awtonoma għal-laċċa kaħla.

Fil-Grigal tal-Atlantiku (l-ilmijiet tal-UE biss), il-bijomassa żdiedet b’mod ġenerali mill-2007 u fl-2019 kienet bħala medja 35 % ogħla milli fl-2003 13 għal stokkijiet evalwati bis-sħiħ. Fil-Baħar Mediterran u fil-Baħar l-Iswed, il-bijomassa żdiedet mill-2015.

3.L-istat tal-flotta tal-UE

L-għadd ta’ bastimenti fil-flotta tal-UE kompla jonqos. Ir-reġistru tal-flotta tal-UE (mingħajr ir-reġjuni ultraperiferiċi) elenka 70 756 bastiment - tnaqqis ta’ 0,4%. B’mod ġenerali, il-kapaċità tal-flotta tal-UE kemm f’tunnellaġġ gross kif ukoll f’potenza tal-magna tibqa’ taħt il-limiti massimi tal-kapaċità tas-sajd stabbiliti mir-Regolament tal-PKS 14 iżda l-kapaċità ta’ xi flotot nazzjonali, speċjalment fil-Baħar Mediterran u l-Baħar l-Iswed, hija qrib ħafna tal-limiti massimi. Il-Kummissjoni se tkompli timmonitorja din is-sitwazzjoni mill-qrib, u tqis l-osservazzjoni ta’ żieda żgħira kemm fit-tunnellaġġ gross kif ukoll fil-potenza tal-magna u t-tħassib li baqa’ dwar in-nuqqas ta’ konformità mifrux mal-potenza tal-magna ddikjarata 15 . L-analiżi tal-bilanċ bejn il-kapaċità tas-sajd u l-opportunitajiet tas-sajd turi li fil-baċiri kollha tal-baħar għadd sinifikanti ta’ segmenti tal-flotta probabbilment għadhom mhumiex f’bilanċ mal-opportunitajiet tas-sajd. Fl-2018, għall-flotta kollha tal-UE, mill-182 segment tal-flotta vvalutati, 145 ma kinux f’bilanċ skont wieħed mill-indikaturi bijoloġiċi ewlenin (l-indikatur tal-ħsad sostenibbli). Għas-segmenti b’kapaċità żejda strutturali identifikata, il-Kummissjoni fakkret lill-Istati Membri bl-obbligi tagħhom li jistabbilixxu pjan ta’ azzjoni.

Rigward il-prestazzjoni ekonomika, u t-tnaqqis fid-domanda u t-tfixkil fil-katina tal-provvista li rriżultaw mit-tifqigħa tal-COVID-19 interrompew ix-xejriet pożittivi li kienu qed jidhru f’dawn l-aħħar snin. L-istimi jagħtuna x’nifhmu li l-prestazzjoni ekonomika tal-flotot tal-UE naqset fl-2020, bi tnaqqis ta’ 17 % fil-valur żbarkat, 19 % fl-impjiegi u 29 % fil-profitti netti meta mqabbla mal-2019.

Il-Kummissjoni pprovdiet appoġġ rapidu lis-settur permezz ta’ emendi għall-Fond Ewropew għall-Affarijiet Marittimi u s-Sajd (FEMS) biex tippermetti pagamenti ta’ kumpens. 136 miljun fi 22 Stat Membru kienu ppjanati għal miżuri ta’ appoġġ għall-Covid-19 taħt il-FEMS. 61 % tal-fondi ntnefqu fuq l-appoġġ għal waqfien temporanju, 17 % fuq il-kumpens lill-produtturi tal-akkwakultura u 14 % fuq l-appoġġ għas-settur tal-ipproċessar. Intgħażlu aktar minn 8 200 operazzjoni, mid-diversifikazzjoni ta’ farm tal-pjanti tal-baħar għall-produzzjoni ta’ sanitizzatur tal-idejn għal servizzi innovattivi ta’ konsenja tal-ħut permezz ta’ magni tal-bejgħ u għodod online. Saru disponibbli wkoll qafas temporanju ta’ għajnuna mill-Istat u appoġġ mill-Fond Ewropew għall-Iżvilupp Reġjonali.

B’mod ġenerali, il-flotta tal-UE baqgħet tagħmel il-qligħ fl-2020, u tirrapporta marġnijiet ta’ profitt gross u nett b’saħħithom ta’ madwar 26 % u 14 % rispettivament jew qrib il-EUR 1,5 biljun ta’ profitti grossi u EUR 800 miljun ta’ profitti netti. Dan jindika reżiljenza notevoli, bis-saħħa ta’ kombinazzjoni ta’ prezzijiet baxxi tal-fjuwil u l-isforzi tas-settur fis-snin preċedenti biex jinkiseb l-MSY. Din hija stampa ċara tal-benefiċċju tal-ekonomija blu tal-UE xprunata mis-sostenibbiltà. Il-flotta tal-UE laħqet livelli ta’ profittabbiltà relattiva qabel il-pandemija, ogħla minn dawk f’setturi oħra tal-ekonomija blu bħat-turiżmu kostali.

B’mod partikolari, id-data soċjoekonomika tissuġġerixxi li l-prestazzjoni ekonomika u s-salarji tas-sajjieda tal-UE għandhom it-tendenza li jitjiebu fejn il-flotot ikunu jiddependu minn stokkijiet li jinqabdu b’mod sostenibbli u għandhom it-tendenza li jistaġnaw fejn l-istokkijiet ikunu soġġetti għal sajd eċċessiv jew sfruttati żżejjed.

Hemm differenzi kbar fil-prestazzjoni minn kategorija għal oħra tal-flotot u minn reġjun tas-sajd għal ieħor. Segmenti ta’ flotot li joperaw fl-Atlantiku u fil-Baħar tat-Tramuntana rreġistraw prestazzjoni ekonomika ogħla minn dawk li joperaw fil-Baltiku u fil-Mediterran, fejn bosta stokkijiet għadhom qed jiffaċċjaw kwistjonijiet ta’ sajd eċċessiv jew ta’ sfruttament żejjed.

4.L-obbligu ta’ ħatt l-art

Il-kontroll u l-infurzar għadhom ta’ sfida. L-ewwel riżultati tal-awditi mnedija mill-Kummissjoni fl-2020 juru li l-Istati Membri li tlestew ir-rapporti tal-verifiki tagħhom ma adottawx il-miżuri meħtieġa biex jiżguraw il-kontroll u l-infurzar ta’ dan l-obbligu u juru rimi sinifikanti ta’ qabdiet mhux dokumentati mill-operaturi. Dan huwa kkorroborat minn rapporti oħra, inklużi 3 evalwazzjonijiet tal-konformità mill-Aġenzija Ewropea għall-Kontroll tas-Sajd (EFCA) 16 . Il-Kummissjoni qed tiżen l-għażliet possibbli biex issegwi r-riżultati tal-verifiki.

L-għodod ta’ monitoraġġ elettroniku mill-bogħod huma l-aktar mezzi effettivi u kosteffiċjenti biex jiġi mmonitorjat l-obbligu ta’ ħatt l-art. Il-Kummissjoni appoġġat l-użu ta’ dan it-tip ta’ għodod moderni ta’ kontroll fil-proposta tagħha għal sistema ta’ kontroll tas-sajd riveduta 17 u se tkompli taħdem mal-koleġiżlaturi biex jintlaħaq ftehim.

Il-ġbir u r-rapportar tad-data dwar il-qabdiet ukoll jibqgħu importanti għall-kwalità tal-parir xjentifiku u għaldaqstant għall-ilħuq tal-objettiv tal-MSY.

Sabiex tiġi ggarantita konformità aħjar mal-obbligu ta’ ħatt l-art fis-sajd imħallat, ir-Regolament dwar l-Opportunitajiet tas-Sajd jippermetti l-introduzzjoni ta’ ġabra ta’ skambju tal-kwoti biex tkopri l-qabdiet inċidentali inevitabbli mill-Istati Membri li ma għandhom l-ebda kwota 18 . Il-gruppi reġjonali tal-Istati Membri rnexxielhom jimplimentaw dan il-mekkaniżmu ta’ skambju tal-kwoti b’suċċess.

L-arranġamenti dettaljati għall-implimentazzjoni tal-obbligu ta’ ħatt l-art għandhom jiġu speċifikati jew taħt l-MAPs jew, fin-nuqqas tagħhom, fi pjanijiet temporanji għall-iskartar tal-ħut. Il-biċċa l-kbira ta’ dawn il-pjanijiet għall-iskartar tal-ħut waslu fi tmiem il-perjodu tagħhom ta’ sitt snin fl-2020. Dawn id-dispożizzjonijiet qed jaqilbu gradwalment minn pjanijiet għall-iskartar tal-ħut għal speċifikazzjonijiet adottati skont l-MAPs. Skont iż-żewġ oqfsa, fl-2020 kienu fis-seħħ total ta’ seba’ Regolamenti Delegati li jispeċifikaw l-arranġamenti għall-implimentazzjoni tal-obbligu ta’ ħatt l-art 19 .

Il-Kummissjoni hija sodisfatta li l-Istati Membri qegħdin jiffokaw iktar fuq proġetti dwar it-titjib ta’ tekniki selettivi tas-sajd biex kemm jista’ jkun jitnaqqsu u jiġu eliminati l-qabdiet mhux mixtieqa. Fi tmiem l-2020, l-Istati Membri għażlu 4 110 operazzjonijiet b’finanzjament totali mill-FEMS ta’ EUR 147,4 miljun impenjati għall-obbligu ta’ ħatt l-art (meta mqabbla ma’ 2 957 operazzjoni u EUR 116,6 miljun is-sena li għaddiet). Ġew iffinanzjati wkoll proġetti simili fil-qafas tal-Orizzont 2020. Madankollu, kif ġie nnotat mill-Kumitat Xjentifiku, Tekniku u Ekonomiku għas-Sajd (STECF), is-selettività għadha ma tjibitx f’ċertu sajd. L-użu ta’ rkapti aktar selettivi, filwaqt li qed jiżdied, għadu kajman u l-bidla minn irkapti selettivi tal-ittestjar għall-adozzjoni fil-leġiżlazzjoni għadha proċess twil. Jenħtieġu aktar sforzi mill-Istati Membri biex jitnaqqsu l-qabdiet mhux mixtieqa, speċjalment permezz ta’ titjib ta’ tekniki selettivi tas-sajd, f’konformità mal-istrateġija tal-UE dwar il-bijodiversità għall-2030 20 . Il-Fond Ewropew għall-Affarijiet Marittimi, is-Sajd u l-Akkwakultura (FEMSA) jista’ jappoġġa investimenti ta’ dan it-tip.

5.Il-messaġġi u l-orjentazzjonijiet ewlenin għall-proposti tal-opportunitajiet tas-sajd għall-2022

5.1Il-passi ewlenin lejn l-istabbiliment tal-opportunitajiet tas-sajd għall-2022

Il-Kummissjoni se tibbaża l-proposti tagħha fuq il-parir xjentifiku tal-ICES dwar il-qbid, ippubblikat f’Mejju / Ġunju u aġġornat parzjalment wara l-istħarriġ fuq il-baħar fil-ħarifa. Il-parir dwar l-istokkijiet pelaġiċi kbar se jinħareġ f’Settembru u l-parir xjentifiku tal-STECF għall-Baħar Mediterran / il-Baħar l-Iswed se jinħareġ fil-ħarifa. Il-Kummissjoni se tkopri kemm jista’ jkun stokkijiet fil-proposti inizjali tagħha.

Il-Kummissjoni tistieden lill-Istati Membri u lill-partijiet ikkonċernati biex iqisu l-parir xjentifiku hekk kif isir disponibbli għall-pubbliku. Il-partijiet ikkonċernati jistgħu wkoll jagħmlu r-rakkomandazzjonijiet permezz tal-Kunsilli Konsultattivi u l-awtoritajiet nazzjonali.

Għall-istokkijiet ġestiti ma’ sħab internazzjonali u l-opportunitajiet tas-sajd li dwarhom il-parir xjentifiku jasal aktar tard fis-sena, il-proposti se jibqgħu jinkludu l-opportunitajiet tas-sajd fil-pro memoria. L-opportunitajiet għall-istokkijiet ġestiti mar-Renju Unit u mar-Renju Unit u n-Norveġja se jiġu ppreżentati wkoll b’dan il-mod, soġġett għaż-żmien u r-riżultat ta’ dawk il-konsultazzjonijiet.

Madankollu, iż-żmien u l-forma tal-parir jistgħu jiġu affettwati mill-impatt tal-pandemija tal-COVID fuq it-twassil tal-pariri xjentifiċi u fuq il-kontinwità fis-sottomissjoni tad-data.

In-novità ewlenija din is-sena hija li maġġoranza kbira tal-istokkijiet tal-Atlantiku u tal-Baħar tat-Tramuntana ma jibqgħux jiġu deċiżi mill-UE b’mod esklużiv, wara t-TCA mar-Renju Unit.

It-tiftix ta’ livelli għolja ta’ allinjament mas-sħab internazzjonali dwar l-opportunitajiet tas-sajd u ta’ miżuri relatati ma’ standards għoljin ta’ sostenibbiltà se jkun kruċjali biex jiġi żgurat l-isfruttar sostenibbli tar-riżorsi u biex jiġu segwiti kundizzjonijiet ekwi għall-industrija tal-UE minħabba l-interkonnessjonijiet qawwija bejn il-flotot fl-ilmijiet ikkonċernati.

It-TCA jipprovdi bażi soda għall-ġestjoni sostenibbli tal-istokkijiet tal-ħut. L-UE se tfittex li tilħaq din l-ambizzjoni fil-konsultazzjonijiet dwar l-opportunitajiet tas-sajd u permezz tal-Kumitat Speċjalizzat għas-Sajd stabbilit skont it-TCA. L-implimentazzjoni tat-TCA se tkun iggwidata mill-pożizzjonijiet tal-UE fil-Kumitat Speċjalizzat, fost l-oħrajn fl-iżvilupp sal-1 ta’ Lulju 2021 tal-linji gwida li għandhom jiġu segwiti meta jiġu stabbiliti t-TACs proviżorji għall-“istokkijiet speċjali”, jiġifieri l-istokkijiet li dwarhom l-ICES jagħti parir li t-TAC ikun ta’ żero; l-istokkijiet maqbuda f’sajd imħallat jekk dak l-istokk jew stokk ieħor fl-istess sajda jkun vulnerabbli; jew stokkijiet oħra li l-Partijiet iqisu li jeħtieġu trattament speċjali.

Bejn Settembru u Novembru se jsiru konsultazzjonijiet mar-Renju Unit u man-Norveġja, bil-għan li jkun hemm konklużjoni f’waqtha qabel il-Kunsill ta’ Diċembru fejn il-Kummissjoni tittama li tinkludi r-riżultati fir-Regolament dwar it-TAC tal-2022. Jekk ma jintlaħaq l-ebda ftehim mar-Renju Unit sal-20 ta’ Diċembru 2021, it-TCA jipprevedi li kull Parti tistabbilixxi TACs proviżorji li japplikaw mill-1 ta’ Jannar fil-livell rakkomandat mill-ICES, b’TACs għal stokkijiet speċjali stabbiliti f’konformità mal-linji gwida li għandhom jiġu adottati mill-Kumitat Speċjalizzat għas-Sajd sal-1 ta’ Lulju 2021.

Il-Kummissjoni għandha l-għan li tadotta erba’ proposti għall-opportunitajiet tas-sajd fl-2022, għad-diskussjoni waqt laqgħat separati tal-Kunsill kif inhu ddettaljat fl-iskeda tax-xogħol fi tmiem din il-Komunikazzjoni.

5.2L-objettivi tal-opportunitajiet tas-sajd għall-2022

Għall-istokkijiet fil-Baħar Baltiku, Skagerrak/Kattegat u fl-ilmijiet tal-Lbiċ fejn il-ġestjoni tibqa’ deċiżjoni esklużiva tal-UE 21 , il-proposta tal-Kummissjoni se jkollha l-għan li tkompli żżomm/tnaqqas il-mortalità mis-sajd f’konformità mal-MSY għall-istokkijiet ivvalutati skont l-MSY, u li timplimenta bis-sħiħ il-pjanijiet ta’ ġestjoni li jistabbilixxu l-meded tal-mortalità tal-MSY.

Il-Kummissjoni se tipproponi li jew tuża l-valur tal-punt MSY inkella tuża l-medda tal-MSY indikata mill-ICES sakemm il-MAPs korrispondenti joffru dan il-grad ta’ flessibbiltà 22 . Il-medda ta’ fuq tal-valuri tal-MSY jistgħu jintużaw biex jiġu proposti TACs għal stokkijiet b’saħħithom, bil-kundizzjoni li l-parir xjentifiku juri l-fehma li jenħtieġ li jintlaħqu l-objettivi tal-MAP għas-sajd imħallat 23 . Għan ieħor se jkun li jinbnew mill-ġdid l-istokkijiet fil-mira li dwarhom l-ICES jirrakkomanda li ma jsirux qabdiet, b’miżuri ta’ rimedju skont l-MAPs. Se tingħata aktar attenzjoni biex tinkiseb evalwazzjoni xjentifika sħiħa tal-MSY għal dawn l-istokkijiet mill-aktar fis possibbli.

Fil-kuntest tal-obbligu ta’ ħatt l-art, il-kwoti de minimis jew b’rata għolja ta’ sopravivenza se jitnaqqsu mill-parir tal-STECF fejn xieraq. Il-Kummissjoni se tevalwa wkoll il-progress tal-Istati Membri fl-implimentazzjoni tal-miżuri attwali għat-tnaqqis tal-qbid inċidentali.

Għall-Baħar Mediterran u l-Baħar l-Iswed, il-proposta għar-Regolament dwar l-Opportunitajiet tas-Sajd se jkollha l-għan li timplimenta aktar l-MAP tal-Punent tal-Mediterran, inkluż aktar tnaqqis biex l-MSY jinkiseb sa mhux aktar tard minn Jannar tal-2025. Din se tkopri miżuri tal-GFCM li jestendu dawk li diġà huma fis-seħħ 24 u tinkludi miżuri addizzjonali adottati fl-44 sessjoni annwali tal-GFCM. L-Adrijatiku se jidher b’mod prominenti fl-opportunitajiet tas-sajd għall-2022.

Għar-riżorsi u għall-istokkijiet kondiviżi sfruttati wkoll minn pajjiżi terzi, il-Kummissjoni se timpenja ruħha ma’ dawk il-pajjiżi terzi f’isem l-UE biex tiżgura kwoti tal-ħut sostenibbli ambizzjużi skont l-istrumenti internazzjonali rilevanti (TCA, Ftehim bejn l-UE u n-Norveġja tal-1980 25 , Ftehim futur bejn l-UE, ir-Renju Unit u n-Norveġja 26 , UNCLOS).

Għall-istokkijiet ġestiti mill-RFMOs, il-Kummissjoni se tipproponi opportunitajiet tas-sajd abbażi tad-deċiżjonijiet tal-RFMOs. L-objettivi ewlenin tal-parteċipazzjoni tal-UE fl-RFMOs huma l-promozzjoni tal-konservazzjoni u l-ġestjoni sostenibbli tal-istokkijiet tal-ħut, deċiżjonijiet ibbażati fuq ix-xjenza u t-tisħiħ tal-prestazzjoni tal-RFMOs.

B’mod ġenerali, filwaqt li l-istatus dgħajjef ta’ xi stokkijiet huwa wkoll ir-riżultat ta’ fatturi oħrajn li jridu jiġu indirizzati bħat-tibdil fil-klima u t-tniġġis, jeħtieġ li l-pressjoni tas-sajd tkompli tonqos. Flimkien max-xjenzati, il-Kummissjoni se tkompli tħaffef il-ħidma fuq l-effetti tas-sajd fuq l-ekosistema, biex dawk il-fatturi jitqiesu fil-ġestjoni tas-sajd.

6.Konklużjoni

Is-sajd fl-UE jikber fis-sostenibbiltà. L-istokkijiet b’saħħithom ikomplu jikkontribwixxu għall-prestazzjoni soċjoekonomika tas-settur, li baqa’ jagħmel il-qligħ minkejja l-impatti tat-tifqigħa tal-COVID-19.

Madankollu, ir-riżorsi tas-sajd tal-UE jeħtieġu aktar protezzjoni. Dan huwa kruċjali kemm biex tiżdied is-sostenibbiltà tas-sistemi tal-ikel kif ukoll biex jiġi żgurat sors ta’ dħul sostenibbli għas-sajjieda tal-UE. Minkejja t-titjib fil-baċiri kollha tal-baħar, hemm bżonn ta’ aktar sforzi, speċjalment fil-Mediterran u fil-Baħar l-Iswed b’rati ta’ sfruttament li huma d-doppju tal-livelli sostenibbli. Sa tmiem l-2021, il-Kummissjoni se tipproponi Pjan ta’ Azzjoni ġdid għall-konservazzjoni tar-riżorsi tas-sajd u għall-protezzjoni tal-ekosistemi tal-baħar.

Bil-ħruġ tar-Renju Unit mill-UE, maġġoranza kbira tal-opportunitajiet tas-sajd fl-Atlantiku u fil-Baħar tat-Tramuntana saru responsabbiltà konġunta tal-UE tar-Renju Unit, tan-Norveġja u tal-istati kostali. Dan se jkun jinvolvi bidliet sinifikanti din is-sena fil-proċess għall-istabbiliment tal-opportunitajiet tas-sajd, u l-konsultazzjonijiet internazzjonali se jsiru l-istandard għal għadd kbir ta’ TACs. Filwaqt li tibni fuq l-ambizzjonijiet ta’ sostenibbiltà minquxa fit-TCA, il-Kummissjoni se tfittex li tkompli tiġġestixxi r-riżorsi kondiviżi b’mod sostenibbli u se tkompli taħdem biex tnaqqas kemm jista’ jkun id-differenzi fir-reġimi ta’ ġestjoni li jaffettwaw l-opportunitajiet tas-sajd u l-operazzjonijiet tal-flotot.

Il-Kummissjoni se tkompli wkoll bl-isforzi tagħha biex tikkontribwixxi għal miri ambizzjużi ta’ sostenibbiltà fit-teħid tad-deċiżjonijiet tal-RFMO.

Nistiednu lill-Istati Membri, lill-Kunsilli Konsultattivi, lill-partijiet ikkonċernati u lill-pubbliku jipprovdu rispons dwar din il-Komunikazzjoni sal-31 ta’ Awwissu 2021.

Skeda tax-xogħol ippjanata

(1) Ir-Regolament (UE) 2016/1139 tal-Parlament Ewropew u tal-Kunsill tas-6 ta’ Lulju 2016 li jistabbilixxi pjan pluriennali għall-istokkijiet tal-merluzz, l-aringi u l-laċċ ikħal fil-Baħar Baltiku u s-sajd li jisfrutta dawk l-istokkijiet (ĠU L 191, 15.7.2016, p. 1).

(2) “Il-Parir tal-ICES dwar l-opportunitajiet tas-sajd, il-qbid u l-isforzi”, 2020.

(3) Ir-Regolament (UE) 2020/1781 tal-Parlament Ewropew u tal-Kunsill tal-25 ta’ Novembru 2020 li jemenda r-Regolament (UE) 2016/1139 fir-rigward ta’ tnaqqis tal-kapaċità tas-sajd fil-Baħar Baltiku, u r-Regolament (UE) Nru 508/2014 fir-rigward tal-waqfien permanenti tal-attivitajiet tas-sajd għall-flotot li jistadu għall-bakkaljaw tal-Baltiku tal-Lvant, il-bakkaljaw tal-Baltiku tal-Punent u l-aringi tal-Baltiku tal-Punent (ĠU L 400, 30.11.2020, p. 1–6).

(4)

Il-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra, ST/5198/2021/INIT (ĠU L 149, 30.4.2021, p. 10–2539).

(5) Ir-Regolament tal-Kunsill (UE) 2021/703 tas-26 ta’ April 2021 li jemenda r-Regolamenti (UE) 2021/91 u (UE) 2021/92 fir-rigward ta’ ċerti opportunitajiet tas-sajd għall-2021 fl-ilmijiet tal-Unjoni u f’dawk mhux tal-Unjoni ST/701/2021/INIT (ĠU L 146, 29.4.2021, p.1).

(6)

Ara n-nota 6 f’qiegħ il-paġna

ST/7401/2021/INIT (ĠU L 146, 29.4.2021, p. 1–69).

(7)    Ir-Regolament tal-Kunsill (UE) 2021/92 tat-28 ta’ Jannar 2021 li jistabbilixxi l-opportunitajiet tas-sajd għall-2021 ta’ ċerti stokkijiet ta’ ħut u ċerti gruppi ta’ stokkijiet ta’ ħut, li japplikaw fl-ilmijiet tal-Unjoni, u għall-bastimenti tas-sajd tal-Unjoni, f’ċerti ilmijiet mhux tal-Unjoni (ĠU L 31, 29.1.2021, p. 31‐192).

(8)    Ir-Regolament (UE) 2019/1022 tal-Parlament Ewropew u tal-Kunsill tal-20 ta’ Ġunju 2019 li jistabbilixxi pjan pluriennali għas-sajd li jisfrutta l-istokkijiet tal-ħut tal-qiegħ fil-Punent tal-Mediterran u li jemenda r-Regolament (UE) Nru 508/2014 (ĠU L 172, 26.6.2019, p. 1-17).

(9)

 Dikjarazzjoni Ministerjali ta’ Malta MEDFISH4EVER (30 ta’ Marzu 2017).

(10)

(11) Ir-Regolament tal-Kunsill (UE) 2021/90 tat-28 ta’ Jannar 2021 li jistabbilixxi l-opportunitajiet tas-sajd għal ċerti stokkijiet ta’ ħut u għal ċerti gruppi ta’ stokkijiet ta’ ħut applikabbli fil-Mediterran u fil-Baħar l-Iswed għall-2021 (ĠU L 31, 29.1.2021, p. 1-19).

(12) Ir-Rakkomandazzjoni GFCM/43/2019/5 dwar pjan ta’ ġestjoni pluriennali għas-sajd demersali sostenibbli fil-Baħar Adrijatiku (fis-subżoni ġeografiċi 17 u 18).

(13) 2003: is-sena ta’ referenza.

(14)    Ir-Regolament (UE) Nru 1380/2013 tal-Parlament Ewropew u tal-Kunsill tal-11 ta’ Diċembru 2013 dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE (ĠU L 354, 28.12.2013, p. 22).

(15) Studju dwar il-verifika tal-potenza tal-magna mill-Istati Membri: https://op.europa.eu/s/oQKG  

(16) Ara d-dokument ta’ ħidma tal-persunal mehmuż.

(17) Proposta għal Regolament tal-Parlament Ewropew u tal-Kunsill li jemenda r-Regolament tal-Kunsill (KE) Nru 1224/2009, u li jemenda r-Regolamenti tal-Kunsill (KE) Nru 768/2005, (KE) Nru 1967/2006, (KE) Nru 1005/2008, u r-Regolament (UE) Nru 2016/1139 tal-Parlament Ewropew u tal-Kunsill fir-rigward tal-kontroll tas-sajd (COM/2018/368 final, 30.5.2018).

(18) Ir-Regolament tal-Kunsill (UE) 2020/123 tas-27 ta’ Jannar 2020 li jistabbilixxi għall-2020 l-opportunitajiet tas-sajd għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f’ċerti ilmijiet mhux tal-Unjoni (ĠU L 25, 30.1.2020, p. 1).

(19) Ara l-lista fid-dokument ta’ ħidma tal-persunal mehmuż.

(20)   https://ec.europa.eu/environment/strategy/biodiversity-strategy-2030_en  

(21) Fil-Baltiku, il-konsultazzjonijiet mal-Federazzjoni Russa kienu konklużivi dwar il-kondiviżjoni tal-kwoti tal-istokkijiet ikkonċernati, u l-UE ddeċidiet li tieħu deċiżjonijiet unilateralment għal ħafna snin.

(22)

L-ICES huwa mitlub jagħti parir li jippermetti li jiġu vvalutati l-ħtieġa u l-possibbiltà li tintuża din il-flessibbiltà.

(23)

Sabiex tiġi evitata ħsara serja lil stokk ikkawżata minn dinamika tal-istokk fi ħdan l-ispeċijiet jew bejniethom jew biex jiġu limitati varjazzjonijiet kbar bejn sena u oħra.

(24) Ir-Regolament tal-Kunsill (UE) 2021/90 tat-28 ta’ Jannar 2021 li jistabbilixxi l-opportunitajiet tas-sajd għal ċerti stokkijiet ta’ ħut u għal ċerti gruppi ta’ stokkijiet ta’ ħut applikabbli fil-Mediterran u fil-Baħar l-Iswed għall-2021 (ĠU L 31, 29.1.2021, p. 1-19).

(25)

L-UE u n-Norveġja impenjaw ruħhom f’taħditiet preliminari għal ftehim ġdid dwar is-sajd, ibbażat fuq id-DEĊIŻJONI TAL-KUNSILL tas-26 ta’ Frar 2021 li tawtorizza l-ftuħ ta’ negozjati mar-Renju tan-Norveġja għal Ftehim ġdid dwar is-sajd bejn l-Unjoni Ewropea u r-Renju tan-Norveġja (mhux ippubblikat).

(26) Abbażi tad-Deċiżjoni tal-Kunsill tal-25 ta’ Jannar 2021 li tawtorizza l-ftuħ tan-negozjati mar-Renju Unit tal-Gran Brittanja u l-Irlanda ta’ Fuq u mar-Renju tan-Norveġja għal ftehim dwar is-sajd (mhux ippubblikat)