IL-KUMMISSJONI EWROPEA
Brussell, 24.7.2020
COM(2020) 606 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
L-Aġenda u l-Pjan tal-Azzjoni tal-UE dwar id-Drogi 2021-2025
I.Introduzzjoni – Spinta mġedda sabiex tiġi indirizzata b’mod komprensiv is-sitwazzjoni relatata mad-droga
F’konformità mal-Istrateġija l-ġdida 2020-2024 dwar l-Unjoni tas-Sigurtà, il-Kummissjoni beħsiebha tintensifika b’mod sinifikanti l-azzjoni tal-UE sabiex tiġġieled kontra d-drogi illeċiti permezz ta’ Aġenda tal-UE dwar id-Drogi robusta ġdida. Minbarra l-impatt fuq l-individwi f’termini ta’ ħajjiet mitlufa, ta’ deterjorament tas-saħħa u ta’ potenzjal mhux milħuq, il-ħsara tista’ tiġi osservata f’termini ta’ tnaqqis fil-kwalità tal-ħajja fil-komunitajiet milquta minn problemi tad-droga. Huwa stmat li s-suq illeċitu tad-droga fl-UE għandu valur bl-imnut minimu ta’ EUR 30 biljun fis-sena, u jirrappreżenta sors ewlieni ta’ introjtu għall-gruppi tal-kriminalità organizzata fl-UE. Huwa importanti wkoll li wieħed jirrikonoxxi l-ħsara ekonomika konsiderevoli li tista’ tiġi attribwita għall-użu tad-droga u, b’mod aktar ġenerali, l-impatt negattiv indirett konsiderevoli li s-suq tad-droga jġib miegħu minħabba r-rabtiet ma’ attivitajiet kriminali usa’, it-tfixkil tal-ekonomija legali, il-vjolenza fil-komunitajiet, il-ħsara lill-ambjent, u billi jservi ta’ mutur sinifikanti għall-korruzzjoni li tista’ xxekkel il-governanza tajba.
Id-data kollha disponibbli tindika li, b’mod ġenerali, id-disponibbiltà tad-droga fl-Ewropa għadha għolja kemm għad-drogi naturali kif ukoll għal dawk sintetiċi. Is-suq Ewropew tad-droga qed isir dejjem aktar ikkaratterizzat mill-fatt li l-pubbliku għandu aċċess għal varjetà wiesgħa ta’ drogi b’purità għolja u b’potenza qawwija li, f’termini reali, huma normalment ekwivalenti fil-prezz jew orħos milli kienu matul l-aħħar għaxar snin. L-użu tal-eroina u ta’ opjojdi oħrajn għadu jirrappreżenta l-akbar parti tad-dannu relatat mad-droga. Ir-rotta tal-Balkani għadha l-kuritur ewlieni għad-dħul tal-eroina fl-UE, filwaqt li l-Balkani tal-Punent jidhru li għadhom sors importanti ta’ oriġini għall-kannabis erbali li tinqabad. Is-suq tal-kokaina huwa t-tieni l-akbar suq illeċitu tad-droga fl-UE, wara l-kannabis. L-użu ta’ kontejners għall-kuntrabandu tal-kokaina jfisser li l-qbid ta’ volumi kbar ta’ droga fil-portijiet issa sar komuni u l-kokaina li tinqabad fil-livell tal-bejgħ bl-ingrossa fl-Ewropa hija ta’ purità għolja, spiss ogħla minn 85 %. L-Afrika ta’ Fuq tidher li qed issir punt ta’ tranżitu aktar sinifikanti kemm għall-konsenji bl-ajru kif ukoll dawk bil-baħar tal-kokaina u tar-raża tal-kannabis maħsuba għas-swieq Ewropej u, possibbilment, għal swieq oħra.
Barra minn hekk, fl-UE tinħadem produzzjoni sinifikanti tal-kannabis u tad-drogi sintetiċi. F’termini ta’ sustanzi psikoattivi ġodda, minkejja li kien hemm tnaqqis fl-għadd tal-ewwel detezzjonijiet fl-Ewropa, dawn qed ikomplu jintbagħtu prinċipalment miċ-Ċina u mill-Indja – li huma wkoll is-sors ewlieni tal-prekursuri tad-droga użati b’mod predominanti fil-produzzjoni illeċita ta’ droga sintetika fl-UE. L-UE tidher ukoll li qed tintuża dejjem aktar bħala żona ta’ tranżitu għal xi drogi bħall-kokaina maħsuba għal swieq oħra, u drogi bħall-opjojdi sintetiċi b’potenza għolja qed jiġu nnegozjati dejjem aktar online u jintbagħtu bil-posta. Fl-aħħar nett, fid-dinja interkonnessa tal-lum, il-fenomenu tad-drogi qed isir dejjem aktar globali. Dan wassal sabiex il-komunità internazzjonali taqbel li żżid l-azzjoni tagħha, issaħħaħ il-kooperazzjoni u taċċellera l-implimentazzjoni tal-impenji konġunti sabiex tiġi indirizzata s-sitwazzjoni globali tad-drogi bħala parti mid-Dikjarazzjoni Ministerjali tal-2019 tal-Kummissjoni tan-NU dwar id-Drogi Narkotiċi (CND).
Gruppi tal-kriminalità organizzata, li aktar minn terz minnhom huma involuti direttament fis-swieq tad-droga, jadattaw irwieħhom malajr ukoll. Matul il-pandemija tal-COVID-19, il-moviment ta’ kwantitajiet kbar ta’ droga bejn l-Istati Membri baqa’ ġeneralment dak li kien qabel minkejja r-restrizzjonijiet ta’ moviment. Madankollu, il-miżuri ta’ lockdown relatati mal-COVID-19 kellhom impatt temporanju li fixkel is-suq globali tad-droga u li wassal għal xi skarsezzi ta’ ċerti drogi u żieda fil-prezzijiet tagħhom.. It-tbegħid soċjali ħoloq ukoll tfixkil fil-livell ta’ distribuzzjoni fl-Ewropa, u s-sitwazzjoni instabbli wasslet għal livelli ogħla ta’ vjolenza fost il-fornituri u d-distributuri ta’ livell intermedjarju. F’termini tal-aspetti sanitarji tad-drogi, id-domanda għas-servizzi tal-kura għad-droga u ta’ tnaqqis tal-ħsara jistgħu jkomplu jiżdiedu filwaqt li l-kontinwità tal-kura għal persuni li jużaw id-drogi saret sfida f’xi Stati Membri, minħabba nuqqas ta’ persunal, tfixkil u għeluq tas-servizzi. Peress li s-sitwazzjoni qed tinbidel malajr, se jkun daqstant ieħor importanti li jiġu identifikati fi stadju bikri u li jiġu żviluppati reazzjonijiet xierqa għall-impatt potenzjali fit-terminu medju u fit-tul tal-pandemija attwali fuq is-servizzi tad-droga, l-użu tad-droga u l-operazzjonijiet tas-suq tad-droga.
L-evalwazzjoni tal-Istrateġija tal-UE dwar id-Drogi 2013-2020 u ż-żewġ pjanijiet ta’ Azzjoni korrispondenti konsekuttivi tagħha kkonfermaw li l-fenomenu tad-droga u l-isfidi tiegħu hemm bżonn li jkomplu jiġu indirizzati fil-livell nazzjonali, tal-UE u dak internazzjonali. Fost il-konstatazzjonijiet, ta’ min jinnota li l-aspetti tas-sigurtà u tas-saħħa li jirriżultaw mis-swieq illeċiti tad-drogi għadhom ċentrali sabiex jiġu indirizzati l-elementi usa’ u orizzontali tal-fenomenu tad-drogi. Irridu nibnu fuq il-ħidma li saret fl-imgħoddi taħt l-Istrateġija tal-UE dwar id-Drogi u kif rifless mill-aġenziji speċjalizzati tal-UE għall-ġustizzja u l-affarijiet interni, speċjalment f’termini ta’ koordinazzjoni u kooperazzjoni, ta’ diskors u analiżi attivi, ta’ djalogu msaħħaħ u ta’ kooperazzjoni fix-xena internazzjonali, u ta’ fehim akbar tal-aspetti kollha tal-fenomenu tad-drogi u tal-impatt tal-interventi. L-UE teħtieġ bidla radikali fil-politika dwar id-drogi. Għalhekk, din l-Aġenda ssaħħaħ l-approċċ tal-UE għad-drogi u twassal aġenda politika kuraġġuża dwar id-drogi sabiex tixpruna bidla konkreta u ambizzjuża. Hija tintensifika l-isforzi fid-dimensjonijiet kollha tal-politika dwar id-drogi, b’mod partikolari mill-aspett tas-sigurtà fejn hija aktar b’saħħitha u tipprevedi azzjonijiet konkreti biex tindirizza n-nuqqasijiet ta’ qabel.
L-Aġenda tal-UE dwar id-Drogi ġiet żviluppata permezz ta’ proċess konsultattiv mal-Istati Membri u mal-partijiet ikkonċernati rilevanti. L-Aġenda hija infurmata mill-valutazzjoni ta’ nofs it-terminu u mill-evalwazzjoni finali tal-Istrateġija tal-UE dwar id-Drogi 2013-2020 u miż-żewġ Pjanijiet ta’ Azzjoni korrispondenti konsekuttivi tagħha. Hija tindirizza s-sitwazzjoni tad-droga kif deskritta fir-rapporti ewlenin tal-UE tal-2019 dwar id-drogi (ir-Rapport annwali Ewropew dwar id-Drogi miċ-Ċentru Ewropew għall-Monitoraġġ tad-Droga u d-Dipendenza fuq id-Droga (European Monitoring Centre for Drugs and Drug Addiction, EMCDDA) u r-Rapport tal-UE dwar is-Swieq tad-Droga mill-EMCDDA u mill-Europol) u l-World Drugs Report tal-UNODC. Id-data rreferenzjata fl-Aġenda tal-UE dwar id-Drogi hija meħuda minn dawn ir-rapporti. Hija tqis ukoll il-Gwida Ewropea dwar ir-risponsi sanitarji u soċjali għall-problemi tad-droga fejn tiġi analizzata l-evidenza teknika dwar x’jikkostitwixxi rispons effettiv għall-użu tad-droga.
II.Għanijiet u prinċipji ta’ gwida tal-politika tal-UE dwar id-drogi
Fl-isfond ta’ sitwazzjoni serja fit-traffikar tad-drogi u fl-użu ta’ drogi illeċiti fl-Ewropa, l-Aġenda tal-UE dwar id-Drogi hija favur u tieħu approċċ integrat, ibbilanċjat u multidixxiplinari bbażat fuq l-evidenza għall-fenomenu tad-drogi fil-livell nazzjonali, tal-UE u dak internazzjonali.
L-għan tal-Aġenda tal-UE dwar id-Drogi huwa li tipproteġi liċ-ċittadini permezz ta’ azzjonijiet ikkoordinati aħjar li: (i) ikollhom impatt sostantiv u li jista’ jitkejjel fuq il-kwistjonijiet ta’ sigurtà u ta’ saħħa li jirriżultaw mill-użu tad-droga u mill-operazzjonijiet tas-suq tad-droga; u, (ii) jindirizzaw il-konsegwenzi kemm diretti kif ukoll indiretti li jirriżultaw minn din il-problema, li tinkludi r-rabtiet mal-vjolenza u ma’ forom oħra ta’ kriminalità serja, problemi tas-saħħa u soċjetali relatati, ħsara ambjentali, filwaqt li jqajmu kuxjenza pubblika u politika dwar dawn il-kwistjonijiet.
L-Aġenda tal-UE dwar id-Drogi hija bbażata fuq il-prinċipji ta’ gwida li ġejjin:
a. Il-valuri fundamentali tal-Unjoni Ewropea u l-prinċipji fundamentali tad-dritt tal-UE: ir-rispett għad-dinjità tal-bniedem, il-libertà, id-demokrazija, l-ugwaljanza, is-solidarjetà, l-istat tad-dritt, is-sigurtà u d-drittijiet tal-bniedem.
b. Approċċ multidixxiplinari: sabiex tiġi implimentata l-Aġenda tal-UE dwar id-Drogi, hemm bżonn li l-imsieħba kollha fil-livell nazzjonali, l-istituzzjonijiet, il-korpi u l-aġenziji tal-UE (b’mod partikolari, ir-rwol ċentrali kontinwu li jaqdu l-EMCDDA u l-Europol), kif ukoll l-industrija u l-organizzazzjonijiet tas-soċjetà ċivili jikkooperaw aktar u aħjar.
c. Integrazzjoni fl-azzjoni esterna tal-EU: l-approċċ u l-objettivi tal-Aġenda tal-UE dwar id-Drogi jenħtieġ li jiġu segwiti b’mod koordinat u integrat mal-azzjoni esterna tal-UE. Hekk kif it-theddid u l-isfidi għas-sigurtà qed jevolvu, is-sigurtà interna u esterna qed isiru dejjem aktar marbutin flimkien. Il-protezzjoni taċ-ċittadini mill-isfidi relatati mad-drogi għalhekk teħtieġ li jkun hemm koerenza u kooperazzjoni mill-qrib, fejn xieraq, bejn l-objettivi tal-Aġenda tal-UE dwar id-Drogi u l-azzjoni esterna tal-UE. L-azzjoni esterna tal-UE fil-qasam tad-drogi jenħtieġ li tkun ibbażata fuq il-prinċipji kumplimentari u li jsaħħu lil xulxin tar-responsabbiltà kondiviża, tal-multilateraliżmu u tar-risponsi globali kkoordinati.
d. Risponsi mmexxija mix-xjenza u bbażati fuq l-evidenza u t-trawwim tal-innovazzjoni: hemm bżonn isiru sforzi biex jiġu identifikati l-prijoritajiet, jinkisbu sinerġiji u koordinazzjoni u l-konstatazzjonijiet jiġu disseminati b’mod effettiv. Jenħtieġ li l-isforzi jiġu intensifikati biex jiġu żviluppati, adottati u wżati teknoloġiji ġodda sabiex isiru monitoraġġ, analiżi u risponsi aħjar għat-tendenzi u t-theddidiet fis-swieq illegali tad-droga u sabiex tiżdied it-tħejjija għar-rispons għal tibdiliet rapidi.
L-Aġenda tal-UE dwar id-Drogi tipprovdi l-qafas politiku u strateġiku sabiex jiġu indirizzati b’mod effettiv u komprensiv l-isfidi tas-sigurtà u tas-saħħa pubblika relatati mad-droga permezz tal-użu tal-istrumenti rilevanti kollha fil-livelli lokali, nazzjonali, tal-UE u internazzjonali. Jenħtieġ ukoll li tippermetti lill-UE titkellem b’vuċi waħda meta tippromwovi l-approċċ ibbażat fuq l-evidenza, integrat, ibbilanċjat u multidixxiplinari tal-Aġenda tal-UE dwar id-Drogi. Dan huwa ta’ rilevanza partikolari meta wieħed ifittex li jsaħħaħ id-djalogu u l-kooperazzjoni ma’ pajjiżi terzi, ma’ reġjuni u ma’ organizzazzjonijiet internazzjonali, kif ukoll f’fora multilaterali.
L-Aġenda tal-UE dwar id-Drogi tistabbilixxi tmien prijoritajiet strateġiċi tal-politika tal-UE dwar id-drogi għall-ħames snin li ġejjin, fi tliet linji ewlenin. L-ewwel nett, l-Aġenda tal-UE dwar id-Drogi tipprovdi sett komprensiv ta’ miżuri ta’ sigurtà msaħħa u ffokati fuq l-aspetti kollha tat-traffikar illeċitu tad-drogi minn gruppi ta’ kriminalità organizzata sal-ġestjoni tal-fruntieri esterni, u d-distribuzzjoni u l-produzzjoni illeċiti fl-UE; It-tieni, il-prevenzjoni u s-sensibilizzazzjoni dwar l-effetti negattivi tad-drogi inkluża r-rabta tagħhom ma’ kriminalità vjolenti u ma’ forom oħra tagħha. It-tielet, li tiġi indirizzata l-ħsara relatata mad-droga huwa daqstant importanti. Irridu niżguraw li dawk li jeħtieġu l-għajnuna jkollhom aċċess għal kura effettiva u li jkun hemm fis-seħħ qafas robust għat-tnaqqis tar-riskju u tal-ħsara sabiex jitnaqqsu l-konsegwenzi negattivi tal-użu tad-droga kemm għall-persuni li jużaw id-droga kif ukoll għall-familji u għall-komunitajiet tagħhom. Fl-Aġenda l-ġdida tal-UE dwar id-Drogi, jingħata rikonoxximent speċifiku għall-appoġġ għal approċċ ibbilanċjat u komprensiv sabiex tiġi indirizzata l-kwistjoni tal-użu tad-droga fil-kuntest tal-ħabsijiet; f’qasam li, minħabba l-kuntest speċifiku tiegħu, jeħtieġ approċċ strateġiku, strutturat u kkoordinat.
L-Aġenda tal-UE dwar id-Drogi hija akkumpanjata minn Pjan ta’ Azzjoni dwar id-Drogi fl-Anness 1, li jkopri passi u attivitajiet konkreti u operazzjonali, li għandhom l-għan li jiffaċilitaw l-implimentazzjoni tat-tmien prijoritajiet strateġiċi
III.Prijoritajiet strateġiċi
a)Sigurtà mtejba – tfixkil tas-swieq tad-droga
1. It-tfixkil u l-iżmantellar ta’ gruppi tal-kriminalità organizzata b’riskju kbir relatati mad-droga li joperaw fl-Istati Membri tal-UE, jew li joriġinaw minnhom jew li jixħtuhom fil-mira tagħhom, u l-indirizzar tar-rabtiet ma’ theddidiet oħra għas-sigurtà
Is-swieq tad-droga huma ta’ natura transfruntiera u l-gruppi tal-kriminalità organizzata identifikati bħala relatati mad-droga ta’ spiss ikollhom karattru polikriminali. Fl-UE, aktar minn terz minn dawn huma direttament involuti fis-swieq tad-droga, li minnhom madwar żewġ terzi għandhom rabtiet ma’ attivitajiet kriminali usa’ li jinkludu l-korruzzjoni u l-ħasil tal-flus, li jippermettulhom iwettqu l-attivitajiet tagħhom. It-traffikar illeċitu tad-droga għandu wkoll rabtiet ma’ oqsma kriminali serji oħra, pereżempju t-traffikar tal-bnedmin, il-faċilitazzjoni ta’ immigrazzjoni illegali u t-traffikar ta’ armi tan-nar, kif ukoll il-kummerċ f’mediċini ffalsifikati, foloz, ta’ standard baxx u mhux awtorizzati. F’għadd limitat ta’ każijiet ġew identifikati rabtiet possibbli mal-iffinanzjar tat-terroriżmu / mat-terroriżmu.
Għaldaqstant, operazzjonijiet fuq skala kbira f’termini ta’ volum ta’ drogi jew ta’ profitti, kif ukoll dawk li huma fuq skala iżgħar iżda li huma ta’ ħsara partikolari minħabba l-potenza tad-drogi li joperaw fihom, bħal opjojdi sintetiċi, jenħtieġ li jkunu mira ta’ prijorità fil-livell tal-UE. Dan jenħtieġ li jiġi prijoritizzat f’sinerġija maċ-ċiklu ta’ politika tal-UE għall-kriminalità internazzjonali organizzata u serja (EMPACT)
li jidentifika, jagħti prijorità u jindirizza t-theddidiet fuq approċċ ibbażat fuq il-komoditajiet. Barra minn hekk, kemm il-miri tal-ogħla livell kif ukoll dawk stabbiliti fil-livell medju li huma importanti għas-sostenn tal-kontinwità operazzjonali tal-gruppi tal-kriminalità organizzata jenħtieġ li jkunu prijorità sabiex ifixklu l-istruttura ta’ kmand tagħhom. L-atturi kollha fil-katina li għandhom esperjenza biżżejjed sabiex jipprovdu kontinwità tal-operazzjonijiet kriminali jenħtieġ li jkunu fil-mira.
Jenħtieġ li tinxteħet attenzjoni fuq is-segwiment, l-iffriżar u l-konfiska tal-profitti kriminali enormi mit-traffikar tad-drogi u minn reati relatati sabiex titneħħa l-kapaċità tal-gruppi tal-kriminalità organizzata li jieħdu sehem f’reati futuri u li jinfiltraw l-ekonomija legali. Sabiex jiġi miġġieled b’mod effettiv it-traffikar tad-drogi, irridu niżguraw li l-profitti illegali ma jmorrux lura fil-katina tal-provvista tad-droga u ma jippermettux imġiba kriminali bħall-korruzzjoni u l-vjolenza, jew forom oħra ta’ kriminalità serja u organizzata, bħat-traffikar tal-bnedmin jew saħansitra t-terroriżmu. Barra minn hekk, jenħtieġ li jiġu kkunsidrati wkoll miżuri sabiex jiġi limitat l-użu kriminali ta’ strumenti li jippermettu l-kummerċ tad-drogi bħal tagħmir fil-laboratorji tad-drogi għall-finijiet tal-produzzjoni tad-drogi, armi tan-nar, dokumenti ffalsifikati u teknoloġija ta’ kriptaġġ. Fl-aħħar nett, il-mezzi strumentali maqbuda u kkonfiskati u r-rikavati mir-reati relatati mad-drogi jistgħu jintużaw fl-appoġġ ta’ miżuri li jnaqqsu l-provvista tad-droga u d-domanda għad-droga.
It-tielet, jenħtieġ li tissaħħaħ il-kollaborazzjoni eżistenti u ssir ħidma biex ikun hemm kooperazzjoni strutturata ma’ pajjiżi u reġjuni sors u ta’ tranżitu tad-droga, u ma’ organizzazzjonijiet reġjonali rilevanti inkluż permezz ta’ aktar programmi mmirati ta’ appoġġ u ta’ kooperazzjoni li sistematikament jinvolvu l-aġenziji rilevanti tal-UE speċjalment il-Europol u l-EMCDDA, fir-rigward tal-prevenzjoni tal-kriminalità relatata mad-droga u tal-kooperazzjoni fl-infurzar tal-liġi, kif ukoll billi jiġu indirizzati r-rabtiet ma’ forom oħra tal-kriminalità organizzata. Huwa importanti li l-Europol u l-EMCDDA jissaħħu bir-riżorsi rilevanti meħtieġa sabiex ikunu jistgħu jsostnu l-azzjonijiet operazzjonali relatati mad-droga meħuda mill-Istati Membri. F’dan il-kuntest, se jkun meħtieġ ukoll li jissaħħu l-azzjonijiet operazzjonali tal-EMPACT. Lil hinn mill-promozzjoni u l-appoġġ tal-infurzar tal-liġi fuq livell internazzjonali u tal-kooperazzjoni bejn osservatorji tad-droga, il-miżuri f’din il-prijorità se jfittxu kontinwament li jindirizzaw il-kawżi fundamentali u l-muturi prinċipali tal-kriminalità organizzata u jsaħħu r-reżiljenza tal-komunitajiet lokali.
Oqsma prijoritarji biex jiġu indirizzati:
|
1.1. L-immirar ta’ gruppi tal-kriminalità organizzata b’riskju għoli attivi madwar l-UE u fi swieq transfruntiera tad-droga, u t-tfixkil ta’ mudelli tan-negozju kriminali speċjalment dawk li jrawmu l-kollaborazzjoni bejn gruppi differenti tal-kriminalità organizzata.
1.2. Ir-rikavati u l-mezzi strumentali tal-gruppi tal-kriminalità organizzata involuti fis-swieq tad-droga, u l-użu mill-ġdid soċjali tal-assi kkonfiskati.
1.3. Il-kooperazzjoni internazzjonali ma’ pajjiżi jew ma’ reġjuni terzi u l-involviment tal-aġenziji rilevanti tal-UE.
|
2. Iż-żieda tad-detezzjoni tat-traffikar illeċitu bl-ingrossa tad-drogi u tal-prekursuri tad-droga fil-punti tad-dħul u tal-ħruġ tal-UE
Hemm bżonn li s-swieq tad-droga fl-UE jiġu kkunsidrati kemm mill-perspettivi globali kif ukoll minn dawk reġjonali Hemm sfidi speċifiċi assoċjati ma’ reġjuni differenti li jagħmlu ċerti punti tad-dħul bil-baħar, bl-art jew bl-ajru lejn u mill-UE prijorità għolja f’termini ta’ traffikar illeċitu bl-ingrossa tad-drogi u tal-prekursuri, li jinkludu sustanzi kimiċi prekursuri ġodda u mhux ikkontrollati jew taħt monitoraġġ. Jenħtieġ li tingħata attenzjoni partikolari lil “prekursuri qraba” (“designer-precursors”) peress li dawn is-sustanzi kimiċi bħalissa jintużaw b’mod predominanti fil-produzzjoni illeċita ta’ drogi sintetiċi fl-UE u joħolqu sfidi partikolari għall-awtoritajiet tal-infurzar tal-liġi. Il-punti tad-dħul u tal-ħruġ (ċentri) użati għat-traffikar tad-drogi f’kontejners jew f’merkanzija jistgħu jikkawżaw tfixkil fil-kummerċ tal-UE, jaġevolaw il-korruzzjoni u jimminaw il-governanza tajba. Barra minn hekk, il-fruntieri esterni tal-UE (tal-baħar, tal-art u tal-ajru) għandhom vulnerabbiltajiet inerenti li jistgħu jiġu sfruttati fil-kuntest tal-kummerċ tad-droga. B’mod partikolari, l-oqsma marittimi u tal-avjazzjoni madwar il-fruntieri tal-UE huma strateġikament importanti għall-monitoraġġ f’termini ta’ abbuż mit-traffikanti tad-droga. Aktar minn 70 % tal-fruntieri esterni tal-UE huma marittimi.
Għaldaqstant, il-portijiet, l-ajruporti u l-punti tad-dħul u tal-ħruġ fuq l-art importanti magħrufa fl-UE li jintużaw bħala ċentri għat-traffikar bl-ingrossa tad-droga jenħtieġ li jitqiegħdu f’lista ta’ prijorità għolja għal azzjonijiet li jimmiraw it-traffikar tad-droga. Jenħtieġ li l-miżuri jinkludu titjib fl-analiżi tar-riskju doganali tal-kontejners u tal-merkanzija, it-tfassil ta’ profili, il-kondiviżjoni tal-intelligence u kooperazzjoni effettiva fost u bejn l-aġenziji rilevanti tal-UE u l-infurzar tal-liġi, id-dwana u l-kontroll fil-fruntieri tal-Istati Membri u ta’ aġenziji rilevanti ta’ pajjiżi sħab. Skambju mtejjeb ta’ informazzjoni u kooperazzjoni msaħħa bejn l-awtoritajiet tad-dwana u l-pulizija ġew identifikati bħala kritiċi fil-ġlieda kontra l-kuntrabandu tad-droga. Jenħtieġ li tingħata attenzjoni wkoll għall-iżvilupp ulterjuri u għall-estensjoni tal-miżuri kontra l-korruzzjoni fir-rigward ta’ dawn iċ-ċentri u għall-identifikazzjoni ta’ kwalunkwe effett ta’ spostament li jirriżulta minn interventi effettivi.
It-tieni huwa importanti li jsir monitoraġġ tal-fruntieri marittimi, tal-art u tal-ajru għall-qsim illeċitu fil-kuntest tal-kummerċ tad-drogi. F’dan l-ambitu, l-attivitajiet ta’ għarfien tas-sitwazzjoni tal-fruntieri esterni kollha tal-UE jenħtieġ li jissaħħu inkluż fil-Frontex f’kooperazzjoni mal-Istati Membri. Jenħtieġ li tingħata prijorità lill-fruntieri tal-ajru u dawk marittimi minħabba vulnerabbiltajiet inerenti, monitoraġġ limitat, kif ukoll l-importanza strateġika tal-ispazju tal-avjazzjoni ġenerali, kif ukoll l-Oċean Atlantiku u l-Baħar Mediterran. Matul il-pandemija tal-COVID-19, it-trasport marittimu kompla relattivament mingħajr xkiel u l-opportunitajiet ta’ traffikar baqgħu disponibbli għall-gruppi tal-kriminalità organizzata involuti fit-trasport bl-ingrossa tad-drogi lejn l-Ewropa. Attivitajiet bħal dawk imwettqa miċ-Ċentru għall-Analiżi u l-Operazzjonijiet Marittimi - Narkotiċi (MAOC-N) jenħtieġ li jissaħħu u jiġu estiżi; eż. il-monitoraġġ ta’ bastimenti u ta’ inġenji tal-ajru ta’ interess li jġorru d-drogi illeċiti fl-ibħra internazzjonali u fl-ispazju tal-ajru madwar il-fruntieri marittimi u l-ispazju tal-ajru tal-UE li hu magħruf li huma abbużati, bl-għan li jiġu interċettati qabel ma jaslu jew malli jaslu fl-ewwel port tad-dħul tagħhom fl-UE. F’dan il-kuntest, l-ispazju tal-avjazzjoni ġenerali wkoll joħloq riskju għas-sigurtà tal-UE u qed isir dejjem aktar abbużat mit-traffikanti tad-droga, filwaqt li għadu mhux sorveljat biżżejjed. Il-kooperazzjoni internazzjonali fil-qasam marittimu u tat-traffiku tal-ajru se tibqa’ kruċjali għat-titjib fl-intelligence u għall-kapaċità ta’ azzjoni fil-ħin reali mill-Istati Membri u mill-aġenziji tal-UE inkarigati bis-sigurtà tal-fruntiera.
Oqsma prijoritarji biex jiġu indirizzati:
|
2.1. Il-kuntrabandu tad-drogi fl-UE u barra mill-UE bl-użu ta’ kanali kummerċjali stabbiliti (mezzi legali).
2.2. Il-qsim illeċitu jew mhux iddikjarat tal-fruntieri tal-UE.
|
3. Iż-żieda tal-monitoraġġ effettiv tal-kanali loġistiċi u diġitali sfruttati għad-distribuzzjoni tad-drogi f’volum medju u żgħir u ż-żieda tal-qbid ta’ kuntrabandu ta’ sustanzi illeċiti f’dawn il-kanali f’kooperazzjoni msaħħa mas-settur privat
Is-suq tad-droga qed isir dejjem aktar diġitalizzat. Kemm is-swieq tal-internet viżibbli kif ukoll dawk tad-darknet jintużaw għall-bejgħ online tad-drogi, kif ukoll l-apps tal-midja soċjali u tal-komunikazzjoni mobbli. L-użu ta’ dawn it-teknoloġiji għamel id-distribuzzjoni tad-drogi, ta’ sustanzi psikoattivi ġodda, ta’ prekursuri u ta’ tagħmir meħtieġ għall-produzzjoni tad-droga ferm aktar faċli u ħoloq sfidi ġodda għall-infurzar tal-liġi u għas-saħħa pubblika. It-traffikar tad-drogi bl-użu ta’ servizzi postali u rapidi jaffettwa l-Istati Membri kollha, u għadd ta’ pajjiżi qed jaraw żidiet konsiderevoli fl-ittri u fil-pakketti li jkun fihom id-drogi. Ir-rotot speċifiċi tal-oġġetti postali jistgħu jvarjaw ħafna, u jinkludu rotot diretti mis-sors sad-destinazzjoni jew permezz ta’ ċentri ta’ tranżitu tal-UE u postijiet mhux fl-UE. Dawn l-oġġetti postali jistgħu jew joriġinaw minn ġewwa l-UE jew minn barra l-fruntieri esterni tagħha.
Hemm bżonn ta’ titjib u koordinazzjoni fil-monitoraġġ u fl-analiżi tat-theddidiet li jirriżultaw mill-aċċessibbiltà tad-drogi permezz ta’ pjattaformi tal-midja soċjali, apps, postijiet tas-suq tal-internet / tad-darknet, kif ukoll l-użu ta’ pagamenti online (inklużi kriptovaluti) u komunikazzjoni diġitali kriptata. F’dan il-kuntest, jenħtieġ li jissaħħaħ l-involviment tas-settur privat.
It-tieni, huwa meħtieġ monitoraġġ aktar strett tal-konsenji li jkun fihom sustanzi illeċiti f’kooperazzjoni mill-qrib mas-servizzi postali u rapidi. Ir-rwol tat-teknoloġiji l-ġodda u tal-intelliġenza artifiċjali jista’ jiġi eżaminat fit-titjib tal-kontrolli u tal-proċeduri li jinkludu l-valutazzjoni tar-riskju ta’ oġġetti postali, bil-possibbiltà li tiġi implimentata b’mod sħiħ data elettronika avvanzata dwar l-oġġetti kollha li jiġu minn pajjiżi ta’ oriġini ewlenin (internazzjonali u fl-UE).
It-tielet, il-konnessjoni tat-trasport ferrovjarju transfruntiera u l-kanali tax-xmajjar kif ukoll l-ispazju tal-avjazzjoni ġenerali jistgħu jiġu sfruttati bħala kanali possibbli għat-traffikar tad-droga u bħalissa mhumiex immonitorjati biżżejjed mis-servizzi tal-infurzar tal-liġi. Hemm bżonn ta’ aktar għarfien sabiex jissaħħu l-metodi ta’ monitoraġġ u ta’ investigazzjoni ta’ portijiet tal-baħar u portijiet tax-xmajjar iżgħar, ta’ ajrudromi żgħar / lokali, u ta’ stazzjonijiet tal-ferrovija.
Oqsma prijoritarji biex jiġu indirizzati:
|
3.1. Is-swieq tad-droga diġitalizzati.
3.2. Is-servizzi postali u rapidi.
3.3. Il-kanali ferrovjarji u tax-xmajjar trans-UE u l-ispazju tal-avjazzjoni ġenerali.
|
4. L-iżmantellar tal-produzzjoni u tal-ipproċessar tad-droga, il-prevenzjoni tad-devjazzjoni u tat-traffikar tal-prekursuri tad-droga għall-produzzjoni illeċita tad-droga, u l-qerda tal-kultivazzjoni illegali
Il-produzzjoni tad-droga tirriżulta f’riskji għas-saħħa u għas-sikurezza kif ukoll fi ħsara ambjentali. Il-prevenzjoni tal-produzzjoni tad-drogi fl-Ewropa u fil-pajjiżi sħab se tikkontribwixxi b’mod sinifikanti għat-tnaqqis tal-provvista u tad-disponibbiltà tad-drogi fis-suq domestiku tal-UE u għall-esportazzjoni. Ir-rwol tal-UE bħala żona ta’ produzzjoni sinifikanti għad-drogi sintetiċi u għall-kannabis jirriżulta wkoll fi ħsara lill-ambjent permezz tar-rimi tal-iskart kimiku u joħloq riskji kemm għal dawk involuti kif ukoll għall-komunitajiet fejn isseħħ il-produzzjoni. Kull sena jintremew tunnellati ta’ skart kimiku maħluqa matul il-produzzjoni tad-droga sintetika f’siti ta’ rimi illegali. Pereżempju, huwa stmat li l-produzzjoni ta’ kilogramma amfetamina toħloq bejn 20 u 30 kg skart. Il-produzzjoni ta’ xi prekursuri minn sustanzi kimiċi alternattivi tipproduċi wkoll ammont sinifikanti ta’ skart, saħansitra minn qabel ma jseħħ il-proċess ta’ produzzjoni tad-droga sintetika.
F’dawn iċ-ċirkustanzi, hemm bżonn li l-awtoritajiet tal-infurzar tal-liġi jagħmlu aktar sforzi sabiex jiskopru u jiżmantellaw l-laboratorji tad-droga sintetika illeċita kif ukoll sabiex iwaqqfu l-esportazzjonijiet tad-drogi prodotti fl-UE. Fir-rigward tal-ħsarat ambjentali, huwa kruċjali li jiġu indirizzati l-impatti ambjentali, il-perikli għas-saħħa u l-ispejjeż assoċjati mal-iskart kimiku ġġenerat mill-produzzjoni tad-droga sintetika, kif rikonoxxut ukoll fl-EMPACT. Il-firxa tal-ħsara ġenerali għall-ambjent hija rikonoxxuta bħala għolja, iżda teħtieġ aktar investiment fil-monitoraġġ u fir-riċerka sabiex ikunu mifhuma aħjar l-isfidi li qed jikbru f’dan il-qasam. Fl-aħħar nett, kwistjonijiet relatati mad-devjazzjoni tal-prekursuri tad-droga u mal-iżvilupp tal-prekursuri qraba jenħtieġ li jiġu indirizzati fil-livell Ewropew.
It-tieni, fl-UE jew fil-viċinat qrib tagħha qed jiġu skoperti u qed jiġi żmantellati dejjem aktar siti tal-kultivazzjoni tal-kannabis. Jenħtieġ li l-miżuri jissaħħu mill-awtoritajiet tal-infurzar tal-liġi sabiex jindirizzaw aħjar il-kultivazzjoni ta’ drogi illeċiti. Barra minn hekk, il-kultivazzjoni ta’ drogi illeċiti f’pajjiżi terzi b’implikazzjonijiet possibbli għall-UE, b’mod partikolari x-xaħxieħ għall-produzzjoni tal-eroina u l-pjanti tal-koka għall-produzzjoni tal-kokaina, jenħtieġ li tiġi indirizzata wkoll b’impenn ulterjuri għal miżuri alternattivi ta’ żvilupp: l-indirizzar tal-kawżi fundamentali tal-ekonomiji tad-drogi illeċiti permezz ta’ approċċ integrat li jgħaqqad l-isforzi dwar l-iżvilupp rurali, it-tnaqqis tal-faqar, l-iżvilupp soċjoekonomiku, il-promozzjoni tal-aċċess għall-art u tad-drittijiet tal-art, il-ħarsien tal-ambjent u t-tibdil fil-klima, il-promozzjoni tal-istat tad-dritt, tas-sigurtà u tal-governanza tajba f’konformità sħiħa mal-obbligi internazzjonali tad-drittijiet tal-bniedem u ma’ impenn għall-ugwaljanza bejn il-ġeneri. Theddidiet potenzjali ġodda, bħall-produzzjoni tal-metamfetamina fuq il-bażi tal-estrazzjoni tal-efedrina u tal-psewdoefedrina minn pjanti mkabbra f’reġjuni tradizzjonali li jipproduċu l-loppju u l-introduzzjoni ta’ razez ġodda, modifikati jew aktar potenti ta’ drogi stabbiliti bbażati fuq il-pjanti, bħall-kannabis u l-koka, jenħtieġ ukoll li jiġu mmonitorjati u li jiġu vvalutati l-implikazzjonijiet possibbli tagħhom għall-UE.
Oqsma prijoritarji biex jiġu indirizzati:
|
4.1. Il-produzzjoni ta’ drogi sintetiċi u l-ħsara ambjentali.
4.2. Il-kultivazzjoni fl-UE u barra minnha.
|
b)Prevenzjoni u sensibilizzazzjoni
5. Il-prevenzjoni tal-użu tad-drogi, it-titjib tal-prevenzjoni tal-kriminalità, u s-sensibilizzazzjoni dwar l-effetti negattivi tad-drogi fuq iċ-ċittadini u l-komunitajiet
Id-domanda għad-drogi qed tiżdied. In-natura illegali tas-suq tad-droga tfisser li dawk li jużaw id-droga jistgħu jkunu esposti għal firxa wiesgħa ta’ ħsarat, li jistgħu jestendu wkoll għall-familji u għall-komunitajiet tagħhom. Għaldaqstant programmi komprensivi ta’ prevenzjoni u ta’ sensibilizzazzjoni huma kruċjali. Ħafna programmi diġà huma disponibbli, iddedikati għad-detezzjoni u l-intervent bikrin, għall-promozzjoni ta’ stili ta’ ħajja tajbin għas-saħħa u għall-prevenzjoni, flimkien ma’ programmi ffinanċjati minn fondi differenti tal-UE. Madankollu, hemm bżonn ta’ strateġiji ulterjuri li jibnu r-reżiljenza fost il-popolazzjoni ġenerali kif ukoll jiffukaw fuq dawk li huma l-aktar vulnerabbli. Minkejja l-programmi diġà fis-seħħ, tali strateġiji għadhom neqsin minn ċerti oqsma jew jinkludu miżuri li ma għandhomx bażi soda ta’ evidenza biex ikunu effettivi. Il-vjolenza li tirriżulta mill-kummerċ tad-droga, li tinkludi l-omiċidju, tikkontribwixxi għas-sentimenti ta’ nuqqas ta’ sigurtà fil-komunitajiet, kif jagħmel madankollu l-funzjonament tas-swieq tad-droga fl-ispazju pubbliku. Id-data dwar il-omiċidji marbuta mad-droga tidher li tissuġġerixxi li dan huwa fenomenu sinifikanti f’bosta pajjiżi madwar l-UE. Minħabba l-evoluzzjoni tal-mudell ta' negozju li jħaddmu l-gruppi tal-kriminalità organizzata, sar hemm theddida dejjem akbar li s-suq Ewropew tad-droga jsir mutur wara ż-żieda fil-vjolenza fil-komunitajiet tagħna u fil-prattiki korrotti fl-UE. Il-miżuri ta’ lockdown tal-COVID-19 jistgħu jżidu din it-tendenza b’aktar rivalità bejn il-gruppi relatati mad-droga.
Għaldaqstant, miżuri bbażati fuq l-evidenza għall-prevenzjoni u għall-appoġġ ta’ gruppi f’riskju li jesperimentaw bid-drogi u li jiżviluppaw tendenza ta’ kif tintuża d-droga jenħtieġ li jingħataw prijorità fuq il-bażi ta’ fehim xjentifiku kemm ta’ dawk li huma l-aktar f’riskju kif ukoll tal-approċċi li ġew ippruvati effettivi. Gruppi fil-mira importanti għall-attivitajiet ta’ prevenzjoni se jkunu l-iskejjel u ż-żgħażagħ. Madankollu, hemm bżonn ukoll li tingħata attenzjoni speċjali lil dawk il-gruppi li ġew identifikati bħala partikolarment vulnerabbli li jinkludu t-tfal u ż-żgħażagħ li jgħixu f’familji li fihom il-ġenituri għandhom passat ta’ disturbi ta’ abbuż ta’ sustanzi, dawk b’disturbi tas-saħħa mentali, dawk affettwati mill-forom differenti ta’ sindromi ta’ uġigħ / għeja kroniċi, persuni mingħajr dar, migranti u tfal mhux akkumpanjati, u żgħażagħ fis-sistema tal-ġustizzja kriminali. Il-ħtiġijiet tan-nisa li huma vulnerabbli għall-problemi tad-droga ukoll iridu jitqiesu.
It-tieni, huwa importanti li jiġi rikonoxxut l-impatt tal-kriminalità relatata mad-droga u li jiġu miġġielda t-theddidiet ta’ dawn ir-reati bħall-vjolenza u l-intimidazzjoni, kif ukoll il-korruzzjoni u l-effett negattiv assoċjat tagħhom fuq l-ekonomija legali. Hemm ukoll il-ħtieġa li jiġi miġġieled l-isfruttament ta’ gruppi vulnerabbli u dawk bi problemi ta’ droga minn gruppi tal-kriminalità organizzata. Il-ġlieda kontra dawn it-theddidiet u l-prevenzjoni tagħhom hija sfida sinifikanti li teħtieġ azzjonijiet miftiehma fil-livell tal-UE u bejn għadd ta’ setturi.
It-tielet, sensibilizzazzjoni mmirata li tinkludi l-promozzjoni ta’ għażliet ta’ stil ta’ ħajja tajbin għas-saħħa fost iż-żgħażagħ, it-tfal u l-gruppi vulnerabbli hija importanti sabiex tiżdied ir-reżiljenza tal-popolazzjoni għall-problemi tad-droga. L-għanijiet tas-sensibilizzazzjoni jistgħu jinkludu ż-żieda fl-edukazzjoni ġenerali relatata mal-effetti tad-drogi u mal-vizzju b’mod ġenerali. L-istigmatizzazzjoni marbuta mal-użu tad-droga tista’ tiġi indirizzata wkoll, speċjalment minħabba li din l-istigma jista’ jkollha influwenza detrimentali fuq is-saħħa mentali u fiżika ta’ dawk li jużaw id-droga u tista’ taġixxi wkoll bħala ostaklu għat-tfittix ta’ kura. Is-sensibilizzazzjoni effettiva relatata mad-drogi jenħtieġ li tkun adattata għat-tfal, sabiex it-tfal jifhmu aħjar il-perikli u l-konsegwenzi fit-tul tal-abbuż tas-sustanzi, tisfrutta bis-sħiħ il-kanali ta’ komunikazzjoni diġitali ġodda u innovattivi kif ukoll tkun adattata għall-kuntest soċjali lokali u għall-ħtiġijiet tal-gruppi fil-mira tal-popolazzjoni u tkun informata b’evidenza u b’evalwazzjonijiet xjentifiċi.
Oqsma prijoritarji biex jiġu indirizzati:
|
5.1. Miżuri preventivi għat-tnaqqis tal-esponiment għad-droga u għat-tisħiħ tal-protezzjoni u tar-reżiljenza ta’ dawk il-gruppi l-aktar vulnerabbli għall-iżvilupp ta’ problemi / ta’ vizzju fit-tul.
5.2. Il-prevenzjoni tal-kriminalità relatata mad-droga b’enfasi partikolari fuq il-ħtieġa li tiġi evitata l-vjolenza u li tiġi limitata l-korruzzjoni.
5.3. Iż-żieda fir-reżiljenza u t-tnaqqis tal-istigma:
|
c)L-indirizzar tal-ħsara relata mad-droga
6. It-titjib tal-aċċess għal opzjonijiet ta’ kura li jissodisfaw il-firxa ta’ ħtiġijiet tas-saħħa u ta’ rijabilitazzjoni ta’ nies li jesperjenzaw ħsara mill-użu ta’ sustanzi
L-użu ta’ sustanzi problematiku huwa kundizzjoni kronika u spiss rikorrenti li tista’ tikkawża ħsara sostanzjali mhux biss lill-persuna kkonċernata iżda wkoll lill-familja tagħha u lill-komunità usa’. Fost in-nies li jużaw id-drogi, il-konsum ta’ diversi drogi huwa komuni, li jista’ kemm iżid ir-riskji tas-saħħa kif ukoll jikkomplika t-twassil ta’ interventi effettivi. Fost dawk li l-użu tagħhom tad-droga sar dipendenza, il-kwistjonijiet tas-saħħa mentali u l-komorbiditajiet fiżiċi huma komuni u ħafna jsibu problemi sabiex iżommu impjieg regolari jew abitazzjoni sikura. Madankollu, f’ħafna pajjiżi, id-disponibbiltà tal-kura għad-droga għadha limitata wisq u jeżistu ostakli li jinibixxu t-teħid tal-kura. Huwa importanti wkoll li jiġi rikonoxxut li l-kura għad-droga trid taħdem ma’ servizzi oħra tas-saħħa u ta’ appoġġ soċjali. Huma meħtieġa servizzi komprensivi u integrati li jirrikonoxxu l-użu ta’ sustanzi bħala problema tal-kura tas-saħħa u li jibbażaw ukoll fuq firxa ta’ servizzi oħra tas-saħħa u ta’ appoġġ soċjali, bħal dawk li jindirizzaw l-abitazzjoni, l-impjiegi jew il-ħtiġijiet edukattivi. Dan se jsir dejjem aktar importanti minħabba l-impatt soċjali u ekonomiku tal-pandemija tal-COVID-19.
Għal dawn ir-raġunijiet, hemm bżonn li l-ostakoli għall-aċċess għall-kura jiġu indirizzati billi jiġi żgurat li s-servizzi tal-kura tas-saħħa u dawk soċjali jkunu disponibbli biżżejjed u xierqa għall-ħtiġijiet tal-gruppi ta’ klijenti tagħhom. Jenħtieġ li l-ostakli għall-aċċess jitnaqqsu fir-rigward tal-karatteristiċi ewlenin tal-grupp fil-mira, bħall-fatturi demografiċi (eż. l-età, il-ġeneru, l-edukazzjoni, l-isfond kulturali), il-fatturi tas-sitwazzjoni (eż. il-faqar, iċ-ċirkustanzi tal-familja, iċ-ċirku soċjali, il-migrazzjoni), u l-fatturi personali (eż. is-saħħa fiżika u mentali, il-benesseri psikoloġiku). Hemm bżonn li jitqiesu wkoll il-konsulenza u t-trattament li jindirizzaw il-bżonnijiet speċifiċi tat-tfal.
It-tieni, hemm bżonn jittieħdu miżuri biex jiġu identifikati u indirizzati aħjar l-ostakli li n-nisa jiffaċċjaw sabiex jidħlu f’kuntatt mas-servizzi tal-kura u tar-riabilitazzjoni u jżommu l-involviment magħhom. Dawn jinkludu l-vjolenza domestika, it-trawma, l-istigma, problemi tas-saħħa fiżika u mentali, u kwistjonijiet relatati mat-tqala u mal-indukrar tat-tfal, li jistgħu jkunu aggravati mill-fatturi demografiċi, tas-sitwazzjoni u personali msemmija aktar ’il fuq. It-twassil effettiv tas-servizz jenħtieġ li jkun sensittiv għall-ħtiġijiet speċifiċi u għall-esperjenzi tal-ħajja tan-nisa bi problemi tad-droga, jagħraf li x-xejriet ta’ użu tad-droga u l-problemi jistgħu jvarjaw minn dawk tal-irġiel, inkluża inċidenza akbar possibbli ta’ problemi assoċjati mal-użu ta’ mediċini bir-riċetta. Hemm bżonn li jiġu kkunsidrati wkoll opzjonijiet ta’ servizz għan-nisa biss jew forom oħra ta’ alternattivi speċjalizzati, bħal sħubijiet ta’ ħidma mill-qrib ma’ fornituri tal-kura u ma’ servizzi li jaħdmu ma’ nisa vulnerabbli, jew mal-vittmi tal-vjolenza domestika.
It-tielet, jenħtieġ li tiġi rikonoxxuta d-diversità evidenti fost dawk li jużaw id-droga u jittieħdu sabiex jingħataw servizzi li jistgħu jindirizzaw din id-diversità u jirriflettu l-ħtiġijiet ta’ gruppi differenti fir-rigward tal-użu problematiku tad-droga. Gruppi speċifiċi bi bżonnijiet aktar kumplessi jinkludu: il-parti tal-popolazzjoni li qed tixjieħ li tuża sustanzi fuq medda twila ta’ żmien, il-persuni b’saħħa mentali komorbida u bi problemi ta’ abbuż ta’ sustanzi, il-persuni mingħajr dar u n-nisa vulnerabbli. L-involviment effettiv ta’ dawn il-gruppi jeħtieġ mudelli ta’ kura li jagħrfu l-ħtieġa ta’ sħubijiet bejn servizzi differenti bejn il-fornituri tas-saħħa u tal-kura soċjali, u l-gruppi tal-pazjenti / tal-persuni li jindukraw.
Oqsma prijoritarji biex jiġu indirizzati:
|
6.1. L-aċċess għal servizzi ta’ kura u ta’ riabilitazzjoni u l-kopertura tagħhom fuq il-bażi tal-ħtiġijiet individwali.
6.2. Kura li tindirizza l-ħtiġijiet speċifiċi tan-nisa.
6.3. Il-mudelli ta’ kura li huma xierqa għal gruppi bi bżonnijiet aktar kumplessi.
|
7. Iż-żieda tal-effiċjenza tal-interventi ta’ tnaqqis tar-riskju u tal-ħsara sabiex tkun protetta s-saħħa ta’ dawk li jużaw id-droga u tal-pubbliku
Il-protezzjoni tal-persuni li jużaw id-drogi u tal-pubbliku mill-ħsarat assoċjati mal-użu tad-droga teħtieġ qafas ta’ intervent f’oqsma differenti ta’ ħsara u ta’ riskju potenzjali li jista’ jgħin sabiex jinkisbu eżiti tas-saħħa u soċjali aħjar maż-żmien. Miri potenzjali importanti għall-interventi f’dan il-qasam jinkludu miżuri sabiex jitnaqqas ir-riskju ta’ infezzjonijiet bl-HIV / AIDS jew bl-epatite virali fost persuni li jinjettaw id-drogi, il-prevenzjoni ta’ doża eċċessiva, u approċċi li jħeġġu lin-nies biex jużaw id-drogi sabiex jadottaw imġiba b’riskju aktar baxx u jippromwovu objettivi relatati mas-saħħa u mas-sikurezza. L-effetti fit-tul tal-użu tad-droga fuq imħuħ żgħażagħ li jkunu għadhom qed jiżviluppaw, bħall-adoloxxenti, huma kwistjoni importanti wkoll. Jenħtieġ li jissaħħu l-miżuri li jillimitaw ir-riskju ta’ inċidenti tat-triq fost il-persuni li jsuqu taħt l-influwenza tad-drogi, jew taħt l-influwenza tad-drogi u tal-alkoħol flimkien. Qafas biex titnaqqas il-ħsara jenħtieġ li jagħti prijorità li jingħataw alternattivi għal miżuri koerċittivi li jistgħu jgħinu sabiex jitnaqqsu l-livelli tal-użu ta’ sustanzi, u jista’ jnaqqas ir-rati tar-reċidività u jtaffi l-piż finanzjarju u amministrattiv u l-ispejjeż soċjali.
Bħala tweġiba, l-inizjattivi ta’ tnaqqis tal-ħsara jridu jiġu estiżi. Programmi ta’ labar u siringi, il-kura ta’ sostituzzjoni għall-opjojdi, kmamar tal-konsum, u miżuri innovattivi oħra għat-tnaqqis tal-ħsara b’evidenza ta’ effettività, u ttestjar aċċessibbli għall-virus tal-epatite C (HCV) jistgħu jkunu interventi effettivi li jipprevjenu infezzjonijiet li jinġarru fid-demm fost persuni li jinjettaw id-drogi. Dawn huma interventi importanti mmirati lejn il-qerda tal-epidemija tal-HIV / AIDS u l-eliminazzjoni tal-epatite virali bħala theddida għas-saħħa pubblika fost il-persuni li jinjettaw id-drogi, peress li jipprevjenu infezzjonijiet ġodda u jipprovdu wkoll opportunità sabiex jintlaħqu popolazzjonijiet b’riskju għoli għall-ittestjar u sabiex dawn jitqarrbu lejn il-kura.
It-tieni, l-użu ħażin ta’ mediċini kkontrollati bir-riċetta jista’ jaffettwa persuni minn kull qasam tal-ħajja, minn sfondi u minn komunitajiet differenti. Id-devjazzjoni ta’ drogi ta’ sostituzzjoni għall-kura tad-dipendenza fuq l-opjojdi, mill-użu maħsub tagħhom fil-kura għad-droga għall-użu mhux mediku u l-bejgħ fi swieq tad-drogi illeċiti hija kawża partikolari ta’ tħassib. Iżda jeżisti wkoll tħassib dwar il-potenzjal li mediċini psikoattivi oħra, speċjalment dawk użati għas-serħan mill-uġigħ, jintużaw ħażin. Huwa wkoll ta’ tħassib li s-sustanzi mediċinali kultant jiġu mmanifatturati jew jinkisbu b’mod illeċitu minn sorsi online minn barra l-UE. L-użu ta’ sustanzi devjati ġie assoċjat ma’ doża eċċessiva fatali u mhux fatali u ma’ inċidenza akbar ta’ dipendenza, spiss ta’ dipendenza fuq l-opjojdi. Madankollu, fl-istess ħin, huwa importanti li l-approċċi f’dan il-qasam jiżguraw li l-mediċini u sustanzi kkontrollati oħra jkunu disponibbli għal skopijiet terapewtiċi u xjentifiċi xierqa.
It-tielet, il-kooperazzjoni ma’ pajjiżi terzi, ma’ reġjuni u ma’ organizzazzjonijiet reġjonali rilevanti jenħtieġ li tindirizza wkoll aspetti relatati mas-saħħa tal-problema tad-droga, b’mod partikolari l-impatt tal-interventi ta’ tnaqqis tad-domanda u tal-provvista fuq dawk li jużaw id-droga u l-pubbliku. Il-kura, it-tnaqqis tal-ħsara u l-alternattivi għas-sanzjonijiet koerċittivi jenħtieġ li jkunu punti permanenti fl-aġenda ta’ djalogi ddedikati dwar id-drogi ma’ pajjiżi terzi jew ma’ reġjuni, fejn dawn il-miżuri għadhom mhumiex fis-seħħ.
Ir-raba, is-sewqan taħt l-influwenza tad-drogi huwa problema ta’ sikurezza fit-toroq minħabba li dan ixekkel il-kapaċità li wieħed isuq u jżid ir-riskju tal-inċidenti. Hemm bżonn ta’ aktar sforzi biex jitjieb l-ittestjar ta’ sewwieqa taħt l-effett tad-drogi. Barra minn hekk, hemm bżonn ta’ sensibilizzazzjoni sabiex jiġu enfasizzati r-riskji tas-sewqan taħt l-effett tad-drogi. Dan il-qasam jeħtieġ aktar riċerka u żvilupp sabiex jiġu identifikati u evalwati risponsi effettivi ta’ politika u operazzjonali, inkluż l-iżvilupp ta’ metodi ta’ ttestjar u għodod orħos għad-detezzjoni tad-droga.
Il-ħames, għalkemm l-Istati Membri kollha jħaddmu tal-anqas miżura kkunsidrata bħala alternattiva għas-sanzjonijiet koerċittivi, hemm bżonn li jiżdiedu l-isforzi u li tiġi integrata l-implimentazzjoni ta’ alternattivi effettivi għal sanzjonijiet koerċittivi għal trasgressuri li jabbużaw mid-droga. F’dan il-qasam hemm bżonn ta’ data aktar komprensiva u fil-fond.
Is-sitta, doża eċċessiva u forom oħra ta’ mortalità li setgħet ġiet evitata assoċjati mal-użu tad-droga huma l-ħsara l-aktar gravi tal-użu tad-droga. L-intervent effettiv sabiex jitnaqqsu d-dożi eċċessivi tad-droga għadu juri diskrepanza ċara fir-risponsi attwali, bin-numru ta’ dożi eċċessivi fatali tad-droga li għadu għoli f’ħafna pajjiżi u saħansitra qed jiżdied f’xi wħud minnhom. Minkejja xi avvanzi potenzjalment importanti li saru dan l-aħħar, pereżempju, l-użu aktar mifrux ta’ antagonisti tal-opjojdi bħal nalosson, l-iżgurar tad-disponibbiltà tiegħu u l-promozzjoni tal-użu xieraq fir-rispons għal dożi eċċessivi tad-droga jew fl-intervent fihom għadu ta’ importanza assoluta. Barra minn hekk, hemm sfidi relatati ma’ data komprensiva dwar l-imwiet minħabba dożi eċċessivi madwar l-UE għal raġunijiet li jinkludu nuqqas sistematiku ta’ rapportar, nuqqas ta’ kapaċità tossikoloġika, u proċessi ta’ reġistrazzjoni li jirriżultaw f’dewmien fir-rapportar.
Oqsma prijoritarji biex jiġu indirizzati:
|
7.1. Mard infettiv relatat mad-droga.
7.2. L-użu ħażin ta’ mediċini u l-aċċess għal sustanzi kkontrollati esklussivament għal skopijiet mediċi u xjentifiċi u d-devjazzjoni possibbli tagħhom.
7.3. Il-kooperazzjoni internazzjonali bil-ħsieb li tiġi protetta s-saħħa ta’ dawk li jużaw id-droga.
7.4. Is-sewqan taħt l-effett tad-droga.
7.5. Alternattivi għal sanzjonijiet koerċittivi.
7.6. Doża eċċessiva u mwiet relatati mad-droga.
|
8. L-iżvilupp ta’ approċċ ibbilanċjat u komprensiv għall-użu tad-drogi fil-ħabsijiet (it-tnaqqis tad-domanda u r-restrizzjoni tal-provvista)
Dawk li jużaw id-droga jifformaw parti kbira mill-popolazzjoni ġenerali tal-ħabsijiet. Il-maġġoranza tal-priġunieri użat drogi illeċiti f’xi punt f’ħajjitha, u ħafna minn dawn għandhom xejriet kroniċi u problematiċi ta’ użu tad-drogi. Għalkemm xi individwi jwaqqfu jew inaqqsu l-użu tad-drogi meta jintbagħtu l-ħabs, oħrajn jibdew jużaw id-droga jew iġibu ruħhom b’mod li jdaħħalhom f’aktar inkwiet meta jidħlu l-ħabs. Minbarra l-livelli għoljin ta’ problemi tad-droga, il-priġunieri jesperjenzaw wkoll livell anqas ta’ saħħa meta mqabbla mal-popolazzjoni ġenerali, bi prevalenza ogħla ta’ infezzjonijiet li jinġarru fid-demm kif ukoll rati għolja ta’ mard mentali. Għal dawk li jużaw l-opjojdi, ir-riskju li jmutu minħabba doża eċċessiva ta’ droga jiżdied ħafna fil-perjodu wara li jinħelsu mill-ħabs, minħabba rati għoljin ta’ reċidività u tolleranza aktar baxxa għall-opjojdi. Jenħtieġ li jiġu identifikati u mfixkla l-kanali li jfornu d-drogi fil-ħabsijiet u dawk involuti fis-sostenn ta’ dawn il-kanali.
Għalhekk, hemm bżonn li l-kontinwità tal-kura, tar-riabilitazzjoni u tal-irkupru għad-delinkwenti li jabbużaw mid-droga fil-ħabs tingħata kemm waqt li jkunu l-ħabs u wara li joħorġu kif ukoll, finalment, għall-integrazzjoni soċjali tagħhom mill-ġdid. L-iżvilupp ta’ mudell kontinwu ta’ kura adattat għal kull Stat Membru u għall-kuntest tal-ħabsijiet u ta’ servizz ta’ probation jista’ jkun essenzjali sabiex jippermetti lill-priġunieri jaċċessaw il-firxa ta’ appoġġ li għandhom bżonn sabiex jilħqu l-għanijiet ta’ rkupru personali tagħhom waqt li jkunu l-ħabs, jitnaqqsu r-riskji u tiġi promossa l-parteċipazzjoni kontinwa f’servizzi ta’ kura u ta’ riabilitazzjoni wara li jkunu skontaw is-sentenza tagħhom.
It-tfixkil tal-kanali li jissuplixxu d-drogi (u oġġetti illegali oħra) fil-ħabsijiet, u l-identifikazzjoni tal-persuni li jipparteċipaw f’dawk il-kanali jenħtieġ li jkunu prijorità. F’dan il-kuntest, il-ħidma mas-servizzi tal-infurzar tal-liġi, il-kondiviżjoni ta’ informazzjoni, il-ġlieda kontra l-korruzzjoni, l-użu tal-intelligence u l-ittestjar tad-droga jistgħu jifformaw il-bażi ta’ intervent effettiv.
Oqsma prijoritarji biex jiġu indirizzati:
|
8.1. Il-kontinwità tal-kura fil-ħabs u s-servizzi ta’ probation.
8.2. Ir-restrizzjoni tal-provvista ta’ drogi fil-ħabsijiet.
|
IV.Il-governanza, l-implimentazzjoni u l-monitoraġġ tal-Aġenda tal-UE dwar id-Drogi
L-Aġenda tal-UE dwar id-Drogi hija akkumpanjata minn Pjan ta’ Azzjoni li jkopri l-istess perjodu sabiex il-Prijoritajiet Strateġiċi tal-Aġenda tal-UE dwar id-Drogi jissarrfu fi stadji u f’attivitajiet operazzjonali konkreti. Il-Pjan ta’ Azzjoni dwar id-Drogi jiġbor flimkien kemm l-aspetti interni kif ukoll dawk esterni meħtieġa sabiex jiġu implimentati l-objettivi tal-Aġenda tal-UE dwar id-Drogi. Bil-ħsieb li jittejbu s-sigurtà u s-saħħa fil-kuntest tal-fenomenu tad-drogi, l-azzjonijiet previsti fil-Pjan ta’ Azzjoni dwar id-Drogi jenħtieġ li jikkontribwixxu wkoll għall-implimentazzjoni tal-Istrateġija dwar l-Unjoni tas-Sigurtà, u tal-għanijiet applikabbli tal-Aġenda 2030 għall-Iżvilupp Sostenibbli.
Il-figura 1 turi l-atturi ewlenin involuti fil-politika dwar id-drogi – l-istabbiliment u l-kontribut għat-twaqqif ta’ prijoritajiet ta’ politika fl-Aġenda tal-UE dwar id-Drogi; l-implimentazzjoni: it-tattika u l-operazzjonijiet – li jikkonċernaw l-implimentazzjoni tal-azzjonijiet prijoritizzati fil-Pjan ta’ Azzjoni dwar id-Drogi; il-monitoraġġ – l-appoġġ fl-analiżi tal-progress miksub; u l-koordinazzjoni tal-implimentazzjoni.
Hija meħtieġa koordinazzjoni aktar b’saħħitha fl-istituzzjonijiet tal-UE, fil-korpi u fl-aġenziji rilevanti tal-UE, fl-Istati Membri u s-soċjetà ċivili tal-UE kif ukoll bejniethom. Barra minn hekk, sabiex jiġu segwiti l-approċċ u l-objettivi tal-Aġenda tal-UE dwar id-Drogi, hija meħtieġa kooperazzjoni internazzjonali msaħħa bejn l-UE, il-pajjiżi terzi u r-reġjuni, u l-organizzazzjonijiet u l-korpi internazzjonali, kif ukoll fuq livell multilaterali. Is-Servizz Ewropew għall-Azzjoni Esterna (SEAE) għandu rwol qofol fl-għoti ta’ appoġġ għal dawn l-isforzi, inkluż permezz tad-Delegazzjonijiet tal-UE u l-istrumenti tal-l-Politika Estera u ta' Sigurtà Komuni (PESK) bħall-missjonijiet u l-operazzjonijiet tal-Politika ta' Sigurtà u ta' Difiża Komuni (PSDK) u n-network tal-esperti dwar il-kontroterroriżmu / is-sigurtà.
Barra minn hekk, jenħtieġ li jiġi żgurat l-impenn mal-Forum tas-Soċjetà Ċivili tal-UE dwar id-Drogi fl-implimentazzjoni, fl-evalwazzjoni u fl-għoti ta’ kontribut għall-iżvilupp tal-politiki dwar id-droga fil-livell tal-UE u dak internazzjonali.
Qabel ma jintemm it-terminu tal-Aġenda tal-UE dwar id-Drogi fl-2025, il-Kummissjoni Ewropea se tagħmel evalwazzjoni indipendenti tal-Aġenda u tal-Pjan ta’ Azzjoni tal-UE dwar id-Drogi u tqis il-kontribut mill-atturi kollha involuti fil-governanza kif ukoll minn partijiet ikkonċernati rilevanti oħra, u fid-dawl tal-iżvilupp tal-politika tal-UE dwar id-drogi fil-ġejjieni.
Figura 1: Erba’ livelli ta’ governanza
Jenħtieġ li r-riżorsi jkunu allokati b’mod proporzjonali għal dawk il-prijoritajiet strateġiċi, l-oqsma u l-interventi li jkollhom l-akbar probabbiltà li jwasslu biex jintlaħqu l-objettivi tal-Aġenda tal-UE dwar id-Drogi fil-livelli tal-UE, dawk nazzjonali kif ukoll lokali. Għalhekk, il-ħtieġa għal mod kif titkejjel l-effettività globali tar-rispons għall-problema tad-droga hija importanti. Il-finanzjament li jsostni l-prijoritajiet stabbiliti f’din l-Aġenda jenħtieġ li jiġi allokat minn sorsi ta’ finanzjament transsettorjali tal-UE, inklużi b’mod partikolari l-Fond għas-Sigurtà Interna u l-programm tal-UE għas-Saħħa (EU4Health), il-Fond Soċjali Ewropew+, il-programm dwar il-Ġustizzja, il-parti tar-riċerka dwar is-sigurtà ta’ Orizzont Ewropa, il-Fondi tal-Politika ta’ Koeżjoni, il-programm Ewropa Diġitali u l-programm dwar id-Drittijiet u l-Valuri.
Il-monitoraġġ tal-progress fl-implimentazzjoni tal-Aġenda u tal-Pjan ta’ Azzjoni tal-UE dwar id-Drogi se jkollu l-appoġġ ta’ sistema kkoordinata ta’ monitoraġġ, ta’ evalwazzjoni u ta’ riċerka. Il-livell ta’ progress milħuq fil-ksib tal-prijoritajiet strateġiċi u tal-azzjonijiet relatati kif deskritti fil-Pjan ta’ Azzjoni dwar id-Drogi, se jkun iddeterminat bl-użu ta’ indikaturi tal-prestazzjoni marbuta ma’ kull prijorità strateġika. Il-Kummissjoni Ewropea, bl-appoġġ tal-EMCDDA, u ta’ aġenziji tal-UE u ta’ korpi oħra tal-UE, skont kif ikun rilevanti, se tissorvelja u tikkoordina l-implimentazzjoni tal-Aġenda tal-UE dwar id-Drogi.
V.Konklużjoni
Il-Kummissjoni qed tqiegħed ir-risponsi tal-UE għall-problema tal-kriminalità organizzata u tad-drogi fil-qalba tal-aġenda politika tal-UE, u qed tmexxi approċċ strateġiku ġdid dwar id-drogi. Se jkun kruċjali li naħdmu flimkien. Dan se jirrikjedi kooperazzjoni dejjem aktar b’saħħitha fost l-atturi kollha, kif ukoll fost l-awtoritajiet fil-livell lokali, nazzjonali u tal-UE. Se nkomplu ngħaqqdu l-forzi tagħna ma’ dawk tas-sħab globali. Fil-livell tal-UE, il-Kummissjoni se tagħti impetu ġdid lir-rwol tal-EMCDDA biex tiżgura li l-aġenzija tagħti sehem aktar qawwi fil-prijoritajiet kollha tal-politika dwar id-drogi. Il-Kummissjoni tistieden lill-Kunsill u lill-Parlament Ewropew sabiex japprovaw l-Aġenda u l-Pjan ta’ Azzjoni tal-UE dwar id-Drogi, u sabiex jappoġġaw u jisfruttaw il-potenzjal sħiħ ta’ kull prijorità strateġika stabbilita. Dan huwa sforz konġunt, għall-benefiċċju taċ-ċittadini kollha.