(1)

Ir-Regolament ta’ Implimentazzjoni tal-Kummissjoni (UE) 2018/2019 (2), abbażi ta’ valutazzjoni preliminari tar-riskju, jistabbilixxi lista ta’ pjanti, prodotti mill-pjanti u oġġetti oħra ta’ riskju għoli.

(2)

Bħala segwitu tal-valutazzjoni preliminari, fl-Anness tar-Regolament ta’ Implimentazzjoni (UE) 2018/2019 ġew elenkati b’mod proviżorju 34 ġeneru u speċi waħda ta’ pjanti għat-tħawwil li joriġinaw minn pajjiżi terzi, bħala pjanti ta’ riskju għoli. Wieħed mill-ġeneri elenkati huwa Prunus L.

(3)

Ir-Regolament ta’ Implimentazzjoni tal-Kummissjoni (UE) 2020/1213 (3) jistabbilixxi l-miżuri fitosanitarji għall-introduzzjoni fit-territorju tal-Unjoni ta’ ċerti pjanti, prodotti mill-pjanti u oġġetti oħra li tneħħew mill-Anness tar-Regolament ta’ Implimentazzjoni (UE) 2018/2019, iżda li r-riskji fitosanitarji tagħhom għadhom ma ġewx ivvalutati bis-sħiħ. Dan għaliex wieħed jew aktar mill-pesti ospitati minn dawk il-pjanti għadhom mhumiex inklużi fil-lista tal-Unjoni tal-pesti tal-kwarantina tar-Regolament ta’ Implimentazzjoni tal-Kummissjoni (UE) 2019/2072 (4), iżda jistgħu jissodisfaw il-kundizzjonijiet biex jiġu inklużi wara valutazzjoni tar-riskji kompluta ulterjuri.

(4)

Fid-29 ta’ Jannar 2020, it-Turkija ressqet talba lill-Kummissjoni għall-esportazzjoni lejn l-Unjoni tal-pjanti għat-tħawwil li ġejjin: biċċiet mingħajr għeruq, mingħajr weraq, inattivi, ta’ mhux aktar minn sentejn ta’ Prunus persica u Prunus dulcis, pjanti għat-tħawwil mhux imlaqqma, mingħajr weraq, inattivi, bl-għeruq mikxufin, ta’ mhux aktar minn sentejn ta’ Prunus persica u Prunus dulcis, u pjanti għat-tħawwil, mingħajr weraq, inattivi, bl-għeruq mikxufin, ta’ mhux aktar minn sentejn ta’ Prunus persica u Prunus dulcis imlaqqma fuq salvaġġ ta’ Prunus persica, Prunus dulcis, Prunus armeniaca jew Prunus davidiana li joriġinaw mit-Turkija (“il-pjanti rilevanti”). Dik it-talba kienet appoġġata mid-dossiers tekniċi rilevanti.

(5)

Fl-1 ta’ Diċembru 2022, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju tal-pjanti rilevanti (5). L-Awtorità identifikat il-pesti Anoplophora chinensis, Didesmococcus unifasciatus, Euzophera semifuneralis, Hoplolaimus galeatus, Lasiodiplodia pseudotheobromae, Lepidosaphes malicola, Lepidosaphes pistaciae, Maconellicoccus hirsutus, Malacosoma parallela, Neoscytalidium dimidiatum, Neoscytalidium novaehollandiae, Nipaecoccus viridis, Peach rosette mosaic virus, Phenacoccus solenopsis, Pochazia shantungensis, Russellaspis pustulans, Scirtothrips dorsalis u l-virus tar-ringspot tat-tadam bħala pesti rilevanti għal dawk il-pjanti.

(6)

L-Awtorità evalwat il-miżuri tal-mitigazzjoni tar-riskji deskritti fid-dossiers għall-pesti identifikati u stmat il-probabbiltà tal-ħelsien tal-pjanti rilevanti minn dawk il-pesti.

(7)

B’segwitu tal-konferma uffiċjali dwar in-nuqqas ta’ Malacosoma parallela fit-Turkija, il-pest ma għadux meqjus rilevanti għall-komoditajiet ta’ Prunus L. li joriġinaw f’dak il-pajjiż.

(8)

Abbażi ta’ dik l-opinjoni u tal-informazzjoni addizjonali mit-Turkija fir-rigward ta’ Malacosoma parallela, huwa meqjus li r-riskju fitosanitarju li jirriżulta mill-introduzzjoni fit-territorju tal-Unjoni tal-pjanti rilevanti jitnaqqas għal-livell aċċettabbli, dment li jiġu applikati miżuri xierqa li jindirizzaw ir-riskju tal-pesti relatati ma’ dawk il-pjanti.

(9)

Il-miżuri deskritti mit-Turkija fid-dossiers tekniċi huma kkunsidrati suffiċjenti biex ir-riskju mill-introduzzjoni tal-pjanti rilevanti fit-territorju tal-Unjoni jitnaqqas għal livell aċċettabbli. Għalhekk, jenħtieġ li dawk il-miżuri jiġu adottati bħala rekwiżiti fitosanitarji għall-importazzjoni biex tiġi żgurata l-protezzjoni fitosanitarja tat-territorju tal-Unjoni mill-introduzzjoni tal-pjanti rilevanti fih.

(10)

B’konsegwenza ta’ dan, jenħtieġ li l-pjanti rilevanti ma jibqgħux jitqiesu bħala pjanti ta’ riskju għoli.

(11)

Għalhekk, jenħtieġ li r-Regolament ta’ Implimentazzjoni (UE) 2018/2019 jiġi emendat kif xieraq.

(12)

L-Anoplophora chinensis, il-Peach rosette mosaic virus, is-Scirtothrips dorsalis u l-virus tar-ringspot tat-tadam huma elenkati bħala pesti tal-kwarantina fl-Unjoni fl-Anness II tar-Regolament ta’ Implimentazzjoni (UE) 2019/2072.

(13)

B’kuntrast, il-pesti Didesmococcus unifasciatus, Euzophera semifuneralis, Hoplolaimus galeatus, Lepidosaphes pistaciae, Maconellicoccus hirsutus, Nipaecoccus viridis, Pochazia shantungensis, u Russellaspis pustulans għadhom mhumiex elenkati bħala pesti tal-kwarantina fl-Unjoni fl-Anness II tar-Regolament ta’ Implimentazzjoni (UE) 2019/2072, u għalhekk il-miżuri fitosanitarji għal dawn il-pesti huma bbażati fuq dawk deskritti mit-Turkija fid-dossiers. Jeħtieġ li jsiru disponibbli l-valutazzjonijiet tar-riskju kompluti dwar dawn il-pesti sabiex jiġi stabbilit jekk il-pesti jissodisfawx il-kundizzjonijiet biex jiġu elenkati fl-Anness II tar-Regolament ta’ Implimentazzjoni (UE) 2019/2072 u jekk il-pjanti rilevanti għandhomx jiġu elenkati fl-Anness VII ta’ dak ir-Regolament, flimkien mar-rekwiżiti speċifiċi rispettivi.

(14)

Għalhekk, jenħtieġ li r-Regolament ta’ Implimentazzjoni (UE) 2020/1213 jiġi emendat kif xieraq.

(15)

Barra minn hekk, il-pesti Lasiodiplodia pseudotheobromae, Neoscytalidium dimidiatum, u Phenacoccus solenopsis għadhom mhumiex elenkati fl-Anness II tar-Regolament ta’ Implimentazzjoni (UE) 2019/2072 bħala pesti tal-kwarantina fl-Unjoni. Madankollu, minħabba li ma ġie osservat l-ebda impatt sinifikanti fuq il-pjanti ospitanti infettati minn dawk il-pesti fit-territorju tal-Unjoni, ma huwa meħtieġ l-ebda rekwiżit tal-importazzjoni fir-rigward ta’ dawk il-pesti.

(16)

In-Neoscytalidium novaehollandiae huwa sinonimu tan-Neoscytalidium dimidiatum. Għaldaqstant, l-ebda rekwiżit tal-importazzjoni ma huwa meħtieġ għal dak il-pest.

(17)

L-opinjoni xjentifika dwar il-kategorizzazzjoni tal-pesti ta’ Lepidosaphes malicola (6) prodotta mill-Awtorità tikkonkludi li, bħala riżultat ta’ inċertezza kbira dwar l-impatt tiegħu fl-UE, il-pest ma jissodisfax il-kriterji kollha biex jitqies bħala pest ta’ kwarantina fl-Unjoni. Għaldaqstant, l-ebda rekwiżit tal-importazzjoni ma huwa meħtieġ għal dak il-pest.

(18)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,