(1)

In-nitrofurani u l-metaboliti tagħhom huma aġenti antimikrobiċi li huma pprojbiti għall-użu fl-ikel li joriġina mill-annimali fl-Unjoni u għalhekk in-nitrofurani huma elenkati fit-Tabella 2 tal-Anness tar-Regolament tal-Kummissjoni (UE) Nru 37/2010 (2) dwar is-sustanzi pprojbiti, li għalihom ma jistgħux jiġu stabbiliti limiti massimi ta’ residwi.

(2)

Ir-Regolament tal-Kummissjoni (UE) 2019/1871 (3) stabbilixxa punti ta’ referenza għall-azzjoni (“RPA”) għal ċerti sustanzi farmakoloġikament attivi mhux permessi preżenti fl-ikel li joriġina mill-annimali, li għalihom ma ġie stabbilit l-ebda limitu massimu ta’ residwi. Mit-28 ta’ Novembru 2022, se jiġi applikat punt ta’ referenza għall-azzjoni ta’ 0,5 μg/kg għan-nitrofurani u l-metaboliti tagħhom.

(3)

Abbażi tal-opinjoni tal-Awtorità Ewropea dwar is-Sigurtà fl-Ikel (4), is-semikarbażid (“SEM”), metabolit tan-nitrofuran nitrofurażon, jista’ jkun preżenti fl-ikel jew bħala metabolit li jseħħ minħabba trattament illegali mat-nitrofurażon jew bħala metabolit prodott waqt l-ipproċessar tal-ikel, li jirriżulta mill-użu ta’ aġenti diżinfettanti jew minn reazzjonijiet ta’ diversi komponenti. Għalhekk, il-preżenza tas-SEM ma tistax titqies bħala indikatur inekwivoku tal-abbuż tan-nitrofurażon matul il-produzzjoni ta’ prodotti tal-annimali.

(4)

Abbażi tad-data pprovduta mill-industrija u d-data ta’ okkorrenza disponibbli (5), jistgħu jinstabu livelli ogħla ta’ SEM fil-ġelatina, fl-idroliżat tal-kollaġen, fil-prodotti tal-qarquċa idrolizzata, fil-prodotti tad-demm imnixxfa bl-atomizzazzjoni, fix-xorrox u fil-konċentrati tal-proteini tal-ħalib, fil-kaseinati u fit-trab tal-ħalib bħala riżultat tal-ipproċessar b’temperatura għolja, anki meta ma jkun ġie applikat l-ebda trattament bin-nitrofurani lil dawk il-prodotti pproċessati.

(5)

Għalhekk, bħala eċċezzjoni, l-RPA għas-SEM jenħtieġ li ma jiġix applikat għall-ġelatina, għall-idroliżat tal-kollaġen, għall-prodotti tal-qarquċa idrolizzata, għall-prodotti tad-demm imnixxfa bl-atomizzazzjoni, għax-xorrox u għall-konċentrati tal-proteini tal-ħalib, għall-kaseinati u għat-trab tal-ħalib sakemm ma jinstabux nitrofurani oħra jew il-metaboliti tagħhom flimkien mas-SEM f’dawn il-prodotti pproċessati.

(6)

It-trabi u t-tfal żgħar huma grupp vulnerabbli ta’ konsumaturi. Meta wieħed iżomm f’moħħu li d-dieta tagħhom tikkonsisti b’mod partikolari f’ikel ta’ trab tal-ħalib, dik l-eċċezzjoni jenħtieġ li ma tapplikax għall-formuli tat-trabi u għall-formuli ta’ prosegwiment.

(7)

Sabiex il-Kummissjoni tkun tista’ tistabbilixxi miżuri speċifiċi regolatorji fir-rigward tal-preżenza tas-SEM fil-ġelatina, fl-idroliżat tal-kollaġen, fil-prodotti tal-qarquċa idrolizzata, fil-prodotti tad-demm imnixxfa bl-atomizzazzjoni, fix-xorrox u fil-konċentrati tal-proteini tal-ħalib, fil-kaseinati u fit-trab tal-ħalib, l-operaturi tan-negozju tal-ikel u partijiet interessati oħra jenħtieġ li, f’perjodu ta’ żmien definit, jipprovdu d-data u l-informazzjoni meħtieġa dwar l-investigazzjonijiet dwar il-parametri u l-fatturi fl-istadji tal-ipproċessar li jirriżultaw fil-formazzjoni tas-SEM matul l-ipproċessar f’dawk il-prodotti pproċessati. Jenħtieġ li l-operaturi tan-negozju tal-ikel jieħdu wkoll miżuri biex inaqqsu l-preżenza tas-SEM f’dawn il-prodotti sal-aktar livell baxx li jista’ raġonevolment jintlaħaq. Fin-nuqqas ta’ dawk id-data u l-informazzjoni, l-eżenzjoni ma tkunx tista’ tibqa’ tinżamm.

(8)

Jenħtieġ li r-Regolament (UE) 2019/1871 jiġi emendat skont dan.

(9)

Il-punt ta’ referenza għall-azzjoni fil-livell ta’ 0,5 μg/kg għan-nitrofurani u l-metaboliti tagħhom japplika mit-28 ta’ Novembru 2022. Sabiex jiġi evitat irtirar bla bżonn mis-suq tal-prodotti pproċessati kkonċernati b’kontenut ta’ SEM fil-livell ogħla mill-RPA minħabba suppożizzjoni żbaljata ta’ użu illegali ta’ nitrofurani, jeħtieġ li l-eżenzjoni tiġi applikata b’mod retroattiv mill-istess data.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,