(1)

Fit-13 ta’ Mejju 2013 il-Kunsill impona dazju antidumping definittiv fuq l-importazzjonijiet fl-Unjoni ta’ oġġetti taċ-ċeramika li jintużaw fuq il-mejda u fil-kċina (“oġġetti li jintużaw fuq il-mejda”) li joriġinaw mir-Repubblika tal-Poplu taċ-Ċina (“RPĊ”) permezz tar-Regolament ta’ Implimentazzjoni tal-Kunsill (UE) Nru 412/2013 (3).

(2)

Fit-12 ta’ Lulju 2019, wara rieżami ta’ skadenza skont l-Artikolu 11(2) tar-Regolament bażiku, il-Kummissjoni estendiet il-miżuri għal ħames snin oħra permezz tar-Regolament ta’ Implimentazzjoni (UE) 2019/1198.

(3)

Fit-28 ta’ Novembru 2019, wara investigazzjoni kontra ċ-ċirkomvenzjoni skont l-Artikoli 13(3) u 14(5) tar-Regolament bażiku, il-Kummissjoni emendat ir-Regolament (UE) 2019/1198 bir-Regolament ta’ Implimentazzjoni tal-Kummissjoni (UE) 2019/2131 (4).

(4)

Fl-investigazzjoni oriġinali, il-kampjunar ġie applikat għall-investigazzjoni tal-produtturi esportaturi fir-RPĊ skont l-Artikolu 17 tar-Regolament (UE) 2016/1036.

(5)

Il-Kunsill impona rati individwali ta’ dazju antidumping li jvarjaw minn 13,1 % sa 23,4 % dwar importazzjonijiet tal-prodott ikkonċernat għall-produtturi esportaturi inklużi fil-kampjun. Għall-produtturi esportaturi li kkooperaw u li ma kinux inklużi fil-kampjun ġiet imposta rata ta’ dazju ta’ 17,9 %. Il-produtturi esportaturi li kkooperaw mhux inklużi fil-kampjun huma elenkati fl-Anness I tar-Regolament ta’ Implimentazzjoni (UE) 2019/2131. Barra minn hekk, ġiet imposta wkoll rata ta’ dazju mal-pajjiż kollu ta’ 36,1 % fuq il-prodott ikkonċernat minn kumpaniji fir-RPĊ li jew ma ddikjarawx ruħhom jew inkella ma kkooperawx fl-investigazzjoni.

(6)

Skont l-Artikolu 2 tar-Regolament ta’ Implimentazzjoni (UE) 2019/1198, il-Kummissjoni tista’ temenda l-Anness I ta’ dak ir-Regolament billi tagħti lil produttur esportatur ġdid ir-rata tad-dazju applikabbli għall-kumpaniji li kkooperaw u li mhumiex inklużi fil-kampjun jew li ma ngħatawx trattament individwali, jiġifieri r-rata tad-dazju medja ponderata ta’ 17,9 %, meta dak il-produttur esportatur ġdid fir-RPĊ jagħti biżżejjed evidenza lill-Kummissjoni li:

(7)

Il-grupp ta’ kumpaniji relatati Huatai Ceramics Industry Limited, Hunan, iċ-Ċina u Kerun Ceramics Manufactory Ltd. (“Huatai u Kerun” jew “l-applikant”), ressqu talba lill-Kummissjoni biex jingħataw trattament ta’ produttur esportatur ġdid (“NEPT”) u għalhekk huma soġġetti għar-rata ta’ dazju applikabbli għall-kumpaniji li kkooperaw fir-RPĊ mhux inklużi fil-kampjun, li huwa 17,9 %. L-applikant iddikjara li jissodisfa t-tliet kundizzjonijiet stabbiliti fl-Artikolu 2 tar-Regolament oriġinali.

(8)

Sabiex jiġi ddeterminat jekk l-applikant jissodisfax il-kundizzjonijiet biex jingħata NEPT kif stipulat fl-Artikolu 2 tar-Regolament oriġinali (“il-kriterji NEPT”), l-ewwel nett, il-Kummissjoni bagħtet kwestjonarju lill-applikant fejn talbet għal evidenza li turi li hu kien qed jissodisfa l-kriterji NEPT.

(9)

Wara l-analiżi tat-tweġiba għall-kwestjonarju, il-Kummissjoni talbet għal aktar informazzjoni u evidenza ta’ appoġġ li ngħata mill-applikant.

(10)

Il-Kummissjoni fittxet li tivverifika l-informazzjoni kollha li qieset meħtieġa biex tiddetermina jekk l-applikant kienx jissodisfa l-kundizzjonijiet tan-NEPT. Għal dan il-għan, il-Kummissjoni analizzat l-evidenza ppreżentata mill-applikant fit-tweġiba tagħha għall-kwestjonarju, billi kkonsultat diversi bażijiet ta’ data online inklużi l-Orbis (5) u l-Qachacha (6) u l-kontroverifika tal-informazzjoni dwar il-kumpaniji mal-informazzjoni mressqa f’każijiet preċedenti. B’mod parallel, il-Kummissjoni infurmat ukoll lill-industrija tal-Unjoni dwar it-talba tal-applikant u stednitha tipprovdi kwalunkwe kumment jekk ikun hemm bżonn. Ma wasal l-ebda kumment mill-industrija tal-Unjoni.

(11)

Fir-rigward tal-kundizzjoi stabbilita fl-Artikolu 2(a) tar-Regolament oriġinali li l-applikant ma esportax il-prodott ikkonċernat lejn l-Unjoni matul il-perjodu ta’ investigazzjoni li fih huma bbażati l-miżuri, li huwa mill-1 ta’ Jannar 2011 sal-31 ta’ Diċembru 2011 (‘il-perjodu ta’ investigazzjoni oriġinali’), il-Kummissjoni stabbiliet li l-applikant tassew ma esportax lejn l-UE matul il-perjodu ta’ investigazzjoni. Huatai ġiet stabbilita f’Settembru 2010 bħala bejjiegħ domestiku ta’ ċeramika. L-artikli ta’ assoċjazzjoni tagħha juru li ma kellhiex liċenzja ta’ esportazzjoni sa’ Marzu 2012 u ma kenitx kapaċi tipproduċi l-prodott ikkonċernat sa Diċembru 2012, li jiġi wara l-perjodu ta’ investigazzjoni. Kerun ġiet stabbilita f’Ottubru 2004. Ma kisbitx liċenzja biex tipproduċi l-prodott ikkonċernat sa Lulju 2018 u ma kisbitx liċenzja għall-esportazzjoni sa Mejju 2019, li t-tnejn li huma seħħu wara l-perjodu ta’ investigazzjoni. Għalhekk, l-applikant jissodisfa din il-kundizzjoni.

(12)

Fir-rigward tal-kundizzjoni stipulata fl-Artikolu 2(b) tar-Regolament oriġinali li l-applikant mhuwiex relatat ma’ kwalunkwe esportatur jew produttur li huwa soġġett għall-miżuri antidumping imposti mir-Regolament oriġinali, il-Kummissjoni stabbilixxiet li l-applikant kien relatat ma’ wieħed mill-klijenti ewlenin tiegħu, il-kumpanija kummerċjali Malasjana Fluxline Trading SDN BHD. Madankollu, din il-kumpanija ma tinsabx fir-RPĊ u ma kinitx soġġetta għall-miżuri antidumping imposti mir-Regolament oriġinali. Ma ġew identifikati l-ebda relazzjonijiet oħra kif definiti mir-Regolament ta’ Implimentazzjoni tal-Kummissjoni 2015/2447 (7). Għalhekk, l-applikant jissodisfa din il-kundizzjoni.

(13)

Fir-rigward tal-kundizzjoni stipulata fl-Artikolu 2(c) tar-Regolament oriġinali, li l-applikant effettivament esporta l-prodott ikkonċernat lejn l-Unjoni wara l-perjodu ta’ investigazzjoni oriġinali jew daħal f’obbligu kuntrattwali irrevokabbli biex jesporta kwantità sinifikanti lejn l-Unjoni, il-Kummissjoni stabbiliet li l-applikant kien esporta lejn l-Unjoni fl-2019, għalhekk wara l-perjodu ta’ investigazzjoni oriġinali. Ir-rikorrent ippreżenta fatturi, lista ta’ imballaġġ, polza ta’ kargu u rċevuta ta’ ordni mogħtija fl-2019 minn kumpannija fl-Awstrija. Għalhekk, l-applikant jissodisfa din il-kundizzjoni.

(14)

Għaldaqstant, l-applikant jissodisfa t-tliet kundizzjonijiet li għandhom jingħataw in-NEPT, kif stipulat fl-Artikolu 2 tar-Regolament oriġinali u għalhekk it-talba għandha tiġi aċċettata. Konsegwentement, l-applikant għandu jkun soġġett għal dazju anti-dumping ta’ 17,9 % għall-kumpaniji li jikkooperaw mhux inklużi fil-kampjun tal-investigazzjoni oriġinali.

(15)

L-applikant u l-industrija tal-Unjoni kienu infurmati bil-fatti essenzjali u l-kunsiderazzjonijiet li skonthom tqies xieraq li tingħata r-rata tad-dazju antidumping applikabbli lill-kumpaniji li kkooperaw mhux inklużi fil-kampjun tal-investigazzjoni oriġinali lil Huatai Ceramics Industry Limited, Hunan, iċ-Ċina u Kerun Ceramics Manufactory Ltd. (“Huatai u Kerun”).

(16)

Il-partijiet ngħataw il-possibbiltà li jippreżentaw kummenti. Ma wasal l-ebda kumment.

(17)

Dan ir-Regolament huwa konformi mal-opinjoni tal-Kumitat stabbilit bl-Artikolu 15(1) tar-Regolament bażiku,