This document is an excerpt from the EUR-Lex website
Document 32019R1916
Commission Implementing Regulation (EU) 2019/1916 of 15 November 2019 laying down detailed provisions as regards the use of rear aerodynamic devices pursuant to Council Directive 96/53/EC
Regolament ta’ Implimentazzjoni tal-Kummissjoni (UE) 2019/1916 tal-15 ta’ Novembru 2019 li jistabbilixxi dispożizzjonijiet dettaljati dwar l-użu ta’ tagħmir ajrudinamiku ta’ wara skont id-Direttiva tal-Kunsill 96/53/KE
Regolament ta’ Implimentazzjoni tal-Kummissjoni (UE) 2019/1916 tal-15 ta’ Novembru 2019 li jistabbilixxi dispożizzjonijiet dettaljati dwar l-użu ta’ tagħmir ajrudinamiku ta’ wara skont id-Direttiva tal-Kunsill 96/53/KE
ĠU L 297, 18.11.2019, p. 3–4
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force: This act has been changed. Current consolidated version: 04/03/2020
|
18.11.2019 |
MT |
Il-Ġurnal Uffiċjali tal-Unjoni Ewropea |
L 297/3 |
REGOLAMENT TA’ IMPLIMENTAZZJONI TAL-KUMMISSJONI (UE) 2019/1916
tal-15 ta’ Novembru 2019
li jistabbilixxi dispożizzjonijiet dettaljati dwar l-użu ta’ tagħmir ajrudinamiku ta’ wara skont id-Direttiva tal-Kunsill 96/53/KE
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 96/53/KE tal-25 ta’ Lulju 1996 li tistabbilixxi għal ċerti vetturi tat-triq li jiċċirkolaw fi ħdan il-Komunità id-dimensjonijiet massimi awtorizzati fit-traffiku nazzjonali u internazzjonali u l-piżijiet massimi awtorizzati fit-traffiku internazzjonali (1), u b’mod partikolari l-Artikolu 8b(4) tagħha,
Billi:
|
(1) |
It-titjib fil-prestazzjoni ajrudinamika tal-vetturi għandu potenzjal sinifikanti li jnaqqas il-konsum tal-fjuwil u b’hekk jonqsu l-emissjonijiet tas-CO2. Madankollu, ma jistax isir titjib sinifikanti fil-prestazzjoni ajrudinamika tal-vetturi sakemm id-dimensjonijiet awtorizzati tal-vetturi tat-triq, inkluż it-tagħmir ajrudinamiku, ma jkunux jippermettu dan. Għalhekk ġiet emendata d-Direttiva 96/53/KE biex tkun tipprovdi derogi għat-tul massimu awtorizzat tal-vetturi, fuq quddiem u fuq wara, soġġetti għal ċerti kundizzjonijiet. |
|
(2) |
Biex tkun żgurata s-sikurezza tat-tagħmir ajrudinamiku ta’ wara li jkun jista’ jiġi rtirat jew jintewa, jenħtieġ jiġu speċifikati s-sitwazzjonijiet meta jkun jista’ jintuża, jew jingħalaq, dan it-tagħmir, b’mod partikolari, fir-rigward tal-qrubija ta’ utenti oħra tat-triq, il-karatteristiċi speċjali taż-żona u l-limiti tal-veloċità. Jenħtieġ ikun żgurat li t-tagħmir ajrudinamiku ta’ wara li jkun jista’ jiġi rtirat jew jintewa, ikun kompatibbli ma’ operazzjonijiet tat-trasport intermodali, b’mod partikolari waqt l-immanuvrar fuq jew ’il barra mill-unitajiet tat-trasport intermodali u biex ikun jiftaħ għall-forzi tar-riħ meta jkun qed jiġi trasportat fuq dawn l-unitajiet. |
|
(3) |
Jenħtieġ jiġi nnotat ukoll li l-vetturi jew il-kombinazzjonijiet tal-vetturi mmuntati b’tagħmir ajrudinamiku ta’ wara jkunu konformi mar-rekwiżiti tad-Direttiva 96/53/KE, u b’mod partikolari ma’ dawk relatati maċ-ċirku stabbilit fil-punt 1.5 tal-Anness I tagħha. |
|
(4) |
Il-miżuri previsti f’dan ir-Regolament huma skont l-opinjoni tal-Kumitat imsemmi fl-Artikolu 10i(2) tad-Direttiva 96/53/KE, |
ADOTTAT DAN IR-REGOLAMENT:
Artikolu 1
Suġġett
Dan ir-Regolament jistabbilixxi dispożizzjonijiet dettaljati għall-użu ta’ tagħmir ajrudinamiku ta’ wara mmuntat fuq vetturi u kombinazzjonijiet ta’ vetturi skont id-Direttiva 96/53/KE.
Artikolu 2
Definizzjonijiet
Għall-finijiet ta’ dan ir-Regolament, għandhom japplikaw id-definizzjonijiet li ġejjin:
|
(a) |
“tagħmir” tfisser tagħmir ajrudinamiku mmuntat fuq wara ta’ vetturi jew ta’ kombinazzjonijiet ta’ vetturi; |
|
(b) |
“pożizzjoni ta’ waqt l-użu” tfisser il-pożizzjoni ta’ tagħmir skjerat f’pożizzjoni ajrudinamika li tnaqqas il-frizzjoni; |
|
(c) |
“pożizzjoni magħluqa” tfisser il-pożizzjoni ta’ tagħmir f’pożizzjoni li jkun jista’ jiġi rtirat jew jintewa, b’mod li jkun sigur u sikur. |
Artikolu 3
Kundizzjonijiet operattivi
1. L-Istati Membri jistgħu jipprojbixxu ċ-ċirkolazzjoni ta’ vetturi jew ta’ kombinazzjonijiet ta’ vetturi mgħammra b’tagħmir fil-pożizzjoni ta’ waqt l-użu f’żoni urbani jew interurbani, meta dan ikun meħtieġ mill-awtoritajiet kompetenti, filwaqt li jitqiesu l-karatteristiċi speċjali ta’ dawn iż-żoni, b’mod partikolari fejn il-limiti tal-veloċità jkunu 50 km/h jew anqas u fejn jaf ikun hemm utenti tat-triq vulnerabbli.
2. It-tagħmir għandu jkun fil-pożizzjoni magħluqa meta jew fejn ikun hemm bżonn ċertu attenzjoni jew kunsiderazzjoni speċjali. Dan jiġifieri:
|
(a) |
waqt l-immanuvrar, l-irriversjar jew l-ipparkjar tal-vettura; |
|
(b) |
meta l-vettura tkun ipparkjata; |
|
(c) |
waqt li jkunu qed jgħabbu jew iħottu xi oġġetti. |
3. L-użu tat-tagħmir fl-operazzjonijiet tat-trasport intermodali għandu jkun soġġett għar-rekwiżiti li ġejjin:
|
(a) |
waqt it-tħejjija tat-trasport intermodali jew waqt it-trasport innifsu, it-tagħmir għandu jkun fil-pożizzjoni magħluqa; |
|
(b) |
it-tagħmir ma għandux jisporġi ’l barra b’aktar minn 25 mm fuq kull naħa tal-vettura u l-wisa’ totali tal-vettura, inkluż it-tagħmir, ma għandhiex tkun aktar minn 2 600 mm; |
4. It-tagħmir difettuż, mhux sikur jew bil-ħsara għandu jinżamm fil-pożizzjoni magħluqa jew, meta possibbli, jitneħħa minnufih.
5. B’eċċezzjoni għall-paragrafi 2 u 3(a), it-tagħmir mhuwiex meħtieġ li jkun fil-pożizzjoni magħluqa jekk, skont il-punt 1.3.1.1.3 tal-Parti B, il-punt 1.3.1.1.3 tal-Parti C, u l-punt 1.4.1.1.3 tal-Parti D tal-Anness I tar-Regolament (UE) Nru 1230/2012, ma jkunx meħtieġ li dan it-tagħmir irid ikun jista’ jiġi rtirat jew irid ikun jista’ jintewa, billi jkunu qed jiġu ssodisfati r-rekwiżiti dimensjonali massimi fil-kundizzjonijiet kollha.
Artikolu 4
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, il-15 ta’ Novembru 2019.
Għall-Kummissjoni
Il-President
Jean-Claude JUNCKER