20.12.2013   

MT

Il-Ġurnal Uffiċjali tal-Unjoni Ewropea

L 347/253

(1)

Il-kriżi globali finanzjarja u r-reċessjoni ekonomika mingħajr preċedent u persistenti għamlu ħsara serja lit-tkabbir ekonomiku u lill-istabilità finanzjarja, u ħolqu deterjorament qawwi fil-kundizzjonijiet finanzjarji, ekonomiċi u soċjali tal-Istati Membri. B'mod partikolari, ċerti Stati Membri qed jesperjenzaw diffikultajiet serji jew huma mhedda b'diffikultajiet bħal dawn, partikolarment bi problemi fit-tkabbir ekonomiku u l-istabilità finanzjarja tagħhom, u b'deterjorament fil-pożizzjoni tad-defiċit u d-dejn tagħhom, b'riżultat ukoll tal-ambjent ekonomiku u finanzjarju internazzjonali.

(2)

Filwaqt li diġà ttieħdu azzjonijiet biex jilqgħu kontra l-effetti negattivi tal-kriżi finanzjarja, inklużi emendi fil-qafas leġiżlattiv, l-impatt ta' dik il-kriżi fuq l-ekonomija reali, fuq is-suq tax-xogħol u ċ-ċittadini qed jinħass ma' kullimkien. Il-pressjoni fuq ir-riżorsi finanzjarji nazzjonali qed tiżdied u għandhom jittieħdu urġentement aktar miżuri biex tittaffa din il-pressjoni permezz tal- użu massimali u ottimali tal-finanzjament mill-Fondi Strutturali u l-Fond ta' Koeżjoni (“il-Fondi”). Minħabba l-persistenza tad-diffikultajiet finanzjarji, huwa neċessarju li tiġi estiża l-applikazzjoni tal-miżuri adottati bir-Regolament (UE) Nru 1311/2011 tal-Parlament Ewropew u tal-Kunsill (4). Dawk il-miżuri ġew adottati skont l-Artikolu 122(2) u l-Artikoli 136 u 143 tat-Trattat dwar il-Funzjonament tal-Unjoni Ewropea.

(3)

Sabiex tiġi ffaċilitata l-ġestjoni tal-fondi tal-Unjoni, biex tingħata għajnuna għall-aċċelerazzjoni tal-investimenti fl-Istati Membri u r-reġjuni, u biex titjieb id-disponibbiltà tal-finanzjament għall-ekonomija, ir-Regolament tal-Kunsill (KE) Nru 1083/2006 (5) ġie emendat bir-Regolament (UE) Nru 1311/2011 biex jippermetti ż-żieda ta' pagamenti interim mill-Fondi b'ammont li jikkorrispondi għal għaxar punti perċentwali aktar mir-rata ta' kofinanzjament reali għal kull assi ta' prijorità għall-Istati Membri li qed jiffaċċjaw diffikultajiet serji fejn tidħol l-istabilità finanzjarja tagħhom u għamlu talba biex jibbenefikaw minn din il-miżura.

(4)

L-Artikolu 77(6) tar-Regolament (KE) Nru 1083/2006 jippermetti l-applikazzjoni ta’ rata miżjuda ta’ kofinanzjament sal-31 ta’ Diċembru 2013. Madankollu, peress li l-Istati Membri għadhom qed iħabbtu wiċċhom ma’ diffikultajiet serji fejn tidħol l-istabilità finanzjarja tagħhom, it-tul tal-applikazzjoni ta’ rata miżjuda ta’ kofinanzjament ma għandux ikun limitat sal-31 ta’ Diċembru 2013.

(5)

F'konformità mal-konklużjonijiet tal-Kunsill Ewropew tas-7 u t-8 ta' Frar 2013 u kif provdut fl-Artikolu 22 tar-Regolament (UE) Nru 1303/2013 tal-Parlament Ewropew u tal-Kunsill (6), għandha tapplika r-rata ta' kofinanzjament miżjuda b'10 punti perċentwali fir-rigward tal-perjodu ta' programmazzjoni 2014-2020 sat-30 ta' Ġunju 2016, meta l-possibilità taż-żieda għandha tiġi eżaminata mill-ġdid. Peress li l-perjodi ta' programmazzjoni 2007-2013 u 2014-2020 jaħbtu flimkien, jeħtieġ li jkun żgurat trattament koerenti u uniformi tal-Istati Membri li jirċievu għajnuna finanzjarja matul iż-żewġ perjodi. Għaldaqstant, dawk l-Istati Membri li jirċievu assistenza finanzjarja għandhom jibbenefikaw ukoll miż-żieda fir-rata ta' kofinanzjament sa tmiem il-perijodu ta' eliġibbiltà u jkollhom dritt għaliha fit-talbiet tagħhom għal bilanċ finali anki jekk l-assistenza finanzjarja ma tkunx baqgħet tiġi pprovduta.

(6)

Ir-Regolament (UE) Nru 1303/2013 għandu l-għan li jikkontribwixxi biex tinkiseb konċentrazzjoni adegwata tal-fondi ta' koeżjoni fir-reġjuni u l-Istati Membri l-inqas żviluppati. Bħala kontribut għat-tnaqqis tad-disparitajiet fil-medja tal-intensitajiet tal-għajnuna per capita, il-limitar massimu tat-trasferiment (capping) mill-Fondi għal kull Stat Membru individwali skont ir-Regolamenti futuri għandu jiġi ffissat għal 2,35 % tal-PDG tal-Istat Membru. Il-limitar massimu se jkun applikat fuq bażi annwali, u, jekk applikabbli, se jnaqqas proporzjonalment it-trasferimenti kollha (ħlief għar-reġjuni l-aktar żviluppati u l-mira tal-Kooperazzjoni territorjali Ewropea) lill-Istat Membru kkonċernat sabiex jinkiseb il-livell massimu ta’ trasferimenti. Għall-Istati Membri li daħlu fl-Unjoni qabel l-2013 u li t-tkabbir reali medju tal-PDG tagħhom fil-perijodu 2008-2010 kien aktar baxx minn – 1 %, il-livell massimu ta’ trasferiment għandu jiġi ffissat għal 2,59 % tal-PDG tagħhom.

(7)

Ir-Regolament (UE) Nru 1303/2013 jillimita l-allokazzjonijiet għal kull Stat Membru għal 110 % tal-livell tagħhom f'termini reali għall-perjodu 2007-2013. L-Istati Membri affettwati minn dan il-limitar massimu jeħtieġ li jkomplu jiġu protetti mir-riskju ta’ diżimpenn awtomatiku tal-allokazzjonijiet fil-perjodu 2007-2013.

(8)

Fil-konklużjonijiet tiegħu tat-8 ta’ Frar 2013, il-Kunsill Ewropew stieden lill-Kummissjoni biex tesplora soluzzjonijiet prattiċi fir-rigward tat-tnaqqis tar-riskju ta’ diżimpenn awtomatiku tal-Fondi mill-pakkett nazzjonali tal-2007-2013 għar-Rumanija u s-Slovakkja, inkluża l-emenda tar-Regolament (KE) Nru 1083/2006.

(9)

Il-Kunsill Ewropew enfasizza wkoll il-ħtieġa li jiġi żgurat livell u profil maniġġabbli għall-ħlasijiet fl-intestaturi kollha sabiex jiġu llimitati l-impenji baġitarji pendenti, partikolarment billi jiġu applikati regoli għad-diżimpenn awtomatiku fl-intestaturi kollha. Għalhekk, dispożizzjonijiet li jirrilaxxaw ir-regoli ta’ diżimpenn għall-Istati Membri affettwati mil-limitu massimu stabbilit fir-Regolament (UE) Nru 1303/2013 għandhom ikunu bbilanċjati fid-dawl tal-effetti tagħhom fuq l-impenji baġitarji pendenti.

(10)

L-iskadenza għall-kalkolu tad-diżimpenn awtomatiku tal-impenji tal-baġit annwali għas-snin 2011 u 2012 għandha tiġi estiża b’sena iżda l-impenn tal-baġit tal-2012, li se jkun għadu miftuħ sal-31 ta' Diċembru 2015, għandu jiġi ġġustifikat sal-31 ta' Diċembru 2015. Dik l-estensjoni għandha tgħin sabiex jitjieb l-assorbiment tal-fondi impenjati għal programmi operazzjonali fl-Istati Membri li huma affettwati minn limitar massimu fuq l-allokazzjonijiet futuri tal-politika ta’ koeżjoni tagħhom għal 110 % tal-livell tagħhom f’termini reali għall-perjodu 2007-2013. Din il-flessibilità hija meħtieġa sabiex jiġi indirizzat ritmu anqas mgħaġġel milli kien mistenni tal-implimentazzjoni tal-programmi li qed jaffettwa lil dawk l-Istati Membri b’mod partikolari.

(11)

Meta jiġi stabbilit l-ammont tal-bilanċ finali li għandu jitħallas lill-programmi operazzjonali għandhom jiġu applikati aġġustamenti limitati tal-ammont massimu ta' għajnuna mill-Fondi għal kull assi prioritarju sabiex jiġi ottimizzat l-assorbiment tal-Fondi.

(12)

Minħabba n-natura bla preċedent tal-kriżi, hija meħtieġa l-adozzjoni rapida ta’ miżuri ta’ appoġġ u għalhekk huwa xieraq li dan ir-Regolament jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(13)

Għalhekk, ir-Regolament (KE) Nru 1083/2006 għandu jiġi emendat skont dan,

(1)

L-Artikolu 77 huwa emendat kif ġej:

(2)

L-Artikolu 93 huwa emendat kif ġej: