Is-sigurtà ta' reċipjenti sempliċi taħt pressjoni fl-UE

Il-liġi tal-Unjoni Ewropea (UE) dwar it-tqegħid fis-suq u t-tqegħid fis-servizz ta’ reċipjenti sempliċi taħt pressjoni (pereżempju, ċilindri tal-għaddasa) għandha 2 għanijiet ewlenin: (i) li tiżgura l-protezzjoni tal-persuni, tal-annimali domestiċi u tal-proprjetà fir-rigward tal-perikli li jirriżultaw minn tnixxija jew tifqiegħa; (ii) li jkun hemm fis-seħħ l-istess regoli li jirregolaw il-bejgħ tagħhom madwar l-UE.

ATT

Direttiva 2014/29/UE tal-Parlament Ewropew u tal-Kunsill tas-26 ta’ Frar 2014 dwar l-armonizzazzjoni tal-liġijiet tal-Istati Membri marbuta mat-twettiq tad-disponibbiltà fis-suq ta’ reċipjenti sempliċi taħt pressjoni.

SOMMARJU

Il-liġi tal-Unjoni Ewropea (UE) dwar it-tqegħid fis-suq u t-tqegħid fis-servizz ta’ reċipjenti sempliċi taħt pressjoni (pereżempju, ċilindri tal-għaddasa) għandha 2 għanijiet ewlenin: (i) li tiżgura l-protezzjoni tal-persuni, tal-annimali domestiċi u tal-proprjetà fir-rigward tal-perikli li jirriżultaw minn tnixxija jew tifqiegħa; (ii) li jkun hemm fis-seħħ l-istess regoli li jirregolaw il-bejgħ tagħhom madwar l-UE.

X'TAGĦMEL DIN ID-DIRETTIVA?

Hija tistabbilixxi regoli uniformi dwar it-tqegħid fis-suq u t-tqegħid fis-servizz ta’ reċipjenti sempliċi taħt pressjoni.

Hija tapplika għal reċipjenti manifatturati f’serje, bħal kwalunkwe reċipjent iwweldjat soġġett għal pressjoni tal-gejġ intern akbar minn 0.5 bar, li huwa intiż biex iżomm l-arja jew in-nitroġenu u li mhux maħsub biex jinħaraq, kif ukoll għall-partijiet u l-assemblaġġi li jikkontribwixxu għas-saħħa tar-reċipjent taħt pressjoni magħmula minn ċerti kwalitajiet ta’ azzar jew aluminju.

Hija ma tapplikax għal: (i) reċipjenti li huma speċifikament iddisinjati għal użu nukleari; (ii) reċipjenti installati fuq vapuri u inġenji tal-ajru; (iii) apparat għat-tifi tan-nar.

PUNTI EWLENIN

Id-direttiva tiddefinixxi r-responsabbiltajiet tal-manifatturi, tal-importaturi u tad-distributuri ta’ reċipjenti sempliċi taħt pressjoni.

• 1.

  Il-biċċa l-kbira tar-reċipjenti sempliċi taħt pressjoni fil-kamp ta’ applikazzjoni tad-Direttiva għandu jkollhom il-marka ta’ konformità CE sabiex juru li huma jissodisfaw ir-rekwiżiti tas-sigurtà essenzjali kollha tal-leġiżlazzjoni tal-UE.

• 2.

  Il-manifattur għandu jwettaq valutazzjoni tal-konformità u jistabbilixxi dokumentazzjoni teknika ddettaljata għar-reċipjenti tiegħu.

• 3.

  L-importaturi għandhom jivverifikaw jekk il-manifatturi wettqux il-valutazzjonijiet tal-konformità b’mod korrett u jinformaw lill-awtorità li timmonitorja s-sigurtà jekk huma jkunu tal-fehma li r-reċipjent mhuwiex konformi mar-rekwiżiti tas-sigurtà essenzjali.

• 4.

  Id-dokumentazzjoni meħtieġa kollha għandha tiġi rreġistrata u għandha tinżamm għal 10 snin.

• 5.

  L-istruzzjonijiet u t-tagħrif dwar is-sigurtà għandhom jinkitbu b’lingwaġġ li jinftiehem faċilment mill-utenti finali.

• 6.

  Il-manifatturi u l-importaturi għandhom jindikaw isimhom, l-isem kummerċjali rreġistrat jew it-trejdmark irreġistrata tagħhom u l-indirizz postali fejn jistgħu jiġu kkuntattjati dwar ir-reċipjenti tagħhom.

• 7.

  Id-direttiva tispeċifika x’għandhom jagħmlu l-awtoritajiet nazzjonali tas-sorveljanza tas-suq sabiex jidentifikaw il-prodotti mhux konformi u jipprevjenu t-tqegħid fis-suq jew it-tqegħid fis-servizz ta’ tali prodotti fis-suq tal-UE.

META TAPPLIKA DIN ID-DIRETTIVA?

Tidħol fis-seħħ fit-18 ta' April 2014 u tapplika mill-20 ta' April 2016. Tirrevoka d-Direttiva 2009/105/KE b'effett mill-20 ta' April 2016.

SFOND

Id-Direttiva taġġorna r-regoli eżistenti tal-UE dwar it-tqegħid fis-suq u t-tqegħid fis-servizz ta’ reċipjenti sempliċi taħt pressjoni. Din hija parti mill-isforz sabiex tiġi mmodernizzata il-liġi Ewropea f’firxa wiesgħa ta’ setturi industrijali bil-għan li jiġu ssimplifikati r-regoli, jitnaqqsu l-piżijiet amministrattivi u jiġu stabbiliti regoli aktar ċari u konsistenti.

Għal aktar tagħrif, ara s-sit elettroniku tal-Kummissjoni Ewropea dwar ir-Reċipjenti sempliċi taħt pressjoni.

l-aħħar aġġornament 17.02.2015