24.5.2016   

MT

Il-Ġurnal Uffiċjali tal-Unjoni Ewropea

L 134/46

(1)

Bejn l-2003 u l-2006, il-Kummissjoni rċeviet ilmenti minn diversi partijiet li allegaw li Ryanair plc (“Ryanair” (3)) kif ukoll l-operatur tal-ajruport ta' Frankfurt Hahn Flughafen Frankfurt-Hahn GmbH (minn hawn 'il quddiem: “FFHG”) ingħataw għajnuna illegali mill-Istat mill-kumpanija Fraport AG u mil-Länder (l-Istati Federali) ta' Rhineland-Palatinate u Hesse. L-ilmentatur ipprovda aktar informazzjoni fit-22 ta' Settembru 2003 u fl-1 ta' Ġunju 2006.

(2)

Permezz tal-ittri datati l-25 ta' Settembru 2006 u d-9 ta' Frar 2007, il-Kummissjoni talbet informazzjoni mingħand il-Ġermanja. Il-Ġermanja wieġbet permezz ta' ittri datati l-20 ta' Diċembru 2006 u d-29 ta' Ġunju 2007 rispettivament.

(3)

Permezz ta' ittra datata s-17 ta' Ġunju 2008, il-Kummissjoni għarrfet lill-Ġermanja bid-deċiżjoni tagħha li tibda l-proċedura prevista fl-Artikolu 108(2) tat-Trattat fir-rigward tal-finanzjament tal-FFHG u r-relazzjonijiet finanzjarji tagħha ma' Ryanair (id-“deċiżjoni tal-ftuħ tal-2008”). Il-Ġermanja bagħtet il-kummenti tagħha fis-27 ta' Ottubru 2008.

(4)

Id-deċiżjoni tal-ftuħ tal-2008 ġiet reġistrata taħt il-każ numru SA.21121 (C29/08). Id-deċiżjoni tal-ftuħ tal-2008 ġiet ippubblikata f'Il-Ġurnal Uffiċjali tal-Unjoni Ewropea  (4) fis-17 ta' Jannar 2009. Il-Kummissjoni stiednet lill-partijiet interessati biex fi żmien xahar minn wara din il-pubblikazzjoni jressqu l-kummenti tagħhom dwar dawn il-miżuri.

(5)

Il-Kummissjoni rċeviet kummenti mingħand Deutsche Lufthansa AG (“Lufthansa”), l-Assoċjazzjoni Federali tat-Trasportaturi tal-Ajru Ġermaniżi (Bundesverband der Deutschen Fluggesellschaften, “BDF”), Ryanair, Société Air France SA (“Air France”) u mill-Assoċjazzjoni tal-Linji tal-Ajru Ewropej (“AEA”). Hija għaddiet il-kummenti lill-Ġermanja permezz ta' ittra datata s-16 ta' April 2009. Il-Ġermanja ngħatat l-opportunità li twieġeb għalihom fi żmien xahar u għaddiet il-kummenti tagħha u aktar informazzjoni fl-1 ta' Lulju 2009.

(6)

Permezz ta' ittra tal-4 ta' Marzu 2011, Lufthansa pprovdiet aktar informazzjoni fir-rigward tad-deċiżjoni tal-ftuħ tal-2008 fejn indirizzat l-allegati miżuri ġodda ta' għajnuna mill-Istat.

(7)

Permezz ta' ittra datata t-18 ta' Marzu 2011 il-Kummissjoni għaddiet l-ilment lill-Ġermanja u talbet għal aktar informazzjoni dwar l-allegazzjonijiet il-ġodda fir-rigward tal-miżuri ta' għajnuna mill-Istat. Il-Ġermanja wieġbet permezz ta' ittri datati d-19 ta' Mejju 2011 u t-23 ta' Mejju 2011.

(8)

Madankollu, dawk it-tweġibiet ma kinux kompleti. Għalhekk, permezz ta' ittra datata s-6 ta' Ġunju 2011 il-Kummissjoni bagħtet nota ta' tfakkira skont l-Artikolu 10(3) tar-Regolament tal-Kunsill (KE) Nru 659/1999 (5). Il-Ġermanja wieġbet permezz ta' ittri datati l-14 ta' Ġunju 2011 u s-16 ta' Ġunju 2011.

(9)

Permezz ta' ittra datata t-13 ta' Ġunju 2011 il-Kummissjoni għarrfet lill-Ġermanja bid-deċiżjoni tagħha li tibda l-proċedura prevista fl-Artikolu 108(2) tat-Trattat fir-rigward tal-linja ta' kreditu li ngħatat lill-FFHG mill-faċilità ta' ppuljar ta' flus tal-Land Rhineland-Palatinate, is-self li ngħata lill-FFHG minn Investitions- und Strukturbank tal-Land Rhineland-Palatinate (“ISB”) u l-garanzija għas-self tal-ISB li ngħatat lill-FFHG mil-Land Rhineland-Palatinate (id-“deċiżjoni tal-ftuħ tal-2011”). Id-deċiżjoni tal-ftuħ tal-2011 ġiet reġistrata taħt il-każ numru SA.32833 (2011/C). Id-deċiżjoni tal-ftuħ tal-2011 ġiet ippubblikata f'Il-Ġurnal Uffiċjali tal-Unjoni Ewropea fil-21 ta' Lulju 2012. (6)

(10)

Permezz ta' ittra datata l-20 ta' Frar 2012 il-Kummissjoni talbet aktar informazzjoni dwar id-deċiżjoni tal-ftuħ tal-2008. Il-Ġermanja wieġbet permezz ta' ittra datata s-16 ta' April 2012. Il-Kummissjoni reġgħet talbet aktar informazzjoni permezz ta' ittra tas-27 ta' Lulju 2012. Il-Ġermanja wieġbet permezz ta' ittra datata l-4 ta' Settembru 2012.

(11)

Permezz ta' ittra datata l-25 ta' Frar 2014 il-Kummissjoni infurmat lill-Ġermanja bl-adozzjoni tal-Linji gwida tal-Kummissjoni dwar l-għajnuna mill-Istat għall-ajruporti u l-linji tal-ajru (7) (il-“Linji Gwida tal-Avjazzjoni tal-2014”) fl-20 ta' Frar 2014. Il-Kummissjoni infurmat lill-Ġermanja li dawk il-linji gwida kienu se jsiru applikabbli mid-data tal-pubblikazzjoni tagħhom f'Il-Ġurnal Uffiċjali tal-Unjoni Ewropea. Tat lill-Ġermanja l-opportunità li tikkummenta dwar dawk il-linji gwida u dwar l-applikazzjoni possibbli tagħhom għall-każ preżenti fi żmien 20 jum ta' xogħol. Permezz ta' ittra datata s-17 ta' Marzu 2014, il-Kummissjoni fakkret lill-Ġermanja li, fil-każ li ma tkunx irċeviet kummenti fil-limitu preskritt ta' 20 jum ta' xogħol, il-Kummissjoni tqis li l-Ġermanja ma kellha ebda kumment.

(12)

Permezz ta' ittri datati t-23 ta' Marzu 2014 u l-4 ta' April 2014 il-Kummissjoni talbet lill-Ġermanja għal aktar informazzjoni. Il-Ġermanja wieġbet permezz ta' ittri datati s-17 ta' April 2014, l-24 ta' April 2014 u d-9 ta' Mejju 2014.

(13)

Il-Linji Gwida tal-Avjazzjoni tal-2014 ġew ippubblikati f'Il-Ġurnal Uffiċjali tal-Unjoni Ewropea fl-4 ta' April 2014. Huma ħadu post il-Linji Gwida tal-Avjazzjoni tal-1994 (8) kif ukoll il-Linji Gwida tal-Avjazzjoni tal-2005 (9).

(14)

Fil-15 ta' April 2014 ġie ppubblikat avviż f'Il-Ġurnal Uffiċjali tal-Unjoni Ewropea li stieden lill-Istati Membri u lill-partijiet interessati sabiex jissottomettu l-kummenti tagħhom dwar l-applikazzjoni tal-Linji Gwida tal-Avjazzjoni tal-2014, f'dan il-każ fi żmien xahar mid-data tal-pubblikazzjoni tagħhom. (10) Lufthansa u Transport & Environment ippreżentaw osservazzjonijiet. Permezz ta' ittra datata s-26 ta' Awwissu 2014, il-Kummissjoni bagħtet dawk l-osservazzjonijiet lill-Ġermanja. Permezz ta' ittra datata t-3 ta' Settembru 2014, il-Ġermanja infurmat lill-Kummissjoni li ma kellha l-ebda osservazzjoni.

(15)

Permezz ta' ittra datata s-17 ta' Ġunju 2014, il-Ġermanja qablet b'mod eċċezzjonali li din id-deċiżjoni tiġi adottata u nnotifikata bl-Ingliż biss.

(16)

L-ajruport ta' Frankfurt Hahn jinsab fil-Land Rhineland-Palatinate, madwar 120 km fil-punent tal-belt ta' Frankfurt/Main. Sal-1992 l-ajruport ta' Frankfurt Hahn kien bażi tal-ajru militari tal-Istati Uniti. Sussegwentement, ġie konvertit f'ajruport ċivili. Għandu liċenzja biex jopera 24 siegħa kuljum.

(17)

Fl-1 ta' April 1995, Holding Unternehmen Hahn GmbH & Co. KG (“Holding Hahn”), sħubija pubblika privata bejn Wayss & Freytag u l-Land Rhineland-Palatinate, kisbet is-sjieda tal-infrastruttura tal-ajruport ta' Frankfurt Hahn mill-Ġermanja. Bejn l-1995 u l-1998, din is-sħubija pubblika privata żviluppat l-ajruport bl-għan li hemmhekk tiġi żviluppata żona industrijali u kummerċjali. Skont il-Ġermanja, meta s-sħubija bejn Wayss & Freytag u l-Land Rhineland-Palatinate ma rnexxietx, fl-1 ta' Jannar 1998, Flughafen Frankfurt/Main GmbH (“Fraport”) (11) bdiet tinvolvi ruħha fil-proġett u eventwalment ħadet f'idejha l-operat tal-ajruport.

(18)

Skont il-Ġermanja, Fraport, li kienet diġà qiegħda topera u tmexxi l-ajruport internazzjonali ta' Frankfurt Main, li jinsab madwar 115-il km mill-ajruport ta' Frankfurt Hahn, involviet ruħha għal diversi raġunijiet strateġiċi. L-ewwel nett, il-Ġermanja qalet li l-ajruport ta' Frankfurt Hahn kien l-uniku ajruport fil-viċinanza tal-ajruport ta' Frankfurt Main li kellu l-potenzjal li jiżviluppa f'ajruport internazzjonali sħiħ. Peress li dak iż-żmien l-ajruport ta' Frankfurt Main kien diġà laħaq il-kapaċità sħiħa tiegħu, kien hemm il-potenzjal għat-tieni ajruport profittabbli fir-reġjun. It-tieni nett, dak iż-żmien l-ajruport ta' Frankfurt Hahn kien l-uniku ajruport Ġermaniż li kellu liċenzja li jista' jopera 24 siegħa kuljum, speċjalment utli għal titjiriet tal-merkanzija. It-tielet nett, ir-runway kienet mgħammra b'kollox u setgħet tintuża fil-kundizzjonijiet kollha tat-temp. Barra minn hekk, il-Ġermanja rrilevat li s-sidien tal-ajruport ta' Schiphol kienu qed jaħsbu wkoll biex jakkwistaw l-ajruport ta' Frankfurt Hahn, u għalhekk billi ħadet ir-responsabiltà għall-operat tal-ajruport ta' Frankfurt Hahn kien possibbli li Fraport iżżomm 'il bogħod kompetitur mhux mixtieq.

(19)

Fraport xtrat 64,90 % tal-ishma fl-operatur Flughafen Hahn GmbH & Co. KG Lautzenhausen (“FFHG & Co KG”) għall-prezz ta' […] (*). Il-ħlas ta' parti mill-prezz tax-xiri (EUR […]) kien dovut fil-31 ta' Diċembru 2007, skont ċerti kundizzjonijiet (12). F'Awwissu 1999, Fraport akkwistat 73,37 % tal-ishma ta' Holding Hahn u 74,90 % tal-ishma tas-soċju solidali tagħha Holding Unternehmen Hahn Verwaltungs GmbH għall-prezz ta' EUR […]. B'hekk Fraport effettivament saret l-imsieħba l-ġdida tal-Land Rhineland-Palatinate.

(20)

Il-fokus ta' Fraport fl-ajruport ta' Frankfurt Hahn kien li tiżviluppa b'mod sistematiku n-negozju tal-ajruport marbut mal-ġarr ta' merkanzija u ta' passiġġieri. F'dak ir-rigward, Fraport kienet waħda mill-ewwel impriżi li bdiet tapplika mudell kummerċjali speċjalment immirat biex jiġu attirati linji tal-ajru bi prezzijiet irħas. Abbażi ta' dan, Fraport ikkonkludiet ftehim ġdid ta' trasferiment ta' profitt u telf ma' Holding Hahn wara l-konverżjoni ta' din tal-aħħar f'kumpanija Ġermaniża b'responsabbiltà limitata, (Gesellschaft mit beschränkter Haftung, “GmbH”). Il-konverżjoni u l-konklużjoni ta' dak il-ftehim saru fl-24 ta' Novembru 2000.

(21)

Sussegwentement, Holding Hahn u FFHG & Co KG ingħaqdu biex jiffurmaw Flughafen Hahn GmbH. Land Rhineland-Palatinate kienet tikkontrolla 26,93 % u Fraport kienet tikkontrolla 73,07 % tal-ishma fil-kumpanija l-ġdida. Aktar tard, l-isem kummerċjali tal-kumpanija reġa' inbidel għal Flughafen Frankfurt-Hahn GmbH (“FFHG”). Fl-2001, iż-żewġ azzjonisti, Fraport u Land Rhineland-Palatinate, injettaw kapital ġdid fl-FFHG (ara d-deskrizzjoni dettaljata fis-sezzjoni 3).

(22)

Sal-11 ta' Ġunju 2001, 100 % tal-ishma fi Fraport kienu miżmuma minn azzjonisti pubbliċi. (13) Fil-11 ta' Ġunju, Fraport ġiet ikkwotata fil-Borża u 29,71 % tal-ishma tagħha nbiegħu lil azzjonisti privati, filwaqt li 70,29 % tal-ishma baqgħu fil-pussess tal-azzjonisti pubbliċi.

(23)

F'Novembru 2002, Land Rhineland-Palatinate, Land Hesse, Fraport u FFHG ikkonkludew ftehim dwar l-iżvilupp ulterjuri tal-ajruport ta' Frankfurt Hahn. Dak il-ftehim ippreveda t-tieni żieda fil-kapital awtorizzat. F'dik l-okkażjoni, Land Hesse ssieħbet ma' FFHG bħala t-tielet azzjonista. Imbagħad Fraport kienet tikkontrolla 65 % tal-ishma, u l-Land Hesse u l-Land Rhineland-Palatinate kienu jikkontrollaw 17,5 % kull wieħed. Dik l-istruttura tas-sjieda baqgħet l-istess sal-2009, meta Fraport biegħet l-ishma kollha tagħha lil-Land Rhineland-Palatinate, li ilha minn dakinhar iżżomm sehem maġġoritarju ta' 82,5 %. Is-17,5 % li fadal għadhom miżmuma minn Land Hesse.

(24)

It-traffiku tal-passiġġieri fl-ajruport żdied minn 29 289 fl-1998 għal 4 miljun fl-2007 u naqas għal kważi 2,7 miljun fl-2013. (ara t-Tabella 1). Attwalment l-ajruport huwa servut minn Ryanair, Wizz Air (14) u linji tal-ajru oħra. Fl-2013, is-sehem tal-passiġġieri tar-Ryanair kien ilaħħaq madwar [80-100 %].

Tabella 1

L-iżvilupp fir-rigward tal-passiġġieri fl-ajruport ta' Frankfurt Hahn bejn l-1998 u l-2013

(25)

L-ajruport ta' Frankfurt Hahn esperjenza wkoll tkabbir fit-trasport tal-merkanzija bl-ajru. It-trasport tal-merkanzija bl-ajru fl-ajruport żdied minn madwar 16 000 tunnellata fl-1998 għal madwar 286 000 tunnellata fl-aqwa tiegħu fl-2011, bi tnaqqis sussegwenti għal madwar 151 000 tunnellata fl-2013 (ara t-Tabella 2). Fl-2013, il-merkanzija totali, inklużi l-ispedizjonieri, immaniġġjata fl-ajruport kienet tammonta għal madwar 447 000 tunnellata.

Tabella 2

L-iżvilupp fir-rigward tal-merkanzija fl-ajruport ta' Frankfurt Hahn bejn l-1998 u l-2013

(26)

L-ajruporti li ġejjin jinsabu qrib l-ajruport ta' Frankfurt Hahn:

Figura 1

L-iżvilupp tat-traffiku fir-rigward tal-passiġġieri fl-ajruport ta' Frankfurt Main u ta' Frankfurt Hahn bejn l-2000-2012

(27)

It-Tabella 3 tipprovdi ħarsa ġenerali tal-investimenti mwettqa mill-FFHG bejn l-2001 u l-2012, li jammontaw għal total ta' madwar EUR 216-il miljun.

Tabella 3

Ħarsa ġenerali tal-investimenti mwettqa bejn l-2001 u l-2012

(28)

It-Tabella 4 tipprovdi ħarsa ġenerali tar-riżultati finanzjarji annwali tal-FFHG bejn l-2001 u l-2012.

Tabella 4

Riżultati finanzjarji annwali tal-FFHG bejn l-2001 u l-2012

(29)

L-FFHG u Fraport ikkonkludew ftehim skont liema Fraport kienet intitolata għall-profitti kollha ġġenerati mill-FFHG. Min-naħa tagħha, Fraport kienet obbligata tassumi t-telf kollu tal-FFHG. Fil-31 ta' Awwissu 1999Land Rhineland-Palatinate u Fraport ikkonkludew ftehim li fih Fraport intrabtet li tikkonkludi Ftehim ta' Trasferiment ta' Profitti u ta' Telf (“PLTA”). Il-ftehim notarili korrispondenti ġie konkluż fl-24 ta' Novembru 2000 u l-PLTA tal-2001 daħal fis-seħħ fl-1 ta' Jannar 2001 (“PLTA tal-2001”) (15).

(30)

Fraport kellha d-dritt li ttemm il-PLTA tal-2001 billi tagħti avviż ta' sitt xhur, iżda dan biss wara l-31 ta' Diċembru 2005. Kieku ma ġiex terminat, il-ftehim kien jiġi mtawwal b'mod taċitu fl-aħħar ta' kull sena kalendarja għal sena oħra, iżda għal mhux aktar mill-31 ta' Diċembru 2010.

(31)

Il-konklużjoni tal-PLTA tal-2001 ġiet approvata mill-bord superviżorju u mill-azzjonisti ta' Fraport. (16) Aktar tard, permezz ta' ftehim tal-5 ta' April 2004, it-tul tal-PLTA tal-2001 ġie estiż sal-2014 (“PLTA tal-2004”). Sakemm il-PLTA tal-2001 ġie sostitwit bil-PLTA tal-2004 (“PLTA tal-2004”, ara l-premessa (45)), Fraport kienet assumiet telf ta' EUR […] miljun.

(32)

Rapport għall-kumitat azzjonarju ta' Fraport (17) fid-19 ta' Jannar 2001 innota li t-telf akkumulat mill-FFHG bejn l-1998 u l-2005 preżumibbilment kien se jammonta għal EUR […] miljun, u għalhekk kien se jkun ta' aktar mid-doppju minn dak imbassar fl-1997. Barra minn hekk, tnejn mill-klijenti ewlenin tal-merkanzija tal-FFHG ittrasferew jew naqqsu n-negozju tagħhom fl-ajruport ta' Frankfurt Hahn fl-istess ħin, li wassal għal tnaqqis sostanzjali fil-volum tat-traffiku tal-merkanzija, jiġifieri b'45 % fl-ewwel semestru tal-2001.

(33)

Wara dak ir-rapport, fil-bidu tas-sena 2001 Fraport qabbdet konsulent, il-Boston Consulting Group (“BCG”), kif ukoll id-Dipartiment Strateġiku tal-Akkwiżizzjonijiet u tal-Azjendi (“SD”) tagħha stess biex jiżviluppaw strateġija għall-FFHG. Kemm il-BCG kif ukoll l-SD ikkonkludew li żvilupp pożittiv u fit-tul tal-FFHG kien se jkun possibbli biss permezz ta' titjib sostanzjali tal-infrastruttura, bħala prerekwiżit biex ikompli jiżdied il-volum tat-traffiku. L-SD enfasizza wkoll li din l-estensjoni sostanzjali tal-FFHG kienet se tkun finanzjarjament riskjuża, u li anki fil-każ tal-aktar xenarju pożittiv, preżumibbilment ma kienx se jinkiseb riżultat annwali pożittiv (profitt nett annwali wara t-taxxa) qabel l-2013.

(34)

Abbażi tal-istudju tal-BCG u l-analiżi tiegħu stess, l-SD abbozza programm ta' żvilupp għall-FFHG, li ppreveda investimenti ta' EUR 172 miljun sal-2007. Dawk l-investimenti kienu jikkonsistu fi programm ta' “emerġenza”, f'valur ta' EUR 27 miljun, li jkopri l-estensjoni tar-runway għal 3 400 metru u l-ispejjeż ta' ppjanar għall-proċedura ta' approvazzjoni tal-pjan (“Planfeststellungsverfahren”) biex ir-runway tiġi estiża għal 3 800 metru, kif ukoll l-ispejjeż addizzjonali tal-kostruzzjoni li kienet diġà bdiet tat-terminal il-ġdid tal-passiġġieri.

(35)

Madankollu, fl-2001 l-FFHG kellha proporzjon ta' dejn ma' ekwità ta' sempliċiment 4 % (18). Barra minn hekk, mill-31 ta' Diċembru 2005, Fraport kellha dritt li ttemm il-PLTA tal-2001. Taħt dawk il-kundizzjonijiet, l-FFHG ma setgħetx tiffinanzja l-programm ta' “emerġenza” permezz ta' aktar dejn, iżda kellha bżonn kapital ġdid.

(36)

Iż-żieda fil-kapital ġiet deċiża b'riżoluzzjoni tal-bord superviżorju ta' Fraport fl-14 ta' Diċembru 2001 u sussegwentement b'riżoluzzjoni tal-azzjonisti tal-FFHG fid-9 ta' Jannar 2002. Kwalunkwe żieda fil-kapital awtorizzat ta' kumpanija b'responsabbiltà limitata, bħall-FFHG, teħtieġ l-approvazzjoni tal-azzjonisti parteċipanti kollha.

(37)

Wara dik l-approvazzjoni, Fraport u Land Rhineland-Palatinate żiedu l-kapital awtorizzat b'EUR 27 miljun minn EUR 3,5 miljuni għal EUR 30,5 miljun. Fid-9 ta' Jannar 2002 Fraport ikkontribwiet EUR 19,7 miljun u Land Rhineland-Palatinate EUR 7,3 miljun. Iż-żieda fil-kapital kienet maħsuba għall-finanzjament tal-estensjoni tar-runway u investimenti f'infrastruttura oħra biex tiżdied il-profittabbiltà tal-ajruport.

(38)

Fis-27 ta' Novembru 2002, Fraport, Land Rhineland-Palatinate, Land Hesse u l-FFHG qablu li Land Hesse kienet se ssir it-tielet azzjonista tal-FFHG u bħala tali kienet se tikkontribwixxi EUR […] miljun meta jkun hemm il-ħtieġa ta' kapital addizzjonali biex jiġu ffinanzjati l-investimenti. Kien hemm qbil ukoll li tinħoloq kooperazzjoni mill-qrib bejn l-ajruport ta' Frankfurt Main u l-ajruport ta' Frankfurt Hahn.

(39)

Kien hemm qbil li kien hemm il-ħtieġa ta' investimenti ulterjuri sabiex tiżdied il-profittabbiltà tal-ajruport ta' Frankfurt Hahn. Dawk l-investimenti jittrattaw pereżempju l-estensjoni tar-runway għal 3 800 metru. Fit-22 ta' Marzu 2004, tħejja abbozz ta' ftehim bejn l-azzjonisti bejn Fraport, Land Rhineland-Palatinate, u Land Hesse. Il-ftehim finali bejn l-azzjonisti dwar id-deċiżjoni biex tiġi realizzata din iż-żieda fil-kapital tal-2004 ġie ffirmat minn Fraport, Land Rhineland-Palatinate, u Land Hesse fit-30 ta' Marzu 2005 u fid-19 ta' Mejju 2005 ġie rreġistrat fir-reġistru kummerċjali

(40)

It-tliet partijiet qablu dwar żieda fil-kapital ta' EUR 19,5 miljun għall-kapital awtorizzat tal-FFHG, biex b'hekk jitkompla l-programm ta' investiment li l-SD kien ippropona fl-2001 (ara l-premessi 33-34). Land Rhineland-Palatinate u Land Hesse qablu dwar din iż-żieda fil-kapital bil-kundizzjoni li jiġi konkluż PLTA ġdid bejn l-FFHG u Fraport, li jkopri l-perjodu sal-31 ta' Diċembru 2014. L-azzjonisti qablu wkoll li kwalunkwe dejn ieħor li l-FFHG kienet se ġġarrab kellu jiġi ggarantit minn Fraport, minn Land Rhineland-Palatinate u minn Land Hesse fi proporzjon li jikkorrispondi għad-distribuzzjoni tal-kapital fl-FFHG. Fuq dik il-bażi Fraport, Land Rhineland-Palatinate u Land Hesse impenjaw ruħhom li jerġgħu jiffinanzjaw l-investimenti infrastrutturali tal-FFHG.

(41)

Bejn l-2004 u l-2009, ġie injettat kapital ġdid ta' EUR 19,5 miljun fl-FFHG f'diversi pagamenti. Is-sehem ta' Fraport fiż-żieda fil-kapital kien jammonta għal EUR 10,21 miljun, ta' Land Rhineland-Palatinate għal EUR 0,54 miljun, u Land Hesse kkontribwiet EUR 8,75 miljun.

(42)

Barra minn hekk, kemm Land Hesse kif ukoll Land Rhineland-Palatinate impenjaw ruħhom u skont l-iskeda ta' pagamenti (ara t-Tabella 5 hawn taħt) injettaw EUR 11,25 miljun oħra bħala riżerva ta' kapital, li kellu jitħallas bejn l-2007 u l-2009 minn tal-ewwel, u bejn l-2005 u l-2009 minn tal-aħħar.

(43)

Għalhekk, l-ammont totali taż-żieda fil-kapital deċiż fl-2005 kien ta' EUR 42 miljun.

(44)

Il-pagamenti kienu dovuti skont l-iskeda li ġejja fit-Tabella 5 (f'eluf ta' EUR):

Tabella 5

Skeda ta' pagamenti ta' injezzjonijiet ta' kapital

(45)

Peress li kienet kundizzjoni għall-approvazzjoni taż-żieda fil-kapital, permezz ta' ftehim tal-5 April 2004 l-FFHG u Fraport estendew it-tul tal-PLTA tal-2001 sal-2014. Madankollu l-ftehim il-ġdid tal-PLTA sar effettiv biss wara l-approvazzjoni tal-assemblea tal-azzjonisti ta' Fraport. Kif ġie miftiehem mill-azzjonisti tal-FFHG fir-rigward taż-żieda fil-kapital, f'dan il-PLTA tal-2004 ġie stabbilit li kwalunkwe dejn ieħor akkumulat mill-FFHG kellu jiġi kumpensat minn Fraport, Land Rhineland-Palatinate u Land Hesse fi proporzjon li jikkorrispondi għall-ekwità tagħhom.

(46)

Skont il-PLTA tal-2004, sal-2009 Fraport kienet assumiet valur ta' madwar EUR […] miljun f'telf. Għalhekk, skont iż-żewġ PLTAs suċċessivi flimkien, Fraport għamlet tajjeb għal total ta' EUR […] miljun ta' telf, li ġie akkumulat bejn l-2001 u l-2009. Minn din is-somma, EUR […] miljun jittratta d-deprezzament ta' assi u EUR […] miljun il-pagamenti ta' imgħax fuq self għall-finanzjament tal-infrastruttura.

(47)

Fl-2009, Fraport biegħet is-sehem kollu tagħha fl-FFHG lil Land Rhineland-Palatinate u b'hekk temmet ukoll il-PLTA.

(48)

Il-Land Rhineland-Palatinate tiġbor taxxa għas-sigurtà ajruportwali mill-passiġġieri kollha li jitilqu mill-ajruport ta' Frankfurt Hahn. Il-Land ma twettaqx il-kontrolli tas-sigurtà hija stess, iżda ssottokuntrattat dak il-kompitu lill-ajruport, li min-naħa tiegħu permezz ta' ftehim issottokuntratta dak il-kompitu lil kumpanija tas-sigurtà. Bħala korrispettiv għat-twettiq tal-kontrolli tas-sigurtà, il-Land tittrasferixxi d-dħul kollu mit-taxxa tas-sigurtà lill-ajruport.

(49)

Skont ir-rapporti finanzjarji għall-kumpaniji azzjonarji tal-Land Rhineland-Palatinate (19), il-Land issussidjat lill-FFHG skont l-ammonti li ġejjin kif miġbura fil-qosor fit-Tabella 6.

Tabella 6

Għotjiet diretti minn Land Rhineland-Palatinate

(50)

L-għotjiet diretti li saru qabel it-12 ta' Diċembru 2000 minn Land Rhineland-Palatinate lill-FFHG ilaħħqu l-[…] miljun, filwaqt li l-għotjiet diretti minn Land Rhineland-Palatinate lill-FFHG bejn l-2001 u l-2004 ilaħħqu l-EUR […] miljun.

(51)

Fl-1999, l-FFHG attirat l-ewwel trasportatur bi prezzijiet irħas tagħha, Ryanair. L-FFHG ikkonkludiet tliet ftehimiet ma' Ryanair fl-1999, fl-2002 u fl-2005. Barra minn hekk, fl-2001 u fl-2006 l-FFHG introduċiet imposti ajruportwali ġodda.

(52)

L-ewwel ftehim ma' Ryanair daħal fis-seħħ b'effett retroattiv mill-1 ta' April 1999, u kellu terminu ta' 5 snin (il-“ftehim ma' Ryanair tal-1999”). Ryanair bdiet topera mill-ajruport ta' Frankfurt Hahn lejn London Stansted fit-22 ta' April 1999, meta kienu diġà ġew miftiehma l-kundizzjonijiet essenzjali kollha tal-ftehimiet.

(53)

Waqt il-laqgħa tiegħu tal-5 ta' Mejju 1999 il-bord maniġerjali tal-FFHG kien ippreżenta Deckungsbeitragsrechnung (analiżi tal-bilanċ finanzjarju) tal-ftehim ma' Ryanair tal-1999 lill-Bord Superviżorju. Skont il-Ġermanja, il-Bord Superviżorju tal-FFHG ma kienx ivvota dwar il-ftehim mar-Ryanair tal-1999 jew dwar l-analiżi tal-bilanċ finanzjarju, peress li l-konklużjoni tal-ftehim kienet meqjusa bħala negozju operattiv ta' kuljum li jaqa' fi ħdan il-kompetenza unika tal-Bord Maniġerjali tal-FFHG.

(54)

It-Tabella 7 tippreżenta fil-qosor l-imposti dovuti minn Ryanair skont l-Anness 1 tal-ftehim ma' Ryanair tal-1999.

Tabella 7

Imposti dovuti minn Ryanair skont l-Anness 1 tal-ftehim ma' Ryanair tal-1999

(55)

Skont l-Anness 3 tal-ftehim ma' Ryanair tal-1999, l-FFHG irċeviet ukoll kummissjoni ta' […] % fuq kull biljett mibjugħ (flus kontanti jew karta ta' kreditu) jew maħruġ mill-kaxxiera tal-biljetti tal-FFHG, kummissjoni ta' […] % fuq l-imposti għal piż eċċessiv tal-bagalji miġbura mill-FFHG, EUR […] għal kull biljett imħallas minn qabel ipproċessat minn Ryanair u kummissjoni ta' […] % għal kull karozza mikrija bbukkjata permezz tal-FFHG.

(56)

Ryanair kienet intitolata għal appoġġ ta' kummerċjalizzazzjoni li jlaħħaq massimu ta' EUR […] fis-sena, li kellu jitħallas mill-FFHG f'pagamenti trimestrali u għall-ewwel 3 snin biss ta' operat. L-appoġġ għall-kummerċjalizzazzjoni kellu jintuża esklussivament għal reklami li jikkonċernaw rotot li jitilqu mill-ajruport ta' Frankfurt Hahn. Ryanair kellha tipprovdi fatturi bħala provi u prova dettaljata ta' kif kienu ntefqu l-flus.

(57)

Fis-16 ta' Ottubru 2001, ġiet approvata l-iskeda tal-imposti ajruportwali tal-2001 għall-ajruport ta' Frankfurt Hahn u ġiet ippubblikata mid-Dipartiment tat-Trasport tal-Land Rhineland-Palatinate. Daħlet fis-seħħ b'mod retroattiv fl-1 ta' Ottubru 2001. (21)

(58)

Peress li l-istrateġija kummerċjali tal-ajruport ta' Frankfurt Hahn kienet iffokata fuq trasportaturi bi prezzijiet irħas, li tipikament joperaw inġenji tal-ajru Boeing 737 jew Airbus A 319/320 b'piż massimu waqt it-tluq (“MTOW”) ta' madwar 50 sa 80 tunnellata, introduċa imposta ta' żero għall-illandjar u għat-tlugħ għal inġenji tal-ajru b'MTOW ta' bejn 5,7 u 90 tunnellata.

(59)

It-Tabella 8 tiġbor fil-qosor l-imposti għal kull inġenju tal-ajru għal servizzi infrastrutturali ċentrali ta' groundhandling li kellhom jitħallsu mil-linji tal-ajru skont l-iskeda tal-imposti ajruportwali tal-2001.

Tabella 8

Imposti għal servizzi infrastrutturali ċentrali ta' groundhandling li kellhom jitħallsu mil-linji tal-ajru skont l-iskeda tal-imposti ajruportwali tal-2001

(60)

It-tariffa fuq il-passiġġieri ġiet iffissata għal EUR 4,35 għal kull passiġġier li jasal. It-tariffa ta' sigurtà għall-passiġġieri bbażata fuq l-għadd ta' passiġġieri abbord l-inġenju tal-ajru mat-tluq hija ta' EUR 4,35 għal kull passiġġier, li għandha titħallas lid-Dipartiment tal-Awtostradi u tat-Trasport ta' Land Rhineland-Palatinate — Sezzjoni tat-Trasport bl-Ajru.

(61)

Skont ir-Regoli tat-Titjir bl-Istrumenti, operatur ta' ajruport irid jitħallas tariffa ta' avviċinament tal-Kontroll tat-Traffiku tal-Ajru għal kull avviċinament ta' inġenju tal-ajru. Jekk it-titjira tkun qiegħda tiġi operata għal raġunijiet minbarra dawk ta' taħriġ jew ta' istruzzjoni, dik l-imposta għal titjiriet kummerċjali jew mhux kummerċjali hija inkluża fl-imposta fuq l-illandjar u t-tlugħ. Għalhekk hija ta' żero għal inġenji tal-ajru li għalihom tapplika l-imposta fuq it-tlugħ u l-illandjar.

(62)

It-tieni ftehim ma' Ryanair huwa datat l-14 ta' Frar 2002 (il-“ftehim ma' Ryanair tal-2002”) u ġie ppreżentat lill-Bord Superviżorju tal-FFHG li tlaqqa' fis-16 ta' Novembru 2001. Il-minuti ta' dik il-laqgħa jirrapportaw li l-maġġoranza tal-membri tal-Bord Superviżorju kienu approvawh.

(63)

Il-kopja tal-ftehim ma' Ryanair tal-2002 li ntbagħtet lill-Kummissjoni mhijiex iffirmata. Skont il-Ġermanja, għalkemm dak il-ftehim qatt ġie ffirmat, madankollu l-partijiet ilhom japplikawh mill-14 ta' Frar 2002.

(64)

Skont il-Ġermanja, il-ftehim ma' Ryanair tal-2002 issostitwixxa l-ftehim ma' Ryanair tal-1999, u kien ġie konkluż għal perjodu ta' […] sena (sal-[…]). Madankollu, it-tariffa tal-passiġġieri baqgħet l-istess bħal ma kienet fil-ftehim inizjali tal-1999. Ryanair għandha l-għażla li ttawwal il-ftehim b'termini u kundizzjonijiet simili sal-[…].

(65)

Il-ftehim ma' Ryanair tal-2002 huwa bbażat fuq il-Ftehim Standard dwar il-Groundhandling tal-Assoċjazzjoni Internazzjonali tat-Trasport bl-Ajru, li ġie adattat għall-ħtiġijiet tal-partijiet. Jikkonsisti f'dawn l-elementi:

(66)

Il-Ftehim prinċipali, l-Anness A u l-Anness B — 1.0 huma sempliċiment kopji tal-formola standard. Il-partijiet ma mlew ebda parti, peress li din il-parti tal-formola standard ma kinitx meqjusa applikabbli.

(67)

Il-partijiet imlew it-tieni Anness B — 1.0, fir-rigward tal-ismijiet tal-partijiet, il-kontijiet bankarji u l-prezz għall-fluwidu għat-tneħħija tas-silġ (EUR […] għal kull litru) u għall-ilma sħun (EUR […] għal kull litru).

(68)

L-Anness 3 u l-Annessi 1-3 tiegħu jittrattaw “ftehimiet strateġiċi ulterjuri” bejn il-partijiet. Jittrattaw l-arranġamenti tekniċi għall-groundhandling, qtugħ ta' biljetti u l-ispazju għat-tpoġġija tal-marka kummerċjali fl-ajruport.

(69)

L-Anness D jistipula li fir-rigward ta' groundhandling japplikaw l-imposti miġbura fil-qosor fit-Tabella 9, bil-kundizzjoni li l-ħin tat-tagħbija u l-ħatt ma jaqbiżx it-30 minuta.

Tabella 9

Imposti għall-groundhandling f'każ ta' massimu ta' 30 minuta għat-tagħbija u l-ħatt

(70)

Il-partijiet vojta għal inġenji tal-ajru ta' “sa” u “aktar minn” […] tunnellata jidhru jindikaw li […] ġew imposti bħala ħlas għal inġenji tal-ajru bejn […] u […] tunnellata. (23)

(71)

L-Anness E (jiġifieri l-Ftehim Hahn-Smart) jikkonferma din l-analiżi. Fil-punt 1 jistabbilixxi:

“[…]”

(72)

Il-livell tat-tariffi ajruportwali ġie ffriżat sat-30 ta' April 2004 u wara din id-data kellu jiġi aġġustat biex jikkorrispondi mal-Indiċi tal-Prezzijiet għall-Konsumatur tal-Ġermanja, jekk dan tal-aħħar jiżdied b'aktar minn […] % meta mqabbel mas-sena ta' qabel.

(73)

L-Anness E jipprevedi wkoll il-ħlas ta' appoġġ għall-kummerċjalizzazzjoni. Ryanair hija intitolata għall-appoġġ għall-kummerċjalizzazzjoni li ġej:

(74)

L-Anness E jipprevedi wkoll iż-żieda tal-VAT ma' kull pagament jew prezz fil-ftehim, sa fejn tapplika l-liġi dwar it-taxxa fuq id-dħul mill-bejgħ.

(75)

[…].

(76)

Bħala konklużjoni, skont il-ftehim ma' Ryanair tal-2002 il-linja tal-ajru tħallas l-imposti ppreżentati fil-qosor fit-Tabella 11.

Tabella 11

Ħarsa ġenerali lejn l-imposti ajruportwali li għandhom jitħallsu minn Ryanair

(77)

Fl-4 ta' Novembru 2005, intlaħaq ftehim dwar emenda għall-fehim tal-2002, il-“Ftehim Ryanair/Flughafen Frankfurt-Hahn GmbH Konsenja ta' inġenji tal-ajru minn 6 sa 18 — bejn l-2005 u l-2012” (il-“ftehim ma' Ryanair tal-2005”). Fit-18 ta' Novembru 2005, il-bord superviżorju tal-FFHG approva l-konklużjoni tal-ftehim ma' Ryanair tal-2005.

(78)

Il-partijiet rilevanti tal-ftehim ma' Ryanair tal-2005 huma:

(79)

Il-ftehim ma' Ryanair tal-2005 huwa validu sal-[…]. L-elementi l-oħra tal-ftehim ma' Ryanair tal-2002, b'mod partikolari l-Ftehim Prinċipali u l-Anness E (jiġifieri l-Ftehim Hahn-Smart), ġew estiżi wkoll sal-[…].

(80)

It-Tabella 12 turi l-għadd ta' inġenji tal-ajru ta' Ryanair li kellhom jiġu bbażati fl-ajruport ta' Frankfurt Hahn u l-volum ta' passiġġieri previst skont il-ftehim ma' Ryanair tal-2005:

Tabella 12

Inġenji tal-ajru ta' Ryanair u t-tkabbir previst fl-għadd ta' passiġġieri skont il-ftehim ma' Ryanair tal-2005

(81)

It-Tabella 13 tipprovdi ħarsa ġenerali tas-sistema ta' ribassi fuq l-imposti ajruportwali introdotti permezz tal-ftehim ma' Ryanair tal-2005.

Tabella 13

Ribassi emendati tal-ajruport introdotti mill-ftehim ma' Ryanair tal-2005

(82)

[…].

(83)

Fis-26 ta' April 2006, id-Dipartiment tat-Trasport ta' Land Rhineland-Palatinate approva l-iskeda tal-imposti ajruportwali tal-2006 għall-ajruport ta' Frankfurt Hahn. (25) u daħlet fis-seħħ fl-1 ta' Ġunju 2006. Issegwi l-istess prinċipji bażiċi bħall-iskeda ta' imposti ajruportwali tal-2001 (ara l-premessa 57 ta' hawn fuq u dawk segwenti).

(84)

Meta mqabbel mal-iskeda preċedenti, it-tibdil jittratta l-imposti fuq it-tlugħ u l-illandjar, it-tariffa fuq il-passiġġieri u l-appoġġ għall-kummerċjalizzazzjoni. L-iskeda tal-imposti ajruportwali tal-2006 iżżomm iż-żewġ prinċipji fundamentali tal-iskeda tal-imposti ajruportwali tal-2001:

(85)

Madankollu, l-iskeda tal-2006 tintroduċi żewġ limitazzjonijiet għal dawk il-prinċipji. L-ewwel nett, inġenji tal-ajru tal-passiġġieri biss jistgħu japprofittaw minn dawn il-vantaġġi. It-tieni nett, il-vantaġġi huma limitati għal inġenji tal-ajru li l-proċess ta' tagħbija u ħatt tagħhom ma jaqbiżx it-30 minuta.

(86)

Barra minn hekk, l-imposti fuq il-passiġġieri huma stabbiliti għal kull passiġġier li jitlaq, u bħala funzjoni tal-għadd totali ta' passiġġieri trasportati mil-linja tal-ajru (li jitilqu u li jaslu) li għaliha jappartjeni l-ajruplan. It-Tabella 14 tipprovdi ħarsa ġenerali tal-imposti fuq il-passiġġieri li għandhom jitħallsu skont l-iskeda tal-imposti ajruportwali tal-2006 skont l-għadd totali ta' passiġġieri li jitilqu u li jaslu.

Tabella 14

L-imposti fuq il-passiġġieri skont l-iskeda tal-imposti ajruportwali tal-2006

(87)

It-Tabella 15 turi l-ammont ta' appoġġ għall-kummerċjalizzazzjoni li jista' jingħata lil linji tal-ajru li jkunu qegħdin jużaw l-ajruport.

Tabella 15

Appoġġ għall-kummerċjalizzazzjoni

(88)

Barra minn hekk, l-appoġġ għall-kummerċjalizzazzjoni huwa regolat f'dokument separat disponibbli fuq is-sit web tal-ajruport ta' Frankfurt Hahn. Appoġġ ta' darba għall-kummerċjalizzazzjoni jingħata taħt il-kundizzjonijiet li ġejjin:

(89)

Il-Ġermanja ntrabtet li tinjetta EUR […] miljun fl-ekwità tal-FFHG biex tiffinanzja mill-ġdid is-self tal-FFHG.

(90)

Dawk il-fondi jirrifinanzjaw il-miżuri infrastrutturali li ġew deċiżi b'mod irrevokabbli mill-awtoritajiet pubbliċi qabel il-31 ta' Diċembru 2012, iżda li ma kinux koperti permezz tal-PLTAs, taż-żidiet fil-kapital jew ta' għotjiet oħra.

(91)

Fir-rigward tal-PLTA tal-2001, fid-deċiżjoni tal-ftuħ tal-2008 il-Kummissjoni sabet li t-telf annwali kien iġġarrab minn Fraport, kumpanija predominantement pubblika. Għalhekk il-Kummissjoni stabbiliet li kellha bżonn teżamina jekk il-Ġermanja tistax titqies li kienet involuta fil-konklużjoni tal-PLTA tal-2001.

(92)

Fi Stardust Marine l-Qorti tal-Ġustizzja ddeċidiet (26) li r-riżorsi ta' impriża inkorporata taħt id-dritt privat, li l-maġġoranza tal-ishma tagħha huma proprjetà pubblika, jikkostitwixxu riżorsi tal-Istat. Il-Kummissjoni qieset li l-konklużjoni tal-ftehim kellha titqies ukoll bħala imputabbli lill-Istat peress li ma kienx ikun impossibbli li dan issir mingħajr ma jitqiesu l-ħtiġijiet tal-awtoritajiet pubbliċi.

(93)

Barra minn hekk, b'kuntrast mal-argumenti mqajma mill-Ġermanja, il-Kummissjoni esprimiet dubji li investitur f'ekonomija tas-suq kien jikkonkludi ftehim bħal dan peress li huwa ċar li l-ftehim kien jikkostitwixxi vantaġġ għall-FFHG billi taffielha piż finanzjarju li kieku kien ikollha ssostni.

(94)

Il-Kummissjoni qieset ukoll li l-miżura kienet selettiva peress li t-telf tal-FFHG biss kien kopert u li l-miżura kkonċernata fixklet jew heddet li tfixkel il-kompetizzjoni fis-suq tal-operaturi tal-ajruporti u affettwat il-kummerċ bejn l-Istati Membri.

(95)

Għalhekk il-Kummissjoni kienet tal-fehma preliminari li l-miżura inkwistjoni tista' tikkostitwixxi għajnuna mill-Istat fil-forma ta' għajnuna operatorja.

(96)

Peress li l-Ġermanja ma pprovdiet ebda evidenza u lanqas ma argumentat li din l-għajnuna operatorja setgħet tiġi kkunsidrata kompatibbli mas-suq intern skont l-Artikolu 107(3)(c) tat-Trattat, u fid-dawl tal-Linji Gwida tal-Avjazzjoni tal-2005, il-Kummissjoni qajmet dubji serji dwar jekk dik l-għajnuna tistax titqies bħala kompatibbli.

(97)

Fid-deċiżjoni tal-ftuħ tal-2008, il-Kummissjoni sabet li Fraport u Land Rhineland-Palatinate kienu żiedu l-kapital tal-FFHG b'EUR 27 miljun, permezz ta' kontribuzzjoni ta' EUR 19,7 miljun u EUR 7,3 miljun rispettivament. Dwar l-eżistenza ta' għajnuna, il-Kummissjoni rrilevat li skont il-kriterji stabbiliti fil-kawża Stardust Marine, ir-riżorsi kemm ta' Fraport kif ukoll tal-Land Rhineland-Palatinate jikkostitwixxu riżorsi tal-Istat (27). Barra minn hekk, il-Kummissjoni kienet tal-fehma preliminari li probabbilment anke d-deċiżjonijiet ta' Fraport huma imputabbli lill-Istat.

(98)

Barra minn hekk, il-Kummissjoni indikat li ma kinitx konvinta li t-test tal-operatur f'ekonomija tas-suq (MEOT) għaż-żieda fil-kapital kien issodisfat. Il-Kummissjoni aċċettat fil-prinċipju li valutazzjoni li ssir minn kumpanija waħda jew aktar indipendenti tal-awditjar tista' sservi bħala prova li tranżazzjoni tkun seħħet skont il-valur tas-suq. (28) Madankollu, il-Kummissjoni kellha dubji dwar jekk ir-rapport ippreżentat minn PwC f'isem Fraport kienx biżżejjed biex tiġi eskluża l-preżenza ta' vantaġġ.

(99)

Id-dubji kienu minħabba l-kontenut tal-MEOT li sar minn PwC peress li kien purament kwalitattiv u ma vvalutax l-ispiża tad-diżimpenn min-naħa ta' Fraport. Barra minn hekk ir-rapport la kkwantifika u lanqas ma spjega fid-dettall ir-“riskji kbar” identifikati mill-BCG u mill-SD ta' Fraport, u ġeneralment illimita l-valutazzjoni għal Fraport, mingħajr ma qies jekk Land Rhineland-Palatinate kinitx aġixxiet bħala investitur f'ekonomija tas-suq. Għal dawk ir-raġunijiet, il-Kummissjoni ma setgħetx teskludi li ż-żieda fil-kapital kienet tat vantaġġ lill-FFHG.

(100)

Il-Kummissjoni kkonkludiet ukoll li l-miżura kienet selettiva peress li l-FFHG biss kienet ingħatat iż-żieda fil-kapital tal-2001 u li fixklet jew heddet li tfixkel il-kompetizzjoni fis-suq tal-operaturi tal-ajruporti u affettwat il-kummerċ bejn l-Istati Membri.

(101)

Għalhekk il-Kummissjoni kienet tal-fehma preliminari li l-miżura inkwistjoni tista' tikkostitwixxi għajnuna mill-Istat fil-forma ta' għajnuna għall-investiment u qajmet dubji dwar il-kompatibbiltà tagħha mas-suq intern, partikolarment fid-dawl tal-Artikolu 107(3)(c) tat-Trattat u l-Linji Gwida tal-Avjazzjoni tal-2005.

(102)

Fir-rigward tat-tieni żieda fil-kapital, il-Kummissjoni nnotat li fl-2004, l-azzjonisti eżistenti tal-FFHG kienu żiedu l-kapital awtorizzat tagħha b'EUR 10,75 miljun, bi Fraport tikkontribwixxi sehem ta' EUR 10,21 miljun u Land Rhineland-Palatinate sehem ta' EUR 0,54 miljun. Barra minn hekk, Land Hesse daħlet bħala azzjonista ġdida, b'kontribuzzjoni ta' EUR 8,75 miljun addizzjonali. Apparti minn hekk, kemm Land Rhineland-Palatinate u Land Hesse impenjaw ruħhom li jikkontribwixxu EUR 11,25 miljun kull wieħed bħala riżerva ta' kapital.

(103)

Fir-rigward ta' din iż-żieda fil-kapital il-Kummissjoni adottat mutatis mutandis l-istess raġunament li kienet applikat għal dak tal-2001 (ara s-sezzjoni 4.1.2) għall-eżistenza ta' għajnuna u qajmet l-istess dubji dwar il-kompatibbiltà tagħha mas-suq intern.

(104)

Skont id-deċiżjoni tal-ftuħ tal-2008, taħt il-PLTA tal-2004 Fraport kienet assumiet it-telf tal-FFHG li kien jammonta għal mill-inqas […] miljun. Il-Kummissjoni applikat mutatis mutandis l-istess raġunament li kienet applikat fir-rigward tal-PLTA tal-2001, ara l-premessa 91 u dawk segwenti. Fir-rigward tal-MEOT ippreżentat minn PwC, il-Kummissjoni kellha dubji dwar l-affidabilità tiegħu minħabba li l-valutazzjoni kienet fil-biċċa l-kbira kwalitattiva. Għalhekk, il-Kummissjoni qieset li l-PLTA tal-2004 jikkostitwixxi għajnuna operatorja u esprimiet dubji dwar il-kompatibbiltà tiegħu mas-suq intern, b'mod partikolari fid-dawl tal-Linji Gwida tal-Avjazzjoni tal-2005.

(105)

Fid-deċiżjoni tal-ftuħ tal-2008 il-Kummissjoni indikat li s-servizzi ta' sigurtà ta' ajruport mhumiex ta' natura ekonomika u ma jaqgħux fil-kamp ta' applikazzjoni tar-regoli dwar l-għajnuna mill-Istat. (29)

(106)

Il-Kummissjoni imbagħad osservat li l-analiżi ekonomika ta' PwC dehret tindika li Land Rhineland-Palatinate kkumpensat iżżejjed lill-FFHG għat-twettiq tal-kontrolli tas-sigurtà. F'dak ir-rigward il-Kummissjoni enfasizzat li dak il-vantaġġ kien ġie ffinanzjat permezz ta' riżorsi tal-Istat u kellu l-potenzjal li jfixkel il-kompetizzjoni u jaffettwa l-kummerċ bejn l-Istati Membri. Għalhekk, il-Kummissjoni qieset li l-kumpens żejjed kien jikkostitwixxi għajnuna mill-Istat fis-sens tal-Artikolu 107(1) tat-Trattat.

(107)

Fir-rigward tal-valutazzjoni ta' kompatibbiltà ta' dik l-għajnuna operatorja, il-Kummissjoni applikat mutatis mutandis l-istess raġunament li kienet applikat fir-rigward tal-PLTA tal-2001, ara l-premessa 95 u dawk segwenti. Bażi ġuridika oħra possibbli li ġiet ivvalutata għall-kompatibbiltà mas-suq intern kienet l-Artikolu 106(2) tat-Trattat. Madankollu, il-Ġermanja ma pprovdiet ebda indikazzjoni li kien ġie impost obbligu ta' servizz pubbliku fuq l-FFHG. Għalhekk, il-Kummissjoni ma sabitx bażi ġuridika biex tiddikjara li l-kumpens żejjed li rriżulta mill-imposta fuq is-sigurtà bħala kompatibbli mas-suq intern.

(108)

Fid-deċiżjoni tal-ftuħ tagħha tal-2008, il-Kummissjoni nnotat li l-għotjiet diretti li ngħataw bejn l-2001 u l-2004 jidhru li kienu ngħataw mingħajr kunsiderazzjoni, minn riżorsi tal-Istat (jiġifieri l-baġit ġenerali ta' Land Rhineland-Palatinate) u b'mod selettiv (lill-FFHG biss). Il-Kummissjoni qieset li dawk l-għotjiet għandhom il-potenzjal li jfixklu l-kompetizzjoni u jaffettwaw il-kummerċ bejn l-Istati Membri. Għalhekk, il-Kummissjoni kienet tal-fehma preliminari li kienu jikkostitwixxu għajnuna mill-Istat fis-sens tal-Artikolu 107(1) tat-Trattat fil-forma ta' għajnuna għall-investiment.

(109)

Barra minn hekk il-Kummissjoni qajmet dubji dwar il-kompatibbiltà tal-għajnuna mas-suq intern, partikolarment fid-dawl tal-Artikolu 107(3)(c) tat-Trattat u l-Linji Gwida tal-Avjazzjoni tal-2005.

(110)

Fir-rigward tal-ftehim ma' Ryanair tal-1999, fid-deċiżjoni tal-ftuħ tal-2008 il-Kummissjoni ġeneralment osservat li tnaqqis jew sistema ta' tnaqqis li tagħti trattament preferenzjali lil negozju speċifiku x'aktarx taqa' fil-kamp ta' applikazzjoni tal-Artikolu 107 tat-Trattat.

(111)

Il-Kummissjoni qieset li, peress li l-FFHG hija impriża predominantement pubblika, ir-riżorsi tagħha jikkostitwixxu riżorsi tal-Istat. Fir-rigward tal-ftehim ma' Ryanair tal-1999, il-Kummissjoni indikat li għalkemm il-bord superviżorju ma kienx ivvota dwar dak il-ftehim, lanqas ma kien għadda xi mozzjoni jew ħa xi azzjoni li tissuġġerixxi li kien kuntrarju għalih. Għalhekk, il-Kummissjoni nnotat li ma kellha l-ebda indikazzjoni li tippermettilha li tikkonkludi li l-ftehim ma' Ryanair tal-1999 ma kienx imputabbli lill-Istat.

(112)

Barra minn hekk, il-Kummissjoni qajmet dubji dwar jekk investitur fis-suq privat kienx jikkonkludi l-ftehim ma' Ryanair tal-1999. F'dan ir-rigward il-Kummissjoni nnotat li l-imposti li l-FFHG imponiet fuq Ryanair ma kinux ikopru l-ispejjeż kollha tal-FFHG u għalhekk jidhru li taw vantaġġ lil Ryanair.

(113)

Il-Kummissjoni indikat ukoll li l-ispejjeż ta' madwar EUR […] miljun tat-terminal il-ġdid ma kinux tqiesu fl-MEOT ippreżentat mill-Ġermanja. Bħala osservazzjoni preliminari, il-Kummissjoni ċaħdet l-argument tal-Ġermanja li fl-1999 l-HHN kien xorta waħda jeħtieġ terminal ġdid tal-passiġġieri, u li l-kapaċità ta' 1,25 miljun passiġġier fis-sena kien ferm ogħla mill-volum ta' passiġġieri li kien mistenni jiġi ġġenerat minn Ryanair, peress li fl-1999 Ryanair kienet l-unika trasportatur tal-ajru maġġuri tal-passiġġieri fl-ajruport ta' Frankfurt Hahn. Għal dawk ir-raġunijiet, il-Kummissjoni qajmet dubji dwar l-MEOT ippreżentat mill-Ġermanja.

(114)

Il-Kummissjoni qieset ukoll li l-ftehim ma' Ryanair tal-1999 huwa miżura selettiva u speċifika peress li Ryanair biss kienet irċeviet dawn il-kundizzjonijiet fin-negozjati mal-FFHG, u li l-miżura kkonċernata tfixkel jew thedded li tfixkel il-kompetizzjoni fis-suq tal-linji tal-ajru u taffettwa l-kummerċ bejn l-Istati Membri.

(115)

Għalhekk, il-Kummissjoni kienet tal-fehma preliminari li, peress li kien jidher li ma jissodisfax l-MEOT u kien imputabbli lill-Istat, il-ftehim ma' Ryanair tal-1999 jikkostitwixxi għajnuna mill-Istat fis-sens tal-Artikolu 107(1) tat-Trattat. Barra minn hekk, il-Kummissjoni ma setgħet tara l-ebda raġuni legali biex tiddikjara għajnuna operatorja permanenti bħal din għal linja tal-ajru bħala kompatibbli mas-suq intern.

(116)

Fid-deċiżjoni tal-ftuħ tal-2008, il-Kummissjoni analizzat ukoll jekk l-iskeda tal-imposti ajruportwali tal-2001 kinux possibbilment jikkostitwixxu għajnuna mill-Istat lil Ryanair. F'dak ir-rigward qieset li, bħala kumpaniji li fihom l-awtoritajiet pubbliċi għandhom sehem predominanti, ir-riżorsi tal-FFHG u ta' Fraport jikkostitwixxu riżorsi tal-Istat u li l-aġir tagħhom ikun imputabbli wkoll lill-Istat.

(117)

Il-Kummissjoni esprimiet dubji dwar jekk l-istruttura tat-tariffi tal-iskeda tal-imposti ajruportwali tal-2001 kinitx ġiet stabbilita b'mod li tippermetti li l-ajruport jopera bi profitt peress li l-Ġermanja ma kinitx ipprovdiet MEOT għal din l-iskeda. Peress li jidher li bejn l-2001 u l-2003 Ryanair kienet l-unika linja tal-ajru tal-passiġġieri li kienet qiegħda tuża l-ajruport, u sal-2006 kienet żammet aktar minn 95 % tal-volum tal-passiġġieri, ir-riżultati tal-MEOT għall-ftehim ma' Ryanair tal-2002, li kien ibbażat fuq l-iskeda ta' imposti ajruportwali tal-2001 u li kien introduċa appoġġ addizzjonali għall-kummerċjalizzazzjoni, kienu jservu bħala punt ta' referenza. Abbażi tal-informazzjoni pprovduta, il-Kummissjoni kellha dubju jekk l-MEOT għall-iskeda ta' imposti ajruportwali tal-2001 kienx issodisfat.

(118)

Il-Kummissjoni qieset li l-miżura kienet selettiva peress li l-linji tal-ajru biss li jużaw l-ajruport ta' Frankfurt Hahn kienu bbenefikaw mill-iskeda ta' imposti ajruportwali tal-2001 u li ħolqot tfixkil jew heddet li toħloq tfixkil tal-kompetizzjoni u affettwat il-kummerċ bejn l-Istati Membri.

(119)

Għalhekk, fir-rigward tal-iskeda ta' imposti ajruportwali tal-2001, il-Kummissjoni kienet tal-fehma preliminari li tista' tikkostitwixxi għajnuna mill-Istat fis-sens tal-Artikolu 107(1) tat-Trattat. Barra minn hekk, il-Kummissjoni ma sabitx raġunijiet legali biex tiddikjara għajnuna operatorja permanenti bħal din għal linja tal-ajru bħala kompatibbli mas-suq intern.

(120)

Fir-rigward tal-kwistjoni ta' riżorsi tal-Istat, il-Kummissjoni applikat l-istess raġunament mutatis mutandis bħal dak għall-ftehim ma' Ryanair tal-1999, li ġie diskuss fis-sezzjoni 4.2.1 (il-premessa 110 u dawk segwenti). Dwar l-imputabbiltà tal-miżura, il-ftehim ma' Ryanair tal-2002 kien ġie formalment approvat mill-Bord Superviżorju tal-FFHG, li huwa ddominat minn membri nominati mill-awtoritajiet pubbliċi. Għalhekk, il-Kummissjoni kienet tal-fehma preliminari li l-ftehim ma' Ryanair tal-2002 kien imputabbli lill-Ġermanja.

(121)

Barra minn hekk, il-Kummissjoni esprimiet dubji dwar jekk investitur fis-suq privat kienx jikkonkludi l-ftehim ma' Ryanair tal-2002. F'dan ir-rigward, il-Kummissjoni ddubitat il-kalkolu ppreżentat mill-Ġermanja. Barra minn hekk, il-Kummissjoni qajmet dubji dwar il-kalkolu tal-ispejjeż peress li l-ispejjeż għall-infrastruttura ġenerali tal-ajruport u l-amministrazzjoni ġenerali tal-ajruport li ġew ippreżentati mill-Ġermanja kienu bbażati fuq spejjeż marġinali, aktar milli fuq spejjeż medji. Barra minn hekk, il-livell tal-imposti ajruportwali kien ġie ffriżat sat-30 ta' April 2004 u wara din id-data kellu jiġi aġġustat biex jikkorrispondi mal-Indiċi tal-Prezzijiet għall-Konsumatur tal-Ġermanja, iżda dan biss jekk dan l-indiċi jkun żdied b'aktar minn […] % meta mqabbel mas-sena ta' qabel.

(122)

Fir-rigward tas-selettività, it- tfixkil tal-kompetizzjoni u l-effett fuq il-kummerċ, il-Kummissjoni applikat l-istess raġunament mutatis mutandis bħal dak għall-ftehim ma' Ryanair tal-1999, ara s-sezzjoni 4.2.1 (il-premessa 110 u dawk segwenti).

(123)

Għalhekk il-Kummissjoni kienet tal-fehma preliminari li l-ftehim ma' Ryanair tal-2002 jista' jikkostitwixxi għajnuna mill-Istat fis-sens tal-Artikolu 107(1) tat-Trattat. Barra minn hekk, il-Kummissjoni ma setgħet tara l-ebda raġuni legali biex tiddikjara għajnuna operatorja permanenti bħal din għal linja tal-ajru bħala kompatibbli mas-suq intern.

(124)

Fir-rigward tal-kwistjoni ta' riżorsi tal-Istat, il-Kummissjoni applikat l-istess raġunament mutatis mutandis bħal dak għall-ftehim ma' Ryanair tal-1999, li ġie diskuss fis-sezzjoni 4.2.1 (il-premessa 110 u dawk segwenti). Dwar il-kwistjoni ta' jekk kienx hemm vantaġġ ekonomiku, il-Kummissjoni esprimiet dubji fir-rigward tal-MEOT ippreżentat mill-Ġermanja peress li ma kienx hemm biżżejjed informazzjoni biex jiġu verifikati l-kalkoli u minħabba li l-investimenti kkawżati minn għadd dejjem jikber ta' passiġġieri bl-ebda mod ma kienu tqiesu jew ġew allokati lil Ryanair.

(125)

Barra minn hekk il-Kummissjoni indikat li għalkemm il-ftehim ma' Ryanair tal-2005 kien differenti mill-ftehim ma' Ryanair tal-1999 u tal-2002, bl-introduzzjoni ta' tip ta' sistema ta' penali kuntrattwali fil-każ li Ryanair ma tiġġenerax il-volum ta' passiġġieri stabbilit skont il-kuntratt, kellha d-dubji jekk dawk is-sanzjonijiet kinux effettivi.

(126)

Fir-rigward tas-selettività, it-tfixkil tal-kompetizzjoni u l-effetti fuq il-kummerċ, il-Kummissjoni applikat l-istess raġunament mutatis mutandis bħal dak għall-ftehim ma' Ryanair tal-1999, ara s-sezzjoni 4.2.1 (il-premessa 110 u dawk segwenti).

(127)

Il-Kummissjoni kkonkludiet li l-ftehim ma' Ryanair tal-2005 jikkostitwixxi wkoll għajnuna mill-Istat fis-sens tal-Artikolu 107(1) tat-Trattat. Il-Kummissjoni ma sabet l-ebda raġuni legali biex tiddikjara għajnuna operatorja permanenti bħal din għal linja tal-ajru bħala kompatibbli mas-suq intern.

(128)

Fir-rigward tal-iskeda tal-imposti ajruportwali tal-2006, il-Ġermanja kienet ipprovdiet biss ġustifikazzjoni ekonomika parzjali fil-forma ta' MEOT lill-Kummissjoni. Fid-deċiżjoni tal-ftuħ tal-2008 tagħha l-Kummissjoni indikat li minħabba l-informazzjoni mhux kompluta ma setgħetx tivverifika jekk, skont l-argument tal-Ġermanja, l-ekonomiji ta' skala jiġġustifikawx id-differenzjazzjoni fl-imposti fuq il-passiġġieri. Barra minn hekk, il-ġustifikazzjonijiet ekonomiċi mogħtija għall-iskeda tal-imposti ajruportwali tal-2006 ħallew diversi kwistjonijiet mhux iċċarati, pereżempju dwar liema spejjeż huma inklużi fil-kopertura tal-ispejjeż u għaliex l-appoġġ għall-kummerċjalizzazzjoni ma kienx ġie inkluż fil-ġustifikazzjoni ekonomika tal-iskeda.

(129)

Il-Kummissjoni qieset li l-miżura kienet selettiva peress li l-linji tal-ajru biss li jużaw l-ajruport ta' Frankfurt Hahn kienu bbenefikaw mill-iskeda tal-imposti ajruportwali tal-2006 u li l-miżura kkonċernata fixklet jew heddet li tfixkel il-kompetizzjoni u affettwat il-kummerċ bejn l-Istati Membri.

(130)

Għalhekk, fir-rigward tal-iskeda tal-imposti ajruportwali tal-2006, il-Kummissjoni kienet tal-fehma preliminari li tista' tikkostitwixxi għajnuna mill-Istat fis-sens tal-Artikolu 107(1) tat-Trattat. Barra minn hekk, il-Kummissjoni ma setgħet tara l-ebda raġuni legali biex tiddikjara għajnuna operatorja permanenti bħal din għal linja tal-ajru bħala kompatibbli mas-suq intern.

(131)

Il-Ġermanja ppreżentat osservazzjonijiet u analiżi ekonomiċi estensivi matul din il-proċedura.

(132)

Fil-kummenti tagħha, il-Ġermanja qabel kollox ipprovdiet xi kunsiderazzjonijiet ġenerali ta' sfond dwar l-ajruport ta' Frankfurt Hahn. Il-Ġermanja insistiet li l-proġett tal-ajruport ta' Frankfurt Hahn kien maħsub li jsir kumpanija privata profittabbli mill-mument li jiġi konvertit. Għalhekk, l-involviment strateġiku ta' Fraport kien bl-għan li l-ajruport jikseb profittabbiltà fit-tul. Skont il-Ġermanja, bil-mudell kummerċjali tiegħu ta' trasportaturi bi prezzijiet irħas, infrastruttura kunsiderevolment simplifikata u spejjeż kapitali baxxi, l-ajruport ta' Frankfurt Hahn kien pijunier fl-Ewropa. Madankollu, il-Ġermanja argumentat li dak it-tip ta' proġett infrastrutturali jkun jeħtieġ perjodu ta' madwar 20 sena biex jintlaħqu riżultati operattivi pożittivi. Il-Ġermanja enfasizzat li fl-2006 għall-ewwel darba l-ajruport ta' Frankfurt Hahn kellu riżultat pożittiv fl-EBITDA, jiġifieri diġà 8 snin wara d-dħul tiegħu fis-suq, li juri l-vijabbiltà ekonomika tiegħu. Skont il-Ġermanja, l-ajruport ta' Frankfurt Hahn kien l-aktar ajruport fil-Ġermanja li kien qiegħed jikber b'rata mgħaġġla.

(133)

Barra minn hekk, il-Ġermanja hija tal-opinjoni li l-miżuri li jittrattaw l-ajruport ta' Frankfurt Hahn kienu ttieħdu esklussivament skont il-prinċipju ta' investitur f'ekonomija tas-suq. Skont il-Ġermanja, kieku impriża privata tal-istess daqs u f'sitwazzjoni komparabbli kellha wkoll tidħol għall-finanzjament abbażi ta' loġika kummerċjali, dan kien jeskludi kwalunkwe vantaġġ. Il-Ġermanja argumentat li l-Kummissjoni għandha tivvaluta biss jekk il-miżura rispettiva hijiex kummerċjalment difendibbli u mhux jekk hemmx dubju raġonevoli għas-suċċess tagħha. Barra minn hekk, il-Ġermanja rreferiet għall-prinċipju ta' ugwaljanza ta' impriżi pubbliċi u privati li taħthom fondi li l-Istat joffri lil impriża skont il-kundizzjonijiet tas-suq ma jiġux meqjusa għajnuna mill-Istat. Kollox ma' kollox, skont il-Ġermanja, il-miżuri għall-ajruport ta' Frankfurt Hahn kienu ngħataw kollha skont il-kundizzjonijiet tas-suq; dan jista' jiġi ppruvat mill-MEOTs ippreżentati mill-Ġermanja. Il-Ġermanja imbagħad elaborat dwar dawk ir-rimarki ġenerali fir-rigward tal-miżuri rispettivi vvalutati fid-deċiżjoni tal-ftuħ tal-2008.

(134)

Il-Ġermanja argumentat li r-regoli dwar l-għajnuna mill-Istat mhumiex applikabbli għall-PLTA tal-2001 peress li dan kien ġie konkluż f'Awwissu 1999, jiġifieri qabel is-sentenza tal-Qorti tal-Ġustizzja fil-kawża Aéroports de Paris  (30) fl-24 ta' Ottubru 2002. Skont il-Ġermanja, is-sentenza fl-ewwel istanza mill-Qorti Ġenerali saret definittiva biss wara li ngħatat is-sentenza tal-Qorti tal-Ġustizzja u biss meta ġie ċċarat li l-ajruporti kienu meqjusa bħala impriżi u għalhekk jaqgħu taħt il-kamp ta' applikazzjoni tal-applikazzjoni tar-regoli dwar l-għajnuna mill-Istat. Aktar tard dan l-approċċ kien se jiġi kkonfermat fis-sentenza Leipzig-Halle  (31).

(135)

Il-Ġermanja qalet ukoll li ma kinux intużaw riżorsi tal-Istat. F'dak ir-rigward, il-Ġermanja elaborat li t-telf assorbit minn Fraport ma kienx ta' piż fuq il-baġit tal-Istat. Barra minn hekk, il-Ġermanja argumentat li d-deċiżjonijiet meħuda minn Fraport ma kinux imputabbli lill-Ġermanja peress li l-azzjonisti pubbliċi ma kinux f'pożizzjoni li jeżerċitaw influwenza determinanti. F'dak ir-rigward, il-Ġermanja enfasizzat li f'kull każ individwali jrid jiġi verifikat jekk ir-riżorsi ta' kumpanija kinux effettivament ikkontrollati mill-Istat. Skont il-Ġermanja, il-fatt li l-maġġoranza tal-azzjonisti kienu pubbliċi mhuwiex biżżejjed sabiex wieħed jassumi li l-PLTA tal-2001 jinvolvi riżorsi tal-Istat.

(136)

Skont il-Ġermanja, l-azzjonisti ma jistgħux jiddeterminaw l-imġiba tal-bord maniġerjali fil-każ ta' kumpanija Ġermaniża b'ishma konġunti, Aktiengesellschaft, bħal Fraport. Fil-fehma tal-Ġermanja, Fraport hija kumpanija inkorporata indipendenti kkwotata fil-Borża u l-korpi reġjonali pubbliċi ma jeżerċitawx kontroll kontinwu fuq il-fondi tagħha. Il-Ġermanja spjegat li skont is-Sezzjoni 76 tal-Aktiengesetz (l-att Ġermaniż dwar korporazzjonijiet b'ishma konġunti, “AktG”), il-bord maniġerjali għandu poteri deċiżjonali estensivi indipendentement mill-azzjonisti. Il-Ġermanja argumentat li fil-kawżi Stadtwerke Brixen AG  (32) u Carbotermo  (33) il-Qorti tal-Ġustizzja kienet diġà rrikonoxxiet in-natura tal-kumpanija Ġermaniża kkwotata u l-indipendenza konsiderevoli li l-bord maniġerjali tagħha jgawdi vis-a-vis l-azzjonisti tagħha. F'dak ir-rigward, l-awtoritajiet pubbliċi ma setgħux jikkontrollaw in-negozju ta' kuljum ta' Fraport.

(137)

F'dak ir-rigward, il-Ġermanja spjegat li Fraport ma kienet bl-ebda mod inkorporata fl-istrutturi tal-amministrazzjoni pubblika, li Fraport ma kinitx responsabbli quddiem il-Ġermanja għall-azzjonijiet tagħha u bl-ebda mod ma kienet subordinata għall-amministrazzjoni pubblika. Minkejja li l-Ġermanja rrikonoxxiet li l-azzjonisti pubbliċi kienu involuti fit-teħid tad-deċiżjoni waqt il-laqgħa ġenerali tal-azzjonisti li matulha kien ġie deċiż il-PLTA tal-2001, il-Ġermanja argumentat li dan ma jfissirx li l-azzjonisti pubbliċi kienu għamlu xi ħaġa aktar milli jeżerċitaw id-drittijiet u l-obbligi leġittimi tagħhom bħala azzjonisti.

(138)

Barra minn hekk, il-Ġermanja ddikjarat li l-PLTA tal-2001 ma ta l-ebda vantaġġ lill-FFHG. Irreferiet għall-MEOT li sar minn PwC f'dak ir-rigward, li qies li kwalunkwe investitur f'ekonomija tas-suq kien jikkonkludi wkoll dak il-ftehim. Barra minn hekk, il-Ġermanja qalet li r-riskji u l-benefiċċji tal-PLTA tal-2001 kienu ġew distribwiti b'mod ugwali u li anke mil-lat tal-liġi tat-taxxa dan kien jagħmel sens. B'mod ġenerali, il-Ġermanja pinġiet il-PLTA tal-2001 bħala miżura perfettament normali fi grupp korporattiv għall-applikazzjoni ta' politika strutturali globali jew settorjali.

(139)

Il-Ġermanja spjegat li ż-żieda fil-kapital tal-2001 kienet meħtieġa peress li finanzjament estern tal-investimenti fl-infrastruttura tagħha kien ikun wisq ta' pressjoni fuq ir-riżultati annwali tal-FFHG fuq terminu qasir.

(140)

Il-Ġermanja qalet li fl-14 ta' Diċembru 2001 il-bord superviżorju tal-FFHG kien iddeċieda dwar iż-żieda fil-kapital tal-2001 u fid-9 ta' Jannar 2002 dan wassal għal tibdil fl-istatut ta' assoċjazzjoni tal-FFHG. Għalhekk, il-Ġermanja kkontestat li r-regoli dwar l-għajnuna mill-Istat huma applikabbli għal dik il-miżura u hawnhekk semmiet ukoll ir-raġunament tagħha dwar il-PLTA tal-2001 (ara l-premessa (134)).

(141)

Il-Ġermanja argumentat ukoll li l-fondi investiti minn Fraport (EUR 19,7 miljun minn EUR 27 miljun) ma kinux riżorsi tal-Istat peress li l-Istat ma kellu l-ebda kontroll fuq Fraport. F'dak ir-rigward il-Ġermanja rreferiet għall-argumentazzjoni tagħha dwar ir-riżorsi tal-Istat fir-rigward tal-PLTA tal-2001 (ara l-premessa 136). Barra minn hekk, il-Ġermanja qalet li anke ż-żieda fil-kapital tista' ma tkunx imputabbli lill-Ġermanja u rreferiet għall-ispjegazzjonijiet tagħha dwar l-imputabbiltà fir-rigward tal-PLTA tal-2001 (ara l-premessa 134). Il-Ġermanja żiedet li l-approvazzjoni taż-żieda fil-kapital tal-2001 min-naħa tal-azzjonisti tal-FFHG ma tistax tkun fattur determinanti għall-imputabbiltà tagħha lill-Istat. Skont il-Ġermanja, għandhom ikunu imputabbli l-azzjonijiet tal-impriża li tkun tat l-għajnuna possibbli, mhux dawk tal-impriża li tkun ibbenefikat mill-għajnuna. Peress li l-FFHG kienet l-impriża li bbenefikat mill-għajnuna, l-approvazzjoni tagħha taż-żieda fil-kapital ma tagħmilx l-għoti ta' għajnuna imputabbli lill-Ġermanja. Skont il-Ġermanja, lanqas l-approvazzjoni tal-bord superviżorju ta' Fraport ma tista' tittieħed bħala indikazzjoni ta' imputabbiltà peress li f'dak iż-żmien il-bord superviżorju kien diġà kostitwit minn parità bejn ir-rappreżentanti tal-impjegati u tal-azzjonisti bi dritt ta' kodeterminazzjoni, jiġifieri kien hemm 10 rappreżentanti tal-impjegati u 10 rappreżentanti tal-azzjonisti.

(142)

Il-Ġermanja argumentat ukoll li ż-żieda fil-kapital tal-2001 ma kienet tat l-ebda vantaġġ lill-FFHG. Fraport kif ukoll Land Rhineland-Palatinate kienu aġixxew bl-istess mod li kien jaġixxi kwalunkwe investitur f'ekonomija tas-suq f'din il-kwistjoni.

(143)

Il-Ġermanja ma qablitx mad-dubji mqajma mill-Kummissjoni dwar l-MEOT fir-rigward tad-deċiżjoni ta' Fraport dwar iż-żieda fil-kapital tal-2001. Il-Ġermanja ppreżentat id-dokumenti interni kollha addizzjonalment mitluba lill-Kummissjoni. Skont il-Ġermanja, id-deċiżjoni li ttieħdet minn Fraport fl-2001 għal żieda fil-kapital kienet barra minn hekk ibbażata fuq valutazzjoni tal-miżura mill-BCG u fuq żewġ studji ġenerali ordnati minn Fraport dwar l-iżvilupp tat-traffiku tal-ajru. Il-Ġermanja enfasizzat li mill-valutazzjoni tal-BCG, Fraport kienet żiedet il-kapital u qalet li fl-ajruport ta' Frankfurt Hahn ma kinitx possibbli tintlaħaq profittabbiltà mingħajr miżuri infrastrutturali u ta' kostruzzjoni addizzjonali. L-MEOT kien qies dawk id-dokumenti kollha.

(144)

Wara d-dubji mqajma mill-Kummissjoni fir-rigward tal-MEOT li sar minn PwC, il-Ġermanja ppreżentat it-tieni valutazzjoni supplimentari minn PwC biex tikkumplimenta u tirfina l-ewwel MEOT. Dik il-valutazzjoni raffinata tasal għall-istess konklużjoni tal-ewwel waħda, jiġifieri li l-MEOT huwa ssodisfat. Il-Ġermanja ċaħdet id-dubji tal-Kummissjoni li PwC ma kinitx ivvalutat id-diżimpenn ta' Fraport u li għalhekk, mingħajr għarfien dwar il-kost tad-diżimpenn, ma kienx ikun possibbli li jiġi verifikat jekk Fraport kinitx aġixxiet bħala investitur f'ekonomija tas-suq. Il-Ġermanja argumentat li l-kost tad-diżimpenn ma għamilx differenza fil-valutazzjoni. Barra minn hekk, il-Ġermanja indikat li Fraport kienet ikkunsidrat id-diżimpenn, iżda dan ma kienx ikun possibbli matul il-5 snin ta' wara minħabba l-PLTA tal-2001. Barra minn hekk, il-valutazzjoni tal-PwC uriet li fl-aħħar mill-aħħar l-investiment kien se jkollu riżultati pożittivi għal Fraport.

(145)

Wara d-deċiżjoni tal-ftuħ tal-2008 il-Ġermanja ppreżentat ukoll MEOT anke dan fir-rigward tal-imġiba ta' Land Rhineland-Palatinate u d-deċiżjoni tagħha li tikkontribwixxi għaż-żieda fil-kapital tal-FFHG b'EUR 7,3 miljun. Skont il-valutazzjoni, li saret ukoll minn PwC, Land Rhineland-Palatinate kienet aġixxiet bħala operatur f'ekonomija tas-suq peress li l-miżuri ta' investiment deċiżi fl-2001 kienu meħtieġa u għalhekk iż-żieda fil-kapital kienet kummerċjalment difendibbli.

(146)

Il-Ġermanja argumentat li anke wara s-sentenza Aéroports de Paris ir-regoli dwar l-għajnuna mill-Istat ma jkunux applikabbli għaż-żieda fil-kapital tal-2004. Skont il-Ġermanja, dak iż-żmien kienu fis-seħħ il-Linji Gwida tal-Avjazzjoni tal-1994 u li taħt dawk il-Linji Gwida miżuri infrastrutturali fl-ajruporti ma kinux rilevanti għall-applikazzjoni tar-regoli dwar l-għajnuna mill-Istat.

(147)

Il-Ġermanja argumentat li, b'kuntrast mad-deskrizzjoni tal-Kummissjoni fid-deċiżjoni tal-ftuħ tal-2008, iż-żieda fil-kapital tal-2004 kienet ġiet maqbula fit-30 ta' Marzu 2005 u kienet ġiet irreġistrata fir-reġistru kummerċjali fid-19 ta' Mejju 2005. Barra minn hekk, il-ftehim bażiku dwar din iż-żieda fil-kapital imur lura għal ftehim li sar fl-2002. Il-Ġermanja spjegat li dan il-ftehim ippreveda t-twaqqif ta' sistema ajruportwali bejn l-ajruport ta' Frankfurt-Main u l-ajruport ta' Frankfurt Hahn skont ir-Regolament tal-Kunsill (KEE) Nru 2408/92 (34). Skont il-Ġermanja, il-valutazzjoni taż-żieda fil-kapital tal-2004 trid tiġi vvalutata f'dan il-kuntest.

(148)

Il-Ġermanja rrilevat li skont l-MEOT ippreżentat minn PwC, appoġġat b'valutazzjonijiet supplimentari li saru wara d-deċiżjoni tal-ftuħ tal-2008, fir-rigward taż-żieda fil-kapital tal-2004 Fraport, Land Rhineland-Palatinate u Land Hesse kienu kollha aġixxew bħala investituri f'ekonomija tas-suq. Dwar l-argumentazzjoni favur Fraport, il-Ġermanja rreferiet għall-argumenti tagħha magħmula fir-rigward taż-żieda fil-kapital tal-2001 (ara l-premessa 140 u dawk segwenti). Skont il-Ġermanja, fl-ewwel MEOT kif ukoll f'dak supplimentari, PwC ikkonkludiet li dak iż-żmien iż-żieda fil-kapital tal-2004, kif ukoll il-konklużjoni ta' PLTA ġdid kellhom jitqiesu bħala vantaġġużi għall-Fraport, kemm b'mod kwalitattiv kif ukoll b'mod kwantitattiv. Skont il-Ġermanja dan kien ġustifikat mis-sejba ta' PwC li r-Redditu ta' Fraport fuq il-kapital investit (minn hawn 'il quddiem: “ROIC”) meta investiet fl-FFHG kien ogħla minn redditu alternattiv ta' investiment kapitali ekwivalenti.

(149)

Fir-rigward ta' Land Rhineland-Palatinate, il-Ġermanja rreferiet għall-konklużjoni ta' PwC li anke l-Land kienet aġixxiet bħala investitur f'ekonomija tas-suq minħabba li r-ROIC għal-Land kien, b'mod simili għal Fraport, ogħla minn investiment komparabbli alternattiv.

(150)

Fir-rigward tal-imġiba ta' Land Hesse, il-Ġermanja argumentat li f'għajnejn il-Land Hesse l-possibiltajiet ristretti ta' tkabbir għall-ajruport ta' Frankfurt Main li inter alia kienu riżultat tar-restrizzjoni fuq titjiriet billejl wasslu sabiex l-iżvilupp ulterjuri tal-ajruport ta' Frankfurt Hahn ikun neċessarju. Inkella l-ajruport ta' Frankfurt Main kien jiffaċċja konsegwenzi ekonomiċi gravi. Il-Ġermanja enfasizzat li dan l-iżvilupp kien meħtieġ sabiex jiġu sfruttati b'mod komprensiv l-opportunitajiet eżistenti ta' tkabbir fil-qafas tal-permess ta' titjir għal 24 siegħa għall-ajruport ta' Frankfurt Hahn flimkien mal-introduzzjoni prevista tas-sistema ajruportwali tal-ajruport ta' Frankfurt Main — l-ajruport ta' Frankfurt Hahn. Għalhekk, skont il-Ġermanja, l-involviment ta' Land Hesse fiż-żieda fil-kapital kien inevitabbli.

(151)

Il-Ġermanja qalet li l-PLTA tal-2004 jista' jitqies biss fid-dawl taż-żieda fil-kapital u l-bidliet fl-istruttura tal-azzjonisti fl-2004, speċjalment peress li l-Land Rhineland-Palatinate u l-Land Hesse kienu ssoġġettaw ir-ridistribuzzjoni tal-ishma tal-FFHG għall-konklużjoni tal-PLTA tal-2004 bejn Fraport u FFHG sal-2014.

(152)

Il-Ġermanja rreferiet għall-argumenti tagħha magħmula fir-rigward taż-żieda fil-kapital tal-2004 u argumentat li anke r-regoli dwar l-għajnuna mill-Istat ma kinux applikabbli għall-PLTA tal-2004 (ara l-premessa 146 u dawk segwenti).

(153)

Dwar l-involviment ta' riżorsi tal-Istat, il-Ġermanja rreferiet għall-ispjegazzjonijiet tagħha għall-PLTA tal-2001 (ara l-premessa 134 u dawk segwenti). Għalhekk, skont il-Ġermanja r-riżorsi ta' Fraport ma kinux riżorsi tal-Istat peress li Fraport ma kinitx soġġetta għal kontroll mill-Istat.

(154)

Il-Ġermanja argumentat ukoll li l-approvazzjoni tad-deċiżjoni tal-PLTA tal-2004 kienet teħtieġ maġġoranza ta' 75 %, filwaqt li l-azzjonisti pubbliċi kellhom biss madwar 70 % tal-ishma u għalhekk fil-fatt ma setgħux jikkontrollaw id-deċiżjonijiet ta' Fraport. Barra minn hekk, it-30 % tal-ishma ta' Fraport li fadal kienu ishma mxerrda. Il-vot ittieħed b'99,992 % vot pożittiv, u b'hekk anke l-investituri f'ekonomija tas-suq kienu vvotaw għall-PLTA tal-2004.

(155)

Fir-rigward tal-eżistenza ta' vantaġġ ekonomiku, għal darb'oħra l-Ġermanja rreferiet għall-ispjegazzjonijiet għall-PLTA tal-2001 (ara l-premessa 137), skont liema d-distribuzzjoni ta' profitti u ta' telf hija miżura assolutament normali fi ħdan grupp tal-kumpaniji. Barra minn hekk, skont PwC, kwalunkwe investitur f'ekonomija tas-suq kien jieħu l-istess deċiżjoni li jikkonkludi l-PLTA tal-2004 peress li f'dak il-mument kien mistenni li mis-sena 2008/2009 'il quddiem jibda jsir profitt. Il-Ġermanja rrilevat ukoll li abbażi tad-dubji espressi mill-Kummissjoni, fil-valutazzjoni supplimentari PwC reġgħet ittestjat dawk il-miżuri skont kalkoli kwalitattivi u waslet għall-istess konklużjoni.

(156)

Il-Ġermanja sostniet ukoll li ż-żieda fil-kapital tal-2004 kienet tiddependi fuq il-PLTA tal-2004 u, minħabba l-aspettattiva ta' żvilupp pożittiv mis-2008/2009 'il quddiem, kien fl-interess ta' Fraport li tikkonkludi l-PLTA tal-2004 għal mill-inqas 5 snin. Barra minn hekk, il-Ġermanja spjegat li Fraport kienet se titħalla tieħu l-profitti kollha tal-FFHG għall-anqas sal-31 ta' Diċembru 2024 filwaqt li, fix-xenarju oppost, setgħet tikkanċella l-ftehim sal-31 ta' Diċembru 2010. Għalhekk, il-Ġermanja rrilevat li Fraport kienet se tkun tista' tibbenefika 100 % mill-ftehim u tmexxi n-negozju ta' kuljum tal-FFHG, filwaqt li żżomm 65 % biss tal-ishma tagħha. Il-Ġermanja kienet anke tal-fehma li l-MEOT huwa sostnut mill-fatt li anke l-investituri privati, li dak iż-żmien kienu jikkostitwixxu 30 % tal-azzjonisti ta' Fraport, kienu approvaw id-deċiżjoni.

(157)

F'dan ir-rigward, il-Ġermanja ddikjarat li ma kien hemm l-ebda riżorsi tal-Istat involuti fil-miżura. Il-Ġermanja rreferiet għas-sentenza Preussen-Elektra  (35) tal-Qorti tal-Ġustizzja u qalet li jista' jkun hemm għajnuna mill-Istat biss fejn il-pagamenti jkunu qegħdin isiru minn korp pubbliku jew privat innominat jew imwaqqaf mill-Istat. Il-Ġermanja spjegat ukoll li fil-każ tat-tariffi għall-kontrolli tas-sigurtà, dawk kienu tħallsu mil-linji tal-ajru lil Land Rhineland-Palatinate u l-Land kienet tibgħathom lill-FFHG biss bħala kumpens għall-kontrolli tas-sigurtà li l-FFHG kienet twettaq f'isem il-Land. Għalhekk, skont il-Ġermanja, f'dan is-sens, it-tariffi qatt ma saru parti mill-fondi tal-Land.

(158)

Il-Ġermanja spjegat li skont is-sezzjoni 5 tal-Luftsicherheitsgesetz (il-Liġi dwar is-Sigurtà fl-Ajru), l-Istat jikkontrolla l-passiġġieri u l-bagalji tagħhom sabiex tiġi protetta s-sigurtà tat-traffiku tal-ajru kontra attakki terroristiċi. Il-Ġermanja ddikjarat ukoll li għal din l-attività l-awtoritajiet iżommu tariffi għal kull passiġġier lil-linji tal-ajru. Il-Ġermanja qalet li l-livell tat-tariffa tas-sigurtà jiddependi fuq iċ-ċirkostanzi individwali tal-ajruport u jvarja minn EUR 2 sa EUR 10 għal kull passiġġier. Fi Frankfurt Hahn, it-tariffa hija ta' EUR 4,35 u għalhekk hija adatta meta mqabbla ma' ajruporti oħra.

(159)

L-awtoritajiet jistgħu jittrasferixxu wkoll dan il-kompitu tas-sigurtà lil operatur ta' ajruport, li huwa dak li ġara f'dan il-każ fejn il-kontrolli tas-sigurtà qegħdin jitwettqu mill-FFHG li min-naħa tagħha qabbdet kumpanija esterna tas-sigurtà.

(160)

Barra minn hekk, il-Ġermanja ddikjarat li l-kontrolli tas-sigurtà jaqgħu fil-kamp ta' applikazzjoni tal-mandat tal-ordni pubbliku u ma jikkostitwux attività ekonomika.

(161)

F'dan ir-rigward il-Ġermanja tikkondividi l-opinjoni tal-Kummissjoni, li ma għandux ikun hemm kumpens żejjed għas-servizzi mwettqa mill-FFHG. Madankollu, il-Ġermanja enfasizzat li l-FFHG ma kinitx ingħatat kumpens żejjed peress li trid iġġarrab l-ispejjeż kollha għall-kontrolli tas-sigurtà.

(162)

Il-Ġermanja ċċarat li bejn l-2001 u l-2004 Land Rhineland-Palatinate għamlet il-pagamenti segwenti lill-FFHG. L-ewwel nett, Land Rhineland-Palatinate appoġġjat lill-FFHG f'xi investimenti infrastrutturali tagħha u fl-2001 tat EUR […] lill-FFHG għal dan l-għan. Skont il-Ġermanja, dawk l-għotjiet kienu bbażati fuq deċiżjonijiet li kienu diġà ttieħdu fl-1999 u fl-2000. Il-Ġermanja argumentat li meta kienu ttieħdu dawk id-deċiżjonijiet, ir-regoli dwar l-għajnuna mill-Istat ma kinux japplikaw għall-ajruporti bħala impriżi fis-sens tal-Artikolu 107(1) tat-Trattat.

(163)

It-tieni nett, il-Ġermanja qalet li Land Rhineland-Palatinate kienet parzjalment assumiet il-finanzjament tal-ispejjeż tal-persunal għall-kontrolli tas-sigurtà għas-snin 2001 (60 % tal-ispejjeż totali), 2002 (50 %), 2003 (40 %) u 2004 (30 %).

(164)

It-tielet nett, il-Ġermanja ammettiet li Land Rhineland-Palatinate kienet kofinanzjat żewġ studji xjentifiċi li kienu ġew ordnati mill-FFHG, iżda li skont il-Ġermanja, kienu prinċipalment fl-interess pubbliku ġenerali. Il-Ġermanja qalet li Land Rhineland-Palatinate kienet issussidjat 90 % tal-ispejjeż totali tal-ewwel studju dwar l-effetti ekonomiċi reġjonali tal-ajruport ta' Frankfurt Hahn, u 70 % tal-ispejjeż totali tat-tieni studju dwar il-potenzjal tal-iżvilupp tan-negozju tat-trasportaturi tal-merkanzija. Il-Ġermanja argumentat li Land Rhineland-Palatinate kienet tat dawk is-sussidji sempliċiment minħabba l-interess tagħha fl-istudji u setgħet tordna l-istudji hija stess. Il-Ġermanja ma tarax kif l-FFHG kienet ġiet ivvantaġġjata permezz dan il-finanzjament parzjali peress li l-istudji huma fl-interess ġenerali pubbliku, u lanqas kif dan il-finanzjament jista' jfixkel il-kompetizzjoni. Sa fejn dawk l-istudji kienu ta' interess għall-FFHG, l-FFHG kienet anke kkontribwiet għalihom finanzjarjament.

(165)

Fir-rigward tal-ftehim ma' Ryanair tal-1999, il-Ġermanja ġeneralment irrimarkat li mill-bidu nett l-ajruport ta' Frankfurt Hahn kien bena biss infrastruttura bażika ħafna sabiex dan l-ajruport seta' jkun sieħeb kosteffiċjenti u innovattiv għal-linji tal-ajru bi prezzijiet irħas. Skont il-Ġermanja, anke f'ajruporti Ewropej oħra l-hekk imsejħa “klijenti ankra” huma fatturi naturali li jwasslu għall-iżvilupp inizjali tal-ajruport. Għal Frankfurt Hahn, il-klijent ankra, jiġifieri l-klijent li permezz tiegħu seta' jistabbilixxi lilu nnifsu fis-suq, kien Ryanair.

(166)

Il-Ġermanja argumentat li meta kien ġie konkluż l-ewwel ftehim ma' Ryanair, il-kunċett ta' ajruport bi trasportaturi bi prezzijiet irħas kien għadu fil-bidu tiegħu. Għalhekk, permezz ta' dan il-ftehim Ryanair ingħatat inċentiv biex tibda ttir lejn l-ajruport rarament iffrekwentat ta' Frankfurt Hahn. Il-Ġermanja qalet li l-fatt li din il-linja tal-ajru kbira kkommettiet ruħha għall-ajruport ta' Frankfurt Hahn wassal għall-akkwist ta' aktar ftehimiet ma' linji tal-ajru għall-ajruport (“prinċipju ta' segwitu”). Fl-aħħar mill-aħħar, permezz tal-hekk imsejjaħ “effett domino”, dan wassal ukoll għal żieda fil-profitti għas-settur mhux tal-avjazzjoni.

(167)

Il-Ġermanja argumentat li, minħabba dawn id-dinamiċi, linji tal-ajru bħal Ryanair kellhom setgħa kbira ta' negozjar, peress li dak iż-żmien kien hemm ħafna ajruporti reġjonali żgħar oħra li ppruvaw jikkonkludu ftehim ma' Ryanair.

(168)

Barra minn hekk, il-Ġermanja qalet li ma kienu ngħataw l-ebda riżorsi tal-Istat permezz tal-ftehim ma' Ryanair tal-1999. Barra minn hekk, il-Ġermanja argumentat li r-relazzjoni kuntrattwali bejn l-operatur tal-ajruport u l-linja tal-ajru ma kinitx qiegħda tagħti vantaġġ lil-linja tal-ajru. Skont il-Ġermanja, ir-responsabbiltà għall-konklużjoni ta' dan il-ftehim għandha tiġi attribwita esklussivament lill-bord maniġerjali peress li l-konklużjoni tal-ftehim ma' Ryanair tal-1999 kien jirrappreżenta negozju ta' kuljum u l-bord superviżorju ma kien ħa l-ebda deċiżjoni f'dan ir-rigward. Fil-fehma tal-Ġermanja, il-Kummissjoni ma tistax tqis il-konklużjoni tal-ftehim ma' Ryanair tal-1999 bħala imputabbli lill-Ġermanja minħabba li l-bord superviżorju ma kien għamel xejn biex iwaqqfu. Skont il-Ġermanja, azzjonijiet bħal dawn ma jaqgħux taħt ir-responsabbiltajiet u l-kompiti tal-bord superviżorju. Barra minn hekk, il-kriterji msemmija mill-Qorti tal-Ġustizzja fi Stardust Marine jiġu invalidati ad absurdum jekk il-fatt li korp superviżorju ta' kumpanija pubblika ma jkunx aġixxa jkun biżżejjed għall-konklużjoni dwar l-imputabbiltà tal-miżura lill-Istat. Għalhekk, skont il-Ġermanja l-ftehim ma kien bl-ebda mod imputabbli lill-Istat.

(169)

Barra minn hekk, il-Ġermanja argumentat li l-ftehim ma' Ryanair tal-1999 ma kien ta l-ebda vantaġġ lil Ryanair peress li kwalunkwe investitur f'ekonomija tas-suq kien jikkonkludi wkoll dan il-ftehim. Il-Ġermanja speċjalment enfasizzat li kuntrarju għall-argument tal-Kummissjoni fid-deċiżjoni tal-ftuħ tagħha tal-2008, dan il-ftehim ma kkaġuna ebda telf, iżda pproduċa ammont enormi ta' dħul li qabeż bil-bosta l-ispejjeż imġarrba.

(170)

F'dan ir-rigward, il-Ġermanja enfasizzat li l-ajruport ta' Frankfurt Hahn uża l-approċċ ta' ħlas wieħed “single-till”, skont liema d-dħul mill-avjazzjoni u mill-attivitajiet mhux relatati mal-avjazzjoni jinġabar flimkien (“single-till”). Għalhekk, skont il-Ġermanja jrid jitqies id-dħul minn servizzi ajrunawtiċi u mhux ajrunawtiċi ġġenerat mil-linji tal-ajru u mill-passiġġieri tagħha fl-ajruport. Kif qalet qabel il-Ġermanja, PwC ikkonkludiet li investitur f'ekonomija tas-suq bi strateġija fit-tul kien jiffirma l-ftehim ma' Ryanair tal-1999, b'mod partikolari jekk wieħed iqis is-sitwazzjoni tal-ajruport ta' Frankfurt Hahn fl-1999. Skont il-Ġermanja, dak iż-żmien l-ajruport ta' Frankfurt Hahn kien qiegħed jiffaċċja spejjeż fissi għoljin għall-manutenzjoni tal-infrastruttura tal-ajru u tal-art, filwaqt li l-użu tal-kapaċità tal-ajruport kien baxx. Għalhekk, skont il-Ġermanja, il-possibbiltà li jiġi ġġenerat volum addizzjonali ta' passiġġieri kienet opportunità biex jiġi limitat it-telf u jiġu akkwistati klijenti b'potenzjal għal tkabbir.

(171)

Il-Ġermanja hija tal-fehma li l-ispejjeż li kienu ġew deċiżi qabel il-konklużjoni tal-ftehim, bħall-ispejjeż għall-infrastruttura ġenerali tal-ajruport u l-amministrazzjoni ġenerali tal-ajruport (fi kliem ieħor spejjeż li nqalgħu irrispettivament mill-ftehim ma' Ryanair tal-1999), ma għandhomx jiġu inklużi fl-analiżi tal-profittabbiltà tal-ftehim ma' Ryanair tal-1999, u PwC tappoġġa l-opinjoni tal-Ġermanja. Il-Ġermanja argumentat speċjalment li kien ikun possibbli biss għal ajruport b'netwerk eżistenti ta' klijenti li jġiegħel lill-klijenti tiegħu jħallsu parzjalment l-ispejjeż tal-miżuri infrastrutturali u li l-ajruport ta' Frankfurt Hahn ma kienx f'din il-pożizzjoni.

(172)

Barra minn hekk, il-Ġermanja argumentat li jekk wieħed kellu jqis l-ispejjeż attwali għall-bini tat-terminal il-ġdid, tal-anqas seta' jitqies il-volum ta' passiġġieri previst li kien se jiġi ġġenerat minn Ryanair. Il-Ġermanja kienet tal-fehma li imbagħad perjodu ta' deprezzament ta' 25 sena jkun xieraq, li jfisser deprezzament ta' EUR […] fis-sena. Anke fil-każ ta' perjodu ta' deprezzament ta' 15-il sena, kif ġie ssuġġerit mill-Kummissjoni, il-Ġermanja argumentat li dan ikun ifisser deprezzament ta' EUR […] fis-sena, sabiex l-analiżi globali tal-punt ta' ekwilibriju xorta tibqa' pożittiva. Għalhekk, jekk wieħed iqis iż-żmien għall-bidu tal-ajruport ta' Frankfurt Hahn, il-Ġermanja kienet tal-fehma li dan kien ikun biżżejjed biex investitur f'ekonomija tas-suq jikkonkludi l-ftehim.

(173)

Skont il-Ġermanja l-iskeda tal-imposti ajruportwali tal-2001 ma tistax titqies bħala għajnuna mill-Istat. Il-Ġermanja argumentat li ma kien hemm l-ebda għoti ta' riżorsi tal-Istat u f'dan ir-rigward tirreferi għall-ispjegazzjonijiet tagħha dwar il-ftehim ma' Ryanair tal-1999 (ara s-sezzjoni 5.3.1 u speċjalment il-premessa 167). Il-Ġermanja qalet li l-iskeda tal-imposti ajruportwali tal-2001 kienet iġġenerat dħul għall-FFHG u ma kienx neċessarju jew possibbli li l-iskeda tal-imposti ajruportwali twassal għall-kopertura tal-ispejjeż kollha mġarrba mill-FFHG. Skont il-Ġermanja, biex jinkiseb tali riżultat, id-dħul mis-settur mhux tal-avjazzjoni jrid jitqies ukoll taħt l-approċċ ta' ħlas wieħed (ara l-premessa 169).

(174)

Il-Ġermanja argumentat ukoll li l-miżura kienet imputabbli lill-Istat minħabba li d-dipartiment tat-Trasport ta' Rhineland-Palatinate kien approva l-imposti ajruportwali. Din l-approvazzjoni ma kinitx tfisser xi dipendenza ekonomika jew politika, iżda kienet sempliċiment formalità regolatorja mitluba skont il-liġi Ġermaniża li kull ajruport, kemm jekk proprjetà pubblika jew le, għandu jissodisfa skont il-liġi. Ir-raġuni għal din il-liġi hija sabiex il-linji tal-ajru jkunu protetti minn kwalunkwe abbuż possibbli tas-setgħa monopolistika tal-ajruport li jistabbilixxi prezzijiet għall-użu tiegħu.

(175)

Barra minn hekk, il-Ġermanja argumentat li l-ajruport ta' Frankfurt Hahn ma kien ingħata l-ebda vantaġġ permezz tal-iskeda tal-imposti ajruportwali tal-2001. Qablet mal-Kummissjoni li r-riżultati tat-test tal-investitur f'suq privat għall-ftehim ma' Ryanair tal-2002, li kien ibbażat fuq l-iskeda tal-imposti ajruportwali tal-2001 u li jintroduċi appoġġ addizzjonali għall-kummerċjalizzazzjoni, jistgħu jservu bħala punt ta' referenza. Fuq din il-bażi, peress li l-MEOT huwa pożittiv għall-ftehim ma' Ryanair tal-2002, il-Ġermanja argumentat li l-ebda riżultat ieħor ma jista' japplika għall-iskeda tal-imposti ajruportwali tal-2001. Dwar id-dubji mqajma mill-Kummissjoni fir-rigward tal-MEOT, il-Ġermanja rreferiet għall-argumentazzjoni tagħha magħmula fir-rigward tal-MEOT għall-ftehim ma' Ryanair tal-2002 (ara l-premessa 178 u dawk segwenti).

(176)

Barra minn hekk, il-Ġermanja espressament ma qablitx mal-Kummissjoni dwar il-valutazzjoni li saret fir-rigward tas-selettività tal-iskeda tal-imposti ajruportwali tal-2001. Il-Ġermanja argumentat li l-iskeda tal-imposti ajruportwali tal-2001 kienet ta' natura ġenerali u kienet tapplika għal-linji tal-ajru kollha li jużaw l-ajruport, u li għalhekk ma setgħetx tkun selettiva jew speċifika. Skont il-Ġermanja, l-iskeda tal-imposti ajruportwali tal-2001 ma kienet tinkludi l-ebda differenzjazzjoni li kienet tagħti vantaġġ lil linja tal-ajru waħda fuq l-oħra u lanqas ma kien fiha xi tip ta' sistema ta' ribass. Għalhekk, il-Ġermanja kienet tal-fehma li l-ebda linja tal-ajru ma kienet ingħatat vantaġġ selettiv.

(177)

Fl-aħħar nett, fir-rigward tal-iskeda tal-imposti ajruportwali tal-2001, il-Ġermanja argumentat li din l-iskeda kienet f'konformità mal-imġiba konformi mas-suq u bħala tali ma tistax tfixkel il-kompetizzjoni bejn l-ajruporti jew il-kompetizzjoni fis-suq intern.

(178)

F'kuntrast mad-deċiżjoni tal-ftuħ tal-2008, il-Ġermanja qieset li l-ftehim ma' Ryanair tal-2002 ma kienx iġġenera telf, iżda minflok ipprovda sors ta' dħul għall-FFHG. Dwar il-kwistjoni tal-imputabbiltà tal-ftehim ma' Ryanair tal-2002 u l-użu ta' riżorsi tal-Istat, il-Ġermanja rreferiet għall-ispjegazzjonijiet tagħha dwar il-ftehim ma' Ryanair tal-1999 (ara l-premessa 167 u dawk segwenti). Barra minn hekk, il-Ġermanja żiedet li fl-2002, fiż-żmien li ġie konkluż il-ftehim, l-ishma tal-FFHG kienu diġà primarjament miżmuma minn Fraport, li r-riżorsi tagħha mhumiex riżorsi tal-Istat u li l-azzjonijiet tagħha mhumiex imputabbli lill-Istat, kif il-Ġermanja diġà indikat fir-rigward tal-PLTA tal-2001 (ara l-premessa 134 u dawk segwenti).

(179)

Skont il-Ġermanja, il-bord superviżorju tal-FFHG, li kien approva l-konklużjoni tal-ftehim ma' Ryanair tal-2002, ma kienx dominat mill-Istat. F'dan ir-rigward, il-Ġermanja sostniet li l-preżentazzjoni tal-membri tal-bord superviżorju tal-FFHG fil-premessa 18 tad-deċiżjoni tal-ftuħ tal-2008 kienet żbaljata. Il-Ġermanja qalet li skont l-istatut ta' assoċjazzjoni tal-FFHG, Fraport kellha sitt rappreżentanti u Land Rhineland-Palatinate kellha tmienja, li tlieta minnhom kienu rappreżentanti ta' awtoritajiet lokali. Skont il-Ġermanja, madankollu l-membri kellhom numru differenti ta' voti u l-maġġoranza tal-voti kienet dejjem favur il-kumpanija privata Fraport. Dan kien dovut għall-fatt li r-rappreżentanti ta' Fraport kellhom 12-il vot kull wieħed, filwaqt li r-rappreżentanti tal-Land kellhom sempliċiment 5 voti kull wieħed u anke dawk tal-awtoritajiet lokali kellhom vot wieħed biss. Għalhekk, skont il-Ġermanja, Fraport kellha 72 vot filwaqt li r-rappreżentanti tal-Land u tal-awtoritajiet lokali kellhom 28 vot biss. Peress li l-bord superviżorju jiddeċiedi b'maġġoranza sempliċi, il-Ġermanja kienet tal-fehma li ma kienx ikun possibbli li l-ftehim ma' Ryanair tal-2002 jiġi konkluż mingħajr il-voti ta' Fraport u għalhekk il-konklużjoni tal-ftehim mhijiex imputabbli lill-Istat.

(180)

Barra minn hekk, il-Ġermanja ċaħdet id-dubji tal-Kummissjoni dwar l-għoti ta' vantaġġ u l-MEOT ippreżentat minn PwC dwar din il-kwistjoni. Il-Ġermanja argumentat li ċ-ċifra ta' […] passiġġier għal kull titjira ma kinitx sopravvalutata peress li anke fl-2002 […] % tat-titjiriet tar-Ryanair kienu qed isiru minn Boeing 737-800 u r-rata medja ta' utilizzazzjoni għal dawk it-titjiriet kienet ta' […] %, li jfisser li l-għadd ta' passiġġieri għal kull ajruplan kien fil-fatt fil-medja ta' […] għal kull titjira tar-Ryanair. Għalhekk, il-Ġermanja kienet tal-fehma li l-istima tal-għadd ta' passiġġieri ta' […] kienet raġonevoli u mhux għolja żżejjed, speċjalment peress li l-FFHG kienet ħadet inkonsiderazzjoni li l-bidla minn Boeing 737-200 għal Boeing 737-800 min-naħa ta' Ryanair kienet se ssir fil-futur qrib.

(181)

Dwar id-dubji mqajma mill-Kummissjoni fir-rigward tal-ispejjeż għall-infrastruttura ġenerali tal-ajruport u għall-amministrazzjoni ġenerali tal-ajruport, il-Ġermanja rreferiet għall-argumentazzjoni tagħha magħmula fir-rigward tal-ftehim ma' Ryanair tal-1999 (ara l-premessa 171 u dawk segwenti). Irreferiet ukoll għad-dikjarazzjonijiet tagħha dwar l-iskeda tal-imposti ajruportwali tal-2001 (ara l-premessa 176) fir-rigward tas-selettività tal-miżura.

(182)

Fir-rigward tal-kwistjoni ta' riżorsi tal-Istati u l-imputabbiltà lill-Istat, il-Ġermanja rreferiet għad-dikjarazzjonijiet tagħha dwar il-ftehimiet ma' Ryanair tal-1999 u tal-2002 (ara l-premessi 167 u dawk segwenti, u l-premessi 178 u dawk segwenti). Barra minn hekk, il-Ġermanja qalet li, fil-mument li ġie konkluż il-ftehim ma' Ryanair tal-2005, il-bord superviżorju tal-FFHG kien kostitwit b'tali mod li l-awtoritajiet pubbliċi ma kinux f'pożizzjoni li jeżerċitaw influwenza determinanti dwar id-deċiżjoni. Dak iż-żmien Fraport kellha 156 vot filwaqt li Land Rhineland-Palatinate u Land Hesse kellhom 42 vot kull wieħed. Għalhekk, il-Ġermanja argumentat li l-Istat ma setax ikollu influwenza determinanti peress li huwa kellu 84 vot biss minn 240.

(183)

Barra minn hekk, il-Ġermanja kienet tal-fehma li dan il-ftehim ma kienx ta vantaġġ lil Ryanair. Il-Ġermanja qalet li f'kuntrast mas-suġġeriment tal-Kummissjoni fid-deċiżjoni tal-ftuħ tal-2008, PwC kienet ingħatat iċ-ċifri rilevanti kollha peress li kieku ma kinitx tkun tista' twettaq dan l-MEOT komprensiv, newtrali u indipendenti. Barra minn hekk il-Ġermanja ċaħdet id-dubji tal-Kummissjoni li l-investimenti kkawżati minn Ryanair ma kinux ġew allokati b'mod xieraq. Il-Ġermanja qalet li fil-valutazzjoni supplimentari tagħha PwC kienet għamlet it-tieni valutazzjoni fejn spjegat li biċċa l-kbira tal-ispejjeż kienu relatati ma' investimenti ta' natura ġenerali li l-ajruport kien għamel b'mod indipendenti mis-servizzi pprovduti lil Ryanair. Skont il-Ġermanja, sa fejn l-ispejjeż kienu kkawżati mill-immaniġġjar ta' passiġġieri ta' Ryanair dawn ġew allokati lil Ryanair.

(184)

Il-Ġermanja ċaħdet ukoll id-dubji tal-Kummissjoni dwar l-effettività tas-sistema ta' penali li ġiet introdotta fil-ftehim ma' Ryanair tal-2005. Il-Ġermanja qalet li din is-sistema ta' penali tirrifletti imġiba konformi mas-suq. Il-Ġermanja argumentat li sanzjonijiet addizzjonali fuq dawk maqbula kienu jkunu żejda u inadegwati peress li Ryanair ma kellha l-ebda dritt esklussiv li tuża l-ajruport u kienet qiegħda wkoll tassumi riskju.

(185)

Barra minn hekk, il-Ġermanja qalet li l-ftehim ma kienx miżura selettiva peress li l-imposti ajruportwali miftehma kienu bbażati fuq l-iskeda ġenerali ta' imposti ajruportwali tal-2006. Il-Ġermanja argumentat ukoll li kwalunkwe telf imġarrab mill-FFHG kienx ġie ġġenerat mill-ftehim ma' Ryanair tal-2005 iżda mill-investimenti meħtieġa għall-ajruport ta' Frankfurt Hahn, filwaqt li l-investimenti kkawżati minn Ryanair kienu ġew koperti mid-dħul iġġenerat mill-ftehim ma' Ryanair tal-2005.

(186)

Fir-rigward tal-iskeda tal-imposti ajruportwali tal-2006, il-Ġermanja argumentat b'mod ġenerali li dawn l-imposti ajruportwali kienu ġew esklussivament żviluppati abbażi ta' kunsiderazzjonijiet ekonomiċi u b'kunsiderazzjoni tal-mudell kummerċjali tal-ajruport ta' Frankfurt Hahn bħala ajruport ta' trasportaturi bi prezz baxx, jiġifieri bl-aspettattiva li l-ispejjeż tal-operat jiġu koperti fuq perjodu ta' żmien qasir u fuq perjodu twil jiġi ġġenerat profitt sostenibbli.

(187)

Fir-rigward tal-kwistjonijiet ta' riżorsi tal-Istati u imputabbiltà lill-Istat, il-Ġermanja rreferiet għall-argumentazzjoni tagħha li għamlet fir-rigward tal-ftehimiet ma' Ryanair tal-1999, tal-2002 u tal-2005 (ara l-premessi 167 u dawk segwenti, 178 u dawk segwenti u 182 u dawk segwenti) u fir-rigward tal-iskeda tal-imposti ajruportwali tal-2001 (ara l-premessa 173 u dawk segwenti).

(188)

Il-Ġermanja argumentat li Ryanair ma kienet ingħatat l-ebda vantaġġ permezz tal-iskeda tal-imposti ajruportwali tal-2006. L-ewwel nett, il-Ġermanja ġġustifikat l-imposti differenti fuq il-passiġġieri li nħolqu sabiex jipprovdu inċentiv lit-trasportaturi bi prezzijiet irħas filwaqt li jiġu koperti l-ispejjeż operattivi tal-ajruport. Il-Ġermanja argumentat li tnaqqis fl-imposti skont il-volum ta' passiġġieri huwa approċċ komuni f'ajruporti nazzjonali u internazzjonali, kif kien diġà ġie aċċettat mill-Qorti tal-Ġustizzja. Meta jingħata dan it-tnaqqis abbażi tal-volum, għandu jkun ġustifikat abbażi ta' kriterji oġġettivi u mhux diskriminatorji u skont il-Ġermanja, dan kien il-każ fl-ajruport ta' Frankfurt Hahn. Peress li l-limitu għall-akkwist ta' ribassi kien baxx ħafna, jiġifieri ta' 100 000 passiġġier fis-sena, dawn ir-ribassi kienu qiegħdin isostnu wkoll linji tal-ajru iżgħar.

(189)

It-tieni nett, il-Ġermanja argumentat li l-ġustifikazzjoni ekonomika għall-imposti ajruportwali kienet tiddependi fuq l-approċċ ta' ħlas wieħed, u rreferiet għad-dikjarazzjonijiet tagħha dwar il-ftehim ma' Ryanair tal-1999 (ara l-premessa 169). Il-Ġermanja ġġustifikat ukoll id-differenzjazzjoni skont it-tul ta' ħin tal-proċess ta' tagħbija u ħatt (minn hawn 'il quddiem: TRT) ta' anqas minn 30 minuta billi spjegat li TRT ta' aktar minn 30 minuta fil-fatt jiswa ħafna aktar flus. Il-Ġermanja ddikjarat ukoll li minkejja li l-imposti ajruportwali ma kinux qed ikopru 100 % tal-ispejjeż, MEO xorta kien jagħżel din l-iskeda ta' imposti peress li l-kopertura tal-ispejjeż ta' infrastruttura bħal ajruport ma tistax tinkiseb fi żmien qasir bħal dan. Madankollu, permezz tal-iskeda tal-imposti ajruportwali tal-2006 l-FFHG kienet qiegħda tistenna l-ġenerazzjoni ta' aktar passiġġieri u li sal-2008 tkun intlaħqet kopertura tal-ispiża kollha. Skont il-valutazzjoni magħmula minn PwC għal din l-iskeda ta' imposti ajruportwali, fiż-żmien li ġew introdotti l-imposti ajruportwali, din kienet ekonomikament realistika, kif ġie kkonfermat ukoll mill-valutazzjoni supplimentari ta' PwC.

(190)

Fir-rigward tal-appoġġ għall-kummerċjalizzazzjoni mogħti taħt l-iskeda tal-imposti ajruportwali tal-2006, il-Ġermanja argumentat li fil-fatt dan mhuwiex parti integrali mill-iskeda. Il-Ġermanja argumentat ukoll li kwalunkwe investitur f'ekonomija tas-suq kien jagħmel l-istess appoġġ għall-kummerċjalizzazzjoni disponibbli għal-linji tal-ajru peress li hemm riskji ekonomiċi għoljin marbuta mal-ftuħ ta' rotta ġdida. Dan l-appoġġ jingħata esklussivament għal rotot li jkunu għadhom kif ġew offruti, li jfisser rotot li qatt ma kienu moqdija jew li ma kinux moqdija matul l-24 xahar preċedenti. L-ammont tal-appoġġ huwa bbażat fuq l-għadd ta' passiġġieri li jitilqu servuti f'sena. Abbażi ta' kriterji bħar-rotot temporanji offruti fl-ajruport ta' Frankfurt Hahn, il-konnessjonijiet ta' kull ġimgħa u t-tul ta' operazzjoni ta' titjir kontinwu, jiġi żgurat li fil-fatt l-appoġġ qiegħed iwassal għal espansjoni tan-netwerk ta' titjiriet offruti mil-linji tal-ajru.

(191)

Il-Ġermanja argumentat li l-appoġġ għall-kummerċjalizzazzjoni ma jistax jitqies bħala prestazzjoni unilaterali min-naħa tal-ajruport. Skont il-Ġermanja, il-promozzjoni ta' rotot ġodda wasslet għal profitt ogħla għall-ajruport peress li għadd akbar ta' passiġġieri joħloq dħul ogħla minn attivitajiet mhux ajrunawtiċi. Barra minn hekk, il-Ġermanja spjegat li l-iffissar tal-ammonti tal-appoġġ kien ibbażat fuq kunsiderazzjonijiet raġonevoli.

(192)

Ġermanja ċaħdet ukoll id-dubji tal-Kummissjoni li r-riskju ta' kummerċjalizzazzjoni kien ogħla għal linji tal-ajru li għadhom mhumiex attivi fl-ajruport ta' Frankfurt Hahn. Il-Ġermanja argumentat li linji tal-ajru b'għadd kbir ta' passiġġieri li jagħtu servizz lil netwerk attraenti, jeħtieġu spejjeż ogħla ta' kummerċjalizzazzjoni li min-naħa l-oħra jiġġustifika appoġġ ogħla għall-kummerċjalizzazzjoni mill-ajruport, anke minħabba li għadd ogħla ta' passiġġieri jżid il-profitti għall-ajruport. Fi kwalunkwe każ, l-ammont ta' appoġġ ma jkunx ta' aktar minn terz tal-ispejjeż reali ta' kummerċjalizzazzjoni, u dan jelimina kwalunkwe diskriminazzjoni bejn linji tal-ajru li diġà jservu lill-ajruport ta' Frankfurt Hahn u linji tal-ajru oħra. Barra minn hekk, il-Ġermanja argumentat li ġeneralment linji tal-ajru akbar ikollhom baġit akbar ta' kummerċjalizzazzjoni, u b'hekk l-appoġġ mogħti fil-fatt se jkun aktar baxx meta mqabbel mal-baġit kollu milli fil-każ ta' linja tal-ajru iżgħar.

(193)

Fl-aħħar nett, il-Ġermanja sostniet li l-MEOT li sar minn PwC stabbilixxa li dan l-appoġġ għall-kummerċjalizzazzjoni kien ingħata b'mod li kien konformi mas-suq.

(194)

Fir-rigward tas-selettività tal-miżura u t-tfixkil tal-kompetizzjoni fis-suq intern, il-Ġermanja rreferiet għad-dikjarazzjonijiet tagħha dwar l-iskeda tal-imposti ajruportwali tal-2001 (ara l-premessa 176) u dawk segwenti.

(195)

Għalhekk il-Ġermanja argumentat li l-iskeda tal-imposti ajruportwali tal-2006 ma kinitx tinvolvi għajnuna mill-Istat. Il-Ġermanja argumentat li anke kieku l-Kummissjoni kellha tistabbilixxi li l-imposti ajruportwali jikkostitwixxu għajnuna mill-Istat, din l-għajnuna kienet kompatibbli mas-suq intern.

(196)

Skont il-Ġermanja, kieku kellu jitqies li l-miżuri minn 1 sa 6 kienu jinvolvu għajnuna mill-Istat fis-sens tal-Artikolu 107(1) tat-Trattat, sakemm l-għan tagħhom kien il-finanzjament ta' infrastrutturi ajruportwali fl-ajruport ta' Frankfurt Hahn, din l-għajnuna tista' titqies kompatibbli abbażi tal-Artikolu 107(3) tat-Trattat u l-Linji Gwida tal-Avjazzjoni 2005.

(197)

Fir-rigward tal-objettiv ta' interess komuni definit sew, il-Ġermanja rrilevat li l-finanzjament tal-infrastruttura tal-ajruport fl-ajruport ta' Frankfurt Hahn kien dejjem immirat lejn l-objettiv li titjieb l-istruttura ekonomika reġjonali tar-reġjun ekonomikament sottożviluppat u b'popolazzjoni baxxa ta' Hunsrück.

(198)

F'dan ir-rigward, il-Ġermanja qalet li, l-ewwel nett, l-għan tal-appoġġ lill-FFHG kien biex tgħin biex tingħeleb l-ekonomija strutturali dgħajfa tar-reġjun ta' Hunsrück. Il-Ġermanja saħqet li l-ajruport ta' Frankfurt Hahn huwa mdawwar minn għadd ta' żoni li fil-qafas tal-Gemeinschaftsaufgabe “Verbesserung der regionalen Wirtschaftsstruktur” huma meqjusa bħala reġjuni li jeħtieġu appoġġ (36), kompitu kondiviż bejn il-gvernijiet federali u lokali. F'dan ir-rigward, il-Ġermanja rrilevat li l-erba' reġjuni madwar l-ajruport, jiġifieri Landkreis Bernkastel-Wittlich, Birkenfeld, Cochem-Zell u Rhein-Hunsrück-Kreis, bħala medja għandhom sempliċiment nofs il-popolazzjoni tal-bqija ta' Land Rhineland-Palatinate. Il-Ġermanja enfasizzat li għal dawk id-distretti li l-ekonomija tagħhom hija ffurmata minn intrapriżi żgħar u ta' daqs medju, l-impjieg huwa l-ankra ewlenija kontra tnaqqis ulterjuri tal-ekonomija reġjonali u l-ajruport ta' Frankfurt Hahn għandu rwol importanti bħala impjegatur u klijent.

(199)

It-tieni nett, il-Ġermanja argumentat li l-ajruport ta' Frankfurt Hahn għandu rwol importanti fl-iżvilupp strateġiku tat-turiżmu lejn (madwar 33 % tal-passiġġieri li jikkorrispondi għal madwar miljun passiġġier fl-2005) u barra mill-pajjiż (madwar 67 % tal-passiġġieri) għal Land Rhineland-Palatinate. Il-Ġermanja ddikjarat li 88 % tal-passiġġieri li jidħlu qegħdin iqattgħu diversi ljieli fir-reġjun. Il-Ġermanja rrilevat li fl-2005 it-turisti li waslu fl-ajruport ta' Frankfurt Hahn iġġeneraw madwar 5,7 miljun lejl waqt soġġorn. (37) Skont il-Ġermanja l-għadd ta' ljieli kompla jiżdied, b'Land Rhineland-Palatinate tilqa' 8,2 miljun klijent fl-2011 li ġġeneraw 21,5 miljun lejl waqt soġġorn. Il-Ġermanja nnotat li b'mod partikolari, l-għadd ta' klijenti minn pajjiżi Ewropej tal-Lvant u tan-Nofsinhar żdied u li qegħdin jiġu operati għadd kbir ta' titjiriet minn dawk il-pajjiżi lejn Frankfurt-Hahn. Skont il-Ġermanja, dan wassal għall-ħolqien ta' madwar 198 000 impjieg li ġie ġġenerat mit-turiżmu f'Rhineland-Palatinate. Kif spjegat il-Ġermanja, l-effetti katalizzanti tal-introjtu u tal- impjiegi huma speċjalment riżultat tat-turiżmu fir-reġjun, u hawnhekk l-ajruport ta' Frankfurt Hahn għandu rwol importanti bħala l-mezz li permezz tiegħu t-turisti jilħqu r-reġjun ta' Hunsrück, iżda wkoll b'mod aktar ġenerali lil Rhineland-Palatinate. Il-Ġermanja qalet li bejn l-1990 u l-2001 l-għadd ta' turisti żdied b'70 % għar-reġjun ta' Hunsrück u b'35 % għal Rhineland-Palatinate. Skont il-Ġermanja, matul l-istess perjodu, l-għadd ta' turisti ġejjin minn barra l-pajjiż żdied b'163 % fir-reġjun ta' Hunsrück. Peress li 88 % tat-turisti li jiġu minn Frankfurt Hahn jibqgħu tal-anqas lejl wieħed u aktar minn 80 % minnhom jibqgħu saħansitra bejn jumejn u għaxart ijiem, jiġġeneraw benefiċċju totali ta' madwar EUR 133,7 miljun fis-sena. Barra minn hekk, il-Ġermanja argumentat li anke t-turiżmu 'l barra mill-pajjiż (67 %) jiġġenera dħul għall-ajruport ta' Frankfurt Hahn permezz ta' dħul minn attivitajiet mhux ajrunawtiċi.

(200)

It-tielet nett, il-Ġermanja qalet li, meta wieħed iqis l-aspetti kollha tal-attivitajiet tal-ajruport, fl-2012 l-ajruport ta' Frankfurt Hahn ħoloq 3 063 impjieg fir-reġjun ta' Hunsrück li 74 % minnhom kienu postijiet full-time. Skont il-Ġermanja, 90 % minn dawk l-impjegati jgħixu wkoll f'dan ir-reġjun. Il-Ġermanja argumentat ukoll li permezz tal-ajruport ta' Frankfurt Hahn, qiegħed jiġi evitat ukoll li impjegati żgħażagħ kwalifikati jiċċaqilqu lejn reġjuni oħra u qiegħed jiġi evitat ukoll tnaqqis ekonomiku u soċjali tal-komunitajiet reġjonali u tal-infrastruttura tagħhom. Barra minn hekk, il-Ġermanja enfasizzat li l-preżenza tal-ajruport ta' Frankfurt Hahn ma tipproduċix biss l-effetti diretti msemmija għas-suq tax-xogħol, iżda wkoll effetti indiretti sostanzjali permezz ta' għadd dejjem jikber ta' attivitajiet ekonomiċi u turistiċi. F'dan ir-rigward, il-Ġermanja rreferiet għall-effetti sekondarji pożittivi għar-reġjun, jiġifieri inqas qgħad u aktar kontribwenti, li jgħin biex jiġi żgurat li l-muniċipalitajiet fir-reġjun ikollhom il-mezzi finanzjarji biex isostnu l-ekonomija lokali. B'kollox, dan iġġenera madwar 11 000 impjieg permezz tat-turiżmu lejn il-pajjiż għar-Rhineland-Palatinate kollu.

(201)

Il-Ġermanja argumentat li l-finanzjament tal-infrastruttura fl-ajruport ta' Frankfurt Hahn għen ukoll sabiex jintlaħaq l-għan ta' interess komuni definit sew li tiġi miġġielda l-konġestjoni tat-traffiku fiċ-ċentri ewlenin tal-UE. F'dan ir-rigward, il-Ġermanja ġibdet l-attenzjoni għall-fatt li fil-passat il-limiti ta' kapaċità tal-ajruport ta' Frankfurt Main kienu kontinwament jinqabżu. Il-Ġermanja rrilevat li l-ajruport ta' Frankfurt Hahn, speċjalment fid-dawl tal-liċenzja tiegħu li jista' jopera 24 siegħa kuljum, kien għalhekk qiegħed jissodisfa l-għan li jiġu pprovduti kapaċitajiet addizzjonali sabiex tittaffa l-konġestjoni fl-ajruport ta' Frankfurt Main.

(202)

Barra minn hekk, il-Ġermanja rrilevat li l-appoġġ lill-ajruport ta' Frankfurt Hahn jissodisfa wkoll l-objettiv ta' interess komuni biex tiżdied il-mobbiltà taċ-ċittadini tal-Unjoni. F'dan ir-rigward, il-Ġermanja indikat li l-ajruport ta' Frankfurt Hahn huwa l-uniku ajruport Ġermaniż li joffri titjiriet diretti lejn Kaunas (il-Latvja), Kerry (l-Irlanda), Kos (il-Greċja), Montpellier (Franza), Nador (il-Marokk), Plovdiv (il-Bulgarija), Pula (il-Kroazja), Rodi (il-Greċja), Santiago de Compostela (Spanja) u Volos (il-Greċja). Barra minn hekk, skont il-Ġermanja, l-ajruport ta' Frankfurt Hahn jikkontribwixxi għall-mobbiltà okkupazzjonali taż-żgħażagħ, li jistgħu jilħqu r-reġjun ta' Hunsrück u ta' Rhineland-Palatinate bi prezzijiet baxxi. Bl-istess mod, il-Ġermanja enfasizzat li l-universitajiet u l-istituzzjonijiet ta' kwalità għolja li joffru edukazzjoni ogħla f'Koblenz, Mainz, Kaiserslautern, Trier, Wiesbaden, Mannheim, Bonn, eċċ, fejn fil-biċċa l-kbira t-tagħlim jingħata mingħajr ħlas, issa huma faċilment aċċessibbli għal studenti minn madwar l-Ewropa kollha.

(203)

Barra minn hekk, il-Ġermanja argumentat li huwa wkoll ta' interess komuni li Hunsrück u r-reġjuni tal-madwar ta' Rhineland-Palatinate jkunu konnessi ma' reġjuni oħra fil-periferija, pereżempju Limerick, li diġà deher permezz ta' sħubijiet bejn il-bliet. Il-Ġermanja qalet li, bħala r-raba' l-akbar ekonomija nazzjonali fid-dinja, mhux biss qiegħda tiffoka biex tikkollega maċ-ċentri Ewropej ewlenin, iżda wkoll biex tgħaqqad ir-reġjuni ma' xulxin. Skont il-Ġermanja, li ssir aktar indipendenti miċ-ċentri ewlenin bħal Heathrow, Charles de Gaulle, Schiphol jew Frankfurt/Main hija importanti għall-Ewropa peress li dan ifisser mhux biss aktar konnessjonijiet diretti, iżda wkoll sigurtà akbar speċjalment għan-negozju tal-merkanzija peress li ajruporti reġjonali huma inqas suxxettibbli għal kanċellazzjonijiet minħabba t-temp, l-istrajkijiet, it-terroriżmu jew riskji oħra ta' kanċellazzjoni.

(204)

Fl-aħħar nett, b'mod ġenerali l-Ġermanja enfasizzat li l-prossimità tal-ajruport ta' Zweibrücken ma jwassalx għal duplikazzjoni ta' ajruporti għall-istess żona ta' lħuq, minħabba d-distanza ta' 127 km bejn l-ajruport ta' Frankfurt Hahn u l-ajruport ta' Zweibrücken. Skont il-Ġermanja, din id-distanza ssarraf f'ħin ta' siegħa u 27 minuta bil-karozza jew madwar 4 sigħat bil-ferrovija. Għalhekk, il-Ġermanja argumentat li l-ebda ħaddiem, trasportatur tal-merkanzija jew turist raġonevoli li l-punt ta' tluq tiegħu jkun jinsab fir-reġjun ta' Hunsrück mhu se jmur fl-ajruport ta' Zweibrücken minflok fl-ajruport ta' Frankfurt Hahn sabiex jilħaq id-destinazzjoni finali tiegħu. Barra minn hekk, il-Ġermanja rrilevat li, meta wieħed iħares lejn it-traffiku tal-passiġġieri u tal-merkanzija bl-ajru bejn l-2005 u l-2012, ma tista' tiġi dedotta l-ebda relazzjoni ta' sostituzzjoni bejn l-ajruporti. Skont il-Ġermanja, l-akbar sehem ta' passiġġieri tal-ajruport ta' Frankfurt Hahn ġej mir-reġjun ta' Hunsrück-Mosel-Nahe (ara l-Figura 5).

Figura 2

Sehem mis-suq fit-trasport tal-passiġġieri bl-ajru tal-ajruport ta' Frankfurt Hahn fl-2013  (38)

(205)

Il-Ġermanja enfasizzat li l-investimenti ffinanzjati kienu neċessarji u proporzjonati għall-objettiv ta' interess komuni (ara l-premessa 197 u dawk segwenti). Skont il-Ġermanja, l-investimenti kienu saru skont il-ħtiġijiet u l-infrastruttura li nbniet kienet neċessarja għall-ajruport sabiex tiġi ggarantita l-konnettività u tgħin fl-iżvilupp tar-reġjun u biex titnaqqas il-konġestjoni fl-ajruport ta' Frankfurt Main. Il-Ġermanja enfasizzat li l-infrastruttura ma kienx sproporzjonata jew kbira wisq għall-ħtiġijiet tal-utenti tal-ajruport. Għalhekk, il-Ġermanja qieset li din il-kundizzjoni ta' kompatibbiltà kienet issodisfata.

(206)

Il-Ġermanja rrilevat li qabel ittieħdet id-deċiżjoni biex tiġi estiża l-infrastruttura tal-ajruport, Fraport kienet ikkummissjonat studju ta' tbassir tat-traffiku sabiex jiġi identifikat il-potenzjal tat-traffiku għall-ajruport ta' Frankfurt Hahn. Il-Ġermanja pprovdiet dawn l-istudji li saru minn esperti tal-avjazzjoni f'isem Fraport. Il-Figura 3, il-Figura 4 u l-Figura 5 jippreżentaw fil-qosor ir-riżultati ta' wieħed minn dawn l-istudji dwar l-iżvilupp mistenni fit-traffiku tal-passiġġieri u tal-merkanzija fl-ajruport ta' Frankfurt Hahn bejn l-2000 u l-2011.

Figura 3

Total ta' passiġġieri potenzjali fl-ajruport ta' Frankfurt Main bejn l-2000-2010

Figura 4

Traffiku potenzjali ta' passiġġieri low-cost (bis-suppożizzjoni li Ryanair tistabbilixxi bażi) fl-ajruport ta' Frankfurt Hahn bejn l-2001-2011

Figura 5

Total ta' traffiku potenzjali ta' merkanzija fl-ajruport ta' Frankfurt Main bejn l-2001-2010

(207)

Skont l-informazzjoni pprovduta mill-Ġermanja, l-utenti potenzjali kollha tal-infrastruttura għandhom aċċess għall-ajruport fuq termini ugwali u mhux diskriminatorji. Il-Ġermanja rrilevat li l-imposti ajruportwali mħallsa għall-użu tal-infrastruttura kienu bbażati fuq differenzjazzjoni kummerċjalment ġustifikata u li l-iskeda tal-imposti ajruportwali hija disponibbli għall-utenti potenzjali kollha b'mod trasparenti u mhux diskriminatorju.

(208)

L-ewwel nett, il-Ġermanja qalet li ma hemm l-ebda effetti ta' sostituzzjoni bejn l-ajruport ta' Frankfurt Hahn u ajruporti oħra fiż-żona ta' lħuq, bħall-ajruport ta' Zweibrücken u l-ajruport ta' Frankfurt Main. Skont il-Ġermanja, ma jistgħux jintwerew effetti negattivi bla bżonn fuq il-kompetizzjoni ma' dawn l-ajruporti minħabba l-għajnuna mogħtija lill-FFHG, sew jekk fit-traffiku tal-passiġġieri jew tal-merkanzija. Tabilħaqq, il-Ġermanja argumentat li f'dawn l-aħħar snin, it-trasportaturi bi prezzijiet irħas kellhom joffru aktar u aktar titjiriet lejn iċ-ċentri ewlenin peress li l-linji tal-ajru tradizzjonali baxxew il-prezzijiet tagħhom u bdew jidħlu fis-suq ta' titjiriet bi prezzijiet irħas. F'dan ir-rigward, il-Ġermanja qalet li issal-ajruporti reġjonali, bħal Frankfurt Hahn, jinsabu taħt pressjoni akbar biex jikkompetu mal-ajruporti ewlenin għall-passiġġieri li jivvjaġġaw għal skop ta' divertiment. Għalhekk, il-Ġermanja kkonkludiet li l-appoġġ finanzjarju pprovdut ma wassal għall-ebda effett negattiv bla bżonn fuq il-kompetizzjoni, iżda għall-kuntrarju wera li kien xieraq biex jgħin fil-proċess ta' adattament lejn mudell kummerċjali stabbli fil-futur.

(209)

It-tieni nett, il-Ġermanja argumentat li l-fatt li qabel ma involviet ruħha fl-ajruport ta' Frankfurt Hahn, Fraport kienet diġà l-operatur tal-ajruport ta' Frankfurt Main, juri li ma kinux mistennija movimenti ta' sostituzzjoni minn Frankfurt Main lejn l-ajruport ta' Frankfurt Hahn. Minflok, Fraport kienet qiegħda tinvesti fil-possibbiltà li titnaqqas il-konġestjoni fl-ajruport ta' Frankfurt Main u li tintuża l-funzjoni kumplimentari addizzjonali tal-ajruport ta' Frankfurt Hahn, peress li kienet prevista kapaċità eċċessiva futura fl-ajruport ċentrali ta' Frankfurt Main. Skont il-Ġermanja, il-projbizzjoni fuq titjiriet billejl fl-ajruport ta' Frankfurt Main kienet waħda mill-fatturi ewlenin f'dan ir-raġunament peress li l-ajruport ta' Frankfurt Hahn kellu liċenzja li jopera 24 siegħa kuljum.

(210)

Bħala konklużjoni, il-Ġermanja argumentat li l-effetti ta' kwalunkwe għajnuna favur l-FFHG kienu limitati għal effetti reġjonali pożittivi għar-reġjun ta' Hunsrück, mingħajr ma nħolqu effetti negattivi bla bżonn fir-relazzjoni ma' ajruporti oħra minħabba li l-ajruport ta' Frankfurt Hahn jintuża sempliċiment biex titnaqqas il-konġestjoni fi Frankfurt Main. Barra minn hekk, il-Ġermanja qalet li, minbarra l-ajruport tal-Lussemburgu, li huwa diġà siegħa u 30 minuta 'il bogħod (111-il km) mill-ajruport ta' Frankfurt Hahn, ma hemmx ajruporti barranin oħra li jikkompetu fl-istess żona ta' lħuq. Skont il-Ġermanja anki fir-rigward tal-Lussemburgu, ma jista' jiġi osservat l-ebda effett ta' xkiel negattiv fuq il-kompetizzjoni minħabba l-għajnuna mogħtija.

(211)

Il-Ġermanja qalet li fin-nuqqas ta' għajnuna għall-investiment, il-livell ta' attività ekonomika tal-ajruport kien se jonqos b'mod sinifikanti. Il-Ġermanja rrilevat li l-għajnuna kienet neċessarja peress li kkumpensat biss l-ispejjeż ta' finanzjament u ammont aktar baxx kien iwassal għal livelli aktar baxxi ta' investiment.

(212)

Il-Linji Gwida tal-Avjazzjoni tal-2014 jipprovdu kundizzjonijiet li taħthom għajnuniet operattivi u ta' investiment lill-ajruporti jistgħu jiġu ddikjarati kompatibbli mas-suq intern fis-sens tal-Artikolu 107(3)(c) tat-Trattat. Fis-17 ta' April 2014, il-Ġermanja ppreżentat l-opinjonijiet tagħha dwar il-kompatibbiltà tal-miżuri skont il-Linji Gwida tal-Avjazzjoni tal-2014. Il-Ġermanja argumentat li, anke kieku l-miżuri taħt investigazzjoni kellhom jikkostitwixxu għajnuna operatorja lill-FFHG, dawn ikunu kompatibbli mas-suq intern skont l-Artikolu 107(3)(c) tat-Trattat u s-sezzjoni 5.1.2 tal-Linji Gwida tal-Avjazzjoni tal-2014.

(213)

Fir-rigward tal-objettiv ta' interess komuni li huwa definit sew, il-Ġermanja rrilevat li l-għan tal-kopertura tal-ispejjeż operattivi tal-FFHG kien dejjem bit-tir li titjieb l-istruttura ekonomika reġjonali tar-reġjun ekonomikament sottożviluppat u b'popolazzjoni baxxa ta' Hunsrück. F'dan ir-rigward il-Ġermanja ppreżentat l-istess raġunament li kienet applikat għall-valutazzjoni tal-kompatibbiltà tal-għajnuna għall-investiment għall-finanzjament tal-infrastruttura tal-ajruport (ara s-sezzjoni 5.4.1.1).

(214)

Fir-rigward tal-ħtieġa għal intervent mill-Istat, il-Ġermanja spjegat għaliex Frankfurt Hahn qiegħed jagħmel telf operatorju li jeħtieġ li jiġi kopert. Fil-fehma tagħha, huwa objettiv pjuttost ambizzjuż li ajruport bħall-ajruport ta' Frankfurt Hahn b'1-3 miljun passiġġier isir profittabbli u jkun jista' jkopri l-ispejjeż operattivi tiegħu. Skont il-Ġermanja, dan l-objettiv ambizzjuż ma setax jiġi realizzat fis-snin tal-bidu peress li l-ajruport kien mgħobbi b'investimenti infrastrutturali għoljin ħafna li ffinanzja huwa stess fis-suq kapitali u li għalihom kellu jħallas imgħax għoli. Barra minn hekk, il-Ġermanja qalet li mill-bidu tal-kriżi ekonomika u finanzjarja dinjija, seta' jiġi rreġistrat staġnar tat-traffiku tal-passiġġieri u speċjalment tal-merkanzija.

(215)

Il-Ġermanja rrilevat li fid-dawl ta' dawn iċ-ċirkostanzi, kien hemm il-ħtieġa għal intervent mill-Istat biex jiġi kopert it-telf operatorju għaliex kieku l-FFHG kienet tispiċċa insolventi. Skont il-Ġermanja, dan kien iwassal għall-irtirar tal-liċenzja li jopera 24 siegħa kuljum, li dan ifisser li matul l-insolvenza l-FFHG kien ikollha tieqaf topera t-titjiriet kollha, li imbagħad dan kien iwassal għat-telf ta' klijenti bħal linji tal-ajru u trasportaturi tal-merkanzija. Il-Ġermanja enfasizzat li barra minn hekk imbagħad kien ikun diffiċli ħafna li jinstab operatur ġdid għall-ajruport.

(216)

Il-Ġermanja rrilevat li l-kopertura tal-ispejjeż operattivi kienet miżura adatta biex jintlaħaq l-objettiv intiż. F'dan ir-rigward il-Ġermanja argumentat li, kieku l-ajruport ta' Frankfurt Hahn kien ikollu jieqaf jopera u kien jgħib mis-swieq rilevanti, ma kienx ikun aktar possibbli li jintlaħqu l-objettivi ta' interess komuni segwiti mill-konverżjoni ta' eks bażi tal-ajru tal-Istati Uniti f'ajruport tal-avjazzjoni ċivili li jaħdem b'mod sħiħ kif ukoll l-iżvilupp tar-reġjun ta' Hunsrück. F'dan ir-rigward, il-Ġermanja enfasizzat li b'kuntrast għal investitur f'ekonomija tas-suq, investitur pubbliku kien ikollu jqis dawn l-objettivi meta jkun qiegħed iqis l-alternattiva tal-għeluq tal-ajruport.

(217)

Il-Ġermanja argumentat li sabiex l-ajruport ta' Frankfurt Hahn jinżamm jopera, kienet conditio sine qua non li jiġu koperti l-ispejjeż operattivi tiegħu peress li altrimenti l-FFHG kienet tispiċċa insolventi. Min-naħa l-oħra operazzjoni b'suċċess tal-ajruport kienet il-bażi biex jiġu realizzati l-objettivi ta' interess komuni kif ġie ddikjarat fil-premessi 213 u dawk segwenti. Barra minn hekk, il-Ġermanja argumentat li mingħajr għajnuna operatorja, il-konsolidazzjoni finanzjarja tal-ajruport kienet tkun inkonċepibbli, minħabba li l-ajruport kien jakkumula aktar u aktar dejn minflok ma jeħles mid-dejn tiegħu kif previst fil-programm attwali ta' awsterità.

(218)

Il-Ġermanja argumentat li kwalunkwe element ta' għajnuna li kien jinsab fis-self kien limitat għat-telf operatorju ta' Frankfurt Hahn u kien jirrappreżenta l-minimu assolut meħtieġ sabiex jinżamm jopera u tiġi evitata l-insolvenza tiegħu.

(219)

L-ewwel nett, il-Ġermanja qalet li ma hemm l-ebda effett ta' sostituzzjoni bejn l-ajruport ta' Frankfurt Hahn u ajruporti oħra fiż-żona ta' lħuq, bħall-ajruport ta' Zweibrücken u l-ajruport ta' Frankfurt Main. Skont il-Ġermanja, ma jistgħux jintwerew effetti negattivi bla bżonn fuq il-kompetizzjoni fuq dawn l-ajruporti minħabba l-għajnuna operatorja mogħtija lill-FFHG, sew jekk fit-traffiku tal-passiġġieri jew tal-merkanzija. Il-Ġermanja sostniet li, għall-kuntrarju, Frankfurt Hahn esperjenza effetti sinifikanti ta' sostituzzjoni ta' passiġġieri li jagħżlu ċ-ċentri, bħal Köln/Bonn jew Frankfurt Main, biex itiru bi trasportaturi bi prezzijiet irħas milli mill-ajruport ta' Frankfurt Hahn. Tabilħaqq, il-Ġermanja argumentat li fl-aħħar snin it-trasportaturi bi prezzijiet irħas kellhom joffru aktar u aktar titjiriet lejn iċ-ċentri ewlenin peress li linji tal-ajru tradizzjonali baxxew il-prezzijiet tagħhom u bdew jidħlu fis-suq ta' titjiriet bi prezzijiet baxxi. F'dan ir-rigward, il-Ġermanja qalet li issal-ajruporti reġjonali, bħal Frankfurt Hahn, jinsabu taħt pressjoni akbar biex jikkompetu mal-ajruporti ewlenin għall-passiġġieri li jivvjaġġaw għal skop ta' divertiment. Għalhekk, il-Ġermanja kkonkludiet li l-kopertura tal-ispejjeż operattivi ma wasslet għall-ebda effett negattiv bla bżonn fuq il-kompetizzjoni, iżda għall-kuntrarju wriet li kienet xierqa biex tgħin fil-proċess ta' adattament lejn mudell kummerċjali stabbli fil-futur.

(220)

It-tieni nett, il-Ġermanja argumentat li l-fatt li qabel ma involviet ruħha fl-ajruport ta' Frankfurt Hahn, Fraport kienet diġà l-operatur tal-ajruport ta' Frankfurt Main, juri li ma kinux mistennija movimenti ta' sostituzzjoni minn Frankfurt Main lejn l-ajruport ta' Frankfurt Hahn. Minflok, Fraport kienet qiegħda tinvesti fil-possibbiltà li titnaqqas il-konġestjoni fl-ajruport ta' Frankfurt Main u li tuża l-funzjoni kumplimentari addizzjonali tal-ajruport ta' Frankfurt Hahn, minħabba li kienet prevista kapaċità eċċessiva futura fl-ajruport ċentrali ta' Frankfurt Main. Skont il-Ġermanja, il-projbizzjoni fuq titjiriet billejl fl-ajruport ta' Frankfurt Main kienet waħda mill-fatturi ewlenin f'dan ir-raġunament peress li l-ajruport ta' Frankfurt Hahn kellu liċenzja li jopera 24 siegħa kuljum.

(221)

Bħala konklużjoni, il-Ġermanja argumentat li l-effetti ta' kwalunkwe għajnuna favur l-FFHG kienu limitati għall-effetti reġjonali pożittivi għar-reġjun ta' Hunsrück, mingħajr ma nħolqu effetti negattivi bla bżonn fir-relazzjoni ma' ajruporti oħra minħabba li l-ajruport ta' Frankfurt Hahn jintuża biex titnaqqas il-konġestjoni fi Frankfurt Main. Barra minn hekk, il-Ġermanja qalet li minbarra l-ajruport tal-Lussemburgu, li huwa diġà siegħa u 30 minuta 'l bogħod (111-il km) mill-ajruport ta' Frankfurt Hahn, ma hemmx ajruporti barranin oħra li jikkompetu fl-istess żona ta' lħuq. Skont il-Ġermanja anki fir-rigward tal-Lussemburgu, ma jista' jiġi osservat l-ebda effett ta' xkiel negattiv fuq il-kompetizzjoni minħabba l-għajnuna mogħtija.

(222)

Ryanair toġġezzjona għad-deċiżjoni tal-Kummissjoni li tibda l-proċedura ta' investigazzjoni formali fir-rigward tal-ftehimiet ma' Ryanair tal-1999, tal-2002 u tal-2005 mal-ajruport ta' Frankfurt Hahn. Ryanair qalet li dawn il-ftehimiet kienu konformi mal-prinċipju tal-investitur f'ekonomija tas-suq, u għalhekk ma kinux jinvolvu għajnuna mill-Istat.

(223)

Ryanair essenzjalment targumenta li ma kienet ingħatat l-ebda vantaġġ peress li l-ftehimiet jirriflettu kundizzjonijiet normali tas-suq. F'dan ir-rigward, Ryanair sostniet li l-kundizzjonijiet kuntrattwali ma għandhomx jiġu mqabbla ma' dawk f'ajruporti Ġermaniżi oħra, iżda ma' dawk li r-Ryanair kienet qiegħda tiftiehem ma' ajruporti oħra li jospitaw trasportaturi bi prezzijiet irħas, bħall-ajruport ta' Blackpool u l-ajruport ta' Charleroi.

(224)

Dwar il-kwistjoni tal-appoġġ għall-kummerċjalizzazzjoni, Ryanair sostniet li l-imposta għal destinazzjonijiet ġodda tippremja l-frekwenza tat-titjiriet u li l-iskontijiet mogħtija mill-ajruport ta' Frankfurt Hahn kienu konformi mal-prattika industrijali peress li ħafna ajruporti privati jew pubbliċi japplikaw l-istess livell jew livell ogħla ta' skontijiet għal destinazzjonijiet ġodda.

(225)

Dwar l-applikazzjoni tal-imposti ajruportwali, Ryanair sostniet li imposti normali tas-suq, jiġifieri imposti li ma jkunux abnormalment baxxi, jissodisfaw il-prinċipju tal-investitur f'ekonomija tas-suq. Skont Ryanair, il-prospett ta' profittabbiltà immedjata mhuwiex meħtieġ biex jiġi ssodisfat dan il-prinċipju. Skont Ryanair il-prospett li tinkiseb profittabbiltà fuq perjodu medju għal wieħed fit-tul għandu jkun biżżejjed. Barra minn hekk, Ryanair tikkontesta l-argument tal-Kummissjoni li l-ajruport ta' Frankfurt Hahn kien qies biss l-ispejjeż speċifiċi tal-kuntratt ma' Ryanair fir-rigward tal-kopertura tal-ispejjeż tiegħu mill-imposti mħallsa lil Ryanair, u mhux l-ispejjeż tal-infrastruttura komuni tal-ajruport u l-amministrazzjoni ġenerali. Fir-rigward tal-kopertura tal-ispejjeż, Ryanair qalet li qatt ma kien hemm pjan biex l-użu tal-ajruport ta' Frankfurt Hahn jiġi esklussivament riżervat għal Ryanair. F'dan ir-rigward, Ryanair indikat il-fatt li l-ajruport ta' Frankfurt Hahn jintuża wkoll b'mod sinifikanti bħala ajruport tal-merkanzija. Barra minn hekk, Ryanair kienet fakkret li għandha tħallas livell aktar baxx ta' imposti meta mqabbel ma' linji oħra tal-ajru, peress li r-rekwiżiti u l-operazzjonijiet ta' mmaniġġjar tagħha jimminimizzaw l-ispejjeż għall-ajruport.

(226)

Ryanair argumentat ukoll li l-imġiba tal-ajruport ta' Frankfurt Hahn kienet iggwidata minn prospetti prevedibbli ta' profittabbiltà. Skont Ryanair, qabel ma kkonkluda l-ftehimiet, l-ajruport ta' Frankfurt Hahn kien wettaq analiżi finanzjarja u strateġika, konsistenti ma' dak li huwa mistenni minn investitur f'ekonomija tas-suq. Ryanair qalet li mill-2005 l-impenn tagħha li tipprovdi volum kbir ta' passiġġieri kien assigurat ukoll permezz ta' penali kuntrattwali, u li dan il-kuntratt kien qiegħed jalloka l-biċċa l-kbira tar-riskju lil Ryanair, u b'hekk jipprovdi ftehim eċċezzjonalment ġeneruż għall-ajruport ta' Frankfurt Hahn. Barra minn hekk, il-ftehimiet ippermettew li l-ajruport ta' Frankfurt Hahn itejjeb is-sitwazzjoni finanzjarja tiegħu. Waqt il-konklużjoni tal-kuntratt, l-Ajruport ta' Frankfurt Hahn kien konxju li ftehimiet simili li Ryanair kienet għamlet ma' ajruporti madwar l-Ewropa wrew li huma profittabbli.

(227)

Fl-aħħar nett, Ryanair tenfasizza li l-ftehimiet tagħha ma' Frankfurt Hahn ma kien fihom l-ebda klawżola ta' esklussività, u għalhekk linji oħra tal-ajru setgħu jagħmlu u fil-fatt jibbenefikaw mill-istess termini u kundizzjonijiet bħal Ryanair, sakemm dawn ikunu lesti li joffru l-istess impenn lejn l-ajruport bħal Ryanair.

(228)

Barra minn hekk, Ryanair ippreżentat serje ta' noti mħejjija minn Oxera, flimkien ma' analiżi mħejjija mill-Professur Damien P. McLoughlin.

(229)

Oxera tqis li l-metodu tal-Kummissjoni li taċċetta biss ajruporti komparaturi li jinsabu fl-istess żona ta' lħuq bħall-ajruport li qiegħed jiġi investigat, huwa wieħed difettuż.

(230)

Oxera targumenta wkoll li l-prezzijiet ta' referenza tas-suq li nkisbu mill-ajruporti ta' referenza mhumiex affettwati mill-għajnuna mill-Istat mogħtija lill-ajruporti tal-madwar. Għalhekk, huwa possibbli li ssir stima robusta ta' referenza tas-suq għall-MEOTs.

(231)

Dan minħabba li:

(232)

Oxera sostniet li l-analiżi tal-profittabbiltà mwettqa minn Oxera fir-rapporti tagħha sottomessi lill-Kummissjoni ssegwi l-prinċipji li għandhom jiġu adottati minn investitur razzjonali fis-settur privat u tkun tirrifletti l-approċċ li jirriżulta mill-preċedenti tal-Kummissjoni.

(233)

Il-prinċipji li jsejsu l-analiżi tal-profittabbiltà huma:

(234)

L-għan tad-dokument huwa li tiġi stabbilita l-loġika kummerċjali wara d-deċiżjonijiet tal-ajruporti reġjonali li jixtru reklamar fuq Ryanair.com mingħand AMS.

(235)

Id-dokument isostni li jeżisti għadd kbir ta' ajruporti b'saħħithom ħafna, magħrufa sewwa u abitwalment użati. Il-kompetituri aktar dgħajfa għandhom jegħlbu l-imġiba tax-xiri statiku tal-konsumaturi biex ikunu jistgħu jkabbru n-negozju tagħhom. Jeħtieġ li ajruporti reġjonali iżgħar isibu mod kif jikkomunikaw il-messaġġ dwar il-marka kummerċjali tagħhom b'mod konsistenti lill-akbar udjenza possibbli. Il-forom tradizzjonali ta' komunikazzjoni kummerċjali jirrikjedu nfiq li jisboq ir-riżorsi tagħhom.

(236)

Ryanair ippreżentat rapporti oħrajn imħejjija mill-konsulenta tagħha Oxera. F'dawn ir-rapporti, Oxera tiddiskuti l-prinċipji li, skont il-linja tal-ajru, għandhom jittieħdu f'kunsiderazzjoni bħala parti mill-MEOT fl-analiżi tal-profittabbiltà ta', minn naħa waħda, l-ftehimiet dwar servizzi ajruportwali bejn Ryanair u l-ajruporti u, min-naħa l-oħra, il-ftehimiet ta' kummerċjalizzazzjoni bejn AMS u l-istess ajruporti. Ryanair enfasizzat li dawk ir-rapporti b'ebda mod ma jbiddlu l-pożizzjoni tagħha li ġiet ippreżentata aktar kmieni, jiġifieri li l-ftehimiet dwar servizzi pprovduti fl-ajruporti u l-ftehimiet ta' kummerċjalizzazzjoni għandhom jiġu analizzati taħt MEOTs separati.

(237)

Ir-rapporti jindikaw li l-profitti ġġenerati minn AMS għandhom jiġu inklużi bħala dħul f'analiżi konġunta rigward il-profittabbiltà, filwaqt li l-infiq ta' AMS għandu jiġi inkorporat fl-ispejjeż. Sabiex dan ikun jista' jsir, ir-rapporti jissuġġerixxu l-applikazzjoni ta' metodoloġija bbażata fuq il-fluss tal-flus għall-analiżi tal-profittabbiltà konġunta, li jfisser li l-infiq mill-ajruporti fuq AMS jista' jiġi ttrattat bħala spejjeż operattivi inkrementali.

(238)

Ir-rapporti enfasizzaw li l-attivitajiet ta' kummerċjalizzazzjoni jikkontribwixxu għall-ħolqien u l-appoġġ tal-valur tal-marka kummerċjali, li jgħin biex jiġu ġġenerati effetti u benefiċċji mhux biss għat-tul ta' żmien tal-kuntratt, iżda wkoll wara t-terminazzjoni tiegħu. Dan ikun partikolarment il-każ jekk, minħabba l-fatt li Ryanair tkun ikkonkludiet ftehim ma' ajruport, ikun hemm linji tal-ajru oħra li jistabbilixxu lilhom infushom fl-ajruport, li min-naħa tagħhom jattiraw aktar ħwienet biex jiftħu hemmhekk u b'hekk iġibu aktar dħul minn attivitajiet mhux ajrunawtiċi għall-ajruport. Skont Ryanair, jekk il-Kummissjoni tgħaddi biex twettaq analiżi konġunta tal-profittabbiltà, dawk il-benefiċċji għandhom jittieħdu f'kunsiderazzjoni billi l-ispejjeż ta' AMS jiġu ttrattati bħala spejjeż operattivi inkrementali, netti mill-ħlasijiet ta' AMS.

(239)

Barra minn hekk, Ryanair tqis li għandu jiġi inkluż valur terminali (li jirrifletti l-valur iġġenerat wara t-terminazzjoni tal-ftehim) fil-profitti inkrementali pproġettati fit-tmiem tal-ftehim dwar is-servizzi pprovduti fl-ajruporti. Il-valur terminali jista' jiġi adattat fuq il-bażi tal-probabbiltà ta' “tiġdid”, li jkejjel l-aspettattiva li l-profitti se jippersistu wara t-terminazzjoni tal-ftehim ma' Ryanair jew jekk jiġu maqbula kundizzjonijiet simili ma' linji tal-ajru oħrajn. Ryanair kienet tal-fehma li mbagħad ikun possibbli li jiġi kkalkulat limitu aktar baxx għall-benefiċċji ġġenerati b'mod konġunt mill-ftehim ma' AMS u mill-ftehim dwar is-servizzi pprovduti fl-ajruporti, li jirrifletti l-inċertezzi tal-profitti inkrementali wara t-terminazzjoni tal-ftehim dwar is-servizzi pprovduti fl-ajruporti.

(240)

Bħala suppliment għal dan l-approċċ, ir-rapporti jippreżentaw sinteżi tar-riżultati tal-istudji dwar l-effetti tal-kummerċjalizzazzjoni fuq il-valur ta' marka kummerċjali. Dawk l-istudji jqisu li l-kummerċjalizzazzjoni tista' tappoġġa l-valur ta' marka kummerċjali u tista' tgħin sabiex tinbena bażi ta' klijenti. Skont ir-rapporti, fil-każ ta' ajruport, reklamar fuq is-sit Ryanair.com iżid b'mod sinifikanti l-viżibilità tal-marka kummerċjali. Barra minn hekk ir-rapporti jgħidu li partikolarment l-ajruporti reġjonali iżgħar li jkunu jixtiequ jżidu t-traffiku tal-ajru tagħhom jistgħu għalhekk iżidu l-valur tal-marka kummerċjali tagħhom billi jikkonkludu ftehimiet ta' kummerċjalizzazzjoni ma' AMS.

(241)

Fl-aħħar nett ir-rapporti jindikaw li approċċ ibbażat fuq il-fluss tal-flus għandu jiġi ppreferut fuq approċċ ta' kapitalizzazzjoni fejn l-ispejjeż tas-servizzi ta' kummerċjalizzazzjoni pprovduti minn AMS jiġu ttrattati bħala nfiq kapitali fuq assi intanġibbli (jiġifieri, il-valur tal-marka kummerċjali). (39) L-approċċ ta' kapitalizzazzjoni jieħu f'kunsiderazzjoni biss il-proporzjon tal-infiq fuq il-kummerċjalizzazzjoni, li huwa attribwibbli għall-assi intanġibbli ta' ajruport. L-ispejjeż tal-kummerċjalizzazzjoni jiġu ttrattati bħala nfiq kapitali f'assi intanġibbli, u mbagħad jiġu deprezzati għat-tul ta' żmien tal-kuntratt, billi jittieħed f'kunsiderazzjoni l-valur residwu fit-terminazzjoni prevista tal-ftehim dwar is-servizzi pprovduti fl-ajruporti. Dan l-approċċ ma jikkunsidrax il-profitti inkrementali li ġġib magħha l-konklużjoni tal-ftehim dwar is-servizzi pprovduti fl-ajruporti ma' Ryanair u barra minn hekk huwa wkoll diffiċli li jiġi kkalkulat il-valur tal-assi intanġibbli minħabba l-ispejjeż tal-marka kummerċjali u l-perjodu ta' żmien tal-użu tal-assi. Skont ir-rapporti, il-metodu tal-fluss tal-flus huwa wkoll aktar xieraq minn approċċ ta' kapitalizzazzjoni minħabba li dan tal-aħħar ma jaqbadx il-benefiċċji pożittivi li mistenni jiżviluppaw għall-ajruport bħala riżultat tal-iffirmar tal-ftehim dwar is-servizzi pprovduti fl-ajruporti ma' Ryanair.

(242)

Ryanair ippreżentat rapport ieħor imħejji minn Oxera dwar il-ftehimiet bejn l-ajruport ta' Frankfurt Hahn u Ryanair tal-1999, tal-2002 u tal-2005. Il-valutazzjoni tal-ftehim ma' Ryanair tal-2005 tqis ukoll il-ftehim ta' kummerċjalizzazzjoni li ġie konkluż direttament ma' Land Rhineland-Palatinate. Il-valutazzjoni tal-ftehimiet ma' Ryanair li saret minn Oxera hija bbażata fuq l-informazzjoni disponibbli għall-ajruport madwar iż-żmien tal-iffirmar tal-ftehim.

(243)

Skont ir-rapport, l-analiżi tal-ftehim ma' Ryanair tal-1999 kienet ibbażata fuq id-dokument tal-pjan tan-negozju prodott mill-FFHG fil-25 ta' Mejju 1999, dokument li ġie mħejji qabel l-iffirmar tal-ftehim. Ir-rapport jgħid li d-dħul minn servizzi ajrunawtiċi ġie kkalkulat abbażi tal-imposti speċifikati fil-ftehim ma' Ryanair tal-1999. L-istimi tal-ispejjeż operattivi inkrementali kienu bbażati fuq l-istimi proprji tal-FFHG. Ir-rapport jindika li l-ispejjeż tat-tifi tan-nar, li normalment jitqiesu li jaqgħu taħt ir-responsabbiltà pubblika, ma kinux ittieħdu inkunsiderazzjoni. L-istess japplika għall-investimenti fl-infrastruttura.

Tabella 16

Valutazzjoni tal-profittabbiltà inkrementali tal-ftehim ma' Ryanair tal-1999 li saret minn Oxera  (40)

(…)

(244)

Ir-rapport jispjega li l-previżjonijiet tal-għadd totali ta' passiġġieri nkisbu mill-pjan tan-negozju tal-FFHG li ġie mfassal f'Novembru 2002, peress li huwa l-uniku dokument disponibbli li fih previżjonijiet dwar it-traffiku matul il-perjodu rilevanti. Skont ir-rapport, id-dħul minn servizzi ajrunawtiċi ġie kkalkulat abbażi tal-imposti speċifikati fil-ftehim ma' Ryanair tal-2002. Id-dħul minn attivitajiet mhux ajrunawtiċi nkiseb mill-pjan tan-negozju tal-FFHG li ġie mfassal f'Novembru 2002, peress li huwa l-uniku dokument li fih projezzjonijiet dwar id-dħul minn servizzi mhux ajrunawtiċi li kien ġie mfassal madwar iż-żmien tal-ftehim ma' Ryanair tal-2002.

(245)

L-istimi tal-ispejjeż operattivi għal kull passiġġier ġew ibbażati fuq l-analiżi proprja tal-FFHG dwar l-ispejjeż operattivi inkrementali għal kull passiġġier tar-Ryanair li jitlaq. L-iskeda ta' investimenti ġiet imfassla f'Novembru 2000.

Tabella 17

Valutazzjoni tal-profittabbiltà inkrementali tal-ftehim ma' Ryanair tal-1999 li saret minn Oxera  (41)

(…)

(246)

Lufthansa u l-Bundesverband der Deutschen Fluggesellschaften e.V. (Assoċjazzjoni Federali tat-Trasportaturi tal-Ajru Ġermaniżi, minn hawn 'il quddiem: il-BDF) ippreżentaw informazzjoni komprensiva u kummenti dwar id-deċiżjoni tal-ftuħ tal-2008 li se jiġu ppreżentati fil-qosor hawn taħt.

(247)

Il-Lufthansa u l-BDF qalu li t-telf tal-FFHG u tal-predeċessuri tagħha mill-1998 u sal-2009 ilaħħaq l-EUR 161 miljun u li l-FFHG, għall-kuntrarju ta' dak li tiddikjara, lanqas fl-2006 ma laħqet EBITDA pożittiv. F'dan ir-rigward, Lufthansa u l-BDF jsostnu li l-EBITDA kemxejn pożittiv kien possibbli biss wara r-rilaxx ta' obbligazzjonijiet legati, li naqqas it-telf operattiv. Għalhekk, Lufthansa u l-BDF jissuġġerixxu li l-Kummissjoni għandha tfittex li tikseb aċċess għall-karti tal-bilanċ annwali kollha tal-FFHG. F'dan ir-rigward Lufthansa argumentat, li b'kuntrast ma' dak li qalet il-Ġermanja, id-deprezzament tal-investimenti ma żdiedx ħafna matul is-snin u ma jistax jitqies għoli ħafna meta mqabbel mal-ispejjeż relatati mal-appoġġ għall-kummerċjalizzazzjoni għal Ryanair li huma inklużi fi “spejjeż operattivi oħra”, kif qiegħed jintwera fit-Tabella 18. Lufthansa u l-BDF jissuġġerixxu wkoll li l-Kummissjoni għandha titlob il-karti tal-bilanċ annwali kollha mhux ippubblikati tal-FFHG.

Tabella 18

Relazzjoni tad-deprezzament u spejjeż operattivi oħra

(248)

Lufthansa u l-BDF sostnew ukoll li studju li ġie ppreżentat mill-Ġermanja li fih statistika dwar l-effetti tal-FFHG fuq it-turiżmu f'Hunsrück u fil-Land Rhineland-Palatinate ma għandux jittieħed inkunsiderazzjoni peress li ċ-ċifri dwar it-tkabbir fir-rigward tal-passiġġieri u t-tkabbir fir-rigward tal-impjiegi fl-ajruport kienu ngħataw mill-FFHG u l-awturi tal-istudju baqgħu ma vverifikawhomx. Barra minn hekk, Lufthansa u l-BDF sostnew li anke meta kien sar l-istudju, kien magħruf li ċ-ċifri ma kinux realistiċi.

(249)

Barra minn hekk, Lufthansa u l-BDF sostnew li l-FFHG ma kellhiex mudell ċar tan-negozju, li jista' jintwera mit-tibdil li sar fil-pjanijiet għal żidiet fl-ajruport, bħal ċentri kummerċjali jew postijiet għal eskursjonijiet, li ma kellhom xejn x'jaqsmu mal-operat tal-ajruport. Barra minn hekk, skont Lufthansa u l-BDF, id-dikjarazzjonijiet kontradittorji mill-FFHG li l-ajruport ta' Frankfurt Hahn l-ewwel kellu jkun profittabbli sal-2005, imbagħad sal-2008 u mbagħad sal-2013, kollha jindikaw li ma kien qiegħed jiġi segwit l-ebda pjan konsistenti tan-negozju. Għalhekk, anke l-aħħar pronjosi li saret, jiġifieri li l-ajruport ta' Frankfurt Hahn kien se jsir profittabbli mill-2016 'il quddiem, tidher dubjuża u apparentement din il-pronjosi kienet ibbażata wkoll fuq is-suppożizzjoni li kienu se jsiru investimenti sostanzjali ulterjuri. Madankollu, skont Lufthansa u l-BDF l-oriġini ta' dawn l-investimenti bl-ebda mod ma huwa ċar.

(250)

Barra minn hekk, Lufthansa u l-BDF qalu li, b'kuntrast ma' dak li qed tiddikjara l-Ġermanja, PwC ma pprovdietx MEOT xieraq peress li l-valutazzjoni tagħha ma tieħux inkunsiderazzjoni l-każistika tal-Qorti tal-Ġustizzja dwar mill-inqas żewġ punti.

(251)

L-ewwel nett, Lufthansa u l-BDF semmew l-argumentazzjoni tal-Ġermanja li t-telf akkumulat tal-FFHG jista' jiġi kkumpensat minn Fraport bħala l-azzjonist tagħha. F'dan ir-rigward, Lufthansa u l-BDF argumentaw li mhuwiex importanti jekk it-telf jistax jiġi kkumpensat fi ħdan grupp ta' kumpaniji, iżda jekk il-miżuri individwali meħuda bħala tali humiex miżuri li investitur f'ekonomija tas-suq kienx jadotta wkoll (jew le) u li għalhekk din l-argumentazzjoni ma kinitx aċċettabbli.

(252)

It-tieni nett, Lufthansa u l-BDF sostnew li l-argumentazzjoni fil-valutazzjoni minn PwC ma kinitx biżżejjed biex tipprova li investitur f'ekonomija tas-suq kien jieħu l-istess deċiżjoni peress li, pereżempju fir-rigward tal-kuntratt ma' Ryanair tal-1999, PwC kienet argumentat li seta' jinkiseb tnaqqis tat-telf billi jiżdied il-volum ta' passiġġieri. Lufthansa u l-BDF irreferew għall-kawża WestLB, skont liema investitur f'ekonomija tas-suq normalment “ifittex li jikseb ir-redditu massimu raġonevoli fuq l-investiment tiegħu, skont iċ-ċirkostanzi partikolari u li jiġu ssodisfati l-interessi fuq perjodu qasir, medju u fit-tul tiegħu, anki meta jkun qiegħed jinvesti f'impriża li tagħha jkun diġà azzjonista” (42). Lufthansa u l-BDF argumentaw li għalhekk tnaqqis fit-telf ma jkunx biżżejjed sabiex miżura tgħaddi mill-MEOT u għalhekk f'dan ir-rigward PwC kienet diġà injorat il-każistika tal-Qorti tal-Ġustizzja. Barra minn hekk, Lufthansa u l-BDG enfasizzaw li l-valutazzjoni ppreżentata f'isem l-FFHG ma kinitx tinkludi MEOT propju peress li kienet tirreferi biss għat-test li sar minn PwC.

(253)

Barra minn hekk, Lufthansa u l-BDF ikkontestaw l-argument magħmul minn PwC fir-rigward taż-żidiet fil-kapital li perjodi twal ta' ippjanar ta' aktar minn 30 sena u amortizzazzjoni ta' investimenti ta' aktar minn 20 sena huma prattika normali tan-negozju għal investimenti infrastrutturali (ara l-premessa 103 tad-deċiżjoni tal-ftuħ tal-2008). F'dan ir-rigward, Lufthansa u l-BDF sostnew li t-tqabbil li PwC għamlet ma' kuntratti ta' konċessjoni fl-ajruport ta' Budapest, fl-ajruporti Da Vinci u Campiano, fl-ajruport ta' Sparta u fl-ajruport tal-Belt ta' Belfast kienu kompletament indifendibbli peress li l-ebda ajruport ma kellu sitwazzjoni anke remotament komparabbli mas-sitwazzjoni tal-FFHG u l-ajruport ta' Frankfurt Hahn. Lufthansa u l-BDF argumentaw li b'differenza mill-ajruporti kollha msemmija minn PwC, Frankfurt Hahn kien ajruport militari u kien biss fl-1999 li fil-biċċa l-kbira beda jintuża għall-użu ċivili u mbagħad kien appoġġjat minn żviluppi infrastrutturali li kienu eżatt skont il-ħtiġijiet ta' Ryanair. Skont Lufthansa u l-BDF, din hija r-raġuni għaliex l-analiżi tal-ekwilibriju mhijiex preċiża peress li l-ispejjeż għat-terminal ma kinux ittieħdu inkunsiderazzjoni.

(254)

Abbażi tad-deċiżjoni tal-ftuħ tal-2008 Lufthansa u l-BDF argumentaw ukoll li l-kumpens żejjed għat-tariffi tas-sigurtà kien jikkostitwixxi biċ-ċar għajnuna mill-Istat. F'dan ir-rigward Lufthansa u l-BDF argumentaw li, l-ewwel nett, il-kontrolli tas-sigurtà ma kinux ġew akkwistati b'mod pubbliku. Skont Lufthansa u l-BDF, ir-regoli dwar l-akkwist pubbliku ma kinux ġew segwiti u għalhekk, awtomatikament, is-servizz ma kienx inkiseb bl-aktar prezz vantaġġuż. It-tieni nett, Lufthansa u l-BDF argumentaw li, skont il-liġi Ġermaniża, dawn it-tariffi tas-sigurtà għandhom ikunu orjentati lejn l-ispejjeż attwali u neċessarji. Madankollu, Lufthansa u l-BDF enfasizzaw li bejn l-2003 u l-2008 it-tariffi fl-ajruport ta' Frankfurt Hahn kienu baqgħu fl-istess livell, filwaqt li f'ajruporti oħra setgħu jiġu osservati varjazzjonijiet fit-traffiku.

(255)

B'kuntrast mal-kummenti mill-Ġermanja dwar il-valutazzjoni legali, Lufthansa u l-BDF kienu tal-fehma li l-għajnuna mogħtija minn Fraport lill-FFHG kienet oriġinat minn riżorsi tal-Istat. Skont Lufthansa u l-BDF, fil-karti tal-bilanċ annwali kollha tagħha bejn l-2001 u l-2006 Fraport kienet espressament ammettiet li minħabba ftehim ta' konsorzju bejn l-azzjonisti pubbliċi, hija “impriża pubblika dipendenti”. F'dan ir-rigward, Lufthansa u l-BDF isostnu li skont is-sentenza fil-kawża Stardust Marine  (43) u l-Artikolu 2(1)(b) tad-Direttiva tal-Kummissjoni 2006/111/KE (44) hemm diversi indikazzjonijiet li juru li l-fondi ta' Fraport kienu riżorsi tal-Istat.

(256)

Barra minn hekk, Lufthansa u BDF jqisu li l-azzjonijiet ta' Fraport huma imputabbli wkoll lill-Istat. F'dan ir-rigward, Lufthansa u BDF irreferew għall-indikazzjonijiet ta' imputabbiltà bħall-fatt li l-laqgħa tal-azzjonisti tal-FFHG, jiġifieri l-Land Rhineland-Palatinate u Fraport, qablu dwar il-konklużjoni tal-ftehimiet ma' Ryanair. Barra minn hekk, Lufthansa u BDG sostnew li hemm relazzjoni temporali notevoli bejn it-tieni żieda fil-kapital u l-applikazzjoni għar-rikonoxximent ta' sistema ajruportwali komuni fl-2005. Skont Lufthansa u BDF, fi żmien ġimagħtejn l-azzjonisti tal-FFHG kienu ddeċidew dwar iż-żieda fil-kapital, li solviet id-diffikultajiet finanzjarji tal-FFHG, u l-applikazzjoni sussegwenti mill-Ġermanja għal ajruport komuni. Lufthansa u BDF għalhekk sostnew li l-azzjonisti pubbliċi għamlu din l-applikazzjoni possibbli permezz taż-żieda ġdida fil-kapital.

(257)

Barra minn hekk, Lufthansa u l-BDF sostnew li l-ebda investitur f'ekonomija tas-suq ma kien jiffinanzja l-FFHG u jinvesti fiha, minħabba li skont il-każistika tal-Qorti tal-Ġustizzja, investitur f'ekonomija tas-suq huwa dejjem orjentat lejn il-profitt. Sempliċi tnaqqis fit-telf mhuwiex biżżejjed biex jikkonvinċi lil investitur f'ekonomija tas-suq u kieku dan ma kienx iqis kunsiderazzjonijiet soċjali jew politiċi lokali.

(258)

Fl-aħħar nett, Lufthansa u l-BDF sostnew li skont il-Linji Gwida tal-Avjazzjoni tal-2005 kif ukoll skont il-Linji Gwida tal-Avjazzjoni tal-2014, l-għajnuna li ngħatat lill-FFHG għal infrastruttura ġdida, kif ukoll l-għajnuna li ngħatat lil Ryanair huma inkompatibbli mas-suq intern. F'dan ir-rigward, Lufthansa u l-BDF sostnew li f'dan il-każ ma kien hemm l-ebda konverżjoni ta' ajruport militari, peress li l-ajruport kien inbena 6 snin wara t-tmiem tal-użu militari. Barra minn hekk, huma sostnew li l-ajruport ta' Frankfurt Hahn ma kienx naqqas il-konġestjoni fl-ajruport ta' Frankfurt Main u speċjalment li kien dubjuż jekk l-ajruport kienx għen l-iżvilupp fir-reġjun u kienx ħoloq impjiegi hemmhekk. Skont Lufthansa u l-BDF, fi kwalunkwe każ dan l-argument ma jiġġustifikax l-għajnuna peress li l-ġenerazzjoni tal-impjiegi bdiet biss fl-1999, sitt snin wara li kien intemm l-użu militari tal-ajruport. Anki kieku wieħed kellu jaċċetta dan bħala ġustifikazzjoni, iċ-ċifri mogħtija mill-FFHG fl-istudji tagħha jkunu qegħdin jissopravalutaw l-effetti fuq l-ekonomija u fuq il-ħolqien tal-impjiegi.

(259)

Barra minn hekk, Lufthansa u l-BDF sostnew li r-ribassi mogħtija permezz tal-imposti ajruportwali għal għadd ta' passiġġieri ta' bejn 1 u 3 miljun jew aktar kienu diskriminatorji. Lufthansa u l-BDF argumentaw li Ryanair biss kienet eliġibbli għal dawn ir-ribassi peress li kienet l-unika linja tal-ajru li kienet qiegħda tiġġenera dak l-ammont ta' passiġġieri u l-ajruport ta' Frankfurt Hahn lanqas biss kellu l-kapaċità li jospita linja tal-ajru oħra li setgħet tipprovdi dan l-ammont ta' passiġġieri. Skont il-Lufthansa u l-BDF, l-għoti tal-appoġġ għall-kummerċjalizzazzjoni kien diskriminatorju wkoll peress li l-proporzjon tal-appoġġ għall-kummerċjalizzazzjoni jiddependi fuq l-għadd ta' passiġġieri li l-linja tal-ajru tkun diġà ġabet fl-ajruport u fuq l-għadd ta' destinazzjonijiet diġà offruti mil-linja tal-ajru fl-ajruport. Peress li dawn il-fatturi ma għandhom l-ebda relazzjoni mal-ammont ta' appoġġ għall-kummerċjalizzazzjoni għal destinazzjonijiet ġodda, din is-sistema se tipprovdi ammont ħafna ogħla ta' appoġġ għall-kummerċjalizzazzjoni lil Ryanair, li skont il-Lufthansa u l-BDF ma jistax jiġi ġustifikat.

(260)

Fir-rigward tal-għajnuna operatorja għall-ajruport, Lufthansa u l-BDF enfasizzaw li huwa ovvju li l-approċċ ta' ħlas wieħed li ġie applikat fl-ajruport ta' Frankfurt Hahn ma jaħdimx peress li b'mod ġenerali d-dħul ma jistax ikopri t-telf. Għalhekk, il-kumpens ta' dan it-telf permezz tal-finanzjament tal-FFHG jikkostitwixxi għajnuna operatorja.

(261)

Fir-rigward tal-għajnuna lil Ryanair, Lufthansa u l-BDF qalu li Ryanair irċeviet vantaġġi permezz tal-imposti ajruportwali u mill-ftehimiet mal-ajruport ta' Frankfurt Hahn. Lufthansa u l-BDF sostnew li l-ebda investitur f'ekonomija tas-suq ma kien jieħu dawn il-miżuri peress li huwa ovvju li l-ajruport ta' Frankfurt Hahn ma jistax jopera bi profitt fuq din il-bażi. Lufthansa u l-BDF sostnew li permezz tal-iskeda tal-imposti ajruportwali tal-2001 u tal-2006, Ryanair kienet ingħatat vantaġġ addizzjonali fil-forma ta' tnaqqis addizzjonali mogħti fir-rigward tal-volum totali ta' passiġġieri li jitilqu mal-linja tal-ajru.

(262)

Lufthansa u l-BDF argumentaw li, peress li Fraport għandha titqies bħala impriża pubblika, l-FFHG hija impriża ta' proprjetà pubblika u għalhekk ir-riżorsi tagħha għandhom jitqiesu bħala riżorsi tal-Istat. Skont il-Lufthansa u l-BDF, il-vantaġġi mogħtija mill-FFHG lil Ryanair huma imputabbli wkoll lill-Istat, peress li l-PLTA jinkludi wkoll ftehim ta' kontroll (“Beherrschungsvertrag”) u l-azzjonisti pubbliċi jistgħu jaffettwaw l-imġiba tal-FFHG. F'dan ir-rigward, il-Lufthansa u l-BDF argumentaw li għandu jittieħed inkunsiderazzjoni wkoll li l-maniġer tal-FFHG huwa dejjem impjegat ta' Fraport.

(263)

Lufthansa u l-BDF argumentaw li l-ebda għajnuna lil Ryanair ma hija kompatibbli mas-suq intern. Il-ftehimiet ma' Ryanair u l-iskeda tal-imposti ajruportwali tal-2001 għandhom jiġu vvalutati direttament skont l-Artikolu 107(3)(c) tat-Trattat. F'dan ir-rigward, id-deċiżjoni tal-Kummissjoni f'Chareloi  (45) għandha tittieħed ukoll inkunsiderazzjoni. Fuq din il-bażi Lufthansa u l-BDF iddikjaraw li l-għajnuna lil Ryanair ma setgħetx tiġi ġġustifikata peress li kienet parzjalment tikkostitwixxi għajnuna operatorja, li ma tistax tiġi affattu ġustifikata, u parzjalment għajnuna tal-bidu, li ma kienet issegwi l-ebda għan leġittimu u ma kinitx ingħatat b'mod trasparenti u mhux diskriminatorju. Barra minn hekk, Lufthansa u l-BDF qalu li l-iskeda tal-imposti ajruportwali tal-2006 mhijiex kompatibbli mal-Linji Gwida tal-Avjazzjoni tal-2005, peress li l-kundizzjonijiet għall-kompatibbiltà fil-punt 79 tal-linji gwida ma ġewx issodisfati fir-rigward tal-appoġġ għall-kummerċjalizzazzjoni u l-għajnuna operatorja mogħtija permezz tat-tariffi tal-passiġġieri. Il-Lufthansa u l-BDF spjegaw li dan huwa minħabba li l-appoġġ għall-kummerċjalizzazzjoni huwa diskriminatorju, u li t-tariffi tal-passiġġieri ma għandhomx żmien limitat u ma għandhom l-ebda effett ta' inċentiv. Barra minn hekk, skont Lufthansa u l-BDF l-għajnuna kollha li ngħatat lil Ryanair hija ta' natura kumulattiva u għalhekk mhijiex konformi mal-kundizzjonijiet ta' kompatibbiltà. Għalhekk, fil-fehma tagħhom, għandha titqies bħala inkompatibbli mas-suq intern.

(264)

L-AEA qalet li l-fatt li l-FFHG ilha tagħmel telf minn mindu fetħet u li d-data mħabbra għall-punt ta' ekwilibriju kontinwament tiġi posposta turi li l-mudell kummerċjali huwa xejn ħlief dubjuż u li hemm nuqqas ta' rispett sfaċċat tal-prinċipju tal-investitur f'ekonomija tas-suq.

(265)

Dwar l-għajnuna possibbli lil Ryanair, l-AEA kienet tal-fehma li din l-għajnuna kellha effetti negattivi għal-linji tal-ajru li jikkompetu u li l-ftehimiet ma' Ryanair kienu jikkostitwixxu miżuri diskriminatorji. Skont l-AEA, dawn il-ftehimiet huma diskriminatorji peress li l-konklużjoni tagħhom taħbat mal-bidu tal-użu kummerċjali tal-ajruport, li jfisser li l-ajruport kien ġie magħmul apposta għall-bżonnijiet ta' Ryanair.

(266)

Air France rrimarkat b'mod ġenerali li tappoġġa bis-sħiħ l-azzjoni tal-Kummissjoni fi kwistjonijiet ta' għajnuna mill-Istat fis-settur tal-avjazzjoni. B'mod aktar speċifiku fir-rigward tas-sitwazzjoni fl-ajruport ta' Frankfurt Hahn, Air France qablet mal-valutazzjoni preliminari tal-Kummissjoni li l-miżuri favur l-FFHG u Ryanair kienu jikkostitwixxu għajnuna mill-Istat. B'mod partikolari Air France temmen li t-tliet ftehimiet kummerċjali ma' Ryanair jikkostitwixxu miżura diskriminatorja ċara peress li l-ebda linja oħra tal-ajru li topera fl-istess sistema ajruportwali qatt ma ġiet offruta l-istess kundizzjonijiet. Għalhekk, Air France kkonkludiet li inevitabbilment dawn il-miżuri kienu qegħdin jikkontribwixxu għal tfixkil sinifikanti tal-kompetizzjoni bejn it-trasportaturi fl-UE fis-suq intern.

(267)

Lufthansa qalet li l-ftehimiet ma' Ryanair tal-1999, tal-2002 u tal-2005 jikkostitwixxu għajnuna inkompatibbli mill-Istat u tipprovdi aktar kummenti dwar il-ftehimiet rispettivi.

(268)

Fir-rigward tal-ftehim ma' Ryanair tal-1999, Lufthansa rrilevat li meta jiġi applikat l-MEOT għandu jittieħed kont sħiħ tal-ispejjeż għat-Terminal 1 fl-ajruport. Sabiex tappoġġja dan, Lufthansa tirreferi għad-dikjarazzjoni ta' Ryanair f'seduta parlamentari. Skont Lufthansa, Ryanair kienet iddikjarat li l-ajruport kien inbena għalihom. Lufthansa kkontestat li proporzjon tal-ispiża tat-terminal seta' jiġi attribwit ukoll lil linji tal-ajru oħra.

(269)

Fil-fehma ta' Lufthansa, l-MEOT li sar minn PwC għall-ftehim ma' Ryanair tal-2002 jissottovaluta l-ispejjeż ta' kummerċjalizzazzjoni għall-ftuħ ta' rotot ġodda fl-2002. Skont il-Lufthansa kien pubblikament magħruf li fl-2002 kienu se jinfetħu mill-inqas 7 rotot ġodda. Għalhekk, Lufthansa qalet li l-appoġġ għall-kummerċjalizzazzjoni kien ġie sottovalutat b'minn tal-inqas EUR […] fl-2002.

(270)

Fir-rigward tal-ftehim ma' Ryanair tal-2005, Lufthansa qalet li l-previżjonijiet dwar il-volum ta' passiġġieri li fuqhom kien ibbażat l-MEOT tal-ftehim ma' Ryanair tal-2005 jidhru li kienu sopravalutati. Lufthansa qalet li fl-agħar każ l-ajruport kien qiegħed jistenna li bejn l-2006 u l-2012 Ryanair kienet se ġġib 3 miljun passiġġier. Madankollu, skont Lufthansa dawn l-aspettattivi ma kinux ibbażati fuq impenn reali min-naħa ta' Ryanair.

(271)

Barra minn hekk, Lufthansa qalet li fl-2005 Land Rheinland-Palatinate u Ryanair ikkonkludew ftehim ta' kummerċjalizzazzjoni li mhuwiex parti mid-deċiżjoni tal-ftuħ tal-2008. (46) Skont Lufthansa, il-ftehim jagħti lil Ryanair appoġġ għall-kummerċjalizzazzjoni ta' mill-inqas EUR […] miljun fis-sena.

(272)

Fir-rigward tal-għajnuna lill-ajruport għall-finanzjament tal-infrastruttura, Lufthansa hija tal-fehma li l-infrastruttura hija ddedikata lil Ryanair u għalhekk il-kriterji ta' kompatibbiltà fil-linji gwida ma japplikawx.

(273)

Din l-organizzazzjoni mhux governattiva għamlet kummenti li fihom ikkritikat il-Linji Gwida tal-Avjazzjoni tal-2014 u d-deċiżjonijiet tal-Kummissjoni fir-rigward tal-industrija tal-avjazzjoni sa issa, għall-effetti allegatament negattivi tagħhom fuq l-ambjent.

(274)

Dwar il-kummenti minn Ryanair, il-Ġermanja qalet li dawn jappoġġjaw b'mod komprensiv l-osservazzjonijiet tagħha u ssupplimentat dawn min-naħa tal-linja tal-ajru. Skont il-Ġermanja, il-kummenti ta' Ryanair jenfasizzaw speċjalment li l-kuntratti ma' Ryanair huma l-istess li kieku kien jikkonkludi investitur f'ekonomija tas-suq u li fil-fatt ħafna ajruporti Ewropej oħra kkonkludew ftehimiet simili ma' Ryanair.

(275)

Barra minn hekk, il-Ġermanja enfasizzat li skont Ryanair l-imposti ajruportwali stabbiliti mill-FFHG kienu assolutament normali fis-settur tat-trasportaturi bi prezzijiet irħas u ma kinux speċjalment vantaġġużi għal Ryanair.

(276)

Dwar il-kummenti minn Lufthansa, il-Ġermanja ċaħdet l-argument li r-riżultati tal-istudju ppreżentat dwar l-effetti tal-ajruport ta' Frankfurt Hahn fuq l-ekonomija reġjonali u fuq l-għadd ta' impjiegi li nħolqu huma dubjużi u minflok enfasizzat li l-istudju huwa bbażat fuq ir-riċerka ekonomika b'bażi soda li saret mill-awturi esperti. Il-Ġermanja rrilevat li naturalment iċ-ċifri fl-istudju huma previżjoni u mhux neċessarjament dejjem se jikkorrispondu maċ-ċifri realizzati fil-verità, speċjalment fil-kuntest tal-kriżi ekonomika dinjija. Skont il-Ġermanja, il-previżjoni kienet realistika fil-mument tal-pubblikazzjoni u wasslet biex, minn perspettiva ex ante, PwC tikkonkludi li l-FFHG kienet aġixxiet bħala investitur f'ekonomija tas-suq.

(277)

Il-Ġermanja ċaħdet ukoll id-dubji ta' Lufthansa u tal-BDF li l-ajruport ta' Frankfurt Hahn ma kienx se jilħaq il-profittabbiltà. Il-Ġermanja qalet li l-previżjoni dwar meta se tinkiseb il-profittabbiltà jista' jkun li jkollha tiġi adattata minħabba diversi fatturi, bħad-deċiżjonijiet dwar l-investimenti u l-espansjoni tal-impriża. Fi kwalunkwe każ, PwC ippreżentat valutazzjonijiet affidabbli li juru li l-miżuri kollha taħt investigazzjoni kienu ekonomikament raġonevoli.

(278)

Skont il-Ġermanja, id-dikjarazzjoni minn Lufthansa u mill-BDF li ma teżisti l-ebda ġustifikazzjoni reali għall-MEOT hija għalhekk bla bażi, speċjalment peress li Lufthansa ma kellhiex aċċess għall-MEOT ta' PwC.

(279)

Dwar iż-żidiet fil-kapital, il-Ġermanja qalet li l-ajruport ta' Frankfurt Hahn ma kienx ingħalaq; pjuttost, l-ajruport ilu mill-1993 jintuża għall-avjazzjoni ċivili u sa dak il-waqt tal-involviment ta' Fraport. Il-Ġermanja tispjega li għalhekk l-ajruport ta' Frankfurt Hahn ma kienx proġett biex Ryanair tingħata ajruport, kif allegat Lufthansa, iżda kien iddisinjat bħala ajruport low-cost biex jintuża skont kundizzjonijiet ugwali u mhux diskriminatorji minn kwalunkwe linja tal-ajru. Skont il-Ġermanja huwa normali li ċerti linji tal-ajru jużaw ċerti ajruporti aktar minn oħrajn. Fil-fatt, Lufthansa stess għandha pereżempju terminal esklussiv fl-ajruport ta' Munich.

(280)

Barra minn hekk, il-Ġermanja qalet li ma kien hemm l-ebda diskriminazzjoni fir-rigward tal-iskema ta' appoġġ għall-kummerċjalizzazzjoni. Il-livelli ta' appoġġ għall-kummerċjalizzazzjoni mogħtija kienu ġew stabbiliti b'mod raġonevoli u mhux diskriminatorju. Il-ħlas tal-appoġġ għall-kummerċjalizzazzjoni f'pagamenti, kif ikkritikat minn Lufthansa u mill-BDF, serva biss biex jiġu minimizzati r-riskji fil-każ li rotta terġa' tingħalaq ftit wara li tkun infetħet. Il-Ġermanja argumentat li dan il-periklu ma kienx ikun preżenti bl-istess mod li kieku linja tal-ajru kienet diġà preżenti fl-ajruport ta' Frankfurt Hahn u kienet diġà sservi aktar minn miljun passiġġier. Barra minn hekk, skont il-Ġermanja, Ryanair ma rċeviet l-ebda appoġġ sigriet jew mhux iġġustifikat għall-kummerċjalizzazzjoni mingħand l-FFHG.

(281)

Fir-rigward tal-kwistjoni dwar jekk kienx hemm xi għajnuna li kienet ġejja minn riżorsi tal-Istat, il-Ġermanja argumentat li b'kuntrast ma' dak allegat minn Lufthansa u mill-BDF, ma setgħet tinġibed l-ebda konklużjoni mill-karti tal-bilanċ annwali ta' Fraport li fihom l-impriża ddikjarat li hija “impriża pubblika dipendenti”. Din id-dikjarazzjoni sempliċiment ġiet inkluża fir-rapport finanzjarju annwali sabiex tiġi ppreżentata r-relazzjoni lill-impriżi u lill-persuni qrib Fraport, iżda ma għandha l-ebda implikazzjoni għall-valutazzjoni dwar l-għajnuna mill-Istat. Fi kwalunkwe każ, minn din l-applikazzjoni ma tista' tiġi dderivata l-ebda imputabbiltà għaż-żidiet fil-kapital lill-Istat.

(282)

Fir-rigward tal-kwistjoni dwar jekk l-għajnuna mogħtija lill-FFHG tkunx kompatibbli mas-suq intern, il-Ġermanja qalet li l-argument ta' Lufthansa u tal-BDF li użu ċivili beda sempliċiment sitt snin wara t-terminazzjoni tal-użu militari ma jkunx korrett u huwa wkoll irrilevanti. L-użu ċivili kien beda direttament fl-1993 u l-infrastruttura għall-użu ċivili kienet diġà hemm. L-espansjoni tal-infrastruttura sabiex l-ajruport ikun lest għat-traffiku kummerċjali tal-passiġġieri kienet inevitabbli.

(283)

Il-Ġermanja ċaħdet l-argument ta' Lufthansa u tal-BDF li ajruport ta' Frankfurt Hahn ma kienx għen biex titnaqqas il-konġestjoni fl-ajruport ta' Frankfurt Main u enfasizzat li Lufthansa u l-BDF ma kinux issostanzjaw l-allegazzjoni tagħhom b'xi evidenza.

(284)

B'mod speċjali, il-Ġermanja opponiet l-argument ta' Lufthansa u tal-BDF li ma kienx ċar jekk l-ajruport ta' Frankfurt Hahn kienx iġġenera għadd kbir ta' impjiegi. F'dan ir-rigward il-Ġermanja argumentat li ma jistax jiġi ddubitat li l-ajruport ta' Frankfurt Hahn kellu influwenza konsiderevoli fuq l-iżvilupp ekonomiku u soċjali tar-reġjun strutturalment dgħajjef madwaru.

(285)

Barra minn hekk, il-Ġermanja ċaħdet l-allegati effetti diskriminatorji tat-tariffi fuq il-passiġġieri u tal-appoġġ għall-kummerċjalizzazzjoni min-naħa ta' Lufthansa u mill-BDF. Il-Ġermanja kienet żgurat li dawn kienu ġew stabbiliti abbażi ta' konsiderazzjonijiet u kalkoli ekonomiċi u kienu disponibbli għal-linji tal-ajru b'mod uniformi u mhux diskriminatorju.

(286)

Fl-aħħar nett il-Ġermanja ċaħdet id-dubji mqajma minn Lufthansa u mill-BDF fir-rigward tal-approċċ ta' ħlas wieħed fl-ajruport ta' Frankfurt Hahn. Il-Ġermanja qalet li kif intwera mill-MEOT li sar minn PwC, dan l-approċċ kien ekonomikament ġustifikat, u li kieku t-tariffi fuq il-passiġġieri kienu jkunu tant għoljin biex mill-bidu jiġi garantit operat profittabbli tal-ajruport, ma kienx ikun possibbli li jiġu attirati linji tal-ajru lejn l-ajruport ta' Frankfurt Hahn.

(287)

Dwar id-dikjarazzjonijiet li Lufthansa u l-BDF ippreżentaw fir-rigward tal-għajnuna mogħtija lil Ryanair permezz tal-ftehimiet ma' Ryanair tal-1999, tal-2002 u tal-2005, il-Ġermanja rreferiet għall-MEOTs dettaljati li saru minn PwC u ddikjarat li dawn il-ftehimiet ma jistgħux jikkostitwixxu għajnuna mill-Istat peress li huma konformi mal-prinċipju tal-investitur f'ekonomija tas-suq. Skont il-Ġermanja, il-kalkoli ppreżentati minn Lufthansa u mill-BDF huma implawsibbli u huma bbażati fuq ċifri żbaljati dwar il-passiġġieri. Għal darb'oħra l-Ġermanja enfasizzat li ma kienx possibbli li ajruport bħal Frankfurt Hahn jiġi operat bi profitt mill-bidu nett, iżda biss fuq perjodu medju sa fit-tul.

(288)

Il-Ġermanja qalet ukoll li d-dubji mqajma minn Lufthansa u mill-BDF fir-rigward tal-kwistjoni dwar jekk l-għajnuna lil Ryanair tistax tkun ġustifikata kienu infondati. Barra minn hekk il-Ġermanja argumentat li anke kieku l-appoġġ għall-kummerċjalizzazzjoni kien jikkostitwixxi vantaġġ għal Ryanair, li ma kienx, skont il-Ġermanja, anki f'dak il-każ dik l-għajnuna kienet tkun kompatibbli mas-suq intern abbażi tal-kriterji stabbiliti fil-premessa 79 tal-Linji Gwida tal-Avjazzjoni tal-2005.

(289)

Dwar il-kummenti mill-AEA l-Ġermanja indikat li dawn ma kienu sostanzjati bl-ebda evidenza. Barra minn hekk, il-Ġermanja argumentat li anki jekk, kif iddikjarat l-AEA, kien hemm effetti negattivi għall-ajruporti li jikkompetu, allura dawn l-ajruporti ma kinux ilmentaw dwar dan u saħansitra lanqas ma kkummentaw dwar id-deċiżjoni tal-ftuħ tal-2008.

(290)

Permezz tal-Artikolu 107(1) tat-Trattat “… kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal tfixkil jew theddida ta' tfixkil għall-kompetizzjoni billi tiffavorixxi lil ċerti impriżi jew il-produzzjoni ta' ċerti prodotti għandha, safejn taffettwa l-kummerċ bejn l-Istati Membri, tkun inkompatibbli mas-suq intern.”

(291)

Il-kriterji stipulati fl-Artikolu 107(1) tat-Trattat huma kumulattivi. Għalhekk, sabiex jiġi stabbilit jekk il-miżura inkwistjoni tikkostitwixxix għajnuna fis-sens tal-Artikolu 107(1) tat-Trattat, jeħtieġ li jiġu ssodisfati l-kundizzjonijiet kollha li ġejjin. Dan ifisser li l-appoġġ finanzjarju għandu:

(292)

Il-Ġermanja ssostni li l-PLTA tal-2001 daħal fis-seħħ qabel il-finanzjament pubbliku tal-ajruporti kien meqjus li jikkostitwixxi għajnuna mill-Istat u baqa' l-istess sakemm ġie sostitwit mill-PLTA tal-2004.

(293)

Għalhekk, il-Kummissjoni għandha l-ewwel tistabbilixxi jekk ir-regoli dwar l-għajnuna mill-Istat kinux applikabbli għall-PLTA tal-2001 fiż-żmien meta ġie konkluż. F'dak il-kuntest, il-Kummissjoni tfakkar li miżura ta' għajnuna tikkostitwixxi għajnuna eżistenti skont l-Artikolu 1(b)(v) tar-Regolament (KE) Nru 659/1999 fejn jista' jiġi stabbilit li fiż-żmien meta ddaħħlet fis-seħħ il-miżura ta' għajnuna, hija ma kinitx tikkostitwixxi għajnuna mill-Istat u, sussegwentement saret għajnuna minħabba l-evoluzzjoni tas-suq komuni u mingħajr ma nbidlet mill-Istat Membru.

(294)

Tabilħaqq, fil-passat, l-iżvilupp tal-ajruporti kien spiss determinat minn kunsiderazzjonijiet purament territorjali jew, f'xi każijiet, minn rekwiżiti militari. L-operat tal-ajruporti kien organizzat bħala parti mill-amministrazzjoni aktar milli bħala impriża kummerċjali. Il-kompetizzjoni bejn l-ajruporti u l-operaturi tal-ajruporti kienet limitata wkoll u żviluppat gradwalment. Meta wieħed iqis dawk il-kundizzjonijiet, għal xi żmien il-Kummissjoni kienet tqis il-finanzjament mill-Istat tal-ajruporti u tal-infrastruttura ta' ajruport bħala miżura ġenerali ta' politika ekonomika li ma setgħetx tiġi kkontrollata skont ir-regoli dwar l-għajnuna mill-Istat tat-Trattat.

(295)

Madankollu, l-ambjent tas-suq inbidel. Fis-sentenza Aéroports de Paris, il-Qorti Ġenerali qalet li l-operat ta' ajruport, li jinkludi l-forniment ta' servizzi fl-ajruport lil-linji tal-ajru u lid-diversi fornituri tas-servizz fl-ajruporti, jikkostitwixxi attività ekonomika. (47) Konsegwentement, mill-adozzjoni tal-imsemmija sentenza (it-12 ta' Diċembru 2000) ma għadux aktar possibbli li l-operat u l-bini ta' ajruporti jitqiesu bħala kompitu li jitwettaq mill-amministrazzjoni taħt ir-responsabbiltà pubblika, barra mill-ambitu ta' kontroll tal-għajnuna mill-Istat.

(296)

Fis-sentenza tagħha Leipzig/Halle Airport, il-Qorti Ġenerali kkonfermat li a priori mhuwiex possibbli li tiġi eskluża l-applikazzjoni tar-regoli dwar l-għajnuna mill-Istat lill-ajruporti peress li l-operat ta' ajruport u l-bini tal-infrastruttura tal-ajruport huwa attività ekonomika. (48) Ladarba operatur ta' ajruport jinvolvi ruħu f'attivitajiet ekonomiċi, irrispettivament mill-istatus legali tiegħu jew mill-mod kif jiġi ffinanzjat, jikkostitwixxi impriża fis-sens tal-Artikolu 107(1) tat-Trattat u, għalhekk japplikaw ir-regoli tat-Trattat dwar l-għajnuna mill-Istat. (49)

(297)

L-FFHG kienet involuta fil-kostruzzjoni, fil-manutenzjoni u fl-operat tal-ajruport ta' Frankfurt Hahn. F'dan il-kuntest, offriet servizzi ajruportwali u ċċarġjat lill-utenti — operaturi tal-avjazzjoni kummerċjali kif ukoll utenti ġenerali tal-avjazzjoni mhux kummerċjali — għall-użu tal-infrastruttura tal-ajruport, u b'hekk sfruttat kummerċjalment l-infrastruttura. Għalhekk, għandu jiġi konkluż li l-FFHG ilha mid-data tas-sentenza Aéroports de Paris (jiġifieri mit-12 ta' Diċembru 2000) 'il quddiem involuta f'attività ekonomika.

(298)

Madankollu, fid-dawl tal-iżviluppi (kif stabbilit fil-premessi minn 294 sa 296) il-Kummissjoni tqis li, qabel is-sentenza tal-Qorti Ġenerali f'Aéroports de Paris, l-awtoritajiet pubbliċi setgħu leġittimament iqisu li l-miżuri ta' finanzjament fir-rigward ta' ajruporti ma kinux jikkostitwixxu għajnuna mill-Istat u għaldaqstant ma kellhomx bżonn jiġu nnotifikati lill-Kummissjoni. Għalhekk, il-Kummissjoni ma tistax tiddubita miżuri individwali ta' finanzjament (li ma kinux ingħataw abbażi ta' skema ta' għajnuna (50)) li kienu ġew adottati b'mod definittiv qabel is-sentenza f'Aéroports de Paris skont ir-regoli dwar l-għajnuna mill-Istat.

(299)

Għaldaqstant, il-Kummissjoni trid l-ewwel tivvaluta jekk il-PLTA tal-2001 kienx daħal fis-seħħ qabel is-sentenza f'Aéroports de Paris (it-12 ta' Diċembru 2000) u t-tieni jekk aktar tard dik il-miżura ġietx emendata.

(300)

Il-PLTA tal-2001 kien ġie miftiehem b'mod irrevokabbli fil-31 ta' Awwissu 1999 u ġie kkonfermat f'att notarili tal-24 ta' Novembru 2000. Għalhekk, il-Kummissjoni tqis li l-PLTA tal-2001 kien daħal fis-seħħ b'mod irrevokabbli qabel is-sentenza Aéroports de Paris. Barra minn hekk, il-PLTA tal-2001 baqa' l-istess sakemm ġie sostitwit mill-PLTA tal-2004.

(301)

Għalhekk, dak iż-żmien l-awtoritajiet pubbliċi setgħu leġittimament iqisu li PLTA biex jiġi kopert it-telf annwali tal-FFHG ma kienx jikkostitwixxi għajnuna mill-Istat.

(302)

Fid-dawl tal-kunsiderazzjonijiet fil-premessi 292 u dawk segwenti, il-Kummissjoni tikkonkludi li, fiż-żmien li ddaħħal fis-seħħ il-PLTA tal-2001, l-awtoritajiet pubbliċi setgħu leġittimament iqisu li PLTA biex jiġi kopert it-telf annwali tal-FFHG ma kienx jikkostitwixxi għajnuna mill-Istat.

(303)

Fl-2001, Fraport u Land Rhineland-Palatinate żiedu l-kapital tal-FFHG b'EUR 27 miljun. Fraport ikkontribwiet EUR 19,7 miljun; Land Rhineland-Palatinate kkontribwiet EUR 7,3 miljun. Iż-żieda fil-kapital ġiet l-ewwel approvata mill-bord superviżorju ta' Fraport (fir-rigward tal-kontribuzzjoni tagħha) fl-14 ta' Diċembru 2001 u sussegwentement b'riżoluzzjoni tal-azzjonisti tal-FFHG datata d-9 ta' Jannar 2002. (51). Iż-żieda fil-kapital minn Fraport u minn Land saret effettiva fid-9 ta' Jannar 2002.

(304)

Kif ġie analizzat fil-premessa 293 u dawk segwenti, mit-12 ta' Diċembru 2000, l-FFHG trid titqies bħala impriża li teżerċita attività ekonomika għall-fini tal-Artikolu 107(1) tat-Trattat.

(305)

Sabiex jikkostitwixxu għajnuna mill-Istat, il-miżuri inkwistjoni jridu jkunu ffinanzjati mir-riżorsi tal-Istat u d-deċiżjoni biex tingħata l-miżura għandha tkun imputabbli lill-Istat.

(306)

Il-kunċett ta' għajnuna mill-Istat japplika għal kull vantaġġ mogħti permezz ta' riżorsi tal-Istat mill-Istat innifsu jew minn xi korp intermedjarju li jaġixxi permezz ta' setgħat mogħtija lilu. (52) Għall-applikazzjoni tal-Artikolu 107(1) tat-Trattat, ir-riżorsi ta' awtoritajiet lokali huma riżorsi tal-Istat. (53) F'dak ir-rigward, hija prattika kostanti tal-Kummissjoni li tqis li irrispettivament minn jekk impriża pubblika hijiex tagħmel telf jew profitt, ir-riżorsi kollha tagħha għandhom jiġu kkunsidrati bħala riżorsi tal-Istat. (54)

(307)

Land Rhineland-Palatinate ffinanzjat is-sehem tagħha fiż-żieda fil-kapital tal-2001 direttament mill-baġit ġenerali tagħha. Għalhekk, jista' jiġi konkluż li din il-miżura hija ffinanzjata permezz ta' riżorsi tal-Istat u anke imputabbli lill-Istat.

(308)

Fl-opinjoni tal-Ġermanja, is-sehem ta' Fraport fiż-żieda fil-kapital tal-2001 ma jikkwalifikax bħala finanzjament minn riżorsi tal-Istat peress li dak iż-żmien Fraport kienet kumpanija inkorporata indipendenti taħt id-dritt privat ikkwotata fil-Borża u l-awtoritajiet pubbliċi ma kienu qegħdin jeżerċitaw l-ebda kontroll kontinwu fuq il-fondi tagħha.

(309)

Skont il-każistika, ir-riżorsi ta' impriża għandhom jitqiesu riżorsi tal-Istat jekk l-Istat ikun jista', billi jeżerċita kontroll fuq dawn l-impriżi, jidderieġi l-użu tar-riżorsi tagħhom. (55)

(310)

Il-Kummissjoni tqis li f'dan il-każ, f'kull ħin rilevanti l-Istat eżerċita kontroll dirett jew indirett fuq ir-riżorsi taħt kunsiderazzjoni. Il-Kummissjoni tinnota li, fil-mument tad-deċiżjoni irrevokabbli dwar iż-żieda fil-kapital tal-2001, Fraport kienet kumpanija fil-maġġoranza proprjetà pubblika. Qabel il-11 ta' Ġunju 2001, l-azzjonisti pubbliċi kienu jikkontrollaw 100 % tal-ishma ta' Fraport. (56) Fil-11 ta' Ġunju 2001, Fraport ġiet ikkwotata fil-Borża u 29,71 % tal-ishma tagħha nbiegħu lill-azzjonisti privati. Wara dan, Land Hesse kienet tikkontrolla 32,04 % tal-ishma, Stadtwerke Frankfurt am Main Holding GmbH (100 % posseduta mill-muniċipalità ta' Frankfurt am Main) kienet tikkontrolla 20,47 % tal-ishma u r-Repubblika Federali tal-Ġermanja kienet tikkontrolla 18,32 % tal-ishma.

(311)

Għalhekk, bejn il-11 ta' Ġunju 2001 u s-26 ta' Ottubru 2005, 70,29 % tal-ishma ta' Fraport kienu kkontrollati minn azzjonisti pubbliċi u għalhekk tikkwalifika bħala impriża pubblika fis-sens tal-Artikolu 2(b) tad-Direttiva 2006/111/KE. Barra minn hekk, il-fatt li l-maġġoranza tal-ishma ta' Fraport kienu kkontrollati minn korpi pubbliċi fisser li dawn kienu f'pożizzjoni li jeżerċitaw influwenza dominanti fuq Fraport.

(312)

Għalhekk, il-Kummissjoni tqis li kwalunkwe injezzjoni ta' kapital mogħtija mir-riżorsi ta' Fraport kienet se tkun tfisser telf ta' riżorsi tal-Istat, u b'hekk tikkostitwixxi trasferiment ta' riżorsi tal-Istat.

(313)

Madankollu, il-Qorti ddeċidiet ukoll li, anki jekk l-Istat huwa f'pożizzjoni li jeżerċita kontroll fuq impriża pubblika u fuq l-operazzjonijiet tagħha, l-eżerċizzju attwali ta' dak il-kontroll f'każ partikolari ma jistax jiġi awtomatikament preżunt. Impriża pubblika tista' taġixxi b'aktar jew anqas indipendenza, skont il-grad ta' awtonomija mogħtija lilha mill-Istat.

(314)

Għalhekk, is-sempliċi fatt li impriża pubblika tkun taħt il-kontroll tal-Istat mhuwiex biżżejjed sabiex il-miżuri li jittieħdu minn dik l-impriża, bħall-finanzjament mogħti lill-FFHG permezz taż-żieda fil-kapital tal-2001, ikunu imputabbli lill-Istat. Huwa wkoll neċessarju li jiġi eżaminat jekk l-awtoritajiet pubbliċi għandhomx jitqiesu bħala li, b'xi mod jew ieħor, kienu involuti fl-adozzjoni ta' din il-miżura. F'dak ir-rigward, il-Qorti indikat li l-imputabbiltà lill-Istat ta' miżura meħuda minn impriża pubblika tista' tiġi dedotta minn sett ta' indikaturi li jirriżultaw miċ-ċirkostanzi tal-każ u l-kuntest li fih tkun ittieħdet dik il-miżura. (57)

(315)

Dawn l-indikaturi jistgħu jkunu l-integrazzjoni tal-impriża fl-istrutturi tal-amministrazzjoni pubblika, in-natura tal-attivitajiet tagħha u l-eżerċizzju ta' dawn fuq is-suq f'kundizzjonijiet normali ta' kompetizzjoni ma' operaturi privati, l-istat legali tal-impriża (fis-sens jekk ikunx soġġett għal-liġi pubblika jew għal-liġi ordinarja tal-kumpaniji), l-intensità tas-sorveljanza eżerċitata mill-awtoritajiet pubbliċi fuq il-ġestjoni tal-impriża, jew kwalunkwe indikatur ieħor li juri, fil-każ partikolari, involviment mill-awtoritajiet pubbliċi fl-adozzjoni ta' miżura jew l-improbabbiltà li ma jkunux involuti, billi jitqies ukoll l-ambitu tal-miżura, il-kontenut tagħha jew il-kundizzjonijiet li tinkludi. (58).

(316)

Kif ġie ddikjarat fil-premessa 135 u dawk segwenti, il-Ġermanja rrilevat li l-miżuri li ttieħdu minn Fraport fir-rigward tal-ajruport ta' Frankfurt Hahn ma kinux imputabbli lill-Istat. F'dan ir-rigward, il-Ġermanja rreferiet b'mod speċjali għas-sezzjoni 76 tal-AktG u għas-sentenzi taħt il-liġi Ġermaniża skont liema l-bord maniġerjali ta' Aktiengesellschaft għandu setgħa diskrezzjonali kbira li jaġixxi fir-rigward tan-negozju ta' kuljum tal-kumpanija u b'hekk ikun qiegħed jaġixxi b'mod indipendenti mill-azzjonisti tagħha.

(317)

Il-Ġermanja rreferiet ukoll għal sentenza tal-Qorti Federali Ġermaniża, il-Bundesgerichtshof, li fiha dik il-qorti osservat li l-azzjonisti pubbliċi ma kinux f'pożizzjoni li jinfluwenzaw id-deċiżjonijiet individwali meħuda fin-negozju ta' kuljum, iżda setgħu jipprovdu biss il-qafas ġenerali u s-superviżjoni ta' gwida lil Fraport. Skont il-Ġermanja, din in-natura speċjali tal-Aktiengesellschaft kienet rikonoxxuta wkoll fir-rigward tal-liġi tal-UE dwar l-akkwist pubbliku fis-sentenza tal-Qorti fil-kawża Stadtwerke Brixen AG. (59)

(318)

Għalhekk, fir-rigward tal-involviment tal-azzjonisti pubbliċi fit-teħid tad-deċiżjonijiet waqt il-laqgħa ġenerali tal-azzjonisti, il-Ġermanja argumentat li votazzjoni fil-laqgħa tal-azzjonisti ma kienet tikkostitwixxi xejn ħlief l-eżerċizzju tad-drittijiet leġittimi u tal-obbligi tagħhom bħala azzjonisti. Il-Ġermanja ċaħdet ukoll l-idea tal-preżenza ta' xi indikazzjoni oħra mis-sentenza Stardust Marine, imsemmija fil-premessa 315.

(319)

Bħala rimarka preliminari, il-Kummissjoni tosserva li s-sempliċi fatt li kumpanija proprjetà tal-Istat hija kumpanija inkorporata taħt id-dritt privat ma jistax — wara li tiġi kkunsidrata l-awtonomija li dik il-forma legali tkun kapaċi tikkonferixxi fuqha — jiġi kkunsidrat bħala suffiċjenti biex jiġi eskluż li l-azzjonijiet tagħha huma imputabbli lill-Istat. (60) Ma għandha ssir l-ebda distinzjoni bejn kawżi fejn l-għajnuna tingħata direttament mill-Istat u kawżi fejn tingħata minn korpi pubbliċi jew privati stabbiliti jew maħtura mill-Istat sabiex jamministraw l-għajnuna. (61)

(320)

Barra minn hekk, il-Kummissjoni tinnota li s-sentenza mogħtija mill-Bundesgerichtshof Ġermaniża fl-1999 (62) titratta proċeduri kriminali. F'dawk il-proċeduri, il-kwistjoni tal-aħħar istanza kienet jekk eks impjegat ta' Fraport setgħax jiġi mixli bir-reat ta' “korruzzjoni ta' impjegat” jew “korruzzjoni ta' uffiċjal pubbliku”, u għalhekk qamet il-kwistjoni ta' jekk skont il-kodiċi kriminali tal-Ġermanja, Fraport kellhiex titqies bħala “amministrazzjoni oħra”. (63) Għalhekk, il-każ ma huwa bl-ebda mod marbut mal-kwistjoni dwar jekk azzjoni ta' Fraport tistax titqies bħala imputabbli lill-Istat skont ir-regoli dwar l-għajnuna mill-Istat, iżda jiċċara biss li impjegat ta' Fraport mhuwiex uffiċjal pubbliku u li Fraport ma tistax titqies bħala parti mill-amministrazzjoni pubblika fis-sens tal-kodiċi kriminali tal-Ġermanja.

(321)

Anke fir-rigward tas-sentenza l-oħra tal-Bundesgerichtshof ippreżentata mill-Ġermanja (64), il-Kummissjoni tinnota li s-sentenza, fil-kawża ta' Parking Brixen  (65), kienet tittratta l-kriterju ta' kontroll pubbliku fuq impriża fis-sens tar-regoli tal-Unjoni dwar l-akkwist pubbliku. Ma tittrattax il-kwistjoni ta' imputabbiltà skont il-liġi dwar l-għajnuna mill-Istat.

(322)

Barra minn hekk, filwaqt li jista' jkun li l-bord maniġerjali ta' Aktiengesellschaft jista' jaġixxi b'mod indipendenti mill-azzjonisti pubbliċi tiegħu meta jittieħdu deċiżjonijiet dwar in-negozju ta' kuljum, minħabba l-istruttura tal-azzjonisti tagħha (li fiha 70 % tal-azzjonisti tagħha huma pubbliċi) u l-ftehim ta' konsorzju bejn l-azzjonisti pubbliċi tagħha, madankollu Fraport tqis lilha nnifisha bħala “impriża pubblika dipendenti” (66) (kif irrapportat f'kull rapport finanzjarju annwali bejn l-2001 u l-2006).

(323)

Barra minn hekk, diversi fatturi jindikaw li fil-fatt iż-żieda fil-kapital tal-2001 hija imputabbli lill-Istat.

(324)

L-ewwel nett, il-Kummissjoni tqis li ż-żieda fil-kapital tal-2001 ma tistax titqies barra mill-kuntest, iżda trid titqies fid-dawl tas-sitwazzjoni politika u legali ta' Fraport f'dak iż-żmien. Dawk iċ-ċirkostanzi u l-fatti jindikaw b'mod ċar li l-miżura ma kinitx tiġi adottata kieku ma kienx għall-involviment tal-Istat.

(325)

Skont il-minuti tal-bord superviżorju ta' Fraport tas-26 ta' Settembru 1997, l-awtoritajiet ta' Land Rhineland-Palatinate stiednu lil Fraport biex tinvolvi ruħha fl-ajruport ta' Frankfurt Hahn, peress li “Land Rhineland-Palatinate xtaqet, permezz tal-involviment ta' [Fraport] fl-[FFHG] li jissaħħaħ l-iżvilupp tal-opportunitajiet ta' xogħol, u peress li kienet qiegħda tistenna żieda fit-traffiku tal-ajru”. Wara li fl-1 ta' Jannar 1998, Fraport kienet saret azzjonista fl-FFHG b'sehem ta' 64 %, skont il-minuti tal-laqgħa tal-bord superviżorju tal-10 ta' Mejju 1999, “il-gvern ta' Land Rhineland-Palatinate [kien] dar fuq il-prim Ministru ta' Land Hesse b'talba għal impenn aktar b'saħħtu ta' [Fraport] fl-[ajruport] ta' Hahn”. Għal dan l-għan, Fraport kellha tieħu f'idejha l-ishma li Holding Hahn u Weiss u Freytag kien għad kellhom fl-ajruport (ara l-premessa 17). Il-minuti jkomplu jgħidu li Fraport ma għandhiex tiġi ppenalizzata “jekk ma tilħaqx il-miri politiċi reġjonali, pereż. l-għadd ta' opportunitajiet ta' xogħol” u li “bdew in-negozjati bejn Fraport u l-Land dwar punti ta' diskussjoni” . Fl-aħħar nett, il-minuti jistqarru li “kemm jista' jkun għandhom jintużaw fondi pubbliċi” għall-iżvilupp tal-ajruport u li, sabiex jitħaffef il-proċess ta' ġbir ta' dawn il-fondi, “Land Rhineland-Palatinate diġà waqqfet grupp ta' ħidma fil-Ministeru tal-Ekonomija, li tiegħu Fraport hija wkoll membru”.

(326)

Dawk il-minuti juru li Land Rhineland-Palatinate u Land Hesse kienu qegħdin jużaw lil Fraport bħala mezz sabiex jiġu segwiti miri politiċi reġjonali u strutturali, bħall-ħolqien ta' aktar impjiegi fir-reġjun.

(327)

Peress li dak iż-żmien Fraport kienet għadha impriża pubblika, il-bord superviżorju tagħha, li fil-maġġorparti l-membri tiegħu kienu ġew innominati (tal-anqas nofs il-bord superviżorju) mill-azzjonisti pubbliċi, kellu s-setgħa li japprova l-ftehim bażiku tal-31 ta' Awwissu 1999 (“Grundlagenvereinbarung”) (67) u li jawtorizza lill-bord maniġerjali biex jikkonkludi l-PLTA tal-2001. (68). Barra minn hekk, waqt il-laqgħa tal-azzjonisti ta' Fraport ġiet adotta riżoluzzjoni datata t-3 ta' Mejju 2000 li fiha l-bord maniġerjali ġie awtorizzat jikkonkludi l-PLTA tal-2001 mal-FFHG u għaldaqstant biex Fraport tintrabat mal-proġett tal-FFHG għall-inqas sal-2005. Peress li r-riżoluzzjoni kienet teħtieġ maġġoranza ta' voti li jirrappreżentaw tal-anqas tliet kwarti tal-kapital awtorizzat li jkun qiegħed jieħu sehem fil-vot, u dak iż-żmien l-awtoritajiet pubbliċi kellhom 100 % tal-ishma (ara l-premessa 305), effettivament dik ir-riżoluzzjoni ttieħdet mill-awtoritajiet pubbliċi.

(328)

Land Rhineland-Palatinate għamlet ukoll l-appoġġ u l-finanzjament pubbliku tagħha kundizzjonali fuq il-konklużjoni tal-PLTA tal-2001, kif jista' jidher mill-ftehim bażiku tal-31 ta' Awwissu 1999. (69).

(329)

Għalhekk, permezz tal-involviment politiku taż-żewġ Länder, direttament fuq livell politiku u indirettament permezz tal-bord superviżorju u bħala l-azzjonisti pubbliċi ta' Fraport, Fraport kienet involuta fl-FFHG u ffirmat il-PLTA tal-2001 biex tassumi t-telf tal-FFHG għall-inqas sal-2005.

(330)

Barra minn hekk, is-sezzjoni 13 tal-istatut ta' assoċjazzjoni tal-FFHG (70) kien jgħid li sal-31 ta' Diċembru 2027 kwalunkwe bejgħ ta' ishma minn xi wieħed mill-azzjonisti kellu jkollu l-awtorizzazzjoni bil-miktub tal-azzjonisti l-oħra. Peress li dak iż-żmien l-FFHG kellha żewġ azzjonisti biss, Fraport u Land Rhineland-Palatinate, dan kien ifisser li biex tbigħ l-ishma tagħha Fraport kellha bżonn l-awtorizzazzjoni bil-miktub mingħand Land Rhineland-Palatinate. Effettivament dan kien ifisser li l-Land setgħet twaqqaf lil Fraport milli titlaq mill-proġett tal-FFHG.

(331)

Diġà fl-2001, meta ġiet diskussa ż-żieda fil-kapital tal-2001, kien jidher li l-maniġment tal-FFHG kien f'negozjati diretti ma' Land Hesse u ma' Land Rhineland-Palatinate. (71) Għandu jiġi nnotat li f'dak il-punt fiż-żmien Land Hesse kienet għadha mhux azzjonista tal-FFHG, imma azzjonista ta' Fraport (b'sehem ta' 45,2 %).

(332)

F'dak il-kuntest politiku u legali, f'Jannar 2001 (72) ħareġ biċ-ċar li kien hemm il-ħtieġa urġenti ta' aktar investimenti fl-FFHG sabiex l-FFHG tkun tista' ssir profittabbli.

(333)

Barra minn hekk, Land Rhineland-Palatinate direttament ipperswadiet lil Fraport biex tadotta ż-żieda fil-kapital tal-2001. Fi proposta għal-laqgħa tal-bord superviżorju tal-20 ta' Ġunju 2001, qiegħed jiġi nnotat li, fid-dawl taż-żieda fil-kapital ta' EUR 27 miljun b'rabta mal-iżvilupp tal-ajruport ta' Frankfurt Hahn, l-azzjonista Land Rhineland-Palatinate kienet insistiet li t-tkomplija tal-investimenti fl-infrastruttura pubblika, bħall-bini tat-triq li tagħti għall-ajruport ta' Frankfurt Hahn li jlaħħaq madwar EUR […] miljun kienet soġġetta għall-investimenti li kellhom jiġu ffinanzjati miż-żieda fil-kapital tal-2001.

(334)

F'dak ir-rigward, il-kumitat dwar l-akkwisti tal-bord superviżorju ta' Fraport, f'laqgħa dwar iż-żieda fil-kapital tal-2001, datata t-23 ta' Novembru 2001, u għalhekk inqas minn xahar qabel il-bord superviżorju approva ż-żieda fil-kapital tal-2001, innota li dak iż-żmien Fraport ma setgħetx tinħall minn mal-FFHG, peress li “ma kienx mistenni li Land Rhineland-Palatinate kienet se taqbel dwar dan”. (73)

(335)

Konsegwentement, il-Kummissjoni tqis li ż-żieda fil-kapital tal-2001 hija imputabbli lill-Istat.

(336)

Vantaġġ fis-sens tal-Artikolu 107(1) tat-Trattat huwa kull benefiċċju ekonomiku li impriża ma kinitx tikseb fil-kundizzjonijiet normali tas-suq, jiġifieri fin-nuqqas ta' intervent mill-Istat. (74) L-effett tal-miżura fuq l-impriża biss huwa rilevanti, u mhux il-kawża jew l-objettiv tal-intervent tal-Istat. (75) Kull meta s-sitwazzjoni finanzjarja ta' impriża titjieb bħala riżultat ta' intervent mill-Istat, ikun hemm vantaġġ.

(337)

Barra minn hekk, “kapital li jitpoġġa għad-dispożizzjoni ta' kumpanija mill-Istat, direttament jew indirettament, f'ċirkostanzi li jikkorrispondu mal-kundizzjonijiet normali tas-suq, ma għandux jitqies bħala għajnuna mill-Istat”. (76) F'dan il-każ, sabiex jiġi stabbilit jekk iż-żieda fil-kapital tal-2001 tagħtix lill-FFHG vantaġġ li ma kinitx kieku tikseb taħt kundizzjonijiet normali tas-suq, il-Kummissjoni għandha tqabbel l-imġiba tal-awtoritajiet pubbliċi li qegħdin jipprovdu l-għotjiet diretti ta' investiment u l-injezzjonijiet ta' kapital ma' dik ta' MEO ggwidat minn prospetti ta' profittabbiltà fit-tul. (77)

(338)

Il-valutazzjoni għandha twarrab kwalunkwe riperkussjoni pożittiva fuq l-ekonomija tar-reġjun fejn jinsab l-ajruport, minħabba li l-Qorti kkjarifikat li l-kwistjoni rilevanti għall-applikazzjoni tal-prinċipju tal-Operatur f'Ekonomija tas-Suq (“MEO”) hija jekk “f'ċirkostanzi simili, azzjonist privat, wara li jkun ikkunsidra l-prevedibbiltà li jinkiseb redditu u wara li jkun eskluda l-kunsiderazzjonijiet soċjali, tal-politika reġjonali u settorjali kollha, kienx jissottoskrivi l-kapital inkwistjoni” (78).

(339)

Fis-sentenza Stardust Marine, il-Qorti sostniet li “[…] sabiex ikun eżaminat jekk l-Istat adottax jew le l-aġir ta' investitur prudenti li jopera f'ekonomija tas-suq, hemm bżonn li wieħed iqiegħed lilu nnifsu fil-kuntest tal-perjodu li matulu twettqu l-miżuri ta' appoġġ finanzjarju sabiex tkun evalwata r-razzjonalità ekonomika tal-kondotta tal-Istat, u għalhekk ma għandha ssir ebda valutazzjoni bbażata fuq sitwazzjoni sussegwenti.” (79)

(340)

Barra minn hekk, fil-kawża EDF, il-Qorti ddikjarat li “[…] biex jintwera li, qabel jew waqt l-għoti tal-vantaġġ, l-Istat Membru ħa dik id-deċiżjoni bħala azzjonist, mhuwiex biżżejjed li wieħed jistrieħ fuq valutazzjonijiet ekonomiċi li jkunu saru wara l-għoti tal-vantaġġ, fuq konstatazzjoni retrospettiva li l-investiment li jkun sar mill-Istat Membru kkonċernat kienx fil-fatt profittabbli, jew fuq ġustifikazzjonijiet ulterjuri waqt l-azzjoni effettivament magħżula.” (80)

(341)

Sabiex tkun tista' tapplika l-prinċipju tal-MEO, il-Kummissjoni għandha tpoġġi lilha nnifisha fiż-żmien meta ttieħdet id-deċiżjoni li jiżdied il-kapital tal-FFHG. Barra minn hekk, fil-prinċipju l-Kummissjoni għandha tibbaża l-valutazzjoni tagħha fuq l-informazzjoni u s-suppożizzjonijiet disponibbli għall-azzjonisti pubbliċi tal-FFHG fiż-żmien meta ttieħdet id-deċiżjoni li tirrigwarda l-arranġamenti finanzjarji inkwistjoni.

(342)

Il-Kummissjoni tirrikonoxxi li jista' jkun diffiċli għall-Istat Membru rilevanti u għall-operaturi kkonċernati li jipprovdu evidenza kontemporanja sħiħa fir-rigward tal-arranġamenti finanzjarji konklużi ħafna snin ilu u se dak kollu meta tiġi biex tapplika l-kriterju inkwistjoni fil-każ preżenti.

(343)

Il-Ġermanja targumenta li l-azzjonisti tal-FFHG ibbażaw id-deċiżjoni tagħhom li jinjettaw kapital addizzjonali fuq diversi dokumenti mħejjija mill-FFHG, minn Fraport u minn konsulenti esterni, li juru li d-deċiżjoni kienet ġustifikata.

(344)

Filwaqt li huwa minnu li kien tfassal pjan fit-tul għall-2001-2015 għal investimenti fl-FFHG, fiż-żmien taż-żieda fil-kapital tal-2001 il-konsulenti ta' Fraport, BCG u SD, kienu qiesu li l-investiment kien jinvolvi riskji għoljin, peress li taħt suppożizzjonijiet sproporzjonatament għoljin ta' tkabbir, l-FFHG kienet se tilħaq profitt annwali ta' EUR […] matul biss l-2015. F'dak il-kuntest, jistgħu jsiru diversi osservazzjonijiet dwar l-għażla taż-żmien taż-żieda fil-kapital tal-2001 u l-informazzjoni disponibbli fiż-żmien li Land Rhineland-Palatinate u Fraport iddeċidew dwar din il-miżura.

(345)

Id-deċiżjoni li jiġi injettat kapital addizzjonali fl-FFHG kienet ittieħdet fl-isfond tas-sitwazzjoni finanzjarja dejjem sejra għall-agħar tal-ajruport fl-2001. F'Jannar 2001, ġie ppreżentat rapport dwar is-sitwazzjoni ekonomika tal-FFHG. Dan ir-rapport ikkonkluda li, minkejja li l-għanijiet preliminari li l-Fraport kienet stabbiliet għall-FFHG kienu ntlaħqu malajr u l-għadd ta' passiġġieri kien qiegħed jiżdied, is-sitwazzjoni ekonomika ġenerali kienet sejra lura b'mod drammatiku peress li tnejn mill-klijenti ewlenin tal-FFHG (Malaysian Airlines Cargo u MNG Airlines) kienu ttrasferew l-attivitajiet tagħhom mill-ajruport ta' Frankfurt Hahn, jew naqqsu l-attivitajiet tagħhom hemmhekk. F'dan l-isfond, Fraport ordnat lill-BCG u lill-SD biex jiżviluppaw strateġija għall-FFHG. Ir-rapport tal-BCG juri li anke fil-każ ta' tkabbir sproporzjonat, sal-2015 ma setgħet tkun mistennija l-ebda profittabbiltà tal-investimenti fl-FFHG. Interplan ukoll kien ikkonferma li dawn is-suppożizzjonijiet ta' tkabbir ma kinux realistiċi (81)  (82) Barra minn hekk, fir-rapport tiegħu l-BCG qal li skont suppożizzjonijiet realistiċi ta' tkabbir ma kienx mistenni li l-investimenti li saru jirrendu profitt. Biex isostni dan, BCG ikkalkula l-Valur Preżenti Nett (VPN) tal-investiment kif ippreżentat fil-qosor fit-Tabella 19.

Tabella 19

Kalkolu tal-profittabbiltà tal-investimenti fl-FFHG tal-BCG  (83)

(346)

Barra minn hekk, skont il-projezzjonijiet tat-traffiku tal-espert estern ta' Fraport, tkabbir ulterjuri jkun soġġett għal investimenti addizzjonali fl-infrastruttura. (86) L-ammont globali tal-investimenti meħtieġa kien stmat li kien jammonta għal EUR […] miljun u kieku kien jinvolvi l-estensjoni tar-runway, tat-taxiways, tar-rampa u miżuri infrastrutturali oħra. Madankollu, skont il-BCG, ma kienet saret l-ebda valutazzjoni dettaljata bħala bażi għal dan il-pjan konsiderevoli ta' investiment. Għal dawn ir-raġunijiet, il-BCG qies li l-investiment kien jinvolvi riskji għoljin u rrakkomanda li dawn ir-riskji jiġu kondiviżi ma' investitur addizzjonali jew li jiġi kkunsidrat il-bejgħ tas-sehem ta' Fraport fl-FFHG.

(347)

Il-Ġermanja ppreżentat MEOT li sar minn PWC biex tiġġustifika l-konformità taż-żieda fil-kapital tal-2001 mas-suq. Madankollu, dan id-dokument ma jsostnix l-argument tal-Ġermanja li l-azzjonisti tal-FFHG kienu aġixxew bħala investituri prudenti kif ġie vvalutat fil-premessa 348 u dawk segwenti.

(348)

Il-Kummissjoni tieħu nota tal-pjan tan-negozju fit-tul imfassal mill-SD ta' Fraport fl-2001, li kien serva bħala l-bażi għall-MEOT li sar minn PWC fl-2006 u fl-2008, rispettivament. F'dak il-pjan tan-negozju, ġew identifikati t-tliet xenarji li ġejjin:

(349)

Madankollu, PWC ma kkalkolatx il-VPN tax-xenarji differenti sabiex ikun jista' jsir tqabbil. Il-VPN stabbilit fit-Tabella 20 juri li fix-xenarji kollha l-VPN2001-2015 kien se jkun negattiv. Barra minn hekk, il-projezzjonijiet li fuqhom kienet ibbażata l-valutazzjoni tal-profittabbiltà ta' PWC juru li huwa biss taħt previżjonijiet ottimisti ħafna tat-traffiku, u jekk wieħed jassumi tkabbir sproporzjonalment għoli, li x-xenarji alternattivi se jwasslu għal telf ta' inqas minn (f'EUR […] miljun) milli skont ix-xenarju tal-istatus quo (mingħajr ma titqies il-ħtieġa ta' investiment addizzjonali ta' EUR […] miljun). Fix-xenarju tal-agħar każ, il-VPN tax-xenarju alternattiv ikun saħansitra ogħla (b'EUR […] miljun) milli skont ix-xenarju tal-istatus quo.

Tabella 20

Valutazzjoni tal-profittabbiltà taż-żieda fil-kapital tal-2001  (87)

(…)

(350)

Il-Ġermanja argumentat ukoll li kien ġie kkunsidrat il-ħruġ ta' Fraport, iżda dan ma kienx possibbli tal-anqas sal-2005, u għalhekk ma kienx meqjus bħala alternattiva. Madankollu, minkejja li Fraport kienet marbuta bil-PLTA tal-2001, il-VPN tat-telf li kien mistenni li jiġġarrab bejn l-2001 u l-2005 kien ilaħħaq EUR […] miljun. Għalhekk, il-Kummissjoni tqis li kopertura tat-telf tal-FFHG sal-2005 mingħajr ebda investiment ulterjuri ieħor kienet tkun tinvolvi anqas spejjeż minn investiment ulterjuri fl-ajruport.

(351)

Barra minn hekk, għandu jiġi mfakkar ukoll li l-previżjoni tal-profittabbiltà tal-investiment ta' Fraport fl-FFHG iddeterjorat sostanzjalment wara li ttieħdet id-deċiżjoni dwar il-konklużjoni tal-PLTA tal-2001 (jiġifieri wara Awwissu 1999).

(352)

It-Tabella 21 tqabbel ir-riżultati annwali mistennija bejn l-2001 u l-2010 skont il-pjan tan-negozju tal-FFHG li ġie mfassal biex isostni d-deċiżjoni dwar il-PLTA tal-2001 u l-pjan tan-negozju tal-FFHG li jsostni ż-żieda fil-kapital tal-2001. Għaldaqstant, il-VPN tar-riżultati annwali tal-FFHG għall-istess perjodu naqas b'madwar EUR […] miljun.

Tabella 21

Valutazzjoni komparattiva tar-riżultati annwali tal-FFHG skont il-pjan tan-negozju għall-PLTA tal-2001 kontra ż-żieda fil-kapital tal-2001  (89)

(…)

(353)

Il-Kummissjoni tosserva wkoll li skont il-minuti tal-laqgħa tal-bord superviżorju tas-16 ta' Novembru 2001 kienet ġiet diskussal-profittabbiltà taż-żieda fil-kapital tal-2001. Skont dawk il-minuti, l-investimenti — anke l-investimenti intermedji ta' EUR 27 miljun — fl-FFHG ma kinux mistennija jkunu profittabbli. Barra minn hekk, intqal li madankollu Fraport kienet se tipprovdi l-“kapital ta' riskju sabiex jinfetħu opportunitajiet għall-futur”. Barra minn hekk, ir-rappreżentant ta' Land Rheinland-Palatinate (Landrat tad-Distrett ta' Rhein-Hunsrück) innota li skont il-minuti tal-bord superviżorju tal-FFHG ta' Mejju 2001, “id-deċiżjoni ta' Fraport li tinvesti fl-FFHG ma tiddependix fuq il-prospett ta' profittabbiltà, iżda fuq il-ftehim tal-kumitat dwar l-akkwisti tal-bord superviżorju ta' Fraport, li kien ta l-approvazzjoni tiegħu.”

(354)

Fid-dawl ta' dan ta' hawn fuq, il-Kummissjoni tikkonkludi li ż-żieda fil-kapital tal-2001 ta' Fraport ma kinitx ingħatat f'konformità mal-MEOP u kienet tat vantaġġ lill-FFGH.

(355)

Fir-rigward taż-żieda fil-kapital ta' Land Rhineland-Palatinate, il-Kummissjoni tinnota li l-ġustifikazzjoni tal-Ġermanja għall-konformità mas-suq tagħha hija bbażata fuq l-istess raġunijiet bħal dawk għal Fraport, li diġà ġiet diskussa fil-premessa 344 u dawk segwenti. L-argumenti mressqa f'dan ir-rigward japplikaw hawnhekk ukoll.

(356)

F'dak ir-rigward, il-Kummissjoni l-ewwel nett tosserva li, mill-1994, il-Land kienet diġà investiet diversi drabi fl-FFHG mingħajr ebda suċċess. It-tieni nett, il-Land ipparteċipat fiż-żieda fil-kapital taħt kundizzjonijiet differenti minn dawk ta' Fraport (ma kienet mistennija l-ebda remunerazzjoni tal-investiment tagħha matul il-perjodu tal-PLTA tal-2001). It-tielet nett, skont ir-rapport dwar l-investiment tal-2003 għal Rhineland-Palatinate, ir-raġuni għaliex il-Land kienet investiet fl-ajruport ta' Frankfurt Hahn kienu objettivi politiċi soċjali u strutturali importanti, bħall-ħolqien ta' impjiegi u t-twettiq ta' objettivi tal-politika tat-trasport, aktar milli kunsiderazzjonijiet ta' profittabbiltà.

(357)

Għalhekk, il-Kummissjoni tikkonkludi wkoll li ż-żieda fil-kapital tal-2001 ta' Land Rhineland-Palatinate ma kinitx ingħatat f'konformità mal-MEOP u kienet tat vantaġġ lill-FFGH.

(358)

Biex miżura tal-Istat taqa' taħt il-kamp ta' applikazzjoni tal-Artikolu 107(1) tat-Trattat, trid tiffavorixxi lil “ċerti impriżi jew ċerti produtturi”. Għalhekk, dawk il-miżuri biss li jiffavorixxu lil impriżi li jagħtu vantaġġ b'mod selettiv jaqgħu taħt il-kunċett ta' għajnuna mill-Istat.

(359)

F'dan il-każ, iż-żieda fil-kapital tal-2001 minn Fraport u minn Land Rhineland-Palatinate kienet tibbenefika biss lill-FFHG. Għalhekk, fis-sens tal-Artikolu 107(1) tat-Trattat, iż-żewġ żidiet fil-kapital kienu, skont id-definizzjoni, selettivi.

(360)

Meta l-għajnuna mogħtija minn Stat Membru ssaħħaħ il-pożizzjoni ta' intrapriża, meta mqabbla ma' intrapriżi oħrajn li jikkompetu fil-kummerċ intra-UE, dawn tal-aħħar għandhom jitqiesu bħala li ġew affettwati minn dik l-għajnuna. Skont każistika stabbilita (91), biex miżura tfixkel il-kompetizzjoni huwa biżżejjed li r-riċevitur tal-għajnuna jikkompeti ma' impriżi oħra fi swieq miftuħa għall-kompetizzjoni.

(361)

Kif ġie vvalutat fil-premessa 304, l-operat ta' ajruport huwa attività ekonomika. Minn naħa, il-kompetizzjoni sseħħ bejn l-ajruporti biex jattiraw linji tal-ajru u t-traffiku tal-ajru korrispondenti (passiġġieri u merkanzija), u, min-naħa l-oħra, bejn l-operaturi ta' ajruporti, li jistgħu jikkompetu bejniethom biex jiġu fdati bl-immaniġġjar ta' ajruport partikolari. Barra minn hekk, b'mod partikolari fir-rigward ta' trasportaturi bi prezzijiet irħas u operaturi ta' titjiriet charter, ajruporti li ma jkunux jinsabu fl-istess żona ta' lħuq jew saħansitra li jkunu jinsabu fi Stati Membri differenti jistgħu wkoll ikunu f'kompetizzjoni ma' xulxin sabiex jattiraw lil dawk il-linji tal-ajru.

(362)

Minħabba d-daqs tal-ajruport ta' Frankfurt Hahn (ara t-Tabella 1) u l-prossimità tiegħu lejn ajruporti oħra tal-Unjoni, speċjalment l-ajruport ta' Frankfurt Main, l-ajruport tal-Lussemburgu, l-ajruport ta' Zweibrücken, l-ajruport ta' Saarbrücken u l-ajruport ta' Köln-Bonn, (92) il-Kummissjoni tqis li l-miżuri kkonċernati jistgħu jaffettwaw il-kummerċ bejn l-Istati Membri. Kif ġie stabbilit fil-premessa 202 hemm titjiriet internazzjonali mill-ajruport ta' Frankfurt Hahn lejn għadd ta' destinazzjonijiet internazzjonali. Ir-runway fl-ajruport ta' Frankfurt Hahn hija twila biżżejjed u tippermetti li l-linji tal-ajru jservu destinazzjonijiet internazzjonali.

(363)

Barra minn hekk, l-ajruport ta' Frankfurt Hahn jservi bħala ajruport tal-merkanzija (ara t-Tabella 2). Fir-rigward tal-kompetizzjoni għat-trasport tal-merkanzija bl-ajru, il-Kummissjoni tinnota li ġeneralment il-merkanzija hija aktar mobbli mit-trasport tal-passiġġieri. (93) B'mod ġenerali, żona ta' lħuq għall-ajruporti tal-merkanzija titqies li għandha raġġ ta' mill-inqas madwar 200 kilometru u sagħtejn ivvjaġġar. Fir-rigward tal-kompetizzjoni għat-trasport tal-merkanzija bl-ajru, il-Kummissjoni tinnota li ġeneralment il-merkanzija hija aktar mobbli mit-trasport tal-passiġġieri. (94) B'mod ġenerali, iż-żona ta' lħuq għall-ajruporti tal-merkanzija titqies li għandha raġġ ta' mill-inqas madwar 200 kilometru u sagħtejn ivvjaġġar. Abbażi tal-informazzjoni tal-Kummissjoni, atturi fl-industrija ġeneralment iqisu li ż-żona ta' lħuq ta' ajruport tal-merkanzija tista' saħansitra tkun akbar peress li ġeneralment nofs ta' nhar ġarr bit-trakkijiet (jiġifieri, sa 12-il siegħa sewqan bit-trakkijiet) ikun aċċettabbli għall-ispedizjonieri biex jużaw l-ajruport sabiex jittrasportaw il-merkanzija. (95) F'dak l-isfond, il-Kummissjoni tqis li, peress li l-ajruporti tal-merkanzija huma aktar sostitwibbli mill-ajruporti tal-passiġġieri dejjem jekk ikun biżżejjed li l-merkanzija bl-ajru tiġi konsenjata lil żona partikolari u mbagħad tintbagħat mill-ispedizjonieri ferrovjarji u bit-triq lejn id-destinazzjoni finali tagħha, inter alia, hemm probabbiltà akbar ta' tfixkil tal-kompetizzjoni u effett fuq il-kummerċ bejn l-Istati Membri.

(364)

Abbażi tal-argumenti ppreżentati fil-premessi minn 360 sa 364, il-vantaġġ ekonomiku konferit fuq l-FFHG saħħaħ il-pożizzjoni tagħha vis-à-vis il-kompetituri tagħha fis-suq tal-Unjoni għall-forniment ta' servizzi pprovduti fl-ajruporti. F'dak l-isfond, il-vantaġġ konferit fuq l-FFHG permezz taż-żieda fil-kapital tal-2001 għandu jitqies li jista' jfixkel il-kompetizzjoni u jaffettwa l-kummerċ bejn l-Istati Membri.

(365)

Iż-żieda fil-kapital tal-2001 ta' EUR 27 miljun minn Fraport u minn Land Rhineland-Palatinate tikkostitwixxi għajnuna mill-Istat fis-sens tal-Artikolu 107(1) tat-Trattat.

(366)

Fl-2004, il-kapital tal-FFHG reġa' żdied b'EUR 42 miljun addizzjonali (Fraport investiet EUR 10,21 miljun, Land Hesse investiet EUR 20 miljun u Land Rhineland-Palatinate investiet EUR 11,79 miljun). Land Rhineland-Palatinate u Land Hesse qablu dwar dik iż-żieda fil-kapital fl-2002 soġġett għall-konklużjoni ta' PLTA ġdid (jiġifieri l-PLTA tal-2004) bejn l-FFHG u Fraport, li jkopri l-perjodu sal-31 ta' Diċembru 2014.

(367)

Fil-5 ta' April 2004, Fraport u FFHG ikkonkludew il-PLTA tal-2004. Dak il-ftehim ġie approvat mill-azzjonisti ta' Fraport fit-2 ta' Ġunju 2004.

(368)

Kif ġie analizzat fil-premessa 293 u dawk segwenti, mit-12 ta' Diċembru 2000 l-FFHG trid titqies bħala impriża li teżerċita attività ekonomika għall-fini tal-Artikolu 107(1) tat-Trattat.

(369)

Il-Kummissjoni tqis li minħabba l-fatt li l-PLTA tal-2004 kien prekundizzjoni biex iż-żieda fil-kapital tal-2004 issir effettiva u minħabba li ż-żewġ miżuri kienu soġġetti għall-qbil mill-azzjonisti ta' Fraport waqt l-istess laqgħa tal-azzjonisti, l-imputabbiltà taż-żewġ miżuri trid tiġi vvalutata flimkien (fir-rigward tal-kontribuzzjoni ta' Fraport).

(370)

Iż-żieda fil-kapital tal-2004 u l-PLTA tal-2004 kienu kkonfermati mill-assemblea tal-azzjonisti ta' Fraport fit-2 ta' Ġunju 2004 b'99,992 % tal-voti tal-azzjonisti preżenti għal-laqgħa.

(371)

Barra minn hekk, il-Ġermanja argumentat li biex tiġi approvata, id-deċiżjoni tal-PLTA tal-2004 kienet teħtieġ maġġoranza ta' 74,994 % tal-voti fl-assemblea tal-azzjonisti, filwaqt li l-azzjonisti pubbliċi kellhom biss madwar 70 % tal-ishma fi Fraport u għalhekk fil-fatt ma setgħux jikkontrollaw id-deċiżjonijiet ta' Fraport. F'dan ir-rigward irid jiġi mfakkar li ż-żieda fil-kapital tal-2004 ma kinitx se ssir effettiva mingħajr l-approvazzjoni tal-PLTA tal-2004 mill-azzjonisti ta' Fraport.

(372)

Il-Kummissjoni tqis li bħala sehem maġġoritarju l-Istat kellu sehem importanti fil-vot dwar iż-żieda fil-kapital tal-2004 u l-PLTA tal-2004. Madankollu, skont l-Aktiengesetz (AktG) Ġermaniża, PLTA jsir effettiv biss wara li jiġi approvat waqt il-laqgħa tal-azzjonisti b'maġġoranza ta' voti li tal-anqas jirrappreżentaw tliet kwarti tal-kapital awtorizzat li jkun qiegħed jieħu sehem fil-vot. (96) Għalhekk, mingħajr il-parteċipazzjoni sostanzjali tal-azzjonisti privati l-awtoritajiet pubbliċi ma setgħux jikkontrollaw id-deċiżjoni biex jiġi implimentat il-PLTA tal-2004 u jwettqu ż-żieda fil-kapital tal-2004 minn Fraport.

(373)

Għalhekk, fid-dawl tal-kunsiderazzjonijiet fil-premessa 369 u dawk segwenti, il-Kummissjoni tqis li ż-żieda fil-kapital tal-2004 minn Fraport u l-PLTA tal-2004 mhumiex imputabbli lill-Istat. Anki kieku kellha tiġi konfermata imputabbiltà u l-miżura titqies bħala għajnuna, din l-għajnuna tkun kompatibbli mas-suq intern. F'dan ir-rigward, il-kunsiderazzjonijiet ta' hawn taħt fis-sezzjoni 10.3 u 10.4 japplikaw b'mod ugwali.

(374)

Land Rhineland-Palatinate u Land Hesse ffinanzjaw l-ishma tagħhom fiż-żieda fil-kapital tal-2004 mill-baġit ġenerali tagħhom. Għalhekk, huwa ċar li dawk il-partijiet miż-żieda fil-kapital tal-2004 kienu ffinanzjati minn riżorsi tal-Istat u huma imputabbli lill-Istat.

(375)

Kif intqal fil-premessa 336 u dawk segwenti, il-Kummissjoni tapplika l-prinċipju tal-MEO biex teżamina jekk impriża tkunx ingħatat vantaġġ ekonomiku. Il-prinċipji dwar l-applikazzjoni tal-prinċipju tal-MEO stabbiliti fil-premessa 336 u dawk segwenti japplikaw b'mod ugwali.

(376)

Fir-rigward taż-żieda fil-kapital tal-2004 ta' Land Rhineland-Palatinate, il-Ġermanja rrilevat li kienet aġixxiet f'konformità mal-prinċipju tal-MEO. Biex issostni dan, wara deċiżjoni tal-ftuħ tal-2008 il-Ġermanja ppreżentat MEOT li kien sar minn PWC fl-2008.

(377)

Il-Kummissjoni l-ewwel nett tinnota li Land Rhineland-Palatinate ma kinitx fasslet kalkolu ex ante proprju tal-profittabbiltà jew ikkalkulat ir-redditu proprju fuq l-investiment. Għall-kuntrarju, Land Rhineland-Palatinate kienet qiegħda tiddependi fuq il-pjan tan-negozju mħejji mill-FFGH u minn Fraport.

(378)

It-tieni nett, l-Kummissjoni madankollu tqis li s-sitwazzjoni tal-Land ma kinitx l-istess bħas-sitwazzjoni tal-azzjonisti ta' Fraport. It-Tabella 22 turi li bejn l-2005 u l-2009 Land Rhineland-Palatinate suppost injettat EUR […] miljun (total ta' EUR […] miljun), iżda stenniet li mill-2025 biss kienet se tirċievi pagamenti tal-imgħax jew xi rimunerazzjoni oħra għall-parteċipazzjoni tagħha. Madankollu, l-azzjonisti ta' Fraport suppost injettaw EUR […] miljun u stennew li wara r-riżultati negattivi matul l-ewwel erba' snin, kienu se jirċievu pagamenti tal-imgħax. Il-VPN tad-dividendi mistennija għall-perjodu sal-2025 kien jammonta għal EUR […] miljun b'Rata ta' Redditu Interna (IRR) ta' […] %.

(379)

It-tielet nett, fid-dawl ta' dan il-perjodu twil ta' ppjanar u minħabba l-fatt li Land Rhineland-Palatinate kienet diġà investiet diversi drabi mingħajr ebda suċċess fl-FFHG, il-Kummissjoni tqis li l-ebda investitur privat prudenti fil-pożizzjoni tal-Land ma kien jiddeċiedi li jinjetta aktar kapital fl-FFHG mingħajr ma jwettaq ukoll valutazzjoni ex ante tas-sensittività.

Tabella 22

Valutazzjoni tal-profittabbiltà taż-żieda fil-kapital tal-2004 minn Land Rhineland-Palatinate

(…)

(380)

Barra minn hekk, l-MEOT għaż-żieda fil-kapital tal-2004 u għall-PLTA tal-2004 huma bbażati fuq aspettattivi sinifikanti ta' tkabbir fir-rigward tar-riżultati finanzjarji annwali tal-FFHG (ara t-Tabella 23). Dawn is-suppożizzjonijiet ta' tkabbir li fuqhom huwa bbażat l-MEOT huma sostanzjalment ogħla minn dawk li fuqhom huwa bbażat l-MEOT għaż-żieda fil-kapital tal-2001. Barra minn hekk, huma soġġetti għal varjazzjonijiet għoljin u pereżempju fl-2009 kienu jlaħħqu aktar minn 300 %.

Tabella 23

Valutazzjoni komparattiva tar-riżultati annwali previsti tal-FFHG fil-pjanijiet tan-negozju użati minn PWC għall-MEOT għaż-żieda fil-kapital tal-2001 u għaż-żieda fil-kapital tal-2004