EUR-Lex Access to European Union law
This document is an excerpt from the EUR-Lex website
Document 32016D0342
Council Decision (EU) 2016/342 of 12 February 2016 on the conclusion, on behalf of the Union, of the Stabilisation and Association Agreement between the European Union and the European Atomic Energy Community, of the one part, and Kosovo *, of the other part
Deċiżjoni tal-Kunsill (UE) 2016/342 tat-12 ta’ Frar 2016 dwar il-konklużjoni, f’isem l-Unjoni Ewropea, tal-Ftehim ta’ Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u l-Kosovo *, min-naħa l-oħra
Deċiżjoni tal-Kunsill (UE) 2016/342 tat-12 ta’ Frar 2016 dwar il-konklużjoni, f’isem l-Unjoni Ewropea, tal-Ftehim ta’ Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u l-Kosovo *, min-naħa l-oħra
ĠU L 71, 16.3.2016, p. 1–2
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
ELI: http://data.europa.eu/eli/dec/2016/342/oj
16.3.2016 |
MT |
Il-Ġurnal Uffiċjali tal-Unjoni Ewropea |
L 71/1 |
DEĊIŻJONI TAL-KUNSILL (UE) 2016/342
tat-12 ta’ Frar 2016
dwar il-konklużjoni, f’isem l-Unjoni Ewropea, tal-Ftehim ta’ Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u l-Kosovo (*), min-naħa l-oħra
IL-KUNSILL TAL-UNJONI EWROPEA,
Wara li kkunsidra t-Trattat tal-Unjoni Ewropea, u b’mod partikolari l-Artikolu 37 flimkien mal-Artikolu 31(1) tiegħu,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 217, flimkien mal-Artikoli 218(7), 218(6)(a)(i) u t-tieni subparagrafu tal-Artikolu 218(8) tiegħu,
Wara li kkunsidra l-proposta mill-Kummissjoni Ewropea,
Wara li kkunsidra l-kunsens tal-Parlament Ewropew,
Billi
(1) |
Bi qbil mad-Deċiżjoni tal-Kunsill (UE) 2015/1988 (1), il-Ftehim ta’ Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, u l-Kosovo, (“il-Ftehim”), ġie ffirmat f’isem l-Unjoni fit-22 ta’ Ottubru 2015, soġġett għall-konklużjoni tiegħu f’data aktar tard. |
(2) |
L-Unjoni u l-Kosovo għandhom rabtiet b’saħħithom u jaqsmu bejniethom valuri u x-xewqa għat-tisħiħ ta’ dawk ir-rabtiet u li jistabbilixxu relazzjoni mill-qrib u dejjiema msejsa fuq ir-reċiproċità u l-interess reċiproku, li għandhom jippermettu l-Kosovo li jsaħħaħ u jestendi aktar ir-relazzjonijiet tiegħu mal-Unjoni. |
(3) |
“L-ewwel ftehim dwar il-prinċipji li jirregolaw in-normalizzazzjoni tar-relazzjonijiet” intlaħaq fid-19 ta’ April 2013 fil-qafas tad-djalogu ffaċilitat mill-UE. |
(4) |
Il-Ftehim jipprevedi l-istabbiliment ta’ assoċjazzjoni bejn l-Unjoni u l-Kosovo li tinvolvi drittijiet u obbligi reċiproċi, azzjonijiet komuni u proċedura speċjali. Jinkludi wkoll dispożizzjonijiet li jaqgħu fil-kamp ta’ applikazzjoni tal-Kapitolu 2 tat-Titolu V tat-Trattat tal-Unjoni Ewropea (TUE), dwar il-Politika Estera u ta’Sigurtà Komuni tal-Unjoni. Id-deċiżjoni għall-konklużjoni tal-Ftehim għandha għalhekk tkun ibbażata fuq il-bażi ġuridika li tipprevedi l-istabbiliment ta’ assoċjazzjoni li tippermetti lill-Unjoni tidħol f’impenji f’kull qasam kopert mit-Trattati u fuq il-bażi ġuridika għall-ftehimiet f’oqsma koperti mill-Kapitolu 2 tat-Titolu V tat-TUE. |
(5) |
Dan huwa ftehim għall-UE biss. L-impenji u l-kooperazzjoni li għandhom jiddaħħlu mill-Unjoni taħt dan il-Ftehim jirrigwardaw biss l-oqsma koperti mill-acquis tal-UE jew politiki eżistenti tal-Unjoni. L-iffirmar u l-konklużjoni ta’ dan il-Ftehim bħala Ftehim għall-UE biss huma mingħajr preġudizzju għan-natura u l-kamp ta’ applikazzjoni ta’ ftehimiet simili li għandhom jiġu nnegozjati fil-futur. Huwa wkoll mingħajr preġudizzju għas-setgħat tal-istituzzjonijiet tal-UE konferiti lilhom fit-Trattati u l-pożizzjonijiet tal-istituzzjonijiet tal-UE u tal-Istati Membri dwar il-kompetenzi. Il-Ftehim jipprevedi għal kooperazzjoni wiesgħa f’diversi oqsma ta’ politika, inkluż fil-ġustizzja u l-affarijiet interni. |
(6) |
Il-konklużjoni tal-Ftehim hija mingħajr preġudizzju għall-pożizzjoni tal-Istati Membri dwar l-istatus tal-Kosovo, li se tiġi deċiża skont il-prassi nazzjonali tagħhom u d-dritt internazzjonali. |
(7) |
B’żieda ma’ dan, l-ebda terminu, għażla ta’ kliem jew definizzjoni użati f’din id-Deċiżjoni u t-test mehmuż tal-Ftehim, lanqas ebda azzjoni ta’ rikors għall-bażijiet ġuridiċi neċessarji kollha għall-konklużjoni tal-Ftehim, ma jikkostitwixxu r-rikonoxximent tal-Kosovo mill-Unjoni bħala Stat indipendenti u lanqas ma jikkostitwixxu rikonoxximent minn Stati Membri individwali tal-Kosovo f’dik il-kapaċità fejn huma ma jkunux ħadu tali pass qabel. |
(8) |
Il-konklużjoni tal-Ftehim fir-rigward ta’ materji li jaqgħu taħt il-kompetenza tal-Komunità Ewropea tal-Enerġija Atomika hija suġġetta għal proċedura separata. |
(9) |
Il-Ftehim għandu jiġi approvat, |
ADOTTA DIN ID-DEĊIŻJONI:
Artikolu 1
Il-Ftehim ta’ Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, u l-Kosovo huwa b’dan approvat f’isem l-Unjoni għall-partijiet li jaqgħu taħt it-TUE u t-Trattat dwar il-Funzjonament tal-Unjoni Ewropea.
It-test tal-Ftehim jinsab mehmuż ma’ din id-Deċiżjoni.
Artikolu 2
Il-President tal-Kunsill għandu, f’isem l-Unjoni, jagħti n-notifika prevista fl-Artikolu 144 tal-Ftehim (2).
Artikolu 3
1. Il-Kunsill ta’ Stabbilizzazzjoni u Assoċjazzjoni għandu jkun ippresedut min-naħa tal-Unjoni mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, f’konformità mar-responsabbiltajiet tiegħu/tagħha skont it-Trattati u l-kapaċità tiegħu/tagħha bħala President tal-Kunsill tal-Affarijiet Barranin.
Il-Kumitat ta’ Stabbilizzazzjoni u Assoċjazzjoni għandu jkun ippresedut minn rappreżentant tal-Kummissjoni.
2. Il-Kummissjoni għandha tkun awtorizzata tapprova f’isem l-Unjoni modifiki għall-Ftehim fejn hi tipprevedi li dawn jiġu adottati mill-Kumitat ta’ Stabbilizzazzjoni u Assoċjazzjoni.
Artikolu 4
Din id-Deċiżjoni hija mingħajr preġudizzju għall-pożizzjoni tal-Istati Membri u tal-Unjoni dwar l-istatus tal-Kosovo.
Artikolu 5
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, it-12 ta’ Frar 2016.
Għall-Kunsill
Il-President
J.R.V.A. DIJSSELBLOEM
(*) Din id-deżinjazzjoni hija mingħajr preġudizzju għall-pożizzjonijiet dwar l-istatus, u hija konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.
(1) ĠU L 290, 6.11.2015, p. 4.
(2) Id-data tad-dħul fis-seħħ tal-Ftehim ser tiġi pubblikata f’Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.