12.2.2009

MT

Il-Ġurnal Uffiċjali tal-Unjoni Ewropea

L 41/3

---

DEĊIŻJONI TAL-KUNSILL

tas-7 ta’ April 2008

dwar l-iffirmar u l-applikazzjoni provviżorja tal-Ftehim bejn il-Komunità Ewropea u l-Gvern tan-Nepal dwar ċerti aspetti tas-servizzi tal-ajru

(2009/117/KE)

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b’mod partikolari l-Artikolu 80(2), flimkien mal-ewwel sentenza tal-ewwel subparagrafu tal-Artikolu 300(2) tiegħu,

Wara li kkunsidra l-proposta tal-Kummissjoni,

Billi:

(1)	Fil-5 ta’ Ġunju 2003, il-Kunsill awtorizza lill-Kummissjoni tiftaħ negozjati ma’ terzi pajjiżi dwar il-bdil ta’ ċerti dispożizzjonijiet fi Ftehimiet bilaterali eżistenti bi Ftehim Komunitarju.

(2)

Il-Kummissjoni nnegozjat, f’isem il-Komunità, Ftehim man-Nepal dwar ċerti aspetti tas-servizzi tal-ajru f’konformità mal-mekkaniżmi u d-direttivi fl-Anness għad-Deċiżjoni tal-Kunsill li tawtorizza lill-Kummissjoni tiftaħ negozjati ma’ terzi pajjiżi dwar il-bdil ta’ ċerti dispożizzjonijiet fi Ftehimiet bilaterali eżistenti bi Ftehim Komunitarju.

(3)	Il-Ftehim għandu jiġi ffirmat u applikat provviżorjament, suġġett għall-konklużjoni possibbli tiegħu f’data aktar ‘il quddiem,

IDDEĊIEDA KIF ĠEJ:

Artikolu 1

L-iffirmar tal-Ftehim bejn il-Komunità Ewropea u l-Gvern tan-Nepal dwar ċerti aspetti tas-servizzi tal-ajru huwa b’dan approvat f’isem il-Komunità, suġġett għall-konklużjoni possibbli tiegħu f’data aktar ‘il quddiem.

It-test ta’ dan il-Ftehim huwa mehmuż ma’ din id-Deċiżjoni.

Artikolu 2

Il-President tal-Kunsill b’dan huwa awtorizzat jinnomina l-persuna jew il-persuni bis-setgħa li tiffirma/jiffirmaw il-Ftehim f’isem il-Komunità.

Artikolu 3

Fl-istennija tad-dħul fis-seħħ tiegħu, il-Ftehim għandu jiġi applikat provviżorjament mill-ewwel jum tal-ewwel xahar wara d-data li fiha l-partijiet ikunu nnotifikaw lil xulxin li l-proċeduri kollha meħtieġa għal dan il-għan ikunu tlestew (1).

Artikolu 4

Il-President tal-Kunsill huwa b’dan awtorizzat jagħmel in-notifika prevista fl-Artikolu 9(2) tal-Ftehim.

---

(1)  Id-data minn meta l-Ftehim għandu japplika provviżorjament se jiġi ppubblikat fil-Ġurnal Uffiċjali tal-Unjoni Ewropea mis-Segretarjat tal-Kunsill.

---

12.2.2009

MT

Il-Ġurnal Uffiċjali tal-Unjoni Ewropea

L 41/5

---

FTEHIM

bejn il-Komunità Ewropea u l-Gvern tan-Nepal dwar ċerti aspetti tas-servizzi tal-ajru

IL-KOMUNITÀ EWROPEA

minn naħa, u

L-GVERN TAN-NEPAL,

min-naħa l-oħra

(minn hawn ‘il quddiem “il-Partijiet”)

FILWAQT LI JINNUTAW li ftehimiet bilaterali dwar is-servizzi tal-ajru ġew konklużi bejn diversi Stati Membri tal-Komunità Ewropea u n-Nepal li fihom dispożizzjonijiet li jmorru kontra l-liġi Komunitarja,

FILWAQT LI JINNUTAW li l-Komunità Ewropea għandha l-kompetenza esklussiva fir-rigward ta’ bosta aspetti li jistgħu jiġu inklużi fi ftehimiet bilaterali dwar is-servizzi tal-ajru bejn l-Istati Membri tal-Komunità Ewropea u terzi pajjiżi,

FILWAQT LI JINNUTAW li, skond il-liġi tal-Komunità Ewropea, it-trasportaturi tal-ajru Komunitarji stabbiliti f’xi wieħed mill-Istati Membri għandhom id-dritt għal aċċess mhux diskriminatorju għar-rotot tal-ajru bejn l-Istati Membri tal-Komunità Ewropea u terzi pajjiżi,

FILWAQT LI JIKKUNSIDRAW il-ftehimiet bejn il-Komunità Ewropea u ċerti terzi pajjiżi li jipprovdu l-possibbiltà għaċ-ċittadini ta’ dawn it-terzi pajjiżi li jiksbu dritt ta’ sjieda fi trasportaturi tal-ajru mogħtija liċenzja f’konformità mal-liġi tal-Komunità Ewropea,

FILWAQT LI JAGĦRFU li ċerti dispożizzjonijiet tal-ftehimiet bilaterali dwar is-servizzi tal-ajru bejn l-Istati Membri tal-Komunità Ewropea u n-Nepal, li jmorru kontra l-liġi tal-Komunità Ewropea, iridu jinġiebu f’konformità magħha sabiex tiġi stabbilita bażi ġuridika soda għas-servizzi tal-ajru bejn il-Komunità Ewropea u n-Nepal u biex tinżamm il-kontinwità ta’ dawn is-servizzi tal-ajru,

FILWAQT LI JAGĦRFU li l-ftehimiet bilaterali dwar is-servizzi tal-ajru bejn l-Istati Membri tal-Komunità Ewropea u n-Nepal għandhom ikunu konsistenti mal-liġijiet tan-Nepal u tal-Komunità Ewropea u jipprovdu bażi ġuridika vijabbli u soda biex jiġu żgurati l-kontinwità u l-iżvilupp tas-servizzi tal-ajru bejn il-Komunità Ewropea u n-Nepal,

FILWAQT LI JINNUTAW li d-dispożizzjonijiet tal-ftehimiet bilaterali dwar is-servizzi tal-ajru bejn l-Istati Membri tal-Komunità Ewropea u n-Nepal, li mhumiex inkonsistenti mal-liġi tal-Komunità Ewropea, ma għandhomx bżonn jiġu affettwati minn dan il-Ftehim,

FILWAQT LI JINNUTAW li, skond il-leġiżlazzjoni tal-Komunità Ewropea, it-trasportaturi tal-ajru fil-prinċipju ma jistgħux jikkonkludu ftehimiet li jistgħu jaffettwaw il-kummerċ bejn l-Istati Membri tal-Komunità Ewropea u li jkollhom bħala l-għan jew l-effett tagħhom li jipprevjenu, jirrestrinġu jew jgħawġu l-kompetizzjoni,

FILWAQT LI JAGĦRFU li d-dispożizzjonijiet fil-ftehimiet bilaterali dwar is-servizzi tal-ajru konklużi bejn l-Istati Membri tal-Komunità Ewropea u n-Nepal li i) jeħtieġu jew jiffavorixxu l-adozzjoni ta’ ftehimiet bejn il-kumpaniji, deċiżjonijiet minn assoċjazzjonijiet ta’ kumpaniji jew prattiki miftehma li jipprevjenu, jgħawġu jew jirrestrinġu l-kompetizzjoni bejn it-trasportaturi tal-ajru fuq ir-rotot rilevanti; jew (ii) isaħħu l-effetti ta’ kwalunkwe ftehim, deċiżjoni jew prattika miftehma ta’ dan it-tip; jew iii) jiddelegaw lit-trasportaturi tal-ajru jew lil operaturi ekonomiċi privati oħrajn ir-responsabbiltà għat-teħid ta’ miżuri li jipprevjenu,, jgħawġu jew jirrestrinġu l-kompetizzjoni bejn it-trasportaturi tal-ajru fuq ir-rotot rilevanti jistgħu jrendu mhux effettivi r-regoli tal-kompetizzjoni applikabbli għall-impriżi;

FILWAQT LI JINNUTAW li mhuwiex għan tal-Komunità Ewropea, bħala parti minn dan il-ftehim, li tbiddel il-volum totali tat-traffiku tal-ajru bejn il-Komunità Ewropea u n-Nepal, jew li jiġi affettwat il-bilanċ bejn it-trasportaturi tal-ajru Komunitarji u t-trasportaturi tal-ajru tan-Nepal, jew li jiġu nnegozjati emendi għad-dispożizzjonijiet ta’ ftehimiet bilaterali eżistenti dwar is-servizzi tal-ajru dwar id-drittijiet tat-traffiku.

FTEHMU KIF ĠEJ:

Artikolu 1

Dispożizzjonijiet ġenerali

1.   Għall-finijiet ta’ dan il-Ftehim, “Stati Membri” tfisser l-Istati Membri tal-Komunità Ewropea.

2.   Referenzi f’kull ftehim elenkat fl-Anness I għaċ-ċittadini tal-Istat Membru li huwa parti fil-ftehim għandhom jinftehmu bħala referenzi għaċ-ċittadini tal-Istati Membri tal-Komunità Ewropea.

3.   Referenzi f’kull ftehim elenkat fl-Anness I għat-trasportaturi tal-ajru jew linji tal-ajru tal-Istat Membru li huwa parti fil-ftehim għandhom jinftehmu bħala referenzi għat-trasportaturi tal-ajru jew linji tal-ajru ddeżinjati minn dak l-Istat Membru.

Artikolu 2

Deżinjazzjoni, Awtorizzazzjoni u Revoka

1.   Id-dispożizzjonijiet fil-paragrafi 3 u 4 ta’ dan l-Artikolu għandhom jieħdu post id-dispożizzjonijiet li jikkorrispondu magħhom fl-artikoli elenkati fl-Anness II(a) u (b) rispettivament, f’dak li għandu x’jaqsam mad-deżinjazzjoni tat-trasportaturi tal-ajru mill-Istat Membru kkonċernat, l-awtorizzazzjonijiet u l-permessi tagħha mogħtija min-Nepal, u r-rifjut, ir-revoka, is-sospensjoni jew il-limitazzjoni tal-awtorizzazzjonijiet jew il-permessi tat-trasportatur tal-ajru, rispettivament.

2.   Id-dispożizzjonijiet fil-paragrafi 3 u 4 ta’ dan l-Artikolu għandhom jieħdu post id-dispożizzjonijiet li jikkorrispondu magħhom fl-artikoli elenkati fl-Anness II(a) u (b) rispettivament, f’dak li għandu x’jaqsam mad-deżinjazzjoni tat-trasportaturi tal-ajru min-Nepal, l-awtorizzazzjonijiet u l-permessi tagħha mogħtija mill-Istat Membru kkonċernat, u r-rifjut, ir-revoka, is-sospensjoni jew il-limitazzjoni tal-awtorizzazzjonijiet jew il-permessi tat-trasportatur tal-ajru, rispettivament.

3.   Mal-wasla ta’ deżinjazzjoni bħal din, jew ta’ applikazzjonijiet mit-trasportatur/i tal-ajru ddeżinjat/i, fil-forma u l-mod preskritt għall-awtorizzazzjonijiet u l-permessi, il-parti l-oħra għandha, suġġetta għall-paragrafi 4 u 5, tagħti l-awtorizzazzjonijiet u l-permessi xierqa b’dewmien proċedurali mill-inqas, bil-kundizzjoni li:

(a)

fil-każ ta’ trasportatur tal-ajru ddeżinjat minn Stat Membru: (i) it-trasportatur tal-ajru jkun stabbilit fit-territorju tal-Istat Membru li qed jiddeżinjah taħt it-Trattat li jistabbilixxi l-Komunità Ewropea u li għandu Liċenzja Operattiva valida maħruġa minn Stat Membru f’konformità mal-liġi tal-Komunità Ewropea; kif ukoll (ii) kontroll regolatorju effettiv tat-trasportatur tal-ajru huwa mħaddem u miżmum mill-Istat Membru responsabbli għall-ħruġ taċ-Ċertifikat tiegħu ta’ Operatur tal-Ajru u l-awtorità ajrunawtika rilevanti tkun identifikata b’mod ċar fid-deżinjazzjoni; kif ukoll (iii) it-trasportatur tal-ajru jkun proprjetà, direttament jew permezz tal-akbar sehem azzjonarju, u tkun ikkontrollata effettivament mill-Istati Membri u/jew miċ-ċittadini tal-Istati Membri, u/jew mill-istati l-oħra elenkati fl-Anness III u/jew miċ-ċittadini ta’ dawn l-istati l-oħra.

(b)	fil-każ ta’ trasportatur tal-ajru ddeżinjat min-Nepal: (i) il-post prinċipali tan-negozju tiegħu jkun fin-Nepal; kif ukoll (ii) in-Nepal għandu, u jżomm, kontroll regolatorju effettiv tat-trasportatur tal-ajru.

4.   Kull waħda mill-partijiet tista’ tirrifjuta, tirrevoka, tissospendi jew tillimita l-awtorizzazzjoni jew il-permessi ta’ trasportatur tal-ajru ddeżinjat mill-parti l-oħra fejn:

(a)

fil-każ ta’ trasportatur tal-ajru ddeżinjat minn Stat Membru: (i) it-trasportatur tal-ajru ma jkunx stabbilit fit-territorju tal-Istat Membru li ddeżinjah taħt it-Trattat li jistabbilixxi l-Komunità Ewropea jew ma għandux Liċenzja Operattiva valida minn Stat Membru f’konformità mal-liġi tal-Komunità Ewropea; jew (ii) ma jkunx imħaddem jew miżmum kontroll regolatorju effettiv tat-trasportatur tal-ajru mill-Istat Membru responsabbli għall-ħruġ taċ-Ċertifikat tiegħu ta’ Operatur tal-Ajru, jew l-awtorità ajrunawtika rilevanti ma tkunx identifikata biċ-ċar fid-deżinjazzjoni; jew (iii) it-trasportatur tal-ajru ma jkunx proprjetà, direttament jew permezz tal-akbar sehem azzjonarju, u ma jkunx ikkontrollat effettivament mill-Istati Membri u/jew miċ-ċittadini tal-Istati Membri, u/jew mill-istati l-oħra elenkati fl-Anness III u/jew miċ-ċittadini ta’ dawn l-istati l-oħra; jew

(b)

fil-każ ta’ trasportatur tal-ajru ddeżinjat min-Nepal: (i) il-post prinċipali tan-negozju tiegħu ma jkunx fin-Nepal; jew (ii) in-Nepal ma jkunx qed iżomm kontroll regolatorju effettiv tat-trasportatur tal-ajru; jew (iii) is-sjieda maġġoritarja jew il-kontroll tat-trasportatur tal-ajru ddeżinjat min-Nepal tkun f’idejn pajjiż terz li ma jaċċettax effettivament id-deżinjazzjoni ta’ trasportaturi tal-ajru Komunitarji stabbiliti fil-Komunità.

5.   Huwa u jeżerċita d-dritt tiegħu skont il-paragrafu 4, in-Nepal ma għandux jiddiskrimina bejn trasportaturi tal-ajru tal-Istati Membri fuq il-bażi tan-nazzjonalità.

Artikolu 3

Is-sikurezza

1.   Id-dispożizzjonijiet fil-paragrafu 2 ta’ dan l-Artikolu għandhom jikkomplementaw id-dispożizzjonijiet korrispondenti fl-artikoli elenkati fl-Anness II(c).

2.   Fejn Stat Membru jkun iddeżinja trasportatur tal-ajru li l-kontroll regolatorju fuqu huwa mħaddem u miżmum minn Stat Membru ieħor, id-drittijiet tal-Gvern tan-Nepal skond id-dispożizzjonijiet ta’ sikurezza tal-ftehim bejn l-Istat Membru li ddeżinja t-trasportatur tal-ajru u l-Gvern tan-Nepal għandhom japplikaw b’mod ugwali fir-rigward tal-adozzjoni, it-tħaddim jew iż-żamma tal-istandards tas-sikurezza minn dak l-Istat Membru l-ieħor u fir-rigward tal-awtorizzazzjoni għall-operazzjoni ta’ dak it-trasportatur tal-ajru.

Artikolu 4

It-tassazzjoni tal-fjuwil tal-avjazzjoni

1.   Id-dispożizzjonijiet fil-paragrafu 2 ta’ dan l-Artikolu għandhom jikkomplementaw id-dispożizzjonijiet li jikkorrispondu magħhom fl-artikoli mniżżla f’lista fl-Anness II(d).

2.   Minkejja kull dispożizzjoni oħra għall-kuntrarju, xejn f’kull wieħed mill-ftehimiet elenkati fl-Anness II(d) ma għandu jżomm Stat Membru milli jimponi, fuq bażi mhux diskriminatorja, taxxi, imposti, dazji, drittijiet jew ħlasijiet fuq fjuwil li jiġi fornut fit-territorju tiegħu għall-użu f’inġenju tal-ajru ta’ trasportatur tal-ajru ddeżinjat min-Nepal li jopera bejn punt fit-territorju ta’ dak l-Istat Membru u punt ieħor fit-territorju ta’ dak l-Istat Membru jew fit-territorju ta’ Stat Membru ieħor.

Artikolu 5

It-tariffi għall-ġarr fi ħdan il-Komunità Ewropea

1.   Id-dispożizzjonijiet fil-paragrafu 2 ta’ dan l-Artikolu għandhom jikkomplementaw id-dispożizzjonijiet li jikkorrispondu magħhom fl-artikoli elenkati fl-Anness II(e).

2.   It-tariffi li għandhom jinżammu mit-trasportatur/i tal-ajru ddeżinjat/i min-Nepal permezz ta’ ftehim elenkat fl-Anness I li fih dispożizzjoni elenkata fl-Anness II(e) għal ġarr li jseħħ kollu kemm hu fi ħdan il-Komunità Ewropea għandhom ikunu suġġetti għal-leġiżlazzjoni tal-Komunità Ewropea.

Artikolu 6

Il-kompatibbiltà mar-regoli tal-kompetizzjoni

1.   Minkejja kull dispożizzjoni oħra għall-kuntrarju, xejn f’kull wieħed mill-ftehimiet elenkati fl-Anness I ma għandu (i) jiffavorixxi l-adozzjoni ta’ ftehimiet bejn impriżi, deċiżjonijiet minn assoċjazzjonijiet ta’ impriżi jew prattiki miftehma li jipprevjenu, jgħawġu jew jirrestrinġu l-kompetizzjoni; (ii) isaħħaħ l-effetti ta’ kwalunkwe ftehim, deċiżjoni jew prattika kkonċertata ta’ dan it-tip; jew (iii) jiddelega lill-operaturi ekonomiċi privati r-responsabbiltà għat-teħid ta’ miżuri li jipprevjenu, jgħawġu jew jirrestrinġu l-kompetizzjoni.

2.   Id-dispożizzjonijiet fil-ftehimiet elenkati fl-Anness I li mhumiex kompatibbli mal-paragrafu 1 ta’ dan l-Artikolu ma għandhomx jiġu applikati.

Artikolu 7

Annessi għal dan il-Ftehim

L-Annessi għal dan il-Ftehim għandhom jiffurmaw parti integrali minnu.

Artikolu 8

Reviżjoni jew emendar

Il-Partijiet jistgħu, f’kull ħin, jirrevedu jew jemendaw dan il-Ftehim b’kunsens reċiproku.

Artikolu 9

Id-dħul fis-seħħ u l-applikazzjoni provviżorja

1.   Dan il-Ftehim għandu jidħol fis-seħħ meta l-Partijiet ikunu nnotifikaw lil xulxin bil-miktub li l-proċeduri interni rispettivi meħtieġa għad-dħul fis-seħħ tiegħu jkunu tlestew.

2.   Minkejja l-paragrafu 1, il-Partijiet jaqblu li japplikaw dan il-Ftehim provviżorjament mill-ewwel jum tax-xahar wara d-data li fiha l-Partijiet ikunu nnotifikaw lil xulxin li l-proċeduri kollha meħtieġa għal dan il-għan ikunu tlestew.

3.   Ftehimiet u arranġamenti oħra bejn l-Istati Membri u l-Gvern tan-Nepal li, fid-data tal-iffirmar ta’ dan il-Ftehim, ma jkunux għadhom daħlu fis-seħħ u li ma jkunux qed jiġu applikati provviżorjament huma elenkati fl-Anness I(b). Dan il-Ftehim għandu japplika għall-Ftehimiet u l-arranġamenti kollha tali mad-dħul fis-seħħ jew mal-applikazzjoni provviżorja tagħhom.

Artikolu 10

Terminazzjoni

1.   Fil-każ li ftehim elenkat fl-Anness I jiġi tterminat, id-dispożizzjonijiet kollha ta’ dan il-Ftehim li għandhom x’jaqsmu mal-ftehim elenkat fl-Anness I ikkonċernat għandhom jiġu tterminati fl-istess ħin.

2.   Fil-każ li l-ftehimiet kollha elenkati fl-Anness I jiġu tterminati, dan il-Ftehim jiġi tterminat fl-istess ħin.

---

ANNESS I

LISTA TA’ FTEHIMIET IMSEMMIJA FL-ARTIKOLU 1 TA’ DAN IL-FTEHIM

(a)

Ftehimiet dwar is-servizzi tal-ajru bejn il-Gvern tan-Nepal u l-Istati Membri tal-Komunità Ewropea li, fid-data tal-iffirmar ta’ dan il-Ftehim, kienu ġew konklużi, iffirmati u/jew qed jiġu applikati provviżorjament — Il-Ftehim bejn il-Gvern Federali tal-Awstrija u l-Gvern tal-Maestà Tiegħu tan-Nepal rigward it-Trasport bl-Ajru Ċivili, iffirmat f’Katmandu fid-29 ta’ Ottubru 1997, minn hawn ‘il quddiem “il-Ftehim Nepal-Awstrija” fl-Anness II; — Il-Ftehim bejn il-Gvern tal-Gran Dukat tal-Lussemburgu u l-Gvern tal-Maestà Tiegħu tan-Nepal dwar is-servizzi tal-ajru, iffirmat fil-Lussemburgu fit-18 ta’ Ġunju 1999, minn hawn ‘il quddiem “il-Ftehim Nepal-Lussemburgu” fl-Anness II; — Il-Ftehim bejn ir-Renju Olandiż u l-Gvern tal-Maestà Tiegħu tan-Nepal dwar is-servizzi tal-ajru, magħmul fl-Ajruport ta’ Schiphol fl-10 ta’ Ġunju 1998, minn hawn ‘il quddiem “il-Ftehim Nepal-Olanda” fl-Anness II; — Il-Ftehim bejn il-Gvern tar-Renju Unit tal-Gran Brittanja u l-Irlanda ta’ Fuq u l-Gvern tal-Maestà Tiegħu tan-Nepal dwar is-servizzi tal-ajru, magħmul f’Katmandu fit-3 ta’ Marzu 1994, minn hawn ‘il quddiem “il-Ftehim Nepal-Renju Unit” fl-Anness II;

(b)

Ftehimiet dwar is-servizzi tal-ajru u arranġamenti oħra inizjalati jew iffirmati bejn il-Gvern tan-Nepal u Stati Membri tal-Komunità Ewropea li, fid-data tal-iffirmar ta’ dan il-Ftehim, kienu għadhom ma daħlux fis-seħħ u mhux qed jiġu applikati provviżorjament — Il-Ftehim dwar is-Servizzi tal-Ajru bejn il-Gvern tal-Maestà Tiegħu tan-Nepal u l-Gvern tar-Repubblika Franċiża inizjalat f’Katmandu fis-7 ta’ Lulju 1998, minn hawn ‘il quddiem “il-Ftehim Nepal-Franza” fl-Anness II; — Il-Ftehim bejn il-Gvern tar-Repubblika Federali tal-Ġermanja u l-Gvern tal-Maestà Tiegħu tan-Nepal dwar is-Servizzi tal-Ajru inizjalat u mehmuż bħala l-Anness III għall-Protokoll magħmul f’Bonn fis-26 ta’ Lulju 2000, minn hawn ‘il quddiem “il-Ftehim Nepal-Ġermanja” fl-Anness II; — Il-Ftehim bejn il-Gvern tal-Maestà Tiegħu tan-Nepal u l-Gvern tar-Repubblika Taljana dwar is-Servizzi tal-Ajru inizjalat f’Katmandu fit-8 ta’ Mejju 1992, minn hawn ‘il quddiem “il-Ftehim Nepal-Italja” fl-Anness II;

---

ANNESS II

LISTA TA’ ARTIKOLI FIL-FTEHIMIET ELENKATI FL-ANNESS I U MSEMMIJA FL-ARTIKOLI 2 SA 6 TA’ DAN IL-FTEHIM

(a)	Deżinjazzjoni minn Stat Membru: — l-Artikolu 4 tal-Ftehim Nepal-Awstrija; — l-Artikolu 4 tal-Ftehim Nepal-Franza; — l-Artikolu 4 tal-Ftehim Nepal-Italja; — l-Artikolu 3 tal-Ftehim Nepal-Lussemburgu; — l-Artikolu 5 tal-Ftehim Nepal-Olanda; — l-Artikolu 4 tal-Ftehim Nepal-Renju Unit.

(b)

Rifjut, revoka, sospensjoni jew limitazzjoni ta’ awtorizzazzjonijiet jew permessi: — l-Artikolu 4 tal-Ftehim Nepal-Awstrija; — l-Artikolu 5 tal-Ftehim Nepal-Franza; — l-Artikolu 4 tal-Ftehim Nepal-Ġermanja; — l-Artikolu 5 tal-Ftehim Nepal-Italja; — l-Artikolu 4 tal-Ftehim Nepal-Lussemburgu; — l-Artikolu 6 tal-Ftehim Nepal-Olanda; — l-Artikolu 5 tal-Ftehim Nepal-Renju Unit.

(ċ)	Sikurezza: — l-Artikolu 8 tal-Ftehim Nepal-Awstrija; — l-Artikolu 9 tal-Ftehim Nepal-Franza; — l-Artikolu 14 tal-Ftehim Nepal-Ġermanja; — l-Artikolu 10 tal-Ftehim Nepal-Italja; — l-Artikolu 6 tal-Ftehim Nepal-Lussemburgu; — l-Artikolu 10 tal-Ftehim Nepal-Olanda;

(d)

Tassazzjoni tal-fjuwil tal-avjazzjoni: — l-Artikolu 9 tal-Ftehim Nepal-Awstrija; — l-Artikolu 12 tal-Ftehim Nepal-Franza; — l-Artikolu 7 tal-Ftehim Nepal-Ġermanja; — l-Artikolu 6 tal-Ftehim Nepal-Italja; — l-Artikolu 8 tal-Ftehim Nepal-Lussemburgu; — l-Artikolu 13 tal-Ftehim Nepal-Olanda; — l-Artikolu 8 tal-Ftehim Nepal-Renju Unit.

(e)

Tariffi għall-Ġarr fi ħdan il-Komunità Ewropea: — l-Artikolu 12 tal-Ftehim Nepal-Awstrija; — l-Artikolu 14 tal-Ftehim Nepal-Franza; — l-Artikolu 8 tal-Ftehim Nepal-Italja; — l-Artikolu 10 tal-Ftehim Nepal-Lussemburgu; — l-Artikolu 8 tal-Ftehim Nepal-Olanda; — l-Artikolu 7 tal-Ftehim Nepal-Renju Unit.

---

ANNESS III

LISTA TA’ STATI OĦRA MSEMMIJA FL-ARTIKOLU 2 TA’ DAN IL-FTEHIM

(a)	Ir-Repubblika tal-Iżlanda (skond il-Ftehim dwar iż-Żona Ekonomika Ewropea);

(b)	Il-Prinċipat tal-Liechtenstein (skond il-Ftehim dwar iż-Żona Ekonomika Ewropea);

(ċ)	Ir-Renju Norveġiż (skond il-Ftehim dwar iż-Żona Ekonomika Ewropea);

(d)	Il-Konfederazzjoni Żvizzera (skond il-Ftehim bejn il-Komunità Ewropea u l-Konfederazzjoni Żvizzera dwar it-Trasport tal-Ajru).