EUR-Lex Access to European Union law
This document is an excerpt from the EUR-Lex website
Document 52023BP1875
Resolution (EU) 2023/1875 of the European Parliament of 10 May 2023 with observations forming an integral part of the decision on discharge in respect of the implementation of the budget of the European Environment Agency (EEA) for the financial year 2021
Riżoluzzjoni (UE) 2023/1875 tal-Parlament Ewropew tal-10 ta’ Mejju 2023 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Aġenzija Ewropea għall-Ambjent (EEA) għas-sena finanzjarja 2021
Riżoluzzjoni (UE) 2023/1875 tal-Parlament Ewropew tal-10 ta’ Mejju 2023 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Aġenzija Ewropea għall-Ambjent (EEA) għas-sena finanzjarja 2021
ĠU L 242, 29.9.2023, p. 279–283
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
29.9.2023 |
MT |
Il-Ġurnal Uffiċjali tal-Unjoni Ewropea |
L 242/279 |
RIŻOLUZZJONI (UE) 2023/1875 TAL-PARLAMENT EWROPEW
tal-10 ta’ Mejju 2023
li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Aġenzija Ewropea għall-Ambjent (EEA) għas-sena finanzjarja 2021
IL-PARLAMENT EWROPEW,
— |
wara li kkunsidra d-deċiżjoni tiegħu dwar il-kwittanza għall-implimentazzjoni tal-baġit tal-Aġenzija Ewropea għall-Ambjent għas-sena finanzjarja 2021, |
— |
wara li kkunsidra l-Artikolu 100 u l-Anness V tar-Regoli ta’ Proċedura tiegħu, |
— |
wara li kkunsidra l-opinjoni tal-Kumitat għall-Ambjent, is-Saħħa Pubblika u s-Sikurezza tal-Ikel, |
— |
wara li kkunsidra r-rapport tal-Kumitat għall-Kontroll tal-Baġit (A9-0143/2023), |
A. |
billi, skont id-dikjarazzjoni tad-dħul u l-infiq tagħha (1), il-baġit finali tal-Aġenzija Ewropea għall-Ambjent (l-“Aġenzija”) għas-sena finanzjarja 2021 kien jammonta għal EUR 64 867 177, u dan jirrappreżenta tnaqqis ta’ 27,64 % meta mqabbel ma’ dak għall-2020; billi l-baġit tal-Aġenzija ġej prinċipalment mill-baġit tal-Unjoni u mill-kontribuzzjoni tal-EFTA (79,26 %) u l-kontribuzzjonijiet fl-ambitu ta’ ftehimiet speċifiċi (20,73 %), b’mod partikolari l-programm Copernicus; |
B. |
billi l-Qorti tal-Awdituri (il-“Qorti”), fir-rapport tagħha dwar il-kontijiet annwali tal-Aġenzija għas-sena finanzjarja 2021 (ir-“rapport tal-Qorti”), iddikjarat li kisbet aċċertament raġonevoli li l-kontijiet annwali tal-Aġenzija huma affidabbli u li t-tranżazzjonijiet ta’ bażi huma legali u regolari; |
Ġestjoni baġitarja u finanzjarja
1. |
Jinnota b’apprezzament li l-isforzi ta’ monitoraġġ tal-baġit matul is-sena finanzjarja 2021 irriżultaw f’rata ta’ implimentazzjoni tal-baġit ta’ 100 % tal-approprjazzjonijiet ta’ impenn tas-sena kurrenti, li tirrappreżenta żieda żgħira ta’ 0,04 % meta mqabbel mal-2020; jinnota li r-rata ta’ eżekuzzjoni tal-approprjazzjonijiet ta’ pagament tas-sena kurrenti kienet ta’ 84,90 %, li tirrappreżenta tnaqqis ta’ 1,18 % meta mqabbel mas-sena preċedenti; |
Prestazzjoni
2. |
Jinnota l-kisbiet tal-Aġenzija fl-oqsma tal-bijodiversità u tal-ekosistemi, tal-mitigazzjoni tat-tibdil fil-klima u tal-adattament għalih, tas-saħħa tal-bniedem u tal-ambjent, tal-ekonomija ċirkolari u tal-użu tar-riżorsi, tax-xejriet, tal-prospetti u tar-reazzjonijiet tas-sostenibbiltà, u, b’mod partikolari, l-objettiv speċifiku li jitwettqu valutazzjonijiet u indikaturi b’appoġġ għall-ambizzjonijiet tas-sostenibbiltà tal-UE; jinnota, barra minn hekk, li s-sena 2021 kienet l-ewwel sena tal-implimentazzjoni tal-Istrateġija EEA-Eionet 2021-2030, li hija allinjata mal-prijoritajiet ta’ politika tal-Unjoni; |
3. |
Jisħaq fuq il-fatt li l-Aġenzija tipprovdi informazzjoni tajba u indipendenti dwar l-ambjent; ifaħħar il-kwalità tal-eżiti tagħha maħruġa fl-2021, bħat-tnedija tal-għodda MapMyTree, taħt l-impenn ta’ 3 biljun siġra tal-istrateġija tal-UE għall-bijodiversità; l-appoġġ għan-negozjati dwar il-Liġi Ewropea dwar il-Klima u l-istabbiliment tal-Bord Konsultattiv Xjentifiku Ewropew dwar it-Tibdil fil-Klima; u t-tnedija ta’ web portal ġdid biex jappoġġja r-rapportar dwar l-istorbju; |
4. |
Jinnota li l-Aġenzija tuża indikaturi ewlenin tal-prestazzjoni (KPIs) li għandhom l-għan li jimmonitorjaw il-prestazzjoni kwantitattiva tal-Aġenzija, fost l-oħrajn, fir-rigward tal-ippjanar tax-xogħol operattiv tagħha, it-twettiq tal-programm ta’ ħidma annwali u l-ġestjoni finanzjarja u tar-riżorsi umani; jinnota, b’mod partikolari, ir-rata ta’ implimentazzjoni tal-2021 ta’ 89 % miksuba fir-rigward tar-rapporti u l-valutazzjonijiet ewlenin, li kienet kemxejn taħt il-mira, u r-rata ta’ eżekuzzjoni tal-baġit ta’ 95,2 % imkejla bħala perċentwal tal-pagamenti eżegwiti sal-iskadenza legali/kuntrattwali; japprezza l-fatt li l-KPIs ġew issodisfati u l-fatt li l-Aġenzija ġibdet l-attenzjoni għal miżuri li jistgħu jtejbu l-effiċjenza u l-effikaċja tal-ħidma tal-Aġenzija; madankollu, jirrakkomanda li l-Aġenzija tieħu nota tal-indikaturi li għadhom ma ntlaħqux jew li waqgħu lura; |
5. |
Jinnota li fl-2021 l-Aġenzija żammet kooperazzjoni effettiva mal-Eionet, mal-istituzzjonijiet tal-Unjoni, kif ukoll mal-atturi globali; jinnota b’apprezzament ir-rwol ewlieni li kellha l-Aġenzija fl-appoġġ ta’ azzjonijiet ambjentali u klimatiċi li jimplimentaw il-politiki tal-Unjoni, il-Patt Ekoloġiku Ewropew u l-proposta għat-Tmien Programm ta’ Azzjoni Ambjentali (‘it-tmien EAP’); |
6. |
Ifakkar li, fl-2021, l-Aġenzija impenjat ruħha b’kompiti ġodda li jappoġġjaw it-twettiq tal-ambizzjonijiet ambjentali tal-Unjoni bħala parti mill-Patt Ekoloġiku Ewropew u t-Tmien EAP, filwaqt li kkontribwiet ukoll għall-impenji globali tal-Unjoni, u b’hekk saħħet il-pożizzjoni tal-Aġenzija bħala sors ewlieni ta’ informazzjoni ambjentali rilevanti għall-politika. |
Politika dwar il-persunal
7. |
Jinnota li, fil-31 ta’ Diċembru 2021, it-tabella tal-persunal kellha rata ta’ implimentazzjoni ta’ 99,28 %, b’3 uffiċjali u 136 aġent temporanju maħtura mit-total ta’ 140 pożizzjoni awtorizzata fl-ambitu tal-baġit tal-Unjoni (meta mqabbla ma’ 130 pożizzjoni awtorizzata fl-2020); jinnota li, barra minn hekk, 79 aġent kuntrattwali u 18-il espert nazzjonali sekondati ħadmu għall-Aġenzija fl-2021; huwa tal-opinjoni li sabiex jitwettqu b’mod xieraq il-kompiti fil-perkors tal-Unjoni lejn in-newtralità klimatika, l- ekonomija ċentrali u r-restawr tan-natura, l-għadd ta’ persunal fi ħdan l-Aġenzija għandu jikber fis-snin li ġejjin; ifakkar li, skont il-proposta tal-Kummissjoni dwar regolament dwar ir-restawr tan-natura, sabiex timmonitorja l-għanijiet ta’ dak ir-regolament futur waħdu, se jkunu meħtieġa 12-il pożizzjoni addizzjonali; ifakkar li dawk li jfasslu l-politika jiddependu fuq l-għarfien espert u l-appoġġ tal-Aġenzija fl-implimentazzjoni tar-riformi meħtieġa biex jinkiseb futur newtrali għall-klima; jistieden għalhekk lill-Aġenzija u lill-Kummissjoni jagħmlu evalwazzjoni tal-possibbiltajiet f’dak ir-rigward u jirrapportaw lura lill-awtorità ta’ kwittanza; jisħaq li riżorsi inadegwati għall-Aġenzija jistgħu jdgħajfu l-kapaċità tal-istituzzjonijiet li jwettqu l-impenji b’rabta mal-Patt Ekoloġiku Ewropew; |
8. |
Jinnota, bi tħassib, in-nuqqas ta’ bilanċ bejn il-ġeneri fost il-membri tal-maniġment superjuri tal-Aġenzija, fejn 6 minn 9 (67 %) huma rġiel; jinnota l-bilanċ bejn il-ġeneri fil-Bord ta’ Mmaniġġjar tal-Aġenzija, b’18 minn 38 (47 %) ikunu rġiel; jinnota l-bilanċ bejn il-ġeneri fost il-persunal ġenerali tal-Aġenzija, b’112 minn 206 (54 %) ikunu nisa; jistieden lill-Aġenzija tieħu miżuri konkreti biex iżżid il-bilanċ bejn il-ġeneri fil-livelli kollha tal-ġerarkija tal-Aġenzija mill-aktar fis possibbli u tirrapporta lura lill-awtorità ta’ kwittanza; |
9. |
Jinnota mis-segwitu għar-rapport ta’ kwittanza tal-2020 li fir-rigward tal-politika dwar il-persunal, l-Aġenzija żviluppat Politika Qafas pluriennali dwar ir-riżorsi umani allinjata mal-Istrateġija EEA-Eionet 2021-2030 li tindirizza ħames oqsma ta’ prijorità; jinnota wkoll li l-Aġenzija għandha koordinatur tal-benesseri; |
10. |
Jinnota mis-segwitu għar-rapport ta’ kwittanza tal-2020 li fir-rigward tal-leġiżlazzjoni għall-finanzi sostenibbli, l-Aġenzija allokat aġent temporanju addizzjonali wieħed biex jaħdem fuq finanzjament sostenibbli fl-2021, u li din il-pożizzjoni ġiet ipprogrammata biex tkun valida biss għal tliet snin fl-iskeda finanzjarja, fejn wara l-Aġenzija ma tkunx f’pożizzjoni li tkompli dawn il-kompiti ta’ appoġġ fil-livell attwali; |
11. |
Jinnota li l-Aġenzija tkompli tirrapporta l-valutazzjoni tagħha tal-ħtiġijiet tar-riżorsi lill-Kummissjoni; jinnota wkoll li wara diskussjoni mal-Kummissjoni, il-leġiżlazzjoni l-ġdida se tkopri funzjonijiet ta’ appoġġ u li l-Aġenzija indikat li ssib li l-pożizzjoni ta’ appoġġ addizzjonali fir-rigward tar-Regolament futur dwar il-Liġi dwar ir-Restawr tan-Natura mhux se tkun biżżejjed; |
12. |
Jinnota b’sodisfazzjon li l-Aġenzija għandha politika dwar il-protezzjoni tad-dinjità tal-persuna u l-prevenzjoni tal-fastidju psikoloġiku u sesswali appoġġjata minn, fost l-oħrajn, kors ta’ tagħlim elettroniku dwar l-etika u l-integrità; jinnota li l-Aġenzija tipprovdi network kunfidenzjali ta’ konsulenti u informazzjoni prattika dwar kif għandu jiġi rrapportat allegat fastidju u jiġi kkuntattjat konsulent kunfidenzjali fuq l-intranet tagħha; |
13. |
Ifakkar fl-importanza li tiġi żviluppata politika tar-riżorsi umani fit-tul dwar il-bilanċ bejn ix-xogħol u l-ħajja privata, il-gwida tul il-ħajja u l-għoti ta’ possibbiltajiet ta’ taħriġ speċifiku għall-iżvilupp tal-karriera, il-bilanċ bejn il-ġeneri fil-livelli kollha tal-persunal, it-telexogħol, id-dritt għall-iskonnessjoni, it-titjib tal-bilanċ ġeografiku biex ikun hemm rappreżentanza xierqa mill-Istati Membri kollha, u r-reklutaġġ u l-integrazzjoni ta’ persuni b’diżabbiltà kif ukoll l-iżgurar li jiġu ttrattati b’mod ugwali u li l-opportunitajiet tagħhom jiġu promossi b’mod wiesa’; |
Akkwist
14. |
Jinnota li l-Aġenzija tkompli ssegwi b’mod attiv proċeduri ta’ akkwist konġunt mal-Kummissjoni permezz ta’ kuntratti qafas, kif ukoll tuża varjetà ta’ sistemi u servizzi tal-Kummissjoni; |
15. |
Jinnota mir-rapport tal-Qorti li l-Aġenzija emendat kuntratt qafas ta’ servizz għall-forniment ta’ servizzi ta’ tiswija u manutenzjoni billi rduppjat il-baġit massimu inizjali minn EUR 500 000 għal EUR 1 000 000, u li l-ġustifikazzjoni użata kienet id-deroga applikabbli għall-proċeduri nnegozjati mingħajr pubblikazzjoni minn qabel, li għalihom il-kundizzjonijiet ma ġewx issodisfati, u li, barra minn hekk, il-kundizzjonijiet tar-Regolament Finanzjarju li jippermettu li l-kuntratti jiġu mmodifikati mingħajr proċedura ġdida ta’ akkwist ma ġewx issodisfati; jinnota bi tħassib li l-Qorti ssib li l-emenda kienet irregolari; jinnota, barra minn hekk, li fl-2021 ma kien hemm l-ebda pagament relatat; |
16. |
Ifakkar fl-importanza tal-proċeduri kollha ta’ akkwist li jiżguraw kompetizzjoni ġusta bejn l-offerenti u fl-importanza li jiġu akkwistati l-oġġetti u s-servizzi bl-aħjar prezz, filwaqt li jiġu rrispettati l-prinċipji tat-trasparenza, il-proporzjonalità, it-trattament indaqs u n-nondiskriminazzjoni; jitlob li jiġu implimentati l-għodod tal-IT tal-akkwist elettroniku żviluppati mill-Kummissjoni; jitlob kjarifika aġġornata tal-proċeduri u tal-mudelli fil-linji gwida dwar l-akkwist; jinnota bi tħassib l-osservazzjoni tal-Qorti li d-dgħufijiet fl-akkwist pubbliku qed jiżdiedu u għadhom l-akbar sors ta’ pagamenti irregolari fil-biċċa l-kbira tal-aġenziji tal-Unjoni; |
Prevenzjoni u ġestjoni tal-kunflitti ta’ interess, u trasparenza
17. |
Jirrikonoxxi l-miżuri eżistenti tal-Aġenzija u l-isforzi kontinwi tagħha biex tipprevjeni u tiġġestixxi l-kunflitti ta’ interess, u tipprovdi l-protezzjoni lill-informaturi; jinnota li ma kien hemm l-ebda każ ta’ żvelar ta’ informazzjoni protetta li nfetaħ, ingħalaq jew li kien għaddej fl-2021; jinnota li ma kien hemm l-ebda każ ta’ kunflitt ta’ interess irrapportat fl-2021; |
18. |
Jinnota, mis-segwitu għar-rapport ta’ kwittanza tal-2020, li l-Aġenzija tkompli żżomm rekord tas-CVs u d-dikjarazzjonijiet ta’ interess sottomessi u tfakkar lill-membri tal-Bord ta’ Mmaniġġjar biex jissottomettu tagħhom, fuq bażi volontarja, f’każ li ma jkunux għadhom ġew sottomessi; |
19. |
Jenfasizza l-ħtieġa li jiġu stabbiliti regoli aktar sistematiċi dwar it-trasparenza, l-inkompatibbiltajiet, il-kunflitti ta’ interessi, il-lobbjar illegali u r-revolving doors; jistieden lill-Aġenzija ssaħħaħ il-mekkaniżmi ta’ kontroll intern tagħha, inkluż l-istabbiliment ta’ mekkaniżmu intern kontra l-korruzzjoni; |
Kontroll intern
20. |
Jirrikonoxxi l-bidla strutturali li segwiet it-tnedija tal-proġett “Post tax-xogħol futur”; jinnota t-tħejjija għall-proġett għat-titjib tas-sistema ta’ ġestjoni tal-kwalità biex jiġu rrimedjati n-nuqqasijiet identifikati, bħal pereżempju l-konformità parzjali biss fil-komponenti qafas tal-ambjent ta’ kontroll, l-attivitajiet ta’ kontroll u l-informazzjoni u l-komunikazzjoni; |
21. |
Jinnota bi tħassib mir-rapport tal-Qorti li kuntratt qafas għall-forniment ta’ servizzi tal-canteen u tal-catering fil-bini tal-Aġenzija ġie estiż f’żewġ okkażjonijiet separati, li għall-ewwel estensjoni l-Aġenzija ma ppreżentatx nota ta’ eċċezzjoni, li mhuwiex konformi mal-istandards ta’ kontroll intern tal-Aġenzija li jirrikjedu d-dokumentazzjoni, il-ġustifikazzjoni u l-approvazzjoni tad-devjazzjonijiet kollha; jinnota, barra minn hekk, bi tħassib li, fir-rigward tat-tieni estensjoni, l-Aġenzija fasslet nota ta’ eċċezzjoni għall-fajl, iżda ma ppreżentatx din in-nota fir-reġistru ċentrali tal-eċċezzjonijiet; jinnota t-tweġiba tal-Aġenzija li l-pandemija tal-COVID-19 fixklet l-ippjanar u t-tnedija ta’ sejħa għal offerti għal kuntratt qafas ta’ servizz ġdid; jistieden lill-Aġenzija ssaħħaħ is-sistema ta’ kontroll intern tagħha f’dak ir-rigward; |
22. |
Jinnota mir-rapport tal-Qorti li f’kuntratt ta’ servizz għall-forniment tas-servizzi ta’ appoġġ tas-sistema ta’ informazzjoni ġeografika, l-Aġenzija użat emenda fil-kuntratt biex testendi l-eżekuzzjoni tas-servizzi b’xahar, mit-28 ta’ Frar 2021 għall-31 ta’ Marzu 2021; jinnota bi tħassib li l-emenda daħlet fis-seħħ biss fit-22 ta’ Marzu 2021 meta ġiet iffirmata miż-żewġ partijiet kontraenti, u effettivament tħalli perjodu ta’ 22 jum ta’ forniment ta’ servizz mingħajr kuntratt; jinnota li għalkemm l-Aġenzija kienet skopriet dan, hija ma kinitx ippreżentat nota ta’ eċċezzjoni; jinnota l-konferma tal-Aġenzija li d-dewmien seħħ minħabba żball; jilqa’ t-tweġiba tal-Aġenzija li se ssaħħaħ il-kontrolli u l-proċeduri tagħha biex jitnaqqas ir-riskju ta’ dewmien fid-dħul f’estensjonijiet ta’ kuntratti u biex jiġi żgurat li jiġu ppreżentati noti ta’ eċċezzjoni meta jseħħ ksur involontarju tar-Regolament Finanzjarju; |
23. |
Jinnota mir-rapport tal-Qorti li, fl-ambitu ta’ kuntratt qafas għall-forniment ta’ servizzi tal-IT, l-Aġenzija ħallset servizzi anċillari, fl-ambitu ta’ pakkett ta’ xogħol separat, għal ammont ta’ EUR 25 000 mingħajr ma l-ewwel ivverifikat liema profili eżatti u rati ta’ kuljum il-kuntrattur kien applika b’mod effettiv meta pprovda s-servizzi u ħareġ il-fatturi għalihom; jinnota mit-tweġiba tal-Aġenzija li hija ħadet passi biex tindirizza t-tħassib tal-Qorti għal ordnijiet futuri; |
24. |
Ifakkar fl-importanza li jissaħħu s-sistemi ta’ ġestjoni u kontroll biex jiġi żgurat il-funzjonament xieraq tal-Aġenzija; jinsisti bil-qawwa fuq il-ħtieġa ta’ sistemi ta’ ġestjoni u kontroll effettivi biex jiġu evitati każijiet potenzjali ta’ kunflitt ta’ interess, kontrolli ex ante/ex post neqsin, ġestjoni inadegwata tal-impenji baġitarji u legali, u nuqqasijiet ta’ rappurtar ta’ kwistjonijiet fir-reġistru tal-eċċezzjonijiet; |
Diġitalizzazzjoni u tranżizzjoni ekoloġika
25. |
Jinnota b’apprezzament li f’April 2021 l-Aġenzija adottat il-qafas ta’ diġitalizzazzjoni tal-EEA-Eionet, billi wettqet għadd ta’ attivitajiet ewlenin bħall-modernizzazzjoni tal-infrastruttura tad-data tal-Aġenzija u l-bidu ta’ proġetti li jesploraw l-użu tal-intelliġenza artifiċjali; jilqa’ l-fatt li l-Aġenzija nediet diversi prodotti diġitali u ta’ għarfien ġodda fl-2021, inkluż l-Osservatorju Ewropew tal-Klima u tas-Saħħa u l-Esplokatur Ewropew tad-Data dwar il-Klima fi ħdan il-pjattaforma Climate-ADAPT u rapporti web interattivi dwar il-kwalità tal-arja u l-perikli klimatiċi; |
26. |
Jinnota fir-rigward tan-network tal-IT tal-Aġenzija u x-xenarju tat-theddida għaċ-ċibersigurtà, li l-Aġenzija introduċiet networks “Blu/ekoloġiċi” fl-uffiċċji, fejn in-network ekoloġiku huwa separazzjoni tal-laptops tal-persunal mis-sistemi interni kollha u n-network blu huwa għal-laptops li għadhom ma jistgħux jiġu iżolati u li huma ristretti f’termini ta’ software disponibbli; |
27. |
Jinnota s-sistema ta’ ġestjoni ambjentali tal-Aġenzija u l-impenn tal-Aġenzija li ssir organizzazzjoni “newtrali għall-klima”; jinnota li fl-2021 l-Aġenzija kkummissjonat studju bil-għan li tidentifika azzjonijiet fattibbli biex jitnaqqsu l-emissjonijiet ta’ gassijiet serra tal-Aġenzija u tgħin biex sal-2030 tinkiseb in-newtralità klimatika; |
28. |
Ifakkar fl-importanza li tiżdied id-diġitalizzazzjoni tal-Aġenzija f’termini ta’ operat u ġestjoni interni iżda anki sabiex titħaffef id-diġitalizzazzjoni tal-proċeduri; jisħaq fuq il-ħtieġa li l-Aġenzija tkompli tkun proattiva f’dan ir-rigward sabiex jiġi evitat distakk diġitali bejn l-aġenziji tal-Unjoni; jiġbed l-attenzjoni, madankollu, għall-ħtieġa li jittieħdu l-miżuri ta’ sigurtà kollha meħtieġa biex jiġi evitat kwalunkwe riskju għas-sigurtà online tal-informazzjoni pproċessata; |
29. |
Iħeġġeġ lill-Aġenzija taħdem f’kooperazzjoni mill-qrib mal-Aġenzija tal-Unjoni Ewropea għaċ-Ċibersigurtà (ENISA) u mal-Iskwadra ta’ Rispons f’Emerġenza relatata mal-Kompjuters għall-istituzzjonijiet, il-korpi u l-aġenziji Ewropej (CERT-UE) u twettaq valutazzjonijiet tar-riskju regolari tal-infrastruttura tal-IT tagħha u tiżgura li jsiru awditi u testijiet regolari tad-difiżi ċibernetiċi tagħha; jissuġġerixxi li jiġu offruti regolarment programmi ta’ taħriġ aġġornati relatati maċ-ċibersigurtà għall-persunal kollu, inkluż il-maniġment, fl-Aġenzija; jistieden lill-Aġenzija tiżviluppa l-politika taċ-ċibersigurtà tagħha b’mod aktar rapidu, tressaqha qabel il-31 ta’ Diċembru 2023 u tirrapporta lura lill-awtorità ta’ kwittanza; |
Kontinwità tal-operat matul il-kriżi tal-COVID-19
30. |
Jinnota li l-Aġenzija, bi tweġiba għar-restrizzjonijiet relatati mal-pandemija, introduċiet reklutaġġ online, appoġġjat mill-implimentazzjoni tal-pjattaforma ta’ reklutaġġ Systal, li ppermettiet lill-Aġenzija tlesti għadd kbir ta’ reklutaġġi fl-2020 u fl-2021 u tħalli rata baxxa ta’ pożizzjonijiet vakanti fi tmiem is-sena; |
31. |
Jilqa’ l-fatt li, minkejja l-pandemija tal-COVID-19 li għaddejja bħalissa, il-ħidma tal-Aġenzija kompliet tkun effiċjenti, flessibbli u mwettqa mingħajr dewmien bla bżonn fl-2021; iħeġġeġ lill-Aġenzija biex tqiegħed fil-prattika t-tagħlimiet rigward il-metodi ta’ ħidma ibridi u b’mod remot, sabiex tirrikonoxxi aħjar il-laqgħat u l-kompiti li jistgħu jsiru b’mod aktar effiċjenti b’mod remot, pjuttost milli wiċċ imb wiċċ fil-futur; |
32. |
Jinnota li fl-2021 l-Aġenzija bdiet timplimenta l-miżuri ta’ referenza taċ-ċibersigurtà b’antiċipazzjoni għar-Regolament li jistabbilixxi miżuri dwar iċ-ċibersigurtà fi ħdan l-istituzzjonijiet, il-korpi, l-uffiċċji u l-aġenzji tal-Unjoni (“ir-Regolament dwar iċ-Ċibersigurtà”), kif ukoll approċċ ta’ fiduċja żero u awtentikazzjoni b’diversi fatturi għas-servizzi interni kollha, u li l-privileġġi amministrattivi tal-IT ġew rieżaminati u ristretti għall-minimu; |
Kummenti oħra
33. |
Jinnota li fl-2021 l-Aġenzija nediet proġett pluriennali u b’diversi komponenti biex tissimplifika l-preżenza online tagħha fis-snin li ġejjin, tiżviluppa politiki aktar b’saħħithom dwar il-kontenut tal-web fil-pjattaformi kollha tal-Aġenzija u li tistabbilixxi loġika mtejba tan-navigazzjoni; jinnota li s-sit web korporattiv il-ġdid se jiżgura l-konformità mal-linji gwida dwar l-aċċessibbiltà tad-WCAG 2.1; |
34. |
Ifakkar fl-importanza li l-pubbliku jiġi infurmat biżżejjed dwar ir-riskji ta’ nuqqas ta’ azzjoni fir-rigward tal-ġlieda kontra t-tibdil fil-klima u l-adattament għalih, jilqa’ l-attivitajiet ta’ komunikazzjoni tal-Aġenzija f’dan il-kuntest, kemm jekk permezz ta’ kontenut awdjoviżiv, dibattiti online, kompetizzjoni annwali tar-ritratti kif ukoll permezz ta’ attivitajiet ta’ komunikazzjoni lokali, u jistieden lill-Aġenzija tiżviluppa u, jekk ikun possibbli, iżżid l-attivitajiet tagħha fil-perjodu li ġej. |
35. |
Jinnota li l-Aġenzija ppresediet in-Network tal-Aġenziji tal-UE (EUAN) inkluż il-biċċa l-kbira tas-subnetworks tagħha, f’konformità mal-prijoritajiet tal-UE f’dawk li huma d-diġitalizzazzjoni, l-ekoloġizzazzjoni tar-reżiljenza u l-irkupru, filwaqt li fost l-oħrajn ħadmet fuq is-sostenn tat-tranżizzjoni ekoloġika u kkontribwixxiet għall-ekoloġizzazzjoni tal-amministrazzjoni tal-EUAN; |
36. |
Jistieden lill-Aġenzija tkompli tiżviluppa s-sinerġiji tagħha (pereżempju r-riżorsi umani, il-ġestjoni tal-bini, is-servizzi tal-IT u s-sigurtà), u biex issaħħaħ il-kooperazzjoni tagħha, l-iskambju tal-prattiki tajba u d-diskussjonijiet tagħha rigward oqsma ta’ interess reċiproku ma’ aġenziji oħra tal-Unjoni bil-għan li tittejjeb l-effiċjenza; |
37. |
Jirreferi, rigward kummenti oħra ta’ natura orizzontali li jakkumpanjaw id-deċiżjoni tiegħu dwar il-kwittanza, għar-riżoluzzjoni tiegħu tal-10 ta’ Mejju 2023 (2) dwar il-prestazzjoni, il-ġestjoni finanzjarja u l-kontroll tal-aġenziji. |
(1) ĠU C 141, 29.3.2022, p. 12.
(2) Testi adottati, P9_TA(2023)0190.