(1)

Ir-Regolament Delegat tal-Kummissjoni (UE) 2020/2015 (2) jipprovdi dettalji dwar kif għandu jiġi implimentat l-obbligu ta’ ħatt l-art għal ċertu sajd demersali fl-Ilmijiet tal-Punent għall-perjodu 2021-2023.

(2)

Ir-Regolament Delegat (UE) 2020/2015 ġie emendat l-aħħar permezz tar-Regolament Delegat (UE) 2022/2290 (3).

(3)

Fil-25 ta’ Ottubru 2022, Franza infurmat lill-Kummissjoni bi żball introdott fir-Regolament Delegat (UE) 2020/2015 bir-Regolament Delegat (UE) 2022/2290. Dan jikkonċerna eżenzjoni ġdida marbuta mal-kapaċità ta’ sopravivenza għal-lingwata komuni (Solea solea) li tkun iżgħar mid-daqs minimu ta’ referenza għall-konservazzjoni (MCRS) li tinqabad fid-diviżjoni 7e tal-ICES minn bastimenti b’tul ta’ inqas minn 12-il metru u li jużaw xbieki tat-tkarkir tal-qiegħ bid-diriġenti (OTB), b’daqs tal-malja tal-manka ta’ aktar minn 80 mm. L-iżball huwa li ma ġiex inkluż id-daqs tal-malja tal-manka ta’ 80 mm u li ma huwiex iddefinit limitu ta’ daqs.

(4)

Franza talbet lill-Kummissjoni tikkoreġi dak l-iżball, sabiex l-eżenzjoni kkonċernata tkun tinkludi daqs tal-malja ekwivalenti għal 80 mm. Franza spjegat li l-bastimenti li jeħtieġu din l-eżenzjoni jużaw meded ta’ daqsijiet tal-malji li jinkludu t-80 mm. Il-konfużjoni tirriżulta minn differenza ta’ abbozzar bejn il-parti prinċipali tar-rakkomandazzjoni konġunta li fuqha huwa bbażat l-att delegat, u l-anness tiegħu. Filwaqt li l-anness tar-rakkomandazzjoni konġunta kien jinkludi b’mod espliċitu d-daqs tal-malja ta’ 80 mm sa 99 mm, sfortunatament l-abbozzar kien differenti fil-parti prinċipali tar-rakkomandazzjoni konġunta.

(5)

Barra minn hekk, fil-parir tiegħu, il-Kumitat Xjentifiku, Tekniku u Ekonomiku għas-Sajd (STECF) kien ivvaluta l-eżenzjoni mitluba wkoll għal daqs tal-malja ta’ 80 mm (u mhux biss għal daqs tal-malja ta’ aktar minn 80 mm) b’limitu ta’ 99 mm.

(6)

Għalhekk jenħtieġ li tingħata l-eżenzjoni għal-lingwata komuni li tkun iżgħar mid-daqs minimu ta’ referenza għall-konservazzjoni (MCRS) magħmula bl-użu ta’ rkaptu tat-tkarkir bid-diriġenti b’daqs tal-malja tal-manka ta’ 80-99 mm, minn bastimenti ta’ inqas minn 12-il metru sal-31 ta’ Diċembru 2023.

(7)

Għalhekk, jenħtieġ li l-Artikolu 4(1) tar-Regolament Delegat (UE) 2020/2015 jiġi kkoreġut biex ikopri rkaptu tat-tkarkir bid-diriġenti b’daqs tal-malja tal-manka ta’ 80 sa 99 mm, minflok dak li jkun aktar minn 80 mm biss.

(8)

Jenħtieġ li dan ir-Regolament jidħol fis-seħħ mill-aktar fis possibli, billi l-miżuri previsti f’dan ir-Regolament għandhom impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati. Jenħtieġ li japplika mill-1 ta’ Jannar 2023, peress li l-bastimenti ta’ inqas minn12-il metru, li jeħtieġu din l-eżenzjoni jużaw meded ta’ daqsijiet tal-malji li jinkludu t-80 mm,