(1)

Fost l-oħrajn, ir-Regolament Delegat tal-Kummissjoni (UE) 2017/1798 (2) jistabbilixxi rekwiżiti speċifiċi dwar il-kompożizzjoni tas-sostituti tad-dieta kollha għall-kontroll tal-piż, li huma bbażati fuq l-iżjed pariri xjentifiċi riċenti (3) tal-Awtorità Ewropea dwar is-Sigurtà fl-Ikel (“l-Awtorità”) dwar din il-kwistjoni.

(2)

Ir-Regolament Delegat (UE) 2017/1798 jipprevedi li s-sostituti tad-dieta kollha għall-kontroll tal-piż għandu jkun fihom mill-inqas 11-il gramma ta’ aċidu linolejku u 1,4 grammi ta’ aċidu alfa-linoleniku biex jipprovdu r-razzjon totali ta’ kuljum, u li ma għandux ikun fihom iżjed minn 250 mg ta’ manjeżju bħala razzjon totali ta’ kuljum, kif stabbilit fil-punti 4.1, 4.2 u 6 tal-Anness I ta’ dak ir-Regolament.

(3)

Fis-7 ta’ Novembru 2019, il-Kummissjoni rċeviet talba, flimkien ma’ lista ta’ provi xjentifiċi ġodda, mingħand Total Diet & Meal Replacements Europe, biex issir reviżjoni tar-rekwiżiti dwar il-kompożizzjoni tal-aċidu linolejku, tal-aċidu alfa-linoleniku, u tal-manjeżju fir-Regolament Delegat (UE) 2017/1798. Fl-10 ta’ Marzu 2020 il-Kummissjoni talbet lill-Awtorità tevalwa l-evidenza xjentifika u kull evidenza xjentifika ġdida oħra rilevanti disponibbli, u jekk ikun hemm bżonn, taġġorna l-konklużjonijiet tal-opinjoni xjentifika l-aktar riċenti tagħha (4) dwar il-livelli minimi tal-aċidu linolejku u tal-aċidu alfa-linoleniku, kif ukoll dwar il-livell massimu tal-manjeżju fis-sostituti tad-dieta kollha għall-kontroll tal-piż.

(4)

Fid-dikjarazzjoni tagħha tal-15 ta’ April 2021 dwar l-evidenza xjentifika addizzjonali għall-kompożizzjoni essenzjali tas-sostituti tad-dieta kollha għall-kontroll tal-piż (5), l-Awtorità kkonkludiet li ma hemmx għalfejn jinżied l-aċidu linolejku fis-sostituti tad-dieta kollha għall-kontroll tal-piż, peress li l-ammont li jiġi rrilaxxat mit-tessut adipuż waqt it-telf tal-piż meta wieħed ikun qed jikkonsma sostitut tad-dieta kollha għall-kontroll tal-piż huwa biżżejjed biex jagħmel tajjeb għall-konsum xieraq ta’ aċidu linolejku. Barra minn hekk, l-Awtorità kkonkludiet li filwaqt li madwar 40 % tal-konsum xieraq ta’ aċidu alfa-linoleniku jista’ jkun ipprovdut bir-rilaxx mit-tessut adipuż waqt it-telf tal-piż minn individwi li jkollhom piż żejjed jew li jkunu obeżi meta jkunu qed jikkunsmaw sostitut tad-dieta kollha għall-kontroll tal-piż, biex jintlaħaq il-konsum xieraq ta’ kuljum tal-aċidu alfa-linoleniku, ikun irid jingħata 0,8 g kuljum ta’ aċidu linolejku mis-sostitut tad-dieta kollha għall-kontroll tal-piż. L-Awtorità kkonkludiet ukoll li żieda sa 350 mg kuljum fit-total massimu tal-kontenut ta’ manjeżju fis-sostituti tad-dieta kollha għall-kontroll tal-piż ma tqajjimx tħassib. Filwaqt li l-manjeżju jista’ jikkawża d-dijarea, il-probabbiltà li l-manjeżju jikkawża dijarea severa li tkun ta’ tħassib għall-individwi obeżi jew li jkollhom piż żejjed li jikkunsmaw sostitut tad-dieta kollha għall-kontroll tal-piż minħabba dan il-konsum hija baxxa meta wieħed iqis li dawk l-individwi x’aktarx li jkunu jbatu iżjed mill-konstipazzjoni milli mid-dijarea.

(5)

Abbażi tal-konklużjonijiet tal-Awtorità filwaqt li jitqies il-progress xjentifiku, jixraq li jitneħħa r-rekwiżit dwar l-aċidu linolejku fir-Regolament Delegat (UE) 2017/1798, li jitnaqqas il-kontenut minimu ta’ aċidu alfa-linoleniku meħtieġ skont dak ir-Regolament Delegat, u li jiżdied il-massimu tal-kontenut ta’ manjeżju permess f’dawk il-prodotti.

(6)

Għaldaqstant jenħtieġ li l-Anness I tar-Regolament Delegat (UE) 2017/1798 jiġi emendat skont dan,