(1)

Wara talba mingħand il-Portugall fil-11 ta’ Awwissu 2020, il-Kunsill, permezz tad-Deċiżjoni ta’ Implimentazzjoni (UE) 2020/1354 (2), ta assistenza finanzjarja lill-Portugall fil-forma ta’ self li jammonta għal massimu ta’ EUR 5 934 462 488 b’maturità medja massima ta’ 15-il sena, bil-ħsieb li tikkomplementa l-isforzi nazzjonali tal-Portugall biex jindirizza l-impatt tat-tifqigħa tal-COVID-19 u jirreaġixxi għall-konsegwenzi soċjoekonomiċi ta’ dik it-tifqigħa għall-ħaddiema u għall-persuni li jaħdmu għal rashom.

(2)

Is-self kellu jintuża mill-Portugall biex jiffinanzja skemi ta’ xogħol b’ħinijiet iqsar, miżuri simili u miżuri relatati mas-saħħa, kif imsemmi fl-Artikolu 3 tad-Deċiżjoni ta’ Implimentazzjoni (UE) 2020/1354.

(3)

It-tifqigħa tal-COVID-19 ipparalizzat parti sostanzjali tal-forza tax-xogħol fil-Portugall. Dan wassal għal żidiet għal għarrieda u qawwija ripetuti fin-nefqa pubblika fil-Portugall fir-rigward ta’ miżuri ġodda li l-Portugall implimenta, jiġifieri l-iskema ta’ appoġġ straordinarju għal ħaddiema li jaħdmu għal rashom, ħaddiema mingħajr aċċess għal mekkaniżmi oħrajn ta’ protezzjoni soċjali, u maniġers li l-introjtu tagħhom ġie affettwat b’mod partikolari mill-pandemija tal-COVID-19, l-iskema ta’ appoġġ soċjali għall-artisti, l-awturi, it-tekniċi u professjonisti oħrajn tal-arti, u r-reklutaġġ ta’ professjonisti tas-saħħa addizzjonali u s-sahra fis-Servizz Nazzjonali tas-Saħħa biex jgħinu jindirizzaw l-isfidi relatati mal-pandemija.

(4)

It-tifqigħa tal-COVID-19 u l-miżuri straordinarji implimentati mill-Portugall fl-2020 u l-2021 biex titrażżan dik it-tifqigħa u l-impatt soċjoekonomiku u l-impatt marbut mas-saħħa tagħha kellhom, u għadu qed ikollhom, impatt drammatiku fuq il-finanzi pubbliċi. Il-Portugall kellu defiċit u dejn tal-gvern estiż ta’ 5,8 % u 135,2 % tal-prodott domestiku gross (PDG) rispettivament sa tmiem l-2020. Skont it-tbassir tal-ħarifa 2021 tal-Kummissjoni, id-defiċit u d-dejn tal-gvern estiż tal-Portugall huma previsti li jonqsu għal 4,5 % u 128,1 % tal-PDG rispettivament fl-2021, u l-PDG tiegħu huwa previst li jiżdied b’ 4,5 % fl-2021.

(5)

Fid-9 ta’ Diċembru 2021 il-Portugall talab lill-Unjoni testendi l-lista tal-miżuri li diġà ngħata assistenza finanzjarja għalihom permezz tad-Deċiżjoni ta’ Implimentazzjoni (UE) 2020/1354 sabiex tikkomplementa b’mod ulterjuri l-isforzi nazzjonali tiegħu li wettaq fl-2020 u l-2021 biex jindirizza l-impatt tat-tifqigħa tal-COVID-19 u jirreaġixxi għall-konsegwenzi soċjoekonomiċi tat-tifqigħa għall-ħaddiema u għal dawk li jaħdmu għal rashom, b’mod partikolari, il-miżuri msemmija fil-premessi (6) u(7).

(6)

Il-“Liġi Nru 75-B/2020 tal-31 ta’ Diċembru” u l-“Ordinanza tal-Gvern Nru 19-A/2021 tal-25 ta’ Jannar” sussegwenti, li huma msemmijin fit-talba tal-Portugall tad-9 ta’ Diċembru 2021, introduċew skema ta’ appoġġ straordinarju għall-ħaddiema li jaħdmu għal rashom, għall-ħaddiema mingħajr aċċess għal mekkaniżmi oħrajn ta’ protezzjoni soċjali, u għall-maniġers li l-introjtu tagħhom ġie affettwat b’mod partikolari mill-pandemija tal-COVID-19. Fil-każ ta’ ħaddiema li jaħdmu għal rashom, il-miżura tipprovdi benefiċċju ugwali għal żewġ terzi tat-tnaqqis fl-introjtu fix-xahar tal-ħaddiema, bejn il-medja ta’ kull xahar skont l-aħħar rapport tal-introjtu trimestrali u l-medja ta’ kull xahar tal-2019, b’limitu massimu ta’ EUR 501,16. Il-ħaddiema eliġibbli li jaħdmu għal rashom huma dawk li esperjenzaw tnaqqis fl-introjtu ta’ mill-inqas 40 % fil-perjodu minn Marzu sa Diċembru 2020, meta mqabbel mal-2019. Fil-każ ta’ ħaddiema mingħajr aċċess għal mekkaniżmi oħra ta’ protezzjoni soċjali, il-miżura tipprovdi: (i) għall-impjegati, benefiċċju ugwali għad-differenza bejn il-valur ta’ referenza ta’ kull xahar ta’ EUR 501,16 u l-paga medja fix-xahar għal kull adult fl-unità domestika rispettiva; jew, (ii) għall-ħaddiema li jaħdmu għal rashom, benefiċċju ugwali għal żewġ terzi tat-tnaqqis fl-introjtu fix-xahar tal-ħaddiema, bejn il-medja ta’ kull xahar skont l-aħħar rapport tal-introjtu trimestrali u l-medja ta’ kull xahar tal-2019, b’limitu massimu ta’ EUR 501,16. Fil-każ ta’ maniġers, il-miżura tipprevedi benefiċċju ugwali jew għall-introjtu medju fix-xahar ta’ referenza tagħhom jekk ikun inqas minn darba u nofs l-indiċi ta’ appoġġ soċjali tal-Portugall (EUR 438,81) fl-2021, jew għal żewġ terzi tal-introjtu medju fix-xahar ta’ referenza tagħhom jekk ikun daqs jew ogħla minn dak l-indiċi. Il-maniġers eliġibbli huma dawk li l-attività kummerċjali tagħhom ġiet temporanjament sospiża minħabba l-pandemija tal-COVID-19, jew li esperjenzaw telf fid-dħul ta’ mill-inqas 40 % fil-perjodu ta’ 30 jum ta’ qabel it-talba għal appoġġ, meta mqabbel mal-istess xahar tas-sena ta’ qabel jew mal-medja fix-xahar tax-xahrejn qabel dak il-perjodu. F’kull każ, il-benefiċċju għandu limitu aktar baxx ta’ EUR 50 jew 50 % tat-tnaqqis fl-introjtu fix-xahar osservat jekk dan tal-aħħar jaqa’ bejn 50 % u 100 % tal-indiċi ta’ appoġġ soċjali tal-Portugall, jew ta’ EUR 219.40 jekk it-tnaqqis fl-introjtu jaqbeż dak l-indiċi.

(7)

“L-Anness tar-Riżoluzzjoni tal-Kunsill tal-Ministri Nru 41/2020 tas-6 ta’ Ġunju” u l-“Ordinanza tal-Gvern Nru 180/2020 tat-3 ta’ Awwissu” u “l-Ordinanza tal-Gvern Nru 37-A/2021 tal-15 ta’ Frar” sussegwenti, li huma msemmijin fit-talba tal-Portugall tal-9 ta’ Diċembru 2021, jintroduċu skema ta’ appoġġ soċjali għall-artisti, l-awturi, it-tekniċi u professjonisti oħrajn tal-arti. L-iskema tipprevedi benefiċċju ugwali għall-indiċi ta’ appoġġ soċjali tal-Portugall (EUR 438,81).

(8)

Il-Portugall introduċa wkoll sensiela ta’ miżuri ġodda relatati mas-saħħa, li implimenta biex jindirizza t-tifqigħa tal-COVID-19, b’mod partikolari l-miżuri msemmija fil-premessa (9).

(9)

Id- “Digriet Amministrattiv Nru 10-A/2020 tat-13 ta’ Marzu” u d- “Digriet Amministrattiv Nru 10-A/2021 tat-2 ta’ Frar” sussegwenti, li huma msemmijin fit-talba tal-Portugall tad-9 ta’ Diċembru 2021, ipprevedew ir-reklutaġġ ta’ professjonisti tas-saħħa addizzjonali u s-sahra fis-Servizz Nazzjonali tas-Saħħa biex jgħinu jindirizzaw l-isfidi relatati mal-pandemija. B’mod partikolari, il-proċess amministrattiv sottostanti għar-reklutaġġ ta’ ħaddiema b’kuntratti b’terminu fiss mis-Servizz Nazzjonali tas-Saħħa ġie ssimplifikat, u ġew impjegati tobba u infermiera addizzjonali minn mindu bdiet il-pandemija tal-COVID-19. Barra minn hekk, il-limiti legali stabbiliti għas-sahra mill-impjegati taċ-ċivil ġew sospiżi għas-Servizz Nazzjonali tas-Saħħa, u l-organizzazzjoni ta’ xiftijiet bl-użu ta’ xogħol supplimentari minn tobba u infermiera speċjalisti, jekk meħtieġ, saret possibbli sabiex tiġi indirizzata l-pandemija tal-COVID-19.

(10)

Il-Portugall jissodisfa l-kundizzjonijiet għat-talba ta’ assistenza finanzjarja stabbiliti fl-Artikolu 3 tar-Regolament (UE) 2020/672. Il-Portugall ipprovda evidenza xierqa lill-Kummissjoni li n-nefqa pubblika effettiva u ppjanata żdiedet b’EUR 5 934 462 488 mill-1 ta’ Frar 2020 minħabba l-miżuri nazzjonali li ttieħdu biex jiġu indirizzati l-effetti soċjoekonomiċi tat-tifqigħa tal-COVID-19. Din tikkostitwixxi żieda għall-għarrieda u qawwija minħabba li hija relatata ma’ miżuri ġodda relatati mal-iskemi ta’ xogħol b’ħinijiet iqsar u miżuri simili li jkopru proporzjon sinifikanti tal-impriżi u tal-forza tax-xogħol fil-Portugall.

(11)

Il-Kummissjoni kkonsultat lill-Portugall u vverifikat iż-żieda għall-għarrieda u qawwija fin-nefqa pubblika effettiva u ppjanata relatata direttament mal-iskemi ta’ xogħol b’ħinijiet iqsar u miżuri simili, kif ukoll ir-rikors għal miżuri rilevanti relatati mas-saħħa marbutin mat-tifqigħa tal-COVID-19, kif imsemmijin fit-talba tad-9 ta’ Diċembru 2021, f’konformità mal-Artikolu 6 tar-Regolament (UE) 2020/672.

(12)

Il-miżuri relatati mas-saħħa mitluba mill-Portugall, inkluż il-miżuri addizzjonali relatati mas-saħħa msemmijin fil-premessa (9), jammontaw għal EUR 1 513 823 304.

(13)

Għalhekk jenħtieġ li l-assistenza finanzjarja diġà mogħtija permezz tad-Deċiżjoni ta’ Implimentazzjoni (UE) 2020/1354 tkopri wkoll il-miżuri l-ġodda li implimenta l-Portugall li huma msemmijin fil-premessi (6), (7) u (9).

(14)

Jenħtieġ li din id-Deċiżjoni tkun mingħajr preġudizzju għall-eżitu ta’ kull proċedura relatata ma’ distorsjonijiet tal-operat tas-suq intern li tista’ titwettaq, b’mod partikolari skont l-Artikoli 107 u 108 tat-Trattat. Din ma twarrabx il-ħtieġa li l-Istati Membri jinnotifikaw każijiet ta’ għajnuna potenzjali mill-Istat lill-Kummissjoni skont l-Artikolu 108 tat-Trattat.

(15)

Jenħtieġ li l-Portugall jinforma lill-Kummissjoni fuq bażi regolari bl-implimentazzjoni tan-nefqa pubblika ppjanata, sabiex il-Kummissjoni tkun tista’ tivvaluta l-punt sa fejn il-Portugall implimenta dik in-nefqa.

(16)

Id-deċiżjoni li tingħata assistenza finanzjarja ttieħdet b’kunsiderazzjoni tal-ħtiġijiet eżistenti u mistennija tal-Portugall, kif ukoll it-talbiet għal assistenza finanzjarja skont ir-Regolament (UE) 2020/672 diġà ppreżentati jew ippjanati li jiġu ppreżentati minn Stati Membri oħrajn, filwaqt li jiġu applikati l-prinċipji ta’ trattament ugwali, solidarjetà, proporzjonalità u trasparenza,

(1)

L-Artikolu 3 huwa sostitwit b’dan li ġej:

(2)

L-Artikolu 4 huwa sostitwit b’dan li ġej: