This document is an excerpt from the EUR-Lex website
Document E2009C0471
EFTA Surveillance Authority Decision No 471/09/COL of 25 November 2009 amending, for the seventy-fourth time, the procedural and substantive rules in the field of State aid by introducing a new chapter on criteria for the analysis of the compatibility of State aid for training subject to individual notification
Deċiżjoni tal-Awtorità ta’ Sorveljanza tal-EFTA Nru 471/09/COL tal- 25 ta’ Novembru 2009 li temenda, għall-erbgħa u sebgħin darba, ir-regoli proċedurali u sostantivi fil-qasam tal-għajnuna mill-Istat billi tintroduċi kapitolu ġdid għall-analiżi tal-kompatibbiltà tal-għajnuna mill-Istat għat-taħriġ soġġetta għal notifika individwali
Deċiżjoni tal-Awtorità ta’ Sorveljanza tal-EFTA Nru 471/09/COL tal- 25 ta’ Novembru 2009 li temenda, għall-erbgħa u sebgħin darba, ir-regoli proċedurali u sostantivi fil-qasam tal-għajnuna mill-Istat billi tintroduċi kapitolu ġdid għall-analiżi tal-kompatibbiltà tal-għajnuna mill-Istat għat-taħriġ soġġetta għal notifika individwali
ĠU L 231, 8.9.2011, p. 23–28
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
In force
8.9.2011 |
MT |
Il-Ġurnal Uffiċjali tal-Unjoni Ewropea |
L 231/23 |
DEĊIŻJONI TAL-AWTORITÀ TA’ SORVELJANZA TAL-EFTA
Nru 471/09/COL
tal-25 ta’ Novembru 2009
li temenda, għall-erbgħa u sebgħin darba, ir-regoli proċedurali u sostantivi fil-qasam tal-għajnuna mill-Istat billi tintroduċi kapitolu ġdid għall-analiżi tal-kompatibbiltà tal-għajnuna mill-Istat għat-taħriġ soġġetta għal notifika individwali
L-AWTORITÀ TA’ SORVELJANZA TAL-EFTA (1),
WARA LI KKUNSIDRAT il-Ftehim dwar iż-Żona Ekonomika Ewropea (2), b’mod partikolari l-Artikoli 61 u 63 u l-Protokoll 26 tiegħu,
WARA LI KKUNSIDRAT il-Ftehim bejn l-Istati tal-EFTA dwar il-Ħolqien ta’ Awtorità ta’ Sorveljanza u Qorti tal-Ġustizzja (3), u partikolarment l-Artikolu 24 u l-Artikolu 5(2)(b) tiegħu,
BILLI taħt l-Artikolu 24 tal-Ftehim tas-Sorveljanza u l-Qorti, l-Awtorità għandha ddaħħal fis-seħħ id-dispożizzjonijiet tal-Ftehim taż-ŻEE dwar l-għajnuna mill-Istat,
BILLI skont l-Artikolu 5(2)(b) tal-Ftehim dwar is-Sorveljanza u l-Qorti, l-Awtorità għandha toħroġ avviżi jew linji gwida dwar kwistjonijiet trattati fil-Ftehim taż-ŻEE, jekk dak il-Ftehim jew il-Ftehim dwar is-Sorveljanza u l-Qorti hekk jipprovdu espressament jew jekk l-Awtorità tqis li hu meħtieġ,
FILWAQT LI TFAKKAR ir-Regoli Proċedurali u Sostantivi fil-Qasam tal-Għajnuna mill-Istat adottati fid-19 ta’ Jannar 1994 mill-Awtorità (4),
BILLI, fil-11 ta’ Awwissu 2009, il-Kummissjoni tal-Komunitajiet Ewropej (minn hawn ’il quddiem il-Kummissjoni KE) ppubblikat Komunikazzjoni dwar il-kriterji għall-analiżi tal-kompatibbiltà tal-għajnuna mill-Istat għat-taħriġ soġġett għan-notifika individwali (5),
BILLI din il-Komunikazzjoni hija wkoll rilevanti għaż-Żona Ekonomika Ewropea,
BILLI għandha tkun żgurata l-applikazzjoni uniformi tar-regoli tal-għajnuna mill-Istat taż-ŻEE fiż-Żona Ekonomika Ewropea kollha,
BILLI, skont il-punt II taħt it-titolu “ĠENERALI” fl-aħħar tal-Anness XV tal-Ftehim taż-ŻEE, l-Awtorità, wara konsultazzjoni mal-Kummissjoni, għandha tadotta atti li jkunu jikkorrispondu ma’ dawk adottati mill-Kummisssjoni Ewropea,
WARA li kkonsultat mal-Kummissjoni Ewropea,
WAQT LI TFAKKAR li l-Awtorità kkonsultat mal-Istati tal-EFTA permezz ta’ ittra datata t-2 ta’ Ottubru 2009 dwar is-suġġett (Avveniment Nri 532318, 532294 u 532322.
ADOTTAT DIN ID-DEĊIŻJONI:
Artikolu 1
Il-linji gwida dwar l-Għajnuna mill-Istat għandhom ikunu emendati bl-introduzzjoni ta’ kapitolu ġdid dwar il-kriterji għall-analiżi tal-kompatibbiltà tal-għajnuna mill-Istat għal taħriġ soġġett għall-notifika individwali. Il-Kapitolu l-ġdid jinsab f’Anness I ta’ din id-Deċiżjoni.
Artikolu 2
Il-verżjoni Ingliża biss hija awtentika.
Magħmul fi Brussell, il-25 ta’ Novembru 2009.
Għall-Awtorità tas-Sorveljanza tal-EFTA
Per SANDERUD
President
Kurt JÄGER
Membru tal-Kulleġġ
(1) Minn hawn ’il quddiem imsejħa “l-Awtorità”.
(2) Minn hawn ’il quddiem imsejjaħ “il-Ftehim taż-ŻEE”.
(3) Minn hawn ’il quddiem imsejjaħ “il-Ftehim dwar is-Sorveljanza u l-Qorti”.
(4) Il-linji gwida dwar l-applikazzjoni u l-interpretazzjoni tal-Artikoli 61 u 62 tal-Ftehim dwar iż-ŻEE u l-Artikolu 1 tal-Protokoll 3 tal-Ftehim dwar is-Sorveljanza u l-Qorti, adottati u maħruġin mill-Awtorità fid-19 ta’ Jannar 1994, ippubblikati f’ Il-Ġurnal Uffiċjali tal-Unjoni Ewropea L 231 tat-3 ta’ Settembru 1994 p. 1 u fis-Supplimenti taż-ŻEE Nru 32 tat-3 ta’ Settembru 1994 p. 1. Minn hawn ’il quddiem imsejħa “l-Linji gwida dwar l-Għajnuna mill-Istat”. Il-verżjoni aġġornata tal-Linji gwida dwar l-Għajnuna mill-Istat tinsab fuq il-websajt tal-Awtorità: http://www.eftasurv.int/state-aid/legal-framework/state-aid-guidelines/
(5) Ippubblikat fil-ĠU C 188, 11.8.2009, p. 1.
ANNESS
KRITERJI GĦALL-ANALIŻI TAL-KOMPATIBBILTÀ TAL-GĦAJNUNA MILL-ISTAT GĦAT-TAĦRIĠ SOĠĠETTA GĦAL NOTIFIKA INDIVIDWALI (1)
1. Introduzzjoni
1. |
It-taħriġ ġeneralment għandu effetti esterni pożittivi għas-soċjetà kollha kemm billi jżid il-grupp ta’ ħaddiema mħarrġa li minnhom jistgħu jieħdu l-impriżi u kemm billi jtejjeb il-kompetittività tal-ekonomija u jippromwovi soċjetà tal-għarfien li kapaċi tħaddan triq ta’ żvilupp iżjed innovattiva. |
2. |
Madankollu, l-impriżi jistgħu jipprovdu livell ta’ taħriġ inqas minn dak soċjalment ottimali jekk l-impjegati jkunu liberi li jibdlu lil min iħaddimhom u impriżi oħra jkunu jistgħu jgawdu milli jirreklutaw ħaddiema mħarrġa minnhom. Dan huwa minnu b'mod partikolari f'dak li jirrigwarda t-taħriġ immirat lejn ħiliet li jistgħu jiġu trasferiti bejn l-impriżi. L-għajnuna mill-Istat tista' tgħin sabiex toħloq inċentivi addizzjonali għal min iħaddem sabiex jipprovdi taħriġ f'livell li huwa mixtieq mis-soċjetà. |
3. |
Dan il-Kapitolu jistabbilixxi gwida dwar il-kriterji li l-Awtorità ta’ Sorveljanza tal-EFTA (minn hawn 'il quddiem “l-Awtorità”) ser tapplika għall-valutazzjoni tal-miżuri ta’ għajnuna għat-taħriġ. Din il-gwida hija maħsuba biex tagħmel ir-raġunament tal-Awtorità trasparenti u biex toħloq previdibbiltà u ċertezza legali. Skont l-Artikolu 6(1)(g) tal-Att imsemmi fil-Punt 1j tal-Anness XV tal-Ftehim taż-ŻEE (ir-Regolament tal-Kummissjoni (KE) Nru 800/2008 tas-6 ta’ Awwissu 2008 li jiddikjara ċerti kategoriji ta’ għajnuna bħala kompatibbli mas-suq komuni skont l-Artikoli 87 u 88 tat-Trattat (ir-Regolament għal Eżenzjoni Ġenerali Sħiħa), (2) kif adattat għall-Ftehim taż-ŻEE permezz tal-ewwel Protokoll tiegħu (3) (minn hawn 'il quddiem “ir-Regolament għal Eżenzjoni Ġenerali Sħiħa”), kwalunkwe għajnuna individwali għat-taħriġ, kemm jekk tingħata ad hoc kif ukoll fuq il-bażi ta’ skema, ser tkun soġġetta għal din il-gwida meta l-ekwivalenti tal-għotja tagħha taqbeż EUR 2 miljun għal kull proġett ta’ taħriġ. |
4. |
Il-kriterji stipulati f'din il-gwida mhux ser jiġu applikati b'mod mekkaniku. Il-livell tal-valutazzjoni mill-Awtorità u t-tip ta’ informazzjoni li tista' titlob ser ikunu proporzjonati għar-riskju ta’ distorsjoni tal-kompetizzjoni. L-ambitu tal-analiżi ser jiddependi fuq in-natura tal-każ. |
2. Effetti pożittivi tal-għajnuna
2.1. Eżistenza ta’ nuqqasijiet fis-suq
5. |
Ħaddiema mħarrġa jikkontribwixxu sabiex iżidu l-produttività u l-kompetittività tal-impriżi. Madankollu, min iħaddem u l-impjegati jistgħu ma jinvestux biżżejjed fit-taħriġ għal numru ta’ raġunijiet. L-impjegati jistgħu jillimitaw l-investimenti tagħhom fit-taħriġ jekk ma jkunux disposti għar-riskju, isofru minn limitazzjonijiet finanzjarji jew ikollhom diffikultajiet biex juru l-livell tal-għarfien li jkunu kisbu lil min iħaddimhom fil-ġejjieni. |
6. |
L-impriżi jistgħu joqogħdu lura milli jħarrġu lill-forza tax-xogħol tagħhom fil-livell li jkun ottimali għas-soċjetà kollha kemm hi. Dan huwa dovut għall-falliment tas-suq marbut mal-esternalitajiet pożittivi tat-taħriġ u mad-diffikultajiet biex jiġu approprjati l-kirjiet jekk l-impjegati jkunu liberi li jibdlu lil min iħaddimhom. L-impriżi jistgħu jinvestu inqas fit-taħriġ, jekk ikunu mħassba li ladarba jiġi mħarreġ, impjegat jitlaq qabel ma l-impriża tkun irkuprat l-investiment tagħha. L-impriżi jistgħu ma jkunux daqshekk ħerqana li jipprovdu taħriġ suffiċjenti lill-ħaddiema tagħhom sakemm l-ispiża tat-taħriġ ma tinfedhiex malajr jew ikun pjuttost speċifiku għall-ħtiġijiet tal-impriża kkonċernata jew sakemm ċerti klawsoli kuntrattwali ma jwaqqfux lill-impjegat imħarreġ milli jħalli l-impriża qabel mal-ispiża tat-taħriġ tkun ġiet ammortizzata jew (parti mill-)ispejjeż tat-taħriġ ikunu ġew irrimborsati. |
7. |
Investiment inadegwat fit-taħriġ jista' jseħħ ukoll jekk l-impriża tkun tista' tirkupra b'mod sħiħ l-investiment tagħha iżda l-benefiċċji privati tagħha jkunu iżgħar mill-benefiċċji tas-soċjetà kollha kemm hi. Tali esternalitajiet pożittivi tat-taħriġ jistgħu jinħolqu b'mod partikolari jekk it-taħriġ itejjeb ħiliet li jistgħu jiġu trasferiti; jiġifieri ħiliet li jistgħu jintużaw f'iżjed minn impriża waħda. B'kuntrast, taħriġ speċifiku jħalli biss żidiet fil-produttività f'impriża speċifika u jista' jiġi faċilment approprjat mill-impriżi (4). Għalhekk l-għan li t-taħriġ speċifiku joħloq esternalitajiet pożittivi hija inqas qawwija mill-possibbiltà li t-taħriġ ġenerali joħloq tali esternalitajiet. |
8. |
Fejn l-impriżi huma ffaċċjati bi spejjeż ogħla u benefiċċji inċerti għat-taħriġ ta’ ħaddiema żvantaġġati jew b'diżabilità (5) jista' jkun hemm inċentiv biex jipprovdu inqas taħriġ lil dawn il-gruppi. Madankollu, it-taħriġ ta’ ħaddiema żvantaġġati jew b'diżabilità huwa ġeneralment mistenni li jipproduċi esternalitajiet pożittivi għas-soċjetà kollha kemm hi (6). |
9. |
L-Istati EFTA għandhom juru li hemm falliment tas-suq li jiġġustifika l-għajnuna. Fl-analiżi tagħha, fost affarijiet oħra, l-Awtorità ser tikkunsidra l-elementi li ġejjin:
|
2.2. L-għajnuna mill-Istat bħala strument politiku xieraq
10. |
L-għajnuna mill-Istat mhijiex l-uniku strument politiku disponibbli għall-Istati EFTA biex jippromwovu t-taħriġ. Ħafna mit-taħriġ jiġi pprovdut mis-sistemi edukattivi (pereżempju universitajiet, skejjel, taħriġ vokazzjonali mwettaq jew sponsorjat minn awtoritajiet tal-Istat). It-taħriġ jista' jiġi segwit ukoll mill-individwi nfushom, bi jew mingħajr l-appoġġ ta’ min iħaddimhom. |
11. |
Meta l-Istat EFTA jkun ikkunsidra għażliet politiċi oħrajn, u l-vantaġġi li jintuża strument selettiv bħall-għajnuna mill-Istat għal impriża speċifika jkunu stabbiliti, il-miżuri kkonċernati jitqiesu li jikkostitwixxu strument adegwat. B'mod partikolari, l-Awtorità ser tieħu inkunsiderazzjoni kull valutazzjoni tal-impatt tal-miżura proposta li l-Istat EFTA jista' jkun għamel. |
2.3. L-effett ta’ inċentiv u n-neċessità tal-għajnuna
12. |
L-għajnuna mill-Istat għat-taħriġ trid twassal biex il-benefiċjarju tal-għajnuna jibdel l-imġiba tiegħu sabiex jipprovdi iżjed taħriġ u/jew taħriġ aħjar milli kieku kien jagħmel mingħajr l-għajnuna. Jekk ma jkunx hemm tali żieda fil-kwantità jew fil-kwalità tal-attivitajiet ippjanati ta’ taħriġ, l-għajnuna ma titqiesx li jkollha effett ta’ inċentiv. |
13. |
L-effett ta’ inċentiv huwa identifikat b'analiżi kontrofattwali, li tqabbel il-livelli tat-taħriġ intenzjonat bl-għajnuna u mingħajr għajnuna. Ħafna impjegaturi jħossuh bżonn li jħarrġu lill-impjegati tagħhom sabiex jiżguraw il-funzjonament tajjeb tal-impriżi tagħhom. Wieħed ma jistax jassumi li dejjem hija meħtieġa għajnuna mill-Istat għat-taħriġ, speċjalment għal taħriġ speċifiku. |
14. |
L-Istati EFTA għandhom juru lill-Awtorità l-eżistenza tal-effett tal-inċentiv kif ukoll il-ħtieġa tal-għajnuna. L-ewwel nett, il-benefiċjarju jrid ikun issottometta applikazzjoni għall-għajnuna lill-Istat EFTA kkonċernat qabel ma jkun beda l-proġett ta’ taħriġ. It-tieni nett, l-Istat EFTA jrid juri li l-għajnuna mill-Istat twassal għal żieda, bi tqabbil ma’ sitwazzjoni mingħajr għajnuna, fid-daqs, kwalità, ambitu jew parteċipanti fil-mira tal-proġett ta’ taħriġ. L-ammont addizzjonali ta’ taħriġ offrut bl-għajnuna jista' jintwera, pereżempju, permezz ta’ numru akbar ta’ sigħat jew korsijiet ta’ taħriġ, numru akbar ta’ parteċipanti, bidla minn taħriġ speċifiku għall-impriża għal taħriġ ġenerali, jew żieda fil-parteċipazzjoni ta’ ċerti kategoriji ta’ ħaddiema żvantaġġati jew b'diżabilità. |
15. |
Fl-analiżi tagħha, fost affarijiet oħra, l-Awtorità ser tikkunsidra l-elementi li ġejjin:
|
2.4. Il-proporzjonalità tal-għajnuna
16. |
L-Istat EFTA jrid juri li l-għajnuna hija meħtieġa u li l-ammont qiegħed jinżamm baxx kemm jista' jkun sabiex jintlaħaq l-għan tal-għajnuna. L-ispejjeż eliġibbli jridu jiġu kkalkulati skont l-Artikolu 39 tar-Regolament għal Eżenzjoni Ġenerali Sħiħa u jkunu limitati għall-ispejjeż li jirriżultaw minn attivitajiet ta’ taħriġ li ma kinux isiru mingħajr l-għajnuna. L-Istati EFTA jridu jipprovdu evidenza li l-ammont tal-għajnuna ma jaqbiżx il-parti tal-ispejjeż eliġibbli li ma tistax tiġi approprjata mill-impriża (7). Fi kwalunkwe każ, l-intensitajiet tal-għajnuna qatt ma jridu jaqbżu dawk stabbiliti fl-Artikolu 39 tar-Regolament għal Eżenzjoni Ġenerali Sħiħa u ser jiġu applikati għall-ispejjeż eliġibbli (8). |
3. L-effetti negattivi tal-għajnuna
17. |
Jekk l-għajnuna tkun proporzjonata sabiex jintlaħaq l-għan tal-għajnuna, l-effetti negattivi tal-għajnuna x'aktarx ikunu limitati u għandu mnejn li analiżi tal-effetti negattivi ma tkunx meħtieġa (9). Madankollu, f'xi każijiet, anki fejn l-għajnuna tkun meħtieġa u proporzjonata għal impriża speċifika sabiex iżżid l-ammont ta’ taħriġ ipprovdut, l-għajnuna tista' twassal għal bidla fl-imġiba tal-benefiċjarju li toħloq distorsjoni tal-kompetizzjoni b'mod sinifikanti. F'dawn il-każijiet l-Awtorità ser tagħmel analiżi komprensiva tad-distorsjoni tal-kompetizzjoni. Il-kobor tad-distorsjoni tal-kompetizzjoni kkawżata mill-għajnuna jista' jvarja skont l-arranġamenti tal-għajnuna u l-karatteristika tas-swieq affettwati (10). |
18. |
Il-karatteristiċi tal-għajnuna li jistgħu jaffettwaw il-probabbiltà u d-daqs tat-distorsjoni huma:
|
19. |
Pereżempju, skema ta’ taħriġ li tintuża biex tinkoraġġixxi lill-impriżi in generali fi Stat EFTA sabiex jagħmlu aktar taħriġ x'aktarx ikollha effett differenti fuq is-suq minn ammont kbir ta’ għajnuna mogħtija lil impriża waħda sabiex din tkun tista' żżid it-taħriġ tagħha. Din tal-aħħar x'aktarx tgħawweġ il-kompetizzjoni b'mod aktar sinifikanti minħabba li l-kompetituri tal-benefiċjarju tal-għajnuna isiru inqas kapaċi li jikkompetu (11). Id-distorsjoni tkun saħansitra akbar jekk l-ispejjeż tat-taħriġ fin-negozju tal-benefiċjarju jirrappreżentaw sehem kbir mill-ispejjeż totali. |
20. |
Fil-valutazzjoni tal-karatteristiċi tas-suq, li jistgħu jagħtu stampa aktar preċiża tal-impatt probabbli tal-għajnuna, l-Awtorità tikkunsidra fost ħwejjeġ oħra:
|
21. |
L-istruttura tas-suq tiġi vvalutata permezz tal-konċentrazzjoni tas-suq, id-daqs tal-impriżi (12), l-importanza tad-diversifikazzjoni tal-prodott (13), kif ukoll l-ostakli għad-dħul u l-ħruġ. L-ishma tas-suq u l-proporzjonijiet tal-konċentrazzjoni jiġu kkalkulati ladarba jiġi identifikat is-suq rilevanti. B'mod ġenerali, inqas ma jkun hemm impriżi, akbar ikun is-sehem tagħhom tas-suq, u inqas tkun il-kompetizzjoni li wieħed jistenna li josserva (14). Jekk is-suq affettwat ikun ikkonċentrat b'ostakoli kbar għad-dħul (15) u l-benefiċjarju tal-għajnuna huwa attur prinċipali fih, f'dak il-każ ikun aktar probabbli li l-kompetituri jkollhom ibiddlu l-imġiba tagħhom bi tweġiba għall-għajnuna. |
22. |
Waqt li tkun qiegħda teżamina l-karatteristiċi tas-settur, l-Awtorità ser tqis fost affarijiet oħra l-importanza tal-ħaddiema mħarrġa għan-negozju, l-eżistenza ta’ kapaċità eċċessiva, jekk is-swieq fl-industrija humiex qegħdin jikbru, humiex maturi jew humiex sejrin lura, l-istrateġiji tal-finanzjament tal-kompetituri għat-taħriġ (għajnuna mill-istat, impjegati, min iħaddem). Pereżempju, l-għajnuna għat-taħriġ f'industrija li sejra lura tista' żżid ir-riskju ta’ distorsjoni tal-kompetizzjoni billi żżomm impriża ineffiċjenti għaddejja. |
23. |
F'każijiet partikolari, l-għajnuna għat-taħriġ tista' twassal għal distorsjoni tal-kompetizzjoni f'dak li jirrigwarda d-dħul fis-suq u l-ħruġ minnu, l-effett fuq il-flussi tal-kummerċ u l-eliminazzjoni tal-investiment fit-taħriġ. |
Dħul fis-suq u ħruġ minnu
24. |
F'suq kompetittiv, impriżi jbiegħu prodotti li jiġġeneraw il-qligħ. Billi taltera l-ispejjeż, l-għajnuna mill-Istat taltera il-profittabbiltà, u tista' għalhekk taffettwa d-deċiżjoni tal-impriża jekk toffriex prodott jew le. Pereżempju, għajnuna mill-Istat li tnaqqas l-ispejjeż rikorrenti tal-produzzjoni, bħalma hu t-taħriġ għall-impjegati, tagħmel id-dħul fis-suq aktar attraenti u tagħmilha possibbli għal impriżi li altrimenti jkollhom prospetti kummerċjali dgħajfa biex jidħlu fis-suq jew jintroduċu prodotti ġodda għad-detriment ta’ kompetituri aktar effiċjenti. |
25. |
Id-disponibbiltà ta’ għajnuna mill-Istat tista' taffettwa wkoll id-deċiżjoni ta’ impriża li toħroġ minn suq li fih tkun diġà qed topera. L-għajnuna mill-Istat għat-taħriġ tista' tnaqqas id-daqs tat-telf u tagħmilha possibbli li impriża tibqa' fis-suq għal żmien itwal – li jista' jfisser li impriżi oħra, iżjed effiċjenti li ma jeħdux għajnuna jkunu sfurzati joħorġu huma minflok. |
Effett fuq il-flussi tal-kummerċ
26. |
L-għajnuna mill-Istat għat-taħriġ tista' twassal biex ċerti territorji jibbenefikaw minn kundizzjonijiet ta’ produzzjoni aktar favorevoli minn oħrajn. Dan jista' jwassal għall-ispostament tal-flussi tal-kummerċ favur ir-reġjuni fejn tingħata tali għajnuna. |
Qlugħ 'il barra tal-investiment fit-taħriġ
27. |
Biex jissopravvivu fis-suq u jimmassimizzaw il-profitti, l-impriżi għandhom inċentivi sabiex jinvestu fit-taħriġ tal-ħaddiema. L-ammont ta’ investiment fit-taħriġ li kull impriża hija lesta li tagħmel jiddependi wkoll fuq kemm jinvestu l-kompetituri tagħha. L-impriżi li jkunu ssussidjati mill-istat jistgħu jnaqqsu l-investiment tagħhom stess. Inkella, jekk l-għajnuna ġġiegħel lill-benefiċjarju tal-għajnuna jinvesti aktar, il-kompetituri jistgħu jirreaġixxu billi jnaqqsu n-nefqa tagħhom fuq it-taħriġ. Jekk, biex jiksbu l-istess għan, il-benefiċjarji tal-għajnuna jew il-kompetituri tagħhom jonfqu inqas fil-preżenza tal-għajnuna milli fin-nuqqas tagħha, l-investiment privat tagħhom fit-taħriġ tal-ħaddiema jiġi maqlugħ 'il barra mill-għajnuna. |
4. Ibbilanċjar u deċiżjoni
28. |
L-aħħar pass fl-analiżi huwa li jiġi evalwat sa fejn l-effetti pożittivi tal-għajnuna jegħlbu l-effetti negattivi tagħha. Dan l-eżerċizzju ser isir abbażi ta’ evalwazzjoni każ b'każ. Sabiex jiġu bbilanċjati l-effetti pożittivi u negattivi, l-Awtorità ser tevalwahom u tagħmel valutazzjoni globali tal-impatt tagħhom fuq il-produtturi u l-konsumaturi f'kull wieħed mis-swieq affettwati. Sakemm informazzjoni kwantitattiva ma tkunx disponibbli faċilment, l-Awtorità ser tuża informazzjoni kwalitattiva għall-finijiet tal-valutazzjoni. |
29. |
L-Awtorità x'aktarx tieħu pożizzjoni aktar pożittiva u għalhekk taċċetta grad ogħla ta’ distorsjoni tal-kompetizzjoni, jekk l-għajnuna tkun meħtieġa, immirata tajjeb u proporzjonata għal impriża speċifika biex iżżid l-attivitajiet ta’ taħriġ tagħha u biex is-soċjetà tibbenefika mit-taħriġ żejjed ipprovdut aktar mill-benefiċjarju tal-għajnuna. |
(1) Dan il-kapitolu jikkorrispondi mal-Komunikazzjoni mill-Kummissjoni tal-Komunitajiet Ewropej - Kriterji għall-analiżi tal-kompatibbiltà tal-għajnuna mill-istat għat-taħriġ soġġetta għal notifika individwali 2009/C 188/01 (ĠU C 188 tal-11.8.2009, p. 1)
(2) ĠU L 214, 9.8.2008, p. 3. Għal għajnuna ad hoc għat-taħriġ lil kumpanija kbira taħt il-limitu ta’ EUR 2 miljuni, il-Kummissjoni se tapplika mutatis mutandis il-prinċipji kif spjegati hawn taħt, għalkemm b'mod inqas dettaljat.
(3) Deċiżjoni tal-Kumitat Konġunt taż-ŻEE Nru 120/2008 tas-7.11.2008 (ĠU L 339, 18.12.2008, p. 111, u s-Suppliment taż-ŻEE Nru 79, 18.12.2008), li daħlet fis-seħħ fit-8.11.2008.
(4) Madankollu, l-esternalitajiet tat-taħriġ ġenerali jistgħu jiġu approprjati wkoll mill-impriżi permezz ta’ klawsoli speċjali fil-kuntratti li jeħtieġu lil impjegat imħarreġ jibqa' fl-impriża għal perjodu definit ta’ żmien wara li huwa jkun irċieva tali taħriġ.
(5) Il-ħaddiema b'diżabilità u żvantaġġati huma definiti fl-Artikolu 2 tar-Regolament għal Eżenzjoni Ġenerali Sħiħa
(6) Pereżempju, soċjetà tagħti iżjed valur lit-taħriġ li jirċievu ħaddiema żgħażagħ u bi ftit ħiliet milli tagħmel impriża minħabba produttività perċepita jew reali aktar baxxa.
(7) Din hija dik il-parti tal-ispejjeż żejda tat-taħriġ li l-impriża ma tistax tirkupra billi tibbenefika direttament mill-ħiliet miksuba mil-impjegati tagħha waqt it-taħriġ.
(8) Ara wkoll il-prattika attwali fil-każisitika, pereżempju, C 35/2007, għajnuna għat-taħriġ lil Volvo Cars f'Gent, id-Deċiżjoni tal-Kummissjoni 2008/948/KE tat-23 ta’ Lulju 2008 dwar miżuri mill-Ġermanja għall-benefiċċju tad-DHL u tal-ajruport Leipzig/Halle (ĠU L 346, 23.12.2008, p. 1) u d-Deċiżjoni tal-Kummissjoni 2007/612/KE tal-4 ta’ April 2007 rigward l-għajnuna mill-Istat C 14/06 li l-Belġju qed jippjana biex iwettaq favur General Motors il-Belġju f'Antwerp (ĠU L 243, 18.9.2007, p. 71).
(9) Barra minn hekk, kieku s-suq tax-xogħol jaħdem perfettament, l-impjegati dejjem jistgħu jieħdu salarju akbar għall-ħiliet imtejba tagħhom minħabba t-taħriġ li rċevew u jassimilaw l-esternalitajiet pożittivi tat-taħriġ.
(10) Bl-għajnuna jistgħu jkunu affettwati numru ta’ swieq, għaliex l-impatt tal-għajnuna ma jistax jiġi ristrett għas-swieq fejn il-benefiċjarju tal-għajnuna jkun attiv, iżda dan jista' jiġi estiż għal swieq oħrajn, pereżempju għas-swieq tas-servizzi anċillari.
(11) Madankollu, għandu jiġi nnotat li l-għajnuna għat-taħriġ mogħtija lil settur sħiħ fi Stat EFTA wieħed tista' twassal għal distorsjoni tal-kummerċ bejn il-Partijiet Kontraenti.
(12) Id-daqs tal-impriża jista' jiġi mfisser fit-termini tal-ishma tas-suq kif ukoll tal-fatturat u/jew tal-impjieg.
(13) Inqas ma jkun il-livell ta’ differenzjar bejn il-prodotti, ikbar ser ikun l-effett tal-għajnuna fuq il-profitti tal-kompetituri.
(14) Madankollu, importanti li wieħed jinnota li xi swieq huma kompetittivi minkejja li ftit hemm impriżi preżenti.
(15) Ta' min jinnota, madankollu, li xi kultant l-għoti ta’ għajnuna jgħin sabiex jingħelbu l-barrieri għad-dħul u jippermetti impriżi ġodda li jidħlu fis-suq.