15.12.2007   

MT

Il-Ġurnal Uffiċjali ta’ l-Unjoni Ewropea

L 330/44

(1)

Din id-deċiżjoni, li ġiet adottata skond l-Artikolu 9(1) tar-Regolament tal-Kunsill (KE) Nru 1/2003 tas-16 ta’ Diċembru 2002 dwar l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat, (1) hija indirizzata lil General Motors Europe (minn hawn ‘il quddiem: “GME”) u tikkonċerna l-provvista ta’ informazzjoni teknika għat-tiswija tal-vetturi tal-marki Opel u Vauxhall.

(2)

L-informazzjoni teknika tikkonsisti f’data, fi proċessi u fi struzzjonijiet li huma meħtieġa sabiex jiġu kontrollati, imsewwija u sostitwiti partijiet difettużi/miksura/użati ta’ vettura bil-mutur jew sabiex jissewew ħsarat fi kwalunkwe waħda mis-sistemi tal-vettura. L-informazzjoni teknika tinkludi seba’ kategoriji prinċipali:

(3)

F’Diċembru 2006, il-Kummissjoni bdiet proċeduri, u indirizzat valutazzjoni preliminari lil GME, li kienet tinkludi l-fehma preliminari li l-ftehimiet ta’ GME ma’ l-imsieħba fis-servizz ta’ wara l-bejgħ tagħha qajmu tħassib dwar il-kompatibbiltà tagħhom ma’ l-Artikolu 81(1) tat-Trattat KE.

(4)

Fil-valutazzjoni preliminari tal-Kummissjoni, donnu li GME naqset milli tirrilaxxa ċerti kategoriji ta’ informazzjoni teknika dwar it-tiswijiet ferm wara tmiem il-perjodu tranżitorju provdut fir-Regolament tal-Kummissjoni (KE) Nru 1400/2002 tal-31 ta’ Lulju 2002 dwar l-applikazzjoni ta’ l-Artikolu 81(3) tat-Trattat fuq kategoriji ta’ ftehim vertikali u prattiċi miftiehma fis-settur tal-vettur bil-mutur, (2) Barra minn hekk, fiż-żmien meta tnediet l-investigazzjoni tal-Kummissjoni, GME kienet għadha ma stabbilitx sistema effettiva sabiex is-sewwejja indipendenti jkunu jistgħu jkollhom aċċess għal informazzjoni teknika dwar it-tiswijiet b’mod li jkun separat (unbundled). Għalkemm matul l-investigazzjoni tal-Kummissjoni, GME tejbet l-aċċessibilità ta’ l-informazzjoni teknika tagħha, l-informazzjoni li tqiegħdet għad-dispożizzjoni tas-sewwejja indipendenti donnha ma kinitx kompluta.

(5)

Dik il-valutazzjoni preliminari sabet li s-swieq preliminari affetwati mill-prattika in kwistjoni kienu s-suq għall-provvista tas-servizzi ta’ tiswija u ta’ manutenzjoni għall-karozzi tal-passiġġieri, u s-suq għall-provvista ta’ informazzjoni teknika lis-sewwejja. In-netwerks awtorizzati ta’ l-Opel/tal-Vauxhall kellhom numru ferm kbir ta’ ishma mis-suq fl-ewwel wieħed minn dawn is-swieq, filwaqt li fit-tieni, GME kienet l-unika fornitriċi li setgħet toffri l-informazzjoni teknika kollha meħtieġa mis-sewwejja għall-vetturi Opel/Vauxhall tagħha.

(6)

Essenzjalment, il-ftehimiet ta’ servis u ta’ distribuzzjoni tal-parts ta’ GME jeħtieġu li l-membri tan-netwerks awtorizzati tagħha jwettqu firxa sħiħa ta’ servizzi ta’ tiswija speċifiċi għall-marka, u jagħmluha ta’ bejjiegħa bl-ingrossa ta’ partijiet ta’ bdil. Il-Kummissjoni hija mħassba li effetti negattivi possibbli li ġejjin minn tali ftehimiet jistgħu jissaħħu min-nuqqas ta’ GME li tipprovdi lil sewwejja indipendenti b’aċċess xieraq għall-informazzjoni teknika biex b’hekk teskludi d-ditti li jkunu lesti u jistgħu joffru servizzi ta’ tiswija permezz ta’ mudell kummerċjali differenti.

(7)

Il-konklużjoni preliminari tal-Kummissjoni kienet li l-arranġamenti ta’ GME sabiex tipprovdi l-informazzjoni teknika tagħha lis-sewwejja indipendenti ma kinux jikkorrispondi għall-ħtiġiet ta’ dawn ta’ l-aħħar la rigward l-ambitu ta’ l-informazzjoni disponibbli u lanqas rigward l-aċċessibbiltà għaliha, u li tali prattika, flimkien ma’ prattiki simili minn manifatturi oħra tal-karozzi, setgħu jikkontribwixxu għal tnaqqis fil-pożizzjoni tas-suq tas-sewwejja indipendenti. Imbagħad, dan seta’ jikkawża dannu konsiderevoli għall-konsumaturi f’termini ta’ tnaqqis sinifikanti fl-għażla ta’ partijiet ta’ bdil, prezzijiet ogħla għal servizzi ta’ tiswija, tnaqqis fl-għażla ta’ fejn titwettaq din it-tiswija, kwistjonijiet ta’ sikurezza potenzjali, u nuqqas ta’ aċċess għal ħwienet tat-tiswija innovattivi.

(8)

Barra minn hekk, in-nuqqas apparenti min-naħa ta’ GME li tipprovdi lil sewwejja indipendenti b’aċċess xieraq għall-informazzjoni teknika jista’ jipprevjeni li l-ftehimiet ma’ l-imsieħba fis-servizz ta’ wara l-bejgħ tagħha jibbenefikaw mill-eżenzjoni mogħtija mir-Regolament (KE) Nru 1400/2002, peress li skond l-Artikolu 4(2) tar-Regolament, l-eżenzjoni mogħtija hemmhekk ma tapplikax fejn il-fornitur tal-vetturi bil-mutur jirrifjuta li jagħti aċċess lil operaturi indipendenti għal kwalunkwe informazzjoni teknika, tagħmir dijanjostiku u ta’ xort’oħra, għodod, inkluż kwalunkwe softwer rilevanti, jew taħriġ meħtieġ għat-tiswija u għall-manutenzjoni ta’ dawn il-vetturi bil-mutur. Kif ġie ċċarat fil-premessa 26 tar-Regolament, il-kundizzjonijiet ta’ aċċess ma jridux jiddiskriminaw bejn operaturi awtorizzati u dawk indipendenti.

(9)

Fl-aħħarnett, il-Kummissjoni waslet għall-fehma preliminari li fil-kuntest ta’ nuqqas ta’ aċċess għal informazzjoni teknika dwar it-tiswijiet, ma kienx probabbli li l-ftehimiet bejn GME u s-sewwejja awtorizzati tagħha se jibbenefikaw mid-dispożizzjoni ta’ l-Artikolu 81(3).

(10)

Fid-9 ta’ Frar 2007, GME offriet impenji lill-Kummissjoni sabiex tissodisfa t-tħassib rigward il-kompetizzjoni li kien indirizzat fil-valutazzjoni preliminari.

(11)

Skond dawn l-impenji, il-prinċipju li jiddetermina l-ambitu ta’ l-informazzjoni li għandha tiġi provduta huwa dak tan-nuqqas ta’ diskriminazzjoni bejn is-sewwejja indipendenti u dawk awtorizzati. F’dan id-dawl, GME se tiżgura li l-informazzjoni teknika, l-għodod, it-tagħmir, is-softwer u t-taħriġ kollu meħtieġ għat-tiswija u għall-manutenzjoni tal-vetturi Opel/Vauxhall tagħha li jiġu provduti lis-sewwejja awtorizzati fi kwalunkwe Stat Membru ta’ l-UE minn jew f’isem GME jitqiegħdu wkoll għad-dispożizzjoni tas-sewwejja indipendenti.

(12)

L-impenji jispeċifikaw li “l-informazzjoni teknika”, fit-tifsira ta’ l-Artikolu 4(2) tar-Regolament (KE) Nru 1400/2002, tinkludi l-informazzjoni kollha provduta lis-sewwejja awtorizzati ta’ l-Opel/tal-Vauxhall għat-tiswija jew għall-manutenzjoni tal-vetturi bil-mutur Opel/Vauxhall. Eżempji partikolari jinkludu softwer, kodiċijiet ta’ ħsarat u parametri kollha, flimkien ma’ aġġornamenti, li huma meħtieġa sabiex issir ħidma fuq l-unitajiet ta’ kontroll elettroniċi (ECUs) ħalli jiġu introdotti jew jergħu jiġu stabbiliti s-settings rakkomandati minn GME, metodi ta’ identifikazzjoni tal-vetturi, katalogi tal-parts, soluzzjonijiet ta’ ħidma li jirriżultaw minn esperjenza prattika u li jkunu relatati ma’ problemi li tipikament jaffetwaw mudell jew lott partikolari, u avviżi ta’ tfakkira kif ukoll avviżi oħra li jidentifikaw tiswijiet li jistgħu jitwettqu mingħajr ħlas fin-netwerk tat-tiswija awtorizzata.

(13)

L-aċċess għal għodod jinkludi aċċess għal għodod dijanjostiċi elettroniċi u għodod oħra ta’ tiswija, flimkien ma’ softwer relatat, inklużi l-aġġornamenti perjodiċi tiegħu, u servizzi ta’ wara l-bejgħ għal tali għodod.

(14)

Il-premessa 26 tar-Regolament tagħmilha ċara li l-Artikolu 4(2) ma jeħtieġx li GME tipprovdi lis-sewwejja indipendenti b’informazzjoni teknika li permezz tagħha parti terza tkun tista’ tevita jew iżżarma apparati kontra s-serq abbord il-vettura u/jew tirrikalibra (3) apparati elettroniċi, jew tbagħbas apparati li jillimitaw il-veloċità jew parametri oħra relatati mar-rendiment ta’ vettura bil-mutur. Madankollu, GME timpenja ruħha li tħalli lis-sewwejja indipendenti aċċess bla restrizzjonijiet għal informazzjoni ta’ dawn it-tipi, sakemm jiksbu ċ-Ċertifikat ta’ Taħriġ ta’ GME rilevanti. (4) Tali ċertifikazzjoni se tinħareġ mingħajr dewmien lis-sewwejja indipendenti, sakemm jikkompletaw it-taħriġ.

(15)

Jekk, fil-ġejjieni, GME kellha tinvoka l-eċċezzjoni fil-premessa 26 bħala raġuni sabiex tirrifjuta aċċess għal ċerti elementi ta’ informazzjoni teknika lis-sewwejja indipendenti, trid tkun hija li tiżgura li l-informazzjoni li ġiet irrifjutata b’dan il-mod tkun limitata għal dak li huwa meħtieġ sabiex tkun provduta l-protezzjoni deskritta fil-premessa 26, u li n-nuqqas ta’ l-informazzjoni in kwistjoni ma jipprevjenix lis-sewwejja indipendenti milli jwettqu operazzjonijiet għajr dawk elenkati fil-premessa 26, inkluża ħidma fuq apparati bħall-ECU tal-ġestjoni tal-magna, l-airbags, il-pre-tensioners (it-tagħmir ta’ qabel ma tiġi miżjuda t-tensjoni) taċ-ċinturin tas-sit, jew elementi ta’ tiskir ċentrali.

(16)

L-Artikolu 4(2) tar-Regolament (KE) Nru 1400/2002 jipprovdi li l-informazzjoni teknika trid tkun disponibbli b’mod li jkun proporzjonat għall-ħtiġiet tas-sewwejja indipendenti. Dan jimplika kemm li l-informazzjoni trid tkun isseparata (unbundled) kif ukoll ipprezzar li jqis sakemm is-sewwejja indipendenti jużaw l-informazzjoni.

(17)

Skond dan il-prinċipju, l-impenji jispeċifikaw li GME se tinkludi fuq is-sit web TI l-informazzjoni teknika kollha relatata ma’ mudelli mnedija wara l-1996, u se tiżgura li l-informazzjoni teknika aġġornata kollha tkun fuq is-sit web TI jew fuq kwalunkwe sit suċċessur il-ħin kollu. Barra minn hekk, GME se tiżgura li s-sit web jista’ jinstab faċilment il-ħin kollu u li dan jipprovdi livell ekwivalenti ta’ rendiment għall-metodi li jintużaw biex tkun provduta informazzjoni teknika lill-membri tan-netwerk awtorizzat ta’ l-Opel/tal-Vauxhall. Meta GME jew intrapriża oħra li qed taġixxi f’isem GME tagħmel biċċa informazzjoni teknika disponibbli lis-sewwejja awtorizzati f’lingwa partikolari ta’ l-UE, GME se tiżgura li din il-verżjoni lingwistika ta’ l-informazzjoni titqiegħed mingħajr dewmien fuq is-sit web TI.

(18)

Rigward il-Katalogu tal-Parts Elettroniċi, li bħalissa mhux disponibbli fuq is-sit web TI, se jitqies li GME tkun konformi ma’ l-impenji jekk tqiegħed din l-informazzjoni fuq is-sit web TI sal-31 ta’ Diċembru 2007. Bħala soluzzjoni tul perjodu qasir ta’ żmien, il-Katalogu se jkun disponibbli permezz tas-Servizzi Call Centre ta’ GME li, fuq talba u mingħajr dewmien, se jipprovdu lis-sewwejja indipendenti bil-paġni mitluba permezz tal-faks fi kwalunkwe waħda mil-lingwi li fih il-Katalogu jkun disponibbli għas-sewwejja awtorizzati. Dan is-servizz se jkun disponibbli għal €1 għal kull paġna (+ 3.9 % ħlas ta’ maniġġjar), u se japplikaw it-tariffi lokali tat-telefonati.

(19)

Rigward id-dijagrammi tal-wajers, GME se tqiegħed fuq is-sit web TI dawk kollha li ġew iġġenerati jew ikkonverititi f’format diġitali sabiex jintużaw mis-sewwejja awtorizzati ta’ l-Opel/tal-Vauxhall tagħha fl-UE. Id-dijagrammi li fadal, li huma relatati ma’ ċerti mudelli (5) li ġew imnedija wara l-1 ta’ Jannar 1997 u li ma jeżistux f’format diġitali, għandhom ikunu disponibbli għas-sewwejja indipendenti permezz tas-Servizzi Call Centre ta’ GME. Tali Servizzi Call Centre se jaħdmu bil-lingwi kollha meħtieġa sabiex tkun evitata diskriminazzjoni diretta jew indiretta bejn sewwejja indipendenti u awtorizzati ta’ l-Opel/tal-Vauxhall, fejn jitqiesu l-kundizzjonijiet li fihom tali sewwejja awtorizzati jiksbu aċċess għad-dijagrammi tal-wajers. Id-dijagrammi tal-wajers se jkunu provduti mingħajr dewmien permezz tal-faks fl-iċken pakketti li s-sewwej indipendenti medju jkun jeħtieġ sabiex iwettaq biċċa xogħol ta’ tiswija u bl-istess kundizzjonijiet kif ikunu provduti lis-sewwejja awtorizzati ta’ l-Opel/tal-Vauxhall. GME timpenja ruħha li, kemm idumu validi l-impenji, iżżomm il-kundizzjonijiet li japplikaw bħalissa għal dawn id-dijagrammi mhux diġitalizzati tal-wajers.

(20)

Rigward aċċess għas-sit web TI, GME qablet li tipprovdi għal diviżjoni pro rata f’perjodi ta’ żmien ta’ kull siegħa, kuljum, kull ġimgħa, kull xahar u kull sena bi prezz rispettivament ta’ EUR 4, EUR 30, EUR 100, EUR 300 u ta’ EUR 3 700. Għal aċċess inizjali għas-sit web TI, se jintalab ħlas ta’reġistrazzjoni ta’ darba ta’ EUR 15 + 3.9 % ħlas ta’ maniġġjar. It-Tech1/Tech2 SWDL (Downlowd ta’ Softwer Tester Dijanjostiku) se jkun disponibbli permezz ta’ l-abbonament annwali mas-sit web TI, jew billi jitħallas abbonament waħdu ta’ kull xahar ta’ EUR 100. GME se żżomm din l-istruttura ta’ ħlasijiet ta’ aċċess, u mhux se żżid il-livelli ta’ ħlasijiet ‘il fuq mir-rata medja ta’ inflazzjoni fl-UE kemm idumu validi l-impenji.

(21)

L-impenji ta’ GME huma mingħajr preġudizzju għal kwalunkwe rekwiżit kurrenti jew futur stabbilit mill-Komunità jew mid-dritt nazzjonali li jista’ jestendi l-ambitu ta’ l-informazzjoni teknika li GME għandha tipprovdi lill-operaturi indipendenti u/jew jista’ jistabbilixxi modi aktar favorevoli biex tali informazzjoni tkun provduta.

(22)

Sabiex ikun indirizzat kwalunkwe ilment imqajjem minn sewwej indipendenti rigward aċċess għal informazzjoni teknika, GME se tistabbilixxi “Ombudsman” ta’ GME. Malli jirċievi ilment ta’ sewwej indipendenti, l-“Ombudsman” ta’ GME, f’massimu ta’ tliet ġimgħat minn meta jirċievi l-fajl komplut, se jipprovdi lis-sewwej indipendenti b’Risposta ta’ GME. F’każ li min qed jagħmel l-ilment ma’ jaċċettax ir-Risposta ta’ GME, GME se taċċetta mekkaniżmu ta’ arbitraġġ biex jinstab ftehim għat-tilwim relatat mal-provvista ta’ informazzjoni teknika fejn kull parti għal tali tilwima jista’ jinnomina espert wieħed, li flimkien jistgħu jiddeċiedu fuq il-ħatra ta’ ieħor. L-arbitraġġ għandu jsir fl-istat Membru fejn tinsab is-sede reġistrata tal-parti li qed tagħmel it-talba. Il-lingwa tal-proċeduri ta’ arbitraġġ se tkun il-lingwa uffiċjali tal-post ta’ arbitraġġ. L-arbitraġġ mhu se jippreġudika l-ebda dritt li tkun ippreżentata applikazzjoni quddiem il-qorti nazzjonali kompetenti.

(23)

Id-deċiżjoni ssib li, minħabba l-impenji, m’għadx hemm aktar raġunijiet biex tittieħed azzjoni min-naħa tal-Kummissjoni. L-impenji se jkunu vinkolanti sal-31 ta’ Mejju 2010.

(24)

Il-Kumitat Konsultattiv dwar il-Prattiki Restrittivi u l-Pożizzjonijiet Dominanti ħareġ opinjoni favorevoli fid-9 ta’ Lulju 2007.