19.6.2007

MT

Il-Ġurnal Uffiċjali ta’ l-Unjoni Ewropea

L 158/1

---

Huma biss it-testi NU/KEE li għandhom effett legali skond il-liġi pubblika internazzjonali. L-istat u d-data ta’ dħul fis-seħħ ta’ dan ir-Regolament għandhom jiġu ċċekkjati fl-aħħar verżjoni tad-dokument ta’ l-istat NU/KEE TRANS/WP.29/343, disponibbli fuq: http://www.unece.org/trans/main/wp29/wp29wgs/wp29gen/wp29fdocstts.html.

Ir-Regolament Nru 89 tal-Kummissjoni Ekonomika għall-Ewropa tan-Nazzjonijiet Uniti (NU/KEE) – Rekwiżiti uniformi għall-approvazzjoni ta’:

I.   Vetturi fir-rigward tal-limitazzjoni tal-veloċità massima tagħhom jew tal-funzjoni aġġustabbli tal-veloċità massima tagħhom

II.   Vetturi fir-rigward ta’ l-installazzjoni ta’ apparat li jillimita l-veloċità (SLD) jew ta’ apparat aġġustabbli li jillimita l-veloċità (ASLD) ta’ tip approvat

III.   Apparat li jillimita l-veloċità (SLD) u apparat aġġustabbli li jillimita l-veloċità (ASLD)

Addendum 88: Regolament Nru 89

Tinkorpora t-test validu kollu sa:

Suppliment 1 għall-verżjoni oriġinali tar-Regolament – Id-data tad-dħul fis-seħħ: 12 ta’ Awwissu 2002

1.   L-AMBITU

Dan ir-Regolament japplika għal:

1.1.1.   Parti I: Vetturi ta’ kategoriji (1) M3, N2 u N3  (2) mgħammra b’SLD u għal vetturi ta’ kategoriji M u N mgħammra b’apparat aġġustabbli li jillimita l-veloċità ASLD li ma jkunux ġew approvati separatament skond il-Parti III ta’ dan ir-Regolament, jew li jkunu magħmula u/jew mgħammra b’tali mod li l-partijiet komponenti tagħhom ikunu jistgħu jitqiesu bħala li jissodisfaw totalment jew parzjalment il-funzjoni ta’ SLD jew ASLD, kif xieraq.

1.1.2.   Parti II: L-installazzjoni ta’ SLDs fuq vetturi ta’ kategoriji M3, N2 u N3 u l-installazzjoni ta’ ASLD fuq vetturi ta’ kategoriji M u N li t-tip tagħhom ikunu ġie approvat skond il-Parti III ta’ dan ir-Regolament.

1.1.3.   Parti III: SLDs li jkunu maħsuba biex jiġu mgħammra fuq vetturi ta’ kategoriji M3, N2 u N3 u ASLD li jkunu maħsuba biex ikunu mgħammra fuq vetturi ta’ kategoriji M u N.

1.2.   L-għan

L-għan ta’ dan ir-Regolament huwa li jillimita l-veloċità tal-vetturi fit-toroq permezz ta’ sistema fil-vettura li jkollha l-funzjoni primarja li tikkontrolla l-alimentazzjoni tal-karburant fil-magna jew pemezz tal-ġestjoni tal-magna.

1.2.1.   Il-vetturi tal-kategoriji M3, N2 u N3 għandhom ikunu limitati għal veloċità massima miksuba minn apparat (SLD) jew funzjoni (SLF) li j/tillimita l-veloċità.

1.2.2.   Il-vetturi tal-kategoriji M1, N1 u M2 għandhom ikunu limitati għal veloċità stabbilita volontarjament mis-sewwieq permezz ta’ apparat (ASLD) jew funzjoni (ASLF) aġġustabbli li j/tillimita l-veloċità, meta dan/din i/tkun attivat/a.

1.2.3.   Il-vetturi tal-kategoriji M3, N2 u N3 jistgħu, barra minn hekk, ikunu mgħammra b’ASLD jew ASLF.

2.   DEFINIZZJONIJIET

Għall-fini ta’ dan ir-Regolament:

2.1.1.   “Veloċità ta’ limitazzjoni V” tfisser il-veloċità massima ta' vettura b'tali mod li d-disinn jew it-tagħmir tagħha ma jippermettix reazzjoni wara li ssir azzjoni pożittiva fuq il-kontroll ta' l-aċċelleratur;

2.1.2.   “Veloċità stabbilita Vset” tfisser il-veloċità medja maħsuba tal-vettura meta din tkun qed taħdem f'kondizzjoni stabbli;

2.1.3.   “Veloċità stabblizzata Vstab” tfisser il-veloċità medja tal-vettura meta din tkun qed taħdem fil-kondizzjonijiet speċifikati fil-paragrafu 1.1.4.2.3 ta' l-Anness 5 ta’ dan ir-Regolament;

2.1.4.   “Veloċità massima Vmax” hija l-veloċità massima milħuqa mill-vettura fl-ewwel nofs perjodu tal-kurva tar-reazzjoni kif definita fil-figura ta’ l-Anness 5 (para. 1.1.4.2.4.).

2.1.5.   “Veloċità b’limitu aġġustabbli Vadj” tfisser il-veloċità stabbilita volontarjament mis-sewwieq.

2.1.6.   “Funzjoni aġġustabbli li tillimita l-veloċità ASLF” tfisser funzjoni li tippermetti lis-sewwieq li jistabbilixxi veloċità tal-vettura Vadj, u li meta din tkun attivata tillimita awtomatikament il-vettura għal dik il-veloċità.

2.1.7.   “Funzjoni li tillimita l-veloċità”, tfisser funzjoni biex tikkontrolla l-alimentazzjoni tal-karburant tal-vettura jew il-ġestjoni tal-magna sabiex il-veloċità tal-vettura tkun limitata għal valur massimu determinat.

Għall-fini tal-Parti I ta’ dan ir-Regolament:

2.2.1.   “Approvazzjoni ta’ vettura” tfisser l-approvazzjoni ta’ tip ta’ vettura fir-rigward tal-limitazzjoni tal-veloċità;

Għall-fini tal-Parti II ta’ dan ir-Regolament:

2.3.1.   “Approvazzjoni ta’ vettura” tfisser l-approvazzjoni ta’ tip ta’ vettura fir-rigward ta’ l-installazzjoni ta’ SLD ta’ tip approvat skond il-Parti III ta’ dan ir-Regolament;

Għall-fini tal-Parti I u l-Parti II ta’ dan ir-Regolament:

“Tip ta’ vettura” tfisser vetturi li ma jkunux ivarjaw f’karatteristiċi essenzjali bħal:

2.4.1.1.   Il-mudell u t-tip ta’ l-SLD, jekk ikun hemm,

2.4.1.2.   Il-firxa ta’ veloċitajiet li fihom tkun tista’ tiġi stabbilita l-limitazzjoni fi ħdan il-firxa stabbilita għall-vettura ttestjata,

2.4.1.3.   Il-proporzjon ta’ qawwa massima tal-magna mal-piż meta mhux mgħobbi, inqas jew ugwali għal dak tal-vettura ttestjata, u

2.4.1.4.   L-ogħla proporzjon tal-veloċità tal-magna mal-veloċità tal-vettura fl-ogħla ger, inqas minn jew ugwali għal dik tal-vettura ttestjata;

2.5.   “Piż meta mhux mgħobbi” tfisser il-piż tal-vettura fi stat ta' tħaddim, mingħajr sewwieqa, passiġġieri jew tagħbija, iżda bit-tank tal-karburant mimli u bis-sett ta’ għodda tas-soltu u l-istepni abbord, fejn applikabbli;

Għall-fini tal-Parti III ta’ dan ir-Regolament:

2.6.1.   “Apparat li jillimita l-veloċità (SLD)” tfisser apparat li l-funzjoni primarja tiegħu hi li jikkontrolla l-alimentazzjoni tal-karburant fil-magna sabiex il-veloċità tal-vettura tiġi llimitata għall-valur speċifikat;

2.6.2.   “Approvazzjoni ta’ SLD” tfisser l-approvazzjoni ta’ tip ta’ SLD fir-rigward tar-rekwiżiti stabbiliti fil-paragrafu 21 ta’ hawn taħt;

2.6.3.   “Tip ta’ SLD” tfisser SLDs li ma jvarjawx fir-rigward ta’ karatteristiċi essenzjali bħal:

Il-mudell u t-tip ta’ l-apparat,

Il-firxa ta’ valuri ta’ veloċitajiet li fihom l-SLD ikun jista’ jiġi stabbilit,

Il-metodu użat għall-kontroll ta’ l-alimentazzjoni tal-karburant tal-magna.

PARTI I

L-APPROVAZZJONI TA’ VETTURI FIR-RIGWARD TAL-LIMITAZZJONI TAL-VELOĊITÀ MASSIMA TAGĦHOM

3.   L-APPLIKAZZJONI GĦALL-APPROVAZZJONI

3.1.   L-applikazzjoni għall-approvazzjoni ta’ tip ta’ vettura fir-rigward tal-limitazzjoni tal-veloċità għandha tkun sottomessa mill-manifattur tal-vettura jew mir-rappreżentant tiegħu li jkun akkreditat b’mod xieraq.

Din għandha tkun akkumpanjata minn tliet kopji tad-dokumenti msemmija hawn taħt u bid-dettalji li ġejjin:

3.2.1.   Deskrizzjoni dettaljata tat-tip ta’ vettura u tal-partijiet tal-vettura relatati mal-limitazzjoni tal-veloċità, li tkun tinkludi d-dettalji u d-dokumenti msemmija fl-Anness I ta’ dan ir-Regolament;

3.2.2.   Vettura rappreżentattiva tat-tip li jkun se jiġi approvat għandha titressaq lis-servizz tekniku responsabbli mit-twettiq tat-testijiet ta’ l-approvazzjoni;

3.2.3.   Vettura li ma jkollhiex il-komponenti kollha li jikkorrispondu għat-tip tista’ tiġi aċċettata bil-kondizzjoni li l-applikant ikun jista’ juri, għas-sodisfazzjon ta’ l-awtorità kompetenti, li n-nuqqas ta’ dawn il-komponenti nieqsa m’għandu l-ebda effett fuq ir-riżultati tal-verifiki, f’dak li għandu x’jaqsam mar-rekwiżiti ta’ dan ir-Regolament.

3.3.   L-awtorità kompetenti għandha tivverifika l-eżistenza ta’ arranġamenti sodisfaċenti sabiex jiġu żgurati kontrolli effettivi fuq il-konformità tal-produzzjoni qabel ma tingħata l-approvazzjoni tat-tip.

4.   L-APPROVAZZJONI

4.1.   Jekk il-vettura mressqa għall-approvazzjoni skond dan ir-Regolament tissodisfa r-rekwiżiti tal-paragrafu 5 ta’ hawn taħt, l-approvazzjoni ta’ dak it-tip ta’ vettura għandha tingħata.

4.2.   Għandu jiġi assenjat numru ta’ approvazzjoni għal kull tip approvat. L-ewwel żewġ figuri (00 għar-Regolament fil-forma preżenti tiegħu) għandhom jindikaw is-serje ta’ emendi li jkunu jinkorporaw l-emendi tekniċi l-aktar reċenti magħmula għar-Regolament fiż-żmien tal-ħruġ ta’ l-approvazzjoni. L-istess Parti Kontraenti ma tistax tassenja l-istess numru lil tip ta’ vettura oħra.

4.3.   Għandu jiġi komunikat avviż ta’ approvazzjoni jew estensjoni jew ċaħda jew irtirar ta’ approvazzjoni jew it-twaqqif għal kollox tal-produzzjoni ta’ tip ta’ vettura skond dan ir-Regolament lill-Partijiet fil-Ftehim li japplikaw dan ir-Regolament permezz ta’ formola li tkun konformi mal-mudell fl-Anness 1 ta’ dan ir-Regolament.

Ma’ kull vettura li tkun konformi mat-tip ta’ vettura approvata taħt dan ir-Regolament għandu jkun hemm imwaħħla, b’mod li tidher u f’post li jkun faċilment aċċessibbli u li jkun speċifikat fil-formola ta’ l-approvazzjoni, marka internazzjonali ta’ l-approvazzjoni li tkun tikkonsisti minn:

4.4.1.   Ċirku madwar l-ittra “E” segwit bin-numru li jiddistingwi l-pajjiż li jkun ta l-approvazzjoni (3);

4.4.2.   In-numru ta’ dan ir-Regolament, segwit bl-ittra “R”, daxx u n-numru ta’ l-approvazzjoni fuq il-lemin taċ-ċirku preskritt fil-paragrafu 4.4.1.;

4.4.3.   Is-simbolu addizzjonali li ġej: rettangolu madwar il-figura, (jew numru ta’ figuri), li juri l-veloċità stabbilita (jew firxa ta’ veloċitajiet stabbiliti), f’km fis-siegħa (u mili fis-siegħa jekk mitlub mill-applikant).

4.5.   Jekk il-vettura tkun konformi mat-tip ta’ vettura approvata, taħt wieħed jew aktar Regolamenti oħra annessi ma’ dan il-Ftehim, fil-pajjiż li jkun ħareġ l-approvazzjoni taħt dan ir-Regolament, is-simbolu msemmi fil-paragrafu 4.4.1 m’għandux għalfejn ikun ripetut; f’dak il-każ in-numri tar-Regolament u ta’ l-approvazzjoni u s-simboli addizzjonali tar-Regolamenti kollha li taħthom tkun ħarġet l-approvazzjoni fil-pajjiż li jkun ta l-approvazzjoni taħt dan ir-Regolament għandhom jitpoġġew fil-kolonni vertikali fuq il-lemin tas-simbolu msemmi fil-paragrafu 4.4.1.

4.6.   Il-marka ta’ l-approvazzjoni għandha tkun tista’ tinqara b’mod ċar u ma titħassarx.

4.7.   Il-marka ta’ l-approvazzjoni għandha titpoġġa qrib jew fuq il-pjanċa ta’ l-informazzjoni tal-vettura mwaħħla mill-manifattur.

4.8.   Il-mudelli B u C ta’ l-Anness 4 ta’ dan ir-Regolament jipprovdu eżempji ta’ arranġamenti ta’ marki ta’ approvazzjoni.

Minbarra r-rekwiżiti ta’ mmarkar li jinsabu fil-paragrafu 4.4 ta’ hawn fuq, il-Partijiet Kontraenti f’dan ir-Regolament jistgħu jitolbu li l-vettura tkun mgħammra bi pjanċa li tkun f’pożizzjoni evidenti u faċilment aċċessibbli fil-kumpartiment tas-sewwieq u li b’mod ċar u li ma jitħassarx tkun turi:

4.9.1.   Il-kliem “MGĦAMMAR B’LIMITATUR TAL-VELOĊITÀ” (jew kliem simili ieħor li jkollu l-istess effett),

4.9.2.   L-isem u l-marka tan-negozju tal-kalibratur ta’ l-SLD (jekk applikabbli),

4.9.3.   Ċirku madwar l-ittra “E” segwit bin-numru li jiddistingwi l-pajjiż li jkun ħareġ l-approvazzjoni u n-numru ta’ dan ir-Regolament, segwit bl-ittra “R”, u

4.9.4.   Il-veloċità stabbilita f’km fis-siegħa (u mili fis-siegħa, jekk ikun mitlub) li fiha tkun kalibrata l-vettura.

5.   IR-REKWIŻITI

5.1.   Ir-rekwiżiti għal vetturi ta’ kategoriji M3, N2 u N3 mgħammra b’SLF

5.1.1.   Il-limitazzjoni tal-veloċità trid tkun tali li l-vettura, f'użu normali, minkejja l-vibrazzjonijiet li tista’ tkun suġġetta għalihom, tkun konformi mad-dispożizzjonijiet tal-Parti I ta’ dan ir-Regolament.

B'mod partikolari, l-SLD tal-vettura jrid ikun iddisinjat, mibni u mmuntat b'tali mod li jirreżisti l-fenomeni ta’ korrużjoni u taż-żmien li jkun espost għalihom u li jirreżisti t-tbagħbis skond il-paragrafu 5.1.6 ta’ hawn taħt.

5.1.2.1.   Il-livell ta’ limitazzjoni ma jista’, fl-ebda każ, ikun jista’ jiżdied, jew jitneħħa temporanjament jew permanentement minn fuq vetturi li qed jintużaw. L-invijolabilità għandha tiġi dimostrata lis-servizz tekniku b’dokumentazzjoni li tanalizza l-failure mode li fih is-sistema tkun ser tiġi eżaminta globalment. L-analiżi għandha turi, meta jiġi kkunsidrati l-istati differenti meħuda mis-sistema, il-konsegwenzi ta' xi modifika fl-istati ta' dħul u ta' ħruġ, il-possibilitajiet li jinkisbu dawn il-modifiki permezz ta' nuqqasijiet jew ta’ vjolazzjoni volontarja, u l-possibilità tal-preżenza tagħhom. Il-livell ta' analiżi għandu jkun dejjem sa l-ewwel nuqqas.

5.1.2.2.   Il-funzjoni ta' limitazzjoni tal-veloċità u l-konnessjonijiet meħtieġa għat-tħaddim tagħha, għajr dawk li huma essenzjali għat-tħaddim tal-vettura, għandhom ikunu jistgħu jiġu protetti minn kwalunkwe aġġustament mhux awtorizzat jew mill-interruzzjoni tal-forniment ta' enerġija tiegħu, bit-twaħħil ta' strumenti li jissiġillaw u/jew bil-ħtieġa li jintużaw għodod speċjali.

5.1.3.   Il-funzjoni tal-limitazzjoni tal-veloċità m'għandhiex tazzjona s-sistema tal-brejkijiet tal-vettura. Brejk permanenti (eż. ritardatur) jista' jiġi inkorporat biss jekk dan jaħdem wara li l-funzjoni li tillimita l-veloċità tkun irrestrinġiet l-alimentazzjoni tal-karburant għall-pożizzjoni minima ta' karburant.

5.1.4.   Il-funzjoni ta' limitazzjoni tal-veloċità trid tkun tali li ma taffettwax il-veloċità tat-triq tal-vettura jekk tiġi applikata azzjoni pożittiva fuq l-aċċelleratur meta l-vettura tkun għaddejja bil-veloċità stabbilita tagħha.

5.1.5.   Il-funzjoni ta' limitazzjoni tal-veloċità tista' tippermetti li jkun hemm kontroll normali ta' l-aċċeleratur sabiex ikun jista' jitbiddel il-ger.

5.1.6.   L-ebda nuqqas ta' tħaddim sodisfaċenti jew tbagħbis mhux awtorizzat, m'għandu jirriżulta f'żieda fil-qawwa tal-magna aktar minn dik mitluba mill-pożizzjoni ta' l-aċċeleratur tas-sewwieq.

5.1.7.   Il-funzjoni ta' limitazzjoni tal-veloċità għandha tinkiseb, independentement mill-kontroll ta' l-aċċeleratur użat, jekk ikun hemm iktar minn kontroll wieħed bħal dan li jista' jintlaħaq mill-pożizzjoni ta' bil-qiegħda tas-sewwieq.

5.1.8.   Il-funzjoni ta' limitazzjoni tal-veloċità għandha taħdem b'mod sodifaċenti fl-ambjent elettromanjetiku tagħha mingħajr tfixkil elettromanjetiku inaċċettabli għal kwalunkwe ħaġa f'dan l-ambjent.

5.1.9.   L-applikant għall-approvazzjoni għandu jipprovdi dokumentazzjoni li tiddeskrivi l-proċeduri ta’ verifika u kalibrazzjoni. Għandu jkun possibbli li l-funzjonament tal-funzjoni ta’ limitazzjoni tal-veloċità tkun verifikata waqt li l-vettura tkun wieqfa, (eż. għall-konformità fil-produzzjoni jew għal spezzjoni perjodika).

5.1.10.   Il-komponenti kollha meħtieġa għat-tħaddim sħiħ tal-funzjoni tal-limitazzjoni tal-veloċità għandhom jimtlew bl-enerġija waqt li l-vettura tkun qed tiġi misjuqa.

5.2.   Ir-rekwiżiti għal vetturi mgħammra b’ASLF

L-ASLF għandu jkun tali li l-vettura f’użu normali, u minkejja l-vibrazzjonijiet li tkun suġġetta għalihom, tkun konformi mad-dispożizzjonijiet tal-Parti I ta’ dan ir-Regolament.

5.2.1.1.   B'mod partikolari, l-apparat u l-komponenti kollha li jsostnu l-ASLF iridu jkunu ddisinjati, mibnija u mmuntati b'tali mod li jirreżistu l-fenomeni ta’ korrużjoni u taż-żmien li jistgħu ikunu esposti għalihom.

5.2.2.   L-ASLF għandu jopera b’mod sodisfaċenti fl-ambjent elettromanjetiku tiegħu u għandu jkun konformi mal-preskrizzjonijiet tekniċi tar-Regolament Nru. 10 sa l-aħħar livell ta’ emendi fis-seħħ fiż-żmien ta’ l-approvazzjoni tat-tip.

5.2.3.   L-ebda nuqqas ta' tħaddim sodisfaċenti jew tbagħbis fis-sistema, m'għandu jirriżulta f'żieda fil-qawwa tal-magna aktar minn dik mitluba mill-pożizzjoni ta' l-aċċeleratur tas-sewwieq.

5.2.4.   Il-valur Vadj għandu jkun dejjem indikat lis-sewwieq u viżibbli mill-post tas-sewwieq. Dan ma jipprekludix xi interruzzjoni temporanja ta’ l-indikazzjoni għal raġunijiet ta’ sigurtà jew fuq talba tas-sewwieq.

L-ASLF għandu jissodisfa r-rekwiżiti li ġejjin:

5.2.5.1.   L-ASLF m’għandux jazzjona s-sistema ta’ brejkijiet tal-vettura ħlief għal vetturi ta’ kategoriji M1 u N1, fejn is-sistema ta’ brejkijiet tal-vettura tista’ tiġi azzjonata.

5.2.5.2.   L-ASLF għandu jkun effettiv, tkun xi tkun it-tip ta’ magna jew trażmissjoni li tintuża.

5.2.5.3.   Il-veloċità tal-vettura għandha tkun limitata għal Vadj.

Għandu jkun possibbli li tinqabeż il-Vadj meta l-vettura tkun ittestjata skond il-paragrafu 5.3.

5.2.5.4.1.   Biex tinqabeż il-Vadj, tkun meħtieġa azzjoni pożittiva (*).

5.2.5.4.2.   Kull darba li l-veloċità tal-vettura tkun qed taqbeż il-Vadj, is-sewwieq għandu jkun infurmat permezz ta’ sinjal xieraq ta’ twissija li ma jkunx l-ispeedometer.

5.2.5.4.3.   Il-konformità mal-paragrafu 5.2.5.4.2. għandha tkun dimostrata bit-twettiq tat-testijiet skond il-paragrafu 5.3.

L-istabbiliment tal-Vadj:

5.2.6.1.   Għandu jkun possibbli li l-valur Vadj ikun stabbilit bi gradi li ma jkunux ikbar minn 10 km/siegħa bejn it-30 km/siegħa u l-veloċità massima tal-vettura.

5.2.6.2.   Fil-każ ta’ vetturi manifatturati għall-bejgħ fi kwalunkwe pajjiż fejn jintużaw l-unitajiet imperjali, għandu jkun possibbli li l-valur Vadj ikun stabbilit bi gradi li ma jkunux akbar minn 5 mph bejn l-20mph u l-veloċità massima tal-vettura.

5.2.6.3.   Dan għandu jsir b’apparat ta’ kontroll imħaddem direttament mis-sewwieq.

L-attivazzjoni/id-de-attivazzjoni:

5.2.7.1.   L-ASLF għandu jkun jista’ jiġi attivat u de-attivat fi kwalunkwe ħin.

5.2.7.2.   L-ASLF għandu jkun de-attivat kull darba li l-magna tiġi mwaqqfa minn azzjoni volontarja tas-sewwieq.

5.2.7.3.   Meta l-ASLF jiġi attivat, l-istabbiliment inizjali tal-Vadj m’għandux ikun inqas mill-veloċità kurrenti tal-vettura.

5.3.   It-testijiet

5.3.1.   It-testijiet ta’ limitazzjoni ta’ veloċità li għalihom tkun sottomessa l-vettura għall-approvazzjoni kif ukoll ir-rendimenti ta’ limitazzjoni rikjesti, huma deskritti fl-Anness 5 ta’ dan ir-Regolament. Fuq talba tal-manifattur u bil-qbil ta’ l-awtorità ta’ l-approvazzjoni tat-tip, il-vetturi li l-veloċità ta’ limitazzjoni V tagħhom ma taqbiżx il-veloċità stabbilita Vset definita għal dawk il-vetturi jistgħu jiġu eżentati mit-testijiet ta’ l-Anness 5 bil-kondizzjoni li r-rekwiżiti ta’ dan ir-Regolament ikunu ġew sodisfatti.

It-testijiet tal-limitazzjoni aġġustabbli tal-veloċità li għalihom tkun sottomessa l-vettura preżentata għall-approvazzjoni huma deskritti fl-Anness 6 ta’ dan ir-Regolament.

5.3.2.1.   Se jintgħażlu tliet veloċitajiet differenti għat-testijiet, li jkunu fid-diskrezzjoni tas-servizz tekniku.

6.   IL-MODIFIKAZZJONI TAT-TIP TA’ VETTURA U L-ESTENSJONI TA’ L- APPROVAZZJONI

Kull modifika tat-tip ta' vettura għandha tkun innotifikata lid-dipartiment amministrattiv li jkun approva t-tip ta' vettura. Id-dipariment imbagħad jista' jew:

6.1.1.   Iqis li l-modifiki li saru m'għandhomx tendenza li jkollhom kull effett kuntrarju konsiderevoli u li, f'kull każ, il-vettura xorta għadha tikkonforma mar-rekwiżiti jew

6.1.2.   Jitlob rapport ieħor ta’ test mis-servizz tekniku responsabbli mit-twettiq tat-testijiet.

6.2.   Konferma jew ċaħda ta' approvazzjoni, fejn tkun speċifikata l-alterazzjoni, għandha tiġi kkomunikata lill-Partijiet fil-Ftehim ta’ l-1958 li japplikaw dan ir-Regolament permezz tal-proċedura speċifikata fil-paragrafu 4.3 ta’ hawn fuq.

6.3.   L-awtorità kompetenti li toħroġ estensjoni ta' approvazzjoni għandha tassenja numru serjali għal kull formola ta' komunikazzjoni mimlija għal tali estensjoni u għandha tinforma b’dan lill-Partijiet fil-Ftehim ta’ l-1958 li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 1 ta’ dan ir-Regolament.

7.   IL-KONFORMITÀ FIL-PRODUZZJONI

7.1.   Kull vettura approvata taħt dan ir-Regolament għandha tkun manifatturata b’tali mod li tkun konformi mat-tip approvat billi tissodisfa r-rekwiżiti stabbiliti fil-paragrafu 5 ta’ hawn fuq.

7.2.   Sabiex ikun verifikat li r-rekwiżiti tal-paragrafu 7.1 ikunu sodisfatti, għandhom isiru verifiki xierqa tal-produzzjoni.

Il-pussessur ta’ l-approvazzjoni għandu, b’mod partikolari:

7.3.1.   Jiżgura l-eżistenza ta’ proċeduri għall-kontroll effettiv tal-kwalità tal-vettura;

7.3.2.   Ikollu aċċess għat-tagħmir ta’ l-ittestjar meħtieġ għall-verifikazzjoni tal-konformità ma’ kull tip approvat;

7.3.3.   Jiżgura li d-data tar-riżultat tat-test tkun irreġistrata u li d-dokumenti annessi jibqgħu disponibbli għal perjodu li jrid jiġi stabbilit bi qbil mad-dipartiment amministrattiv;

7.3.4.   Janalizza r-riżultati ta' kull tip ta' test, sabiex jivverifika u jiżgura l-konsistenza tal-karatteristiċi tal-vettura, filwaqt li jikkonċedi li jkun hemm varjazzjonijiet permissibbli fil-produzzjoni industrijali;

7.3.5.   Jiżgura li għal kull tip ta' vettura jsiru kontrolli u testijiet biżżejjed skond il-proċeduri approvati mill-awtorità kompetenti;

7.3.6.   Jiżgura li kwalunkwe sett ta' kampjuni jew ta' komponenti tat-test li jipprovdu evidenza ta’ nuqqas ta' konformità fit-tip ta' test ikkonċernat għandhom iwasslu għal iktar ġbir ta' kampjuni u testijiet. Għandhom jittieħdu l-passi kollha neċessarji sabiex terġa’ tinġieb il-konformità mal-produzzjoni korrispondenti.

L-awtorità kompetenti li tkun ħarġet l-approvazzjoni tat-tip tista' tivverifika f'kull mument il-metodi ta' kontrolli għall-konformità applikati f'kull unità ta' produzzjoni.

7.4.1.   F'kull spezzjoni, ir-rekords tat-testijiet u d-dokumenti tal-produzzjoni għandhom jiġu ppreżentati lill-ispettur li jkun qed iżur.

7.4.2.   L-ispettur jista' jagħżel kampjuni bl-addoċċ biex jiġu ttestjati fil-laboratorju tal-manifattur. In-numru minimu ta' kampjuni jista' jiġi determinat skond ir-riżultati tal-kontrolli tal-manifattur stess.

7.4.3.   Fejn il-livell tal-kwalità ma jkunx jidher sodisfaċenti jew ikun jidher li hemm bżonn li tiġi ppruvata l-validità tat-testijiet li jkunu saru fl-applikazzjoni tal-paragrafu 7.4.2., l-ispettur għandu jagħżel il-kampjuni li għandhom jintbagħtu lis-servizz tekniku li jkun wettaq it-testijiet ta' l-approvazzjoni tat-tip.

7.4.4.   L-awtorità kompetenti tista' twettaq kwalunkwe test stabbilit f'dan ir-Regolament. Il-frekwenza normali ta' spezzjonijiet awtorizzati mill-awtorità kompetenti għandha tkun ta' darba kull sentejn. F'każijiet fejn jinstabu riżultati mhux sodisfaċenti matul waħda minn dawn l-ispezzjonijiet, l-awtorità kompetenti għandha tiżgura li jittieħdu l-passi kollha meħtieġa sabiex terġa' tinkiseb il-konformità tal-produzzjoni malajr kemm jista' jkun.

8.   IL-PIENI GĦAN-NUQQAS TA’ KONFORMITÀ FIL-PRODUZZJONI

8.1.   L-approvazzjoni maħruġa fir-rigward ta' tip ta' vettura skond dan ir-Regolament tista' tiġi rtirata jekk ir-rekwiżiti stabbiliti fil-paragrafu 5 ta' hawn fuq ma jkunux imħarsa.

8.2.   Jekk Parti Kontraenti fil-Ftehim ta’ l-1958 li tapplika dan ir-Regolament tirtira approvazzjoni li hi tkun ħarġet preċedentement, din għandha minnufih tavża lill-Partijiet Kontraenti l-oħra li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 1 ta’ dan ir-Regolament.

9.   IL-PRODUZZJONI LI TWAQQFET GĦAL KOLLOX

9.1.   Jekk il-pussessur ta’ l-approvazzjoni jwaqqaf għal kollox il-manifattura ta’ tip ta’ vettura approvat skond dan ir-Regolament, huwa għandu jinforma b’dan lill-awtorità li tkun ħarġet l-approvazzjoni. Malli tirċievi l-komunikazzjoni rilevanti, dik l-awtorità għandha tavża b’dan lill-Partijiet fil-Ftehim ta’ l-1958 li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 1 ta’ dan ir-Regolament.

10.   L-ISMIJIET U L-INDIRIZZI TAS-SERVIZZI TEKNIĊI RESPONSABBLI GĦAT-TWETTIQ TA’ TESTIJIET TA’ APPROVAZZJONI U TAD-DIPARTIMENTI AMMINISTRATTIVI

10.1.   Il-Partijiet Kontraenti fil-Ftehim ta’ l-1958 li japplikaw dan ir-Regolament għandhom jikkomunikaw lis-segretarjat tan-Nazzjonijiet Uniti l-ismijiet u l-indirizzi tas-servizzi tekniċi responsabbli għat-twettiq ta’ testijiet ta’ approvazzjoni u tad-dipartimenti amministrattivi li joħorġu l-approvazzjoni u li lilhom għandhom jintbagħtu l-formoli li jiċċertifikaw l-approvazzjoni jew l-estensjoni, jew ċaħda jew irtirar ta’ approvazzjoni jew il-produzzjoni mwaqqfa għal kollox, maħruġa f’pajjiżi oħra.

PARTI II

L-APPROVAZZJONI TA’ VETTURI FIR-RIGWARD TA’ L-INSTALLAZZJONI TA’ APPARAT LI JILLIMITA L-VELOĊITÀ (SLD) TA’ TIP APPROVAT

11.   L-APPLIKAZZJONI GĦALL-APPROVAZZJONI

11.1.   L-applikazzjoni għall-approvazzjoni ta’ tip ta’ vettura fir-rigward ta’ l-installazzjoni ta’ SLD ta’ tip approvat għandha tkun sottomessa mill-manifattur tal-vettura jew mir-rappreżentant tiegħu li jkun akkreditat b’mod xieraq.

Din għandha tkun akkumpanjata minn tliet kopji tad-dokumenti msemmija hawn taħt u bid-dettalji li ġejjin:

11.2.1.   Deskrizzjoni dettaljata tat-tip ta’ vettura u tal-partijiet tal-vettura relatati mal-limitazzjoni tal-veloċità, li tkun tinkludi d-dettalji u d-dokumentazzjoni msemmija fl-Anness 2 ta’ dan ir-Regolament.

11.2.2.   Fuq talba ta’ l-awtorità kompetenti għandha tkun provduta wkoll il-formola ta’ komunikazzjoni tat-tip approvat (jiġifieri, Anness 3 ta’ dan ir-Regolament) ta’ kull tip ta’ SLD.

Vettura rappreżentattiva tat-tip li jkun se tiġi approvat u mgħammra b’SLD tat-tip approvat, għandha titressaq lis-servizz tekniku,

11.2.3.1.   Vettura li ma jkollhiex il-komponenti kollha li jikkorrispondu għat-tip tista’ tiġi aċċettata bil-kondizzjoni li l-applikant ikun jista’ juri, għas-sodisfazzjon ta’ l-awtorità kompetenti, li n-nuqqas ta’ dawn il-komponenti nieqsa m’għandu l-ebda effett fuq ir-riżultati tal-verifiki, f’dak li għandu x’jaqsam mar-rekwiżiti ta’ dan ir-Regolament.

11.3.   L-awtorità kompetenti għandha tivverifika l-eżistenza ta’ arranġamenti sodisfaċenti sabiex jiġu żgurati kontrolli effettivi fuq il-konformità tal-produzzjoni qabel ma tingħata l-approvazzjoni tat-tip.

12.   L-APPROVAZZJONI

12.1.   Jekk il-vettura mressqa għall-approvazzjoni skond dan ir-Regolament tkun provduta b’SLD u tkun tissodisfa r-rekwiżiti tal-paragrafu 13 ta’ hawn taħt, l-approvazzjoni ta’ dak it-tip ta’ vettura għandha tingħata.

12.2.   Għandu jiġi assenjat numru ta’ approvazzjoni għal kull tip approvat. L-ewwel żewġ figuri (00 għar-Regolament fil-forma preżenti tiegħu) għandhom jindikaw is-serje ta’ emendi li jkunu jinkorporaw l-emendi tekniċi l-aktar reċenti magħmula għar-Regolament fiż-żmien tal-ħruġ ta’ l-approvazzjoni. L-istess Parti Kontraenti ma tistax tassenja l-istess numru lil tip ta’ vettura oħra.

12.3.   Għandu jiġi komunikat avviż ta’ approvazzjoni jew ta’ estensjoni jew ċaħda jew irtirar ta’ approvazzjoni jew it-twaqqif għal kollox tal-produzzjoni ta’ tip ta’ vettura skond dan ir-Regolament lill-Partijiet fil-Ftehim li japplikaw dan ir-Regolament permezz ta’ formola li tkun konformi mal-mudell fl-Anness 2 ta’ dan ir-Regolament.

Ma’ kull vettura li tkun konformi mat-tip ta’ vettura approvata taħt dan ir-Regolament għandu jkun hemm imwaħħla, b’mod li tidher u f’post li jkun faċilment aċċessibbli u li jkun speċifikat fil-formola ta’ l-approvazzjoni, marka internazzjonali ta’ l-approvazzjoni li tkun tikkonsisti minn:

12.4.1.   Ċirku madwar l-ittra “E” segwit bin-numru li jiddistingwi l-pajjiż li jkun ta l-approvazzjoni (3);

12.4.2.   In-numru ta’ dan ir-Regolament, segwit bl-ittra “R”, daxx u n-numru ta’ l-approvazzjoni fuq il-lemin taċ-ċirku preskritt fil-paragrafu 12.4.1.

12.4.3.   Is-simbolu addizzjonali li ġej: rettangolu madwar numru ta’ figuri li jikkorrispondu għall-firxa ta’ veloċitajiet tal-vettura li għalihom l-SLD jista’ jkun stabbilit, determinati f’km fis-siegħa (u mili fis-siegħa jekk mitlub mill-applikant).

12.5.   Jekk il-vettura tkun konformi mat-tip ta’ vettura approvata, taħt wieħed jew aktar Regolamenti oħra annessi ma’ dan il-Ftehim, fil-pajjiż li jkun ħareġ l-approvazzjoni taħt dan ir-Regolament, is-simbolu msemmi fil-paragrafu 12.4.1 m’għandux għalfejn ikun ripetut; f’dak il-każ in-numri tar-Regolament u ta’ l-approvazzjoni u s-simboli addizzjonali tar-Regolamenti kollha li taħthom tkun ħarġet l-approvazzjoni fil-pajjiż li jkun ta l-approvazzjoni taħt dan ir-Regolament għandhom jitpoġġew fil-kolonni vertikali fuq il-lemin tas-simbolu msemmi fil-paragrafu 12.4.1.

12.6.   Il-marka ta’ l-approvazzjoni għandha tkun tista’ tinqara b’mod ċar u ma titħassarx.

12.7.   Il-marka ta’ l-approvazzjoni għandha titpoġġa qrib jew fuq il-pjanċa ta’ l-informazzjoni tal-vettura mwaħħla mill-manifattur.

12.8.   Il-mudelli B u C ta’ l-Anness 4 ta’ dan ir-Regolament jipprovdu eżempji ta’ arranġamenti ta’ marki ta’ approvazzjoni.

Minbarra r-rekwiżiti ta’ mmarkar li jinsabu fil-paragrafu 12.4 ta’ hawn fuq, il-Partijiet Kontraenti f’dan ir-Regolament jistgħu jitolbu li l-vettura tkun mgħammra bi pjanċa li tkun f’pożizzjoni evidenti u faċilment aċċessibbli fil-kumpartiment tas-sewwieq u li b’mod ċar u li ma jitħassarx tkun turi:

12.9.1.   Il-kliem “MGĦAMMAR B’LIMITATUR TAL-VELOĊITÀ” (jew kliem ieħor simili li jkollu l-istess effett),

12.9.2.   L-isem u l-marka tan-negozju tal-kalibratur ta’ l-SLD (jekk applikabbli),

12.9.3.   Ċirku madwar l-ittra “E” segwit bin-numru li jiddistingwi l-pajjiż li jkun ħareġ l-approvazzjoni u n-numru ta’ dan ir-Regolament, segwit bl-ittra “R”, u

12.9.4.   Il-veloċità stabbilita f’km fis-siegħa (u mili fis-siegħa, jekk ikun mitlub) li fiha tkun kalibrata l-vettura.

13.   IR-REKWIŻITI

13.1.   Ir-rekwiżiti li jikkonċernaw l-installazzjoni ta’ SLD approvat

13.1.1.   L-SLD għandha tkun installata b’tali mod li jippermetti lill-vettura, f'użu normali, li minkejja l-vibrazzjonijiet li tista’ tkun suġġetta għalihom, tkun konformi mad-dispożizzjonijiet tal-Parti II ta’ dan ir-Regolament.

13.1.2.   Id-dokument ta’ l-informazzjoni għandu jindika kif tkun żgurata l-invijolabilità ta’ l-SLD. Il-livell ta’ analiżi għandu jkun dejjem sa l-ewwel nuqqas.

13.1.3.   Il-funzjoni ta' limitazzjoni tal-veloċità għandha tinkiseb, independentement mill-kontroll ta' l-aċċeleratur użat, jekk ikun hemm iktar minn kontroll wieħed bħal dan li jista' jintlaħaq mill-pożizzjoni ta' bil-qiegħda tas-sewwieq.

13.1.4.   L-applikant għall-approvazzjoni għandu jipprovdi dokumentazzjoni li tiddeskrivi l-proċeduri ta’ verifika u kalibrazzjoni. Għandu jkun possibbli li l-funzjonament tal-funzjoni ta’ limitazzjoni tal-veloċità ikun verifikat waqt li l-vettura tkun wieqfa, (eż. għall-konformità fil-produzzjoni jew għal spezzjoni perjodika).

13.1.5.   Il-komponenti kollha meħtieġa għat-tħaddim sħiħ ta’ l-SLD għandhom jimtlew bl-enerġija waqt li l-vettura tkun qed tiġi misjuqa.

13.1.6.   Il-funzjoni tal-limitazzjoni tal-veloċità m'għandhiex tazzjona s-sistema tal-brejkijiet tal-vettura. Brejk permanenti (eż. ritardatur) jista' jiġi inkorporat biss jekk dan jaħdem wara li l-funzjoni li tillimita l-veloċità tkun irrestrinġiet l-alimentazzjoni tal-karburant għall-pożizzjoni minima ta' karburant.

13.2.   Ir-rekwiżiti li jikkonċernaw l-installazzjoni ta’ ASLD approvat

13.2.1.   Il-vettura li fuqha jkun installat l-ASLD approvat għandha tissodisfa r-rekwiżiti kollha tal-paragrafi 5.2.2., 5.2.4., 5.2.5.4., 5.2.6. u 5.2.7.

14.   IL-MODIFIKAZZJONI TAT-TIP TA’ VETTURA U L-ESTENSJONI TA’ L- APPROVAZZJONI

Kull modifika tat-tip ta' vettura għandha tkun innotifikata lid-dipartiment amministrattiv li jkun approva t-tip ta' vettura. Id-dipariment imbagħad jista' jew:

14.1.1.   Iqis li l-modifiki li saru m'għandhomx tendenza li jkollhom kull effett kuntrarju konsiderevoli u li, f'kull każ, il-vettura xorta għadha tikkonforma mar-rekwiżiti, jew

14.1.2.   Jitlob rapport ieħor mis-servizz tekniku.

14.2.   Konferma jew ċaħda ta' approvazzjoni, fejn tkun speċifikata l-alterazzjoni, għandha tiġi kkomunikata lill-Partijiet fil-Ftehim ta’ l-1958 li japplikaw dan ir-Regolament permezz tal-proċedura speċifikata fil-paragrafu 12.3 ta’ hawn fuq.

14.3.   L-awtorità kompetenti li toħroġ estensjoni ta' approvazzjoni għandha tassenja numru serjali għal kull formola ta' komunikazzjoni mimlija għal tali estensjoni u għandha tinforma b’dan lill-Partijiet fil-Ftehim ta’ l-1958 li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 2 ta’ dan ir-Regolament.

15.   IL-KONFORMITÀ FIL-PRODUZZJONI

15.1.   Kull vettura approvata taħt dan ir-Regolament għandha tkun manifatturata b’tali mod li tkun konformi mat-tip approvat billi tissodisfa r-rekwiżiti stabbiliti fil-paragrafu 13 ta’ hawn fuq.

15.2.   Sabiex ikun verifikat li r-rekwiżiti tal-paragrafu 15.1 ikunu sodisfatti, għandhom isiru verifiki xierqa fuq il-produzzjoni.

Il-pussessur ta’ l-approvazzjoni għandu, b’mod partikolari:

15.3.1.   Jiżgura l-eżistenza ta’ proċeduri għall-kontroll effettiv tal-kwalità tal-vettura fir-rigward ta’ l-aspetti kollha relevanti għall-konformità mar-rekwiżiti stabbiliti fil-paragrafu 13 ta’ hawn fuq;

15.3.2.   Jiżgura li għal kull vettura approvata jsiru verifiki biżżejjed fir-rigward ta’ l-installazzjoni ta’ SLD tat-tip approvat, b’tali mod li l-vetturi kollha fil-produzzjoni jkunu konformi ma’ l-ispeċifikazzjonijiet tal-vetturi mressqa għall-approvazzjoni tat-tip;

15.3.3.   Jiżgura li, jekk il-verifiki mwettqa skond il-paragrafu 15.3.2. ta’ hawn fuq jipprovdu evidenza ta’ nuqqas ta’ konformità ta’ vettura waħda jew aktar mar-rekwiżiti stabbiliti fil-paragrafu 13 ta’ hawn fuq, għandhom jittieħdu l-passi kollha neċessarji biex terġa’ tinġieb il-konformità mal-produzzjoni korrispondenti.

15.4.   L-awtorità kompetenti li tkun ħarġet l-approvazzjoni tat-tip tista’ fi kwalunkwe ħin tivverifika l-metodi ta’ kontroll tal-konformità applikati għal kull unità ta’ produzzjoni. L-awtorità tista’ wkoll twettaq verifiki fuq bażi ta’ kif jinzerta fuq vetturi manifatturati f’serje fir-rigward tar-rekwiżiti stabbiliti fil-paragrafu 13 ta’ hawn fuq.

15.5.   Fejn jinstabu riżultati mhux sodisfaċenti matul waħda minn dawn il-verifiki u spezzjonijiet skond il-paragrafu 15.4 ta’ hawn fuq, l-awtorità kompetenti għandha tiżgura li jittieħdu l-passi kollha meħtieġa sabiex terġa' tinkiseb il-konformità tal-produzzjoni malajr kemm jista' jkun.

15.6.   Il-frekwenza normali ta' spezzjonijiet awtorizzati mill-awtorità kompetenti għandha tkun ta' darba kull sentejn. F'każijiet fejn jinstabu riżultati mhux sodisfaċenti matul waħda minn dawn l-ispezzjonijiet, l-awtorità kompetenti għandha tiżgura li jittieħdu l-passi kollha meħtieġa sabiex terġa' tinkiseb il-konformità tal-produzzjoni malajr kemm jista' jkun.

16.   IL-PIENI GĦAN-NUQQAS TA’ KONFORMITÀ FIL-PRODUZZJONI

16.1.   L-approvazzjoni maħruġa fir-rigward ta' tip ta' vettura skond dan ir-Regolament tista' tiġi rtirata jekk ir-rekwiżiti stabbiliti fil-paragrafu 13 ta' hawn fuq ma jkunux imħarsa.

16.2.   Jekk Parti Kontraenti fil-Ftehim ta’ l-1958 li tapplika dan ir-Regolament tirtira approvazzjoni li hi tkun ħarġet preċedentement, din għandha minnufih tavża lill-Partijiet Kontraenti l-oħra li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 2 ta’ dan ir-Regolament.

17.   IL-PRODUZZJONI LI TWAQQFET GĦAL KOLLOX

17.1.   Jekk il-pussessur ta’ l-approvazzjoni jwaqqaf għal kollox il-manifattura ta’ tip ta’ vettura approvat skond dan ir-Regolament, huwa għandu jinforma b’dan lill-awtorità li tkun ħarġet l-approvazzjoni. Malli tirċievi l-komunikazzjoni rilevanti, dik l-awtorità għandha tavża b’dan lill-Partijiet fil-Ftehim ta’ l-1958 li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 2 ta’ dan ir-Regolament.

18.   L-ISMIJIET U L-INDIRIZZI TAS-SERVIZZI TEKNIĊI RESPONSABBLI GĦAT-TWETTIQ TA’ TESTIJIET TA’ APPROVAZZJONI U TAD-DIPARTIMENTI AMMINISTRATTIVI

18.1.   Il-Partijiet Kontraenti fil-Ftehim ta’ l-1958 li japplikaw dan ir-Regolament għandhom jikkomunikaw lis-segretarjat tan-Nazzjonijiet Uniti l-ismijiet u l-indirizzi tas-servizzi tekniċi responsabbli għat-twettiq ta’ testijiet ta’ approvazzjoni u tad-dipartimenti amministrattivi li joħorġu l-approvazzjoni u li lilhom għandhom jintbagħtu l-formoli li jiċċertifikaw l-approvazzjoni jew l-estensjoni, jew ċaħda jew irtirar ta’ approvazzjoni jew il-produzzjoni mwaqqfa għal kollox, maħruġa f’pajjiżi oħra.

PARTI III

L-APPROVAZZJONI TA’ APPARATI LI JILLIMITAW IL-VELOĊITÀ (SLD)

19.   L-APPLIKAZZJONI GĦALL-APPROVAZZJONI TA’ SLD

19.1.   L-applikazzjoni għall-approvazzjoni ta’ SLD għandha tkun sottomessa mill-manifattur tal-vettura jew mir-rappreżentant tiegħu li jkun akkreditat b’mod xieraq.

Għal kull tip ta’ SLD l-applikazzjoni għandha tkun akkumpanjata b’dan li ġej:

19.2.1.   Tliet kopji ta’ dokumentazzjoni li tiddeskrivi l-karatteristiċi tekniċi ta’ l-SLD u l-metodu ta’ l-installazzjoni tiegħu fuq kull mudell u tip ta’ vettura li għaliha jkun maħsub li jiġi installat l-SLD;

19.2.2.   Ħames kampjuni tat-tip ta’ SLD: il-kampjuni għandhom jinkludu, b’mod ċar u li ma jitħassarx, l-isem jew il-marka tan-negozju ta’ l-applikant u d-disinn tat-tip;

19.2.3.   Vettura jew magna (f’każ ta’ ittestjar fuq bank tal-magni) mgħammra bl-SLD tat-tip li jkun se jiġi approvat, magħżula mill-applikant bi qbil mas-servizz tekniku responsabbli għat-twettiq tat-testijiet ta’ l-approvazzjoni.

19.3.   L-awtorità kompetenti għandha tivverifika l-eżistenza ta’ arranġamenti sodisfaċenti sabiex jiġu żgurati kontrolli effettivi fuq il-konformità tal-produzzjoni qabel ma tingħata l-approvazzjoni tat-tip.

20.   L-APPROVAZZJONI

20.1.   Jekk l-SLD mressaq għall-approvazzjoni skond dan ir-Regolament jissodisfa r-rekwiżiti tal-paragrafu 21 ta’ hawn taħt, l-approvazzjoni ta’ dak it-tip ta’ SLD għandha tingħata.

20.2.   Għandu jiġi assenjat numru ta’ approvazzjoni għal kull tip approvat. L-ewwel żewġ figuri (00 għar-Regolament fil-forma preżenti tiegħu) għandhom jindikaw is-serje ta’ emendi li jkunu jinkorporaw l-emendi tekniċi l-aktar reċenti u importanti magħmula għar-Regolament fiż-żmien tal-ħruġ ta’ l-approvazzjoni. L-istess Parti Kontraenti ma tistax tassenja l-istess numru lil tip ieħor ta’ SLD.

20.3.   Għandu jiġi komunikat avviż ta’ approvazzjoni jew estensjoni jew ċaħda jew irtirar ta’ approvazzjoni jew it-twaqqif għal kollox tal-produzzjoni ta’ tip ta’ SLD skond dan ir-Regolament lill-Partijiet fil-Ftehim li japplikaw dan ir-Regolament permezz ta’ formola li tkun konformi mal-mudell fl-Anness 3 ta’ dan ir-Regolament.

Ma’ kull SLD li jkun konformi mat-tip ta’ SLD approvat taħt dan ir-Regolament għandu jkun hemm imwaħħla, b’mod li tidher u f’post li jkun faċilment aċċessibbli u li jkun speċifikat fil-formola ta’ l-approvazzjoni, marka internazzjonali ta’ l-approvazzjoni li tkun tikkonsisti minn:

20.4.1.   Ċirku madwar l-ittra “E” segwit bin-numru li jiddistingwi l-pajjiż li jkun ta l-approvazzjoni (3);

20.4.2.   In-numru ta’ dan ir-Regolament, segwit bl-ittra “R”, daxx u n-numru ta’ l-approvazzjoni fuq il-lemin taċ-ċirku preskritt fil-paragrafu 20.4.1.

20.5.   Il-marka ta’ l-approvazzjoni għandha tkun tista’ tinqara b’mod ċar u ma titħassarx.

20.6.   Il-mudell A ta’ l-Anness 4 ta’ dan ir-Regolament jipprovdi eżempji ta’ arranġamenti ta’ marki ta’ approvazzjoni.

21.   IR-REKWIŻITI

21.1.   Ġenerali

21.1.1.   L-SLD għandha tkun disinjata, mibnija u mmuntata b’tali mod li tippermetti lill-vettura f'użu normali, mgħammra b’SLD, li tħares id-dispożizzjonijiet tal-Parti III ta’ dan ir-Regolament.

B'mod partikolari, l-SLD jrid ikun iddisinjat, mibni u mmuntat b'tali mod li jirreżisti l-fenomeni ta’ korrużjoni u taż-żmien li jkun espost għalihom u li jirreżisti t-tbagħbis skond il-paragrafu 21.1.6.

21.1.2.1.   Il-veloċità stabbilita Vset m’għandha, fl-ebda każ, tkun tista’ tiżdied, jew titneħħa temporanjament jew permanentement minn fuq vetturi li qed jintużaw. L-invijolabilità għandha tiġi dimostrata lis-servizz tekniku b’dokumentazzjoni li tanalizza l-failure mode li fih is-sistema tkun ser tiġi eżaminta globalment. L-analiżi għandha turi, meta jiġi kkunsidrati l-istati differenti meħuda mis-sistema, il-konsegwenzi ta' xi modifika fl-istati ta' dħul u ta' ħruġ tal-funzjonament, il-possibilitajiet li jinkisbu dawn il-modifiki permezz ta' nuqqasijiet jew ta’ vjolazzjoni volontarja, u l-possibilità tal-preżenza tagħhom. Il-livell ta' analiżi għandu jkun dejjem sa l-ewwel nuqqas.

21.1.2.2.   L-SLD u l-konnessjonijiet meħtieġa għat-tħaddim tiegħu, għajr dawk li huma essenzjali għat-tħaddim tal-vettura, għandhom ikunu jistgħu jiġu protetti minn kwalunkwe aġġustament mhux awtorizzat jew mill-interruzzjoni tal-forniment ta' enerġija tiegħu, bit-twaħħil ta' strumenti li jissiġillaw u/jew bil-ħtieġa li jintużaw għodod speċjali.

21.1.3.   L-SLD m'għandux jazzjona s-sistema tal-brejkijiet tal-vettura. Brejk permanenti (eż. ritardatur) jista' jiġi azzjonat biss jekk dan jaħdem wara li l-apparat li jillimita l-veloċità ikun irrestrinġa l-alimentazzjoni tal-karburant għall-pożizzjoni minima ta' karburant.

21.1.4.   L-SLD għandu jkun tali li ma jaffettwax il-veloċità tat-triq tal-vettura jekk tiġi applikata azzjoni pożittiva fuq l-aċċelleratur meta l-vettura tkun għaddejja bil-veloċità stabbilita tagħha.

21.1.5.   L-SLD jista' jippermetti li jkun hemm kontroll normali ta' l-aċċeleratur sabiex ikun jista' jitbiddel il-ger.

21.1.6.   L-ebda nuqqas ta' tħaddim sodisfaċenti jew tbagħbis mhux awtorizzat, m'għandu jirriżulta f'żieda fil-qawwa tal-magna aktar minn dik mitluba mill-pożizzjoni ta' l-aċċeleratur tas-sewwieq.

21.1.7.   L-SLD għandu jaħdem b'mod sodifaċenti fl-ambjent elettromanjetiku tiegħu mingħajr tfixkil elettromanjetiku inaċċettabli għal kwalunkwe ħaġa f'dan l-ambjent.

21.2.   Ir-rekwiżiti għall-ASLDs

L-apparat aġġustabbli li jillimita l-veloċità ASLD irid ikun tali li l-vettura, f'użu normali, minkejja l-vibrazzjonijiet li tista’ tkun suġġetta għalihom, tkun konformi mad-dispożizzjonijiet tal-Parti III ta’ dan ir-Regolament.

21.2.1.1.   B'mod partikolari, l-ASLF irid ikun iddisinjat, mibni u mmuntat b'tali mod li jirreżisti l-fenomeni ta’ korrużjoni u taż-żmien li jkun espost għalihom.

21.2.2.   Il-funzjoni ta' limitazzjoni tal-veloċità għandha taħdem b'mod sodifaċenti fl-ambjent elettromanjetiku tagħha, skond il-preskrizzjonijiet ta’ l-Artikolu 10 sal-livell l-iktar reċenti ta’ emendi li jkunu fis-seħħ fiż-żmien ta’ l-approvazzjoni tat-tip.

21.2.3.   L-ebda nuqqas ta' tħaddim sodisfaċenti jew tbagħbis mhux awtorizzat, m'għandu jirriżulta f'żieda fil-qawwa tal-magna aktar minn dik mitluba mill-pożizzjoni ta' l-aċċeleratur tas-sewwieq.

21.2.4.   Il-valur Vadj għandu jkun dejjem indikat lis-sewwieq u viżibbli mill-post tas-sewwieq. Dan ma jipprekludix xi interruzzjoni temporanja ta’ l-indikazzjoni għal raġunijiet ta’ sigurtà.

L-ASLD għandu jħares ir-rekwiżiti li ġejjin:

21.2.5.1.   L-apparat aġġustabbli li jillimita l-veloċità m’għandux jazzjona s-sistema ta’ brejkijiet tal-vettura ħlief għal vetturi ta’ kategoriji M1 u N1, fejn is-sistema ta’ brejkijiet tal-vettura tista’ tiġi azzjonata.

21.2.5.2.   Il-metodu użat biex tkun limitata l-veloċità meta tintlaħaq il-Vadj għandu jkun possibbli, tkun xi tkun it-tip ta’ trażmissjoni (awtomatika jew manwali) tal-vettura.

21.2.5.3.   Il-veloċità tal-vettura għandha tkun limitata għall-Vadj.

Xorta għandu jkun possibbli li tinqabeż il-veloċità Vadj.

21.2.5.4.1.   Biex tinqabeż il-Vadj, tkun meħtieġa azzjoni pożittiva (*).

21.2.5.4.2.   Kull darba li l-veloċità tal-vettura tkun qed taqbeż il-Vadj, is-sewwieq għandu jkun infurmat permezz ta’ sinjal xieraq ta’ twissija li ma jkunx l-ispeedometer.

21.2.5.4.3.   Il-konformità mal-paragrafu 21.2.5.4.2. għandha tkun dimostrata bil-paragrafu 21.3.

21.2.5.5.   Il-funzjoni ta' limitazzjoni tal-veloċità għandha tippermetti użu normali tal-kontroll ta' l-aċċeleratur sabiex ikun jista' jitbiddel il-ger.

L-istabbiliment tal-Vadj:

21.2.6.1.   Għandu jkun possibbli li l-valur Vadj ikun stabbilit bi gradi li ma jkunux ikbar minn 10 km/siegħa (5 mili fis-siegħa) bejn it-30 km/siegħa (20 mil fis-siegħa) u l-veloċità massima tal-vettura.

21.2.6.2.   Fil-każ ta’ vetturi manifatturati għall-bejgħ fi kwalunkwe pajjiż fejn jintużaw l-unitajiet imperjali, għandu jkun possibbli li l-valur Vadj ikun stabbilit bi gradi li ma jkunux akbar minn 5 mph bejn l-20mph u l-veloċità massima tal-vettura.

21.2.6.3.   Dan għandu jsir b’apparat ta’ kontroll imħaddem direttament mis-sewwieq.

L-attivazzjoni/id-de-attivazzjoni

21.2.7.1.   Fejn il-Vadj tkun stabbilita mis-sewwieq, m’għandux ikun possibbli li din tkun modifikata bi kwalunkwe mezz ieħor li ma jkunx l-apparat maħsub għall-kontroll.

21.2.7.2.   L-ASLD għandu jkun jista’ jiġi attivat u de-attivat fi kwalunkwe ħin.

21.2.7.3.   L-ASLD għandu jkun de-attivat kull darba li tiġi mwaqqfa l-magna u tinħareġ iċ-ċavetta.

21.3.   It-testijiet

21.3.1.   It-testijiet ta’ limitazzjoni ta’ veloċità li għalihom ikun sottomess l-SLD preżentat għall-approvazzjoni kif ukoll ir-rendimenti rikjesti, huma deskritti fl-Anness 5 ta’ dan ir-Regolament.

It-testijiet ta’ limitazzjoni aġġustabbli ta’ veloċità li għalihom ikun sottomess l-ASLD preżentat għall-approvazzjoni huma deskritti fl-Anness 6 ta’ dan ir-Regolament.

21.3.2.1.   Se jintgħażlu tliet veloċitajiet differenti għat-testijiet, li jkunu fid-diskrezzjoni tas-servizz tekniku.

22.   IL-MODIFIKAZZJONI TAT-TIP TA’ SLD U L-ESTENSJONI TA’ L- APPROVAZZJONI

Kull modifika tat-tip ta' SLD għandha tkun innotifikata lid-dipartiment amministrattiv li jkun approva t-tip ta' SLD. Id-dipariment imbagħad jista' jew:

22.1.1.   Iqis li l-modifiki li saru m'għandhomx tendenza li jkollhom effett kuntrarju konsiderevoli u li, f'kull każ, l-SLD xorta għadu jikkonforma mar-rekwiżiti, jew

22.1.2.   Jitlob rapport ieħor ta’ test mis-servizz tekniku responsabbli mit-twettiq tat-testijiet għal xi testijiet jew għat-testijiet kollha deskritti fl-Anness 5 ta’ dan ir-Regolament.

22.2.   Konferma jew ċaħda ta' approvazzjoni, fejn tkun speċifikata l-alterazzjoni, għandha tiġi kkomunikata lill-Partijiet fil-Ftehim ta’ l-1958 li japplikaw dan ir-Regolament permezz tal-proċedura speċifikata fil-paragrafu 20.3 ta’ hawn fuq.

22.3.   L-awtorità kompetenti li toħroġ estensjoni ta' approvazzjoni għandha tassenja numru serjali għal kull formola ta' komunikazzjoni mimlija għal tali estensjoni u għandha tinforma b’dan lill-Partijiet fil-Ftehim ta’ l-1958 li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 3 ta’ dan ir-Regolament.

23.   IL-KONFORMITÀ FIL-PRODUZZJONI

23.1.   Kull SLD approvat taħt dan ir-Regolament għandu jkun manifatturat b’tali mod li jkun konformi mat-tip approvat billi jissodisfa r-rekwiżiti stabbiliti fil-paragrafu 21 ta’ hawn fuq.

23.2.   Sabiex ikun verifikat li r-rekwiżiti tal-paragrafu 23.1 ikunu sodisfatti, għandhom isiru verifiki xierqa tal-produzzjoni.

Il-pussessur ta’ l-approvazzjoni għandu, b’mod partikolari:

23.3.1.   Jiżgura l-eżistenza ta’ proċeduri għall-kontroll effettiv tal-kwalità ta’ l-SLD;

23.3.2.   Ikollu aċċess għat-tagħmir ta’ l-ittestjar meħtieġ għall-verifikazzjoni tal-konformità ma’ kull tip approvat;

23.3.3.   Jiżgura li d-data tar-riżultat tat-test tkun irreġistrata u li d-dokumenti annessi jibqgħu disponibbli għal perjodu li jrid jiġi stabbilit bi qbil mad-dipartiment amministrattiv;

23.3.4.   Janalizza r-riżultati ta' kull tip ta' test, sabiex jivverifika u jiżgura l-konsistenza tal-karatteristiċi ta’ l-SLD, filwaqt li jikkonċedi li jkun hemm varjazzjonijiet permissibbli fil-produzzjoni industrijali;

23.3.5.   Jiżgura li għal kull tip ta’ SLD mill-inqas il-materjali kostitwenti u l-metodu ta’ l-immuntar ikunu jikkorrispondu għall-SLD approvat. Jekk meħtieġ, għandhom jitwettqu t-testijiet preskritti fil-paragrafu 1 ta’ l-Anness 5 ta’ dan ir-Regolament;

23.3.6.   Jiżgura li kwalunkwe sett ta' kampjuni jew ta' komponenti tat-test li jipprovdu evidenza ta’ nuqqas ta' konformità fit-tip ta' test ikkonċernat għandhom iwasslu għal iktar ġbir ta' kampjuni u testijiet. Għandhom jittieħdu l-passi kollha neċessarji sabiex terġa’ tinġieb il-konformità mal-produzzjoni korrispondenti.

L-awtorità kompetenti li tkun ħarġet l-approvazzjoni tat-tip tista' tivverifika f'kull mument il-metodi ta' kontrolli għall-konformità applikati f'kull unità ta' produzzjoni.

23.4.1.   F'kull spezzjoni, ir-rekords tat-testijiet u d-dokumenti tal-produzzjoni għandhom jiġu ppreżentati lill-ispettur li jkun qed iżur.

23.4.2.   L-ispettur jista' jagħżel kampjuni bl-addoċċ biex jiġu ttestjati fil-laboratorju tal-manifattur. In-numru minimu ta' kampjuni jista' jiġi determinat skond ir-riżultati tal-kontrolli tal-manifattur stess.

23.4.3.   Fejn il-livell tal-kwalità ma jkunx jidher sodisfaċenti jew ikun jidher li hemm bżonn li tiġi ppruvata l-validità tat-testijiet li jkunu saru fl-applikazzjoni tal-paragrafu 23.4.2., l-ispettur għandu jagħżel il-kampjuni li għandhom jintbagħtu lis-servizz tekniku li jkun wettaq it-testijiet ta' l-approvazzjoni tat-tip.

23.4.4.   L-awtorità kompetenti tista' twettaq kwalunkwe test stabbilit f'dan ir-Regolament. Il-frekwenza normali ta' spezzjonijiet awtorizzati mill-awtorità kompetenti għandha tkun ta' darba kull sentejn. F'każijiet fejn jinstabu riżultati mhux sodisfaċenti matul waħda minn dawn l-ispezzjonijiet, l-awtorità kompetenti għandha tiżgura li jittieħdu l-passi kollha meħtieġa sabiex terġa' tinkiseb il-konformità tal-produzzjoni malajr kemm jista' jkun.

24.   IL-PIENI GĦAN-NUQQAS TA’ KONFORMITÀ FIL-PRODUZZJONI

24.1.   L-approvazzjoni maħruġa fir-rigward ta' tip ta' SLD skond dan ir-Regolament tista' tiġi rtirata jekk ir-rekwiżiti stabbiliti fil-paragrafu 21 ta' hawn fuq ma jkunux imħarsa.

24.2.   Jekk Parti Kontraenti fil-Ftehim ta’ l-1958 li tapplika dan ir-Regolament tirtira approvazzjoni li hi tkun ħarġet preċedentement, din għandha minnufih tavża lill-Partijiet Kontraenti l-oħra li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 3 ta’ dan ir-Regolament.

25.   IL-PRODUZZJONI LI TWAQQFET GĦAL KOLLOX

25.1.   Jekk il-pussessur ta’ l-approvazzjoni jwaqqaf għal kollox il-manifattura ta’ tip ta’ SLD approvat skond dan ir-Regolament, huwa għandu jinforma b’dan lill-awtorità li tkun ħarġet l-approvazzjoni. Malli tirċievi l-komunikazzjoni rilevanti, dik l-awtorità għandha tavża b’dan lill-Partijiet fil-Ftehim ta’ l-1958 li japplikaw dan ir-Regolament permezz ta’ formola ta’ komunikazzjoni li tkun konformi mal-mudell fl-Anness 3 ta’ dan ir-Regolament.

26.   L-ISMIJIET U L-INDIRIZZI TAS-SERVIZZI TEKNIĊI RESPONSABBLI GĦAT-TWETTIQ TA’ TESTIJIET TA’ APPROVAZZJONI U TAD-DIPARTIMENTI AMMINISTRATTIVI

26.1.   Il-Partijiet Kontraenti fil-Ftehim ta’ l-1958 li japplikaw dan ir-Regolament għandhom jikkomunikaw lis-segretarjat tan-Nazzjonijiet Uniti l-ismijiet u l-indirizzi tas-servizzi tekniċi responsabbli għat-twettiq ta’ testijiet ta’ approvazzjoni u tad-dipartimenti amministrattivi li joħorġu l-approvazzjoni u li lilhom għandhom jintbagħtu l-formoli li jiċċertifikaw l-approvazzjoni jew l-estensjoni, jew ċaħda jew irtirar ta’ approvazzjoni jew il-produzzjoni mwaqqfa għal kollox, maħruġa f’pajjiżi oħra.

---

(1)  Kif definit fir-Riżoluzzjoni Konsolidata dwar il-Kostruzzjoni tal-Vetturi (R.E.3) (TRANS//WP29/78/Rev. 1/Amend.2).

(2)  Huwa rakkomandat li dan ir-Regolament jiġi applikat fir-rigward ta’ SLDs għal vetturi ta’ iktar minn 10 tunnellati li l-limitu ta’ veloċità tagħhom ikun inqas mil-limitu ġenerali ta’ veloċità

(3)  1 għall-Ġermanja, 2 għal Franza, 3 għall-Italja, 4 għall-Olanda, 5 għall-Iżvezja, 6 għall-Belġju, 7 għall-Ungerija, 8 għar-Repubblika Ċeka, 9 għal Spanja, 10 għall-Jugożlavja, 11 għar-Renju Unit, 12 għall-Awstrija, 13 għal-Lussemburgu, 14 għall-Iżvizzera, 15 (vojt), 16 għan-Norveġja, 17 għall-Finlandja, 18 għad-Danimarka, 19 għar-Rumanija, 20 għall-Polonja, 21 għall-Portugall, 22 għall-Federazzjoni Russa, 23 għall-Greċja, 24 għall-Irlanda, 25 għall-Kroazja, 26 għas-Slovenja, 27 għas-Slovakkja, 28 għall-Belarus, 29 għall-Estonja, 30 (vojt), 31 għall-Bożnja Ħerżegovina, 32 għal-Latvja, 33 (vojt), 34 għall-Bulgarija, 35 (vojt), 36 għal-Litwanja, 37 għat-Turkija, 38 (vojt), 39 għall-Ażerbajġan, 40 għall-Ex Repubblika Jugożlava tal-Maċedonja, 41 (vojt), 42 għall-Komunità Ewropea (L-approvazzjonijiet jingħataw mill-Istati Membri tagħha bl-użu tas-simbolu rispettiv tagħhom tal-KEE), 43 għall-Ġappun, 44 (vojt), 45 għall-Awstralja, 46 għall-Ukrajna, 47 għall-Afrika t’Isfel u 48 għal New Zealand. In-numri sussegwenti għandhom ikunu assenjati lil pajjiżi oħra fl-ordni kronoloġika li fiha jirratifikaw jew jaċċedu għall-Ftehim li Jikkonċerna l-Adozzjoni ta’ Preskrizzjonijiet Tekniċi Uniformi għal Vetturi bir-Roti, Tagħmir u Partijiet li jistgħu Jitwaħħlu u/jew jiġu Użati fuq Vetturi bir-Roti u l-Kondizzjonijiet għar-Rikonoxximent Reċiproku ta’ Approvazzjonijiet Mogħtija fuq il-Bażi ta’ dawn il-Preskrizzjonijiet, u n-numri assenjati b’dan il-mod għandhom ikunu komunikati mis-Segretarju Ġenerali tan-Nazzjonijiet Uniti lill-Partijiet Kontraenti fil-Ftehim.

(*)  eż. għafsa tal-pedala.

---

---

---

---

---

---

---