1)

Għall-finijiet ta’ proċedura bħal dik fil-kawża prinċipali, li tikkonċerna kawża mressqa kontra konsumatur għall-ħlas ta’ kontijiet tal-ilma b’ammont żgħir, huma konformi mal-Artikolu 19[(1)] TUE, ikkunsidrat flimkien mal-Artikolu 169(1) TFUE, ir-regoli previsti fl-Artikolu 2(5) u fil-punt 1 tal-Artikolu 7(2) tan-Naredba 1 ot 09.07.2004 za minimalnite razmeri na advokatskite vaznagrazhdenia (id-Digriet 1 tad-9 ta’ Lulju 2004 dwar l-ammonti minimi tal-onorarji tal-avukati), applikabbli bis-saħħa tal-Artikolu 47(6) tal-Grazhdanski protsesualen kodeks (il-Kodiċi tal-Proċedura Ċivili, iktar ’il quddiem il-“GPK”), dwar ir-regoli għad-determinazzjoni tal-onorarji dovuti lil rappreżentant speċjali tal-konvenut f’sitwazzjoni fejn, fil-każ li l-kawża jkollha eżitu sfavorevoli għall-konsumatur, dan tal-aħħar ikollu jbati wkoll l-ispejjeż tar-rappreżentant speċjali abbażi tal-Artikolu 78(1) tal-GPK?

2)

Huwa konformi mal-Artikolu 19[(1)] TUE, ikkunsidrat flimkien mal-Artikolu 169(1) TFUE, mekkaniżmu, stabbilit fl-Artikolu 47(6) tal-GPK, flimkien mal-Artikolu 26(1) taż-Zakona za pravnata pomosht (il-Liġi dwar l-Għajnuna Legali), għall-ħatra ta’ rappreżentat speċjali fil-każ li l-konsumatur ma jkunx jista’ jinstab fl-indirizz, li jipprevedi li l-onorarji għandhom jiġu ddeterminati mill-qorti, inkluża l-possibbiltà li dawn jiġu stabbilit f’ammont iżgħar mill-ammonti minimi, f’sitwazzjoni fejn il-ħatra tar-rappreżentant speċjali taqa’ esklużivament taħt il-prerogattivi ta’ korp ieħor, jiġifieri s-Saveta na Advokatskata kolegija (il-Kunsill tal-Kamra tal-Avukati, il-Bulgarija), li jista’, skont id-diskrezzjoni tiegħu u għas-sempliċi raġuni li ma jaqbilx mal-ammont tal-onorarji stabbilit mill-qorti, jirrifjuta li jaħtar rappreżentant speċjali?

3)

Fil-każ ta’ rifjut li jinħatar avukat bħala rappreżentant speċjali, il-qorti għandha s-setgħa, b’applikazzjoni diretta tad-dritt tal-Unjoni u b’mod partikolari tad-dispożizzjonijiet tal-Artikolu 19[(1)] TUE, ikkunsidrat flimkien mal-Artikolu 169(1) TFUE, li tuża mekkaniżmi oħra sabiex tiggarantixxi l-protezzjoni tad-drittijiet tal-konsumatur fil-proċedura, mekkaniżmi li bħala prinċipju ma humiex intiżi li japplikaw f’każijiet bħal dawn skont il-leġiżlazzjoni tar-Repubblika Bulgarija, bħalma huwa, pereżempju, l-għoti tal-għajnuna legali taħt l-Artikolu 95(1) tal-GPK mingħajr ma tkun saret talba f’dan is-sens min-naħa tal-konsumatur?