This document is an excerpt from the EUR-Lex website
Document 32022D0810(01)
Administrative Commission for the Coordination of Social Security Systems Decision No H13 of 30 March 2022 concerning the composition and working methods of the Audit Board of the Administrative Commission for the Coordination of Social Security Systems (Text of relevance to the EEA and to the EC/Switzerland Agreement) 2022/C 305/03
Il-Kummissjoni Amministrattiva Għall-Koordinazzjoni tas-Sistemi tas-Sigurtà Soċjali Deċiżjoni Nru H13 tat-30 ta’ Marzu 2022 dwar il-kompożizzjoni u l-metodi ta’ ħidma tal-Bord tal-Verifika tal-Kummissjoni Amministrattiva għall-Koordinazzjoni tas-Sistemi tas-Sigurtà Soċjali (Test b’relevanza għaż-ŻEE u għal-Ftehim UE/Żvizzera) 2022/C 305/03
Il-Kummissjoni Amministrattiva Għall-Koordinazzjoni tas-Sistemi tas-Sigurtà Soċjali Deċiżjoni Nru H13 tat-30 ta’ Marzu 2022 dwar il-kompożizzjoni u l-metodi ta’ ħidma tal-Bord tal-Verifika tal-Kummissjoni Amministrattiva għall-Koordinazzjoni tas-Sistemi tas-Sigurtà Soċjali (Test b’relevanza għaż-ŻEE u għal-Ftehim UE/Żvizzera) 2022/C 305/03
PUB/2022/952
ĠU C 305, 10.8.2022, p. 4–7
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
10.8.2022 |
MT |
Il-Ġurnal Uffiċjali tal-Unjoni Ewropea |
C 305/4 |
IL-KUMMISSJONI AMMINISTRATTIVA GĦALL-KOORDINAZZJONI TAS-SISTEMI TAS-SIGURTÀ SOĊJALI DEĊIŻJONI NRU H13
tat-30 ta’ Marzu 2022
dwar il-kompożizzjoni u l-metodi ta’ ħidma tal-Bord tal-Verifika tal-Kummissjoni Amministrattiva għall-Koordinazzjoni tas-Sistemi tas-Sigurtà Soċjali
(Test b’relevanza għaż-ŻEE u għal-Ftehim UE/Żvizzera)
(2022/C 305/03)
IL-KUMMISSJONI AMMINISTRATTIVA GĦALL-KOORDINAZZJONI TAS-SISTEMI TAS-SIGURTÀ SOĊJALI,
Wara li kkunsidrat l-Artikolu 72 tar-Regolament (KE) Nru 883/2004 tal-Parlament Ewropew u tal-Kunsill tad-29 ta’ April 2004 dwar il-koordinazzjoni ta’ sistemi ta’ sigurtà soċjali (1), li skontu l-Kummissjoni Amministrattiva għandha tistabbilixxi l-fatturi li jeħtieġ jitqiesu għat-tfassil tal-kontijiet relatati mal-kostijiet li għandhom jiġġarrbu mill-istituzzjonijiet tal-Istati Membri skont dan ir-Regolament u biex jiġu adottati l-kontijiet annwali bejn dawk l-istituzzjonijiet, abbażi tar-rapport tal-Bord tal-Verifika msemmi fl-Artikolu 74,
Wara li kkunsidrat l-Artikolu 74 tar-Regolament (KE) Nru 883/2004, li skontu l-Kummissjoni Amministrattiva għandha tiddetermina l-kompożizzjoni u l-metodi ta’ ħidma tal-Bord tal-Verifika, li għandu jipprovdi rapporti u opinjoni motivata għal deċiżjonijiet li għandhom jittieħdu mill-Kummissjoni Amministrattiva skont l-Artikolu 72(g),
IDDEĊIDIET KIF ĠEJ:
Artikolu 1
1. Il-Bord tal-Verifika previst fl-Artikolu 74 tar-Regolament (KE) Nru 883/2004 dwar il-koordinazzjoni ta’ sistemi ta’ sigurtà soċjali huwa marbut mal-Kummissjoni Amministrattiva għall-Kordinazzjoni tas-Sistemi tas-Sigurtà Soċjali.
2. Meta jwettaq il-funzjonijiet tiegħu kif stabbilit fl-Artikolu 74(a) sa (f) tar-Regolament (KE) Nru 883/2004, il-Bord tal-Verifika għandu jopera skont l-awtorità tal-Kummissjoni Amministrattiva, li minnha għandu jirċievi d-direttivi. Fi ħdan dan il-qafas, il-Bord tal-Verifika għandu jippreżenta programm ta’ xogħol fit-tul lill-Kummissjoni Amministrattiva għall-approvazzjoni.
Artikolu 2
1. Il-Bord tal-Verifika għandu, bħala prinċipju, jasal għad-deċiżjonijiet tiegħu abbażi tal-evidenza dokumentata. Dan jista’ jitlob mill-awtoritajiet kompetenti kwalunkwe informazzjoni jew jistaqsi l-mistoqsijiet kollha meqjusa meħtieġa għall-investigazzjoni tal-kwistjonijiet ippreżentati biex jeżaminahom. Meta meħtieġ, soġġett għal approvazzjoni minn qabel tal-President tal-Kummissjoni Amministrattiva, il-Bord tal-Verifika jista’ jiddelega membru tas-Segretarjat jew ċerti membri tal-Bord tal-Verifika biex iwettqu, fuq il-post, kull investigazzjoni meħtieġa għat-twettiq ta’ ħidmietu. Il-President tal-Kummissjoni Amministrattiva għandu jinnotifika lir-rappreżentant tal-Kummissjoni Amministrattiva tal-Istat Membru kkonċernat li qed issir din l-investigazzjoni.
2. Il-Bord tal-Verifika għandu jiffaċilita l-għeluq finali tal-kontijiet f’każijiet fejn il-ftehim ma jkunx jista’ jintlaħaq fil-perjodu stabbilit fir-Regolament (KE) Nru 987/2009 tal-Parlament Ewropew u tal-Kunsill tas-16 ta’ Settembru 2009 li jistabbilixxi l-proċedura għall-implimentazzjoni tar-Regolament (KE) Nru 883/2004 dwar il-koordinazzjoni tal-iskemi ta’ sigurtà soċjali (2). It-talba motivata għall-opinjoni tal-Bord tal-Verifika dwar tilwima skont l-Artikolu 67(7) tar-Regolament (KE) Nru 987/2009 għandha tiġi riferita lill-Bord tal-Verifika minn waħda mill-partijiet mhux anqas minn 25 jum tax-xogħol qabel il-bidu tal-laqgħa.
3. Il-Bord tal-Verifika jista’ jwaqqaf Panel ta’ Konċiljazzjoni biex jassisti ħidmietu meta jkun qed jittratta t-talba motivata għall-opinjoni tal-Bord tal-Verifika, ippreżentata minn waħda mill-partijiet, f’konformità mal-punt 2 ta’ dan l-Artikolu.
Id-dettalji tal-kompożizzjoni, it-terminu, il-kompiti, il-metodi ta’ ħidma kif ukoll is-sistema tal-Presidenza tal-Panel ta’ Konċiljazzjoni għandhom ikunu inklużi f’mandat li dwaru tkun ittieħdet deċiżjoni mill-Bord tal-Verifika.
Artikolu 3
1. Il-Bord tal-Verifika għandu jkun magħmul minn żewġ rappreżentanti minn kull wieħed mill-Istati Membri tal-Unjoni Ewropea maħtura mill-awtoritajiet kompetenti ta’ dawk l-Istati.
Kull membru tal-Bord tal-Verifika li ma jkunx jista’ jattendi, jista’ jiġi sostitwit minn deputat maħtur għal dan l-għan mill-awtoritajiet kompetenti.
2. Ir-rappreżentant tal-Kummissjoni Ewropea jew is-sostitut tiegħu fuq il-Kummissjoni Amministrattiva għandu jaġixxi f’kapaċità konsultattiva fi ħdan il-Bord tal-Verifika.
3. Il-Bord tal-Verifika għandu jkun megħjun minn espert indipendenti jew minn tim ta’ esperti b’taħriġ professjonali u b’esperjenza fi kwistjonijiet li jikkonċernaw il-funzjonijiet tal-Bord tal-Verifika, b’mod partikolari fir-rigward tal-kompiti tiegħu skont l-Artikoli 64, 65 u 69 tar-Regolament (KE) Nru 987/2009.
Artikolu 4
1. Il-kariga tal-President tal-Bord tal-Verifika għandha tkun f’idejn membru mill-Istat Membru li r-rappreżentant tiegħu fuq il-Kummissjoni Amministrattiva jkollu l-kariga tal-President ta’ dik il-Kummissjoni.
2. Il-President tal-Bord ta’ Verifika, flimkien mas-Segretarjat, jista’ jieħu l-passi kollha meħtieġa biex isolvi mingħajr dewmien il-problemi kollha li jaqgħu fil-kompetenza tal-Bord tal-Verifika.
3. Bħala regola, il-President tal-Bord tal-Verifika għandu jippresiedi l-laqgħat tal-partijiet ta’ ħidma stabbiliti biex jeżaminaw problemi li huma fil-kompetenza tal-Bord tal-Verifika; madankollu, jekk ma jkunx/tkunx f’qagħda li jagħmel/tagħmel dan jew jekk qed jiġu eżaminati ċerti problemi speċifiċi, il-President jista’ jkun irrappreżentat minn persuna oħra maħtura minnu/minnha.
Artikolu 5
1. Id-deċiżjonijiet għandhom jittieħdu b’maġġoranza sempliċi, kull Stat Membru b’vot wieħed biss.
Id-deċiżjonijiet u l-opinjonijiet dwar tilwima skont l-Artikolu 67(7) tar-Regolament (KE) Nru 987/2009 tal-Bord tal-Verifika jridu jindikaw jekk intlaħqux b’mod unanimu jew b’maġġoranza. Fejn xieraq, iridu jippreżentaw il-konklużjonijiet jew ir-riżervi tal-minoranza.
Ir-rappreżentanti tal-pajjiżi involuti fit-tilwima ma għandhomx jieħdu sehem fl-approvazzjoni tal-opinjoni tal-Bord tal-Verifika dwar tilwima skont l-Artikolu 67(7) tar-Regolament (KE) Nru 987/2009. Kull darba li opinjoni dwar tilwima skont l-Artikolu 67(7) tar-Regolament (KE) Nru 987/2009 ma tintlaħaqx b’mod unanimu, il-Bord tal-Verifika għandu jippreżentaha lill-Kummissjoni Amministrattiva flimkien ma’ rapport li b’mod partikolari jkun fih dikjarazzjoni tal-fehmiet opposti u r-raġunijiet għalihom. Għandu wkoll jaħtar relatur responsabbli li jipprovdi lill-Kummissjoni Amministrattiva bl-informazzjoni kollha li din tal-aħħar tqis xierqa sabiex tkun tista’ ssib soluzzjoni għat-tilwima inkwistjoni. Ir-relatur ma għandux jintgħażel mir-rappreżentanti tal-pajjiżi involuti fit-tilwima.
2. Il-Bord tal-Verifika jista’ jiddeċiedi li jadotta deċiżjonijiet u opinjonijiet dwar tilwima skont l-Artikolu 67(7) tar-Regolament (KE) Nru 987/2009 bl-użu ta’ proċedura bil-miktub jekk it-tali proċedura tkun ġiet miftiehma f’laqgħa preċedenti tal-Bord tal-Verifika.
Għal dan l-għan il-President għandu jikkomunika t-test li għandu jiġi adottat lill-membri tal-Bord tal-Verifika. Il-Membri għandhom jingħataw limitu ta’ żmien stabbilit ta’ mill-inqas għaxart ijiem tax-xogħol li fihom il-Membri għandu jkollhom il-possibbiltà jiddikjaraw li jirrifjutaw it-test propost jew li jastjenu mill-votazzjoni. Jekk ma tingħata l-ebda tweġiba fil-limitu ta’ żmien stabbilit, din għandha titqies bħala vot fl-affermattiv.
Il-President jista’ wkoll jiddeċiedi li jniedi proċedura bil-miktub f’każ li ma jkun intlaħaq ebda ftehim minn qabel f’laqgħa tal-Bord tal-Verifika. F’każ bħal dan, ftehimiet bil-miktub biss dwar it-test propost għandhom jgħoddu bħala voti fl-affermattiv u għandu jingħata l-limitu ta’ żmien stabbilit ta’ mill-inqas 15-il jum tax-xogħol.
Meta jiskadi l-limitu ta’ żmien stabbilit, il-President għandu jinforma lill-membri bir-riżultat tal-votazzjoni. Deċiżjoni li tkun irċeviet l-għadd meħtieġ ta’ voti fl-affermattiv, għandha titqies li tkun ġiet adottata fl-aħħar jum stabbilit tal-perjodu li matulu l-membri jkunu ntalbu jwieġbu.
3. Jekk matul il-proċedura bil-miktub, membru tal-Bord tal-Verifika jipproponi li t-test għandu jiġi emendat, il-President għandu jagħżel li jew:
(a) |
jerġa’ jibda mill-ġdid il-proċedura bil-miktub billi jikkomunika l-emenda proposta lill-membri f’konformità mal-proċedura fil-paragrafu 2; jew |
(b) |
iħassar il-proċedura bil-miktub sabiex il-kwistjoni terġa’ tiġi diskussa fil-laqgħa li jmiss, |
skont liema proċedura l-President iqis xierqa għall-kwistjoni kkonċernata.
4. Jekk qabel ma jiskadi l-limitu ta’ żmien stabbilit għat-tweġibiet, membru tal-Bord tal-Verifika jitlob li t-test propost għandu jiġi eżaminat f’laqgħa tal-Bord tal-Verifika, il-proċedura bil-miktub għandha titħassar.
Il-kwistjoni mbagħad għandha tiġi eżaminata fil-laqgħa tal-Bord tal-Verifika li jkun imiss.
Artikolu 6
Il-Bord tal-Verifika jista’ jwaqqaf gruppi ad-hoc komposti minn għadd limitat ta’ persuni biex iħejju u jressqu proposti fuq kwistjonijiet speċifiċi għall-adozzjoni tal-Bord tal-Verifika.
Għal kull grupp ad-hoc, il-Bord tal-Verifika għandu jiddeċiedi min għandu jkun ir-relatur, il-kompiti li għandhom jitwettqu, u l-limitu ta’ żmien li fih il-grupp ikun irid iressaq ir-riżultati ta’ ħidmietu lill-Bord tal-Verifika. Dawn għandhom ikunu stabbiliti fil-mandat bil-miktub kif deċiż mill-Bord tal-Verifika.
Artikolu 7
1. Is-Segretarjat tal-Kummissjoni Amministrattiva għandu jħejji u jorganizza l-laqgħat tal-Bord tal-Verifika u jniżżel il-minuti tagħhom. Għandu jwettaq ix-xogħol meħtieġ għall-funzjonament tal-Bord tal-Verifika. L-aġenda, id-data u t-tul tal-laqgħat tal-Bord tal-Verifika għandhom jiġu miftiehma mal-President.
2. L-aġenda għandha tintbagħat mis-Segretarjat tal-Kummissjoni Amministrattiva lill-membri tal-Bord tal-Verifika u lill-membri tal-Kummissjoni Amministrattiva mhux aktar tard minn 15-il jum qabel il-bidu ta’ kull laqgħa. Id-dokumenti relatati mal-punti fuq l-aġenda jenħtieġ li jkunu disponibbli mill-inqas għaxart ijiem tax-xogħol qabel il-bidu tal-laqgħa. Dan ma japplikax għal dokumenti li jipprovdu informazzjoni ġenerali li ma hemmx bżonn li tiġi approvata.
3. Noti dwar il-laqgħa li jkun imiss tal-Bord tal-Verifika jenħtieġ li jintbagħtu lis-Segretarjat tal-Kummissjoni Amministrattiva mill-inqas 20 jum tax-xogħol qabel il-bidu tal-laqgħa. Dan ma japplikax għal dokumenti li jipprovdu informazzjoni ġenerali li ma hemmx bżonn li tiġi approvata.
Noti li jkun fihom l-input għad-Dikjarazzjoni tal-kontijiet annwali stipulata fl-Artikolu 69(1) tar-Regolament (KE) Nru 987/2009 għandhom isegwu l-format u jkunu jinkludu d-dettalji speċifikati mill-espert indipendenti jew mit-tim ta’ esperti msemmija fl-Artikolu 3(3) ta’ din id-Deċiżjoni. Kull delegazzjoni għandha tibgħat din in-nota lis-Segretarjat sal-31 ta’ Lulju tas-sena ta’ wara dik is-sena kkonċernata.
Artikolu 8
Sakemm meħtieġ, ir-regoli tal-Kummissjoni Amministrattiva għandhom japplikaw għall-Bord tal-Verifika.
Artikolu 9
1. Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea. Għandha tapplika mid-data tal-pubblikazzjoni.
2. Din id-Deċiżjoni tissostitwixxi d-Deċiżjoni Nru H4 tat-22 ta’ Diċembru 2009 (3).
Il-President tal-Kummissjoni Amministrattiva
Claire JEAN
(1) ĠU L 166, 30.4.2004, p. 1.
(2) ĠU L 284, 30.10.2009, p. 1.
(3) Id-Deċiżjoni Nru H4 tat-22 ta’ Diċembru 2009 dwar il-kompożizzjoni u l-metodi ta’ ħidma tal-Bord ta’ Verifika tal-Kummissjoni Amministrattiva għall-Koordinazzjoni tas-Sistemi tas-Sigurtà Soċjali (ĠU C 107, 27.4.2010, p. 3).