(1)

Il-globalizzazzjoni u d-diġitalizzazzjoni żiedu r-riskju li għadd kbir ta' konsumaturi jġarrbu ħsara mill-istess prattika illegali. Il-ksur tal-liġi tal-Unjoni jista' jagħmel ħsara lill-konsumatur. Mingħajr mezzi effettivi biex jinkiseb il-waqfien ta' prattiki illegali u jinkiseb kumpens għall-konsumaturi, titnaqqas il-fiduċja tal-konsumatur fis-suq intern.

(2)

In-nuqqas ta' mezzi effettivi għall-infurzar tal-liġi tal-Unjoni li tipproteġi lill-konsumaturi jista' jirriżulta wkoll fid-distorsjoni tal-kompetizzjoni ġusta bejn kummerċjanti li jiksru l-liġi u kummerċjanti li jikkonformaw magħha u li joperaw fuq livell domestiku jew transfruntier. Tali distorsjonijiet jistgħu jxekklu l-funzjonament bla xkiel tas-suq intern.

(3)

Taħt l-Artikolu 26(2) tat-Trattat dwar il-Funzjonament tal-Unjoni Ewropea (TFUE), is-suq intern għandu jikkostitwixxi żona mingħajr fruntieri interni li fiha jkun żgurat il-moviment liberu tal-merkanzija u s-servizzi. Is-suq intern għandu jipprovdi lill-konsumaturi valur miżjud fil-forma ta' kwalità aħjar, varjetà akbar, prezzijiet raġonevoli u standards ta' sikurezza għoljin fir-rigward ta' merkanzija u servizzi, u b'hekk jippromwovi livell għoli ta' protezzjoni tal-konsumatur.

(4)

L-Artikolu 169(1) u l-punt (a) tal-Artikolu 169(2) TFUE jipprevedu li l-Unjoni għandha tikkontribwixxi biex jinkiseb livell għoli ta' protezzjoni tal-konsumatur permezz ta' miżuri adottati taħt l-Artikolu 114 TFUE. L-Artikolu 38 tal-Karta tad-Drittijiet Fundamentali tal-Unjoni Ewropea (il-“Karta”) jistipula li l-politiki tal-Unjoni għandhom jiżguraw livell għoli ta' protezzjoni tal-konsumatur.

(5)

Id-Direttiva 2009/22/KE tal-Parlament Ewropew u tal-Kunsill (4) ippermettiet lill-entitajiet kwalifikati jressqu azzjonijiet rappreżentattivi li jkollhom l-għan primarju il-waqfien jew il-projbizzjoni ta' ksur tal-liġi tal-Unjoni li jagħmel ħsara lill-interessi kollettivi tal-konsumaturi. Madankollu, dik id-Direttiva ma indirizzatx biżżejjed l-isfidi relatati mal-infurzar tal-liġi tal-konsumatur. Sabiex titjieb id-deterrenza ta' prattiki illegali u biex titnaqqas il-ħsara għall-konsumatur f'suq dejjem aktar globalizzat u diġitalizzat, jenħtieġ li jissaħħu l-mekkaniżmi proċedurali għall-protezzjoni tal-interessi kollettivi tal-konsumaturi biex jiġu koperti miżuri ta' inġunzjoni kif ukoll miżuri ta' rimedju. Minħabba l-għadd kbir ta' tibdiliet meħtieġa, huwa adatt li d-Direttiva 2009/22/KE titħassar u li tiġi ssostitwita b'din id-Direttiva.

(6)

Il-mekkaniżmi proċedurali għal azzjonijiet rappreżentattivi, kemm għal miżuri ta' inġunzjoni kif ukoll għal miżuri ta' rimedju, ivarjaw madwar l-Unjoni u joffru livelli differenti ta' protezzjoni għall-konsumaturi. Barra minn hekk, ċerti Stati Membri, fil-preżent, ma għandhom stabbiliti l-ebda mekkaniżmu proċedurali għal azzjonijiet kollettivi għal miżuri ta' rimedju. Dik is-sitwazzjoni tnaqqas il-fiduċja fis-suq intern tal-konsumaturi u tan-negozji u l-kapaċità tagħhom li joperaw fis-suq intern. Toħloq distorsjoni tal-kompetizzjoni u xxekkel l-infurzar effettiv tal-liġi tal-Unjoni fil-qasam tal-protezzjoni tal-konsumatur.

(7)

Din id-Direttiva għandha għalhekk l-għan li tiżgura li fil-livell nazzjonali u f'dak tal-Unjoni jkun disponibbli mill-inqas mekkaniżmu proċedurali wieħed, li jkun effettiv u effiċjenti, għal azzjonijiet rappreżentattivi għal miżuri ta’ inġunzjoni u għal miżuri ta’ rimedju għall-konsumaturi fl-Istati Membri kollha. Il-fatt li jkun hemm disponibbli mill-inqas tali mekkaniżmu proċedurali wieħed għal azzjonijiet rappreżentattivi jagħti spinta lill-fiduċja tal-konsumatur, jagħti s-setgħa lill-konsumaturi biex jeżerċitaw id-drittijiet tagħhom, jikkontribwixxi għal kompetizzjoni aktar ġusta u joħloq kondizzjonijiet ekwivalenti ta' kompetizzjoni għall-kummerċjanti li joperaw fis-suq intern.

(8)

Din id-Direttiva għandha l-għan li tikkontribwixxi għall-funzjonament tas-suq intern u l-kisba ta' livell għoli ta' protezzjoni tal-konsumatur billi tippermetti lill-entitajiet kwalifikati li jirrappreżentaw l-interessi kollettivi tal-konsumaturi jressqu azzjonijiet rappreżentattivi kemm għal miżuri ta' inġunzjoni kif ukoll għal miżuri ta' rimedju kontra kummerċjanti li jiksru d-dispożizzjonijiet tal-liġi tal-Unjoni. Jenħtieġ li dawk l-entitajiet kwalifikati jkunu jistgħu jitolbu l-waqfien jew il-projbizzjoni ta' tali mġiba ta' ksur u jitolbu rimedju, skont kif xieraq u disponibbli taħt il-liġi tal-Unjoni jew taħt il-liġi nazzjonali, bħall-kumpens, tiswija jew roħs fil-prezz.

(9)

Jenħtieġ li azzjoni rappreżentattiva toffri mod effettiv u effiċjenti li tipproteġi l-interessi kollettivi tal-konsumaturi. Jenħtieġ li din tippermetti lill-entitajiet kwalifikati jaġixxu bil-għan li jiżguraw li l-kummerċjanti jikkonformaw mad-dispożizzjonijiet rilevanti tal-liġi tal-Unjoni u li jegħlbu l-ostakli li jiffaċċaw il-konsumaturi f'azzjonijiet individwali, bħal dawk relatati mal-inċertezza dwar id-drittijiet tagħhom u li dwarhom hemm mekkaniżmi proċedurali disponibbli, bħar-riluttanza psikoloġika li jieħdu azzjoni u l-bilanċ negattiv tal-ispejjeż mistennija relattivament għall-benefiċċji tal-azzjoni individwali.

(10)

Huwa importanti li jiġi żgurat il-bilanċ meħtieġ bejn it-titjib tal-aċċess tal-konsumatur għall-ġustizzja u l-għoti ta' salvagwardji adegwati għall-kummerċjanti biex jevitaw litigazzjoni abużiva li tista' tfixkel b'mod mhux ġustifikabbli l-kapaċità tan-negozji li joperaw fis-suq intern. Sabiex jiġi evitat l-abbuż tal-azzjonijiet rappreżentattivi, jenħtieġ li jiġi evitat l-għoti ta' danni punittivi u jenħtieġ li jiġu stabbiliti regoli ċari dwar ċerti aspetti proċedurali, bħad-deżinjazzjoni u l-finanzjament ta' entitajiet kwalifikati.

(11)

Din id-Direttiva ma għandhiex tissostitwixxi l-mekkaniżmi proċedurali nazzjonali eżistenti għall-protezzjoni tal-interessi kollettivi jew individwali tal-konsumatur. B'kunsiderazzjoni tat-tradizzjonijiet legali tagħhom, jenħtieġ li hija tħalli fid-diskrezzjoni tal-Istati Membri jekk ifasslux il-mekkaniżmu proċedurali għall-azzjonijiet rappreżentattivi meħtieġa minn din id-Direttiva bħala parti minn mekkaniżmu proċedurali eżistenti jew bħala parti minn mekkaniżmu proċedurali ġdid għall-miżuri kollettivi ta' inġunzjoni jew miżuri kollettivi ta' rimedju jew bħala mekkaniżmu proċedurali distint, dment li mill-inqas mekkaniżmu proċedurali nazzjonali wieħed għall-azzjonijiet rappreżentattivi jikkonforma ma' din id-Direttiva. Pereżempju, din id-Direttiva ma għandhiex tipprevjeni lill-Istati Membri milli jadottaw liġijiet dwar azzjonijiet biex jingħataw deċiżjonijiet dikjaratorji minn qorti jew awtorità amministrattiva minkejja li hija ma tipprevedix regoli dwar tali azzjonijiet. Jekk ikun hemm stabbiliti mekkaniżmi proċedurali fil-livell nazzjonali flimkien mal-mekkaniżmu proċedurali meħtieġ minn din id-Direttiva, jenħtieġ li l-entità kwalifikata tkun tista' tagħżel liema mekkaniżmu proċedurali għandu jintuża.

(12)

F'konformità mal-prinċipju ta' awtonomija proċedurali, din id-Direttiva ma għandhiex tinkludi dispożizzjonijiet dwar kull aspett tal-proċedimenti f'azzjonijiet rappreżentattivi. Għaldaqstant, huma l-Istati Membri li jridu jistabbilixxu regoli, pereżempju, dwar l-ammissibbiltà, il-provi jew il-mezzi ta' appell, applikabbli għall-azzjonijiet rappreżentattivi. Pereżempju, għandu jkun f'idejn l-Istati Membri li jiddeċiedu dwar il-livell meħtieġ ta' similarità tal-pretensjonijiet individwali jew dwar l-għadd minimu ta' konsumaturi kkonċernati minn azzjoni rappreżentattiva għal miżuri ta' rimedju sabiex il-każ ikun ammess biex jinstema' bħala azzjoni rappreżentattiva. Jenħtieġ li tali regoli nazzjonali ma jxekklux il-funzjonament effettiv tal-mekkaniżmu proċedurali għall-azzjonijiet rappreżentattivi meħtieġa minn din id-Direttiva. F’konformità mal-prinċipju tan-nondiskriminazzjoni, jenħtieġ li r-rekwiżiti ta’ ammissibbiltà applikabbli għal azzjonijiet rappreżentattivi transfruntiera speċifiċi ma jkunux differenti minn dawk applikati għal azzjonijiet rappreżentattivi domestiċi speċifiċi. Jenħtieġ li deċiżjoni li tiddikjara azzjoni rappreżentattiva bħala inammissibbli ma taffettwax id-drittijiet tal-konsumaturi kkonċernati mill-azzjoni.

(13)

Jenħtieġ li l-ambitu ta' din id-Direttiva jirrifletti l-iżviluppi reċenti fil-qasam tal-protezzjoni tal-konsumatur. Peress li issa l-konsumaturi joperaw f'suq usa' u dejjem aktar diġitalizzat, il-kisba ta' livell għoli ta' protezzjoni tal-konsumatur teħtieġ li oqsma bħall-protezzjoni tad-data, is-servizzi finanzjarji, l-ivvjaġġar u t-turiżmu, l-enerġija u l-mezzi tat-telekomunikazzjoni jkunu koperti mid-Direttiva, barra l-liġi ġenerali tal-konsumatur. B'mod partikolari, peress li hemm domanda akbar mill-konsumaturi għal servizzi finanzjarji u ta' investiment, huwa importanti li jittejjeb l-infurzar tal-liġi tal-konsumatur f'dawk l-oqsma. Barra minn hekk, is-suq tal-konsumatur evolva fil-qasam tas-servizzi diġitali, u hemm ħtieġa akbar għal infurzar aktar effiċjenti tal-liġi tal-konsumatur, inkluż fir-rigward tal-protezzjoni tad-data.

(14)

Din id-Direttiva għandha tkopri l-ksur tad-dispożizzjonijiet tal-liġi tal-Unjoni msemmija fl-Anness I sa fejn dawk id-dispożizzjonijiet jipproteġu l-interessi tal-konsumaturi, irrispettivament minn jekk dawk il-konsumaturi humiex imsemmija konsumaturi, vjaġġaturi, utenti, klijenti, investituri bl-imnut, klijenti konsumaturi, suġġetti tad-data jew xi ħaġa oħra. Madankollu, jenħtieġ li din id-Direttiva tipproteġi biss l-interessi ta' persuni fiżiċi li jkunu ġarrbu ħsara jew li tista' ssirilhom ħsara minn dawk il-każijiet ta' ksur jekk dawk il-persuni huma konsumaturi taħt din id-Direttiva. Jenħtieġ li l-ksur li jagħmel ħsara lil persuni fiżiċi li jikkwalifikaw bħala kummerċjanti taħt din id-Direttiva ma jkunx kopert minnha.

(15)

Din id-Direttiva għandha tkun mingħajr preġudizzju għall-atti legali elenkati fl-Anness I u għalhekk ma għandhiex tbiddel jew testendi d-definizzjonijiet stabbiliti f'dawk l-atti legali jew tissostitwixxi kwalunkwe mekkaniżmu ta' infurzar li dawk l-atti legali jista' jkun fihom. Pereżempju, il-mekkaniżmi ta' infurzar previsti fir-Regolament (UE) 2016/679 tal-Parlament Ewropew u tal-Kunsill (5) jew ibbażati fuqu jistgħu, fejn applikabbli, jibqgħu jintużaw għall-protezzjoni tal-interessi kollettivi tal-konsumaturi.

(16)

Sabiex ikun evitat id-dubbju, l-ambitu ta' din id-Direttiva għandu jiġi stabbilit bl-aktar mod preċiż possibbli fl-Anness I. Fejn l-atti legali elenkati fl-Anness I ikun fihom dispożizzjonijiet li ma għandhomx x'jaqsmu mal-protezzjoni tal-konsumatur, fl-Anness I għandha ssir referenza għad-dispożizzjonijiet speċifiċi li jipproteġu l-interessi tal-konsumaturi. Madankollu, tali referenzi mhumiex dejjem fattibbli minħabba l-istruttura ta' ċerti atti legali, b'mod partikolari fil-qasam tas-servizzi finanzjarji, inkluż il-qasam tas-servizzi ta' investiment.

(17)

Biex ikun żgurat rispons adatt għall-ksur tal-liġi tal-Unjoni, li l-forma u d-daqs tiegħu jevolvu rapidament, jenħtieġ li l-leġiżlatur jikkunsidra, kull darba li jiġi adottat att ġdid tal-Unjoni li jkun rilevanti għall-protezzjoni tal-interessi kollettivi tal-konsumaturi, jekk jenħtieġx li jiġi emendat l-Anness I sabiex l-att il-ġdid tal-Unjoni jitqiegħed fl-ambitu ta' din id-Direttiva.

(18)

Jenħtieġ li l-Istati Membri jibqgħu kompetenti biex jagħmlu d-dispożizzjonijiet ta' din id-Direttiva applikabbli għal oqsma li jkunu addizzjonali għal dawk li jaqgħu fl-ambitu tagħha. Jenħtieġ li l-Istati Membri jkunu jistgħu, pereżempju, iżommu fis-seħħ jew jintroduċu leġiżlazzjoni nazzjonali li tikkorrispondi għal dispożizzjonijiet ta' din id-Direttiva, relattivament għal tilwim li jaqa' barra mill-ambitu tal-Anness I.

(19)

Peress li kemm il-proċedimenti ġudizzjarji u l-proċedimenti amministrattivi jistgħu b'mod effettiv u effiċjenti jservu għall-protezzjoni tal-interessi kollettivi tal-konsumaturi, jitħalla fid-diskrezzjoni tal-Istati Membri jekk tistax titressaq azzjoni rappreżentattiva bi proċedimenti ġudizzjarji, proċedimenti amministrattivi, jew bit-tnejn, skont il-qasam rilevanti tal-liġi jew is-settur ekonomiku rilevanti. Dan jenħtieġ li jkun mingħajr preġudizzju għad-dritt għal rimedju effettiv taħt l-Artikolu 47 tal-Karta, li tistipula li l-Istati Membri għandhom jiżguraw li l-konsumaturi u l-kummerċjanti għandhom id-dritt għal rimedju effettiv quddiem qorti jew tribunal, kontra kwalunkwe deċiżjoni amministrattiva meħuda skont miżuri nazzjonali li jittrasponu din id-Direttiva. Dan jenħtieġ li jinkludi l-possibbiltà li parti f'azzjoni tikseb deċiżjoni li tordna s-sospensjoni tal-eżekuzzjoni tad-deċiżjoni kkontestata, f'konformità mal-liġi nazzjonali.

(20)

Filwaqt li tibni fuq id-Direttiva 2009/22/KE, jenħtieġ li din id-Direttiva tkopri kemm il-ksur domestiku kif ukoll il-ksur transfruntier, b'mod partikolari fejn il-konsumaturi affettwati minn ksur ikunu jgħixu fi Stati Membri għajr l-Istat Membru fejn ikun stabbilit il-kummerċjant li wettaq il-ksur. Jenħtieġ ukoll li hija tkopri ksur li jkun waqaf qabel titressaq jew tiġi konkluża l-azzjoni rappreżentattiva, peress li xorta jista' jkun li din għadha meħtieġa biex jiġi evitat li l-prassi tirrepeti ruħha billi tiġi pprojbita, biex jiġi stabbilit li prassi speċifika tikkostitwixxi ksur jew biex jiġi ffaċilitat ir-rimedju lill-konsumaturi.

(21)

Jenħtieġ li din id-Direttiva la taffettwa l-applikazzjoni tar-regoli tad-dritt internazzjonali privat, ir-rikonoxximent u l-infurzar ta' sentenzi jew tal-liġi applikabbli, u lanqas ma tistabbilixxi tali regoli. Jenħtieġ li l-istrumenti eżistenti tal-liġi tal-Unjoni japplikaw għall-mekkaniżmu proċedurali għall-azzjonijiet rappreżentattivi meħtieġa minn din id-Direttiva. B'mod partikolari, ir-Regolament (KE) Nru 864/2007 (6), ir-Regolament (KE) Nru 593/2008 (7) u r-Regolament (EU) Nru 1215/2012 (8) tal-Parlament Ewropew u tal-Kunsill għandhom japplikaw għall-mekkaniżmu proċedurali għall-azzjonijiet rappreżentattivi meħtieġa minn din id-Direttiva.

(22)

Ta' min jinnota li r-Regolament (UE) Nru 1215/2012 ma jkoprix il-kompetenza tal-awtoritajiet amministrattivi u lanqas ir-rikonoxximent jew l-eżekuzzjoni ta' deċiżjonijiet minn tali awtoritajiet. Jenħtieġ li r-regolamentazzjoni ta' tali kwistjonijiet titħalla għal-liġi nazzjonali.

(23)

Fejn ikun adatt, jista' jkun possibbli, f'konformità mar-regoli tad-dritt internazzjonali privat, li entità kwalifikata tressaq azzjoni rappreżentattiva fl-Istat Membru fejn tkun ġiet iddeżinjata kif ukoll fi Stat Membru ieħor. Filwaqt li tibni fuq id-Direttiva 2009/22/KE, jenħtieġ li din id-Direttiva tagħmel distinzjoni bejn dawk iż-żewġ tipi ta' azzjonijiet rappreżentattivi. Fejn entità kwalifikata tressaq azzjoni rappreżentattiva fi Stat Membru ieħor għajr dak tad-deżinjazzjoni tagħha, jenħtieġ li dik l-azzjoni rappreżentattiva titqies bħala azzjoni rappreżentattiva transfruntiera. Fejn entità kwalifikata tressaq azzjoni rappreżentattiva fl-Istat Membru fejn ġiet iddeżinjata, jenħtieġ li dik l-azzjoni rappreżentattiva titqies bħala azzjoni rappreżentattiva domestika, anki jekk dik l-azzjoni rappreżentattiva titressaq kontra kummerċjant domiċiljat fi Stat Membru ieħor u anki jekk ikun hemm rrappreżentati konsumaturi minn diversi Stati Membri f'dik l-azzjoni rappreżentattiva. Jenħtieġ li l-Istat Membru fejn titressaq l-azzjoni rappreżentattiva jkun il-kriterju deċiżiv biex jiġi determinat it-tip ta' azzjoni rappreżentattiva li titressaq. Għal din ir-raġuni, ma għandux ikun possibbli li azzjoni rappreżentattiva domestika ssir azzjoni rappreżentattiva transfruntiera matul il-kors tal-proċedimenti, jew viċe versa.

(24)

Jenħtieġ li b'mod partikolari l-organizzazzjonijiet tal-konsumaturi jkollhom rwol attiv fl-iżgurar tal-konformità mad-dispożizzjonijiet rilevanti tal-liġi tal-Unjoni. Jenħtieġ li dawn jitqiesu lkoll bħala f'pożizzjoni tajba biex japplikaw għall-istatus ta' entità kwalifikata skont il-liġi nazzjonali. Skont it-tradizzjonijiet legali nazzjonali, il-korpi pubbliċi jistgħu wkoll ikollhom rwol attiv fl-iżgurar tal-konformità mad-dispożizzjonijiet rilevanti tal-liġi tal-Unjoni billi jressqu l-azzjonijiet rappreżentattivi kif previsti minn din id-Direttiva.

(25)

Għall-finijiet tal-azzjonijiet rappreżentattivi transfruntiera, jenħtieġ li l-entitajiet kwalifikati jkunu soġġetti għall-istess kriterji għad-deżinjazzjoni fl-Unjoni kollha. B'mod partikolari, jenħtieġ li huma jkunu persuni ġuridiċi li jkunu kkostitwiti korrettament f'konformità mal-liġi nazzjonali tal-Istat Membru tad-deżinjazzjoni, li jkollhom ċertu grad ta' permanenza u livell ta' attività pubblika, li jkunu ta' natura mingħajr skop ta' qligħ u jkollhom interess leġittimu, fid-dawl tal-għan statutorju tagħhom, fil-protezzjoni tal-interessi tal-konsumaturi kif previst mil-liġi tal-Unjoni. L-entitajiet kwalifikati jenħtieġ li la jkunu soġġetti għal proċedimenti ta’ insolvenza u lanqas li huma ddikjarati bħala insolventi. Dawn jenħtieġ li jkunu indipendenti u mhux influwenzati minn persuni għajr konsumaturi li jkollhom interess ekonomiku li jressqu azzjoni rappreżentattiva, b’mod partikolari minn kummerċjanti jew hedge funds, inkluż fil-każ ta’ finanzjament minn partijiet terzi. Jenħtieġ li l-entitajiet kwalifikati jkollhom proċeduri stabbiliti li jipprevjenu tali influwenza kif ukoll li jipprevjenu kunflitti ta’ interess bejnhom, il-fornituri tal-finanzjament tagħhom u l-interessi tal-konsumaturi. Jenħtieġ li jagħmlu disponibbli għall-pubbliku, b’lingwaġġ sempliċi u li jinftiehem, bi kwalunkwe mezz xieraq, b’mod partikolari fuq is-siti web tagħhom, informazzjoni li turi li huma jikkonformaw mal-kriterji għad-deżinjazzjoni bħala entità kwalifikata u informazzjoni ġenerali dwar is-sorsi tal-finanzjament tagħhom b’mod ġenerali, l-istruttura tagħhom fir-rigward tal-organizzazzjoni, ġestjoni u sistema ta' sħubija tagħhom, u l-objettivi u l-attivitajiet tagħhom.

(26)

Jenħtieġ li l-Istati Membri jkunu jistgħu jistabbilixxu l-kriterji għad-deżinjazzjoni tal-entitajiet kwalifikati għall-fini tal-azzjonijiet rappreżentattivi domestiċi b'mod liberu skont il-liġi nazzjonali. Madankollu, jenħtieġ li l-Istati Membri jkunu jistgħu wkoll japplikaw il-kriterji għad-deżinjazzjoni stabbiliti minn din id-Direttiva biex jiddeżinjaw entitajiet kwalifikati għall-finijiet ta' azzjonijiet rappreżentattivi transfruntiera fir-rigward ta' entitajiet kwalifikati ddeżinjati biss għall-fini ta' azzjonijiet rappreżentattivi domestiċi.

(27)

Jenħtieġ li kwalunkwe kriterju applikat għad-deżinjazzjoni ta' entitajiet kwalifikati f'azzjonijiet rappreżentattivi domestiċi jew transfruntiera ma jxekkilx il-funzjonament effettiv tal-azzjonijiet rappreżentattivi kif previsti minn din id-Direttiva.

(28)

Jenħtieġ li l-Istati Membri jkunu jistgħu jiddeżinjaw entitajiet kwalifikati minn qabel għall-fini li jressqu azzjonijiet rappreżentattivi. Jenħtieġ li din id-Direttiva ma tinkoraġġix lill-Istati Membri jintroduċu l-possibbiltà li jiddeżinjaw entitajiet kwalifikati fuq bażi ad hoc. Madankollu, għall-fini ta' azzjonijiet rappreżentattivi domestiċi, jenħtieġ li l-Istati Membri jkunu wkoll, jew alternattivament, jistgħu jiddeżinjaw entitajiet kwalifikati fuq bażi ad hoc għal azzjoni rappreżentattiva domestika speċifika. Jenħtieġ li jkun possibbli li tali deżinjazzjoni ssir mill-qorti jew mill-awtorità amministrattiva li jkollha l-każ quddiemha, inkluż permezz ta' aċċettazzjoni, fejn applikabbli. Madankollu, għall-finijiet tal-azzjonijiet rappreżentattivi transfruntiera, huma meħtieġa salvagwardji komuni. Għalhekk, jenħtieġ li l-entitajiet kwalifikati li jkunu ġew iddeżinjati fuq bażi ad hoc ma jitħallewx iressqu azzjonijiet rappreżentattivi transfruntiera.

(29)

Jenħtieġ li jkun f'idejn l-Istat Membru ta' deżinjazzjoni li jiżgura li entità tikkonforma mal-kriterji għad-deżinjazzjoni bħala entità kwalifikata għall-fini tal-azzjonijiet rappreżentattivi transfruntiera, li jivvaluta jekk l-entità kwalifikata għadhiex tikkonforma mal-kriterji għad-deżinjazzjoni u, jekk meħtieġ, li jirrevoka d-deżinjazzjoni ta' dik l-entità kwalifikata. Jenħtieġ li l-Istati Membri jivvalutaw jekk l-entitajiet kwalifikati għadhomx jikkonformaw mal-kriterji għad-deżinjazzjoni, mill-inqas kull ħames snin.

(30)

Jekk jirriżulta xi tħassib rigward jekk entità kwalifikata tikkonformax mal-kriterji għad-deżinjazzjoni, jenħtieġ li l-Istat Membru li jkun iddeżinja lil dik l-entità kwalifikata jinvestiga t-tħassib u, jekk xieraq, jirrevoka d-deżinjazzjoni ta' dik l-entità kwalifikata. Jenħtieġ li l-Istati Membri jiddeżinjaw punti ta' kuntatt nazzjonali biex jittrasmettu u jirċievu talbiet għal investigazzjonijiet.

(31)

Jenħtieġ li l-Istati Membri jiżguraw li l-azzjonijiet rappreżentattivi transfruntiera jkunu jistgħu jitressqu quddiem il-qrati jew l-awtoritajiet amministrattivi tagħhom minn entitajiet kwalifikati li kienu ddeżinjati għall-fini ta' tali azzjonijiet rappreżentattivi fi Stat Membru ieħor. Barra minn hekk, jenħtieġ li entitajiet kwalifikati minn Stati Membri differenti jkunu jistgħu jingħaqdu f'azzjoni rappreżentattiva waħda f'forum wieħed, soġġett għar-regoli rilevanti dwar il-ġurisdizzjoni. Jenħtieġ li dan ikun mingħajr preġudizzju għad-dritt tal-qorti jew tal-awtorità amministrattiva li jkollha l-każ quddiemha li teżamina jekk l-azzjoni rappreżentattiva hijiex adatta biex tinstema' bħala azzjoni rappreżentattiva waħda.

(32)

Jenħtieġ li jiġi żgurat ir-rikonoxximent reċiproku tal-interess ġuridiku tal-entitajiet kwalifikati ddeżinjati għall-fini ta' azzjonijiet rappreżentattivi transfruntiera. Jenħtieġ li l-identità ta' dawk l-entitajiet kwalifikati tiġi kkomunikata lill-Kummissjoni, u jenħtieġ li l-Kummissjoni tagħmel lista ta' dawk l-entitajiet kwalifikati u tagħmel dik il-lista disponibbli pubblikament. Jenħtieġ li l-inklużjoni fil-lista sservi ta' prova tal-interess ġuridiku tal-entità kwalifikata li tkun qed tressaq l-azzjoni rappreżentattiva. Jenħtieġ li dan ikun mingħajr preġudizzju għad-dritt tal-qorti jew tal-awtorità amministrattiva li teżamina jekk l-għan statutorju tal-entità kwalifikata jiġġustifikax it-teħid ta' azzjoni minnha f'każ speċifiku.

(33)

Il-miżuri ta' inġunzjoni għandhom l-għan li jipproteġu l-interessi kollettivi tal-konsumaturi irrispettivament minn jekk kwalunkwe telf jew dannu ġġarrabx mill-konsumaturi individwali. Il-miżuri ta' inġunzjoni jistgħu jeħtieġu lill-kummerċjanti jieħdu azzjoni speċifika, bħal pereżempju li jipprovdu lill-konsumaturi l-informazzjoni li qabel kienet tħalliet barra bi ksur ta' obbligu legali. Jenħtieġ li deċiżjoni dwar miżura ta' inġunzjoni ma tiddependix minn jekk il-prattika twettqitx intenzjonalment jew bħala riżultat ta' negliġenza.

(34)

Meta titressaq azzjoni rappreżentattiva, jenħtieġ li l-entità kwalifikata tipprovdi biżżejjed informazzjoni dwar il-konsumaturi kkonċernati mill-azzjoni rappreżentattiva lill-qorti jew lill-awtorità amministrattiva. Jenħtieġ li dik l-informazzjoni tippermetti lill-qorti jew lill-awtorità amministrattiva tiddetermina jekk għandhiex ġurisdizzjoni u tiddetermina l-liġi applikabbli. F'kawżi dwar danni, dan l-obbligu jinvolvi li tiġi infurmata l-qorti jew l-awtorità amministrattiva dwar il-post fejn seħħ jew jista' jseħħ l-avveniment dannuż li jaffettwa lill-konsumaturi. Il-livell tad-dettall tal-informazzjoni meħtieġa jista' jvarja skont liema miżura tkun qed tfittex l-entità kwalifikata u jekk ikunx japplika mekkaniżmu ta' inklużjoni jew esklużjoni fakultattiva. Barra minn hekk, meta titressaq azzjoni rappreżentattiva għal miżuri ta' inġunzjoni, is-sospensjoni jew l-interruzzjoni possibbli tal-perijodi ta' limitazzjoni applikabbli għal talbiet sussegwenti għal rimedju tkun teħtieġ li l-entità kwalifikata tipprovdi biżżejjed informazzjoni dwar il-grupp ta' konsumaturi kkonċernati mill-azzjoni rappreżentattiva.

(35)

Jenħtieġ li l-Istati Membri jiżguraw li l-entitajiet kwalifikati jkunu jistgħu jitolbu miżuri ta' inġunzjoni u miżuri ta' rimedju. Jenħtieġ li, biex jiżguraw l-effikaċja proċedurali tal-azzjonijiet rappreżentattivi, l-Istati Membri jkunu jistgħu jiddeċiedu li l-entitajiet kwalifikati jistgħu jitolbu miżuri ta' inġunzjoni u miżuri ta' ta' rimedju fi ħdan azzjoni rappreżentattiva waħda jew fi ħdan azzjonijiet rappreżentattivi separati. Jekk jintalbu f'azzjoni rappreżentattiva waħda, jenħtieġ li l-entitajiet kwalifikati jkunu jistgħu jitolbu l-miżuri rilevanti kollha meta jressqu l-azzjoni rappreżentattiva jew l-ewwel jitolbu l-miżuri ta' inġunzjoni rilevanti u sussegwentement jitolbu l-miżuri ta' rimedju, jekk ikun xieraq.

(36)

Jenħtieġ li entità kwalifikata li tressaq azzjoni rappreżentattiva taħt din id-Direttiva tfittex il-miżuri rilevanti, inklużi miżuri ta' rimedju, fl-interessi ta', u f'isem, il-konsumaturi affettwati mill-ksur. Jenħtieġ li l-entità kwalifikata jkollha d-drittijiet u l-obbligi proċedurali tal-parti rikorrenti fil-proċedimenti. Jenħtieġ li l-Istati Membri jkunu jistgħu jipprovdu lill-konsumaturi individwali kkonċernati mill-azzjoni rappreżentattiva ċerti drittijiet fi ħdan l-azzjoni rappreżentattiva, iżda dawk il-konsumaturi individwali m'għandhomx ikunu partijiet rikorrenti fil-proċedimenti. Jenħtieġ li f'ebda każ ma għandhom il-konsumaturi individwali jkunu jistgħu jinterferixxu fid-deċiżjonijiet proċedurali li jittieħdu mill-entitajiet kwalifikati, jew jitolbu b'mod individwali evidenza fi ħdan il-proċedimenti, jew jappellaw individwalment id-deċiżjonijiet proċedurali tal-qorti jew tal-awtorità amministrattiva li quddiemha titressaq l-azzjoni rappreżentattiva. Barra minn hekk, il-konsumaturi individwali ma għandhomx ikollhom obbligi proċedurali fi ħdan l-azzjoni rappreżentattiva u ma għandhomx iġarrbu l-ispejjeż tal-proċedimenti, ħlief f’ċirkostanzi eċċezzjonali.

(37)

Madankollu, jenħtieġ li l-konsumaturi kkonċernati minn azzjoni rappreżentattiva jkunu intitolati li jibbenefikaw minn dik l-azzjoni rappreżentattiva. F'azzjonijiet rappreżentattivi għal miżuri ta' rimedju, jenħtieġ li l-benefiċċji jiġu fil-forma ta' rimedji, bħal kumpens, tiswija, sostituzzjoni, tnaqqis fil-prezz, terminazzjoni ta' kuntratt jew rimborż tal-prezz imħallas. F'azzjonijiet rappreżentattivi għal miżuri ta' inġunzjoni, il-benefiċċju għall-konsumaturi kkonċernati jkun il-waqfien jew il-projbizzjoni ta' prattika li tikkostitwixxi ksur.

(38)

F’azzjonijiet rappreżentattivi għal miżuri ta' rimedju, il-parti telliefa għandha tħallas l-ispejjeż tal-proċedimenti mġarrba mill-parti rebbieħa, skont il-kondizzjonijiet u l-eċċezzjonijiet previsti fil-liġi nazzjonali. Madankollu, il-qorti jew l-awtorità amministrattiva m’għandhiex tordna lill-parti telliefa tħallas l-ispejjeż sa fejn dawk l-ispejjeż kienu ġġarrbu bla bżonn. Il-konsumaturi individwali kkonċernati minn azzjoni rappreżentattiva m’għandhomx iħallsu l-ispejjeż tal-proċedimenti. Madankollu, f’ċirkustanzi eċċezzjonali, jenħtieġ li jkun possibbli li l-konsumaturi individwali kkonċernati minn azzjoni rappreżentattiva għal miżuri ta' rimedju jiġu ordnati jħallsu l-ispejjeż tal-proċedimenti li kienu r-riżultat ta' mġiba intenzjonali jew negliġenti ta' konsumaturi individwali billi, pereżempju, it-titwil tal-proċedimenti minħabba mġiba illegali. Jenħtieġ li l-ispejjeż tal-proċedimenti jinkludu, pereżempju, kwalunkwe spiża li tirriżulta mill-fatt li kwalunkwe parti kienet irrappreżentata minn avukat jew professjonist ieħor fil-qasam legali, jew kwalunkwe spiża li tirriżulta min-notifikazzjoni jew mit-traduzzjoni ta' dokumenti.

(39)

Sabiex jevitaw litigazzjoni abużiva, l-Istati Membri għandhom jadottaw regoli ġodda jew japplikaw regoli eżistenti taħt il-liġi nazzjonali sabiex il-qorti jew l-awtorità amministrattiva tkun tista' tiddeċiedi li tiċħad kawżi li jkunu b'mod ċar bla bażi malli l-qorti jew l-awtorità amministrattiva tkun irċeviet l-informazzjoni meħtieġa sabiex tiġġustifika d-deċiżjoni. Jenħtieġ li l-Istati Membri ma jkunux obbligati jintroduċu regoli speċjali applikabbli għal azzjonijiet rappreżentattivi u li jkunu jistgħu japplikaw ir-regoli proċedurali ġenerali, fejn dawk ir-regoli jissodisfaw l-objettiv li jevitaw litigazzjoni abużiva.

(40)

Jenħtieġ li l-miżuri ta' inġunzjoni jinkludu miżuri definittivi kif ukoll miżuri proviżorji. Il-miżuri proviżorji jistgħu jkopru miżuri interim, miżuri prekawzjonarji u miżuri preventivi biex titwaqqaf prattika li tkun għaddejja jew biex tiġi pprojbita prattika f'każ li l-prattika ma tkunx twettqet iżda jkun hemm riskju li din tikkawża ħsara serja jew irriversibbli lill-konsumaturi. Il-miżuri ta' inġunzjoni jistgħu jinkludu wkoll miżuri li jiddikjaraw li prattika partikolari tikkostitwixxi ksur, f'każijiet fejn dik il-prattika waqfet qabel ma jkunu tressqu l-azzjonijiet rappreżentattivi, iżda jkun għad hemm il-ħtieġa li jiġi stabbilit li l-prattika kienet tikkostitwixxi ksur, pereżempju biex jiġu ffaċilitati azzjonijiet ta' segwitu għal miżuri ta' rimedju. Barra minn hekk, il-miżuri ta' inġunzjoni jistgħu jkunu fil-forma ta' obbligu tal-kummerċjant li jwettaq il-ksur li jippubblika d-deċiżjoni meħuda mill-qorti jew mill-awtorità amministrattiva, sħiħa jew parzjalment, dwar il-miżura, f'tali forma li tkun meqjusa adatta, jew li jippubblika stqarrija korrettiva.

(41)

Filwaqt li jibnu fuq id-Direttiva 2009/22/KE, jenħtieġ li l-Istati Membri jkunu jistgħu jeħtieġu li entità kwalifikata li biħsiebha li tressaq azzjoni rappreżentattiva għal miżuri ta' inġunzjoni tidħol f'konsultazzjoni minn qabel sabiex il-kummerċjant ikkonċernat jingħata opportunità jwaqqaf il-ksur li jkun immirat mill-azzjoni rappreżentattiva. Jenħtieġ li l-Istati Membri jkunu jistgħu jeħtieġu li dik il-konsultazzjoni minn qabel issir flimkien ma' korp pubbliku indipendenti ddeżinjat minnhom. Fejn l-Istati Membri jkunu stabbilixxew li għandu jkun hemm konsultazzjoni minn qabel, jenħtieġ li tiġi stabbilita skadenza ta' ġimagħtejn wara li tkun riċevuta t-talba għall-konsultazzjoni, wara liema, jekk il-ksur ma jkunx waqaf, jenħtieġ li l-applikant ikun intitolat iressaq immedjatament azzjoni rappreżentattiva għal miżura ta' inġunzjoni quddiem il-qorti jew l-awtorità amministrattiva kompetenti. Tali rekwiżiti jistgħu wkoll ikunu applikabbli għal azzjonijiet rappreżentattivi għal miżuri ta’ rimedju, skont il-liġi nazzjonali.

(42)

Jenħtieġ li din id-Direttiva tipprevedi mekkaniżmu proċedurali li ma jaffettwax ir-regoli li jistabbilixxu d-drittijiet sostantivi tal-konsumaturi għal rimedji kuntrattwali u mhux kuntrattwali f'każijiet fejn l-interessi tagħhom ikunu ġarrbu ħsara minn ksur, bħad-dritt għal kumpens għad-danni, it-terminazzjoni ta' kuntratt, ir-rimborż, is-sostituzzjoni, it-tiswija jew ir-roħs fil-prezz skont kif ikun adatt u kif ikun disponibbli taħt il-liġi tal-Unjoni jew dik nazzjonali. Jenħtieġ li azzjoni rappreżentattiva għal miżuri ta' rimedju taħt din id-Direttiva tkun tista' titressaq biss fejn il-liġi tal-Unjoni jew dik nazzjonali tipprevedi tali drittijiet sostantivi. Jenħtieġ li din id-Direttiva ma tippermettix l-impożizzjoni ta' danni punittivi fuq il-kummerċjant li jwettaq il-ksur, f'konformità mal-liġi nazzjonali.

(43)

Jenħtieġ li l-konsumaturi kkonċernati minn azzjoni rappreżentattiva għal miżuri ta' rimedju jkollhom opportunitajiet adegwati wara li l-azzjoni rappreżentattiva tkun tressqet biex jesprimu jekk huma jixtiqux ikunu rrappreżentati mill-entità kkwalifikata f'dik l-azzjoni rappreżentattiva speċifika u jekk huma jixtiqux jibbenefikaw mill-eżiti rilevanti ta' dik l-azzjoni rappreżentattiva. Biex jirrispondu bl-aħjar mod għat-tradizzjonijiet legali tagħhom, jenħtieġ li l-Istati Membri jipprevedu mekkaniżmu ta' inklużjoni fakultattiva jew mekkaniżmu ta' esklużjoni fakultattiva, jew taħlita tat-tnejn. F'mekkaniżmu ta' inklużjoni fakultattiva, jenħtieġ li l-konsumaturi jkunu meħtieġa jesprimu b'mod espliċitu x-xewqa tagħhom li jkunu rappreżentati mill-entità kwalifikata fl-azzjoni rappreżentattiva għal miżuri ta' rimedju. F'mekkaniżmu ta' esklużjoni fakultattiva, jenħtieġ li l-konsumaturi jkunu meħtieġa jesprimu b'mod espliċitu x-xewqa tagħhom li ma jkunux rappreżentati mill-entità kwalifikata fl-azzjoni rappreżentattiva għal miżuri ta' rimedju. Jenħtieġ li l-Istati Membri jkunu jistgħu jiddeċiedu f'liema stadju tal-proċedimenti l-konsumaturi individwali għandhom ikunu jistgħu jeżerċitaw id-dritt tagħhom ta' inklużjoni jew esklużjoni fakultattiva fir-rigward tal-azzjoni rappreżentattiva.

(44)

Jenħtieġ li l-Istati Membri li jipprevedu mekkaniżmu ta' inklużjoni fakultattiva jkunu jistgħu jeħtieġu li xi konsumaturi jagħżlu li jkunu inklużi fl-azzjoni rappreżentattiva għal miżuri ta' rimedju qabel ma l-azzjoni rappreżentattiva tkun tressqet, dment li konsumaturi oħra wkoll ikollhom l-opportunità li jagħżlu li jiġu inklużi wara li tkun tressqet l-azzjoni rappreżentattiva.

(45)

Madankollu, sabiex tiġi żgurata amministrazzjoni tajba tal-ġustizzja u biex jiġu evitati sentenzi irrikonċiljabbli, jenħtieġ li jkun meħtieġ mekkaniżmu ta' inklużjoni fakultattiva rigward azzjoni rappreżentattiva għal miżuri ta' rimedju fejn il-konsumaturi milquta mill-ksur ma jkunux residenti abitwali fl-Istat Membru tal-qorti jew l-awtorità amministrattiva li quddiemha titressaq l-azzjoni rappreżentattiva. F'tali sitwazzjonijiet, jenħtieġ li l-konsumaturi jkunu meħtieġa jesprimu b'mod espliċitu x-xewqa tagħhom li jkunu rappreżentati f'dik l-azzjoni rappreżentattiva sabiex ikunu marbuta bl-eżitu tal-azzjoni rappreżentattiva.

(46)

Fejn il-konsumaturi jesprimu b’mod espliċitu jew taċitu x-xewqa tagħhom li jkunu rappreżentati minn entità kwalifikata f’azzjoni rappreżentattiva għal miżuri ta' rimedju, irrispettivament minn jekk dik l-azzjoni rappreżentattiva titressaqx fil-kuntest ta' mekkaniżmu ta' inklużjoni jew esklużjoni fakultattiva, jenħtieġ li ma jibqgħux ikunu jistgħu jiġu rappreżentati f’azzjonijiet rappreżentattivi oħra bl-istess kawża ta’ azzjoni kontra l-istess kummerċjant jew li jkunu jistgħu jressqu azzjonijiet individwali bl-istess causa petendi kontra l-istess kummerċjant. Madankollu, jenħtieġ li dan ma jkunx japplika jekk konsumatur, li jkun esprima x-xewqa tiegħu b'mod espliċitu jew taċitu li jkun rappreżentat f'azzjoni rappreżentattiva għal miżuri ta' rimedju, aktar tard jagħżel li jiġi eskluż minn dik l-azzjoni rappreżentattiva f'konformità mal-liġi nazzjonali, pereżempju fejn konsumatur jirrifjuta aktar tard li jintrabat bi ftehim riżoluttiv.

(47)

Għal raġunijiet ta' ħeffa u effiċjenza, jenħtieġ li l-Istati Membri, f'konformità mal-liġi nazzjonali, jkunu jistgħu jipprovdu lill-konsumaturi l-possibbiltà li jibbenefikaw direttament minn miżura ta' rimedju wara li tinħareġ, mingħajr ma jkunu soġġetti għal rekwiżiti fir-rigward tal-parteċipazzjoni minn qabel fl-azzjoni rappreżentattiva.

(48)

Jenħtieġ li l-Istati Membri jistabbilixxu regoli għall-koordinazzjoni ta' azzjonijiet rappreżentattivi, ta' azzjonijiet individwali mressqa minn konsumaturi u ta' kwalunkwe azzjoni oħra għall-protezzjoni tal-interessi individwali u kollettivi tal-konsumaturi kif previst taħt il-liġi tal-Unjoni u dik nazzjonali. Jenħtieġ li l-miżuri ta' inġunzjoni maħruġa taħt din id-Direttiva jkunu mingħajr preġudizzju għall-azzjonijiet individwali għal miżuri ta' rimedju mressqa mill-konsumaturi li jkunu ġarrbu ħsara minħabba l-prattika mmirata mill-miżuri ta' inġunzjoni.

(49)

Jenħtieġ li l-Istati Membri jeħtieġu li l-entitajiet kwalifikati jipprovdu biżżejjed informazzjoni biex isostnu l-azzjonijiet rappreżentattivi għal miżuri ta' rimedju, inklużi deskrizzjoni tal-grupp ta' konsumaturi affettwati mill-ksur u l-kwistjonijiet ta' fatti u ta' liġi li jridu jiġu indirizzati f'dik l-azzjoni rappreżentattiva. Jenħtieġ li l-entità kwalifikata ma tkunx meħtieġa tidentifika individwalment kull konsumatur ikkonċernat mill-azzjoni rappreżentattiva biex tiġi istitwita l-azzjoni rappreżentattiva. F'azzjonijiet rappreżentattivi għal miżuri ta' rimedju, jenħtieġ li l-qorti jew l-awtorità amministrattiva tivverifika kemm jista' jkun kmieni fil-proċedimenti jekk il-każ huwiex adatt biex jitressaq bħala azzjoni rappreżentattiva, fid-dawl tan-natura tal-ksur u l-karatteristiċi tal-ħsara mġarrba mill-konsumaturi affettwati.

(50)

Jenħtieġ li l-miżuri ta' rimedju jidentifikaw il-konsumaturi individwali, jew tal-anqas jiddeskrivu l-grupp ta' konsumaturi intitolati għar-rimedji previsti mill-miżuri ta' rimedju, u, jekk ikun applikabbli, jiddikjaraw il-metodu ta' kwantifikazzjoni tal-ħsara u l-passi rilevanti li għandhom jittieħdu mill-konsumaturi u l-kummerċjanti għall-implimentazzjoni tar-rimedji. Jenħtieġ li l-konsumaturi intitolati għal rimedji jkunu jistgħu jibbenefikaw minn dawk ir-rimedji mingħajr ma jkollhom bżonn jistitwixxu proċedimenti separati. Pereżempju, rekwiżit għal proċedimenti separati jimplika l-obbligu għall-konsumatur li jressaq azzjoni individwali quddiem qorti jew awtorità amministrattiva għall-kwantifikazzjoni tal-ħsara. Min-naħa l-oħra, sabiex konsumatur jikseb ir-rimedji tiegħu, jenħtieġ li jkun possibbli taħt din id-Direttiva li l-konsumaturi jkunu meħtieġa jieħdu ċerti passi, bħal li jidentifikaw rwieħhom lil entità responsabbli għall-eżekuzzjoni tal-miżura ta' rimedju.

(51)

Jenħtieġ li l-Istati Membri jistabbilixxu jew iżommu r-regoli dwar il-limiti ta' żmien, bħal perijodi ta' limitazzjoni jew limiti oħra ta' żmien, biex konsumaturi individwali jeżerċitaw id-dritt tagħhom li jibbenefikaw mill-miżuri ta' rimedju. Jenħtieġ li l-Istati Membri jkunu jistgħu jistabbilixxu regoli dwar id-destinazzjoni ta' kwalunkwe fondi ta' rimedju pendenti li ma jkunux ġew irkuprati fil-limiti taż-żmien stabbilit.

(52)

Jenħtieġ li l-entitajiet kwalifikati jkunu kompletament trasparenti vis-à-vis l-qrati jew l-awtoritajiet amministrattivi fir-rigward tas-sors tal-finanzjament tal-attivitajiet tagħhom inġenerali u fir-rigward tas-sors tal-fondi li jsostnu azzjoni rappreżentattiva speċifika għal miżuri ta' rimedju. Dan huwa meħtieġ sabiex il-qrati jew l-awtoritajiet amministrattivi jkunu jistgħu jivvalutaw jekk il-finanzjament minn parti terza, sa fejn permess skont il-liġi nazzjonali, jikkonformax mal-kondizzjonijiet previsti f’din id-Direttiva, jekk jeżistix xi kunflitt ta’ interess bejn min jipprovdi l-finanzjament tal-parti terza u l-entità kwalifikata li jippreżenta riskju ta’ litigazzjoni abużiva, u jekk il-finanzjament minn parti terza li jkollha interess ekonomiku fit-tressiq tal-azzjoni rappreżentattiva għal miżuri ta' rimedju jew fl-eżita tagħha jiddevjax l-azzjoni rappreżentattiva mill-protezzjoni tal-interessi kollettivi tal-konsumaturi. L-informazzjoni pprovduta mill-entità kwalifikata lill-qorti jew lill-awtorità amministrattiva jenħtieġ li tippermetti lill-qorti jew lill-awtorità amministrattiva jivvalutaw jekk il-parti terza tistax indebitament tinfluwenza d-deċiżjonijiet proċedurali tal-entità kwalifikata fil-kuntest tal-azzjoni rappreżentattiva, inklużi deċiżjonijiet dwar riżoluzzjonijiet tal-kwistjoni, b'mod li jkun ta' ħsara għall-interessi kollettivi tal-konsumaturi kkonċernati, u jivvalutaw jekk il-parti terza hijiex qed tipprovdi finanzjament għal azzjoni rappreżentattiva għal miżuri ta' rimedju kontra konvenut li huwa kompetitur ta' dik il-parti terza li qed tipprovdi l-fondi jew kontra konvenut li minnu tiddependi l-parti terza li qed tipprovdi l-fondi. Jenħtieġ li finanzjament dirett ta’ azzjoni rappreżentattiva speċifika minn kummerċjant li jopera fl-istess suq bħall-konvenut jitqies li jimplika kunflitt ta’ interess, peress li l-kompetitur jista’ jkollu interess ekonomiku fl-eżitu tal-azzjoni rappreżentattiva li ma jkunx l-istess bħall-interess tal-konsumaturi.

Il-finanzjament indirett ta' azzjoni rappreżentattiva minn organizzazzjonijiet li jkunu ffinanzjati permezz ta' kontribuzzjonijiet ugwali mill-membri tagħhom jew permezz ta' donazzjonijiet, inklużi donazzjonijiet minn kummerċjanti fil-qafas ta' inizjattivi ta' responsabbiltà soċjali korporattiva jew finanzjament kollettiv (crowdfunding), jenħtieġ li jitqies eliġibbli għal finanzjament minn partijiet terzi, dment li l-finanzjament minn partijiet terzi jikkonforma mar-rekwiżiti ta' trasparenza, indipendenza u assenza ta' kunflitti ta' interess. Jekk jiġi kkonfermat xi kunflitt ta' interess, il-qorti jew l-awtorità amministrattiva jenħtieġ li jkollha s-setgħa li tieħu miżuri adatti, bħal li tirrikjedi lill-entità kwalifikata tirrifjuta jew tibdel il-finanzjament rilevanti u, jekk ikun meħtieġ, tirriġetta l-locus standi tal-entità kwalifikata jew tiddikjara azzjoni rappreżentattiva speċifika għal miżuri ta' rimedju bħala inammissibbli. Jenħtieġ li tali riġettazzjoni jew deċiżjoni dikjarattiva ma taffettwax id-drittijiet tal-konsumaturi kkonċernati mill-azzjoni rappreżentattiva.

(53)

Jenħtieġ li jitħeġġu r-riżoluzzjonijiet kollettivi li jkollhom l-għan li jipprovdu rimedju lil konsumaturi li ġarrbu ħsara f'azzjonijiet rappreżentattivi għal miżuri ta' rimedju.

(54)

Jenħtieġ li l-qorti u l-awtorità amministrattiva jkunu jistgħu jistiednu lill-kummerċjant u lill-entità kwalifikata li ressqet l-azzjoni rappreżentattiva għal miżuri ta' rimedju biex jidħlu f'negozjati bl-għan li jintlaħaq ftehim dwar riżoluzzjoni dwar ir-rimedju li jridu jingħataw lill-konsumaturi kkonċernati mill-azzjoni rappreżentattiva.

(55)

Jenħtieġ li kwalunkwe riżoluzzjoni milħuqa fil-kuntest ta' azzjoni rappreżentattiva għal miżuri ta' rimedju tiġi approvata mill-qorti jew l-awtorità amministrattiva rilevanti ħlief jekk il-kondizzjonijiet tar-riżoluzzjoni ma jistgħux jiġu infurzati jew jekk ir-riżoluzzjoni tmur kontra dispożizzjonijiet obbligatorji tal-liġi nazzjonali, applikabbli għall-kawża, li minnhom ma tkunx ammissibbli deroga għad-dannu tal-konsumatur b'mod kuntrattwali. Pereżempju, riżoluzzjoni li espliċitament tħalli mhux mibdula klawsola kuntrattwali li tagħti lill-kummerċjant dritt esklużiv li jinterpreta kwalunkwe klawsola oħra ta' dak il-kuntratt tista' tmur kontra dispożizzjonijiet obbligatorji tal-liġi nazzjonali.

(56)

Jenħtieġ li l-Istati Membri jkunu jistgħu jistabbilixxu regoli li jippermettu li qorti jew awtorità amministrattiva anke tirrifjuta li tapprova soluzzjoni fejn il-qorti jew l-awtorità amministrattiva tqis li r-riżoluzzjoni hija inġusta.

(57)

Ir-riżoluzzjonijiet approvati għandhom ikunu vinkolanti fuq l-entità kwalifikata, fuq il-kummerċjant u fuq il-konsumaturi individwali kkonċernati. Madankollu, jenħtieġ li l-Istati Membri jkunu jistgħu jistabbilixxu regoli li taħthom il-konsumaturi individwali kkonċernati jingħataw il-possibbiltà li jaċċettaw riżoluzzjoni jew jirrifjutaw li jintrabtu biha.

(58)

Biex azzjoni rappreżentattiva jkollha suċċess huwa kruċjali li jkun żgurat li l-konsumaturi jiġu infurmati dwarha. L-entitajiet kwalifikati għandhom jinfurmaw lill-konsumaturi mis-siti web tagħhom dwar l-azzjonijiet rappreżentattivi li jkunu ddeċidew li jressqu quddiem qorti jew awtorità amministrattiva, l-istat attwali tal-azzjonijiet rappreżentattivi li jkunu ġabu u r-riżultati ta’ tali azzjonijiet rappreżentattivi, biex il-konsumaturi ikunu jistgħu jieħdu deċiżjoni infurmata dwar jekk jixtiqux jipparteċipaw f'azzjoni rappreżentattiva u biex jieħdu l-passi meħtieġa fil-ħin. L-informazzjoni li l-entitajiet kwalifikati jkunu meħtieġa jipprovdu lill-konsumaturi jenħtieġ li tinkludi, kif rilevanti u adatt, spjegazzjoni b’lingwa li tinftiehem tas-suġġett u tal-konsegwenzi legali possibbli jew attwali tal-azzjoni rappreżentattiva, l-intenzjoni tal-entità kwalifikata li tressaq l-azzjoni, deskrizzjoni tal-grupp ta’ konsumaturi kkonċernati mill-azzjoni rappreżentattiva, u l-passi meħtieġa li għandhom jittieħdu mill-konsumaturi kkonċernati, inkluża s-salvagwardja tal-evidenza meħtieġa, sabiex il-konsumatur ikun jista' jibbenefika mill-miżuri ta' inġunzjoni, mill-miżuri ta’ rimedju jew mir-riżoluzzjonijiet approvati kif previst minn din id-Direttiva. Tali informazzjoni għandha tkun adegwata u proporzjonata għaċ-ċirkostanzi tal-każ.

(59)

Mingħajr preġudizzju għall-obbligu tal-entitatijiet kwalifikati li jipprovdu informazzjoni, il-konsumaturi kkonċernati għandhom ikunu infurmati dwar l-azzjoni rappreżentattiva li tkun għaddejja għal miżuri ta’ rimedju sabiex ikunu jistgħu jesprimu b'mod espliċitu jew taċitu x-xewqa tagħhom li jkunu rappreżentati fl-azzjoni rappreżentattiva. Jenħtieġ li l-Istati Membri jagħmlu dan possibbli billi jistabbilixxu regoli adegwati dwar id-disseminazzjoni tal-informazzjoni dwar azzjonijiet rappreżentattivi lill-konsumaturi. Jenħtieġ li jkun f'idejn l-Istati Membri li jiddeċiedu min għandu jkun responsabbli għad-disseminazzjoni ta' dik l-informazzjoni.

(60)

Il-konsumaturi għandhom anke jiġu infurmati dwar id-deċiżjonijiet finali li jipprevedu miżuri ta' inġunzjoni, miżuri ta' rimedju jew riżoluzzjonijiet approvati, dwar id-drittijiet tagħhom wara li jiġi stabbilit li jeżisti ksur, u dwar kwalunkwe pass sussegwenti li jrid jittieħed mill-konsumaturi kkonċernati mill-azzjoni rappreżentattiva, partikolarment biex jinkiseb rimedju. Ir-riskji għar-reputazzjoni assoċjati mad-disseminazzjoni tal-informazzjoni dwar il-ksur huma wkoll importanti bħala deterrent lill-kummerċjanti milli jiksru d-drittijiet tal-konsumaturi.

(61)

Biex tkun effettiva, jenħtieġ li l-informazzjoni dwar l-azzjonijiet rappreżentattivi li jkunu għaddejjin u dawk konklużi tkun adegwata u proporzjonata għaċ-ċirkostanzi tal-każ. Tali informazzjoni tista' tiġi pprovduta, pereżempju fuq is-sit web tal-entità kwalifikata jew fuq dak tal-kummerċjant, f'bażijiet tad-data nazzjonali, fil-media soċjali, fuq swieq online, jew f'gazzetti popolari, inklużi gazzetti li jkunu ppubblikati esklużivament b'mezzi elettroniċi ta' komunikazzjoni. Fejn ikun possibbli u adatt, jenħtieġ li l-konsumaturi jiġu informati individwalment permezz ta' ittri trażmessi b'mezzi elettroniċi jew stampati. Jenħtieġ li tali informazzjoni tingħata fuq talba f'formati li jkunu aċċessibbli għal persuni b'diżabilità.

(62)

Jenħtieġ li jkun il-kummerċjant li wettaq il-ksur li, bl-ispejjeż tal-kummerċjant stess, jinforma lill-konsumaturi kollha kkonċernati dwar il-miżuri finali ta' inġunzjoni u l-miżuri finali ta' rimedju. Jenħtieġ li l-kummerċjant jinforma wkoll lill-konsumaturi dwar kwalunkwe riżoluzzjoni approvata minn qorti jew awtorità amministrattiva. Jenħtieġ li l-Istati Membri jkunu jistgħu jistabbilixxu regoli li taħthom tali obbligu jiddependi fuq it-talba mill-entità kwalifikata. Jekk, taħt il-liġi nazzjonali, l-entità kwalifikata jew il-qorti jew awtorità amministrattiva jkunu meħtieġa jipprovdu informazzjoni dwar deċiżjonijiet finali u riżoluzzjonijiet approvati lill-konsumaturi kkonċernati mill-azzjoni rappreżentattiva, ma għandux ikun meħtieġ mill-kummerċjant li jipprovdi dik l-informazzjoni għat-tieni darba. Għandu jkun f’idejn l-entità kwalifikata li tinforma lill-konsumaturi kkonċernati dwar id-deċiżjonijiet finali dwar ir-riġettazzjoni jew iċ-ċaħda ta’ azzjonijiet rappreżentattivi għall-miżuri ta’ rimedju.

(63)

Jenħtieġ li l-Istati Membri jkunu jistgħu jistabbilixxu bażi ta’ data elettronika nazzjonali li jkunu disponibbli pubblikament permezz ta’ siti web li jipprovdu informazzjoni dwar l-entitajiet kwalifikati deżinjati minn qabel għall-fini li jressqu azzjonijiet rappreżentattivi domestiċi u azzjonijiet rappreżentattivi transfruntiera kif ukoll informazzjoni ġenerali dwar azzjonijiet rappreżentattivi li jkunu għaddejjin u li jkunu ġew konklużi.

(64)

Jenħtieġ li l-Istati Membri jiżguraw li d-deċiżjoni finali ta' qorti jew ta' awtorità amministrattiva ta' kwalunkwe Stat Membru dwar l-eżistenza ta' ksur li jkun ta' dannu għall-interessi kollettivi tal-konsumaturi tkun tista' tintuża mill-partijiet kollha bħala evidenza fil-kuntest ta' kwalunkwe azzjoni oħra li titlob miżuri ta' rimedju kontra l-istess kummerċjant għall-istess prattika quddiem il-qrati jew l-awtoritajiet amministrattivi tagħhom. F'konformità mal-indipendenza tal-ġudikatura u l-evalwazzjoni libera tal-evidenza, jenħtieġ li dan ikun mingħajr preġudizzju għal-liġi nazzjonali dwar l-evalwazzjoni tal-evidenza.

(65)

Il-perijodi ta' limitazzjoni normalment jiġu sospiżi meta titressaq azzjoni. Madankollu, l-azzjonijiet għal miżuri ta' inġunzjoni mhux neċessarjament ikollhom effett sospensiv fir-rigward ta' miżuri sussegwenti ta' rimedju li jistgħu jirriżultaw mill-istess ksur. Jenħtieġ li l-Istati Membri għaldaqstant jiżguraw li azzjoni rappreżentattiva pendenti għal miżuri ta' inġunzjoni jkollha l-effett li tissospendi jew tinterrompi l-perijodi ta' limitazzjoni applikabbli fir-rigward tal-konsumaturi kkonċernati mill-azzjoni rappreżentattiva sabiex dawk il-konsumaturi, irrispettivament milli jkunu qed jaġixxu f'isimhom stess jew ikunux rappreżentati minn entità kwalifikata, ma jkunux impeduti milli sussegwentement iressqu azzjoni għal miżuri ta' rimedju dwar il-ksur allegat minħabba l-iskadenza ta' perijodi ta' limitazzjoni matul il-kors tal-azzjoni rappreżentattiva għal miżuri ta' inġunzjoni. Meta tressaq azzjoni rappreżentattiva għal miżura ta' inġunzjoni, jenħtieġ li l-entità kwalifikata tiddefinixxi b'mod suffiċjenti lill-grupp ta' konsumaturi li l-interessi tagħhom huma affettwati mill-ksur allegat, li jistgħu possibbilment ikollhom pretensjoni li tirriżulta minn dak il-ksur u li jistgħu jiġu affettwati mill-iskadenza tal-perijodi ta' limitazzjoni matul l-azzjoni rappreżentattiva. Sabiex ikun evitat id-dubbju, jenħtieġ li anki azzjoni rappreżentattiva pendenti għal miżura ta' rimedju jkollha l-effett li tissospendi jew tinterrompi l-perijodi ta' limitazzjoni applikabbli fir-rigward tal-konsumaturi kkonċernati minn dik l-azzjoni rappreżentattiva.

(66)

Sabiex tiġi żgurata ċ-ċertezza legali, jenħtieġ li s-sospensjoni jew l-interruzzjoni tal-perijodi ta' limitazzjoni imposti skont din id-Direttiva japplikaw biss għal talbiet għal rimedju li jkunu bbażati fuq ksur li jkun seħħ fi ... [data tal-applikazzjoni ta' din id-Direttiva] jew warajha. Jenħtieġ li dan ma jipprekludix l-applikazzjoni ta’ dispożizzjonijiet nazzjonali dwar is-sospensjoni jew l-interruzzjoni ta’ perijodi ta’ limitazzjoni li kienu japplikaw qabel ... [data tal-applikazzjoni tad-Direttiva] għal talbiet għal rimedju li jkunu bbażati fuq ksur li seħħ qabel dik id-data.

(67)

Jenħtieġ li l-azzjonijiet rappreżentattivi għal miżuri ta' inġunzjoni jiġu ttrattati bil-ħeffa proċedurali dovuta. Jekk ikun għadu qed iseħħ ksur, il-ħtieġa għall-ħeffa tista' tkun akbar. Jenħtieġ li l-azzjonijiet rappreżentattivi għal miżuri ta' inġunzjoni b'effett proviżorju jiġu ttrattati, fejn ikun adatt, permezz ta’ proċedura sommarja biex jiġi evitat kwalunkwe dannu jew dannu ulterjuri kkawżat mill-ksur.

(68)

L-evidenza hija essenzjali biex jiġi stabbilit jekk azzjoni rappreżentattiva għal miżuri ta' inġunzjoni jew miżuri ta' rimedju hijiex fondata. Madankollu, ir-relazzjonijiet bejn in-negozji u l-konsumaturi huma ta' spiss karatterizzati minn asimetrija fl-informazzjoni u l-evidenza meħtieġa tista' tkun miżmuma esklużivament mill-kummerċjant, u dan jagħmilha inaċċessibbli għall-entità kwalifikata. Jenħtieġ għalhekk li l-entitajiet kwalifikati jkollhom id-dritt li jitolbu lill-qorti jew lill-awtorità amministrattiva biex tordna li l-kummerċjant jiżvela l-evidenza rilevanti għat-talba tagħhom. Min-naħa l-oħra, filwaqt li jitqies il-prinċipju ta' opportunitajiet ugwali għall-partijiet, jenħtieġ li l-kummerċjant ikollu dritt simili li jitlob evidenza li tkun fil-kontroll tal-entità kwalifikata. Jenħtieġ li l-ħtieġa, il-portata u l-proporzjonalità tal-ordnijiet ta' żvelar ta' evidenza jiġu vvalutati bir-reqqa mill-qorti jew mill-awtorità amministrattiva li quddiemha titressaq l-azzjoni rappreżentattiva, f'konformità mal-liġi proċedurali nazzjonali, b'kunsiderazzjoni tal-protezzjoni tal-interessi leġittimi ta' partijiet terzi u soġġett għar-regoli applikabbli tal-Unjoni u dawk nazzjonali dwar il-kunfidenzjalità.

(69)

Sabiex tiġi żgurata l-effettività tal-azzjonijiet rappreżentattivi, jenħtieġ li l-kummerċjanti li jwettqu ksur jiskontaw pieni effettivi, dissważivi u proporzjonati talli jonqsu milli jew jirrifjutaw li jikkonformaw ma' miżura ta' inġunzjoni. Jenħtieġ li l-Istati Membri jiżguraw li dawk il-pieni jkunu jistgħu jieħdu l-forma ta' multi, pereżempju multi kondizzjonali, pagamenti perjodiċi jew pagamenti ta' pieni. Jenħtieġ ukoll li jkun hemm pieni għan-nuqqas jew rifjut ta' konformità ma' ordni biex tingħata informazzjoni lill-konsumaturi kkonċernati dwar deċiżjonijiet jew riżoluzzjonijiet finali jew għan-nuqqas jew rifjut ta' żvelar ta' evidenza. Jenħtieġ ukoll li jkun possibbli li jiġu applikati tipi oħra ta’ pieni, bħal miżuri proċedurali, għar-rifjut ta' konformità ma' ordni biex tiġi żvelata evidenza.

(70)

B'kunsiderazzjoni tal-fatt li l-azzjonijiet rappreżentattivi javanzaw l-interess pubbliku billi jipproteġu l-interessi kollettivi tal-konsumaturi, jenħtieġ li l-Istati Membri jżommu jew jieħdu miżuri li jiżguraw li l-entitajiet kwalifikati ma jkunux impeduti milli jressqu azzjonijiet rappreżentattivi taħt din id-Direttiva minħabba spejjeż assoċjati mal-proċeduri. Tali mezzi jistgħu jinkludu l-limitazzjoni ta' tariffi tal-qorti jew tariffi amministrattivi applikabbli, l-għoti ta' aċċess lill-entitajiet kwalifikati għal għajnuna legali, fejn din tkun meħtieġa, jew l-għoti ta' fondi pubbliċi lill-entitajiet kwalifikati biex iressqu azzjonijiet rappreżentattivi, inkluż appoġġ strutturali jew mezzi oħra ta' appoġġ. Madankollu, jenħtieġ li l-Istati Membri ma jkunux meħtieġa jiffinanzjaw azzjonijiet rappreżentattivi.

(71)

Il-kooperazzjoni u l-iskambju ta' informazzjoni bejn l-entitajiet kwalifikati minn Stati Membri differenti wrew li huma utli biex jiġu indirizzati, b'mod partikolari, każijiet ta' ksur transfruntier. Teżisti l-ħtieġa li jitkomplew il- miżuri tal-bini tal-kapaċità u l- tal-kooperazzjoni u li jiġu estiżi għal għadd akbar ta' entitajiet kwalifikati madwar l-Unjoni sabiex jiżdied l-użu tal-azzjonijiet rappreżentattivi b'implikazzjonijiet transfruntiera.

(72)

Għall-finijiet tal-evalwazzjoni ta' din id-Direttiva, jenħtieġ li l-Istati Membri jipprovdu lill-Kummissjoni b'data dwar azzjonijiet rappreżentattivi mressqa taħt din id-Direttiva. L-Istati Membri jenħtieġ li jipprovdu informazzjoni dwar l-għadd u t-tip ta’ azzjonijiet rappreżentattivi li jkunu ġew konklużi quddiem kwalunkwe qorti jew awtorità amministrattiva tagħhom. Jenħtieġ li tiġi pprovduta wkoll informazzjoni dwar l-eżiti tal-azzjonijiet rappreżentattivi, bħal jekk kinux ammissibbli jew le, jew jekk kellhomx suċċess jew jekk irriżultawx f'riżoluzzjoni approvata. Sabiex jeħfief il-piż amministrattiv tal-Istati Membri fit-twettiq ta' dawk l-obbligi, jenħtieġ li jkun biżżejjed li l-Kummissjoni tingħata informazzjoni ġenerali dwar it-tip ta' ksur u dwar il-partijiet, b'mod partikolari fir-rigward ta' miżuri ta' inġunzjoni. Fir-rigward tal-partijiet, pereżempju, jenħtieġ li jkun biżżejjed li l-Kummissjoni tiġi infurmata dwar jekk l-entità kwalifikata kinitx organizzazzjoni tal-konsumaturi jew korp pubbliku, u dwar il-qasam tan-negozju tal-kummerċjant, pereżempju servizzi finanzjarji. Alternattivament, jenħtieġ li l-Istati Membri jkunu jistgħu jipprovdu lill-Kummissjoni b'kopji ta' deċiżjonijiet jew soluzzjonijiet rilevanti. Jenħtieġ li ma tiġix ipprovduta informazzjoni dwar l-identitajiet speċifiċi tal-konsumaturi konċernati minn azzjonijiet rappreżentattivi.

(73)

Jenħtieġ li l-Kummissjoni tfassal rapport, akkumpanjat jekk ikun adatt minn proposta leġiżlattiva, li jivvaluta jekk azzjonijiet rappreżentattivi transfruntiera jistgħux l-aħjar jiġu indirizzati fil-livell tal-Unjoni billi jiġi stabbilit ombudsman Ewropew għal azzjonijiet rappreżentattivi għal miżuri ta' inġunzjoni u miżuri ta' rimedju.

(74)

Din id-Direttiva tirrispetta d-drittijiet fundamentali u tosserva l-prinċipji rikonoxxuti b'mod partikolari mill-Karta. Għaldaqstant, din id-Direttiva jenħtieġ li tkun interpretata u applikata skont dawk id-drittijiet u l-prinċipji, inklużi dawk relatati mad-dritt għal rimedju effettiv u għal proċess ġust, kif ukoll id-dritt għal difiża.

(75)

Fir-rigward tal-liġi ambjentali, din id-Direttiva tqis il-Konvenzjoni tal-25 ta' Ġunju 1998, taħt l-amministrazzjoni tal-Kummissjoni Ekonomika għall-Ewropa tan-Nazzjonijiet Uniti, dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta' Deċiżjonijiet u l-Aċċess għall-Ġustizzja fi Kwistjonijiet Ambjentali (il-“Konvenzjoni ta' Aarhus”).

(76)

Minħabba li l-għanijiet ta' din id-Direttiva, jiġifieri li jkun disponibbli fl-Istati Membri kollha mekkaniżmu għal azzjoni rappreżentattiva għall-protezzjoni tal-interessi kollettivi tal-konsumaturi bil-għan li jiġi żgurat livell għoli ta' protezzjoni għall-konsumaturi u li jkun assistit il-funzjonament tajjeb tas-suq intern, ma jistgħux jinkisbu b'mod suffiċjenti mill-Istati Membri, iżda pjuttost jistgħu, minħabba l-implikazzjonijiet transfruntiera tal-ksur, jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità, kif stipulat f'dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-għanijiet.

(77)

F'konformità mad-Dikjarazzjoni Politika Konġunta tat-28 ta’ Settembru 2011 tal-Istati Membri u l-Kummissjoni dwar id-dokumenti ta’ spjegazzjoni (9), l-Istati Membri impenjaw rwieħhom li, f'każijiet ġustifikati, jakkumpanjaw in-notifika tal-miżuri ta' traspożizzjoni b'dokumenti ta' spjegazzjoni, wieħed jew aktar, li jispjegaw ir-relazzjoni bejn il-komponenti ta’ Direttiva u l-partijiet korrispondenti ta’ strumenti ta’ traspożizzjoni nazzjonali. Fir-rigward ta' din id-Direttiva, il-leġiżlatur iqis li t-trażmissjoni ta' dawk id-dokumenti hija ġġustifikata.

(78)

Ikun adatt li jiġu previsti regoli għall-applikazzjoni temporali ta' din id-Direttiva.

(79)

Jenħtieġ għalhekk li d-Direttiva 2009/22/KE titħassar,