—

tannulla sa fejn dawn l-atti jikkonċernaw lir-rikorrent:

—

tikkundanna lill-Kunsill iħallas is-somma ta’ EUR 500 000,00 (ħames mitt elf) bħala danni b’kumpens għad-danni kollha sostnuti;

—

tikkundanna lill-Kunsill għall-ispejjeż.

1.

L-ewwel motiv ibbażat fuq ksur tad-drittijiet tad-difiża u ta’ smigħ xieraq, ibbażati fuq l-Artikolu 47 tal-Karta tad-Drittijiet Fundamentali tal-Unjoni Ewropea u l-Artikoli 6 u 13 tal-Konvenzjoni għall-Protezzjoni tad-Drittijiet tal-Bniedem u tal-Libertajiet Fundamentali kif ukoll fuq ġurisprudenza tal-Qorti tal-Ġustizzja. Ir-rikorrent iqis li huwa kellu jinstema’ qabel ma l-Kunsill tal-Unjoni Ewropea adotta l-miżuri restrittivi kontra tiegħu u li konsegwentement id-drittijiet tad-difiża tiegħu ma ġewx irrispettati.

2.

It-tieni motiv ibbażat fuq ksur tal-obbligu ta’ motivazzjoni (it-tieni paragrafu tal-Artikolu 296 TFUE). Ir-rikorrent jikkritika lill-Kunsill li għamel biss kunsiderazzjonijiet vagi u ġenerali mingħajr ma semma, b’mod speċifiku u konkret, ir-raġunijiet li għalihom huwa qies, fl-eżerċizzju tas-setgħa diskrezzjonali ta’ evalwazzjoni tiegħu, li r-rikorrent kellu jiġi ssuġġettat għall-miżuri restrittivi inkwistjoni. Ebda element konkret u oġġettiv li bih jista’ jiġi kkritikat ir-rikorrent u li jista’ jiġġustifika l-miżuri inkwistjoni ma ġie invokat u l-motivazzjoni tal-Kunsill ma tipprovdi ebda indikazzjoni suffiċjenti għar-rikorrent u hija tal-inqas vaga, ġenerali u impreċiża.

3.

It-tielet motiv ibbażat fuq żball manifest ta’ evalwazzjoni. Ir-rikorrent jikkritika lill-Kunsill li kkonstata fil-motivazzjoni tiegħu, insostenn tal-miżura restrittiva, elementi li huma manifestament nieqsa minn bażi fattwali, billi l-fatti invokati huma fil-fehma tiegħu nieqsa minn kull bażi serja.

4.

Ir-raba’ motiv, relatat mat-talba għad-danni bħala kumpens għad-danni sostnuti u bbażat fuq l-imputazzjoni kontra r-rikorrent ta’ ċerti fatti gravi, li jesponu lilu personalment u kif ukoll lill-familja tiegħu għal perikli u juru l-kobor tad-dannu sostnut, tiġġustifika t-talba tiegħu għad-danni. Barra minn hekk, ir-rikorrent isostni li l-attivitajiet ekonomiċi tiegħu huma ppreġudikati b’mod gravi u għal żmien twil.