Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62020TN0166

Kawża T-166/20: Rikors ippreżentat fit-3 ta’ April 2020 – JD vs BEI

ĠU C 201, 15.6.2020, p. 34–35 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

15.6.2020   

MT

Il-Ġurnal Uffiċjali tal-Unjoni Ewropea

C 201/34

Rikors ippreżentat fit-3 ta’ April 2020 – JD vs BEI

(Kawża T-166/20)

(2020/C 201/46)

Lingwa tal-kawża: l-Ingliż

Partijiet

Rikorrent: JD (rappreżentant: H. Hansen, avukat)

Konvenut: BEI

Talbiet

Ir-rikorrent jitlob li l-Qorti Ġenerali jogħġobha:

—

tannula d-deċiżjoni (i) li tirrikjedi li r-rikorrent jiffirma addendum għall-kuntratt tax-xogħol tiegħu b’tali mod li jirrinunzja għal ċerti drittijiet tas-sigurtà soċjali u (ii) li r-rikorrent ma jitħalliex jidħol fis-servizz tal-BEI sakemm ma jiffirmax l-imsemmi addendum;

—

tordna lill-konvenut jirtira l-ittra li tipproponi l-imsemmi addendum u t-talba assoċjata li r-rikorrent jiffirma l-addendum inkwistjoni bħala kundizzjon minn qabel għad-dħul fis-servizz;

—

tordna li l-konvenut jħalli lir-rikorrent jidħol fis-servizz tal-BEI b’remunerazzjoni u benefiċċji retroattivi b’effett mid-data ta’ dħul fis-servizz stabbilita fil-kuntratt;

—

tordna li l-ispejjeż kollha jiġu sostnuti mill-konvenut; u

—

tirriżerva d-drittijiet kollha tar-rikorrent.

Motivi u argumenti prinċipali

Insostenn tar-rikors tiegħu, ir-rikorrent jinvoka erba’ motivi.

1.

L-ewwel motiv ibbażat fuq allegazzjoni ta’ ksur tar-rekwiżiti ta’ protezzjoni tad-data

—

Ir-rikorrent jargument li l-konvenut kiser l-Artikolu 15(1)(c) tar-Regolament (UE) 2018/1725 (1). Il-konvenut uża r-risposti għal kwestjonarju mediku sabiex jirrestinġil-kopertura fil-każ ta’ mewt jew invalidità, minkejja li l-avviż ta’ protezzjoni tad-data fil-kwestjonarju ma kienx jiddikjata li dan jista jintuża għal dan il-għan.

2.

It-tieni motiv ibbażat fuq allegazzjoni li ma hemmx bażi legali għall-esklużjoni mill-kopertura mfittxija mill-BEI.

—

Ir-rikorrent jargumenta li l-konvenut kiser l-Artikolu 33d tar-Regolamenti tal-Persunal II u l-Artikolu 9.1.2 tar-Regoli tal-Persunal. Il-bażi legali invokata mill-BEI (l-Artikolu 6-1 tar-Regolamenti dwar l-Iskema tal-Pensjoni) ma tistax raġonevolment titqies bħala li hija proposta mill-BEI. Tali argumentazzjoni tonqos milli tiħu inkunsiderazzjoni id-definizzjoni u l-għan iddikjarat tal-evalwazzjoni medika ta’ qabel l-impjieg kif iddefinita fl-Artikolu 2.1.1.A tal-Anness X tar-Regoli tal-Persunal.

3.

It-tielet motiv ibbażat fuq allegazzjoni li ma hemmx bażi legali għar-rekwiżit li jiġi ffirmat l-addendum.

—

Ir-rikorrent jargumenta li l-konvenut kiser l-Artikolu 13 tar-Regolamenti tal-Persunal II. Ma hemm ebda regola fill-korp tar-regolamenti tal-BEI li tirrikjedi li persuna li kkonkludiet kuntratt ta’ xogħol mal-BEI u li ħiet iddikjarata tajba għax-xogħol mit-tabib tax-xogħol tal-BEI tiffirma addendum għall-kuntratt tax-xogħol tagħha b’tali mod li tirrinunzja għal ċerti drittijiet tas-sigurtà soċjali (f’dan il-każ kopertura għal mewt u invalidità).

4.

Ir-raba’ motiv ibbażat fuq allegazzjoni ta’ diskriminazzjoni u b’mod partikolari ksur tal-Artikoli 21(1) u 34(1) tal-Karta tad-Drittijiet Fundamentali tal-Unjoni Ewropea.

—

Ir-rikorrent jargumenta li, permezz tad-deċiżjoni kontenzjuża, il-konvenut qed jipprova jċaħħdu minn ċerti drittijiet essenzjali tas-sigurtà soċjali (f’dan il-każ kopertura għal mewt u invalidità) fuq il-bażi ta’ perċezzjoni ta’ ċerti fatturi ġenetiċi u/jew allegata diżabbiltà. Il-BEI, billi jeżiġi li r-rikorrent jirrinunzja għall-imsemmija drittijiet tas-sigurtà soċjali taħt it-theddida ta’ terminazzjoni tal-kuntratt tax-xogħol tiegħu, aġixxa bi ksur tad-drittijiet fundamentali tar-rikorrent. L-aġir tal-konvenut huwa diskriminatorju sa fejn dan jipprova jirrestrinġi d-drittijiet tas-sigurtà soċjali fundamentali tar-rikorrent abbażi ta’ raġunijiet arbitrarji (l-eżistenza “baxxa ħafna jew estremament baxxa” ta’ riskju ta’ invalidità fil-ġejjieni) u għal perijodu ta’ żmien arbitrarju (5 snin).

(1)  Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU 2018, L 295, p. 39)

Top