This document is an excerpt from the EUR-Lex website
Document 52016AE1875
Opinion of the European Economic and Social Committee on the Communication from the Commission to the European Parliament, the Council, the European Economic and Social Committee and the Committee of the Regions on an EU Action Plan against Wildlife Trafficking [COM(2016) 87 final]
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Pjan ta’ Azzjoni tal-UE kontra t-Traffikar ta’ Organiżmi Selvaġġi” [COM(2016) 87 final]
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Pjan ta’ Azzjoni tal-UE kontra t-Traffikar ta’ Organiżmi Selvaġġi” [COM(2016) 87 final]
ĠU C 389, 21.10.2016, p. 74–79
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
21.10.2016 |
MT |
Il-Ġurnal Uffiċjali tal-Unjoni Ewropea |
C 389/74 |
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Pjan ta’ Azzjoni tal-UE kontra t-Traffikar ta’ Organiżmi Selvaġġi”
[COM(2016) 87 final]
(2016/C 389/10)
Relatur: |
is-Sur Cillian LOHAN |
Nhar l-4 ta’ Marzu 2016, il-Kummissjoni Ewropea ddeċidiet, b’konformità mal-Artikolu 304 tat-Trattat dwar il-Funzjonament tal-Unjoni Ewropea, li tikkonsulta lill-Kumitat Ekonomiku u Soċjali Ewropew dwar
“Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Pjan ta’ Azzjoni tal-UE kontra t-Traffikar ta’ Organiżmi Selvaġġi”
[COM(2016) 87 final].
Is-Sezzjoni Speċjalizzata għall-Agrikoltura, l-Iżvilupp Rurali u l-Ambjent, inkarigata sabiex tipprepara l-ħidma tal-Kumitat dwar is-suġġett, adottat l-Opinjoni tagħha nhar it-30 ta’ Ġunju 2016.
Matul il-518-il sessjoni plenarja tiegħu li saret fit-13 u l-14 ta’ Lulju 2016 (seduta tal-14 ta’ Lulju), il-Kumitat Ekonomiku u Soċjali Ewropew adotta din l-Opinjoni b’143 vot favur mingħajr astensjonijiet.
1. Konklużjonijiet u rakkomandazzjonijiet
1.1. |
Il-KESE jilqa’ b’sodisfazzjon il-proposta tal-Kummissjoni dwar Pjan ta’ Azzjoni tal-UE kontra t-traffikar ta’ organiżmi selvaġġi u bi pjaċir jinnota l-inklużjoni ta’ għadd ta’ proposti ewlenin stabbiliti fl-Opinjoni preċedenti tiegħu dwar din il-kwistjoni. |
1.2. |
Il-Kumitat huwa tal-fehma l-approċċ olistiku, inkluża alleanza dinjija li tinvolvi l-pajjiżi ta’ provenjenza, tranżitu u destinazzjoni, huwa pilastru fundamentali fil-ġlieda kontra l-impatti diretti u indiretti tat-traffikar ta’ organiżmi selvaġġi. |
1.3. |
Il-KESE jidentifika azzjonijiet prijoritarji differenti għal-livelli differenti tal-katina tal-provvista fit-traffikar.
|
1.4. |
Il-KESE huwa tal-fehma li d-djalogu strutturat u l-kooperazzjoni ma’ pajjiżi terzi għandhom jiġu infurzati permezz tal-inklużjoni tal-ġlieda kontra t-traffikar ta’ organiżmi selvaġġi bħala prerekwiżit għal kull ftehim tal-UE ta’ kummerċ bilaterali u multilaterali. L-impatt tal-politiki barranin tal-UE mmirati lejn l-iżvilupp sostenibbli fil-pajjiżi terzi ser ikollu jitkejjel l-ewwel u qabel kollox mil-lat ta’ kwalità tal-ħajja u s-sorsi sostenibbli alternattivi ta’ dħul u ta’ impjieg għall-popolazzjonijiet rurali, b’konformità mal-Aġenda 2030 għall-Iżvilupp Sostenibbli tan-NU. |
1.5. |
Il-Kumitat, b’konformità mad-Dikjarazzjoni ta’ Londra, jenfasizza l-ħtieġa ta’ sistema ta’ tikkettar u ta’ traċċabbiltà li tiggarantixxi li l-kummerċ tal-organiżmi selvaġġi jkun legali u sostenibbli. |
1.6. |
Il-Kumitat jiddeplora l-assenza fil-proposta tal-Kummissjoni ta’ kwalunkwe referenza għat-theddida li jirrappreżenta t-traffikar tal-organiżmi selvaġġi għas-saħħa pubblika u għall-ispeċijiet indiġeni tal-annimali u l-pjanti. Il-Kumitat jenfasizza li s-sistemi msemmijin hawn fuq ta’ tikkettar u ta’ traċċabbiltà, flimkien ma’ mekkaniżmu adegwat ta’ kontroll veterinarju u tas-saħħa tal-pjanti, jistgħu jikkontribwixxu għall-ġlieda kontra l-bidu u t-tixrid ta’ mard fuq skala dinjija. |
1.7. |
Il-Kumitat jipproponi li l-Kummissjoni tagħti aktar importanza lill-impatt li l-kummerċ elettroniku għandu fuq it-traffikar tal-organiżmi selvaġġi u timplimenta miżuri speċifiċi għall-protezzjoni tal-kummerċ legali u sostenibbli ta’organiżmi selvaġġi fil-konfront tal-kummerċ illegali, li jsir permezz tal-użu ħażin ta’ siti web tal-kummerċ elettroniku u l-midja soċjali jew permezz ta’ netwerks illegali speċifiċi maħluqa fid-deep web. |
1.8. |
Il-KESE jenfasizza l-importanza tas-17-il laqgħa tal-Konferenza tal-Partijiet (CoP17) għall-Konvenzjoni dwar il-Kummerċ Internazzjonali fl-Ispeċijiet ta’ Fawna u Flora Selvaġġi fil-Periklu (CITES), u jħeġġeġ lill-UE biex tieħu pożizzjoni b’saħħitha biex tappoġġja l-għanijiet ta’ dan il-Pjan ta’ Azzjoni. Il-KESE jitlob lill-Kummissjoni Ewropea biex tappoġġja t-talba għall-għeluq tas-swieq domestiċi għall-avorju bħala kontribut kruċjali għall-prevenzjoni tat-theddida tal-estinzjoni tal-iljunfanti Afrikani. |
2. Introduzzjoni
2.1. |
It-traffikar ta’ organiżmi selvaġġi mhux fenomenu ġdid (1) iżda l-iskala, in-natura u l-impatt tiegħu nbidlu b’mod konsiderevoli f’dawn l-aħħar snin (2). It-tkabbir mgħaġġel u mifrux tiegħu jagħmel it-traffikar tal-organiżmi selvaġġi wieħed mill-agħar forom ta’ kriminalità organizzata, flimkien mat-traffikar tal-bnedmin u dak tad-drogi u tal-armi, b’fatturat stmat bejn EUR 8 u EUR 20 biljun fis-sena. |
2.2. |
It-traffikar ta’ organiżmi selvaġġi sar wieħed mill-aktar attivitajiet profitabbli illegali fid-dinja minħabba d-domanda kbira (3) u r-riskju baxx (detezzjoni u sanzjonijiet). Meta mqabbel ma’ tipi oħra ta’ kriminalità, jingħata livell ferm iżjed baxx ta’ prijorità u jiġu allokati ħafna inqas riżorsi biex jiġi miġġieled. Is-sanzjonijiet applikati huma inkonsistenti u mhumiex applikati b’mod uniformi, anke fi ħdan l-UE, ħaġa li tħeġġeġ lill-organizzazzjonijiet kriminali internazzjonali biex jiċċaqilqu lejn pajjiżi b’sanzjonijiet inqas severi jew fejn l-awtoritajiet kompetenti huma inqas effettivi. |
2.3. |
L-impatt tat-traffikar ta’ organiżmi selvaġġi jista’ jitkejjel u huwa viżibbli, u mhux biss minn perspettiva ambjentali (4). Għal din ir-raġuni, it-telf tal-bijodiversità, id-deforestazzjoni (5), l-estinzjoni potenzjali tal-aktar speċijiet ikoniċi (6) u t-tnaqqis fl-istokkijiet tal-ħut (7) huma biss konsegwenza parzjali ta’ fenomenu iżjed perikoluż. |
2.4. |
It-traffikar ta’ organiżmi selvaġġi huwa marbut mill-qrib ma’ attivitajiet oħra illegali ta’ organizzazzjonijiet kriminali internazzjonali, inklużi l-ħasil tal-flus u l-korruzzjoni, kif enfasizzat fir-rapport reċenti tal-Uffiċċju tan-Nazzjonijiet Uniti kontra d-Droga u l-Kriminalità (UNODC) (8). |
2.5. |
It-traffikar ta’ organiżmi selvaġġi huwa theddida għas-sigurtà globali. Huwa jinkoraġġixxi l-konflitti u jhedded is-sigurtà nazzjonali u reġjonali billi jipprovdi sors ta’ finanzjament għal gruppi tal-milizja u netwerks terroristiċi (9). |
2.6. |
It-traffikar illegali tal-organiżmi selvaġġi jirrappreżenta theddida għas-saħħa pubblika u għall-ispeċijiet indiġeni tal-annimali u l-pjanti. L-evitar ta’ kontrolli tas-saħħa tal-pjanti adegwati jesponi lill-ispeċijiet indiġeni għal riskji konsiderevoli ta’ mard li jittieħed minn patoġeni ġodda (10). Huwa stmat li 75 % tal-mard li jittieħed emerġenti joriġina mill-annimali u li l-biċċa l-kbira tiegħu joriġina mill-organiżmi selvaġġi (11). |
2.7. |
Is-serq ta’ speċijiet mhedda huwa problema rilevanti oħra li ma ġietx enfasizzata biżżejjed. Fil-ġonna żooloġiċi tal-Assoċjazzjoni Ewropea tal-Ġonna Żooloġiċi u l-Akwarji (EAZA) (12), insterqu 739 annimal minn fost 44 speċi mill-2000 ‘l hawn, u ħafna minnhom qatt ma nstabu. L-ispeċijiet fil-perisklu fost il-primati u l-għasafar huma miri popolari, u dan joħloq problemi ta’ benessri u ta’ bijodiversità għall-programmi tat-tgħammir ta’ dawn l-ispeċijiet rari. |
2.8. |
CITES hija kruċjali fil-ġlieda kontra t-traffikar ta’ organiżmi selvaġġi. Fl-2013, in-NU nediet kampanja politika b’saħħitha (13) dwar dan is-suġġett li wasslet għall-ewwel Riżoluzzjoni speċifika adottata mill-Assemblea Ġenerali f’Lulju 2015 (14). B’riżultat ta’ dan, il-komunità internazzjonali bdiet inizjattiva parallela bl-għan li tinħoloq alleanza dinjija li tinvolvi l-pajjiżi ta’ provenjenza, tranżitu u destinazzjoni tal-organiżmi selvaġġi, li wasslet għall-iffirmar tad-Dikjarazzjoni ta’ Londra (15) fi Frar 2014 |
2.9. |
L-UE, bħala waħda mid-destinazzjoni ewlenin għall-prodotti tal-organiżmi selvaġġi ta’ oriġini illegali, kif ukoll ċentru kruċjali tat-traffikar li joriġina fl-Afrika, l-Amerika Latina u l-Asja, għandha rwol ewlieni x’taqdi. Fl-2014, il-Parlament Ewropew ħeġġeġ lill-Kummissjoni tfassal pjan ta’ azzjoni tal-UE biex jiġi indirizzat it-traffikar illeċitu fl-organiżmi selvaġġi (16). Il-frott ta’ dan kien Komunikazzjoni tal-Kummissjoni dwar l-approċċ tal-UE kontra t-traffikar ta’ organiżmi selvaġġi (17) li kienet appoġġjata bis-sħiħ mill-KESE f’Opinjoni (18). |
2.10. |
Is-setturi tan-negozju huma direttament jew indirettament milqutin mit-traffikar illeċitu tal-organiżmi selvaġġi, kemm l-intrapriżi involuti fil-kummerċ legali u sostenibbli tal-organiżmi selvaġġi (jiġifieri, l-indutrija tal-prodotti ta’ lussu, is-settur tal-annimali domestiċi u l-mediċina Ċiniża tradizzjonali) kif ukoll l-intrapriżi involuti indirettament (jiġifieri l-kumpaniji tat-trasport, il-kurjers u l-kumpaniji fi-qasam tal-kummerċ onlajn). B’rikonoxximent ta’ dan, ħafna kumpaniji introduċew firxa ta’ inizjattivi kontra t-traffikar illegali tal-organiżmi selvaġġi bħal skemi ta’ ċertifikazzjoni u ta’ responsabbiltà soċjali korporattiva (CSR) f’livell ta’ kumpanija individwali jew kumpaniji multipli (19). |
3. Sommarju tal-Proposta tal-Kummissjoni
3.1. |
Il-Pjan ta’ Azzjoni għandu l-għan li jtejjeb il-kooperazzjoni bejn l-atturi kollha kkonċernati, jagħmel użu aktar effettiv tal-għodod u l-politiki eżistenti, u jsaħħaħ is-sinerġiji bejniethom. Ir-riżultati ta’ dan il-pjan ta’ azzjoni ser jiġu vvalutati fl-2020. |
3.2. |
Il-miżuri huma bbażati fuq tliet prijoritajiet:
|
3.3. |
Sabiex jiġu indirizzati l-kawżi tat-traffikar tal-organiżmi selvaġġi, l-UE ser tiffoka fuq erba’ oqsma:
|
4. Kummenti ġenerali
4.1. |
Il-KESE jilqa’ b’sodisfazzjon il-proposta tal-Kummissjoni u huwa tal-fehma li l-Pjan ta’ Azzjoni tal-UE kontra t-traffikar ta’ organiżmi selvaġġi huwa għodda essenzjali biex jiġi indirizzat dan il-fenomenu perikoluż u vast. L-analiżi tan-nuqqas min-naħa tal-istrutturi eżistenti li jiġġieldu ż-żieda fit-traffikar tal-organiżmi selvaġġi fid-dokument ta’ ħidma tal-persunal tal-Kummissjoni li jakkumpanja l-Proposta għandha tgħin biex tinforma kwalunkwe valutazzjoni u azzjoni addizzjonali fil-ġejjieni (20). |
4.2. |
Il-Kumitat bi pjaċir jinnota l-inklużjoni ta’ għadd ta’ proposti ewlenin stabbiliti fl-Opinjoni preċedenti tiegħu dwar it-traffikar ta’ organiżmi salvaġġi (21). |
4.3. |
Il-KESE huwa tal-fehma li l-approċċ olistiku huwa aspett kruċjali tal-Pjan ta’ Azzjoni tal-UE minħabba d-dimensjonijiet kumplessi multidimensjonali tat-traffikar tal-organiżmi salvaġġi u l-impatt dirett u indirett tiegħu. |
4.4. |
Il-KESE jaqbel li l-punt tat-tluq tal-istrateġija ser ikun ir-rispett, it-tisħiħ u l-koordinazzjoni tal-ftehimiet internazzjonali (b’mod partikolari CITES), tal-liġijiet, ir-regolamenti, il-politiki u l-istrumenti ta’ infurzar li jeżistu diġà, fil-forma ta’ integrazzjoni iżjed mill-qrib tas-setturi rilevanti kollha – il-ħarsien ambjentali, il-kontroll tad-dwana, il-qrati, l-interessi tan-negozju, il-ġlieda kontra l-kriminalità organizzata, eċċ. – u kooperazzjoni iżjed effettiva bejn l-awtoritajiet fil-pajjiżi ta’ provenjenza, tranżitu u destinazzjoni tal-organiżmi selvaġġi. |
4.5. |
Il-Kumitat huwa tal-fehma li l-UE mhux ser tkun tista’ tiġġieled b’mod effettiv kontra l-kriminalità organizzata marbuta mal-organiżmi selvaġġi jekk ma jintlaħqux ċerti għanijiet (imsemmija fl-Anness għall-proposta):
|
4.6. |
Il-proposta għall-ħolqien ta’ alleanza dinjija kontra t-traffikar tal-organiżmi selvaġġi sabiex jiġi stabbilit djalogu strutturat u kooperazzjoni mal-pajjiżi ta’ sors, ta’ tranżitu u ta’ konsum, inklużi l-gvernijiet nazzjonali, il-komunitajiet lokali, is-soċjetà ċivili u s-settur privat, ser tappoġġja l-għanijiet tal-Pjan. |
4.7. |
Il-KESE jidentifika azzjonijiet prijoritarji differenti għal-livelli differenti tal-katina tal-provvista fit-traffikar.
|
4.8. |
Il-KESE jaqbel li jinħtieġu aktar fondi u aktar inizjattivi mmirati fil-ġlieda kontra t-traffikar illegali ta’ organiżmi salvaġġi fil-pajjiżi ta’ provenjenza. Pereżempju, il-KESE jappoġġja l-proposta tal-Kummissjoni li l-ġlieda kontra t-traffikar ta’ organiżmi selvaġġi ssir prerekwiżit għall-ftehimiet kummerċjali bilaterali u multilaterali kollha tal-UE. |
4.9. |
Il-KESE huwa tal-fehma li r-rwol tas-soċjetà ċivili fl-indirizzar u l-prevenżjoni tat-traffikar ta’ organiżmi selvaġġi huwa fundamentali kemm fil-pajjiżi ta’ provenjenza kif ukoll dawk ta’ destinazzjoni. B’mod partikolari, il-Kumitat jemmen li hu importanti s-sehem attiv u konxju tal-konsumaturi u tas-settur privat sabiex jinkoraġġixxu sorsi sostenibbli ta’ prodotti tal-organiżmi selvaġġi, bl-appoġġ tal-introduzzjoni ta’ sistema ta’ tikkettar u traċċabbiltà. |
4.10. |
Il-KESE jemmen li l-popolazzjonijiet rurali għandhom jiġu involuti fi strateġiji ta’ żvilupp effettivi sabiex ikunu jistgħu jibbenefikaw mill-protezzjoni tal-organiżmi selvaġġi (pereżempju l-ekoturiżmu). It-tranżizzjoni għal ekonomija sostenibbli fil-pajjiżi terzi għandha titkejjel u tiġi evalwata l-ewwel u qabel kollox mil-lat tal-kwalità tal-ħajja u l-opportunitajiet ta’ impjieg, u ser ikollha tikkonforma mal-Aġenda 2030 għall-Iżvilupp Sostenibbli tan-NU kif ukoll mal-Għanijiet relatati ta’ Żvilupp Sostenibbli (SDGs). |
4.11. |
Il-KESE jenfasizza l-bżonn li l-popolazzjonijiet tal-pajjiżi terzi involuti fl-iżjed stadji bikrin tat-traffikar ta’ organiżmi selvaġġi jiġu pprovduti b’sorsi sostenibbli alternattivi ta’ dħul u impjieg. Dan jista’ jieħu l-forma tal-ekoturiżmu jew tabilħaqq billi jsir l-aqwa użu mill-opportunitajiet tad-dħul mis-servizzi tal-ekosistema tal-ħabitats u l-organiżmi selvaġġi lokali. |
4.12. |
Il-KESE jenfasizza l-ħtieġa għal involviment mas-settur tan-negozju biex jiġu ffaċilitati diskussjoni u fluss ta’ informazzjoni miż-żewġ naħat sabiex jiġi żgurat li s-settur tan-negozju jaqdi rwol pożittiv fil-ġlieda kontra t-traffikar ta’ organiżmi selvaġġi. Kwalunkwe strateġija biex tindirizza dawn il-problemi ma tistax isseħħ f’vakwu li jeskludi n-negozju privat. |
5. Kummenti speċifiċi
5.1. |
Il-KESE jipproponi li ssir kampanja ta’ sensibilizzazzjoni wiesgħa fil-livell Ewropew sabiex jiġu involuti l-konsumaturi u s-settur privat biex jitnaqqsu l-provvista u d-domanda tal-prodotti illegali tal-organiżmi selvaġġi. Minħabba d-definizzjoni wiesgħa tat-terminu “traffikar ta’ organiżmi selvaġġi”, il-Kumitat jirrakkomanda li l-fokus ikun il-pjanti u l-annimali nonikoniċi (22) u l-prodotti derivati (23) wkoll. |
5.2. |
Il-KESE jtenni r-rieda tiegħu li jappoġġja u jipparteċipa f’inizjattivi li l-UE tixtieq tieħu, pereżempju abbażi tan-netwerk UE-Afrika tal-atturi ekonomiċi u soċjali stabbilit fi ħdan il-Kumitat. Il-KESE jilqa’ b’sodisfazzjon kwalunkwe inizjattiva mill-Kummissjoni biex jiġi stabbilit forum għad-diskussjoni dwar l-implimentazzjoni tal-pjan ta’ azzjoni u huwa miftuħ ukoll għall-għażla li jospita avveniment dwar dan. |
5.3. |
Kif jingħad fid-Dikjarazzjoni ta’ Londra, il-KESE jitlob għal miżuri speċifiċi biex is-settur privat jieħu azzjoni b’mod responsabbli u għal sistema ta’ tikkettar u ta’ traċċabbiltà li tiggarantixxi li l-kummerċ tal-organiżmi selvaġġi jkun legali u sostenibbli, kemm mil-lat ekonomiku kif ukoll ambjentali u mill-perspettiva tal-komunitajiet lokali. Għal dan il-għan jistgħu jintużaw bħala referenza s-sistemi fis-seħħ bħalissa għall-kummerċ tal-kavjar u tal-injam tropikali (24). Is-sistema għall-ġestjoni tal-informazzjoni żooloġika (ZIMS – Zoological Information Management System) użata mill-EAZA) tista’ jkun referenza tajba għal sistema komuni ta’ traċċabilità għall-annimali ħajjin. |
5.4. |
Il-Kumitat jiddeplora l-assenza fil-proposta tal-Kummissjoni ta’ kwalunkwe referenza għat-theddida li jirrappreżenta t-traffikar tal-organiżmi selvaġġi għas-saħħa pubblika u għall-ispeċijiet indiġeni tal-annimali u l-pjanti. Din il-kwistjoni hija rilevanti ħafna u għaldaqstant il-KESE jħeġġeġ li din tiġi inkluża fil-Pjan ta’ Azzjoni tal-UE. Il-Kumitat jenfasizza li s-sistemi msemmijin hawn fuq ta’ tikkettar u ta’ traċċabbiltà, flimkien ma’ mekkaniżmu adegwat ta’ kontroll veterinarju u tas-saħħa tal-pjanti, jistgħu jikkontribwixxu għall-ġlieda kontra l-bidu u t-tixrid ta’ mard fuq skala dinjija. Għandha tissaħħaħ il-kooperazzjoni maċ-Ċentru Ewropew għall-Prevenzjoni u l-Kontroll tal-Mard (ECDC). |
5.5. |
Il-fruntiera l-ġdida tal-kummerċ illegali tal-ispeċijiet selvaġġi huwa l-kummerċ elettroniku. Il-KESE jinnota li jeżistu bosta għodod elettroniċi illegali bħalma huma l-użu ħażin ta’ siti web kummerċjali u forums tal-midja soċjali jew pjattaformi onlajn speċjalizzati li jkunu ristretti u stabbiliti fid-deep-web. Rigward l-ewwel każ, il-Kumitat jenfasizza għadd ta’ prattiki tajbin li l-Kummissjoni Ewropea għandha tikkunsidra, bħall-ftehim iffirmat f’Ġunju 2013 bejn il-Korp Taljan tal-Forestrija u ż-żewġ portali ewlenin tar-reklami onlajn “eBay annunci” u “Subito.it” (25); jinħtieġ aktar tagħrif għall-benefiċċju tal-konsumaturi, u l-offerti meqjusin suspettużi jistgħu jitneħħew malajr. Il-ftehim jippermetti wkoll li jiġu ffiltrati r-reklami, u b’hekk jiġu awtorizzati biss dawk li jiggarantixxu t-traċċabbiltà tal-oġġett għall-bejgħ. Fir-rigward tad-deep-web, il-KESE jipproponi l-ħolqien ta’ task force speċifika bl-appoġġ ta’ esperti taċ-ċiberkriminalità. |
5.6. |
Il-KESE jenfasizza l-importanza tas-17-il laqgħa tal-Konferenza tal-Partijiet (CoP17) għal CITES, li ser issir f’Settembru/Ottubru 2016 fl-Afrika t’Isfel. L-UE għandha 28 vot u għandha tirrifletti l-pożizzjonijiet b’saħħithom meħuda minn dan il-Pjan ta’ Azzjoni. Xi wħud mill-proposti li diġà tressqu mill-Kummissjoni ser jgħinu fil-ġlieda kontra t-traffikar ta’ organiżmi selvaġġi, fosthom iż-żieda ta’ għadd akbar ta’ speċijiet relevanti għal-lista ta’ CITES. Il-KESE jitlob lill-Kummissjoni Ewropea biex tappoġġja t-talba għall-għeluq tas-swieq domestiċi għall-avorju bħala kontribut kruċjali għall-prevenzjoni tat-theddida tal-estinzjoni tal-iljunfanti Afrikani. |
Brussell, l-14 ta’ Lulju 2016.
Il-President tal-Kumitat Ekonomiku u Soċjali Ewropew
Georges DASSIS
(1) Id-definizzjoni tat-traffikar ta’ organiżmi selvaġġi tkopri l-kummerċ illegali internazzjonali u mhux internazzjonali fl-annimali, il-pjanti u l-prodotti derivati selvaġġi, u reati marbutin mill-qrib bħalma huma l-kaċċa illegali.
(2) Bejn l-2007 u l-2013, il-kaċċa illegali żdiedet b’tali mod li xejnet ir-ripopolazzjoni li twettqet matul l-aħħar tliet deċennji, u rrrappreżentat theddida reali għall-konservazzjoni tal-bijodiversità u għall-iżvilupp sostenibbli. Pereżempju, kull sena jinqatlu bejn 20 000 u 25 000 iljunfant fl-Afrika għall-avorju, u sa 100 000 minnhom sfaw maqtula bejn l-2010 u l-2012 biss.
(3) It-traffikar qed jiżdied, xprunat minn domanda dejjem tikber għall-prodotti tal-organiżmi selvaġġi bħall-avorju, il-qrun tar-rinoċeronti u l-għadam tat-tigri, speċjalment f’xi pajjiżi Asjatiċi (pereżempju, iċ-Ċina u l-Vjetnam).
(4) L-impatt tat-traffikar tal-organiżmi selvaġġi fuq in-natura jista’ jiġi amplifikat minn fatturi oħra bħalma huma l-konsum globalizzat, l-użu mhux sostenibbli tal-art, it-tibdil fil-klima, l-użu eċċessiv tal-pjanti mediċinali u t-turiżmu intensiv, li jinvolvi l-kaċċa.
(5) Il-qtugħ illegali tas-siġar jammonta għal 30 % tal-kummerċ dinji tal-injam u jikkontribwixxi għal iktar minn 50 % tad-deforestazzjoni fl-Afrika Ċentrali, ir-Reġjun tal-Amażonja u x-Xlokk tal-Asja, biex b’hekk qed iċaħħad lill-popolazzjonijiet indiġeni minn opportunitajiet importanti ta’ żvilupp sostenibbli.
(6) Minħabba l-kaċċa illegali tar-rinoċeronti, ir-Rinoċerente Iswed tal-Punent ġie ddikjarat estint mill-Unjoni Internazzjonali għall-Konservazzjoni tan-Natura u tar-Riżorsi Naturali (IUCN) fl-2011.
(7) Huwa kkalkulat li s-sajd illegali jilħaq volum ta’ 19 % tal-valur iddikjarat tal-qbid.
(8) UNODC, World Wildlife Crime Report: Trafficking in protected species, 2016.
(9) Il-Kummissjoni Ewropea, Komunikazzjoni dwar Pjan ta’ Azzjoni għat-tisħiħ tal-ġlieda kontra l-finanzjament tat-terroriżmu, COM(2016) 50 final.
(10) ĠU C 424, 26.11.2014, p. 52.
(11) Rapport tad-WWF – http://awsassets.panda.org/downloads/wwffightingillicitwildlifetrafficking_french_lr.pdf
(12) L-EAZA hija l-organizzazzjoni ewlenija f’dan is-settur, b’377 istituzzjoni membru fi 43 pajjiż madwar l-Ewropa u l-Lvant Nofsani.
(13) Riżoluzzjoni, adottata fl-2013 mill-Kummissjoni tan-NU għall-Prevenzjoni tal-Kriminalità u l-Ġustizzja Penali u approvata mill-Kunsill Ekonomiku u Soċjali tan-NU, identifikat it-traffikar ta’ organiżmi selvaġġi bħala forma ta’ “kriminalità organizzata serja” kommessa mill-istess tipi ta’ gruppi kriminali organizzati globali, bħal dawk responsabbli għal attivitajiet bħat-traffikar tal-bnedmin, id-drogi u l-armi.
(14) Riżoluzzjoni 69/314 tan-NU, “Il-ġlieda kontra t-traffikar illeċitu tal-organiżmi selvaġġi”, 30 ta’ Lulju 2015 (mhux disponibbli bil-Malti).
(15) Id-Dikjarazzjoni ta’ Londra kienet iffirmata mill-Kapijiet ta’ Stat, il-Ministri u r-rappreżentanti minn 46 pajjiż fil-Konferenza dwar il-Kummerċ Illegali tal-Organiżmi Selvaġġi fl-2014. Id-dikjarazzjoni tistabbilixxi standards ġodda għall-ġlieda kontra t-traffikar ta’ organiżmi selvaġġi, fosthom il-modifika tal-leġislazzjoni fis-seħħ biex il-kaċċa illegali u t-traffikar tal-organiżmi selvaġġi jiddaħħlu fost ir-“reati gravi”, il-projbizzjoni tal-użu tal-ispeċijiet mhedda bl-estinzjoni, it-tisħiħ tal-kooperazzjoni transkonfinali u l-koordinazzjoni tan-netwerks tal-ġlieda kontra t-traffikar tal-organiżmi selvaġġi.
(16) Riżoluzzjoni tal-Parlament Ewropew tal-15 ta’ Jannar 2014 dwar kriminalità marbuta mal-organiżmi selvaġġi (2013/2747(RSP)).
(17) Komunikazzjoni tal-Kummissjoni lill-Kunsill u lill-Parlament Ewropew dwar l-Approċċ tal-UE kontra t-traffikar ta’ Organiżmi Salvaġġi – COM(2014) 64 final.
(18) Ara n-nota ta’ qiegħ il-paġna 10.
(19) Ricardo Energy & Environment “Strengthening cooperation with business sectors against illegal trade in wildlife” (It-tisħiħ tal-kooperazzjoni ma’ setturi tan-negozju kontra l-kummerċ illegali tal-organiżmi selvaġġi”). Rapport għad-DĠ Ambjent tal-Kummissjoni Ewropea, 2015.
(20) Il-Kummissjoni Ewropea, Analysis and Evidence in support of the EU Action Plan against Wildlife Trafficking, Commission Staff Working Document, SWD (2016) 38 final (mhux disponibbli bil-Malti).
(21) Ara n-nota ta’ qiegħ il-paġna 10.
(22) CITES għandha tliet appendiċijiet, li jelenkaw kategoriji ta’ speċijiet skont il-livell ta’ ħarsien meħtieġ, jiġifieri skont kemm huma mhedda mill-kummerċ internazzjonali. L-appendiċijiet fihom madwar 5 600 speċi ta’ annimali u 30 000 speċi ta’ pjanti, li jipproteġuhom kontra l-isfruttament żejjed permezz tal-kummerċ internazzjonali. Dan ifisser li speċijiet inqas magħrufa u inqas ikoniċi bħall-pangolini – waħda mill-iżjed speċijiet traffikati – huma mhedda wkoll mill-kummerċ illegali.
(23) Il-kummerċ tal-organiżmi selvaġġi jista’ jinvolvi annimali u pjanti ħajjin iżda wkoll firxa ta’ prodotti derivati minħabba l-bosta użi potenzjali tagħhom (ingredjenti għal mediċina tradizzjonali, ikel, fjuwil, għalf, materjali tal-bini, ħwejjeġ u ornamenti, eċċ.). http://www.traffic.org/trade/
(24) Fl-ambitu ta’ CITES, teżisti sistema ta’ tikkettar universali għall-identifikazzjoni tal-kavjar, li l-importazzjoni tiegħu hija permessa biss wara li jkunu nxtraw awtorizzazzjonijiet apposta mill-awtoritajiet kompetenti (www.cites.org/common/resource/reg_caviar.pdf). Għal dak li għandu x’jaqsam mas-settur tal-forestrija, il-leġislazzjoni tal-UE ssostni l-għan li jiġi skoraġġut it-traffikar ta’ injam tropikali billi tappoġġja l-introduzzjoni ta’ sistemi nazzjonali ta’ traċċabbiltà.
(25) “eBay annunci” u “Subito.it” jimmaniġġjaw 90 % tar-reklami tal-kummerċ elettroniku Taljan http://www.corpoforestale.it/flex/cm/pages/ServeBLOB.php/L/IT/IDPagina/7388.