21.2.2012   

MT

Il-Ġurnal Uffiċjali tal-Unjoni Ewropea

CE 50/214

—

wara li kkunsidra l-proposta tal-Kummissjoni lill-Parlament u lill-Kunsill (COM(2009)0501),

—

wara li kkunsidra l-Artikolu 251(2) u l-Artikolu 95 tat-Trattat KE, skont liema artikoli l-Kummissjoni ppreżentat il-proposta lill-Parlament (C7-0169/2009),

—

wara li kkunsidra l-Komunikazzjoni mill-Kummissjoni lill-Parlament u lill-Kunsill bit-titolu “Konsegwenzi tad-dħul fis-seħħ tat-Trattat ta’ Lisbona fuq il-proċeduri interistituzzjonali ta’ teħid ta’ deċiżjonijiet li għaddejjin bħalissa” (COM(2009)0665),

—

wara li kkunsidra l-Artikolu 294(3) u l-Artikolu 114 tat-Trattat dwar il-Funzjonament tal-Unjoni Ewropea,

—

wara li kkunsidra l-opinjoni tal-Bank Ċentrali Ewropew tat-8 ta’ Jannar 2010 (1),

—

wara li kkunsidra l-opinjoni tal-Kumitat Ekonomiku u Soċjali Ewropew tat-22 ta’ Jannar 2010 (2),

—

wara li kkunsidra l-impenn meħud mir-rappreżentant tal-Kunsill b'ittra tal-15 ta’ Settembru 2010 li tiġi approvata l-posizzjoni tal-Parlament, skont l-Artikolu 294(4) tat-Trattat dwar il-Funzjonament tal-Unjoni Ewropea,

—

wara li kkunsidra l-Artikolu 55 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Ekonomiċi u Monetarji u l-opinjonijiet tal-Kumitat għall-Affarijiet Legali, il-Kumitat għall-Baġits u l-Kumitat għall-Affarijiet Kostituzzjonali (A7–0166/2010),

1.

Jadotta l-pożizzjoni fl-ewwel qari kif stabbilita hawn taħt (3);

2.

Iqis li l-ammont referenzjali indikat fil-proposta leġiżlattiva huwa kompatibbli mal-limitu massimu għas-subintestatura 1a tal-qafas finanzjarju multiannwali għall-2007-2012 (MFF), imma li l-marġini li jinqa fl-intestatura 1a għall-2011-2013 huwa limitat ħafna u l-finanzjament għall-attivitajiet il-ġodda ma għandux jipperikola l-finanzjament ta’ prijoritajiet oħrajn skont is-subintestatura 1a; itenni, għaldaqstant, it-talba tiegħu għal reviżjoni tal-MFF, akkumpanjata bi proposti konkreti li jaġġustawha u jirreveduha qabel l-għeluq tal-2010 billi jintużaw il-mekkaniżmi kollha disponibbli skont il-Ftehim Interistituzzjonali tas-17 ta’ Mejju 2006 (IIA) u, b'mod partikolari, dawk li jinsabu fil-punti 21 u 23 tiegħu, ħalli jkun żgurat il-finanzjament tal-Awtorità Ewropea ta’ Superviżjoni (Awtorità Bankarja Ewropea) mingħajr ma jkun ipperikolat il-finanzjament tal-prijoritajiet l-oħrajn, u jkun żgurat li jifdal marġini biżżejjed, skont is-subintestatura 1a;

3.

Jisħaq li d-dispożizzjonijiet tal-punt 47 tal-IIA għandhom jiġu applikati għat-twaqqif tal-Awtorità Ewropea ta’ Superviżjoni (Awtorità Bankarja Ewropea); jisħaq li, jekk kemm-il darba l-awtorita leġiżlattiva tiddeċidi favur it-twaqqif tal-Awtorità Ewropea ta’ Superviżjoni (Awtorità Bankarja Ewropea), il-Parlament jidħol f'negozjati mal-fergħa l-oħra tal-awtorita baġitarja bil-ħsieb li jintlaħaq ftehim fil-ħin dwar il-finanzjament tal-Awtorità b'konformita mad-dispożizzjonijiet rilevanti tal-IIA;

4.

Jieħu nota tal-istqarrijiet tal-Kummissjoni annessi ma’ din ir-risoluzzjoni;

5.

Jistieden lill-Kummissjoni terġa' tirreferi l-proposta lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

6.

Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill, lill-Kummissjoni u lill-parlamenti nazzjonali.