i.

issir ħidma mal-Parlament Ewropew biex tkun tista' ssir adozzjoni mgħaġġla tal-istrumenti l-ġodda meħtieġa biex jiġu implimentati d-dispożizzjonijiet baġitarji tat-Trattat ta’ Lisbona u jiġi rivedut l-MFF kurrenti sabiex isir provvediment għar-riżorzi żejda meħtieġa biex jiġu implimentati inizjattivi li ma kinux previsti meta ġie adottat l-MFF kurrenti;

ii.

ikun hemm konformità mal-Artikolu 312(3) TFUE li jirrikjedi li l-qafas finanzjarju għandu jistabbilixxi kwalunkwe dispożizzjoni meħtieġa għat-tħaddim tajjeb tal-proċedura annwali tal-baġit u mal-Artikolu 312(5) li jiddikjara li “tul il-proċedura kollha li twassal għall-adozzjoni tal-qafas finanzjarju, il-Parlament Ewropew, il-Kunsill u l-Kummissjoni għandhom jieħdu l-miżuri kollha meħtieġa sabiex jiffaċilitaw din l-adozzjoni”;

iii.

ikun hemm konformità mal-Artikolu 311 TFUE li jirrikjedi li l-Unjoni tipprovdi għaliha nnifisha l-mezzi meħtieġa sabiex tikseb l-għanijiet tagħha u twettaq il-politiki tagħha, filwaqt li jitqiesu l-oqsma ta’ azzjoni ġodda mogħtija bit-Trattat ta’ Lisbona, inkluż fl-oqsma ta’ azzjoni esterna, l-isport, l-ispazju, it-tibdil fil-klima, l-enerġija, it-turiżmu u l-protezzjoni ċivili;

iv.

jinsiltu l-konklużjonijiet neċessarji kollha mill-fatt li anke qabel iż-żieda ta’ dawn il-bżonnijiet il-ġodda relatati mat-Trattat ta’ Lisbona, matul dawn l-aħħar erba' snin tal-MFF kurrenti, l-uniku mod kif seta' jsir ftehim dwar il-baġits annwali kien billi jiġu utilizzati l-marġni eżistenti jew billi jsir rikors għall-istrumenti previsti mill-IIA kurrenti biex jiġu ffinanzjati prijoritajiet tal-UE bħalma huwa l-proġett Galileo, il-faċilità għall-ikel jew il-Pjan ta’ Rkupru Ewropew, u l-fatt li huwa stmat li l-marġni li jibqa' taħt il-limiti massimi tal-qafas finanzjarju kurrenti huma negliġibbli għall-bqija tal-perjodu;

v.

ikun hemm konformità mal-punt 4 tal-IIA kurrenti li jiddikjara li “jekk isseħħ reviżjoni ta’ Trattat b'implikazzjonijiet baġitarji matul il-qafas finanzjarju multiannwali għall-perjodu 2007-2013 (minn issa 'l quddiem imsejjaħ ‘il-qafas finanzjarju’), l-aġġustamenti meħtieġa għandhom isiru skont il-ħtieġa”;

vi.

jirrikonoxxi li l-klima ekonomika attwali, taf twassal lill-awtorità baġitarja biex tagħmel xi sforzi favur il-prijoritizzazzjoni mill-ġdid fil-baġit billi jiġi żgurat il-finanzjament xieraq tal-prijoritajiet, iżda, filwaqt li wieħed iżomm f'moħħu l-valur miżjud Ewropew tal-baġit tal-UE, minħabba li huwa espressjoni ta’ solidarjetà u effiċjenza minħabba li jiġbor flimkien riżorsi finanzjarji li nkella jixxerrdu fil-livelli nazzjonali, reġjonali jew lokali; jenfasizza wkoll li parti kbira ħafna mill-infiq tal-baġit tal-UE hija dedikata biex tappoġġa l-investimenti fit-tul neċessarji sabiex jiġi stimulat it-tkabbir ekonomiku tal-UE;

vii.

jiġi rikonoxxut li dawn il-bżonnijiet il-ġodda ma jistgħux jiġu ssodisfati permezz tal-użu mill-ġdid jew il-prijoritizzazzjoni mill-ġdid u li hija meħtieġa reviżjoni tal-MFF u tal-mekkaniżmi ta’ flessibilità inklużi fl-IIA, kuntrarjament għall-pożizzjoni tal-Kunsill kif stipulata fil-konklużjonijiet tiegħu tas-16 ta’ Marzu 2010 dwar il-linji gwida baġitarji għall-2011 u affermata mill-ġdid mill-President fil-kariga fid-dikjarazzjonijiet tiegħu matul id-dibattitu tal-15 ta’ Ġunju 2010 dwar il-mistoqsija orali B7-0310/2010 O-0074/2010; barra minn hekk ifakkar li l-bżonnijiet il-ġodda li jirriżultaw mid-dħul fis-seħħ tat-Trattat ta’ Lisbona loġikament għandhom jinvolvu ffrankar fil-livell nazzjonali u f'dak reġjonali;

viii.

ikun hemm reazzjoni għad-dikjarazzjoni 3 tal-IIA kurrenti li titlob reviżjoni sħiħa u b'firxa wiesgħa sal-2008/2009 li tkopri l-aspetti kollha tar-riżorsi u l-infiq tal-UE, u ma jibqgħux isiru tentattivi biex l-isfidi/il-kompetenzi mogħtija lill-UE bit-Trattat il-ġdid jiġu indirizzati permezz ta’ reviżjoni limitata ħafna tal-funzjonament tal-IIA kurrenti mingħajr ebda dimensjoni politika;

ix.

jiġi rikonoxxut li l-pożizzjoni tal-Kunsill u tal-Kummissjoni fir-rigward tar-reviżjoni tal-MFF s'issa hija kontradittorja mal-fatt li qed joħorġu b'mod kostanti bi proposti ġodda li jitolbu riżorsi ġodda bħalma huma l-“Ftehim dwar il-Banana” u l-ITER;

x.

jesprimi t-tħassib tiegħu fir-rigward tat-tendenza żviluppata mill-Istati Membri fir-rigward tat-tnedija ta’ politiki tal-UE ffinanzjati barra mill-baġit tal-UE; jitkejjel ir-riskju ta’ nuqqas ta’ leġittimità u kontroll demokratiku fuq dawk il-politiki kif ukoll ksur tal-prinċipju tal-universalità tal-baġit tal-UE u l-impatt negattiv li din it-tendenza taf timplika fir-rigward tal-prinċipju ta’ solidarjetà;

xi.

jittieħdu l-passi neċessarji kollha għal reviżjoni tal-MFF sabiex jiġu pprovduti r-riżorsi neċessarji żejda ħalli jiġu implimentati s-Servizz Ewropew ta’ Azzjoni Esterna u prijoritajiet ta’ politika oħrajn relatati mat-Trattat ta’ Lisbona, kif ukoll inizjattivi oħrajn, b'mod partikulari taħt l-Intestatura 1a “Kompetittività, Tkabbir u Impjiegi” u l-Intestatura 4 “Relazzjonijiet Esterni”, li jipprovdu valur miżjud tal-UE u jippermettu li l-UE tissodisfa l-impenji tagħha u l-aspettattivi taċ-ċittadini tagħha;

xii.

tittieħed nota tal-fatt li mingħajr din ir-reviżjoni l-Parlament mhu se jkun jista' jadotta l-ebda proposta għal aġenziji ġodda u l-ebda inizjattiva ulterjuri tal-Kunsill sakemm ma jkunux akkumpanjati bi proposti għal riżorsi ġodda;

xiii.

jiġu segwiti sforzi biex tiġi pprovduta aktar flessibilità kif indikat fir-rapport tal-Kummissjoni msemmi hawn fuq dwar il-funzjonament tal-Ftehim Interistituzzjonali dwar id-dixxiplina baġitarja u l-amministrazzjoni finanzjarja tajba;

xiv.

tiġi rikonoxxuta l-importanza tal-flessibilità biex jinħolqu riżervi u marġni li jippermettu li l-UE tirreaġixxi għall-bżonnijiet attwali u futuri, kemm fi ħdan il-qafas finanzjarju, fl-intestuturi u bejniethom kif ukoll fin-negozjati dwar l-istabbiliment u t-twaqqif tiegħu;

xv.

tittieħed nota tal-fatt li l-Parlament insista dwar livell iktar b'saħħtu u ogħla ta’ flessibilità u l-ħolqien ta’ riżervi suffiċjenti għal kull kategorija, kif ukoll ammonti ogħla disponibbli permezz tal-Istrument ta’ Flessibilità u dwar simplifikazzjoni tal-proċedura biex ir-riżorsi jiġu ttrasferiti bejn l-intestaturi varji tal-MFF;

xvi.

tittieħed nota li l-Parlament mhu lest jidħol fl-ebda negozjati dwar kwlaunkwe proposta li mill-inqas ma tkunx tinkludi l-levell attwali ta’ flessibilità fuq ir-reviżjonijiet tal-qafas finanzjarju ta’ massimu ta’ 0.03 % tad-DGN tal-UE (imsemmi fl-Artikolu 8(3) tal-proposta għal Regolament MFF);

xvii.

ikun hemm fehim li approċċ purament tekniku fir-rigward tal-implimentazzjoni tat-Trattat ta’ Lisbona fil-qasam baġitarju huwa insuffiċjenti u li, sabiex il-Parlament ikun jista' jagħti l-kunsens tiegħu, id-dħul bla dewmien f'negozjati politiċi u reali f'livell għoli kif xieraq, u jekk hemm bżonn fl-ogħla livell, huwa indispensabbli;

xviii.

minħabba l-konsegwenzi baġitarji b'firxa wiesgħa possibbli tiegħu, għandu jkun hemm aktar riflessjoni fir-rigward tal-Mekkaniżmu Ewropew ta’ Stabbilizzazzjoni Finanzjarja qabel l-adozzjoni tar-regolament MFF; jiġi aċċettat li ż-żewġ fergħat tal-awtorità baġitarja jkunu involuti fid-deċiżjonijiet rigward l-impatt li dan il-mekkaniżmu jaf ikollu fuq il-baġit tal-UE; jintlaħaq ftehim li kwalunkwe ħtieġa baġitarja marbuta ma’ dan il-mekkaniżmu għandha tkun iffinanzjata permezz ta’ reviżjoni ad-hoc tal-MFF sabiex jiġi żgurat li jiġi garantit involviment suffiċjenti u fil-ħin tal-awtorità baġitarja;