2.9.2011   

MT

Il-Ġurnal Uffiċjali tal-Unjoni Ewropea

C 259/62

—

jenfasizza li waħda mill-iktar prijoritajiet ta’ politika importanti tal-Kumitat tar-Reġjuni hija li jiġi żgurat is-suċċess tal-proċess tat-tkabbir tal-UE;

—

iqis li l-liberalizzazzjoni tal-visa għal xi pajjiżi tal-Balkani tal-Punent bħala eżempju tajjeb ta’ dak kollu li jista’ jinkiseb meta kundizzjonijiet rigorużi jiġu abbinati mal-għoti ta’ vantaġġi speċifiċi;

—

ma għalaqx għajnejh għall-fatt li fil-biċċa l-kbira tal-pajjiżi għad hemm firxa sħiħa ta’ sfidi, b’soluzzjonijiet adatti li parzjalment jieħdu ż-żmien u jiffaċċjaw il-problemi; iqis li hemm bżonn ta’ riforma b’mod speċjali fil-bini tan-nazzjon, l-istat tad-dritt u t-tisħiħ tal-kapaċitajiet amministrattivi fil-livelli kollha, b’mod partikolari fil-livell reġjonali u lokali, fit-titjib tat-tmexxija tal-gvern, fir-riforma tal-ġustizzja u fil-ġlieda kontra l-korruzzjoni u l-kriminalità organizzata f’kull livell ta’ gvern;

—

jenfasizza li l-pajjiżi tal-adeżjoni għandhom ikomplu jiġu appoġġjati bis-saħħa tas-sussidji mill-istrument tal-preadeżjoni (IPA) u s-self mill-Bank Ewropew tal-Investiment u l-istituzzjonijiet finanzjarji internazzjonali oħra;

—

jinsab konvint li mingħajr rappreżentanti politiċi u amministrattivi mħejjija u mħarrġa sew fil-livell lokali u reġjonali l-isforzi tat-tkabbir ma jistgħux jitwettqu b’suċċess.

Relatur

Is-Sur Franz SCHAUSBERGER (AT/PPE), Delegat tal-Land ta’ Salzburg għall-Kumitat tar-Reġjuni

Dokument ta’ referenza

Komunikazzjoni mill-Kummissjoni lill-Parlament Ewropew u lill-Kunsill – L-Istrateġija tat-Tkabbir u l-Isfidi Ewlenin 2010-2011

COM(2010) 660 finali

1.

jenfasizza li waħda mill-iktar prijoritajiet ta’ politika importanti tal-Kumitat tar-Reġjuni hija li jiġi żgurat is-suċċess tal-proċess tat-tkabbir tal-UE;

2.

jenfasizza li l-awtoritajiet lokali u reġjonali rappreżentati fil-KtR għandhom rwol kruċjali fid-djalogu mal-pajjiżi kandidati u l-pajjiżi kandidati potenzjali, li kollha għandhom forom differenti ħafna ta’ deċentralizzazzjoni determinati mill-istorja u l-kultura differenti tagħhom;

3.

jagħraf il-bżonn li tinħoloq politika deċentralizzata tal-informazzjoni u l-komunikazzjoni fil-livell reġjonali u lokali għall-proċess tat-tkabbir u jiddikjara li huwa lest jappoġġja lill-awtoritajiet reġjonali u lokali f’dan il-qasam, biex jitħejjew għar-responsabbiltajiet futuri tagħhom u biex tiġi mħeġġa l-kooperazzjoni mal-kontropartijiet Ewropej tagħhom;

4.

bl-istrateġija tiegħu tar-relazzjonijiet esterni, jippromovi d-djalogu politiku u l-kooperazzjoni ekonomika u kulturali bejn l-awtoritajiet lokali u reġjonali tal-pajjiżi kandidati, tal-pajjiżi kandidati potenzjali u dawk tal-UE;

5.

qed jaħdem b’mod intensiv biex, permezz ta’ kuntatti interistituzzjonali diretti u l-organizzazzjoni ta’ avvenimenti pubbliċi, konferenzi speċjalizzati u gruppi ta’ ħidma, itejjeb il-kapaċitajiet tal-awtoritajiet lokali u reġjonali fl-oqsma tal-leġislazzjoni, tal-finanzi u l-amministrazzjoni;

6.

jirriferi, bi gratitudini, għall-fehmiet u l-informazzjoni tal-Kungress ta’ Awtoritajiet Lokali u Reġjonali tal-Kunsill tal-Ewropa u għall-kontributi importanti tad-delegazzjonijiet tal-pajjiżi li jinsabu fil-proċess tat-tkabbir, l-assoċjazzjonijiet tal-muniċipalitajiet tagħhom u l-NGOs varji;

7.

jilqa’ l-fatt li – kif tindika l-Komunikazzjoni tal-Kummissjoni – il-proċess ta’ tkabbir tal-UE sab impetu ġdid mill-adozzjoni tal-aħħar rapporti ta’ progress, minkejja ħafna sfidi oħra, inkluża l-kriżi finanzjarja u ekonomika, u b’hekk id-dħul fis-seħħ tat-Trattat ta’ Lisbona ser jiżgura li tinżamm id-dinamika tal-proċess ta’ integrazzjoni Ewropea;

8.

jilqa’ l-fatt li, bil-progress li sar fin-negozjati tas-sħubija mal-Kroazja u n-negozjati li bdew f’Lulju 2010 mal-Islanda, is-sitt ċiklu ta’ tkabbir tal-UE issa jidher qrib;

9.

madankollu, jisħaq fuq il-bżonn li t-tħejjija għal kwalunkwe adeżjoni ġdida ssir billi jiġi żgurat li l-kundizzjonijiet jiġi sodisfati kif suppost;

10.

jinsab konvint li l-proċess tal-adeżjoni joffri opportunità unika għar-riforma politika u ekonomika fil-pajjiżi tat-tkabbir sabiex dawn jilħqu l-istandards Ewropej u jikkontribwixxi wkoll biex tiġi ffaċċjata l-kriżi finanzjarja u ekonomika u għall-implimentazzjoni tal-aġenda ta’ riforma 2020;

11.

josserva li l-pajjiżi tat-tkabbir, b’mod speċjali l-pajjiżi tal-Balkani tal-Punent, għandhom strutturi u tradizzjonijiet politiċi u amministrattivi ferm differenti – anke parzjalment fil-livell lokali u reġjonali – u juru diversità kbira fl-iżvilupp; dawn il-fatturi għandhom jiġu kkunsidrati fil-proċess tat-tkabbir;

12.

jipproponi li jittieħdu miżuri mmirati biex jissaħħu l-SMEs fil-livell lokali u reġjonali fil-pajjiżi tal-Balkani tal-Punent sabiex jinħolqu l-impjiegi u b’hekk jitnaqqsu l-inċentivi biex iż-żgħażagħ jemigraw, b’mod partikolari miż-żoni mbiegħda u sottożviluppati;

13.

iqis li l-liberalizzazzjoni tal-visa għal xi pajjiżi tal-Balkani tal-Punent bħala eżempju tajjeb ta’ dak kollu li jista’ jinkiseb meta kundizzjonijiet rigorużi jiġu abbinati mal-għoti ta’ vantaġġi speċifiċi;

14.

jilqa’ l-fatt li sa mill-aħħar rapport ta’ progress sar progress fil-qasam ta’ kunflitti bilaterali dejjiema, u seta’ jitnieda djalogu fejn il-pajjiżi tal-adeżjoni bdew jieħdu iktar responsabbiltà għall-kooperazzjoni reġjonali;

15.

madankollu, ma għalaqx għajnejh għall-fatt li fil-biċċa l-kbira tal-pajjiżi għad hemm firxa sħiħa ta’ sfidi, b’soluzzjonijiet adatti li parzjalment jieħdu ż-żmien u jiffaċċjaw il-problemi; iqis li hemm bżonn ta’ riforma b’mod speċjali fil-bini tan-nazzjon, l-istat tad-dritt u t-tisħiħ tal-kapaċitajiet amministrattivi fil-livelli kollha, b’mod partikolari fil-livell reġjonali u lokali, fit-titjib tat-tmexxija tal-gvern, fir-riforma tal-ġustizzja u fil-ġlieda kontra l-korruzzjoni u l-kriminalità organizzata f’kull livell ta’ gvern;

16.

jenfasizza li l-pajjiżi tal-adeżjoni għandhom ikomplu jiġu appoġġjati bis-saħħa tas-sussidji mill-istrument tal-preadeżjoni (IPA) u s-self mill-Bank Ewropew tal-Investiment u l-istituzzjonijiet finanzjarji internazzjonali oħra;

17.

jinnota li fil-maġġoranza tal-pajjiżi tal-Balkani tal-Punent u t-Turkija hemm bżonn li jittieħdu miżuri konkreti fil-ġlieda kontra kull tip ta’ diskriminazzjoni u favur it-tisħiħ tal-ħarsien tad-drittijiet tal-bniedem, b’mod partikolari d-drittijiet tan-nisa u t-tfal kif ukoll tar-Roma; rigward il-każ speċifiku tat-Turkija, il-Kumitat huwa tal-fehma li jeħtieġ li jiġu stabbiliti mill-ġdid id-drittijiet tal-bniedem taċ-Ċiprijotti, li jkun hemm moratorju dwar is-sistemazzjoni ta’ popolazzjonijiet li kellhom jiċċaqilqu minn pajjiżhom, li Famagusta tingħata lura lill-abitanti leġittimi tagħha, b’konformità mar-riżoluzzjonijiet tal-Kunsill tas-Sigurtà tan-NU, u li jiġi applikat il-Protokoll ta’ Ankara, li huwa kundizzjoni tal-UE;

18.

jinsab konvint li mingħajr rappreżentanti politiċi u amministrattivi mħejjija u mħarrġa sew fil-livell lokali u reġjonali l-isforzi tat-tkabbir ma jistgħux jitwettqu b’suċċess;

19.

iħeġġeġ lill-pajjiżi tal-adeżjoni fl-isforzi tagħhom għad-deċentralizzazzjoni u r-reġjonalizzazzjoni; dan jiffaċilita wkoll l-politika deċentralizzata tal-informazzjoni u tal-komunikazzjoni, kif ukoll id-djalogu ċivili u politiku bejn l-Unjoni Ewropea u ċ-ċittadini tal-pajjiżi tal-adeżjoni;

20.

josserva li hemm bżonn li jissaħħu l-kapaċitajiet tal-istituzzjonijiet lokali u reġjonali fil-qasam leġislattiv, finanzjarju u amministrattiv u li, fid-dawl tal-prinċipju tas-sussidjarjetà, jiġu trasferiti kemm jista’ jkun responsabbiltajiet lil-livell reġjonali u lokali u li jiġu żgurat il-finanzjament tagħhom;

21.

jilqa’ b’sodisfazzjon il-fatt li l-istrateġiji Ewropej għall-makroreġjuni jirrappreżentaw strument importanti sabiex jitħaffef il-proċess ta’ integrazzjoni anke permezz tat-tisħiħ tar-rwol tal-awtoritajiet reġjonali u lokali u, fl-Istrateġija tal-UE għar-reġjun tad-Danubju u l-Istrateġija futura tal-UE għall-makroreġjun Adrijatiku-Joniku, jara opportunitajiet ġodda għall-kooperazzjoni reġjonali, anke mal-pajjiżi tat-tkabbir;

22.

jinnota li sa mill-2000, l-Inizjattiva Adrijatika-Jonika stabbiliet l-għan li tiggarantixxi l-paċi, is-sigurtà, l-iżvilupp u l-kooperazzjoni fiż-żona UE-Balkani tal-Punent u li l-Kunsill Adrijatiku-Joniku ħa l-impenn li jappoġġja l-Istrateġija tal-UE għar-reġjun Adrijatiku-Joniku fi ħdan l-istituzzjonijiet Ewropej u bl-involviment tal-istituzzjonijiet nazzjonali, reġjonali u lokali;

23.

jitlob lill-Istati Membri rilevanti u lill-Kummissjoni Ewropea biex janalizzaw sa fejn jistgħu jinħolqu interkonnessjonijiet u sinerġiji bejn id-diversi strateġiji tal-UE għall-makroreġjuni;

24.

jitlob lill-Kummissjoni Ewropea teżamina kif tista’ tisfrutta l-potenzjal tar-Raggruppamenti Ewropej ta’ Kooperazzjoni Territorjali (REKT) eżistenti li jaħdmu fir-reġjun tal-Balkani tal-Punent u l-Baċir tal-Mediterran bil-għan li l-awtoritajiet lokali u reġjonali tal-pajjiżi tal-Balkani tal-Punent u t-Turkija jiġu adattati għall-acquis Komunitarju;

25.

qabel kollox, għall-pajjiżi tal-Balkani tal-Punent u t-Turkija jipproponi li jittieħdu miżuri konkreti biex l-għadd ta’ nisa fil-korpi rappreżentattivi lokali u reġjonali jiżdied b’mod konsiderevoli;

26.

jirrakkomanda lill-Kummissjoni li, fir-rapporti futuri dwar l-istrateġija tat-tkabbir, tidħol f’iktar dettall dwar is-sitwazzjoni u l-istandards tal-governanza awtonoma reġjonali u lokali b’rabta mar-rwol importanti li jaqdu fit-traspożizzjonij tal-politiki tal-UE u anke biex tagħmel iktar biex tiġbed l-attenzjoni tal-pajjiżi tal-adeżjoni b’mod aktar ċar għall-bżonn ta’ riforma fl-oqsma tar-reġjonalizzazzjoni u tad-deċentralizzazzjoni;

27.

jilqa’ l-fatt li l-Kroazja għamlet progress tant tajjeb fin-negozjati għall-adeżjoni fl-2010 u fl-2011 li fit-30 ta’ Ġunju 2011 in-negozjati għall-adeżjoni mal-UE setgħu jintemmu uffiċjalment u b’hekk huwa mistenni li fl-1 ta’ Lulju 2013 dan il-pajjiż jaderixxi mal-UE bħala l-28 membru tagħha;

28.

madankollu, iqis ukoll li huwa urġenti li qabel kollox il-Kroazja tieħu ż-żmien meħtieġ biex tikkonforma mal-benchmarks tal-Kapitolu 23 li għadhom mhumiex sodisfati. Fosthom insibu b’mod partikolari kooperazzjoni mingħajr restrizzjoni mat-Tribunal Kriminali Internazzjonali għal Dik li kienet il-Jugoslavja, ġlieda deċiżiva kontra l-korruzzjoni u l-kriminalità organizzata fl-ogħla livell statali, l-indipendenza u l-effiċjenza tas-sistema ġudizzjarja kif ukoll ir-rispett u l-ħarsien tal-minoritajiet, inkluż ir-ritorn tar-rifuġjati;

29.

f’dan ir-rigward, jinnota li hemm bżonn ta’ iktar sforzi għar-riforma tal-amministrazzjoni pubblika u li l-awtoritajiet lokali u reġjonali assolutament għandhom ikunu involuti, biex jiġu eliminati l-proċeduri burokratiċi eżistenti kif ukoll il-politiċizzazzjoni eċċessiva, u biex jissaħħu l-kapaċitajiet, l-effiċjenza, l-awtonomija u l-affidabbiltà tal-amministrazzjoni fil-livelli kollha;

30.

jħeġġeġ l-implimentazzjoni rapida tal-liġi l-ġdida dwar il-paga tal-impjegati tal-awtoritajiet lokali u reġjonali u ta’ “L-istrateġija nazzjonali għat-taħriġ tal-impjegati u l-persunal tal-gvernijiet awtonomi muniċipali u reġjonali 2009-2013” biex jittejjeb il-provvediment ta’ servizzi deċentralizzati għaċ-ċittadini u tinbena amministrazzjoni pubblika moderna u effiċjenti;

31.

jipproponi li, minkejja l-progress li nkiseb fil-politika reġjonali u l-koordinazzjoni tal-fondi strutturali, għad iridu jittieħdu iktar miżuri li jwasslu għat-tisħiħ tal-parteċipazzjoni tal-livell reġjonali u lokali fl-implimentazzjoni tal-politika ta’ koeżjoni tal-UE u billi jitħarrġu u jitħejjew l-impjegati fil-qasam tal-amministrazzjoni u l-politiċi lokali u reġjonali, joffru l-possibbiltà li jiġu żviluppati proġetti adatti għall-appoġġ mill-fondi tal-UE. B’hekk, jiġu indirizzati d-disparitajiet fl-iżvilupp li jeżistu bejn ir-reġjuni Kroati, u jsir kontribut biex tissaħħaħ il-koeżjoni territorjali;

32.

jirrakkomanda li tiġi implimentata strateġija tad-deċentralizzazzjoni li, minn naħa, ittejjeb il-qagħda finanzjarja tal-awtoritajiet lokali u reġjonali u, minn naħa oħra, tippermetti lir-rappreżentanti lokali u reġjonali jieħdu sehem fil-proċess leġislattiv, kif ukoll li jiġu implimentati l-Linji Gwida għad-Deċentralizzazzjoni Funzjonali u l-Organizzazzjoni Territorjali approvati fil-laqgħa ta’ Lulju 2010;

33.

jilqa’ l-ħafna inizjattivi indipendenti ta’ politika lokali li ħadu r-reġjuni u l-muniċipalitajiet sabiex jiġbdu lill-investituri, bħall-isforzi sabiex titnaqqas il-burokrazija u tingħata l-għajnuna – fatturi li jżidu n-numru ta’ kumpaniji stabbiliti lokalment u li jżidu l-impjiegi; madankollu, jittama li l-inċertezza legali konsiderevoli dwar il-proprjetà tista’ titneħħa permezz ta’ leġislazzjoni ġdida;

34.

jiġbed l-attenzjoni għall-fatt li t-titjib reċenti fir-relazzjonijiet bilaterali bejn il-Kroazja u pajjiżi oħra tal-adeżjoni, bħas-Serbja, u Stati Membri qraba fl-UE, bħas-Slovenja, jista’ jiġi kkonsolidat permezz ta’ kooperazzjoni transkonfinali reġjonali u lokali;

35.

jirrakkomanda li jsir iktar progress fil-qasam tad-drittijiet tal-minoritajiet, id-drittijiet kulturali, il-protezzjoni tal-minoritajiet u r-ritorn tar-rifuġjati permezz ta’ parteċipazzjoni msaħħa tal-persuni responsabbli fil-livell lokali u reġjonali u li jittieħdu passi biex jissaħħaħ l-appoġġ reġjonali mmirat għar-ritorn tar-rifuġjati, speċjalment f’dawk ir-reġjuni li tħallew vojta – meta n-nies kellhom jiċċaqilqu minħabba l-gwerra f’Dik li kienet il-Jugoslavja u f’dan ir-rigward jilqa’ l-kooperazzjoni msaħħa mas-Serbja u l-UNHCR;

36.

bi pjaċir jinnota li Dik li kienet ir-Repubblika Jugoslava tal-Maċedonja għadha tilħaq il-kriterji politiċi u fl-2010 għamlet iktar progress; jistqarr madankollu li għad iridu jsiru iktar sforzi f’ħafna mill-oqsma tal-kriterji politiċi, bħall-indipendenza tas-sistema ġudizzjarja, ir-riforma tal-amministrazzjoni pubblika, il-libertà tal-espressjoni tal-mezzi tax-xandir u rieda ġenerali biex jitwettqu r-riformi; huwa tal-fehma wkoll li fost l-elementi importanti biex Dik li kienet ir-Repubblika Jugoslava tal-Maċedonja titqarreb lejn l-UE nsibu ż-żamma ta’ relazzjonijiet tajba ta’ viċinat, speċjalment fil-livell transkonfinali reġjonali u lokali. Dan jinkludi soluzzjoni negozjata u aċċettata reċiprokament dwar il-kwistjoni tal-isem taħt il-patroċinju tan-Nazzjonijiet Uniti;

37.

jenfasizza li għandu jissaħħaħ id-djalogu dwar ir-relazzjonijiet interetniċi u jappella għal laqgħat regolari tal-kumitat parlamentari kompetenti sabiex jitwettqu l-għanijiet tal-Ftehim ta’ Ohrid;

38.

jilqa’ l-fatt li d-deċentralizzazzjoni, wieħed mill-prinċipji bażiċi tal-Ftehim ta’ Ohrid, qed tkompli timxi ’l quddiem,li l-Grupp ta’ Ħidma Interministerjali għad-Deċentralizzazzjoni ltaqa’ b’mod regolari u li l-Programm u l-Pjan ta’ Azzjoni dwar l-implimentazzjoni tad-deċentralizzazjoni 2008-2010 ġew aġġornati;

39.

jilqa’ l-fatt li muniċipalitajiet oħra jinsabu fl-aħħar fażi tal-proċess tad-deċentralizzazzjoni finanzjarja, b’77 minn 85 muniċipalità li issa jinsabu f’din il-fażi;

40.

jilqa’ wkoll il-fatt li l-liġi dwar il-finanzjament tal-gvernijiet awtonomi lokali ġiet riveduta kompletament, b’tali mod li sal-2013 l-ammont ta’ VAT identifikat għall-muniċipalitajiet ser jiżdied minn 3 % għal 4,5 %, għalkemm dan jaf ma jkunx biżżejjed, sabiex il-muniċipalitajiet ikunu jistgħu jaqdu dmirijiethom b’mod sodisfaċenti;

41.

iqis bħala ħaġa pożittiva li l-Istrateġija dwar it-trasferiment tar-responsabbiltà amministrattiva tal-artijiet fuq proprjetà statali lill-muniċipalitajiet mill-2011 tlestiet u issa jistenna li din l-istrateġija tiġi implimentata mill-iktar fis possibbli;

42.

jinnota li, minkejja l-fatt li bosta muniċipalitajiet espandew il-monitoraġġ tal-kwistjonijiet finanzjarji, jinħtieġu iktar programmi ta’ tisħiħ tal-kapaċitajiet (Capacity Building Programmes), sabiex tissaħħaħ il-kapaċità tal-muniċipalitajiet fil-qasam tal-amministrazzjoni fiskali, l-iżvilupp tal-persunal u l-monitoraġġ finanzjarju, u jiddispjaċih li r-riformi miftiehma fil-laqgħat ta’ kull xahar tal-Kumitat ta’ Livell Għoli għall-Amministrazzjoni Pubblika għadhom ma ġewx implimentati b’mod sistematiku jew effettiv;

43.

jirrakkomanda li l-kwistjonijiet tad-deċentralizzazzjoni u t-tisħiħ tal-kapaċitajiet fil-qasam tal-politika finanzjarja u baġitarja fil-livell lokali jitħaffu bis-saħħa ta’ intervent speċjali tal-ministeri rilevanti u jiddispjaċih li l-kumitat interministerjali għall-monitoraġġ tal-finanzjament tal-muniċipalijiet iltaqa’ darba biss u li fil-fondi tal-proġetti muniċipali mill-gvern nazzjonali m’hemmx biżżejjed trasparenza u koordinazzjoni għal żvilupp reġjonali bilanċjat;

44.

b’dispjaċir jinnota d-dewmien dejjem ikbar fl-implimentazzjoni tal-programm ta’ ħidma għall-iżvilupp reġjonali, kif ukoll in-nuqqas kontinwu ta’ kapaċità teknika fir-rigward tat- tħejjija u l-implimentazzjoni ta’ proġetti fi ħdan il-ministeri u l-amministrazzjonijiet lokali;

45.

iqis li għandhom jiġu stabbiliti kriterji iktar ġusti dwar it-tqassim tar-riżorsi mill-fondi tal-investiment statali lill-muniċipalitajiet, b’tali mod li ma tingħatax l-impressjoni li l-partiti politiċi jew etniċi qed jagħmlu l-għotjiet mhux tal-inqas biex tiġi mxekkla d-diskriminazzjoni fil-konfront tal-minoritajiet etniċi;

46.

jenfasizza l-bżonn li jiġu żgurati kompletament il-garanziji legali għall-minoritajiet f’kull livell u t-titjib tal-integrazzjoni tal-komunitajiet etniċi, b’mod speċjali tar-Roma, u jappella lill-gvern biex jirratifika l-Karta Ewropea tal-lingwi reġjonali jew tal-minoritajiet u li jissaħħaħ l-istatus tal-Kumitat għar-relazzjonijiet bejn il-komunitajiet etniċi;

47.

jinnota li l-liġi dwar il-gvernijiet awtonomi lokali titrasferixxi poteri kruċjali lill-awtoritajiet lokali, għad li l-effett ta’ din il-liġi huwa limitat minn dispożizzjonijiet legali oħra u m’hemmx riżorsi finanzjarji biżżejjed għall-implimentazzjoni tagħha;

48.

jilqa’ l-fatt li f’Ġunju 2010, il-Kunsill Ewropew iddeċieda li jniedi negozjati għall-adeżjoni mal-Islanda u jinnota b’sodisfazzjon li l-Islanda tilħaq il-kriterji politiċi, li hija demokrazija parlamentari funzjonali b’istituzzjonijiet b’saħħithom, b’sistema kostituzzjonali u leġislattiva stabbli, b’sistema ġudizzjarja stabbilita, u amministrazzjoni pubblika effiċjenti;

49.

bi pjaċir jinnota li l-Islanda għandha gvernijiet awtonomi muniċipali ferm effiċjenti, iżda jirrakkomanda li, b’konformità mal-prinċipji tas-sussidjarjetà, jkun hemm iktar deċentralizzazzjoni u li jiġu trasferiti aktar responsabbiltajiet lill-muniċipalitajiet;

50.

fl-iżvilupp ta’ proġetti speċifiċi ta’ żvilupp reġjonali bl-appoġġ tal-fondi tal-UE, huwa jara opportunità għall-isforz kontra l-eżodu mill-muniċipalitajiet imbiegħda u żgħar u għall-prevenzjoni tal-amalgamazzjoni ta’ muniċipalitajiet;

51.

bi pjaċir jinnota l-inklużjoni ta’ gruppi ta’ ħidma dwar il-politika reġjonali fit-tim tan-negozjati tal-adeżjoni u jirrakkomanda li r-rappreżentanti tal-livell lokali jiġu involuti mill-qrib;

52.

ifakkar li taħt it-Trattati tal-UE, kull ċittadin tal-UE għandu d-dritt li jivvota u d-dritt li joħroġ bħala kandidat fl-elezzjonijiet muniċipali fl-Istat Membru fejn jgħix bl-istess kundizzjonijiet applikabbli għaċ-ċittadini ta’ dak l-Istat [Art. 40 tal-Karta tad-Drittijiet Fundamentali]; għaldaqstant, iħeġġeġ lill-Islanda tadatta b’dawn id-dispożizzjonijiet id-dritt li wieħed jivvota fl-elezzjonijiet lokali;

53.

jinnota li jeżisti xettiċiżmu u/jew oppożizzjoni konsiderevoli fost iċ-ċittadini u bosta gruppi politiċi fl-Islanda fir-rigward tas-sħubija fl-UE u li hemm bżonn ta’ sforzi konsiderevoli sabiex iċ-ċittadini tal-Islanda jingħataw biżżejjed informazzjoni dwar l-effetti ta’ sħubija fl-UE u għal dan il-għan jirrakkomanda li l-awtoritajiet lokali jiġu involuti mill-qrib;

54.

jirrakkomanda li, b’konformità mal-prinċipju tas-sussidjarjetà, jiġi stabbilit tqassim ċar tal-poteri bejn il-gvern ċentrali u l-amministrazzjoni lokali permezz ta’ miżuri leġislattivi adatti u li jinħoloq strument leġislattiv biex l-awtoritajiet lokali jkunu jistgħu jikkuntestaw id-deċiżjonijiet jekk dawn imorru kontra l-prinċipji tal-awtonomija tal-gvern lokali;

55.

iqis bħala problema l-fatt li 26 mis-76 muniċipalità Islandika għandhom inqas minn 500 abitant; barra minn hekk, il-muniċipalitajiet kultant ikunu sitwati ’l bogħod sew minn xulxin, li jfisser li iktar tnaqqis fl-għadd ta’ muniċipalitajiet jista’ jwassal għal sitwazzjoni fejn in-nies ikollhom jagħmlu vjaġġi twal biex jilħqu s-servizzi u r-rappreżentanzi muniċipali. Għalhekk, jirrakkomanda li l-kooperazzjoni bejn il-muniċipalitajiet iż-żgħar tiżdied b’mod konsiderevoli biex jiġi żgurat li jkomplu jeżistu u biex ikunu jistgħu jkomplu jaħdmu flimkien għat-tfassil u l-implimentazzjoni ta’ proġetti sponsorjati mill-UE;

56.

jittama li l-Kostituzzjoni attwali tkun tista’ tiġi sostitwita minn Kostituzzjoni ċivili msejsa fuq l-iktar konsultazzjonijiet mifruxa ma’ gruppi u partijiet diversi tas-soċjetà, inklużi l-livelli lokali/reġjonali, kif ukoll minoranzi etniċi u l-komunitajiet reliġjużi. F’dan ir-rigward, jilqa’ l-adozzjoni li għaddiet dwar il-pakkett tar-riforma kostituzzjonali u l-isforzi relatati tad-demokratizzazzjoni u l-liberalizzazzjoni, u jittama li, fuq din il-bażi, tittejjeb il-klima politika u jkun hemm rieda ikbar fost il-partiti politiċi u l-istituzzjonijiet politiċi biex jidħlu fi djalogu u kompromessi; għaldaqstant isejjaħ għal implimentazzjoni rapida tar-riforma kostituzzjonali minn issa ’l quddiem u għal appoġġ wiesa’ għaliha mill-partiti politiċi u mis-soċjetà ċivili;

57.

jagħraf li r-riformi introdotti s’issa u r-rieda biex jiġu implimentati oħrajn għandu jkollhom ukoll impatt pożittiv fuq l-awtoritajiet lokali u reġjonali;

58.

iħeġġeġ lill-gvern tat-Turkija biex, minkejja l-progress li sar f’dan il-qasam, ikompli bl-isforzi tiegħu biex jiġi żgurat ir-rispett għall-libertà tat-twemmin, id-drittijiet tan-nisa u d-drittijiet fundamentali tal-libertà tal-espressjoni u l-libertà tal-mezzi tax-xandir; jitlob lit-Turkija tagħmel sforzi addizzjonali u, jekk ikun bżonn, tadotta leġislazzjoni ġdida biex tiggarantixxi l-libertà tal-minoranzi reliġjużi ta’ twemmin li mhuwiex Musulman li jeżerċitaw id-drittijiet tagħhom mingħajr tfixkil u li jwettqu l-attivitajiet tagħhom mingħajr restrizzjonijiet;

59.

bi pjaċir jinnota li sar progress fil-politika reġjonali u l-koordinazzjoni tal-istrumenti ta’ politika strutturali, u li l-atturi sottonazzjonali kienu iktar involuti fit-tħejjija; madankollu, josserva li fil-livell nazzjonali, hemm bżonn li jsir titjib biex tiżdied l-effikaċja tal-korpi amministrattivi involuti f’dawn il-kwistjonijiet, sabiex ir-riżorsi jkunu jistgħu jintużaw b’mod iktar effiċjenti u sabiex it-Turkija titħejja kif suppost għall-użu tal-Fondi Strutturali;

60.

huwa konvint li r-riżoluzzjoni tal-kwistjoni Kurda, li s’issa għadha ma ġietx solvuta b’mod partikolari fil-Lvant u x-Xlokk tal-pajjiż, tista’ tiġi megħjuna permezz tat-tisħiħ tal-gvern lokali u reġjonali awtonomu. Jirrakkomanda lill-awtoritajiet Torok ikomplu bl-isforzi sabiex isaħħu l-gvern lokali u reġjonali awtonomu permezz ta’ strateġija ta’ deċentralizzazzjoni iktar fit-tul u jħeġġeġ lill-awtoritajiet Torok jipprovdu aktar riżorsi lill-governanza awtonoma lokali;

61.

jissuġġerixxi li jiġi studjat sa liema punt l-aqwa prattiki u eżempji tajbin li diġà jeżistu ta’ strutturi li jaqsmu l-poter reġjonali/federali fi ħdan l-UE, kif ukoll l-applikazzjoni tal-prinċipji tas-sussidjarjetà u d-deċentralizzazzjoni jistgħu jgħinu biex tinstab soluzzjoni għall-problemi;

62.

jitlob lit-Turkija biex, fin-negozjati ta’ bħalissa, tagħti xhieda tar-rieda tagħha li ssolvi l-kwistjoni ta’ Ċipru u li timplimenta r-riżoluzzjonijiet tal-Kunsill tas-Sigurtà tan-Nazzjonijiet Uniti dwar Ċipru;

63.

jiddispjaċih għan-nuqqas ta’ progress fl-applikazzjoni tat-tieni Protokoll Addizzjonali mehmuż mal-Ftehim ta’ Assoċjazzjoni (l-hekk imsejjaħ Protokoll ta’ Ankara), li jestendi l-unjoni doganali mat-Turkija, li ilha stabbilita mill-1996, għal għaxar Stati Membri ġodda, fosthom ir-Repubblika ta’ Ċipru;

64.

jappoġġja l-isforzi li tnedew fl-2010 mill-Kummissjoni Ewropea biex jinbnew sħubijiet ta’ proġetti bejn il-muniċipalitajiet fl-Istati Membri tal-UE u fit-Turkija sabiex il-muniċipalitajiet tat-Turkija jingħataw appoġġ għall-iżvilupp, it-tisħiħ u l-estensjoni fl-oqsma tal-ġestjoni tal-iskart, il-protezzjoni ambjentali, it-trasport, is-servizzi soċjali, il-provvista tal-enerġija, it-turiżmu u l-kultura;

65.

lest jilqa’ l-kunċett li l-muniċipalitajiet u l-provinċji jingħataw l-opportunità li jistabbilixxu relazzjonijiet ma’ reġjuni u muniċipalitajiet f’pajjiżi oħra mingħajr awtorizzazzjoni minn qabel mill-Ministru tal-Affarijiet Interni, u jħeġġeġ lill-awtoritajiet lokali u reġjonali tal-UE biex isaħħu l-kooperazzjoni mar-reġjuni u l-muniċipalitajiet Torok;

66.

jenfasizza l-bżonn li l-awtoritajiet lokali u reġjonali jiġu involuti sa minn kmieni fil-proċess tal-adeżjoni billi parti kbira mil-leġislazzjoni tal-UE ser ikollha tiġi implimentata fil-livell lokali u reġjonali u jqis li huwa partikolarment importanti li l-kapaċità amministrattiva tiġi kkonsolidata fil-livell lokali u reġjonali;

67.

lest jagħmel parti minn kumitat konsultattiv konġunt flimkien mar-rappreżentanti tal-korpi lokali u reġjonali fit-Turkija biex jiġi appoġġjat iktar il-proċess tad-deċentralizzazzjoni fil-pajjiż u biex jingħataw kontributi konkreti għat-tisħiħ tal-istituzzjonijiet u biex tissaħħaħ il-kapaċità amministrattiva fil-livell lokali u reġjonali;

68.

jirrakkomanda tnaqqis gradwali fl-influwenza tal-gvernaturi fil-ħidma tal-awtonomija reġjonali;

69.

jissuġġerixxi li tinħoloq struttura legali li tagħmel il-konsultazzjoni mal-awtoritajiet lokali u reġjonali obbligatorja kulfejn jintlaqtu l-interessi u l-poteri tagħhom;

70.

josserva li t-Turkija għad għandha disparitajiet reġjonali konsiderevoli, li qed jirriżultaw fi sfidi serji għall-politika reġjonali u l-iżvilupp strutturali għat-tnaqqis gradwali ta’ dawn id-disparitajiet u għalhekk jappella biex titfassal strateġija biex jitnaqqas id-distakk tal-iżvilupp bejn iż-żoni rurali u urbani;

71.

jirrakkomanda li, b’konformità mal-acquis Komunitarju, qabel kollox jinfetaħ mill-iktar fis possibbli l-Kapitolu 22 dwar il-politika reġjonali u l-koordinazzjoni tal-istrumenti ta’ politika strutturali;

72.

jirrakkomanda li tinħareġ liġi dwar ir-riżorsi finanzjarji tal-provinċji u l-muniċipalitajiet mill-iktar fis possibbli, biex isiru disponibbli r-riżorsi finanzjarji adegwati għall-awtoritajiet sottonazzjonali biex ikunu jistgħu jaqdu d-dmirijiet u l-kompiti tagħhom;

73.

jinnota r-rwol importanti li taqdi t-Turkija bħala attur reġjonali b’rabta mal-istrateġija tal-UE għall-Baħar l-Iswed u jirrakkomanda li t-Turkija tieħu impenn sod f’din il-kwistjoni, u li jieħdu sehem ukoll dawk ir-reġjuni bi fruntiera diretta mal-Baħar l-Iswed;

74.

jilqa’ l-isforzi tal-Albanija biex tikkonforma mal-kriterji politiċi tal-Unjoni Ewropea, b’mod partikolari bit-twettiq tal-impenji stabbiliti fil-Ftehim ta’ Stabbiltà u Assoċjazzjoni;

75.

jinnota li l-Albanija għad trid toħloq miżuri konsiderevoli għall-politika reġjonali biex tilħaq l-istandards Ewropej; dan jirrelata b’mod partikolari man-nuqqas ta’ unitajiet territorjali ekwivalenti għan-NUTS-2 u leġislazzjoni uniformi koordinata għall-implimentazzjoni ta’ proġetti tal-iżvilupp reġjonali;

76.

b’dispjaċir jinnota l-istrutturi li għadhom inadegwati għall-ġestjoni finanzjarja tal-awtoritajiet lokali u reġjonali, b’mod speċjali rigward il-possibbiltà li jinġabru riżorsi finanzjarji, possibbiltajiet limitati għall-infiq u implimentazzjoni bil-mod ħafna tal-miżuri tad-deċentralizzazzjoni, l-awtonomija amministrattiva u t-trasferiment assoċjat tal-poteri lil-livelli sottonazzjonali;

77.

jinnota li għad hemm ftit wisq persunal imħarreġ kif suppost fil-livelli kollha biex in-negozjati mal-programmi tal-UE jkunu effiċjenti;

78.

jappella biex l-istrutturi demokratiċi fl-Albanija jiġu konsolidati, b’mod speċjali fir-rigward tal-istituzzjonijiet politiċi u d-djalogu mal-partiti kollha, sabiex ikun hemm iktar stabbiltà politika fil-pajjiż u l-gvern ikun jista’ jfassal attivitajiet amministrattivi b’mod ikar effiċjenti, li mingħajrhom ir-riformi neċessarji jkunu impossibbli; f’dan il-kuntest, huwa jenfasizza li l-parteċipazzjoni tal-oppożizzjoni fil-ħidma parlamentari hija indispensabbli;

79.

jirrakkomanda li jiġu introdotti elezzjonijiet diretti għall-kunsilli reġjonali u li titfassal leġislazzjoni ġdida dwar l-awtonomija tal-gvern lokali;

80.

jipproponi li sabiex jissaħħu l-awtoritajiet lokali u reġjonali, jiġi riformat ir-rwol tal-prefetti u b’dan il-mod jiġu limitati d-drittijiet tagħhom tal-monitoraġġ u tiġi żgurata definizzjoni ċara tar-responsabbiltajiet tagħhom rigward il-kunsilli reġjonali;

81.

jappella għall-adozzjoni tar-riforma elettorali rakkomandata mill-OSCE, bil-għan li jiġi żgurat li l-elezzjonijiet f’kull livell jikkonformaw mal-istandards Ewropej u internazzjonali; jieħu nota tar-rapport tal-OSCE u tal-Kungress tal-Awtoritajiet Lokali u Reġjonali tal-Kunsill tal-Ewropa, fejn intqal li l-elezzjonijiet muniċipali tat-8 ta’ Mejju 2011 saru bl-iktar b’mod trasparenti, ġust u kalm; jitlob li jiġu stabbiliti regoli ċari dwar il-validità tal-iskedi elettorali u jittama li l-partiti politiċi jirritornaw għall-ħajja politika ordinarja;

82.

jenfasizza l-kunflitti vjolenti reċenti u jistenna li l-Albanija tieħu kull miżura possibbli mill-iktar fis possibbli, biex tiżgura l-istabbiltà politika fil-livell nazzjonali, reġjonali u lokali;

83.

jirrakkomanda bil-qawwa li r-rappreżentanti muniċipali jkunu involuti fil-proċess ta’ negozzjazzjoni mal-UE;

84.

jiddispjaċih għall-fatt li fl-2010 l-Bożnja-Ħerzegovina m’għamlitx wisq progress fl-implimentazzjoni ta’ riformi prinċipali u għall-fatt li għad hemm inkonsistenzi bejn il-kostituzzjoni u l-Konvenzjoni Ewropea dwar id-Drittijiet tal-Bniedem minkejja s-sentenza tal-Qorti Ewropea tad-Drittijiet tal-Bniedem;

85.

jitlob reviżjoni urġenti tal-kostituzzjoni u titjib fl-effiċjenza u t-tħaddim tal-korpi statali kollha sabiex il-pajjiż ikun f’qagħda li jadotta, jagħmel traspożizzjoni u jimplimenta l-leġislazzjoni u r-regolamenti tal-UE;

86.

iqis li huwa inaċċettabbli li l-kostituzzjoni tal-Bosnja-Ħerzegovina għadha tistipula li ċ-ċittadini li ma jagħmlux parti minn waħda mit-tliet komunitajiet (Bosnjaka, Kroata jew Serba) ma jistgħux joħorġu bħala kandidati għall-presidenza jew għall-parlament; jenfasizza d-deċiżjoni tal-Qorti Ewropea għad-Drittijiet tal-Bniedem li skontha dawn id-dispożizzjonijiet mhumiex kompatibbli mal-prinċipji ġenerali tad-drittijiet tal-bniedem;

87.

iqis li huwa importanti li, fl-10 ta’ Marzu, il-Kunsill tal-Ministri adotta pjan ta’ azzjoni għall-implimentazzjoni tad-deċiżjoni tal-Qorti Ewropea għad-Drittijiet tal-Bniedem u waqqfet grupp ta’ ħidma; madankollu, jilmenta l-fatt li dan il-grupp għadu ma wasal għall-ebda ftehim;

88.

jiddispjaċih għall-fatt li anke l-aħħar elezzjonijiet fl-2010 kienu soġġetti għal-limitazzjonijiet tad-dritt tal-vot skont l-etniċità u r-residenza, li b’mod ċar imorru kontra l-prinċipji demokratiċi u d-dritt għat-trattament ugwali mingħajr diskriminazzjoni;

89.

b’dispjaċir jirrapporta li l-prerekwiżiti għall-għeluq tal-Uffiċċju tar-Rappreżentant Għoli għadhom ’il bogħod milli jintlaħqu; dawn jinkludu t-tqassim raġonevoli ta’ proprjetà bejn l-Istat u l-livelli amministrattivi l-oħra; bl-istess mod jiddispjaċih li l-ħidma tal-korpi eżekuttivi u leġislattivi fil-livelli kollha tal-Istat għadha kważi b’mod esklużiv organizzata skont il-linji etniċi u tbati minn nuqqas sew ta’ koordinazzjoni;

90.

jiddispjaċih għall-fatt li l-Bosnja-Ħerzegovina hija l-uniku pajjiż li mhux ser jipparteċipa fiċ-ċensiment tal-2011 minħabba li s’issa għadha m’għaddhietx liġi taċ-ċensiment;

91.

jinnota li sar progress limitat fil-kwistjonijiet relatati mas-sistema ġudizzjarja, għalkemm għad hemm bżonn aktar titjib fil-livell tal-entitajiet (sottonazzjonali) u d-distretti;

92.

jiddispjaċih li sar biss progress limitat fil-ġlieda kontra l-korruzzjoni, li l-proċedimenti legali fil-każijiet ta’ korruzzjoni jipproċedu biss b’rata bil-mod ħafna u li għadd żgħir biss ta’ każijiet ta’ livell għoli tressqu quddiem il-qorti; fost affarijiet oħra, dan jinbet min-nuqqas ta’ implimentazzjoni adegwata tal-leġislazzjoni u minn problemi fil-koordinazzjoni bejn l-entitajiet;

93.

jilqa’ l-fatt li l-għadd ta’ skejjel maqsuma skont il-linji etniċi naqas u fil-biċċa l-kbira tal-iskejjel iddaħħal kors komuni ta’ 9 snin; madankollu, jikkritika l-fatt li għad hemm diviżjoni etnika tal-istudenti fl-iskejjel;

94.

jiddispjaċih li l-Bosnja-Ħerzegovina, għalkemm tirċievi appoġġ finanzjarju mill-IPA, għadha mhijiex f’qagħda biex tibni l-istrutturi neċessarji għad-deċentralizzazzjoni tal-amministrazzjoni tal-fondi tal-UE bil-mod adatt;

95.

jenfasizza problemi partikolari fil-Federazzjoni tal-Bosnja-Ħerzegovina fejn hemm setgħat doppji fl-entitajiet, id-distretti u l-muniċipalitajiet, għax sal-lum il-leġislazzjoni fid-diversi livelli ma ġietx armonizzata;

96.

jirrifjuta l-isfidi ripetuti għall-għaqda territorjali tal-istat, tal-istituzzjonijiet u s-setgħat tiegħu, l-iktar mir-Repubblika Srpska, jikkritika bil-qawwa t-tentattivi reċenti tar-Republika Srpska li permezz ta’ referendum ikkontestat il-validità tar-rappreżentat għoli tal-ġurisdizzjoni tal-Istat Federali, u jirrakkomanda li f’ċerti oqsma jiġu konsolidati l-poteri tal-istat kollu tal-Bosnja-Ħerzegovina u li tiġi stabbilita żona ekonomika unika; għalhekk, iħeġġeġ lill-politiċi fil-livell federali tal-entitajiet u tad-distretti biex ifasslu ftehim intermedju;

97.

jinnota li r-riżorsi tal-awtoritajiet lokali bħalissa huma eċċessivament limitati, il-kwistjoni tal-proprjetà pubblika għadha ma ġietx iċċarata biżżejjed u l-kriterji etniċi għall-eżerċizzju tad-drittijiet politiċi fil-livell lokali u reġjonali jeħtieġu riforma urġenti;

98.

iqis li tinħtieġ riforma tal-proprjetà pubblika f’kull livell;

99.

jappella biex il-persuni responsabbli fil-livelli kollha ta’ gvern isaħħu l-kooperazzjoni transkonfinali mal-pajjiżi ġirien;

100.

bi pjaċir jinnota li s-Serbja mxiet ’il quddiem fl-aġenda tagħha ta’ riforma politika u kompliet tagħmel progress notevoli sabiex tilħaq ir-rekwiżiti tal-Ftehim ta’ Stabbilizzazzjoni u Assoċjazzjoni; madankollu, jinnota li għad hemm bżonn li jsir iktar sforz;

101.

bl-istess mod bi pjaċir jinnota li s-Serbja għamlet passi kbar favur ir-rikonċiljazzjoni fir-reġjun kollu tal-Balkani tal-Punent u qed taħdem b’mod kostruttiv mat-Tribunal Kriminali Internazzjonali għal Dik li kienet il-Jugoslavja;

102.

jilqa’ t-tnedija ta’ taħdidiet diretti bejn is-Serbja u l-Kosovo, kif ukoll il-fatt li diġà kien possibbli li tinkiseb ftit konverġenza, u jħeġġeġ liż-żewġ naħat isegwu dawn it-taħdidiet b’mod kostruttiv;

103.

jilqa’ l-fatt li l-istatut il-ġdid tal-Provinċja Awtonoma ta’ Vojvodina daħal fis-seħħ fl-1 ta’ Jannar 2010; madankollu, jappella lill-gvern tas-Serbja sabiex mill-iktar fis jiffinalizza u jimplimenta xi dispożizzjonijiet li għadhom ma ġewx definiti tal-istatut, bħat-trasferiment tal-proprjetà pubblika lill-Provinċja Awtonoma ta’ Vojvodina;

104.

b’mod partikolari jilqa’ ż-żieda fl-isforzi u l-inizjattivi fl-2010 għad-deċentralizzazzjoni tal-gvern fis-Serbja

105.

jirrakkomanda b’mod urġenti li r-rappreżentanti tal-Provinċja Awtonoma tal-Vojvodina u l-Assemblea tal-Bliet u l-Muniċipalitajiet Serbi jiġu inklużi fil-kumitat tas-Serbja għan-negozjati mal-UE;

106.

jissuġġerixxi li jiġu stabbiliti dispożizzjonijiet legali li jagħmlu l-konsultazzjoni mal-awtoritajiet lokali u reġjonali obbligatorja għall-gvernijiet nazzjonali kulfejn jintlaqtu l-interessi u s-setgħat tagħhom;

107.

jirrakkomanda li jinħolqu rekwiżiti legali u inċentivi għal komunikazzjoni aħjar bejn il-muniċipalitajiet sabiex tittejjeb il-prestazzjoni tal-amministrazzjoni pubblika u sabiex jiġi żgurat li r-riżorsi disponibbli jintużaw b’mod iktar ekonomiku;

108.

jinnota li s-Serbja għad għandha għadd eċċessivament kbir ta’ rifuġjati li qed jistennew soluzzjoni għas-sitwazzjoni tagħhom; qabel kollox dan jeħtieġ miżuri komprensivi fil-livell muniċipali;

109.

jilqa’ l-fatt li l-Montenegro għamel progress konkret sabiex jilħaq il-kriterji politiċi u l-kundizzjonijiet tal-proċess ta’ Stabbilizzazzjoni u Assoċjazzjoni iżda jinnota li hemm bżonn isiru iktar sforzi f’dan il-qasam;

110.

jenfasizza l-importanza ta’ amministrazzjoni trasparenti u affidabbli fil-livell lokali u ta’ iktar deċentralizzazzjoni tar-responsabbiltajiet u r-riżorsi finanzjarji;

111.

jappella għall-adozzjoni tal-liġi dwar l-organizzazzjoni reġjonali u ż-żidiet għal-liġi dwar il-finanzi lokali;

112.

qed jagħmel pressjoni għal kooperazzjoni aħjar bejn il-gvern u l-kunsilli tal-minoritajiet sabiex jiġi żgurat li l-minoritajiet ikunu rappreżentati fl-amministrazzjoni pubblika, l-organizzazzjonijiet statali u l-korpi tal-gvernijiet awtonomi lokali;

113.

iħeġġeġ lill-Montenegro jkompli jespandi l-kapaċità amministrattiva tiegħu f’kull qasam, b’mod partikolari fil-livell lokali, u jżid il-professjonaliżmu fis-servizz ċivili u jnaqqas il-politiċizzazzjoni fl-amministrazzjoni pubblika;

114.

jinnota b’sodisfazzjon li l-proċess ta’ deċentralizzazzjoni tal-Kosovo mexa ’l quddiem, il-kooperazzjoni mal-EULEX żdiedet u sar progress fl-implimentazzjoni tal-aġenda Ewropea u l-politika ta’ riforma;

115.

jagħmel pressjoni għal kjarifika sħiħa u mingħajr dewmien tal-akkużi kontra r-rappreżentanti ta’ livell għoli tal-Kosovo fir-riżoluzzjoni tal-Assemblea Parlamentari tal-Kunsill tal-Ewropa skont ir-Rapport ta’ Marty;

116.

bi tħassib jinnota li għad hemm nuqqas konsiderevoli ta’ djalogu u rikonċiljazzjoni bejn il-komunitajiet differenti kif ukoll nuqqas ta’ protezzjoni u integrazzjoni tal-minoritajiet, b’mod partikolari s-Serbi tal-Kosovo;

117.

huwa ferm imħasseb dwar l-irregularitajiet, il-prattiki illegali u l-frodi elettorali fl-aħħar elezzjoni, li reġgħu seħħew fl-elezzjonijiet parzjali sussegwenti neċessarji, u b’xorti ħażina jqis dan bħala sinjal ċar ta’ nuqqas ta’ maturità demokratika;

118.

iħeġġeġ lill-Kosovo sabiex ikompli għaddej bil-proċess ta’ deċentralizzazzjoni u r-riforma fil-gvern lokali; jilqa’ t-twaqqif ta’ grupp ta’ ħidma fil-Ministeru għal Gvern Lokali Awtonomu b’mod partikolari biex tiġi indirizzata l-kwistjoni tat-Tramuntana tal-Kosovo u jiġbed l-attenzjoni għall-fatt li d-deċentralizzazzjoni tista’ tinkiseb biss meta tkun involuta l-popolazzjoni lokali;

119.

jinsab imħasseb ukoll li kien hemm inċidenti vjolenti rikorrenti fir-reġjun ta’ Mitrovica fit-Tramuntana tal-Kosovo, eżattament b’rabta mal-elezzjonijiet, u li s’issa ma kien hemm l-ebda suċċess biex tinkiseb il-paċi f’dan ir-reġjun.