Appell ippreżentat fit-8 ta’ Novembru 2010 minn Grúas Abril Asistencia, S.L. mis-sentenza tal-Qorti Ġenerali (It-Tieni Awla) mogħtija fl-24 ta’ Awissu 2010 fil-Kawża T-386/09, Gruas Abril Asistencia, S.L. vs Il-Kummissjoni Ewropea

(Kawża C-521/10 P)

()

2011/C 30/30

Lingwa tal-kawża: l-Ispanjol

Partijiet

Appellanti: Grúas Abril Asistencia, S.L. (rappreżentant: R. García García, avukat)

Appellata: Il-Kummissjoni Ewropea

Talbiet tal-appellanti

Tilqa’ l-argumenti mressqa u, wara li twettaq il-formalitajiet legali neċessarji, tirrevoka d-digriet ta’ inammissibbiltà u tiddikjara r-rikors għal annullament ammissibbli peress li l-appellanti għandha locus standi, u tiddeċiedi fuq il-mertu skont it-talbiet tal-appellanti.

Aggravji u argumenti prinċipali

L-appell huwa intiż kontra d-digriet, mogħti mill-Qorti Ġenerali, li ddikjara l-inammissibbiltà tar-rikors għal annullament ippreżentat kontra d-deċiżjoni tal-Kummissjoni li ma tibdiex proċedura bil-għan li tikkorreġi l-ksur allegat. Il-Qorti Ġenerali ssostni li ma jistax jiġi ppreżentat rikors kontra tali rifjut minn individwu.

Ir-rikorrenti tqis li l-individwi, bħala destinatarji tad-deċiżjoni li hija s-suġġett tal-appell u li tikkonċernahom direttament u individwalment, jistgħu jippreżentaw rikors għal annullament skont l-Artikoli 230 TKE u III-365 tat-Trattat li jistabbilixxi Kostituzzjoni għall-Ewropa, u l-ġurisprudenza. Ir-rikorrenti titlob ir-revoka tad-digriet ta’ inammissibbiltà u li għaldaqstant ir-rikors għal annullament jiġi iddikjarat ammissibbli.