52009TA1215(24)

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
EUR-Lex - 52009TA1215(24) - EN

Help

Search tips

Need more search options? Use the Advanced search

Document 52009TA1215(24)

Rapport dwar il-kontijiet annwali tal-Eurojust għas-sena finanzjarja 2008, flimkien mar-risposti tal-Eurojust

ĠU C 304, 15.12.2009, p. 131–135 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

HTML

PDF

Official Journal

15.12.2009

Il-Ġurnal Uffiċjali tal-Unjoni Ewropea

C 304/131

RAPPORT

dwar il-kontijiet annwali tal-Eurojust għas-sena finanzjarja 2008, flimkien mar-risposti tal-Eurojust

2009/C 304/24

WERREJ

	Paragrafu	Paġna
INTRODUZZJONI…	1-2	132
ID-DIKJARAZZJONI TA’ ASSIGURAZZJONI…	3-12	132
KUMMENTI DWAR IL-ĠESTJONI TAL-BAĠIT U DIK FINANZJARJA…	13-16	133
Tabella…		134
Ir-risposti tal-Eurojust…		135

INTRODUZZJONI

Il-Eurojust, li tinsab fl-Aja, ġiet imwaqqfa permezz tad-deċiżjoni tal-Kunsill Nru 2002/187/JHA (1) bi ħsieb li tiġi msaħħa l-ġlieda kontra l-kriminalità organizzata serja. L-għan tagħha hu li ttejjeb il-koordinazzjoni ta’ investigazzjonijiet u prosekuzzjonijiet li jkopru t-territorji ta’ bosta Stati Membri tal-Unjoni Ewropea, kif ukoll dawk ta’ Stati li mhumiex membri (2).

2.	Il-baġit tal-Eurojust għall-2008 ammonta għal 24,8 miljun euro meta mqabbel mat-18,9 miljun euro tas-sena ta’ qabel. L-għadd ta’ persunal impjegat mill-Eurojust fi tmiem is-sena kien 222 meta mqabbel ma’ 179 is-sena ta’ qabel.

ID-DIKJARAZZJONI TA’ ASSIGURAZZJONI

Skont id-dispożizzjonijiet tal-Artikolu 248 tat-Trattat il-Qorti vverifikat il-kontijiet annwali (3) tal-Eurojust, li jikkonsistu fir-“rendikonti finanzjarji” (4) u fir-“rapporti dwar l-implimentazzjoni tal-baġit” (5) għas-sena finanzjarja li ntemmet fil-31 ta’ Diċembru 2008 u l-legalità u r-regolarità tat-tranżazzjonijiet li fuqhom huma bbażati dawk il-kontijiet.

4.	Din id-Dikjarazzjoni ta’ Assigurazzjoni hija indirizzata lill-Parlament Ewropew u lill-Kunsill, skont l-Artikolu 185(2) tar-Regolament tal-Kunsill (KE, Euratom) Nru 1605/2002 (6).

Ir-responsabbiltà tad-Direttur

Bħala uffiċjal li jawtorizza, id-Direttur jimplimenta d-dħul u l-infiq tal-baġit skont ir-regoli finanzjarji tal-Eurojust li taqa’ taħt ir-responsabbiltà tiegħu u fi ħdan il-limiti tal-approprijazzjonijiet awtorizzati (7). Id-Direttur huwa responsabbli mit-twaqqif (8) tal-istruttura organizzattiva u s-sistemi u l-proċeduri tal-ġestjoni u l-kontroll interni rilevanti biex jiġu ppreparati kontijiet finali (9) li huma ħielsa minn dikjarazzjoni żbaljata materjali, kemm jekk minħabba frodi jew inkella żball, u biex jiżgura li t-tranżazzjonijiet li fuqhom huma bbażati dawk il-kontijiet huma legali u regolari.

Ir-responsabbiltà tal-Qorti

6.	Ir-responsabbiltà tal-Qorti hija li tipprovdi, abbażi tal-verifika tagħha, dikjarazzjoni ta’ assigurazzjoni dwar l-affidabbiltà tal-kontijiet annwali tal-Eurojust u dwar il-legalità u r-regolarità tat-tranżazzjonijiet li huma bbażati fuqhom.

Il-Qorti wettqet il-verifika tagħha skont l-Istandards Internazzjonali tal-Verifika u l-Kodiċi tal-Etika tal-IFAC u tal-ISSAI (10). Dawk l-istandards jitolbu li l-Qorti tikkonforma mar-rekwiżiti tal-etika u li tippjana u twettaq il-verifika biex tikseb assigurazzjoni raġonevoli dwar jekk il-kontijiet humiex ħielsa minn dikjarazzjoni żbaljata materjali u dwar jekk it-tranżazzjonijiet ta’ bażi humiex legali u regolari.

Il-verifika tal-Qorti tinvolvi t-twettiq ta’ proċeduri sabiex tinkiseb evidenza tal-verifika dwar l-ammonti u t-tagħrif fil-kontijiet u dwar il-legalità u r-regolarità tat-tranżazzjonijiet li huma bbażati fuqhom. Il-proċeduri magħżula jiddependu fuq l-evalwazzjoni tagħha tal-verifika inkluża l-evalwazzjoni tar-riskji ta’ dikjarazzjoni żbaljata materjali fil-kontijiet jew ta’ tranżazzjonijiet illegali jew irregolari, kemm jekk minħabba frodi jew inkella żball. Meta tagħmel dawk l-evalwazzjonijiet tar-riskju, il-kontroll intern rilevanti għall-preparazzjoni u l-preżentazzjoni tal-kontijiet tal-entità jiġi kkunsidrat sabiex jitfasslu proċeduri tal-verifika li huma xierqa fiċ-ċirkostanzi. Il-verifika tal-Qorti tinkludi wkoll evalwazzjoni tal-adegwatezza tal-politika tal-kontabilità użata, tar-raġonevolezza tal-estimi tal-kontabilità magħmula mill-maniġment u kif ukoll evalwazzjoni tal-preżentazzjoni tal-kontijiet inġenerali.

9.	Il-Qorti tqis li l-evidenza tal-verifika miksuba hija biżżejjed u xierqa biex tipprovdi bażi għall-opinjonijiet t’hawn taħt.

L-opinjoni dwar l-affidabbiltà tal-kontijiet

10.

Fl-opinjoni tal-Qorti, il-Kontijiet Annwali (11) tal-Eurojust jippreżentaw b’mod ġust, fl-aspetti materjali kollha, il-pożizzjoni finanzjarja tagħha fil-31 ta’ Diċembru 2008 u r-riżultati tal-operazzjonijiet tagħha u tal-likwidità tagħha għas-sena li ntemmet, skont id-dispożizzjonijiet tar-Regolament Finanzjarju tagħha.

L-opinjoni dwar il-legalità u r-regolarità tat-tranżazzjonijiet li fuqhom huma bbażati l-kontijiet

11.	Fl-opinjoni tal-Qorti, it-tranżazzjonijiet li fuqhom huma bbażati l-kontijiet annwali tal-Eurojust għas-sena finanzjarja li ntemmet fil-31 ta’ Diċembru 2008, fl-aspetti materjali kollha huma legali u regolari.

12.	Il-kummenti li ġejjin ma jpoġġux f’diskussjoni l-opinjonijiet tal-Qorti.

KUMMENTI DWAR IL-ĠESTJONI TAL-BAĠIT U DIK FINANZJARJA

13.

Il-livell tal-approprijazzjonijiet miġjuba ’l quddiem għas-sena ta’ wara, 3,5 miljun euro, kien ħafna aktar baxx milli fl-2007 (minn 25 % għal 13 % tal-approprijazzjonijiet tal-baġit finali), iżda l-livell ta’ kanċellazzjonijiet tal-approprijazzjonijiet miġjuba ’l quddiem mis-sena finanzjarja ta’ qabel, miljun euro (25 % tal-approprijazzjonijiet miġjuba ’l quddiem) kien għoli. Din is-sitwazzjoni ma kinitx tikkonforma mal-prinċipju tal-annwalità.

14.

Kif il-Qorti diġà semmiet (12), ir-rata għolja ta’ karigi battala (26 %) għalkemm inqas sinifikanti milli fl-2007 (33 %), għadha tindika nuqqasijiet fl-ippjanar u fl-implimentazzjoni tal-proċeduri tar-reklutaġġ. Barra minn hekk, dan kellu implikazzjonijiet fuq l-użu tal-approprijazzjonijiet tat-Titolu I, fejn ammont ta’ 1,8 miljun euro kien trasferit mill-approprijazzjonijiet għas-salarji tal-persunal temporanju u kuntrattwali, l-aktar sabiex jiżdiedu (b’238 %) l-approprijazzjonijiet għall-persunal interim. Din is-sitwazzjoni ma kinitx tikkonforma mal-prinċipju tal-ispeċifikazzjoni.

15.

Fir-rigward tal-akkwist, fil-biċċa l-kbira tal-każijiet ma sar l-ebda estimu min qabel tal-valur tas-suq qabel ma tnediet il-proċedura. Barra dan, analiżi tar-reġistru tal-eċċezzjonijiet (jiġifieri devjazzjonijiet minn politika, proċeduri jew kontrolli stabbiliti) wriet dgħufijiet rikorrenti u gravi fil-livell tal-monitoraġġ tal-kuntratti u fl-ipprogrammar tal-akkwisti. B’mod partikolari, 14-il eċċezzjoni ġew awtorizzati fl-2008 mid-Direttur, fejn 11 minnhom ippermettew estensjoni irregolari tal-kuntratti (lil hinn mit-tul ta’ żmien permess jew il-limitu massimu tal-baġit iffissat). Din is-sitwazzjoni (13), li diġà saru kummenti dwarha fir-Rapporti Annwali għall-2005, l-2006 u l-2007 (14), b’mod serju tpoġġi f’diskjussjoni l-kapaċità tas-servizzi varji involuti li jikkollaboraw b’mod xieraq u tindika nuqqas ta’ gwida u kontroll mill-uffiċjal li jawtorizza.

16.

Għal dak li għandu x’jaqsam mal-proċeduri ta’ għażla tal-persunal, ġeneralment xogħol il-bordijiet ta’ għażla ma kienx iddokumentat b’mod ċar, peress li ta’ sikwit il-minuti jew it-tabelli finali għall-klassifikazzjoni tal-kandidati kienu neqsin. F’każ minnhom, kandidat intern inħatar f’kariga ta’ Kap tal-Unità għalkemm ir-rekwiżiti minimi fir-rigward tal-esperjenza professjonali ma kinux issodisfati. Dawn is-sitwazzjonijiet ma kinux jiżguraw li l-kandidati esterni u interni jiġu ttrattati b’mod trasparenti u mhux diskriminatorju.

Dan ir-rapport ġie adottat mill-Qorti tal-Awdituri fil-Lussemburgu fil-laqgħa tagħha tat-8 ta’ Ottubru 2009.

Għall-Qorti tal-Awdituri

Vítor Manuel da SILVA CALDEIRA

President

Tabella

L-Eurojust (L-Aja)

Oqsma tal-kompetenza li joħorġu mit-Trattat dwar l-Unjoni Ewropea

Kompetenzi tal-Eurojust kif definiti fid-Deċiżjoni ta-Kunsill 2002/187/JHA

Tmexxija

Riżorsi disponibbli għall-Eurojust fl-2008

(Data għall-2007)

Prodotti u servizzi mogħtija fl-2008

(Data għall-2007)

Korp tat-tielet pilastru mwaqqaf permezz ta’ Deċiżjoni tal-Kunsill.

Il-mira tal-Unjoni hija li tipprovdi liċ-ċittadini b’livell għoli ta’ sigurtà fl-ambitu ta’ spazju ta’ libertà, sigurtà u ġustizzja.

Il-Kunsill jinkoraġġixxi l-koperazzjoni permezz tal-Eurojust billi jagħmilha possibbli għall-Eurojust li tiffaċilita l-koordinazzjoni tajba bejn l-awtoritajiet nazzjonali tal-prosekuzzjoni tal-Istati Membri.

(Estratti mill-Artikoli 29 u 31)

L-oqsma prinċipali ta’ responsabbiltà tal-Eurojust huma l-istess bħal dawk tal-Europol, jiġifieri l-ġlieda kontra t-terroriżmu, il-kriminalità organizzata, b’mod partikolari t-traffikar tad-droga, l-immigrazzjoni illegali, it-traffikar illeċitu ta’ karozzi, it-traffikar ta’ bnedmin, il-falsifikazzjoni tal-flus, it-traffikar ta’ sustanzi radjo-attivi, il-kriminalità tal-informatika, atti għad-detriment tal-interessi finanzjarji tal-Unjoni Ewropea u l-ħasil tal-flus.

Objettivi

L-Artikolu 3 tad-Deċiżjoni tal-Eurojust

—	Tistimola u ttejjeb il-koordinazzjoni, bejn l-awtoritajiet nazzjonali tal-Istati Membri responsabbli mill-investigazzjonijiet u prosekuzzjonijiet;

—	Ittejjeb il-koperazzjoni billi tiffaċilita l-iskambju ta’ informazzjoni, assistenza ġudizzjarja u l-implimentazzjoni ta’ ordnijiet ta’ estradizzjoni.

—	Ssostni l-awtoritajiet kompetenti tal-Istati Membri biex l-investigazzjonijiet u l-prosekuzzjonijiet tagħhom ikunu aktar effettivi.

—	Tagħti għajnuna fi proċeduri li jinvolvu Stat Membru u Stat li mhux membru.

—	Tagħti għajnuna fi proċeduri li jinvolvu Stat Membru u l-Komunità.

Kompiti

L-Artikoli 5, 6 u 7 tad-Deċiżjoni tal-Eurojust

Torganizza l-koperazzjoni bejn il-varji sistemi legali nazzjonali, l-Eurojust taħdem:

—	permezz tal-membri nazzjonali tagħha; jew

—	bħala Kulleġġ.

Jekk l-awtoritajiet kompetenti tal-Istat Membru ikkonċernat jiddeċiedu li ma jsegwux ir-rikjesti maħruġa mill-Eurojust bħala Kulleġġ huma għandhom jinfurmaw lill-Eurojust bir-raġunijiet għad-deċiżjoni tagħhom.

1 – Il-Kulleġġ huwa responsabbli mill-organizzazzjoni u l-operat tal-Eurojust.

2 – Il-Kulleġġ huwa magħmul minn membri nazzjonali ssekondati minn kull Stat Membru skont is-sistema legali, li huma prosekuturi, imħallfin jew uffiċjali tal-puliżija b’kompetenza ekwivalenti.

3 – Il-Kulleġġ jeleġi lill-President tiegħu minn fost il-membri nazzjonali.

4 – Il-Korp Konġunt ta’ Sorveljanza jiċċekkja l-ipproċessar tad-data personali.

5 – Id-Direttur Amministrattiv huwa maħtur unanimament mill-Kulleġġ.

6 – Verifika esterna

Il-Qorti tal-Awdituri.

7 – Awtorità ta’ kwittanza

Il-Parlament fuq rakkomandazzjoni tal-Kunsill

Baġit

24,8 Miljun euro (18,9).

Persunal fil-31 ta’ Diċembru 2008

175 (147) ppjanati fil-Pjan tal-Istabbiliment

Li minnhom okkupati: 130 (98)

43 (32) Kariga oħra:

aġenti kuntrattwali, 12-il espert nazzjonali ssekondat, 19-il interim)

49 oħra (Membri nazzjonali, prosekuturi ta’ kollaborazzjoni, deputati u assistenti)

Persunal totali: 222 (179)

Kompiti operazzjonali: 117 (95)

Kompiti amministrattivi: 80 (65)

Kompiti mħallta: 25 (19)

Għadd ta’ laqgħat: 131 (91)

Laqgħat standard: 168 (236)

Każijiet kumplessi: 1 025(849)

Għadd totali ta’ każijiet: 1 193(1 085)

Frodi: 810

% Frodi: 68 % (69 %)

Traffikar tad-droga: 223 (207)

% Traffikar tad-droga: 19 % (19 %)

Terroriżmu: 23 (23)

% Terroriżmu: 2 % (2 %)

Qtil: 86 (80)

% Qtil: 7 % (7 %)

Traffikar ta’ bnedmin: 83 (71)

Traffikar ta’ bnedmin: 7 % (7 %)

Sors: Informazzjoni mogħtija mill-Eurojust.

IR-RISPOSTI TAL-EUROJUST

13.

Nofs il-miljun euro kkanċellat kien dovut għal fatturi esterni relatati ma’ obbligi u koordinazzjoni tax-xogħol tal-każ tal-Istati ospiti. L-Eurojust sejjer jagħmel ħiltu kollha sabiex ikollu stampa iktar ċara minn partijiet esterni fl-2009, b’hekk inaqqas il-kanċellazzjonijiet tal-approprijazzjonijiet.

14.

L-Eurojust ikompli jindirizza n-nuqqasijiet fil-proċeduri tar-reklutaġġ. In-numru ta’ personal interim tnaqqas drastikament u għaldaqstant, b’riżultat ta’ dan, il-ħtieġa għal trasferiment tal-approprijazzjonijiet naqqset bi kbir. Għaldaqstant, fl-2009, trasferiment għoli bħal dan mhux sejjer ikun neċessarju.

15.	Il-proċeduri mnedija minn dak iż-żmien jipprovdu stima tal-valur. It-twaqqif ta’ sistema ta’ ppjanar fl-2009 irriżulta f’ipprogrammar aħjar tal-proċess tal-akkwisti. Barra minn hekk, qiegħed jiġi implimentat pjan ta’ azzjoni dwar l-akkwisti li jindirizza d-dgħjufijiet identifikati mill-Qorti.

16.	Eurojust qiegħed jindirizza d-dgħjufijiet li għandhom x’jaqsmu mal-minuti u mat-tabelli finali ta’ evalwazzjoni. Barra minn hekk, minn dak iż-żmien, is-sitwazzjoni indirizzata mill-Qorti ġiet regolarizzata u fl-2009, tnediet proċedura ta’ reklutaġġ.

(1) Id-Deċiżjoni tat-28 ta’ Frar 2002 li tistabbilixxi l-Eurojust (ĠU L 63, 6.3.2002, p. 1).

(2) It-Tabella tagħti sommarju tal-kompetenzi u l-attivitajiet tal-Eurojust. Tiġi ppreżentata għal skopijiet ta’ informazzjoni.

(3) Dawn il-kontijiet huma akkumpanjati minn rapport dwar il-ġestjoni tal-baġit u dik finanzjarja matul is-sena li, fost l-oħrajn, jagħti rendikont tar-rata ta’ implimentazzjoni tal-approprijazzjonijiet flimkien ma’ informazzjoni fil-qosor dwar it-trasferimenti tal-approprijazzjonijiet fost il-partiti varji tal-baġit.

(4) Ir-rendikonti finanzjarji jinkludu l-karta tal-bilanċ u l-kont tar-riżultat ekonomiku, it-tabella tal-likwidità, ir-rendikont tat-tibdil fil-kapital u l-anness għar-rendikonti finanzjarji li jinkludi d-deskrizzjoni tal-politika tal-kontabilità prinċipali u informazzjoni oħra ta’ spjegazzjoni.

(5) Ir-rapporti tal-implimentazzjoni tal-baġit jikkonsistu fil-kont tar-riżultat tal-baġit u fl-anness tiegħu.

(6) ĠU L 248, 16.9.2002, p. 1.

(7) L-Artikolu 33 tar-Regolament tal-Kummissjoni (KE, Euratom) Nru 2343/2002 tat-23 ta’ Diċembru 2002 (ĠU L 357, 31.12.2002, p. 72)

(8) L-Artikolu 38 tar-Regolament tal-Kummissjoni (KE, Euratom) Nru 2343/2002.

(9) Ir-regoli dwar il-preżentazzjoni tal-kontijiet u tal-kontabilità mill-Aġenziji huma stabbiliti fil-kapitolu 1 tat-Titlu VII tar-Regolament tal-Kummissjoni (KE, Euratom) Nru 2343/2002 kif l-aħħar emendat bir-Regolament tal-Kummissjoni (KE, Euratom) Nru 652/2008 tad-9 ta’ Lulju 2008 (ĠU L 181, 10.7.2008, p. 23) u huma fil-fatt integrati fir-Regolament Finanzjarju tal-Eurojust.

(10) Il-Federazzjoni Internazzjonali tal-Kontabilisti (IFAC) u l-Istandards Internazzjonali tal-Istituzzjonijiet Supremi tal-Verifika (ISSAI).

(11) Il-Kontijiet Annwali Finali kienu ppreparati fit-30 ta’ Ġunju 2009 u rċevuti mill-Qorti fis-6 ta’ Lulju 2009. Il-Kontijiet Annwali Finali, konsolidati ma’ dawk tal-Kummissjoni huma ppubblikati fil-Ġurnal Uffiċjali tal-Unjoni Ewropea sal-15 ta’ Novembru tas-sena ta’ wara. Dawn jistgħu jinstabu fuq il-websajt li ġej http://eca.europa.eu jew http://www.eurojust.europa.eu/adm_budg_finance.htm

(12) Ara l-paragrafu 9 tar-Rapport Annwali għall-2007 (ĠU C 311, 5.12.2008, p. 143).

(13) Valur totali: 390 000 euro.

(14) Pereżempju ara l-paragrafu 8 tar-rapport annwali tal-2007 (ĠU C 311, 5.12.2008, p. 143), il-paragrafu 8 tar-rapport annwali tal-2006 (ĠU C 309, 19.12.2007, p. 112) u l-paragrafu 11 tar-rapport annwali tal-2005 (ĠU C 312, 19.12.2006, p. 69).

Top

Choose the experimental features you want to try