19.11.2009   

MT

Il-Ġurnal Uffiċjali tal-Unjoni Ewropea

CE 279/71

—

billi din is-sena jaħbat is-60 anniversarju tad-Dikjarazzjoni Universali tad-Drittijiet tal-Bniedem, li l-Artikolu 25(1) tagħha jikkonċerna d-dritt għall-ikel;

—

wara li kkunsidra l-Konklużjonijiet tas-Sammit Dinji tal-Ikel tal-1996 u l-objettiv li jitnaqqas bin-nofs in-numru ta' persuni li jbatu l-ġuħ sa l-2015,

—

wara li kkunsidra l-obbligi li hemm fil-Konvenzjoni Internazzjonali tan-NU dwar id-Drittijiet Ekonomiċi, Soċjali u Kulturali, partikolarment l-Artikolu 11 tiegħu dwar id-dritt għall-ikel, li tiegħu l-Istati Membri kollha tal-Unjoni Ewropea huma Firmatarji,

—

wara li kkunsidra s-Sessjoni Speċjali tal-Kunsill tan-NU għad-Drittijiet tal-Bniedem dwar “L-impatt negattiv li l-qagħda mwiegħra tal-kriżi dinjija tal-ikel, kkawżata inter alia mill-prezzijiet għoljin ħafna tal-ikel, għandha fuq il-kisba tad-dritt għall-ikel” li ser issir f'Ġinevra fit-22 ta' Mejju 2008,

—

wara li kkunsidra d-Dikjarazzjoni Konġunta mill-Kunsill u r-Rappreżentanti tal-Gvernijiet tal-Istati Membri li jiltaqgħu fi ħdan il-Kunsill, il-Parlament Ewropew u l-Kummissjoni Ewropea dwar l-għajnuna umanitarja tal-Unjoni Ewropea intitolata “l-Konsensus Ewropew dwar l-Għajnuna Umanitarja” (1),

—

wara li kkunsidra l-Artikolu 33 tat-Trattat KE,

—

wara li kkunsidra “l-kontroll tas-saħħa tal-PAK” li għadu għaddej,

—

wara li kkunsidra r-rakkomandazzjonijiet riċenti tal-Evalwazzjoni Internazzjonali tal-Agrikoltura, ix-Xjenza u t-Teknoloġija (IAASTD) dwar il-produzzjoni globali tal-ikel, imnedija u mwettqa bl-appoġġ tal-Programm għall-Iżvilupp tan-Nazzjonijiet Uniti, tal-Organizzazzjoni tal-Ikel u l-Agrikultura, tal-Bank Dinji u ta' entitajiet oħra tal-komunità internazzjonali;

—

wara li kkunsidra r-rapporti tal-Panel Intergovernattiv dwar il-Bidla fil-Klima (IPCC),

—

wara li kkunsidra n-negozjati attwali dwar Ir-Rawnd ta' Żvilupp ta' Doħa,

—

wara li kkunsidra d-dikjarazzjoni ta' Kigali tat-22 ta' Novembru 2007 dwar l-iżvilupp ta' Ftehimiet ta' Sħubija Ekonomika (EPAs), adottat mill-Assemblea Parlamentari Konġunta tal-ACP-UE,

—

wara li kkunsidra r-riżoluzzjoni tiegħu tal-25 ta' Ottubru 2007 dwar prezzijiet tal-għalf u tal-ikel li qed jogħlew (2),

—

wara li kkunsidra l-Artikolu 103(4) tar-Regoli ta' Proċedura tiegħu,

A.

Billi wara snin ta' staġnar u tnaqqis fil-prezzijiet tal-prodotti bażiċi, iż-żidiet fil-prezz dinji tal-qamħ laħqu l-181 % fuq medda ta' 36 xahar qabel Frar 2008, il-prezzijiet tar-ross żdiedu b'141 % minn Jannar 2008 u l-prezzijiet globali tal-ikel żdiedu bi 83 %,

B.

billi ż-żieda fil-prezzijiet tefgħet lura l-objettivi tat-tnaqqis tal-faqar b'7 snin u billi skond il-kalkolazzjonijiet tal-Bank Dinji '>l fuq minn 100 miljun persuna fid-dinja li qed tiżviluppa jistgħu jsofru faqar agħar minħabba ż-żieda kontinwa fil-prezzijiet tal-ikel,

C.

billi 854 miljun persuna fid-dinja jinsabu bil-ġuħ jew nieqsa minn ikel sustanzjuż (insigurtá tal-ikel), b'4 miljuni oħra jiżdiedu magħhom kull sena; billi 170 miljun tifel u tifla mhumiex mitmugħa biżżejjed u 5.6 miljun tifel u tifla jmutu kull sena minħabba nuqqas ta' ikel sustanzjuż,

D.

billi l-kriżi attwali tal-ikel hija wkoll ir-riżultat ta' żieda fl-ispekulazzjoni fil-prodotti bażiċi tal-ikel u dawk agrikoli,

E.

billi skond il-FAO, l-ikel jirrapreżenta bejn 60 u 80 % tal-infiq tal-konsumatur f'pajjiżi li qed jiżviluppaw u madwar 10 sa 20 % f'nazzjonijiet industrijalizzati; billi ż-żieda fil-prezzijiet tal-ikel għandha l-aktar effett kbir fuq familji li għandhom dħul baxx,

F.

billi f'dawn l-aħħar għaxriet ta' snin, il-Bank Dinji, il-Fond Monetarju Internazzjonali u l-Organizzazzjoni Dinjija tal-Kummerċ imponew liberalizzazzjoni kummerċjali fil-pajjiżi li qed jiżviluppaw, sabiex jiġi impost mudell dominanti ta' agrikoltura fuq skala kbira mmirata biex tkun esportata bi ħsara għall-produzzjoni lokali sostenibbli tal-ikel u għas-swieq tal-ikel,

G.

billi ż-żieda fil-prezzijiet qed taggrava l-problemi ta' aċċessibilità, b'mod partikolari fir-rigward ta' dawk li għandhom dħul baxx jew m'għandhomx dħul,

H.

billi t-talba għall-ikel qed tiżdied, speċjalment f'pajjiżi emerġenti bħal m'huma ċ-Ċina u l-Indja, hekk kif il-popolazzjoni tad-dinja qed tiżdied; billi d-dinja, li skond il-FAO tista' titma' 12-il biljun ruħ, mhijiex nieqsa mill-ikel b'mod globali; ifakkar li l-ħsad tal-qamħ u tar-ross kien tajjeb ħafna fl-2007; billi 1.01 biljun tunnellata biss tal-ħsad tal-2007 hemm ċans li jintuża biex jitma' lin-nies, filwaqt li parti kbira jintuża biex jintemgħu l-annimali (760 miljun tunnellata) u madwar 100 miljun tunnellata jintużaw biex jiġu prodotti l-agrofjuwils; billi l-aktar estimi riċenti jindikaw li l-produzzjoni dinjija taċ-ċereali fl-2008 għandha tiżdied bi 2,6 % għal rekord ta' 2,164 biljun tunnellata; billi, iżda, dawn l-estimi jiddependu fuq kundizzjonijiet klimatiċi favorevoli,

I.

billi ħafna mill-pajjiżi li qed jiżviluppaw m'humiex qed iwettqu l-potenzjal tagħhom ta' produzzjoni tal-ikel; billi n-nuqqas ta' investiment fl-agrikoltura, l-iżvilupp rurali u t-taħriġ tal-bdiewa fil-pajjiżi li qed jiżviluppaw u minn istituzzjonijiet finanzjarji internazzjonali esponew lill-bdiewa żgħar għal kompetizzjoni inġusta, sitwazzjoni li żiedet il-faqar u d-djgħufija tagħhom u naqqset il-kapaċità tagħhom li jipproduċu ikel biżżejjed,

J.

billi ostakolu serju għal produzzjoni agrikola akbar fil-pajjiżi li qed jiżviluppaw huwa li l-bdiewa ż-żgħar spiss ma jkollhomx aċċess għal self jew mikrokrediti għal titjib ta' żrieragħ, fertilizzanti u mekkaniżmi ta' tisqija u għall-firxa meħtieġa ta' għodod ta' ħarsien tal-uċuħ tar-raba' biex jipproteġu l-ħsad tagħhom mill-organiżmi li jagħmlu l-ħsara u mill-mard, xi kultant minħabba l-fatt li l-art ma tkunx tagħhom u għaldaqstant ma jkollhom ebda garanzija fuq is-self,

K.

billi l-Programm Dinji tal-Ikel (WFP) wera li huma biss USD 260 miljun minn USD 750 miljun meħtieġa li s'issa ġew konfermati biex ikopru l-bżonnijiet tal-2008,

L.

billi l-impatt taż-żieda fil-prezzijiet tal-prodotti qed issir forza ta' distabbilizzazzjoni fl-ekonomija globali u diġà qabbdet irvellijiet f'diversi pajjiżi,

M.

billi ż-żieda fil-prezzijiet tal-ikel tintensifika l-ħtieġa għal risposta politika integrata u għal strateġija komprensiva sabiex tiġi ttrattata il-problema tal-ikel,

1.

Jenfasizza n-natura fundamentali tad-dritt għall-ikel u l-ħtieġa li jitjieb l-aċċess għal kulħadd u f'kull żmien għal ikel suffiċjenti li jwassal għal ħajja attiva u b'saħħitha; jenfasizza li l-Istati għandhom obbligu li jipproteġu, jirrispettaw u jwettqu dan id-dritt fundamentali tal-bniedem; jenfasizza li l-fatt li 2 biljun persuna għadhom jgħixu f'faqar kbir u li 850 miljun persuna jbatu l-ġuħ kuljum jixhed ksur sistematiku tad-dritt għall-ikel, kif miġbur fil-liġi internazzjonali dwar id-drittijiet tal-bniedem; għalhekk jitlob li jkun hemm miżuri adegwati biex jiġu implimentati d-dispożizzjonijiet tad-Dikjarazzjoni Universali tad-Drittijiet tal-Bniedem dwar id-dritt għall-ikel; iħeġġeġ lill-Kunsill sabiex jiżgura koerenza fil-politiki nazzjonali u internazzjonali kollha relatati mal-ikel mal-obbligi skond id-dritt għall-ikel;

2.

Jistieden lill-Kunsill biex iżid l-impenn tiegħu lejn l-Għanijiet tal-Millenju għall-Iżvilupp (MDGs) billi jerġa' jafferma l-impenji ta' finanzjament u billi jadotta aġenda għal azzjoni tal-UE fir-rigward tal-MDGs waqt il-Kunsill Ewropew ta' Ġunju; jikkunsidra li din l-aġenda għal azzjoni tal-UE għandha tidentifika avvenimenti importanti u azzjonijiet speċifiċi li għandhom jintlaħqu fil-limiti ta' skadenzi f'oqsma ewlenin bħall-edukazzjoni, is-saħħa, l-ilma, l-agrikoltura, it-tkabbir u l-infrastruttura u li għandhom jagħtu kontribut biex jiġi żgurat li l-MDGs jintlaħqu sa l-2015, bil-ħsieb, fost objettivi oħrajn, li jinqered il-ġuħ sa l-2015;

3.

Jinsab imħasseb dwar l-effetti tal-ispekulazzjoni fuq il-prodotti bażiċi tal-ikel, inklużi fondi ta' lqugħ (hedge funds) fuq prodotti bażiċi, li qed ikollha fuq il-ġuħ u l-faqar; jistieden lill-Kummissjoni sabiex tanalizza l-effett tal-ispekulazzjoni fuq il-prezzijiet tal-ikel u sabiex toħroġ b'miżuri xierqa fuq il-bażi ta' din l-analiżi;

4.

Jiġbed l-attenzjoni għall-fatt li din il-kriżi tal-ikel hi marbuta sew mal-kriżi finanzjarja li fiha injezzjonijiet ta' likwiditá mill-banek ċentrali sabiex jevitaw il-fallimenti, setgħu żiedu l-investimenti spekulattivi fil-prodotti; jistieden lill-IMF u lill-Forum ta' Stabilitá Finanzjarja (FSF) sabiex jevalwaw dan “l-effett sekondarju” u jqisu dan meta jipproponu rimedji globali;

5.

Ifakkar li dawk li qed isofru l-aktar minn din il-kriżi huma l-livelli l-anqas favoriti tal-popolazzjoni u għalhekk jisħaq dwar il-ħtieġa ta' politiki soċjali xierqa sabiex il-popolazzjonijiet fqar u imċaħħdin jingħataw is-setgħa u sabiex jittaffew l-effetti tal-kriżijiet attwali tal-ikel;

6.

Jenfasizza li l-forniment tal-ikel lill-popli kollha madwar id-dinja għandu jiġi qabel kull għan ieħor; jisħaq li l-ikel għandu jkun disponibbli bi prezzijiet raġjonevoli, kif hemm imniżżel fl-Artikolu 33 tat-Trattat KE;

7.

Ifakkar il-ħtieġa li jiġu żgurati regolazzjoni globali u interni tas-swieq agrikoli fl-interess tal-konsumatur, id-dħul tal-bdiewa u l-industriji tal-ipproċessar u politika sostenibbli għall-ikel fl-UE;

8.

Ifakkar li l-għan ewlieni tal-PAK huwa li tiggarantixxi l-istabiliżżazzjoni tas-suq, provvista sigura u prezzijiet raġonevoli għall-konsumaturi u jenfasizza l-bżonn għall-PAK wara l-2013, sabiex tiġi żgurata politika sustenibbli tal-ikel għall-UE filwaqt li jiġu rispettati s-sustenibilità, is-sigurta' u l-kwalità tal-prodotti agrikoli;

9.

Jenfasizza li l-ispejjeż tal-materja prima huma parti relattivament żgħira mill-ispiża totali ta' ħafna mill-prodotti tal-ikel; jistieden lill-Kummissjoni u lill-Istati Membri biex janalizzaw id-diskrepanzi bejn il-prezzijiet tal-prodotti meta jitilqu mill-farm u dawk mitluba mill-bejjiegħa ewlenin tal-prodotti bl-imnut;

10.

Għalhekk jitlob li ssir evalwazzjoni tal-impatt li l-irwol tal-bejjiegħa bl-imnut għandu fuq il-katina tal-ikel għaliex il-prezzijiet tal-bejgħ tal-ikel bl-imnut tela' b'mod sproporzjonat meta mqabbel mal-għoli tal-ħajja; jistieden lill-bejjiegħa tal-prodotti bl-imnut biex jagħtu prezz ġust lill-produtturi, waqt li fl-istess ħin jipprovdu lill-konsumaturi b'ikel bi prezzijiet raġjonevoli;

11.

Jirrimarka li l-ħażniet attwali taċ-ċereali tal-UE jservu biss għal 30 ġurnata, u jistaqsi jekk il-ħażniet tal-ikel tagħna humiex fil-livell it-tajjeb, speċjalment minħabba li jistgħu jinqalgħu xi kriżijiet; jitlob lill-Kummissjoni sabiex tiżviluppa strateġiji sabiex toħloq ħażniet tal-ikel sabiex tevita kriżijiet futuri;

12.

Jitlob li jsir tbassir aħjar tal-produzzjoni agrikola sabiex ikun possibbli li jiġu identifikati minn ħafna qabel ix-xejriet ewlenin fil-provvista dinjija tal-ikel;

13.

Jenfasizza li s-sitwazzjoni tad-dħul tal-bdiewa tal-UE trid tiġi rrispettata; jirrimarka li biż-żieda fil-prezzijiet tal-għalf, l-enerġija, il-fertilizzant u affarijiet oħra li huma meħtieġa għall-agrikoltura, u bi standards ta' konformità li qed jiġu jiswew dejjem aktar, il-bdiewa għandhom bżonn jaraw id-dħul tagħhom jiżdied b'mod konsiderevoli jekk għandhom jibqgħu jkunu kapaċi jissodisfaw id-domanda għall-ikel; jirrimarka li d-dħul tal-farms żdied biss kemm kemm u li l-bdiewa f'ċerti Stati Membri fil-fatt raw id-dħul tagħhom jonqos;

14.

Jitlob li l-promozzjoni ta' politiki sostenibbli tal-agrikoltura tiġi inkluża fl-istrumenti ta' tkabbir u tal-viċinanzi kollha;

15.

Jitlob li l-operaturi ta' pajjiżi terzi jkunu soġġetti għall-istess livell ta' kontrolli bħall-produtturi tal-UE, iżda jirrikonoxxi l-ħtieġa li l-pajjiżi li qed jiżviluppaw jiġu megħjuna jissodisfaw l-istandards fitosanitarji tal-UE;

16.

Jilqa' b'sodisfazzjon id-deċiżjoni tal-Ministri tal-Agrikoltura tal-UE li tiġi adottata l-proposta tal-Kummissjoni biex l-obbligi tal-2008, li jitolbu li l-art titħalla mingħajr użu agrikolu, jiġu sospiżi u jinnota l-estimi tal-Kummissjoni li dan il-pass se jeħles madwar 2.9 miljuni ta' ettari għall-produzzjoni tal-qmugħ u li se jżid il-ħsad ta' din is-sena b'madwar 10 miljun tunnellata;

17.

Jistieden lill-Kummissjoni sabiex twettaq evalwazzjoni tal-impatt dwar is-sikurezza tal-ikel tal-politiki attwali tal-UE fl-oqsma tal-politiki li jirrigwardaw il-PAK, tal-miri ta' sorsi ta' enerġija li jiġġeddu, tal-għajnuna għall-iżvilupp, u tal-ftehimiet tal-kummerċ internazzjonali sabiex titjieb is-sikurezza tal-ikel fuq livell globali;

18.

Jenfasizza li l-ikel għandu jingħata prijorità fuq il-fjuwil u li l-produzzjoni tal-bijofjuwil għandha tkun marbuta ma' kriterji ta' sostenibilità b'saħħithom; jinnota li sabiex jintlaħqu l-objettivi proposti għall-bijofjuwils, dawn il-kriterji jridu jiġu sodisfatti;

19.

Jaċċetta li s-sussidju tal-UE tal-uċuħ maħsuba għall-produzzjoni tal-bijofjuwils m'għadhomx iġġustifikati, iżda jenfasizza bl-aktar mod qawwi possibbli li minn 2 sa 3 fil-mija biss tal-art agrikola tal-UE qiegħda fil-preżent tintuża għal dan it-tip ta' produzzjoni u r-rapporti fil-midja li jagħtu t-tort lill-bijofjuwils għall-kriżi attwali tal-ikel huma esaġerati sa fejn għandha x'taqsam l-UE; jaqbel, madankollu, li l-politika f'pajjiżi bħall-Istati Uniti fejn tiġi allokata aktar art għat-tkabbir tal-qamħirrun biex jiġi prodott il-bijoetanol kellu effett indirett fuq il-prezz u d-disponibilità tal-qamħirrun u ċereali oħra fis-suq globali tal-ikel;

20.

Jistieden lill-Kummissjoni u lill-Istati Membri, madankollu, biex jagħmlu iktar biex jippromwovu l-użu u l-produzzjoni tal-bijoenerġija tat-tieni ġenerazzjoni, li tipproċessa d-demel u materjali ta' skart agrikolu, minflok prodotti agrikoli primarji;

21.

Jenfasizza b'mod partikulari li għandha tingħata prijorità għolja għall-ġbir tal-iskart muniċipali u ta' residwi agrikoli u tal-foresti u li dawn jiġu mibdula f'gass; jiġbed l-attenzjoni li dan jippermetti li t-teknoloġiji xierqa jiġu żviluppati u jagħti ż-żmien li jkunu eżaminati l-kompatibilità tal-produzzjoni tal-ikel u tal-produzzjoni tal-enerġija;

22.

Jinnota bi tħassib serju li l-ispiża tal-għalf kompost għoliet b' 75 għal kull tunnellata u qed tkompli togħla minħabba nuqqas akut ta' qmuħ għall-għalf, u li dan jirrappreżenta spiża addizzjonali ta' 15-il biljun għall-industrija tal-UE tal-bhejjem tat-trobbija;

23.

Jidhirlu li l-kriżi attwali titlob diskussjoni immedjata u dettaljata fost l-istituzzjonijiet tal-UE u l-Istati Membri dwar l-irwol li l-bijoteknoloġija moderna jista' jkollha biex jiġi żgurat li l-ikel jibqa' jiġi prodott bi prezzijiet raġunevoli;

24.

Iqis li ġlieda ġenwina kontra l-ġuħ tirrikjedi politika globali u sostenibbli għall-iżvilupp sabiex tippermetti lill-pajjiżi li qed jiżviluppaw li jipproduċu u jfornu l-popolazzjoni tagħhom b'ilma u ikel biżżejjed;

25.

Jagħti l-appoġġ tiegħu lill-pajjiżi li qegħdin jiżviluppaw fl-isforzi tagħhom sabiex jiżguraw li l-popolazzjonijiet lokali jkollhom aċċess għall-ikel; jemmen li l-ispazju vijabbli għall-politika għandu jissaħħaħ aktar sabiex ikun hemm lok għal regoli u miżuri nazzjonali għall-iżvilupp ta' dan is-settur; iqis il-Malawi bħala eżempju pożittiv ta' pajjiż li qed jiżviluppa fejn il-produzzjoni tal-ikel irduppjat fl-aħħar tliet snin u jenfasizza li l-UE qed twettaq rwol ta' appoġġ f'dan l-iżvilupp; jistieden lill-Kummissjoni sabiex tipprovdi għajnuna ħalli dan il-fenomenu jkun magħruf, sabiex jista' jittieħed bħala eżempju f'pajjiżi oħra li qed jiżviluppaw;

26.

Jistieden lill-Istati Membri u lill-komunità internazzjonali sabiex jissodisfaw it-talba straordinarja ta' emerġenza li l-WFP għamel b'mod urġenti u sabiex jappoġjaw dan il-programm biex ikun jista' jilqa' l-isfidi l-ġodda fil-ġlieda kontra l-ġuħ; iqis, madankollu, li d-dipendenza fuq l-operazzjonijiet tal-għajnuna alimentari jeħtieġ li tonqos u jisħaq, għalhekk, dwar il-ħtieġa ta' azzjonijiet fuq perjodu medju u fuq perjodu twil biex jiġu evitati aktar konsegwenzi ta' ħsara u sabiex ikunu indirizzati l-kawżi radikali ta' din il-kriżi;

27.

Jitlob għal żieda urġenti u sostanzjali fl-investiment fl-agrikolura, fl-iżvilupp rurali u fil-kummerċ agrikolu fil-pajjiżi li qed jiżviluppaw, li tkun tiffoka fuq bdiewa fqar u biedja fuq skala żgħira bbażata fuq sistemi ta' produzzjoni agroekoloġiċi; ifakkar li 75 % tal-popolazzjoni l-aktar fqira tad-dinja tgħix f'zoni rurali, imma li biss 4 % ta' għajnuna uffiċjali għall-iżvilupp (ODA) hi dedikata għall-agrikoltura; jistieden, għalhekk, lill-Kummissjoni u lill-Istati Membri sabiex jindirizzaw il-kwistjoni tal-agrikultura b'moa aktar effettiv fil-politiki tagħhom għall-iżvilupp u sabiex jippromwovi l-aġġustament tal-ipprogrammar tal-10 Fond Ewropew għall-Iżvilupp (EDF) b'kooperazzjoni mill-qrib ma' pajjiżi li qed jiżviluppaw u sabiex jerġgħu jindirizzaw id-dokumenti ta' strateġija bħala mezz ta' kif l-agrikultura tingħata prijorità ogħla; jenfasizza l-irwol tal-NGOs u tal-awtoritajiet lokali biex jinstabu soluzzjonijiet agrikoli innovattivi fi ftehimiet ta' sħubija mal-popolazzjonijiet ta' pajjiżi li qed jiżviluppaw u jistieden lill-Kummissjoni u lill-Istati Membri sabiex jappoġġjaw u jippromovu l-proġetti tagħhom;

28.

Jenfasizza dwar il-ħtieġa li bdiewa ż-żgħar f'pajjiżi fqar, li huma l-aktar nisa, jingħataw aċċess għall-art, għal servizzi finanzjarji u ta' kreditu, għal żrieragħ li jipproduċu ħafna, għal sistemi ta' tisqija u għal fertilizzanti; jenfasizza li l-investiment fis-settur tal-agrikoltura jeħtieġ li jkun iffukat aktar fuq tisqija, toroq rurali, riċerka u tagħrif lokali, taħriġ u skambji tal-aħjar prattiċi sabiex jiġu żviluppati sistemi ta' wċuħ ir-raba' li jkunu sostenibbli u effiċjenti, ilma tajjeb għax-xorb nadif u edukazzjoni u kif ukoll fuq it-tisħiħ tal-produzzjoni lokali u tal-iskambji tas-suq; jistieden, għalhekk, lill-Kummissjoni sabiex tinforza dawn l-aspetti fl-azzjoni tagħha u biex tappoġġja organizzazzjonijiet ta', il-mikrokreditu u programmi ta' servizzi finanzjarji oħra kif ukoll ż-żieda fl-investiment fl-agrikoltura;

29.

Jistieden lill-Bank Ewropew ta' Investiment biex jinvestiga l-possibilitajiet ta' ħolqien immedjat ta' fond ta' garanzija li jappoġġja skemi nazzjonali ta' mikro-kreditu u skemi ta' “risk-hedging” li joperaw viċin il-bżonnijiet tal-prodotti lokali tal-ikel speċjalment fl-ifqar pajjiżi qed jiżviluppaw;

30.

Jenfasizza l-ħtieġa ta' koperazzjoni dwar il-bidla fil-klima bejn l-UE u l-pajjiżi li qed jiżviluppaw, partikolarment il-ħtieġa għal trasferiment ta' teknoloġija u bini tal-kapaċitajiet; jenfasizza li l-bidla fil-klima għandha tkun integrata fil-koperazzjoni ta' żvilupp kollu tal-UE u jenfasizza li xi salvagwardji sempliċi għandhom jgħinu lill-bdiewa jipproteġu l-prodotti tagħhom min-nixfa u minn diżastri oħra, u jsejjaħ lill-Kummissjoni sabiex tesplorahom; jistieden lill-komunità internazzjonali biex tintensifika l-isforzi tagħha biex tiġġieled id-deżertifikazzjoni, id-degradazzjoni tal-art u n-nixfa sabiex ittejjeb is-sigurtà tal-ikel u l-aċċess għall-ikel, speċjalment fil-pajjiżi l-foqra;

31.

Jisħaq fuq l-importanza ta' investimenti xierqa fil-qasam tar-riċerka bl-objettiv li jsir progress fil-ħsad fir-reġjuni kollha tad-dinja;

32.

Jitlob, b'mod partikolari, li l-iżvilupp kollu fil-GMOs kif ukoll id-dibattitu politiku kollu dwar dan is-suġġett jiġu segwiti bir-reqqa;

33.

Iqis li l-pajjiżi għandu jkollhom id-dritt għas-sovranità u għas-sigurtà tal-ikel, u għandhom id-dritt li jipproteġu s-suq tagħhom kontra l-importazzjonijiet ta' prodotti sussidjati; iqis li dawn is-sussidji tal-prodotti agrikoli għall-esportazzjoni jiddestabilizzaw is-swieq lokali fil-pajjiżi li qed jiżviluppaw

34.

Iqis li l-ftuħ tas-swieq agrikoli jeħtieġ li jkun progressivi, bi qbil mal-progress ta' żvilupp ta' kull pajjiż li qed jiżviluppa u bbażat fuq regoli ta' kummerċ li jkunu ġusti u li ma jagħmlux ħsara ambjentali; jinnota li prodotti sensittivi li huma ħtiġiet bażiċi għall-persuni fil-pajjiżi li qed jiżviluppaw jew ta' importanza partikolari għas-sigurtá tal-ikel u għall-iżvilupp rurali f'pajjiżi li qed jiżviluppaw, għandhom ikunu esklużi minn liberalizzazzjoni sħiħa sabiex ikunu evitati danni irreversibbli għall-produtturi lokali; jenfasizza li l-UE għandha tippromovi sistema preferenzjali u asimetrika fin-negozjati tal-kummerċ ma' pajjiżi li qed jiżviluppaw sabiex tippermettilhom li jżommu ċertu ammont ta' mmaniġġjar tal-provvisti u għodda ta' żvilupp oħra fis-swieq tagħhom; jirrimarka li l-pajjiżi l-inqas żviluppati kellhom u għad għandhom aċċess mingħajr kwoti jew tariffi għas-suq tal-UE, skond il-ftehim “Kollox Minbarra l-Armi” (EBA);

35.

Jenfasizza li fin-negozjati attwali tal-Ftehima ta' Sħubija Ekonomika (EPA), il-prijoritá tal-Kummissjoni għandha tkun li tirrispondi għall-ħtiġijiiet ta' żvilupp espressi mill-pajjiżi tal-Afrika, il-Karibbew u l-Paċifiku (ACP); ifakkar li sabiex tingħeleb din l-isfida, l-EPAs għandhom ikunu akkumpanjati mill-fondi l-ġodda li diġá ġew imwiegħda għall-Għajnuna għall-Kummerċ (EUR 2 biljun fis-sena sa l-2010) u bil-promozzjoni tal-integrazzjoni regjonali;

36.

Jenfasizza l-ħtieġa ta' riżultat tajjeb u ġust fid-Rawnd ta' Doħa; jenfasizza li r-riżultati tar-Rawnd ta' Doħa għandhom jagħtu inċentivi pożittivi lill-pajjiżi li qed jiżviluppaw sabiex jinvestu fl-agrikultura u fil-produzzjoni tal-ikel tagħhom; jistieden lill-Kummissjoni sabiex tappoġġja proposti ħalli tiġi inkluża azzjoni dwar il-prezzijiet tal-ikel bażiku fis-sensiela ta' negozjati attwali tad-WTO;

37.

Itenni l-istedina tiegħu lill-Kummissjoni u lill-Kunsill biex jippromwovu l-Kummerċ Ġust u skemi etiċi li jagħtu kontribut biex jgħollu l-istandards soċjali u ambjentali u jgħinu produtturi żgħar u marġinalizzati f'pajjiżi li qegħdin jiżviluppaw, inaqqsu l-inċertezza, jiggarantixxu prezzijiet u dħul aktar ġusti filwaqt li jinkuraġġixxi l-awtoritajiet pubbliċi fl-UE biex jintegraw il-kummerċ ġust fil-kriterji ta' sostenibilità fil-politiki tagħhom dwar l-appalt u l-akkwist pubbliku;

38.

Jenfasizza li l-kriżi attwali tal-ikel turi l-ħtieġa li jkunu promossi l-istabilitá politika, l-integrazzjoni reġjonali, id-demokrazija u d-drittijiet tal-bniedem, mhux biss fl-UE, imma wkoll fid-dinja kollha; jistieden, għalhekk, lill-partijiet interessati kollha sabiex jippromwovu valuri umani u demokratiċi u l-istat tad-dritt meta jindirizzaw il-kriżi attwali tal-ikel u meta jindirizzaw problemi dwar sigurtá tal-ikel fuq perjodu twil;

39.

Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u lill-parlamenti tal-Istati Membri, lill-Bank Dinji, lill-G8, lis-Segretarju Ġenerali tan-Nazzjonijiet Uniti u lill-Assemblea Ġenerali tan-Nazzjonijiet Uniti, lill-KoPresidenti tal-Assemblea Parlamentari Konġunta tal-ACP-UE u lill-Parlament Pan-Afrikan (PAP).