1.1.

Skond l-Artikolu 248 tat-Trattat tal-KE, il-Qorti ta' l-Awdituri tipprovdi lill-Parlament Ewropew u lill-Kunsill b' Dikjarazzjoni ta' Assigurazzjoni dwar l-affidabbiltà tal-kontijiet u l-legalità u r-regolarità tat-tranżazzjonijiet ta' bażi (“id-DAS”). It-Trattat jawtorizza wkoll lill-Qorti biex tissupplimenta din id-dikjarazzjoni b'evalwazzjonijiet speċifiċi ta' kull qasam prinċipali ta' attività ta’ l-UE.

1.2.

L-għan tax-xogħol fuq l-affidabbiltà tal-kontijiet tal-Komunitajiet Ewropej huwa li tinkiseb biżżejjed evidenza xierqa li twassal għal konklużjoni dwar il-punt safejn id-dħul, in-nefqa, l-attivi u l-passivi ġew irreġistrati kif suppost u li l-kontijiet annwali jippreżentaw b'mod ġust, fl-aspetti materjali kollha, il-pożizzjoni finanzjarja fil-31 ta' Diċembru 2007, u r-riżultati ta' l-operazzjonijiet tagħhom u l-likwidità għas-sena li ntemmet (ara l-paragrafi 1.6 sa 1.31).

1.3.

L-għan tax-xogħol tal-verifika tal-Qorti dwar il-legalità u r-regolarità tat-tranżazzjonijiet li fuqhom huma bbażati l-kontijiet ta’ l-2007 huwa li tinġabar biżżejjed evidenza xierqa, ta’ natura diretta jew indiretta, biex tingħata opinjoni dwar jekk humiex skond ir-regolamenti applikabbli jew id-dispożizzjonijiet kuntrattwali, jew kinux ikkalkulati b’mod korrett (ara l-paragrafi 1.32 sa 1.54 ta’ dan il-kapitolu għal kwistjonijiet orizzontali u l-kapitoli 2 u 4 sa 11 għal dettalji).

1.4.

Għal darb’oħra, il-Qorti evalwat il-progress li sar mill-Kummissjoni fit-tisħiħ tas-sistema tagħha ta’ kontroll intern u fis-segwitu mogħti lill-pjanijiet ta’ azzjoni adottati fi ħdan il-kuntest tar-Roadmap lejn qafas ta’ kontroll intern integrat (ara l-kapitolu 2).

1.5.

Barra dan, billi ma kienx hemm indikaturi tal-Kummissjoni fuq perijodu ta' snin u biex tikkumplimenta dawk li hemm provvediment għalihom fl-2007 (9), il-Qorti tippreżenta ċerti indikaturi biex tissorvelja l-progress fit-titjib tal-kontrolli interni kemm b'mod ġenerali, kif ukoll għal kull qasam ta’ dħul u nfiq (ara l-annessi għal dan il-kapitolu u għall-kapitoli 2 u 4 sa 11).

1.6.

L-osservazzjonijiet tal-Qorti jikkonċernaw il-kontijiet annwali għas-sena finanzjarja 2007, ippreparati mill-Uffiċjal tal-Kontijiet tal-Kummissjoni u approvati mill-Kummissjoni b'konformità ma' l-Artikolu 129 tar-Regolament Finanzjarju tal-25 ta' Ġunju 2002 (10) u mibgħuta lill-Qorti fit-28 ta’ Lulju 2008. Il-kontijiet jiġbru r-“rendikonti finanzjarji konsolidati” — li jkopru, b'mod partikolari, il-karta tal-bilanċ li telenka l-attivi u l-passivi sa għeluq is-sena kif ukoll il-kont tar-riżultat ekonomiku — u r-“rapporti konsolidati dwar l-implimentazzjoni tal-baġit” li jkopru d-dħul u n-nefqa għas-sena.

1.7.

Il-kontijiet annwali 2007 huma t-tielet sett ta' kontijiet ippreparati skond ir-regoli tal-kontabilità bbażata fuq id-dovuti li kienu introdotti mill-Komunitajiet Ewropej fl-2005 abbażi tad-dispożizzjonijiet tar-Regolament Finanzjarju (b'mod partikolari l-Artikoli 123 sa 138). B'paragun mal-kontijiet annwali ta' l-2005 u l-2006, seħħew il-bidliet prinċipali li ġejjin:

—

l-ambitu tal-konsolidazzjoni ġie miżjud minn 16-il aġenzija konsolidata fl-2005 għal 26 aġenzija fl-2007 (24 fl-2006);

—

l-informazzjoni mogħtija fuq l-għamliet differenti ta’ rkupru ta’ nefqa żejda magħmula mill-Kummissjoni ġiet ikklassifikata mill-ġdid;

—

ingħatat rikonċiljazzjoni tar-riżultat ekonomiku mar-riżultat baġitarju;

—

għall-ewwel darba din is-sena, l-Uffiċjali tal-Kontabilità ta’ l-Istituzzjonijiet u tal-korpi l-oħra taw lill-Uffiċjal tal-Kontabilità tal-Kummissjoni “ittri ta’ trasmissjoni” ffirmati kif meħtieġ, il-biċċa l-kbira minnhom materjalment simili għall-ittra tar-rappreżentazzjoni tal-maniġment (11) mogħtija mill-Uffiċjal tal-Kontabilità tal-Kummissjoni.

1.8.

L-Uffiċjal tal-Kontabilità tal-Kummissjoni ta lill-Qorti ittra ta’ rappreżentazzjoni li tikkonferma li bil-kundizzjoni ta' ċerti limitazzjonijiet il-kontijiet konsolidati huma kompleti u affidabbli (madankollu ara l-paragrafi 1.29 u 1.31) u li l-biċċa l-kbira tas-sistemi lokali tal-Kummissjoni ġew validati (madankollu ara l-paragrafi 1.13 sa 1.16).

1.9.

It-tranżizzjoni għall-kontabilità bbażata fuq id-dovuti, u l-bidliet sinifikanti riżultanti fl-istruttura u fil-kontenut tal-kontijiet tal-Komunitajiet Ewropej, jeħtieġu proċess ta’ adattament multi-annwali għall-Kummissjoni. Fil-verifika tagħha tal-kontijiet ta' l-2007 l-Qorti qagħdet attenta b'mod partikolari għall-bidliet introdotti bħala riżultat ta’ l-immodernizzar kontinwu tas-sistema tal-kontabilità tal-Komunitajiet (12). Il-verifika ffukat fuq l-elementi segwenti (13):

—

evalwazzjoni dwar jekk il-miżuri meħuda fil-Kummissjoni, biex tirrimedja n-nuqqasijiet fil-qafas tar-rappurtar finanzjarju l-ġdid u s-sistemi tal-kontabilità ta' ċerti Istituzzjonijiet u Direttorati-Ġenerali (14), jikkontribwixxux biex jagħtu assigurazzjoni raġonevoli li l-kontijiet huma veri u ġusti. Dan sar, b’mod partikolari, permezz ta’ analiżi tal-bażijiet għall-validazzjonijiet (skond l-Artikolu 61 tar-Regolament Finanzjarju) mill-Uffiċjali li Jawtorizzaw tal-kontijiet 2007 li jaqgħu taħt ir-responsabbiltà tagħhom, kif ukoll permezz ta’ analiżi tal-validazzjoni ta' l-Uffiċjali li Jawtorizza għall-metodoloġija tal-qtugħ u l-istat ta' tlestija tas-sistemi tal-ġestjoni finanzjarja lokali li jagħtu data għall-kontijiet tal-Kummissjoni (ara l-paragrafi 1.13 sa 1.18);

—

verifikazzjoni ta’ l-affidabbiltà tal-kontijiet ta’ l-2007, b’fok fuq elementi li għalihom ingħatat opinjoni modifikata fil-kuntest tad-Dikjarazzjoni ta’ Assigurazzjoni ta' l-2006 (15) (finanzjamenti minn qabel, fatturi/rendikonti ta' l-ispejjeż u qtugħ). Dan sar bit-twettiq ta’ reviżjonijiet analitiċi u testijiet sostantivi fuq kampjuni statistiċi rappreżentattivi (ara l-paragrafi 1.23, 1.24, 1.25 u 1.26).

1.10.

L-Uffiċjal tal-Kontabilità tal-Kummissjoni introduċa numru ta’ miżuri sabiex jikkonsolida t-tranżizzjoni għall-kontabilità bbażata fuq id-dovuti mmodernizzata. Tneda studju pilota f’Lulju 2006 fuq il-kwalità tad-data tal-kontabilità u dan tlesta. Minħabba dan, l-Uffiċjal tal-Kontabilità tal-Kummissjoni ffinalizza numru ta’ miżuri li tqassmu lid-Direttorati-Ġenerali kollha f'Marzu 2007. L-għan tagħhom kien li jittejjeb l-ambjent tal-kontroll tal-kontabilità fil-livell tad-Direttorati-Ġenerali individwali. Dawn jinkludu l-iżvilupp ta’ analiżi tar-riskji tal-kontabilità, l-użu ta’ eżerċizzji ta’ reviżjoni tal-kontabilità bbażata fuq ir-riskji, l-elaborazzjoni ta’ manwali tal-kontabilità speċifiċi u d-dokumentazzjoni ta’ fajls ta’ għeluq il-kontabilità għal tmiem is-sena. Il-proġett japplika għall-ewwel darba għall-kontijiet annwali ta’ l-2007.

1.11.

Dawn il-miżuri kkontribwew għat-tisħiħ tal-qafas ta' rappurtar finanzjarju u s-sistemi tal-kontabilità. Madankollu, ċerti nuqqasijiet xorta għadhom jeżistu li jpoġġu f'riskju l-kwalità tad-data tal-kontabilità (ara l-paragrafi 1.13 sa 1.18). Barra dan, kien innutat li l-linji gwida dwar l-ambjent tal-kontroll tal-kontabilità, maħruġa mill-Uffiċjal tal-Kontabilità tal-Kummissjoni, ma kinux applikati b’mod sħiħ minn għadd limitat ta’ Direttorati-Ġenerali operattivi għall-kalkolu tal-qtugħ.

1.11.

Għalkemm ġew identifikati xi nuqqasijiet fil-kwalità ta’ xi data tal-kontabbiltà, dawk ma kellhom l-ebda impatt fuq l-affidabbiltà tal-kontijiet.

1.12.

It- Tabella 1.1 fiha segwitu tal-kwalifiki tal-Qorti dwar l-affidabbiltà tal-kontijiet li kienu espressi fid-Dikjarazzjoni ta' Assigurazzjoni għas-sena finanzjarja 2006, kif ukoll il-punti l-oħra mqajma mill-Qorti, li kienu [parzjalment] solvuti jew għadhom iridu jiġu indirizzati fil-kuntest tal-miżuri meħuda mill-Kummissjoni biex tikkonsolida t-tranżizzjoni għall-kontabilità bbażata fuq id-dovuti.

1.13.

Ħafna Direttorati-Ġenerali jużaw is-sistemi ta' l-IT tagħhom stess għal għanijiet ta' ġestjoni finanzjarja u biex joħolqu tranżazzjonijiet li jintbagħtu lis-sistemi tal-kontabilità ċentrali (ABAC) permezz ta' interface.

1.13.

Peress li s-sitwazzjoni qiegħda tevolvi kostantement, it-tim ta' validazzjoni tas-servizzi tal-kontabbiltà jeħtieġ li jaġġorna ruħu dwar din l-evoluzzjoni, u introduċa, kif kien diġà msemmi s-sena li għaddiet, proċedura għal validazzjoni tat-tibdil fis-sistemi lokali.

1.14.

Għas-sena finanzjarja 2007, is-servizzi ta' l-Uffiċjal tal-Kontabilità tal-Kummissjoni wettqu segwitu tas-sejbiet tas-sena preċedenti (16). Barra dan, sitt servizzi oħra (17) kienu soġġetti għal reviżjonijiet fil-fond bħala parti minn approċċ ċikliku mmirat biex ikopri bis-sħiħ is-servizzi tal-Kummissjoni f’terminu taż-żmien medju. Żewġ servizzi oħra (18) kienu wkoll soġġetti għal reviżjoni iżda r-rapporti tagħhom ma kinux iffinalizzati fil-ħin għar-Rapport ta’ Validazzjoni Globali tal-Kontabilista tal-Kummissjoni għall-2007.

1.14.

It-tim tal-validazzjoni tas-servizzi tal-kontabbiltà jsegwi materji mqajma fir-rapporti preċedenti sabiex jiżgura li r-rakkomandazzjonijiet li saru jiġu implimentati, sabiex b’hekk jiġi żgurat li l-kwalità tas-sistemi ta’ ġestjoni finanzjarja lokali qiegħda titjieb il-ħin kollu.

1.15.

L-Uffiċjal tal-Kontabilità tal-Kummissjoni kien għadu mhux f’pożizzjoni li jivvalida s-sistemi lokali tad-Direttorat-Ġenerali għall-Edukazzjoni u Kultura (19) u d-Direttorat-Ġenerali għar-Relazzjonijiet Esterni (20), kif hemm indikat fl-ittra tar-rappreżentazzjoni amministrattiva tiegħu (ara l-paragrafu 1.8), u lanqas biex jivvalida mingħajr kwalifiki s-sistema lokali ta’ l-Uffiċċju għall-Koperazzjoni ta’ l-Europe-Aid (21) għas-sena finanzjarja 2007. Ir-riżerva mhux relatata mal-kontabilità maħruġa għaċ-Ċentru tar-Riċerka Konġunta (22) fl-2006 nżammet għas-sena finanzjarja 2007. L-għadd u l-importanza ta’ kwistjonijiet orizzontali u punti oħra għall-kunsiderazzjoni jibqgħu fil-biċċa l-kbira l-istess bħal fi snin preċedenti (23).

1.15.

Ix-xogħol għadu għaddej bil-għan li tintlaħaq il-validazzjoni għad-Direttorati Ġenerali għar-Relazzjonijiet Esterni u għall-Edukazzjoni u l-Kultura.

1.16.

Il-verifika tal-Qorti kkonfermat li d-deċiżjonijiet ta' l-Uffiċjal tal-Kontabilità tal-Kummissjoni kellhom bażi soda: il-kwistjonijiet u l-punti pendenti kienu importanti.

1.17.

Minn mindu saret it-tranżizzjoni għall-kontabilità bbażata fuq id-dovuti, l-Uffiċjal tal-Kontabilità tal-Kummissjoni stieden lis-servizzi tal-Kummissjoni biex iwettqu ttestjar ex-post tal-metodoloġija tal-qtugħ tagħhom, fejn dan ikun relevanti (24), b'taħlita ta' data minn sorsi baġitarji u mill-kontabilità ġenerali sabiex l-adegwatezza tal-metodi tkun iċċekkjata. Mid-disa’ Direttorati-Ġenerali eżaminati (25), sitta kienu parzjalment imħassba minħabba dan l-ittestjar li rrappreżenta anqas minn 20 % ta’ l-ammont ta’ qtugħ totali, kien hemm Direttorat-Ġenerali li tejjeb il-proċeduri tiegħu billi ttestja u kkorreġa l-proċeduri tiegħu tal-qtugħ (26), oħrajn ittestjaw il-metodoloġija tagħhom iżda azzjonijiet korrettivi kienu postposti (27) u xi Direttorati-Ġenerali (28) għadhom ma wettqux ittestjar ex-post tal-metodoloġiji tagħhom ta’ qtugħ. Dan jista’ jwassal għal impreċiżjonijiet fid-data tal-kontabilità.

1.17.

L-Uffiċjal tal-Kontabbiltà kkunsidra li d-data tal-kontabbiltà hija preċiża biżżejjed għall-finijiet tal-kontijiet finali.

1.18.

Xi Direttorati-Ġenerali (li jirrappreżentaw madwar 20 % ta’ l-ammont ta’ qtugħ totali) jistabbilixxu l-qtugħ tagħhom ta’ l-ispejjeż dovuti skond metodu pro rata temporis  (29). Madankollu, jekk id-dati tal-kuntratt mogħtija fis-sistemi tal-kontabilità użati bħala bażi għall-kalkoli tal-qtugħ huma inkorretti jew inkella l-bidliet fihom mhumiex aġġornati, huma jolqtu l-affidabbiltà tal-kontijiet b’mod avvers.

1.18.

Il-pjan tal-kontroll tal-kwalità tad-Direttorat Ġenerali ewlieni kkonċernat iffoka fuq id-dati tal-attività. Ġew riveduti 935 kuntratt, inklużi l-kuntratti kollha tat-tul. Bħala konsegwenza, l-iżbalji li fadal fid-dati tal-attivitajiet għandhom x’jaqsmu ma’ kuntratti għal perjodi qosra li għandhom impatt aktar baxx fuq il-cut-off mill-aħħar snin. Fil-kampjun tal-Qorti ta’ 20 tranżazzjoni għal dan id-Direttorat Ġenerali, hemm 3 żbalji minħabba dati skorretti tal-attivitajiet. Dan hu titjib meta mqabbel mal-aħħar snin.

1.19.

Matul l-2007, il-Kummissjoni ħadet miżuri biex tiżgura l-kompletezza u l-preċiżjoni tar-reġistrazzjoni ta' pagamenti ġodda ta' finanzjament minn qabel, kif ukoll rendikonti tal-fatturi/spejjeż miftuħa ġodda, u l-qtugħ.

1.20.

Il-verifika tal-Qorti ta' self, inventarji, riċevibbli ta’ skadenza twila, likwidità u ekwivalenti likwidi, benefiċċji ta’ l-impjegat, proviżjonijiet u responsabbiltajiet finanzjarji u responsabbiltajiet oħra ta' skadenza twila, u riżervi, ma pproduċiet l-ebda sejbiet sinifikanti. Madankollu, għadd ta’ żbalji kienu identifikati fir-rigward ta’ elementi oħra li huma ppreżentati aktar ’il quddiem.

1.21.

L-Awtorità Ewropea ta' Sorveljanza GNSS (GSA) (30), Aġenzija ta’ l-UE maħluqa fl-2004 (31), uffiċjalment ħadet kontroll tar-responsabbiltà (32) minn dik li qabel kienet l-Impriża Konġunta Galileo (GJU) fl-1 ta’ Jannar 2007. Fil-bidu, il-korp il-ġdid kien intenzjonat sabiex jaħdem bħala sħab pubbliku u privat; wara deċiżjoni tal-Kunsill meħuda f’Novembru 2007 l-programm Galileo issa se jkun iffinanzjat mill-baġit ta’ l-UE. Fi tmiem l-2007, minkejja l-firma ta’ ftehimiet (33) bejn il-partijiet interessati (GJU, l-Aġenzija Ewropea ta’ l-Ispazju, l-Awtorità), l-appartenenza ta’ l-attivi tal-proġetti mill-GJU għall-Awtorità ma kinitx ġiet trasferita għal kollox u l-ebda lista ta’ attivi ta’ Galileo miżmuma mill-Aġenzija Ewropea ta’ l-Ispazju ma kienet ġiet stabbilita. Il-Qorti għalhekk ma esprimietx opinjoni dwar l-affidabbiltà tal-kontijiet ta' l-Awtorità għas-sena li ntemmet fil-31 ta' Diċembru 2007.

1.21.

Fi tmiem l-2007, minkejja l-firma ta' ftehim bejn il-partijiet interessati (GJU, l-Aġenzija Spazjali Ewropea, GSA), l-appartenenza tal-assi tal-proġett kienet għadha ma ġietx trasferita għal kollox mill-ESA għall-Komunitajiet Ewropej. Ladarba għad hemm xi inċertezza u dewmien fit-trasferiment tal-assi, għal raġunijiet ta' prudenza l-Komunitajiet Ewropej ma rrikonoxxewx l-assi tal-programm fil-karta tal-bilanċ tagħhom. Huwa maħsub li l-assi jkunu rikonoxxuti ladarba jiġu riżolti l-kwistjonijiet tat-trasferiment.

1.22.

Fir-rendikonti finanzjarji konsolidati tal-Komunitajiet Ewropej, l-operazzjonijiet tal-kapital ta’ riskju kollha (218-il miljun euro fil-31 ta’ Diċembru 2007) huma kklassifikati bħala “investimenti ta’ skadenza twila” (attivi disponibbli għall-bejgħ). Huma rreġistrati kollha bil-prezz storiku li minnu huma mnaqqsa l-proviżjonijiet għat-tnaqqis fil-valur, peress li fil-preżent il-valur ġust tagħhom ma jistax jitkejjel b'mod affidabbli. Filwaqt li tali metodu ta' stima huwa aċċettabbli fiċ-cirkostanzi, dan mhux applikat b'mod konsistenti. Il-Qorti sabet li d-deterjoramenti huma bbażati biss fuq write-offs filwaqt li l-istimi provviżorji għad-deterjoramenti kienu disponibbli lill-ġestjonarju ta' l-operazzjonijiet (Il-Bank Ewropew ta' l-Investiment) iżda ma kinux ġew ikkomunikati lill-Kummissjoni (34).

1.22.

L-istandards tar-rappurtaġġ u tal-kontabbiltà evolvew b’mod sinifikanti matul il-perjodu tal-mandati tal-MEDA li jkopru dawn l-operazzjonijiet ta' kapital tar-riskju (RCO). Il-BEI u l-Kummissjoni kienu qed isegwu l-iżviluppi u fil-preżent qed jeżaminaw is-sitwazzjoni flimkien, billi qed ifittxu l-aħjar soluzzjoni li toffri bilanċ bejn in-nefqa u l-benefiċċju u wkoll qed jieħdu inkunsiderazzjoni l-informazzjoni disponibbli skont il-kuntratti ffirmati ħafna snin ilu ma' benefiċjarji finali (b'hekk ma jinkludux standards kurrenti ta' rappurtaġġ). Din ir-reviżjoni kkonfermat li l-eżerċizzju preżenti ta’ valutazzjoni tal-Operazzjonijiet ta’ Kapital tar-Riskju huwa eżerċizzju li jieħu ħafna ħin u joffri sfida minħabba n-numru kbir u l-kumplessità tal-istruttura kaskata tat-tranżazzjonijiet RCO. Il-BEI saħaq ukoll li l-valutazzjoni tat-tranżazzjonijiet RCO hija bbażata, sa kemm huwa possibbli, fuq prinċipji relevanti tal-kontabbiltà internazzjonali, b’mod partikolari l-IAS 39.

1.23.

Il-verifika tal-Qorti ta’ kampjun statistiku rappreżentattiv ta’ 150 finanzjament minn qabel li kienu rreġistrati fis-sistema tal-kontabilità identifikat livell ta’ żball baxx f’termini ta’ l-impatt finanzjarju rigward dan il-punt tal-karta tal-bilanċ. Madankollu, il-frekwenza ta’ dawn l-iżbalji tenfasizza l-ħtieġa għal aktar titjib fil-preċiżjoni tad-data tal-kontabilità bażika fil-livell tad-Direttorati-Ġenerali operazzjonali. It-tipi ta' żbalji l-aktar komuni huma:

—

reġistrazzjoni ta' finanzjamenti minn qabel mhux skond it-tipi ta’ ġestjoni differenti hekk kif ippreżentati fin-noti tar-rendikonti finanzjarji;

—

l-ammonti tal-finanzjamenti minn qabel baqgħu miftuħa għalkemm kienu ntużaw mill-benefiċjarji qabel għeluq is-sena.

1.24.

Barra dan, xogħol ta' verifika addizzjonali dwar l-identifikazzjoni u l-validazzjoni ta' finanzjamenti minn qabel kixef problemi ta' kompletezza/preċiżjoni fil-karta tal-bilanċ:

1.24.

—

reġistrazzjoni ta’ xi wħud mill-pagamenti bħala spejjeż fil-kont tar-riżultat ekonomiku filwaqt li kien imisshom ġew irreġistrati bħala finanzjamenti minn qabel fil-karta tal-bilanċ;

—

preżenza ta’ xi finanzjamenti minn qabel li baqgħu fil-karta tal-bilanċ għalkemm l-informazzjoni relevanti, bħal ċertifikati tal-verifika, kienet disponibbli sabiex l-approvazzjoni tagħhom tkun tista’ ssir permezz ta’ reġistrazzjoni ta’ l-ispejjeż korrispondenti fil-kont tar-riżultat ekonomiku. Barra dan, ġie osservat trattament inkonsistenti ta’ l-approvazzjoni ta’ finanzjamenti minn qabel. Id-Direttorat-Ġenerali għas-Soċjetà Informatika u Mezzi ta’ Komunikazzjoni jipproċedi sew għall-approvazzjoni ta’ finanzjamenti minn qabel fil-każ ta’ talbiet ta’ spejjeż li magħhom m'hemmx ċertifikati tal-verifika filwaqt li d-Direttorat-Ġenerali għar-Riċerka, fl-istess ċirkustanzi, iħalli miftuħ il-finanzjament minn qabel;

—

Il-Kummissjoni taqbel mal-Qorti li hija l-aħjar prattika li jiġu approvati l-ammonti miftuħa tal-prefinanzjament bl-anqas dewmien possibbli u l-għan għandu jkun li s-servizzi kollha jagħmlu dan hekk kif dokumentazzjoni suffiċjenti ta' sostenn tkun disponibbli. Sadanittant, il-prenotazzjonijiet tal-aħħar tas-sena jiżguraw li l-prattika kkritikata ma taffettwax l-affidabbiltà tal-kontijiet.

Aktar minn hekk, id-Direttorat Ġenerali għas-Soċjetà tal-Informazzjoni u l-Media u d-Direttorat Ġenerali għar-Riċerka qed jikkooperaw biex isibu triq komuni biex jittrattaw din il-kwistjoni skont ir-rakkomandazzjonijiet li saru mis-servizzi tal-kontabbiltà.

1.25.

Il-verifika ta’ kampjun statistiku rappreżentattiv ta’ 150 fattura/rendikont ta’ l-ispejjeż mill-popolazzjoni tal-kontijiet pagabbli li kienu rreġistrati fis-sistema tal-kontabilità identifikat livell ta’ żball baxx f’termini ta’ l-impatt finanzjarju rigward dan il-punt tal-karta tal-bilanċ. Madankollu, il-frekwenza ta’ dawn l-iżbalji tenfasizza l-ħtieġa għal aktar titjib ta’ l-affidabbiltà tad-data tal-kontabilità bażika fil-livell tad-Direttorati-Ġenerali operazzjonali. Il-biċċa l-kbira ta’ l-iżbalji huma dwar fatturi jew rendikonti ta’ l-ispejjeż irreġistrati għall-ammonti ħżiena.

1.26.

Kien identifikat dewmien sinifikanti fit-trattament ta' xi fatturi u dikjarazzjonijiet ta' l-ispejjeż. Dan kellu impatt fuq il-kontabilità fejn dewmien fl-analiżi ta’ l-eliġibbiltà tal-fatturi ma jippermettix il-bidu ta’ l-approvazzjoni ta’ finanzjamenti minn qabel. Dan jista’ jwassal għal pożizzjoni ta’ responsabbiltà mhux eżatta fir-rigward ta' partijiet terzi u r-reġistrazzjoni ta’ ammont ta’ spiża, fuq bażi ta’ stima tal-qtugħ, minflok ammont sostnut minn fatturi diġà rċevuti.

1.27.

Ir-reġistrazzjoni ta’ pagamenti taħt it-tip ta’ ġestjoni ħażin għandha impatt fuq il-preċiżjoni tat-tqassim ta’ l-ispejjeż skond it-tip ta’ ġestjoni fin-noti relatati mal-kont tar-riżultat ekonomiku kif ukoll fir-rappurtar skond is-segmenti (ara wkoll il-paragrafu 1.23).

1.28.

Għalkemm in-noti ta’ spjegazzjoni relatati mal-kontijiet annwali fihom informazzjoni dwar il-fatt li xi wħud mit-tranżazzjonijiet x’aktarx li jkunu kkorreġuti aktar tard mid-dipartimenti tal-Kummissjoni jew mill-Istati Membri, l-ammonti u l-oqsma tan-nefqa li jistgħu jkunu soġġetti għal aktar verifikazzjoni u approvazzjoni tal-proċeduri tal-kontijiet (35) għadhom mhux identifikati fin-noti.

1.28.

Ir-Regolament Finanzjarju u r-regolamenti settorjali dwar il-fondi agrikoli u strutturali, jagħtu d-dritt lill-Kummissjoni sabiex din twettaq verifiki fuq l-infiq kollu sa ħafna snin wara li dan ikun sar. Il-kontijiet m’għandhomx jimplikaw li, minħabba dan id-dritt, l-infiq kollu kkonċernat jkun għadu ma ġiex approvat. Fejn l-ammonti ta’ rkupri potenzjali huma kwantifikabbli, jiġu żvelati fin-noti 5.3 u 5.4 tal-kontijiet konsolidati.

1.29.

Fuq rakkomandazzjoni tal-Qorti, aktar informazzjoni dwar l-irkupru ta’ pagamenti mhux dovuti kienet ippreżentata fin-noti relatati mar-rendikonti finanzjarji. Madankollu, in-noti tar-rendikonti finanzjarji għadhom ma fihomx informazzjoni kompleta u affidabbli dwar l-attivitajiet ta’ korrezzjoni finanzjarja magħmula mill-Istati Membri. Huma jagħtu din l-informazzjoni b’mod partikolari fir-rigward ta’ rtirar, rkupri u rkupri pendenti fil-qasam ta’ Azzjonijiet Strutturali (36). Bħala riżultat tal-proporzjon għoli ta' nefqa ineliġibbli indikat repetutament fir-Rapporti Annwali tal-Qrati, u sabiex tkun kompatibbli mal-preżentazzjoni ta' stampa vera u ċara, il-Qorti tikkunsidra li għandha tkun ippreżentata informazzjoni xierqa fin-noti relatati mal-kontijiet fuq dawn il-mekkaniżmi ta' korrezzjoni.

1.29.

Kapitolu 6 tal-kontijiet annwali tal-2007 jagħti ħarsa ġenerali tal-proċeduri li qed jintużaw għall-irkupru tal-ħlasijiet mhux dovuti, u jipprovdi l-aħjar stima tal-ammont totali ta’ rkupri bħal dawn, inklużi rkupri li jkunu saru mill-Istati Membri rigward in-nefqa fl-agrikoltura.

1.30.

Fuq bażi ta’ l-eżami tax-xogħol tal-korpi li jiċċertifikaw (37) il-Qorti ttenni (38) d-dubji tagħha fir-rigward tal-preċiżjoni tar-riċevibbli mill-Istati Membri fil-qasam ta’ l-agrikoltura. Barra dan il-Qorti tinnota li l-politika differenti applikata għad-data tar-rikonoxximent tad-dejn mill-Aġenziji tal-Pagament tirriżulta f’preżentazzjoni inkonsistenti tal-valur globali tad-djun (ara l-paragrafi 5.44 u 5.45).

1.30.

Il-Kummissjoni tikkunsidra li l-informazzjoni li rċeviet mill-Istati Membri dwar ammonti riċevibbli fil-qasam tal-agrikoltura hija affidabbli biżżejjed għall-iskopijiet ta’ approvazzjoni u kontabbiltà.

1.31.

Barra dan, in-noti relatati mal-kontijiet ma jiżvelawx l-irkupri magħmula mit-tnaqqis ta’ pagament sussegwenti (tpaċija).

1.31.

Kif indikat fin-noti tal-kontabbiltà, is-sistemi tal-informazzjoni ma ppermettewx l-identifikazzjoni ta' din l-informazzjoni fl-2007. Is-sistemi issa ġew adattati mill-Kummissjoni matul l-2008 sabiex l-irkupri kollha li saru permezz ta’ tnaqqis minn ħlas sussegwenti seta’ jiġi identifikat u spjegat.

1.32.

Wara l-introduzzjoni mill-Kummissjoni ta' Baġitjar Ibbażat fuq l-Attività (ABB) u Ġestjoni Bbażata fuq l-Attività (ABM), il-Qorti ddeċidiet li tiddefinixxi mill-ġdid l-evalwazzjonijiet speċifiċi li fihom taqsam il-baġit għal skopijiet DAS f'termini ta' gruppi/ġabriet ta' oqsma tal-politika ABB (ara t- Tabella 1.2 ).

1.33.

Il-Qorti tuża mudell ta’ assigurazzjoni li jieħu minn żewġ għejun prinċipali ta’ evidenza:

1.33.

a)

evalwazzjoni ta’ l-operat tas-sistemi ta’ sorveljanza u kontroll applikati fil-ġbir u fl-infiq ta’ fondi mill-baġit ta’ l-UE mill-Istituzzjonijiet ta' l-UE, Stati Membri, Reġjuni, Pajjiżi Terzi eċċ. bil-għan li tingħata informazzjoni rappreżentattiva dwar l-implimentazzjoni u l-ħidma ta’ kontrolli prinċipali dwar jekk jistgħux jipprevjenu jew isibu u jikkorreġu żbalji;

b)

kontrolli bbażati fuq kampjuni statistiċi rappreżentattivi ta' tranżazzjonijiet ta’ bażi relatati mad-dħul u n-nefqa, li jinżlu sal-livell tal-benefiċjarju finali, bil-għan li jipprovdu evidenza diretta dwar il-legalità u r-regolarità tal-pagamenti.

b)

Taħt il-leġiżlazzjoni applikabbli (46), il-Kummissjoni tħaddem ċiklu ta’ kontroll fir-rigward ta’ nefqa ffinanzjata mill-Komunità li jitwettaq fuq perjodu ta’ snin. Pereżempju, hi tapplika proċeduri ta’ rilaxx tal-kontijiet fl-agrikoltura, mekkaniżmi ta’ korrezzjoni finanzjarja f’miżuri strutturali, u rkupri ta’ politiki interni u azzjonijiet esterni. L-iżbalji li jiġu identifikati waqt il-kors ta’ proġett multiannwali u l-ħlasijiet mhux dovuti assoċjati jistgħu jiġu rkuprati sena aktar tard minn dak li jkun qed jiġi eżaminat, bħal pereżempju permezz tat-tnaqqis tal-ħlas finali biex jittieħed inkunsiderazzjoni n-nuqqas li jkun instab.

L-applikazzjoni ta’ dawn il-proċeduri mill-Istati Membri u l-Kummissjoni, u l-miżuri l-oħra ta’ kontroll li ttieħdu jipprovdu, bil-limitazzjonijiet deskritti fir-rapporti ta’ attività annwali tal-2007, serħan il-moħħ raġonevoli li r-riżorsi assenjati lill-attivitajiet tal-Kummissjoni ntużaw skont kif ippjanat u b'konformità mal-prinċipji ta' ġestjoni finanzjarja f'saħħitha. Il-proċeduri ta’ kontroll li qed jintużaw jagħtu l-garanziji meħtieġa dwar il-legalità u r-regolarità tat-tranżazzjonijiet sottostanti.

Għaldaqstant il-Kummissjoni tassumi r-responsabbiltà finali għall-implimentazzjoni tal-baġit kif stabbilit permezz tal-Artikolu 274 tat-Trattat tal-KE.

Il-Kummissjoni tilqa’ b’mod pożittiv l-enfasi miżjuda tal-Qorti fuq il-miżuri eżaminattivi li ttieħdu biex jinstabu u jiġu kkoreġuti l-iżbalji, prinċipalment permezz ta’ korrezzjonijiet finanzjarji, rilaxx u rkupri. Il-Kummissjoni għamlet sforzi kbar biex ittejjeb il-kwalità tad-data fuq l-irkupri pprovduti mill-Istati Membri u attwalment tinsab għaddejja b'ħidma ta' vverifikar tal-kompletezza u l-preċiżjoni ta’ din id-data.

Kien hemm progress fir-rigward tal-produzzjoni ta’ provi affidabbli tal-operazzjoni tal-mekkaniżmi korrettivi multiannwali. Fin-noti marbuta mal-kontijiet annwali tal-Komunitajiet Ewropej għas-sena finanzjarja 2007, il-Kummissjoni inkludiet kapitolu ġdid dwar l-irkupru ta’ ħlasijiet mhux dovuti. L-għan ta’ dan il-Kapitolu hu li tingħata ħarsa ġenerali lejn il-proċedura fis-seħħ għall-irkupru ta’ ħlasijiet mhux dovuti u li tiġi ppreżentata l-aħjar stima tal-ammont totali rkuprat.

1.34.

L-għejun prinċipali deskritti hawn fuq jistgħu jiġu kkomplementati b'żewġ għejun oħra:

a)

analiżi tar-Rapport ta' Attività Annwali u d-dikjarazzjonijiet tad-Diretturi-Ġenerali tal-Kummissjoni u s-sinteżi tagħhom dwar jekk il-Kummissjoni kisbitx assigurazzjoni raġonevoli li s-sistemi fis-seħħ jiżguraw il-legalità/regolarità tat-tranżazzjonijiet ta' bażi;

b)

eżami tax-xogħol ta' awdituri oħra, definiti bħala dawk li huma indipendenti mill-proċess tat-tmexxija u kontroll tal-Komunità (eż. l-Istituzzjonijiet Supremi tal-Verifika fl-Istati Membri jew f'Pajjiżi Terzi) (47).

1.35.

L-iżbalji jistgħu jirrelataw ma’ “kundizzjoni għall-pagament” jew ma’ “kwistjoni ta' osservanza oħra”. B'mod ġenerali, isir ksur tal-kundizzjonijiet għall-pagament meta r-rekwiżiti legali ta' l-iskema ta' għajnuna jew kuntratt rispettivi mhumiex issodisfati. Mill-banda l-oħra, kwistjonijiet ta’ osservanza oħra huma kundizzjonijiet speċifiċi li għandhom ikunu ssodisfati, li jirriżultaw minn objettivi tal-politika relatata (protezzjoni ta’ l-ambjent, prattiċi agrikoli tajbin, eċċ.) jew rekwiżiti tas-sistemi (għadd minimu ta’ kontrolli, strutturi u proċeduri preskritti, eċċ.).

1.36.

Il-Qorti tikklassifika l-iżbalji bħala jew “kwantifikabbli” jew “mhux kwantifikabbli”. L-ewwel kategorija tirreferi għal żbalji, li għandhom impatt finanzjarju dirett u miżurabbli fuq l-ammont ta’ tranżazzjonijiet ta’ bażi ffinanzjati mill-baġit ta’ l-UE (48).

1.37.

Jittieħed kont ta’ l-iżbalji kwantifikabbli biss waqt li jkun qiegħed jiġi stmat l-impatt finanzjarju ta’ l-iżbalji għall-popolazzjoni sħiħa. F’dan ir-rapport il-frekwenza ta’ l-iżbalji tirreferi għal żbalji kwantifikabbli u dawk mhux kwantifikabbli (49).

1.38.

Fil-qasam ta' Dħul, Affarijiet ekonomiċi u finanzjarji u Nefqa amministrattiva u nefqa oħra, fejn is-sistemi ta’ sorveljanza u kontroll, fit-totalità tagħhom, huma applikati sew u b’mod korrett (ara l-paragrafi 4.40 sa 4.41, 10.32 sa 10.33 u 11.25), il-Qorti tistma li l-iżbalji għandhom impatt finanzjarju ta’ anqas minn 2 % tat-total ta’ l-ammonti (ara t- Tabella 1.3 ). Barra dan, l-evalwazzjoni tal-Qorti tad-dikjarazzjonijiet mid-Diretturi-Ġenerali u mill-uffiċjali li jawtorizzaw b'delega kkonfermaw li, l-ebda riżerva, jew inkella riżervi minuri biss kellhom jiġu ppreżentati (ara l-paragrafi 2.6, 2.7 u 2.9 u t- Tabella 2.1 ).

1.38.

Il-konklużjonijiet tar-rapport ta’ sinteżi tal-2007 jgħidu li s-sistemi ta' kontroll intern fis-seħħ, bil-limiti deskritti fir-rapporti ta’ attività annwali tal-2007, jipprovdu serħan il-moħħ raġonevoli li r-riżorsi assenjati għall-attivitajiet tagħha ntużaw skont kif ippjanat u b’konformità mal-prinċipji tal-ġestjoni finanzjarja soda.

1.39.

Fil-qasam ta’ l-Agrikoltura u riżorsi naturali, Koeżjoni, Riċerka, enerġija u trasport, Għajnuna esterna, żvilupp u tkabbir u Edukazzjoni u ċittadinanza, fejn is-sistemi ta’ sorveljanza u kontroll huma biss parzjalment effettivi (ara l-paragrafi 5.50 sa 5.55, 6.32, 7.40 sa 7.41, 8.31 sa 8.32 u 9.25), il-Qorti tistma li għal dawn l-oqsma l-iżbalji għandhom impatt finanzjarju ta’ aktar minn 2 % tan-nefqa totali (55) (ara t- Tabella 1.3 ). Barra minn hekk, l-evalwazzjoni tal-Qorti tad-dikjarazzjonijiet mid-Diretturi-Ġenerali u mill-uffiċjali li jawtorizzaw permezz ta’ delega kkonfermaw li riżervi kbar kienu ppreżentati jew, fil-fehma tal-Qorti, kien imisshom ġew ippreżentati għall-oqsma in kwistjoni (ara l-paragrafi 2.6 sa 2.11 u t- Tabella 2.1 ).

1.39.

Il-Kummissjoni taħdem sabiex tiżgura li s-sistemi ta' superviżjoni u kontroll ikunu effettivi fl-identifikazzjoni u l-korrezzjoni tal-iżbalji, b'konsiderazzjoni dovuta lejn l-ispejjeż u l-benefiċċji tal-verifiki li jridu jsiru fuq il-post. Il-pjan ta’ azzjoni tagħha lejn qafas integrat intern ta' kontroll b’mod ġenerali gie implimentat u qed jidher titjib bil-mod il-mod. L-impatt sħiħ tiegħu huwa għat-tul.

1.40.

Meta mqabbla mas-snin ta’ qabel il-bidliet segwenti kienu nnutati: tnaqqis fl-istima kampjun tal-livell ta' żball kien identifikat għall-oqsma tal-politika li kienu koperti qabel taħt Politika interna (58) u Azzjonijiet esterni (59) (ara t-Tabella 1.3 ). Il-valur tan-nefqa agrikola kopert mill-IACS żdied b’mod sinifikanti permezz ta’ l-inklużjoni ta’ xi oqsma ta’ nfiq ta’ riskju ogħla, inkluż iż-żejt taż-żebbuġa. Madankollu, il-Qorti tikkonkludi li l-IACS tkompli tkun effettiva fil-limitazzjoni tar-riskju ta’ nefqa irregolari meta tkun implimentata sew u jekk tiddaħħal data preċiża u affidabbli dwar il-pagamenti SPS ibbażati fuq intitolamenti allokati. L-introduzzjoni ta’ skemi ta’ sostenn fl-SPS, bħal dawk relatati maż-żejt taż-żebbuġa, hija żvilupp pożittiv għalkemm fuq terminu ta’ żmien qasir għandha mnejn twassal għal frekwenza ta’ żball ogħla (ara l-paragrafu 5.52).

1.40.

Il-Kummissjoni tiġbed ukoll l-attenzjoni li għall-qasam tal-koeżjoni, kien hemm żieda fil-proporzjon ta’ proġetti li fihom ma nstabux żbalji, u l-valutazzjoni ġenerali tal-Qorti tas-sistemi ta' superviżjoni u kontroll sab li tjiebu minn “mhux effettivi” għal “parzjalment effettivi”.

1.41.

Il-Qorti tisħaq li l-verifiki tagħha fl-oqsma ta’ “Agrikoltura u riżorsi naturali”, “Koeżjoni”, “Riċerka, enerġija u trasport” kif ukoll “Edukazzjoni u ċittadinanza” juru li kriterji ta’ eliġibbiltà kkumplikati jew mhux ċari jew inkella rekwiżiti legali kumplessi għandhom impatt konsiderevoli fuq il-legalità u/jew ir-regolarità tat-tranżazzjonijiet ta’ bażi (60).

1.41.

Is-simplifikazzjoni hija element ewlieni fil-programm tal-Kummissjoni ta’ regolamentazzjoni aħjar. L-Istati Membri huma mitluba wkoll biex jissimplifikaw il-kriterji tal-eliġibbiltà fil-programmi nazzjonali tagħhom. Madankollu, ċertu livell ta’ kumplessità huwa inevitabbli u jrid jittieħed inkunsiderazzjoni fid-diskussjonijiet futuri dwar livell tollerabbli ta’ riskju.

1.42.

Il-paragrafu 1.39 u t- Tabella 1.3 juru li l-biċċa l-kbira ta’ l-infiq skond il-valur għandu sorveljanza u kontroll ineffettiv parzjalment jew għal kollox, u li t-tranżazzjonijiet ta' bażi għad fihom livell ta' żball materjali. Madankollu, ir-rapporti annwali ta’ l-2007 u ta’ qabel jidentifikaw li:

a)

L-arranġamenti ta’ kontroll intern tal-Kummissjoni qegħdin ikomplu jitjiebu (jiġifieri, rapporti ta’ attività annwali — ara l-paragrafi 2.8, 2.10 sa 2.12 u 2.37) jew jibqgħu f'livell għoli (jiġifieri konformità ma’ standards ta' kontroll intern — ara l-paragrafi 2.25 u 2.39);

b)

Il-Kummissjoni għamlet progress fl-implimentazzjoni tal-pjan ta’ azzjoni tagħha għal qafas ta’ kontroll intern integrat (ara l-paragrafi 2.29 sa 2.36 u 2.39);

c)

Il-ġestjoni mill-Kummissjoni tal-baġit tjiebet matul l-aħħar ftit snin (ara l-paragrafi 3.4, 3.6, 3.11, 3.15 u 3.30 sa 3.32).

1.42.

Il-valutazzjoni tal-Qorti għandha x’taqsam mal-effettività tas-superviżjoni u l-kontroll fil-prevenzjoni tal-iżbalji. Il-qafas ta' kontroll intern tal-Komunità jinkludi dawk il-kontrolli meħtieġa biex jidentifikaw u jikkoreġu l-iżbalji, kif ukoll dawk imfassla biex jipprevjenu l-iżbalji milli jsiru. Il-Kummissjoni se tivvaluta l-impatt ta’ dan il-qafas fuq l-effettività tas-sistemi kollha flimkien.

1.43.

Il-baġit jinvolvi pagamenti magħmula lil miljuni ta’ benefiċjarji finali individwali. Il-pagamenti huma bbażati fuq l-osservanza mill-benefiċjarji finali ta’ kundizzjonijiet legali jew regolatorji (per eżempju, il-benefiċjarju jew l-ispejjeż jissodisfaw regoli ta' eliġibbiltà li kultant ikunu kkumplikati), kif ukoll il-preċiżjoni u l-eżistenza ta' l-attivitajiet ta' bażi u/jew l-ispejjeż. Xi wħud minn dawn il-kundizzjonijiet tal-pagament huma ddeterminati mir-regoli Komunitarji, inklużi r-regoli ta’ l-applikazzjoni ġenerali bħad-direttivi ta’ l-akkwist pubbliku, filwaqt li oħrajn huma deċiżi mill-Istati Membri. Il-benefiċjarji finali jitħallsu jew b’mod dirett (bħal fil-każ tal-ġestjoni diretta) jew permezz tar-rimborż ta’ talbiet ta’ nfiq eliġibbli minn awtoritajiet ta’ l-Istati Membri (b’mod notevoli fil-każ tal-ġestjoni maqsuma).

1.44.

Il-pagamenti huma legali u regolari meta dawn il-kundizzjonijiet huma ssodisfati, u meta l-benefiċjarji tajba jirċievu l-ammonti tajba fil-ħin tajjeb. Dan jeħtieġ sorveljanza u kontroll adegwati. L-assigurazzjoni li l-baġit jintefaq tajjeb — li n-nefqa hija legali u regolari kif ukoll li jingħata valur għall-flus — hija r-responsabbiltà tal-Kummissjoni. Għal madwar 80 % ta’ l-infiq — koeżjoni u agrikoltura — il-kompitu ta’ l-implimentazzjoni huwa maqsum ma’ l-Istati Membri, li fil-prattika jfisser li għandhom obbligi speċifiċi biex jagħżlu proġetti għall-finanzjament, jagħmlu pagamenti u jħaddmu sistemi ta’ kontroll, li jġestu r-riskji b’mod effettiv u li jirrappurtaw fuq ir-riżultat.

1.45.

Huma ħafna l-fatturi li jaffettwaw jekk l-iżbalji jseħħux jew le, jew li ma jkunux evitati jew misjuba u kkorreġuti mis-sistemi ta’ kontroll. Dawn jinkludu: il-kumplessità tar-regoli u obbligi ta’ eliġibbiltà li l-benefiċjarji għandhom isegwu, u kemm huma familjari magħhom; il-mod kif it-talbiet isiru u jkunu pproċessati; l-għadd u l-limitu ta’ kontrolli magħmula; kemm hemm sanzjonijiet imposti fuq benefiċjarji li jitolbu iżjed milli suppost meta jinstabu l-iżbalji; u l-viżibbiltà — u l-effett ta’ deterrent assoċjat — tal-proċeduri ta’ kontroll. Għalhekk, regoli u regolamenti mfassla sew u li huma ċari biex ikunu interpretati u sempliċi biex jiġu applikati, inaqqsu r-riskju ta’ l-iżbalji.

1.46.

Ikun li jkun l-approċċ tal-ġestjoni involut, l-arranġamenti ta’ sorveljanza u kontroll jikkorrispondu għal qafas li fih tliet livelli wiesgħa ta' ħidma:

a)

kontrolli ta’ livell primarju, li jiċċekkjaw jekk il-benefiċjarji jikkonformawx ma’ l-obbligi regolatorji tagħhom;

b)

kontrolli ta’ livell sekondarju, li jiċċekkjaw l-effettività ta’ kontrolli ta’ livell primarju; u

c)

sorveljanza ġenerali mill-Kummissjoni, biex ikun żgurat li l-Istati Membri u/jew id-Direttorati-Ġenerali tal-Kummissjoni jissodisfaw l-obbligi u r-responsabbiltajiet tagħhom fir-rigward tal-ġestjoni tagħhom tal-baġit (62).

1.47.

In-natura ta’ l-infiq ta’ l-UE tfisser li r-riskju prinċipali ta’ żball jinsab fil-livell tal-benefiċjarju finali li, apposta, b’mod negliġenti jew bi żvista, jagħmel talbiet għar-rimborż ta’ nefqa li hija ineliġibbli għaliex ma tissodisfax il-kundizzjonijiet regolatorji, jew mhix dokumentata tajjeb jew inkella ġiet kkalkulata ħażin. Dan huwa indikat mis-sejbiet tal-verifika preċedenti tal-Qorti, kif ukoll dawk f'dan ir-rapport annwali (ara l-paragrafi 5.12 sa 5.16, 6.22 sa 6.27, 7.14 sa 7.22, 8.9, 9.8 sa 9.11 u 10.16 sa 10.19). Mhux biss huwa l-każ li r-riskju prinċipali jinsab f’dan il-livell, iżda wkoll l-iżbalji ta’ sikwit jistgħu jinstabu biss fuq il-post, u b’hekk id-desk checks huma effettivi b'mod parzjali biss. Dan — flimkien mal-fatt li ħafna miljuni ta’ pagamenti jsiru kull sena — ifisser li l-kontrolli fil-livell primarju huma għaljin biex isiru, u l-ispiża ġenerali hija funzjoni diretta tal-kopertura.

1.47.

Il-Kummissjoni taqbel li l-kontrolli tad-dokumenti dwar talbiet jistgħu jkunu biss parzjalment effettivi fil-prevenzjoni tal-iżbalji. Għalhekk il-qafas tal-kontroll intern tal-Kummissjoni jżid is-serħan il-moħħ fuq il-legalità u r-regolarità tan-nefqa fuq bażi multi-annwalli permezz ta’ numru akbar ta' verifiki fuq il-post.

1.48.

Il-kontrolli magħmula fuq il-post f’dan il-livell ta’ sikwit jirrappreżentaw proporzjon żgħir biss (normalment 5 sa 10 % kull sena, skond il-qasam) tat-talbiet individwali. Il-Qorti ssib nuqqasijiet dwar il-kontrolli fl-agrikoltura (ara l-paragrafi 5.27, 5.28, 5.30 sa 5.32, u 5.34 sa 5.36) u l-politika tal-Koeżjoni (ara l-paragrafu 6.29), li jikkorrispondu għal nuqqasijiet fi ħdan l-awtoritajiet ta’ l-Istati Membri. Każijiet ta’ kontrolli primarji ta’ kwalità fqira kienu identifikati wkoll għall-ġestjoni diretta, inklużi kontrolli fil-livell tal-Kummissjoni dwar rimborżi lill-benefiċjarji tar-riċerka li jonqsu milli jaħdmu b'mod sodisfaċenti (il-paragrafi 7.29 u 7.30) u verifiki ta' kwalità fqira mwettqa minn awdituri indipendenti fuq talbiet individwali (ara l-paragrafi 7.32 sa 7.33, u 10.29 sa 10.30).

1.48.

Filwaqt li hu minnu li l-kontrolli fuq il-post qajla jsiru għall-benefiċjarji kollha tal-iskema, il-kontrolli amministrattivi regolatorji jsiru dejjem fir-rigward tat-talbiet individwali kollha. Dan għaliex il-kontrolli fuq il-post huma għaljin ħafna.

1.49.

In-natura tal-kontrolli fil-livell primarju tfisser li l-prestazzjoni fqira f’dan il-livell ma tistax tkun ikkumpensata b’mod dirett b’kontrolli fil-livell sekondarju. L-effettività ta’ dawn ta’ l-aħħar hija għalhekk iddeterminata mill-kapaċità tagħhom li jippromwovu arranġamenti ta’ kontroll adegwati fil-livell primarju, aktar mill-kapaċità tagħhom li jsibu u jikkorreġu żbalji individwali. Ix-xogħol tal-verifika tal-Qorti fuq is-sena finanzjarja 2007 reġa’ sab illi l-kontrolli sekondarji mill-Istati Membri u l-kontrolli ta’ sorveljanza mill-Kummissjoni (63) mhumiex qegħdin jiksbu l-livell mixtieq ta' effettività. Per eżempju, il-Qorti sabet nuqqasijiet:

1.49.

Is-superviżjoni tal-Kummissjoni hija mmirata biex ittejjeb is-sistemi tal-ġestjoni u l-kontroll sabiex jipprevjenu jew jidentifikaw u jikkoreġu l-iżbalji, bħal ma tirrakkomanda l-Qorti, u wkoll biex tiżgura li jittieħdu l-miżuri korrettivi meħtieġa. Mhijiex hi nnifisha mmirata għall-identifikazzjoni ta’ żbalji individwali.

a)

fl-approvazzjoni tal-konformità mill-Kummissjoni fl-agrikoltura (ara l-paragrafi 5.47 u 5.48);

a)

Il-konklużjonijiet tal-Qorti li hemm referenza għalihom fil-paragrafi 5.47 u 5.48 huma inerenti fil-mekkaniżmu tal-konformità tal-approvazzjoni fl-agrikoltura u, għalhekk, ma jistgħux jiġu kkunsidrati bħala nuqqasijiet ta' dak il-mekkaniżmu. Il-Kummissjoni tikkunsidra li l-mekkaniżmu qed jaħdem sew u jilħaq kompletament l-għanijiet li għalhom tfassal, li jinkludu l-esklużjoni mill-finanzjament tal-Kummissjoni infiq li ma jkunx sar b’konformità mar-regoli tal-Komunità.

Aktar minn hekk, fejn ikunu identifikati, ħlasijiet mhux dovuti lill-benefiċjarji b'riżultat tal-approvazzjoni tal-konformità, l-Istati Membri huma meħtieġa li jsegwuhom b'azzjonijiet ta' rkupru kontra dawn il-benefiċjarji. Madankollu, anke fejn irkupri mill-benefiċjarji ma jkunux meħtieġa minħabba li l-korrezzjoni finanzjarja tirrigwarda biss nuqqasijiet fis-sistema tal-ġestjoni u l-kontroll tal-Istati Membri u mhux ħlasijiet mhux dovuti, dawn il-korrezzjonijiet huma mezz importanti sabiex jittejbu s-sistemi tal-Istati Membri u b'hekk sabiex jiġiu evitati jew identifikati u rkuprati ħlasijiet irregolari lil benefiċjarji.

Ara wkoll it-tweġibiet għal paragrafi 5.47 u 5.48.

b)

fil-verifiki fl-infiq tal-Koeżjoni (ara l-paragrafi 6.30 u 6.31);

b)

Il-Kummissjoni tikkonsidra li fil-biċċa l-kbira tal-każi l-verifiki eżaminati mill-Qorti fil-qasam tal-Politika ta' Koeżjoni wasslu għal miżuri ta’ korrezzjoni effettivi u riżultati operazzjonali utli. Barra minn hekk ir-Rapporti ta’ Attività Annwali tad-Direttorati Ġenerali kompetenti stabbilixxew fid-dettall ir-riżultati tal-attività tal-verifika, b’mod partikolari l-azzjonijiet ta’ rimedju, sospensjonijiet u korrezzjonijiet finanzjarji.

Ara wkoll it-tweġibiet għal paragrafi 6.30 u 6.31.

c)

fil-verifiki finanzjarji ex-post fir-riċerka, enerġija u trasport (ara l-paragrafu 7.34); u

c)

Id-DGs tar-Riċerka żiedu b'mod sinifikanti l-isforzi ta' verifika tagħhom fl-2007 u laħqu l-miri annwali tagħhom.

L-attenzjoni issa ddur lejn il-korrezzjoni tal-iżbalji identifikati. Id-Direttorati Ġenerali tar-Riċerka qed iħabirku attivament biex itejbu l-istrumenti ta' sorveljar u qed joħorġu linji gwida amministrattivi u finanzjarji iktar preċiżi. Dawn huma mistennija li jtejbu l-effiċjenza u l-kompletezza tal-proċess ta' rkupru (inkluża l-estrapolazzjoni u s-segwitu għas-sejbiet tal-Qorti).

d)

fid-dikjarazzjoni ta’ assigurazzjoni ex-ante fir-rigward tal-kwalità tal-ġestjoni u żjarat ta' monitoraġġ relatati (ara l-paragrafi 9.16, 9.17 u 9.20).

d)

Id-Direttorat Ġenerali għall-Ġustizzja, Libertà u Sigurtà (DG JLS) tejjeb il-gwida tiegħu u stabbilixxa pjan ta' azzjoni biex jiffinalizza ż-żjarat tiegħu ta' sorveljar Ara tweġibiet għal paragrafi 9.16, 9.17 u 9.20.

1.50.

Kontrolli primarji u sekondarji dgħajfa ma jistgħux ikunu kkumpensati bis-sorveljanza tal-Kummissjoni. L-għan ta’ din is-sorveljanza huwa li jkun żgurat li hemm arranġamenti ta’ kontroll adegwati fil-livelli primarji u sekondarji fis-seħħ, u li qegħdin jitħaddmu b’mod effettiv. Għandhom ikunu identifikati nuqqasijiet fil-livelli aktar baxxi (per eżempju fir-rapporti ta’ attività annwali tad-Direttorati-Ġenerali), u għandhom jittieħdu miżuri biex jirrimedjaw is-sitwazzjoni (ara l-paragrafu 2.40). Is-sorveljanza sseħħ f’livelli differenti fi ħdan il-Kummissjoni, kemm fid-Direttorati-Ġenerali involuti fin-nefqa tal-ġestjoni maqsuma, u fl-ogħla livell tal-Kummissjoni fir-rigward ta’ Direttorati-Ġenerali individwali.

1.50.

Fl-agrikoltura, nuqqasijiet fis-sistemi ta’ ġestjoni u kontroll fl-Istati Membri huma identifikati permess ta’ proċeduri ta’ approvazzjoni b’konformità u jistgħu jwasslu għal korrezzjonijiet finanzjarji imposti fuq Stati Membri. Dawn il-korrezzjonijiet huma mezz importanti biex jitjiebu s-sistemi tal-Istati Membri u biex b’hekk jipprevjenu jew jidentifikaw ħlasijiet irregolari lil benefiċjarji.

1.51.

Dan il-proċess huma mxekkel minn fatturi marbuta b’mod dirett ma’ l-għadd ta' benefiċjarji, il-kumplessità tar-regoli, id-diffikultà fl-iċċekkjar tal-konformità u l-effett dissważiv ta' korrezzjonijiet u sanzjonijiet finanzjarji.

1.51.

Dawn huma riskji inerenti ta’ ċerti oqsma ta’ politika li jridu jittieħdu f’kunsiderazzjoni biex tiġi ddeterminata l-istrateġija ta’ kontroll, b’mod partikolari fil-kuntest tal-programmi multiannwali.

1.52.

L-Opinjoni tal-Qorti Nru 2/2004 tirrakkomanda li s-sistemi ta’ kontroll li jiggvernaw in-nefqa Komunitarja għandhom jagħmlu bilanċ xieraq bejn l-ispiża tal-kontrolli, u l-benefiċċji li jġibu f’termini tat-tnaqqis tar-riskju ta' l-iżball fi tranżazzjonijiet għal livell raġonevoli (riskju residwali). Dan jeħtieġ li jkun rikonoxxut mill-parteċipanti kollha fil-proċess tal-baġit:

1.52.

Il-Kummissjoni taqbel mar-rakkomandazzjonijiet tal-Opinjoni tal-Qorti Nru 2/2004, u qed timplimentahom fi ħdan il-Pjan ta’ Azzjoni lejn il-Qafas ta’ Kontroll Intern Integrat, kif ippreżentat fir-rapport tagħha ta’ progress (COM(2008)110 finali). Qed tkompli bix-xogħol tagħha fuq l-ispejjeż u l-benefiċċji tal-kontrolli taħt punt 10 tal-Pjan ta' Azzjoni u se terġa’ tniedi d-dibattitu dwar ir-riskju tollerabbli lejn l-aħħar tal-2008.

a)

mhux il-benefiċjarji finali kollha jistgħu jkunu ċċekkjati fuq il-post, u b’hekk xi riskju ta’ żball residwali dejjem se jkun preżenti. Il-kwistjoni prinċipali hija li dak ir-riskju jkun iffissat għal livell xieraq (tollerabbli), b’kunsiderazzjoni tan-natura tat-tipi differenti ta’ nfiq, il-kumplessità tar-regoli eżistenti u l-effett dissważiv tas-sanzjonijiet disponibbli;

b)

l-ispejjeż tal-kontroll huma kwistjoni importanti, kemm għall-baġit ta’ l-UE u kif ukoll għall-Istati Membri jew benefiċjarji; u

b)

Hija partikolarment l-ispiża tal-kontrolli fuq il-post li hija għalja.

c)

il-bilanċ bejn ir-riskju ta’ l-ispejjeż u residwali għal oqsma ta’ nfiq individwali huwa tant importanti illi għandu jkun approvat mil-livell politiku (jiġifieri mill-awtoritajiet tal-baġit/kwittanza) f’isem iċ-ċittadini ta’ l-Unjoni;

d)

jekk skema ma tistax tkun implimentata b’mod sodisfaċenti f’livell aċċettabbli ta’ spiża u b’riskju tollerabbli, din għandha tkun ikkunsidrata mill-ġdid.

1.53.

It-twaqqif ta’ qafas ta' kontroll intern ibbażat madwar dawn il-prinċipji razzjonali kieku jippermetti li dawn is-sistemi ta' kontroll ikunu definiti f'termini ta' dak li għandhom jiksbu (64) (miri tal-prodott), kif ukoll kriterji maqbula li abbażi tagħhom għandha tkun meqjusa u vverifikata l-prestazzjoni tagħhom.

1.53.

Il-Kummissjoni se teżamina din l-idea. Il-gwida preżenti fil-qasam tal-politika ta' Koeżjoni tinkoraġġixxi approċċ orjentat lejn ir-riżultati għal kontrolli bbażati fuq l-irreġistrar tar-rati ta’ żbalji u kemm jinbidlu maż-żmien, u r-rekwiżit biex jiġu sorveljati u rrapurtati r-rati tal-iżbalji huwa mandatorju fil-leġiżlazzjoni għall-perjodu 2007-2013. Fl-agrikoltura, ir-riżultati tal-kontrolli mitluba taħt l-IACS huma ssorveljati mill-qrib.

1.54.

Il-Qorti tħeġġeġ lill-Kummissjoni sabiex tikkonkludi l-analiżi tagħha fuq l-ispiża tal-kontrolli u fuq il-livelli differenti tar-riskju inerenti fl-oqsma ta' l-infiq (65). Approċċ realistiku, trasparenti, razzjonali u effettiv b'relazzjoni ma' l-ispejjeż lejn il-ġestjoni tar-riskji kieku, fil-fehma tal-Qorti, ikun ta’ benefiċċju kemm għall-kontributuri kif ukoll għall-benefiċjarji.

2.1.

Dan il-kapitolu jirrapporta dwar il-progress li għamlet il-Kummissjoni fl-2007 fit-titjib ta’ l-effettività tas-sistemi ta’ sorveljanza u kontroll fid-Direttorati-Ġenerali sabiex tassigura l-legalità u r-regolarità tat-tranżazzjonijiet iffinanzjati mill-baġit ta’ l-UE. B’mod partikolari, hija tanalizza l-punt safejn:

2.1.

a)

ir-rappreżentazzjonijiet tal-maniġment fir-rapporti ta’ attività annwali u d-dikjarazzjonijiet tad-Diretturi-Ġenerali u fir-rapport ta’ Sinteżi tal-Kummissjoni huma kkonfermati bis-sejbiet tal-verifika tal-Qorti (il-paragrafi 2.2 sa 2.14);

b)

il-Kummissjoni rnexxiela żżid l-assigurazzjoni dwar il-legalità u r-regolarità bl-użu ta’ indikaturi, kriterji ta’ materjalità rilevanti u taqsiriet annwali (il-paragrafi 2.15 sa 2.23);

c)

il-Kummissjoni għamlet progress fl-implimentazzjoni ta’ l-istandards ta’ kontroll intern u tal-qafas ta’ kontroll intern integrat, u l-punt safejn kienet kapaċi turi l-impatt tagħhom fuq l-infiq ta’ l-2007 (il-paragrafi 2.24 sa 2.36).

c)

Il-Kummissjoni tikkunsidra li s-sistemi ta' kontroll intern fis-seħħ, bil-limiti deskritti fir-rapporti ta’ attività annwali tal-2007, jipprovdu assigurazzjoni raġonevoli li r-riżorsi assenjati għall-attivitajiet tal-Kummissjoni ntużaw għall-għan intiż tagħhom u skont il-prinċipji ta’ ġestjoni finanzjarja soda. Il-proċeduri ta’ kontroll li ddaħħlu fis-seħħ u s-segwitu tas-sejbiet tal-verifika tal-Qorti jagħtu l-garanziji meħtieġa dwar il-legalità u r-regolarità tat-tranżazzjonijiet sottostanti.

Il-Kummissjoni qed tieħu azzjoni biex ittejjeb aktar is-sistema ta’ kontroll intern tagħha fid-dawl tal-esperjenza tagħha stess u biex tindirizza l-kwistjonijiet li tqajmu mill-awdituri. Fost l-azzjonijiet li ttieħdu fl-2007 kien hemm ir-reviżjoni tal-istandards tal-kontroll intern għal ġestjoni effettiva, l-issuktar tal-implimentazzjoni tal-Pjan ta’Azzjoni lejn Qafas Integrat ta’ Kontroll Intern u linji gwida riveduti għar-Rapporti ta’ Attività Annwali.

Il-Kummissjoni qed tindirizza ċerti kwistjonijiet, bħal dawk enfasizzati fir-riżervi tal-uffiċjali awtorizzanti ddelagati. Se tispjega b’mod aktar ċar ir-raġunijiet fejn hemm xi differenzi fl-opinjoni bejn l-analiżi annwali tal-qorti, mitluba mit-Trattati tal-KE, u l-analiżi multiannwali tal-maniġer, li ma tikkunisdrax il-miżuri meħuda biex jinstabu u jiġu kkoreġuti żbalji li jseħħu matul is-sena.

2.2.

Billi tadotta r-Rapport ta’ Sinteżi l-Kummissjoni tassumi r-responsabilità politika tagħha għall-implimentazzjoni operattiva tal-baġit permezz tad-Diretturi-Ġenerali tagħha (1). Il-Kummissjoni tikkunsidra li l-proċeduri ta’ kontroll fis-seħħ jagħtu l-garanziji neċessarji dwar il-legalità u r-regolarità tat-tranżazzjonijiet ta’ bażi li l-Kummissjoni tieħu r-responsabilità totali tagħhom skond l-Artikolu 274 tat-Trattat tal-KE.

2.3.

Minkejja dan, il-Kummissjoni tagħraf li hemm bżonn sforzi ulterjuri biex jiġu solvuti għadd ta’ nuqqasijiet, b’mod partikolari dawk enfasizzati fir-riżervi ta’ l-uffiċjali delegati li jawtorizzaw u dawk li jappartjenu ma’ l-oqsma tal-baġit li ma kinux ikkunsidrati bħala sodisfaċenti mill-Qorti ta’ l-Awdituri. F’dan ir-rigward, il-Qorti tqis li l-ambitu ta’ xi riżervi għandu jkun akbar minn dak ippreżentat mid-Diretturi-Ġenerali tal-Kummissjoni (il-paragrafu 2.12 u t- Tabella 2.1 )

2.3.

Il-Kummissjoni tilqa’ l-valutazzjoni mtejba tal-Qorti fit-tabella 2.1 dwar l-evidenza mogħtija mir-Rapporti ta’ Attività Annwali tal-2007 tad-Diretturi Ġenerali għall-konklużjonijiet tad-DAS tal-Qorti.

2.4.

Għall-Fondi Strutturali, il-Kummissjoni tindika li tat figuri aggregati dwar korrezzjonijiet finanzjarji li twettqu fuq livell nazzjonali permezz ta’ rtirar u rkupri mill-Istati Membri (8). Iżda, il-Kummissjoni għandha tpoġġi aktar enfasi fir-Rapport ta’ Sinteżi tagħha fuq il-“‘vojt u l-inkonsistenzi” fid-data mill-Istati Membri. Il-miżuri intiżi biex itejjbu l-kwalità ta’ l-informazzjoni għalhekk m’għandhom ikunu limitati biss għall-Kummissjoni, kif intqal fir-Rapport ta’ Sinteżi, imma estiżi wkoll għall-Istati Membri (ara wkoll il-paragrafi 1.42, 2.31 sa 2.33 u 3.26 sa 3.28)

2.4.

L-anness tar-Rapport Annwali dwar il-Fondi Strutturali tal-2006, li ssir referenza għalih fir-Rapport ta’ Sinteżi (COM(2008) 338 finali), u l-kontijiet annwali tal-2007 jagħrfu l-fatt li jeżistu nuqqasijiet u inkonsistenzi fid-dejta li ntbagħtet mill-Istati Membri.

2.5.

Għal xi wħud mill-objettivi multi-annwali tal-Kummissjoni l-evalwazzjoni tagħha hija differenti minn dik li għamlet il-Qorti. Il-Kummissjoni tiggrada, per eżempju, kemm l-objettiv tagħha li tikseb sistema ta’ kontroll intern effettiva u kif ukoll dak li tippromwovi r-responsabilità permezz ta’ Rapporti ta’ Attività Annwali bħala kkompletati. Iżda, il-Qorti tinnota li għalkemm l-istandards ta’ kontroll intern ġew implimentati, l-effettività ta’ għadd ta’ sistemi ta’ sorveljanza kontroll biex jipprevjenu jew isibu u jikkoreġu l-iżbalji ma tistax tintwera (ara wkoll il-paragrafu 2.26) u li l-ambitu u l-iskala ta’ xi riżervi fir-rapporti ta’ Attività Annwali għandhom ikunu usa’ sabiex jirriflettu l-impatt potenzjali tagħhom b’mod sħiħ (ara l-paragrafu 2.12).

2.5.

Ir-rapport ta’ sinteżi tal-Kummissjoni (COM(2008) 338 finali anness 3) qies li xi inizjattivi meħuda biex jiġu sodisfatti l-għanijiet kienu ġew konklużi. Dan ma jimplikax li l-Kummissjoni tikkunsidra li mhi se tittieħed l-ebda azzjoni ulterjuri biex fil-ġejjieni ttejjeb is-sistemi ta’ kontroll intern jew ir-rapporti ta’ attività annwali. Il-Kummissjoni hija impenjata li ttejjeb is-sistema ta’ kontroll intern tagħha b’mod kostanti.

2.6.

Fl-eżami tagħha tar-rapporti ta’ attività annwali u tad-dikjarazzjonijiet tad-Diretturi-Ġenerali, il-Qorti evalwat il-punt safejn dawn jagħtu stampa ġusta (jiġifieri mingħajr distorsjonijiet sinifikanti) ta’ l-effettività tal-proċeduri fis-seħħ. B’mod partikolari, jekk is-sistemi ta’ sorveljanza u kontroll jagħtux l-assigurazzjoni neċessarja f’dak li għandu x’jaqsam mal-legalità u r-regolarità ta’ l-operazzjonijiet li jaqgħu taħthom.

2.7.

Twettqet reviżjoni fuq ir-rapporti ta’ attività annwali kollha, ikkomplementata b’analiżi fil-fond fuq dawk ta’ 15-il Direttorat-Ġenerali.

2.8.

Il-gwida (9) għar-rapporti ta’ attività annwali ta’ l-2007 enfasizzat il-bżonn espress mis-servizzi ċentrali tal-Kummissjoni biex issir kjarifika tar-rabta bejn l-effettività tas-sistemi ta’ kontroll intern u l-bażi li fuqha huma mibnija d-dikjarazzjonijiet. Fil-prattika, il-parti l-kbira tad-Diretturi-Ġenerali spjegaw fid-dettall fuq xiex bnew jew l-elementi prinċipali li fuqhom ibbażaw l-assigurazzjoni tagħhom.

2.9.

Id-Diretturi-Ġenerali kollha qalu li kisbu assigurazzjoni raġonevoli li r-riżorsi allokati lilhom intużaw għall-għanijiet speċifikati u l-kontrolli interni li huma introduċew assiguraw il-legalità u r-regolarità tat-tranżazzjonijiet ta’ bażi, f’għadd ta’ każijiet soġġetti għal riżervi. Il-Qorti evalwat il-bażi ta’ dawn ir-rendikonti billi pparagunat il-kopertura u l-impatt tagħhom mar-riżultati tal-verifika proprja tal-Qorti.

2.10.

Mill-40 dikjarazzjoni għall-2007, 13 (10) fihom riżerva waħda jew aktar, il-maġġoranza tagħhom jirreferu għal nuqqasijiet dwar il-legalità u r-regolarità tat-tranżazzjonijiet ta’ bażi. L-għadd totali ta’ riżervi waqa’ minn 20 (2006) għal 17 (2007), għalkemm l-impatt finanzjarju tagħhom flimkien żdied.

2.11.

Għad-Direttorati-Ġenerali tal-politika Reġjonali u ta’ l-Impjiegi, l-Affarijiet Soċjali u l-Opportunitajiet Indaqs il-kwantifikazzjoni finanzjarja stmata totali ta’ l-impatt tar-riżervi tagħhom żdied minn madwar 140 miljun euro fl-2006 għal madwar 725 miljun euro fl-2007 (11). Għad-Direttorat-Ġenerali ta’ l-Agrikoltura u l-Iżvilupp Rurali r-riżerva l-ġdida għall-2007 dwar l-infiq fuq l-Iżvilupp Rurali hija bbażżata fuq informazzjoni mogħtija mill-Istati Membri li turi rata ta’ żball ta’ aktar minn 3 %. Iżda, din l-informazzjoni ma kinitx ġiet validata mill-korpi ta’ ċertifikazzjoni jew aċċettata mid-Direttorat-Ġenerali. Ir-riservi l-aktar sinifikanti fil-kuntest tal-legalità u r-regolarità tat-tranżazzjonijiet ta’ bażi qegħdin fit- Tabella 2.1 .

2.11.

Ir-rapporti ta’ attività annwali tad-Direttorati Ġenerali għall-Politika Reġjonali, u għall-Impjiegi, l-Affarijiet Soċjali u l-Opportunitajiet Indaqs jistabbilixxu l-ammonti li qegħdin f’riskju, jiġifieri l-ħlasijiet relatati mas-sistemi milquta minn nuqqasijiet, u l-kwantifikazzjoni tal-impatt finanzjarju. Dan isir permezz ta' referenza għall-iskali ta' korrezzjonijiet b' rata fissa għal nuqqasijiet fis-sistemi ta’ ġestjoni u kontroll. Il-Kummissjoni tikkunsidra li dan l-approċċ jagħti valutazzjoni ġusta tal-impatt finanzjarju potenzjali tan-nuqqasijiet misjuba.

2.12.

It-tabella turi li r-rapporti ta’ attività annwali jagħtu evidenza ċara u mhux ambigwa għall-konkluzjonijiet tad-DAS tal-Qorti dwar l-infiq amministrattiv u l-affarijiet ekonomiċi u finanzjarji biss. Għal parti kbira ta’ l-oqsma tal-politika, ir-rapporti ta’ attività annwali huma aktar qrib il-konklużjonijiet ta’ l-evalwazzjoni speċifika tad-DAS rilevanti milli fi snin preċedenti, b’mod partikolari fil-każ tal-politika agrikola u ta’ koeżjoni. Il-Qorti tinnota, iżda, illi l-ambitu u l-iskala ta’ dawn ir-riżervi għandu jkun usa’ sabiex jirrifletti bis-sħiħ l-impatt potenzjali tagħhom u, għal għadd ta’ oqsma tal-politika d-Diretturi-Ġenerali jaslu xorta għal konklużjoni aktar pożittiva dwar il-legalità u r-regolarità ta’ l-infiq ta’ l-UE minn dik tas-sejbiet tal-verifika tal-Qorti proprji.

2.12.

Filwaqt li l-Qorti tagħti opinjoni annwali tal-verifika dwar il-legalità u r-regolarità tat-tranżazzjonijiet sottostanti (kif jitlob it-Trattat tal-KE), l-opinjoni tad-Diretturi Ġenerali tiffoka fuq jekk il-fondi jkunux intużaw għall-iskop intiż, b’kunsiderazzjoni għan-natura multiannwali tal-kontrolli, u l-effikaċja tagħhom fis-sejba u l-korrezzjoni ta’ żbalji. Id-Diretturi Ġenerali jagħtu opinjoni amministrattiva bbażata fuq informazzjoni li tinkludi l-ħidma ta' verifika tal-Kummissjoni stess, rapporti u osservazzjonijiet tal-Qorti tal-Awdituri u, fejn xieraq, ir-riżultati tal-kontrolli tal-Istati Membri.

2.13.

Fir-rigward tal-qasam tal-politika Edukazzjoni u Ċittadinanza, l-assigurazzjoni mogħtija mid-Diretturi-Ġenerali mhix kompattibbli f’xi aspetti sinifikanti mas-sejbiet tal-Qorti. Il-Qorti sabet nuqqasijiet sinifikanti fil-proċeduri ta’ dikjarazzjoni ex-ante taħt ir-responsabilità tad-Direttorat-Ġenerali għall-Edukazzjoni u l-Kultura (ara l-paragrafi 9.17 u 9.25), iżda dawn in-nuqqasijiet ma jidhrux bħala riżerva tad-Direttur-Ġenerali. Għad-Direttorat-Ġenerali għall-Komunikazzjoni hemm riżerva dwar nuqqas ta’ kontrolli ex-post strutturati, imma l-Qorti sabet ukoll li hemm nuqqasijiet sinifikanti fil-kontrolli ex-ante (ara l-paragrafi 9.23 u 9.25).

2.13.

Id-Direttorat Ġenerali tal-Edukazzjoni u l-Kultura (DG EAC) bbaża l-assigurazzjoni tiegħu fuq sett komprensiv ta' kontrolli u mhux biss fuq il-proċedura ta’ valutazzjoni tad-dikjarazzjoni ex-ante.

2.14.

Fil-qasam tal-politika Għajnuna esterna, Żvilupp u Tkabbir il-Qorti sabet li t-tranżazzjonijiet ta’ bażi huma milquta minn livell materjali ta’ żball ta’ legalità u/jew ta’ regolarità fil-biċċa l-kbira fit-tranżazzjonijiet ġestiti minn organizzazzjonijiet implimentattivi (ara l-paragrafu 8.31) u li s-sistemi ta’ sorveljanza u kontroll huma parzjalment effettivi (ara l-paragrafu 8.32). Dawn is-sejbiet mhux riflessi b’mod adegwat mid-Diretturi-Ġenerali fir-riżervi tagħhom.

2.14.

Il-Qorti tasal għal konklużjoni dwar il-materjalità abbażi ta’ kampjun ta' tranżazzjonijiet minn firxa wiesgħa ta’ Direttorati Ġenerali. Madankollu kull Direttur Ġenerali jista’ jikkonkludi u jirrapporta dwar il-materjalità għall-qasam tiegħu stess.

2.15.

Il-Kummissjoni għamlet enfażi partikolari fuq l-għoti ta’ indikaturi ta’ regolarità fir-Rapporti ta’ Attività Annwali ta’ l-2007 (12). Il-parti l-kbira tad-Diretturi-Ġenerali użaw templates tal-kontroll intern indikattivi biex juru li dispożizzjonijiet legali, regolatorji u kuntrattwali rilevanti ġew osservati u kif dawn jistgħu jintrabtu ma’ assigurazzjoni raġonevoli (13). Għal Direttorat-Ġenerali wieħed, iżda, id-data bażika użata mhix affidabbli u/jew ir-rabta mal-legalità u r-regolarità mhix stabbilita biċ-ċar (14). Kważi d-Diretturi-Ġenerali kollha għadhom ma inkludewx indikaturi komparabbli għas-snin ta’ qabel u lanqas ma ffissaw miri ta’ legalità jew regolarità (15).

2.15.

Il-Kummissjoni żviluppat diversi mudelli ta’ kontroll intern bil-għan li l-istrateġiji ta’ kontroll ikunu ppreżentati b’mod armonizzat, iżda adattati għal kwistjonijiet u modi differenti ta’ ġestjoni. Iddaħħlu fis-seħħ indikaturi ta’ legalità u regolarità fuq bażi obbligatorja, bil-għan li jiffaċilitaw il-monitoraġġ u r-rappurtaġġ dwar il-legalità u r-regolarità tat-tranżazzjonijiet fir-rigward tar-rapporti ta’ attività annwali tal-2007. Il-Kummissjoni tikkunsidra li dan jikkostitwixxi wieħed mill-ewwel passi importanti iżda tirrikonoxxi li se jkollu jsir xi titjib b’rabta mal-affidabbiltà u ċ-ċarezza tal-indikaturi. Jeħtieġ li dawn jintużaw bis-sħiħ u b’mod faċli għal skopijiet ta' segwitu u monitoraġġ.

2.16.

L-Artikolu 53b tar-regolament finanzjarju revedut (16) jgħid illi: “L-Istati Membri għandhom jipproduċu taqsira annwali fil-livell nazzjonali xieraq tal-verifiki u d-dikjarazzjonijiet” (17). Skond l-istruzzjonijiet tas-servizzi Ċentrali tal-Kummissjoni, id-Diretturi-Ġenerali għandhom jippreżentaw evalwazzjoni preliminari ta’ l-assigurazzjoni miksuba mit-taqsiriet annwali tar-rapporti ta’ l-attività annwali ta’ l-2007 (18).

2.17.

Il-Qorti rrikonoxxiet żmien qabel li t-taqsiriet annwali huma element addizzjonali tal-kontroll intern u ħeġġet lill-Kummissjoni biex iżżid il-valur lill-proċess billi tidentifika problemi komuni, soluzzjonijiet possibbli u l-aħjar prattiċi u tuża din l-informazzjoni fir-rwol tagħha ta’ sorveljanza (19).

2.18.

Il-verifika tal-Qorti wriet li fil-31 ta’ Marzu 2008, 25 mis-27 Stat Membru kienu ppreżentaw sommarju annwali. Minn dawn il-25, total ta’ tmien Stati Membri ma osservawx ir-rekwiżiti minimi tar-Regolament Finanzjarju u r-Regoli Implimentattivi (20) u 12-il Stat Membru ieħor osservawhom biss parzjalment. Barra dan, 15 biss minn dawn il-25 Stat Membru taw rendikont dwar il-kompletezza u l-preċiżjoni ta’ l-informazzjoni mogħtija u tnejn minnhom kienu dwar il-perijodu ta’ programmar 2007-2013 li fih tħallsu biss pagamenti bil-quddiem bi ftit riskju marbut magħhom.

2.18.

Il-Kummissjoni tilqa’ l-konklużjoni tal-Qorti li l-Kummissjoni wettqet monitoraġġ xieraq tal-proċess tas-sommarju annwali billi ħarġet linji gwida ċari filwaqt li ħadet azzjoni pronta dwar in-nuqqas ta' konformità.

2.19.

Id-differenza bejn il-preżentazzjoni u l-assenza frekwenti ta’ rendikont fuq il-kompletezza u l-preċiżjoni tad-data ta’ bażi fissret li t-taqsiriet annwali sa issa ma jagħtux evalwazzjoni affidabbli tal-ħidma u l-effettività tas-sistemi ta’ sorveljanza u kontroll.

2.19.

B’mod ġenerali r-riżultat tal-ewwel ċiklu ta’ sommarji annwali kien wieħed pożittiv, jiġifieri fl-aħħar mill-aħħar kważi l-Istati Membri kollha żammew konformi mar-rekwiżiti, u l-Kummissjoni tikkunsidra li dan jipprovdi bażi tajba għat-titjib tal-kwalità tas-sommarji fiċ-ċiklu li jmiss. Il-Kummissjoni se tippreżenta nota ta’ gwida riveduta lill-Istati Membri b’rakkomandazzjonijiet immirati lejn il-kisba ta’ kwalità ogħla fis-sommarji annwali tagħhom għall-2008.

2.20.

Il-Qorti tqis illi, għal din l-ewwel sena ta’ taqsiriet annwali, il-Kummissjoni ssorveljat b’mod xieraq il-proċess kemm billi ħarġet linji ta’ gwida ċari u billi segwiet ir-raġunijiet għaliex ma ġewx osservati l-iskadenzi u l-kriterji ta’ l-ambitu jew tal-kwalità.

2.21.

Bosta Direttorati-Ġenerali stabbilew kriterji ta’ materjalità (21) skond il-linji ta’ gwida tal-Kummissjoni u adattawhom għall-modi ta’ ġestjoni partikolari tagħhom, għall-ambjent tal-kontroll intern u għas-sistemi ta’ kontroll fl-Istati Membri (22).

2.22.

Fuq rakkomandazzjoni tal-Qorti fir-Rapport Annwali tagħha ta’ l-2006 (23) l-erba Direttorati-Ġenerali prinċipali responsabbli mill-implimentazzjoni tal-baġit ta’ l-UE taħt l-arranġamenti ta’ ġestjoni maqsuma (24) irrevedew il-metodu li bih jevalwaw il-ħidma tas-sistemi ta’ ġestjoni u kontroll għall-azzjonijiet strutturali fl-Istati Membri. Id-Diretturi-Ġenerali issa jikkunsidraw il-programmi u s-sistemi kollha li ngħatatilhom opinjoni tal-verifika avversa dwarhom minn korp adegwat bħala li fihom, “nuqqasijiet sinifikanti”, jekk mhux għax hemm evidenza tal-verifika affidabbli, minn sors differenti, li turi l-oppost (25).

2.23.

Direttorat Ġenerali wieħed applika livelli ta’ materjalità li mhumiex kompatibbli ma’ l-informazzjoni u l-assigurazzjoni l-oħra mogħtija fi bnadi oħra fir-Rapport ta’ l-Attività Annwali tiegħu (26).

2.23.

Fir-rapport ta’ Sinteżi s-servizzi ċentrali tal-Kummissjoni kkommettew ruħhom li jipprovdu gwida ulterjuri lid-Direttorati Ġenerali biex dawn jindirizzaw b’mod aktar ċar ir-rabta bejn ir-rati ta’ żbalji, il-materjalità u r-riżervi.

2.24.

Il-Qorti eżaminat l-applikazzjoni ta’ għażla ta’ standards ta’ kontroll intern (ICS) minn għadd ta’ servizzi tal-Kummissjoni. L-eżami mmira li jevalwa mhux biss il-grad ta’ implimentazzjoni tar-rekwiżiti minimi (baseline), imma wkoll li jevalwa l-efettività tas-sistemi li jassiguraw il-legalità u r-regolarità tat-tranżazzjonijiet ta’ bażi. Din ta’ l-aħħar hija partikolarment importanti għall-2007 għax tippermetti li jittieħdu konklużjonijiet dwar is-suċċess ta’ l-isforzi tal-Kummissjoni f’dan il-qasam qabel ir-reviżjoni ġenerali ta’ l-istandards fis-seħħ sa mill-2008.

2.24.

Il-Kummissjoni għandha l-għan li turi li l-implimentazzjoni tal-istandards qed tikkontribwixxi b’mod effettiv għall-assigurazzjoni tal-amministrazzjoni. Dan il-prinċipju iservi ta’ bażi għar-reviżjoni li saret fl-2007 tal-istandards ta’ kontroll intern (fis-seħħ mill-2008).

2.25.

L-evalwazzjoni tal-Qorti ta’ l-implimentazzjoni ta’ l-istandards ta’ kontroll intern għas-sena finanzjarja 2007 turi li d-Direttorati-Ġenerali josservaw bħala medja 96 % (2006, 95 %) tar-rekwiżi minimi (ara t- Tabella 2.2 ). Għalhekk il-Kummissjoni implimentat ICSs fuq grad konsistentement għoli sa mill-2004.

2.25.

Fis-sena 2000 il-Kummissjoni adottat l-istandards tagħha ta’ kontroll intern bħala parti mir-riforma li tnediet f'dik is-sena. L-istandards u r-rekwiżiti minimi assoċjati magħhom kienu saru bil-ħsieb li jippermettu li titkejjel il-maturità tas-sistemi ta' kontroll intern tal-Kummissjoni. Is-suċċess ta’ dan l-approċċ joħroġ biċ-ċar mil-livell konsistentement għoli ta' konformità li ġie rrapurtat mis-servizzi u mill-Qorti fl-aħħar snin.

2.26.

Minkejja din il-kisba l-Kummissjoni ma kinitx kapaċi li turi b’mod komprensiv għall-2007 li sistemi ta’ sorveljanza u kontroll huma biżżejjed effettivi biex inaqqsu r-riskju ta’ żball f’ċerti oqsma ta’ politika bħall-Agrikoltura u r-riżorsi naturali (il-paragrafu 5.51), il-Koeżjoni (il-paragrafu 6.32) (27), ir-Riċerka, l-enerġija u t-trasport (il-paragrafu 7.41), l-Għajnuna esterna, l-iżvilupp u t-tkabbir (il-paragrafu 8.32) u l-Edukazzjoni u ċ-ċittadinanza (il-paragrafu 9.25).

2.26.

Il-Kummissjoni tirrikonoxxi li jeħtieġ li jittieħdu miżuri biex tittejjeb l-effikaċja tas-sistemi ta' kontroll intern, u ta' dawk superviżorji, għal ċerti oqsma ta' politika. Dan huwa proċess kontinwu u jinvolvi titjib ulterjuri tas-sistemi ta’ kontroll fil-livelli kollha.

2.27.

Fl-2007 il-Kummissjoni ddeċidiet li tissostitwixxi l-istruttura ICS kurrenti bi prinċipji bażiċi u b’rekwiżiti relatati aktar dettaljati li essenzjalment jikkorrispondu ma’ l-ICS ta’ qabel u r-rekwiżiti minimi (28). Analiżi tat-tmien ICS rilevanti għall-evalwazzjoni tal-Qorti fl-2007 ma turix bidliet materjali fil-format il-ġdid.

2.27.

L-għan tar-reviżjoni tal-istandards kien li l-implimentazzjoni tagħhom tkun iċċarata u ssimplifikata: l-istandards il-ġodda jkopru l-istess oqsma iżda jużaw lingwaġġ aktar aċċessibbli għall-persunal kollu. Barra minn hekk il-qafas il-ġdid neħħa ċertu xogħol doppju bejn l-istandards preċedenti u jenfasizza l-effikaċja tas-sistemi ta’ kontroll.

2.28.

Wieħed mill-komponenti ta’ l-ICSs revedut huwa l-Evalwazzjoni ta’ l-Effettività tal-Kontroll Intern fejn is-servizzi tal-Kummissjoni huma meħtieġa li jiġġudikaw u juru l-effettività tas-sistemi ta’ kontroll intern tagħhom fil-prattika. Din ser tkun ibbażata fuq għoti ta’ prijorità lil ċerti standards u evalwazzjoni tar-riskju annwali mill-maniġment. Iżda, peress li l-ICSs huma interdipendenti u flimkien jiffurmaw il-qafas ta’ kontroll, il-Kummissjoni trid tkun f’pożizzjoni wkoll li turi kull sena l-effettività tas-sistema ta’ kontroll intern fit-totalità tagħha.

2.28.

Ir-rekwiżit li jitħejja rapport dwar l-effikaċja jopera fuq żewġ livelli:

—

juri li l-istandards infushom (li jkopru kemm kwistjonijiet finanzjarji u dawk li mhumiex) huma implimentati b'mod effettiv fis-servizzi tal-Kummissjoni; kif ukoll

—

juri li s-sistemi fis-seħħ fil-Kummissjoni jaqdu b’mod effettiv l-għan tagħhom ta’ ġestjoni tar-riskju ta’ żbalji fit-tranżazzjonijiet sottostanti, li huma s-suġġett ta' din l-osservazzjoni.

2.29.

Diċembru 2007 kien it-tmiem ta’ perijodu ta’ sentejn iffissat mill-Kummissjoni għall-implimentazzjoni tal-Pjan ta’ Azzjoni tagħha lejn Qafas tal-Kontroll Intern Integrat (29). Ir-rapport sommarju tal-Kummissjoni għall-2007 (30) jagħti evalwazzjoni kunfidenti tal-progess li sar fl-implimentazzjoni ta’ l-azzjonijiet f’din id-data, filwaqt li jindika li l-evidenza ta’ l-effettività ta’ l-azzjonijiet f’dak li għandu x’jaqsam mat-tnaqqis tal-livell ta’ żball fit-tranżazzjonijiet ta’ bażi għad jonqosha ż-żmien.

2.29.

Il-Pjan ta’ Azzjoni għandu l-għan li jindirizza nuqqasijiet speċifiċi fil-qafas tal-kontroll intern. Is-16-il azzjoni kienu intiżi li jkunu implimentati fuq perjodu ta’ sentejn sal-31 ta’ Diċembru 2007. Fil-biċċa l-kbira tiegħu dan il-għan inkiseb (hemm il-pjan li l-azzjonijiet li baqa’ jitwettqu sa tmiem l-2008.)

2.30.

Abbażi ta’ l-analiżi tal-Qorti (ara t- Tabella 2.3 ), il-Kummissjoni għamlet progress fl-implimentazzjoni tal-Pjan ta’ Azzjoni tagħha fl-2007. B’mod ġenerali, fi tmiem l-2007 total ta’ 21 (2006-7) sub-azzjonijiet ġew implimentati u 14 (2006-19) għadhom f’varji stadji ta’ progress.

2.30.

Fil-parti l-kbira tagħha l-analiżi tal-Qorti tikkonferma l-analiżi tal-Kummissjoni fir-rapport dwar il-progress tas-27 ta' Frar 2008 (COM(2008)110 finali). L-implimentazzjoni tal-azzjonijiet hija proċess kontinwu u qed titwettaq b'mod rigoruż. L-impatt tal-azzjonijiet jeħtieġ li jsir wara l-implimentazzjoni tagħhom fis-snin 2006 u 2007. L-ewwel rapport dwar l-impatt se jsir kmieni fl-2009.

2.31.

F’Marzu 2007 ġiet introdotta sub-azzjoni 11N li timmira li tevalwa jekk is-sistemi ta’ rkupru u ta’ tpaċija humiex qed jaħdmu b’mod effettiv, billi tidentifika ammonti rkuprati kemm fl-2005 u fl-2006 u l-koerenza tagħhom ma’ żbalji identifikati waqt il-kontrolli.

2.32.

Minkejja sforzi konsiderevoli, il-Kummissjoni ma kinitx kapaċi li tippreżenta figuri kompleti u affidabbli għall-2005 u l-2006. Barra dan, il-Kummissjoni ma kinitx kapaċi turi li l-figuri eventwalment preżentati fir-rigward tas-snin in kwestjoni, ħadu in konsiderazzjoni l-irkupri kollha mibdija mill-Istati Membri u jistgħu jiġu rrikonċiljati b’mod trasparenti mar-rendikonti finanzjarji ppubblikati.

2.32.

Il-Kapitolu 6 tan-noti għall-kontijiet annwali għall-2007 jagħti l-aħjar stima tal-irkupri (ara wkoll it-tweġiba għall-paragrafu 3.29). Fil-qasam tal-politika ta' koeżjoni, il-Kummissjoni tippubblika ċifri għal korrezzjonijiet finanzjarji li jirriżultaw mill-attività ta' kontroll tagħha stess. Diġà nkiseb titjib fir-rigward tal-affidabbiltà ta’ din id-dejta. Hija qiegħda tieħu passi biex ittejjeb ir-rappurtaġġ mill-Istati Membri tal-korrezzjonijiet wara l-attività ta’ kontroll tagħhom biex tiżgura l-kompletezza finali tiegħu.

2.33.

L-inizjattiva tal-Kummissjoni li tirreġistra fis-sistema finanzjarja ċentrali u tal-kontabilità, data kompleta dwar irkupri mill-Kummissjoni sa mill-2008 huwa żvilupp pożittiv. Il-Qorti tinnota, iżda, li din l-opportunità intilfet għall-2007.

2.33.

L-ispiża tal-aġġornament retroattiv tar-rekords tan-noti ta’ kreditu u tal-ordnijiet ta’ rkupru kollha għall-2007 kienet meqjusa waħda projbittiva.

2.34.

Il-Kummissjoni għamlet l-ewwel evalwazzjoni ta’ l-impatt tal-pjan ta’ azzjoni fi Frar 2008 (34). B’mod ġenerali, tiggrada l-azzjonijiet bħala li qed jibdew juru impatt b’varjazzjonijiet żgħar bejn sub-azzjonijiet individwali (ara t- Tabella 2.3 ). Biex iżżid it-trasparenza l-Kummissjoni għandha tikkjarifika l-bażi għall-evalwazzjoni ta’ l-impatt tagħha.

2.34.

Mill-2009, l-enfasi tar-rappurtaġġ se tinbidel minn fuq l-implimentazzjoni għal fuq miżuri dwar l-impatt. Il-Kummissjoni se tipprovdi aktar informazzjoni dwar l-impatt ivvalutat għal kull azzjoni fl-ewwel rapport tagħha dwar l-impatt kmieni fl-2009 b’referenza għal indikaturi speċifiċi tal-impatt għal kull azzjoni. Madankollu l-Kummissjoni diġà tista’ turi l-impatt reali fuq ċerti azzjonijiet, pereżempju:

—

(għall-azzjoni 3) il-mudelli ta’ kontroll intern u l-proċess imtejjeb ta’ evalwazzjoni bejn il-pari, flimkien ma’ linji gwida aktar ċari lid-Direttorati Ġenerali, wasslu għal titjib li jista' jitkejjel fir-rapporti ta' attività annwali, kif muri fit-Tabella 2.1 tal-Qorti;

—

(għall-azzjoni 8N) l-istudju ta’ każ partikolari wassal għal titjib fir-rapporti mogħtija lil Istituzzjonijiet Supremi tal-Verifika li min-naħa tagħhom wasslu biex aktar u aktar SAIs jagħmlu użu minnhom f'ħidmiethom.

—

(għall-azzjoni 12) l-istrateġija ta’ verifika għas-Sitt Programm Qafas tar-Riċerka ġiet rikonoxxuta mill-Qorti bħala “li x’aktarx tikkontrobwoxxi għal ħidma aktar effettiva ta’ dan il-kontroll [ex post]”.

2.35.

Filwaqt li l-Qorti tirrikonoxxi li parti kbira tal-Pjan ta’ Azzjoni ġiet implimentata, ma ssibx evidenza ta’ titjib marbut ma’ l-azzjonijiet, speċjalment dawk relatati mal-legalità u r-regolarità tat-tranżazzjonijiet, li huwa dirett u li jista’ jitkejjel. Sal-punt li l-impatt jista jitkejjel b’mod objettiv, il-Qorti tikkunsidra li dan jista jkun evalwat fuq tul ta’ żmien itwal.

2.35.

Kwalunkwe simplifikazzjoni tar-regoli, u t-titjib kollu fuq il-kontrolli tal-Kummissjoni, se jieħdu ż-żmien biex iħallu effett fuq il-prevenzjoni ta' żbalji. Barra minn hekk, bosta miżuri jikkonċernaw kontrolli ex-post, u l-irkupru ta’ żbalji fi snin wara li jkunu saru. Il-Kummissjoni taqbel mal-fehma tal-Qorti li l-impatt jista’ jkun ivvalutat biss fuq medda itwal ta’ żmien kif stabbilit fir-rapport tal-Kummissjoni ta’ Frar 2008 dwar il-Pjan ta’ Azzjoni (COM(2008) 110 finali); ara wkoll it-tweġiba għall-paragrafu 2.29.

2.36.

Il-Qorti tinnota li l-Kummissjoni għandha l-intenzjoni li tippreżenta rapport annwali ta’ l-ewwel dwar l-impatt tal-Pjan ta’ Azzjoni, kmieni fl-2009.

2.37.

Għall-2007, il-Qorti identifikat aktar progress fis-sistemi ta’ sorveljanza u kontroll tal-Kummissjoni, b’mod partikolari, it-titjib fil-proċess ta’ preparazzjoni tar-rapporti ta’ l-attività annwali u d-dikjarazzjonijiet (il-paragrafu 2.8), l-impatt tar-riżervi rilevanti dwar l-assigurazzjoni mogħtija fid-dikjarazzjonijiet tad-Diretturi-Ġenerali (il-paragrafi 2.10 sa 2.11) u pass lejn aktar konsistenza mal-konklużjonijiet ta’ l-evalwazzjonijiet speċifiċi tad-DAS (il-paragrafu 2.12).

2.37.

Il-Kummissjoni tilqa’ l-progress identifikat mill-Qorti u tikkommetti ruħha li tissokta bl-isforzi tagħha. Pereżempju, il-proċess intern tal-analiżi tal-“evalwazzjoni bejn il-pari” qabel il-finalizzazzjoni tar-rapporti ta’ attività annwali għenet fl-iżgurar tal-konsistenza u l-affidabbiltà tar-rapporti. Dan il-proċess se jissaħħaħ ulterjorment għar-rapporti ta’ attività annwali tal-2008, kif imħabbar fir-Rapport ta’ Sinteżi.

2.38.

Iżda, f’xi rapporti ta’ l-attività annwali u dikjarazzjonijiet, il-verifiki tal-Qorti identifikaw nuqqasijiet kontinwi fl-iskop u l-iskala tar-riżervi u fl-evalwazzjoni u l-operat tas-sistemi ta’ sorveljanza u kontroll (il-paragrafi 2.13 sa 2.14).

2.38.

Il-Kummissjoni tat struzzjonijiet lis-servizzi tagħha biex jieħdu azzjoni vigoruża biex jindirizzaw il-kawżi tar-riżervi fir-Rapporti ta’ Attività Annwali tal-2007 u se tissorvelja mill-qrib il-progress, b'attenzjoni speċjali fuq ir-riżervi rikorrenti. Matul l-2008, se tingħata gwida ulterjuri lis-servizzi biex jippromwovu l-konsistenza fit-trattament tar-riskji ta’ reputazzjoni u r-rabta bejn ir-rati ta' żbalji, il-materjalità u r-riżervi.

2.39.

Il-Kummissjoni kienet kapaċi turi grad għoli konsistenti ta’ implimentazzjoni ta’ l-istandards tal-kontroll intern sa mill-2004 (ara l-paragrafu 2.25) u sa tmiem l-2007, kienet implimentat aktar minn żewġ terzi tas-sub-azzjonijiet fil-pjan ta’ azzjoni tagħha lejn qafas tal-kontroll intern integrat (il-paragrafu 2.30).

2.40.

Iżda, il-Qorti tinnota li l-Kummissjoni mhux kapaċi turi li l-azzjonijiet tagħha biex ittejjeb is-sistemi ta’ sorveljanza u kontroll kienu effettivi biex inaqqsu r-riskju ta’ żball f’oqsma kbar tal-baġit. Il-Qorti għada ma ssibx evidenza biex issostni l-impatt tal-pjan ta’ azzjoni ddikjarat mill-Kummissjoni.

2.40.

F’dawn l-aħħar snin, it-titjib li sar fl-oqfsa leġiżlattivi għall-programmi Komunitarji ta' finanzjament, it-titjib tal-kundizzjonijiet ta' kontroll, is-simplifikazzjoni tar-regoli finanzjarji u ż-żieda tas-sommarji annwali f'ġestjoni indiretta maqsuma jew ċentralizzata kienu inizjattivi mfassla biex jittejjeb il-qafas ta' kontroll intern u sabiex jittaffa r-riskju ta' żbalji fi tranżazzjonijiet sottostanti.

2.41.

Il-Qorti tirrikmanda li l-Kummissjoni tkompli bl-isforzi tagħha biex tassigura u turi l-effettività tas-sistemi ta’ sorveljanza u kontroll tad-Direttorati-Ġenerali tagħha billi tiffoka fuq l-oqsma li ġejjin:

2.41.

a)

tassigura li r-rapporti ta’ attività annwali u d-dikjarazzjonijiet jagħtu evalwazzjoni konsistenti tas-sistemi ta’ sorveljanza u kontroll li hija kompatibbli mar-riżervi (il-paragrafi 2.13 sa 2.14);

a)

Waqt li d-Direttur Ġenerali biss jibqa’ responsabbli mir-rapport ta’ attività annwali u minn kwalunkwe riżerva/i li jsiru, l-“evalwazzjoni bejn il-pari” tal-abbozz tal-eżerċizzji tar-Rapporti ta’ Attività Annwali ssaħħet għall-eżerċizzju tal-2007. Fil-biċċa l-kbira tagħhom, u meta jittieħdu f’daqqa, ir-rapporti ta’ attività annwali u d-dikjarazzjonijiet jippreżentaw valutazzjoni konsistenti tas-sistemi superviżorji u ta’ kontroll, u mhux biss l-effikaċja tagħhom fil-prevenzjoni ta' żbalji. Dan huwa kompatibbli mar-riżervi. Barra minn hekk, il-Kummissjoni qed ittejjeb il-proċess tar-rapporti ta’ attività annwali f’ċerti oqsma, prinċipalment biex tiżgura konsistenza sħiħa bejn is-servizzi u se tissokta bl-isforzi tagħha f’dan ir-rigward.

Ara wkoll it-tweġibiet għall-paragrafi 2.12 sa 2.14.

b)

tikkollabora ma’ l-Istati Membri biex itejjbu l-informazzjoni mogħtija fit-Taqsiriet Annwali u turi kif din l-informazzjoni ntużat biex tinkiseb assigurazzjoni jew valur miżjud għall-assigurazzjoni mogħtija fir-Rapporti ta’ l-Attività Annwali (il-paragrafu 2.19);

b)

Il-Kummissjoni se tippreżenta nota ta’ gwida riveduta lill-Istati Membri b’rakkomandazzjonijiet biex tittejjeb il-kwalità tas-sommarji annwali tagħhom għall-2008.

Ara wkoll it-tweġiba għall-paragrafu 2.19.

c)

tikkompleta segwitu xieraq tal-miżuri rilevanti tal-pjan ta’ azzjoni lejn qafas ta’ kontroll intern integrat sabiex tassigura impatt reali fuq is-sistemi ta’ sorveljanza u kontroll (il-paragrafu 2.35), b’mod partikolari fir-rigward tas-Sub-azzjoni 1 (simplifikazzjoni), is-Sub-azzjonijiet 10a u 10b (effettività ta’ l-ispejjeż) u Sub-azzjoni 11N (sistemi ta’ rkupru) (il-paragrafu 2.31);

c)

Kmieni fl-2009 se jiġi ppreżentat rapport dwar l-impatt tal-Pjan ta’ Azzjoni sa tmiem Diċembru 2008. Barra minn hekk f’Novembru 2008 l-Kummissjoni se tagħmel segwitu tar-riżultati ta’ azzjonijiet 4, 10 u 11 f’Komunikazzjoni bil-għan li terġa' tinfetaħ id-diskussjoni dwar ir-riskju tollerabbli.

Fir-rigward tal-politika ta’ koeżjoni, il-Kummissjoni għamlet sforzi sostanzjali biex ittejjeb il-kwalità tad-dejta pprovduta mill-Istati Membri u attwalment qed twettaq ħidma biex tivverifika l-kompletezza u l-eżattezza ta’ din id-dejta.

Ara wkoll it-tweġiba għal paragrafi 2.31 u 2.35.

2.42.

Il-Qorti tirrakkomanda li l-awtoritajiet leġiżlattivi u l-Kummissjoni jkunu preparati li jikkunsidraw it-tfassil ta’ programmi ta’ nfiq futuri billi jagħtu attenzjoni għal dawn li ġejjin:

2.42.

a)

is-simplifikazzjoni tal-bażi ta’ kalkolu ta’ spejjeż eliġibbli u użu akbar ta’ pagamenti ta’ ammonti f’daqqa jew fuq rata fissa minflok rimborż ta’ l-“ispejjeż reali”,

a)

Il-Kummissjoni taqbel li hija meħtieġa aktar simplifikazzjoni fir-rigward ta’ kwistjonijiet ta’ eliġibbiltà tan-nefqa.

Taħt il-Pjan ta’ Azzjoni lejn Qafas Integrat ta’ Kontroll Intern tagħha l-Kummissjoni diġà kkommettiet ruħha li toħroġ bi proposti għal regoli ssimplifikati f'rawnds leġiżlattivi ġejjiena. Madanakollu hija ma taġixxix b’mod individwali u tkun teħtieġ li l-Awtorità Leġiżlattiva tiżgura li l-miżuri ta’ simplifikazzjoni jkunu inklużi f’leġiżlazzjoni ġejjiena.

Il-Kummissjoni impenjat ruħha li tiżgura li proposti leġiżlattivi ġejjiena jinkludu regoli ċari u sempliċi fir-rigward tal-użu estiż ta’ ħlasijiet b’ammonti f’daqqa jew b’rata fissa.

Ir-regoli kurrenti għall-Politika ta’ Koeżjoni diġà jippermettu r-rati fissi f’xi ċirkostanzi u l-Kummissjoni se tesplora l-ambitu għall-estensjoni ta' din il-prattika, li fil-preżent hija applikabbli biss għal għadd limitat ta’ kategoriji ta’ nfiq. Dawn mhumiex xierqa għal proġetti kapitali minħabba regoli dwar is-sottomissjoni ta’ offerti u kunsiderazzjonijiet ta’ valur għall-flus.

Fir-rigward tar-riċerka, il-Kummissjoni taqbel li hija meħtieġa aktar simplifikazzjoni fir-rigward tal-kwistjonijiet tal-eliġibbiltà tal-ispejjeż, partikolarment għall-ispejjeż tal-persunal u l-ispejjeż indiretti. Hija tiġbed l-attenzjoni għal-limiti legali tas-Seba' Programm Qafas (FP7) u għad-diffikultajiet biex jiġi definit il-ħlas ta' somom f'daqqa u b'rata fissa li jkunu rappreżentattivi.

Minbarra dan, iċ-ċertifikazzjoni ex-ante tal-metodoloġija ta' kalkolu tal-ħlas introdott fis-Seba' Programm Qafas hija pass 'il quddiem importanti lejn is-simplifikazzjoni. Il-Kummissjoni tirreferi għall-kwistjonijiet diskussi fir-risposta tagħha għal paragrafi 7.20-7.21.

b)

id-definizzjoni mill-ġdid tas-sistemi ta’ kontroll f’termini tar-riżultati tagħhom (l-objettiv tar-riskju u l-livell ta’ żball aċċettabbli li jirriżulta) aktar milli r-riżorsi kif huwa l-każ bħalissa (l-għadd ta’ kontrolli li għandhom jitwettqu),

b)

Il-Kummissjoni taċċetta din ir-rakkomandazzjoni, u se tanalizza kif timplimentaha fil-prattika.

c)

li jsir progess fl-iżvilupp tal-kunċett ta’ riskju tollerabbli.

c)

Il-Kummissjoni se tagħmel Komunikazzjoni dwar din il-kwistjoni fil-Ħarifa 2008 bil-għan li tiftaħ mill-ġdid id-diskussjoni interistituzzjonali dwar ir-riskju tollerabbli.

3.1.

Dan il-kapitolu janalizza kwestjonijiet li joħorġu mill-implimentazzjoni tal-baġit ġenerali ta’ l-UE fl-2007, l-ewwel sena tal-qafas finanzjarju multinannwali ta’ l-2007 sa l-2013. B’mod partikolari ikopri r-rata ta’ implimentazzjoni baġitarja u l-livell ta’ impenji baġitarji pendenti b’fok speċjali fuq l-applikazzjoni tar-regola n + 2. Dan il-kapitolu jiddiskuti wkoll korrezzjonijiet u rkupri finanzjarji fir-rigward tan-nuqqasijiet fis-sistema u pagamenti inkorretti fis-snin preċedenti, li ġew ikkunsidrati fil-proċess tal-baġit.

3.2.

Kompitu prinċipali fil-ġestjoni tal-baġit tal-Kummissjoni huwa li tassigura li l-fondi li l-Kunsill u l-Parlament allokaw skond il-prijoritajiet politiċi ta’ l-UE jintefqu skond ir-regoli u l-prinċipji tal-ġestjoni finanzjarja tajba. L-analiżi ta’ l-implimentazzjoni tal-baġit hija biss aspett wieħed ta’ l-implimentazzjoni korretta tal-baġit. Il-baġit għandu josserva wkoll il-prinċipji ta’ l-ekonomija, l-effiċjenza u l-effettività, li huma aktar it-tema tar-Rapporti Speċjali maħruġa mill-Qorti milli ta’ dan ir-Rapport Annwali.

3.3.

L-approprijazzjonijiet baġitarji adottati għall-2007 (baġit ivvutat u baġits ta’ emenda) kellhom total ta’ 126,4 biljun euro f’impenji u 113,8 biljun euro f’pagamenti, żieda ta’ 5 % u 6 % rispettivament meta mqabbla mal-baġit finali ta’ l-2006. B’mod ġenerali, l-approprijazzjonijiet għall-impenji baġitarji totali tas-sena kienu 2,5 biljun euro inqas mill-ammont massimu tal-qafas finanzjarju, filwaqt li approprijazzjonijiet għall-pagamenti baqgħu taħt b’10 biljun euro (ara d- Dijagrammi III u IV fl- Anness I ).

3.4.

Is-seba’ baġits ta’ emenda vvutati matul is-sena rriżultaw fi tnaqqis ġenerali ta’ 0,167 biljun euro f’approprijazzjonijiet għall-impenji u fi tnaqqis ta’ 1,65 biljun euro f’approprijazzjonijiet għall-pagamenti. Dan ta’ l-aħħar huwa fil-parti l-kbira reazzjoni għal infiq inqas minn dak previst fil-qasam tal-Kompetittività (0,5 biljun euro), il-Politika ta’ Koeżjoni (0,7 biljun euro) u l-Agrikoltura u r-Riżorsi Naturali (0,5 biljun euro). It-tnaqqis ta’ l-approprijazzjonijiet għall-pagamenti b’dan il-mod jirrifletti ġestjoni tal-baġit tajba peress li juri l-kapaċità li ssir reazzjoni skond it-tibdil u li jitnaqqas il-bilanċ favur tal-baġit (1) (li jippermetti li r-riżorsi proprji jiġu mogħtija lura lill-Istati Membri).

3.5.

Id- Dijagrammi III u IV fl- Anness I jagħtu informazzjoni dettaljata dwar approprijazzjonijiet għall-impenji u approprijazzjonijiet għall-pagamenti kif ukoll il-figuri reali rispettivi fl-2007 skond l-intestatura fil-qafas finanzjarju kif ukoll skond il-qasam tal-politika ABB.

3.6.

Il-Kummissjoni tipproduċi serje ta’ dokumenti (sa ċertu punt imtennija) li fihom fost oħrajn l-informazzjoni li ġejja dwar l-implimentazzjoni tal-baġit tal-Komunitajiet Ewropej (2):

3.6.

Id-dokumenti li għalihom tirreferi l-Qorti huma ppreżentati għal għanijiet differenti (ara t-tweġiba għall-paragrafu 3.20.

—

il-bilanċ favur tal-baġit naqas minn 1,9 biljun euro fl-2006 għal 1,5 biljun euro fl-2007;

—

ir-rati ta’ użu kemm għall-impenji kif ukoll għall-pagamenti, ta’ 96 % u 98 % rispettivament, baqgħu fl-livell għoli simili bħal fl-2006 (99 % u 96 %);

—

1,2 biljun euro ta’ approprijazzjonijiet ta’ pagament mhux użati (bl-esklużjoni ta’ dħul assenjat) ma ġewx annullati imma miġjuba ’l quddiem mill-2007 għall-2008 jew programmati mill-ġdid, livell bħal tas-sena l-oħra;

—

għall-qasam tal-“Koeżjoni” (inkluż fit-Titoli 04, 05, 11 u 13 (3)) it-tnaqqis ta’ 0,745 biljun euro fl-approprijazzjonijiet ta’ pagament rriżulta f’rata ta’ użu finali ta’ kważi 100 %, (kienet tkun ta’ 97 % li kieku l-baġit ta’ emenda ma ġiex adottat). Il-previżjonijiet ta’ pagament ta’ l-Istati Membri tjiebu fis-snin riċenti. Ir-rata ta’ stima żejda b’mod ġenerali naqset minn 33 % fl-2006 għal 18 % fl-2007.

—

Waqt li l-Istati Membri jkomplu jtejbu l-akkuratezza tat-tbassir, dan jibqa’ inkonsistenti wisq biex jintuża għal għanijiet baġitarji. Madankollu, b’aktar titjib, dan it-tbassir jista’ jsir strument utli biex jgħin fl-iżgurar ta’ rati ta’ użu kontinwi.

3.7.

Impenji baġitarji pendenti jinħolqu konsegwenza diretta ta’ infiq differenzjat, fejn il-programmi ta’ l-infiq jieħdu għadd ta’ snin biex jiġu kkompletati u l-impenji jsiru fi snin aktar kmieni qabel il-pagamenti korrispondenti. Żidiet ta’ darba fl-impenji (per eżempju, wara t-tkabbir) u infiq baxx (nuqqas li jintużaw il-krediti ta’ pagament ibbaġitjati kollha) tista’ twassal għal żieda fil-livell ta’ l-impenji pendenti. Hekk kif l-impenji jiġu likwidati bil-pagamenti, l-effett fuq żmien twil ta’ l-impenji li jeċċedu b’mod sinifikanti l-pagamenti huwa akkumulazzjoni strutturali ta’ l-impenji pendenti, u s-sitwazzjoni tgħaddi ’l quddiem minn sena għall-oħra (4).

3.8.

L-impenji baġitarji pendenti (jiġifieri impenji użati miġjuba ’l quddiem biex jissodisfaw infiq fil-ġejjieni), prinċipalment fuq programmi multiannwali, żdiedu b’ 6,855 biljun euro (5,2 %) għal 138,6 biljun euro. Esklussivament fir-rigward ta’ oqsma tal-politika ffinanzjati minn approprijazzjonijiet differenzjati, l-ammont ta’ impenji pendenti totali ta’ 136 biljun euro, li jirrappreżentaw 1,9 snin ta’ impenji jew 2,1 snin ta’ pagamenti bir-rata ta’ infiq ta’ l-2007 fl-oqsma tal-politika rispettivi.

3.9.

Il-Fondi Strutturali jirrappreżentaw l-akbar sehem ta’ l-impenji pendenti. F’dan il-qasam, impenji pendenti ammontaw għal 84 biljun euro (5) (madwar 66 % ta’ l-ammont totali), li jirrapprenżentaw 1,9 snin ta’ impenji jew 2,3 snin ta’ pagamenti bir-rata ta’ infiq ta’ l-2007. Iżda, l-2007 kienet l-ewwel sena tal-perijodu ta’ programmar il-ġdid. Għalhekk, pagamenti bil-quddiem jirrappreżentaw sehem ta’ madwar 20 % ta’ l-ammont ġenerali tal-pagamenti. Minħabba dan, paragun mal-valuri ta’ referenza tas-sena l-oħra ta’ żewġ indikaturi possibbli (l-impenji pendenti ta’ tmiem is-sena mqabbla ma’ l-approprijazzjonijiet jew il-pagamenti implimentati fis-sena) mhix sinifikanti bħal fi snin preċedenti.

3.7-3.9.

B’mod konsistenti, l-impenji huma bbaġitjati ogħla mill-pagamenti minħabba perjodi itwal għall-pagamenti milli għall-impenji. L-impenji għalhekk ġeneralment jiżdiedu minn sena għal sena.

3.10.

13 % ta’ l-impenji mhux użati (18,1 biljun euro) kienu jikkonċernaw il-Fond ta’ Koeżjoni, minkejja l-fatt li jirrappreżenta biss madwar 5 % ta’ l-approprijazzjonijiet ta’ impenji totali awtorizzati għall-2007. Din hija żieda ta’ 2,7 biljun euro jew madwar 15 % meta mqabbla ma’ l-2006. Il-livell għoli ta’ impenji baġitarji pendenti fir-rigward tal-Fond ta’ Koeżjoni jirrappreżenta 2,5 snin ta’ impenji jew 4,2 snin ta’ pagamenti bir-rata ta’ infiq ta’ l-2007 u jirrifletti wkoll il-fatt li dan il-fond mhux soġġett għar-regola ta’ n + 2 (ara l-paragrafi 3.12 sa 3.17). Ir-rata ta’ nfiq għall-Fond ta’ Koeżjoni kienet inqas minn dik prevista, speċjalment għal proġetti fi Spanja, fir-Repubblika Ċeka u fis-Slovenja. Baġit ta’ emenda naqqas l-approprijazzjonijiet ta’ pagament b’0,67 biljun euro (14 %).

3.10.

L-iskadenza għal bosta mill-proġetti tal-Fond ta’ Koeżjoni biex jitwettaq l-infiq hija fl-2010. Għall-perjodu l-ġdid ta’ pprogrammar, il-Fond ta’ Koeżjoni hu soġġett għar-regola n + 2/n + 3.

3.11.

Fir-rigward ta’ l-impenji pendenti għall-Fondi Strutturali għall-perijodu ta’ programmar il-qadim 2000 sa 2006, tnaqqis ta’ 41 % minn 78 biljun euro (2,4 snin ta’ pagamenti bir-rata ta’ infiq ta’ l-2007) għal 46 biljun euro (1,5 snin ta’ pagamenti bir-rata ta’ infiq ta’ l-2007 (6)) jista’ jiġi nnutat (7). Iżda, il-benefiċjarji tal-fondi għandhom biss sa tmiem l-2008 biex jagħmlu pagamenti sabiex jippermettu lill-Kummissjoni tillikwida l-ammont li jifdal. F’dan il-kuntest, il-Kummissjoni għandha tassigura li l-għeluq tal-perijodu ta’ programmar il-ġdid 2000 sa 2006 mhux ser ikun imdewwem u għalhekk ikollu impatt negattiv fuq l-implimentazzjoni tal-programmi l-ġodda approvati għall-2007 sa l-2013. Il-Qorti tinnota titjib konsiderevoli għall-perijodu ta’ programmar il-ġdid, dovut għall-adozzjoni fil-ħin tal-programmi, minħabba li aktar minn 98 % ta’ l-approprijazzjonijiet għall-2007 ġew impenjati f’dan il-qasam tal-politika (8) meta mqabbel ma’ madwar 50 % fl-2000 għall-perijodu ta’ programmar il-qadim.

3.11.

Il-Kummissjoni se tagħmel kull sforz biex tevita kwalunkwe dewmien fl-għeluq tal-programmi għall-2000-2006, li essenzjalment se jkun fl-2010/2011. Biex tħejji għal dan l-għeluq, fl-2006 l-Kummissjoni kienet ħarġet linji gwida u ilha torganizza seminars dwar l-għeluq għall-Istati Membri. Qiegħda wkoll twettaq verifiki tat-tħejjijiet tal-Istati Membri għall-għeluq (ara l-azzjoni 3.1 tal-Pjan ta’ Azzjoni tal-Kummissjoni tad-19 ta’ Frar 2008 biex issaħħaħ ir-rwol superviżorju tagħha fil-ġestjoni maqsuma tal-azzjonijiet strutturali, COM(2008) 97). Jekk l-iskadenza għall-infiq ma tiġix irrispettata, il-Kummissjoni tiddiżimpenja l-fondi mhux minfuqa meta tagħlaq il-programmi.

3.12.

Għall-azzjonijiet strutturali tipikament implimentati fuq perijodu multiannwali, sistema ta’ diżimpenji awtomatiċi ġiet introdotta mill-Artikolu 31 tar-Regolament tal-Kunsill (KE) Nru 1260/1999 tal-21 ta’ Ġunju 1999 li jistabbilixxi d-dispożizzjonijiet ġenerali dwar il-Fondi Strutturali (9) għall-perijodu 2000 sa 2006 sabiex tevita żieda fl-akkumulazzjoni ta’ impenji pendenti potenzjalment anormali li jinġiebu 'l quddiem kull sena. Dan il-mekkaniżmu huwa magħruf ukoll bħala r-regola tas-sena n + 2.