27.2.2008

MT

Il-Ġurnal Uffiċjali ta’ l-Unjoni Ewropea

C 54/14

---

Inizjattiva tar-Repubblika tas-Slovenja, tar-Repubblika Franċiża, tar-Repubblika Ċeka, tar-Renju ta' l-Iżvezja, tar-Renju ta' Spanja, tar-Renju tal-Belġju, tar-Repubblika tal-Polonja, tar-Repubblika Taljana, tal-Gran Dukat tal-Lussemburgu, tar-Renju ta' l-Olanda, tar-Repubblika Slovakka, tar-Repubblika ta' l-Estonja, tar-Repubblika ta' l-Awstrija, tar-Repubblika Portugiża, bil-ħsieb ta' l-adozzjoni ta' Deċiżjoni tal-Kunsill ta' … dwar in-Network Ġudizzjarju Ewropew

(2008/C 54/03)

IL-KUNSILL TA' L-UNJONI EWROPEA,

Wara li kkunsidra t-Trattat dwar l-Unjoni Ewropea u, b'mod partikolari l-Artikoli 31 u 34(2)(c) tiegħu,

Wara li kkunsidra l-inizjattiva tar-Repubblika tas-Slovenja, tar-Repubblika Franċiża, tar-Repubblika Ċeka, tar-Renju ta' l-Iżvezja, tar-Renju ta' Spanja, tar-Renju tal-Belġju, tar-Repubblika tal-Polonja, tar-Repubblika Taljana, tal-Gran Dukat tal-Lussemburgu, tar-Renju ta' l-Olanda, tar-Repubblika Slovakka, tar-Repubblika ta' l-Estonja, tar-Repubblika ta' l-Awstrija, tar-Repubblika Portugiża,

Wara li kkunsidra l-opinjoni tal-Parlament Ewropew,

Billi:

(1)	Stabbilit bl-Azzjoni Konġunta 98/428/ĠAI tad-29 ta' Ġunju 1998 (1), in-Network Ġudizzjarju Ewropew wera l-utilità tiegħu fil-faċilitazzjoni tal-koperazzjoni ġudizzjarja f'materji kriminali.

(2)

Skond l-Artikolu 53 tal-Konvenzjoni tad-19 ta' Ġunju 1990 li timplimenta l-Ftehim ta' Schengen u l-Artikolu 6 tal-Konvenzjoni tad-29 ta' Mejju 2000 dwar Assistenza Reċiproka f'Materji Kriminali bejn l-Istati Membri ta' l-Unjoni Ewropea, l-assistenza ġuridika reċiproka sseħħ permezz ta' kuntatti diretti bejn l-awtoritajiet ġudizzjarji kompetenti. Din id-deċentralizzazzjoni ta' assistenza ġuridika reċiproka issa hija implimentata fil-wisa'.

(3)	Il-prinċipju ta' rikonoxximent reċiproku ta' deċiżjonijiet ġudizzjarji f'materji kriminali huwa implimentat gradwalment. Huwa mhux biss jikkonferma l-prinċipju ta' kuntatti diretti bejn awtoritajiet ġudizzjarji kompetenti, huwa jistabbilixxi wkoll il-proċeduri u jagħmilhom kompletament ġudizzjarji.

(4)	L-impatt ta' dan it-tibdil fuq il-koperazzjoni ġudizzjarja kien imkabbar iżjed bit-tkabbir ta' l-Unjoni Ewropea fl-2004 u l-2007. Minħabba din l-evoluzzjoni, in-Network Ġudizzjarju Ewropew huwa meħtieġ anke iżjed milli fiż-żmien tal-ħolqien tiegħu u għalhekk għandu jissaħħaħ.

(5)

L-Eurojust kien stabbilit bid-Deċiżjoni 2002/187/ĠAI (2) sabiex itejjeb il-koordinazzjoni u l-koperazzjoni bejn l-awtoritajiet kompetenti ta' l-Istati Membri. Id-Deċiżjoni 2002/187/ĠAI jipprevedi li l-Eurojust għandu jżomm relazzjonijiet privileġġati man-Network Ġudizzjarju Ewropew abbażi ta' konsultazzjoni u komplimentarjetà.

(6)	Ħames snin ta' koeżistenza ta' l-Eurojust u n-Network Ġudizzjarju Ewropew urew kemm il-ħtieġa li ż-żewġ strutturi jinżammu kif ukoll il-ħtieġa li r-relazzjoni tagħhom tiġi kkjarifikata.

(7)

Jeħtieġ li l-koperazzjoni ġudizzjarja tissaħħaħ bejn l-Istati Membri ta' l-Unjoni Ewropea u li l-punti ta' kuntatt tan-Network Ġudizzjarju Ewropew u ta' l-Eurojust jitħallew jikkomunikaw għal dan il-fini kulmeta jkun meħtieġ, direttament u b'mod aktar effiċjenti permezz ta' network sigur ta' telekomunikazzjonijiet,

ADOTTA DIN ID-DEĊIŻJONI:

Artikolu 1

Ħolqien

In-network ta' punti ta' kuntatt ġudizzjarji stabbilit bejn l-Istati Membri taħt l-Azzjoni Konġunta 98/428/ĠAI, minn hawn 'il quddiem imsejjaħ “in-Network Ġudizzjarju Ewropew”, għandu jkompli jopera skond id-dispożizzjonijiet ta' din id-Deċiżjoni.

Artikolu 2

Kompożizzjoni

1.   In-Network Ġudizzjarju Ewropew għandu jkun iffurmat, b'kont meħud tar-regoli kostituzzjonali, it-tradizzjonijiet ġudizzjarji u l-istruttura interna ta' kull Stat Membru, mill-awtoritajiet ċentrali responsabbli għall-koperazzjoni ġudizzjarja internazzjonali u l-awtoritajiet ġudizzjarji jew awtoritajiet kompetenti oħrajn b'responsabbiltajiet speċifiċi fi ħdan il-kuntest tal-koperazzjoni internazzjonali.

2.   Għandu jkun stabbilit punt ta' kuntatt wieħed jew aktar ta' kull Stat Membru skond ir-regoli interni u d-diviżjoni interna tar-responsabbiltajiet tiegħu, b'kont meħud ta' l-iżgurar ta' kopertà effettiva tat-territorju kollu tiegħu.

3.   Kull Stat Membru għandu jaħtar, minn fost il-punti ta' kuntatt, korrispondent nazzjonali għan-Network Ġudizzjarju Ewropew.

4.   Kull Stat Membru għandu jiżgura li l-punti ta' kuntatt tiegħu ikollhom funzjonijiet fir-rigward tal-koperazzjoni ġudizzjarja f'materji kriminali u konoxxenza adegwata ta' lingwa ta' l-Unjoni Ewropea minbarra dik tal-lingwa nazzjonali tiegħu, b'kont meħud tal-ħtieġa li tkun tista' ssir komunikazzjoni mal-punti ta' kuntatt fl-Istati Membri l-oħrajn. Qabel jaħtru punt ta' kuntatt ġdid, l-Istat Membri jistgħu jitolbu l-opinjoni tal-korrispondenti nazzjonali.

5.   Meta l-maġistrati ta' kollegament imsemmijin fl-Azzjoni Konġunta 96/277/ĠAI (3) jkunu nħatru fi Stat Membru u jkollhom doveri analogi ma' dawk assenjati bl-Artikolu 4 għall-punti ta' kuntatt, dawn għandhom ikunu marbutin man-Network Ġudizzjarju Ewropew u man-network sigur ta' telekomunikazzjonijiet skond l-Artikolu 10, mill-Istat Membru li jaħtar il-maġistrat ta' kollegament f'kull każ, skond il-proċeduri li għandhom jiġu stabbiliti minn dak l-Istat.

6.   Il-Kummissjoni għandha tinnomina punt ta' kuntatt għal dawk l-oqsma li jaqgħu fl-isfera tal-kompetenza tagħha.

7.   In-Network Ġudizzjarju Ewropew għandu jkollu Segretarjat li għandu jkun responsabbli għall-amministrazzjoni tan-network, f'koperazzjoni u f'konsultazzjoni mal-Presidenza tal-Kunsill. Is-Segretarjat jista' jirrappreżenta lin-Network, f'konsultazzjoni mal-Presidenza.

Artikolu 3

Mod ta' operat tan-network

In-Network Ġudizzjarju Ewropew għandu jopera b'mod partikolari fit-tliet modi li ġejjin:

(a)	għandu jiffaċilita l-istabbiliment ta' kuntatti xierqa bejn il-punti ta' kuntatt fid-diversi Stati Membri sabiex iwettqu l-funzjonijiet stabbiliti fl-Artikolu 4;

(b)	għandu jorganizza laqgħat perjodiċi tar-rappreżentanti ta' l-Istati Membri skond il-proċeduri stabbiliti fl-Artikoli 5, 6 u 7;

(c)	għandu kontinwament jipprovdi ċertu ammont ta' informazzjoni ta' sfond aġġornata, partikolarment permezz ta' network xieraq ta' telekomunikazzjonijiet, taħt il-proċeduri stabbiliti fl-Artikoli 8, 9 u 10.

Artikolu 4

Funzjonijiet tal-punti ta' kuntatt inkluż il-korrispondent nazzjonali

1.   Il-punti ta' kuntatt, inkluż il-korrispondent nazzjonali, għandhom ikunu intermedjarji attivi bil-kompitu li jiffaċilitaw il-koperazzjoni ġudizzjarja bejn l-Istati Membri, b'mod partikolari fl-azzjoni tal-ġlieda kontra forom ta' kriminalità serja. Huma għandhom ikunu disponibbli sabiex jagħmluha possibbli għall-awtoritajiet ġudizzjarji lokali u l-awtoritajiet kompetenti l-oħrajn f'pajjiżhom, għall-punti ta' kuntatt fil-pajjiżi l-oħrajn u l-awtoritajiet kompetenti ġudizzjarji lokali jew oħrajn fil-pajjiżi l-oħrajn li jistabbilixxu l-kuntatti diretti l-aktar xierqa.

Dawn jistgħu, jekk ikun meħtieġ, jivvjaġġaw sabiex jiltaqgħu ma' punti ta' kuntatt ta' l-Istati Membri l-oħrajn, abbażi ta' ftehim bejn l-amministrazzjonijiet ikkonċernati.

2.   Il-punti ta' kuntatt, inkluż il-korrispondent nazzjonali, għandhom jipprovdu l-informazzjoni ġuridika u prattika meħtieġa lill-awtoritajiet ġudizzjarji lokali f'pajjiżhom, lill-punti ta' kuntatt fil-pajjiżi l-oħrajn u lill-awtoritajiet ġudizzjarji lokali fil-pajjiżi l-oħrajn sabiex dawn ikunu jistgħu jħejju talba effettiva għal koperazzjoni ġudizzjarja jew itejbu l-koperazzjoni ġudizzjarja b'mod ġenerali.

3.   Fil-livell rispettiv tagħhom il-punti ta' kuntatt, inkluż il-korrispondent nazzjonali, għandhom jorganizzaw sessjonijiet ta' taħriġ dwar il-koperazzjoni ġudizzjarja għall-benefiċċju ta' l-awtoritajiet kompetenti ta' l-Istat Membru tagħhom, f'koperazzjoni man-Network ta' Taħriġ Ġudizzjarju Ewropew.

Artikolu 5

Fini tal-laqgħat perjodiċi tal-punti ta' kuntatt

1.   L-għanijiet tal-laqgħat perjodiċi tan-Network Ġudizzjarju Ewropew, li għalihom għandhom jiġu mistiedna mill-inqas żewġ punti ta' kuntatt minn kull Stat Membru, għandhom ikunu kif ġej:

(a)	biex jippermettu lill-punti ta' kuntatt li jsiru jafu aħjar lil xulxin u jiskambjaw esperjenza, b'mod partikolari rigward l-operat tan-network;

(b)	biex jipprovdu forum għal diskussjoni ta' problemi prattiċi u ġuridiċi li jiltaqgħu magħhom l-Istati Membri fil-kuntest tal-koperazzjoni ġuridika, b'mod partikolari fir-rigward ta' l-implementazzjoni ta' miżuri adottati mill-Unjoni Ewropea.

2.   L-esperjenza rilevati li tinkiseb fi ħdan in-Network Ġudizzjarju Ewropew għandha tiġi mgħoddija lill-gruppi ta' ħidma kompetenti ta' l-Unjoni Ewropea sabiex isservi bħala bażi għad-diskussjoni ta' tibdil leġislattiv possibbli u titjib prattiku fil-qasam tal-koperazzjoni ġudizzjarja internazzjonali.

Artikolu 6

Frekwenza tal-laqgħat plenarji

Il-plenarja tan-Network Ġudizzjarju Ewropew, magħmula mill-korrispondenti nazzjonali, għandha tiltaqa' perjodikament fuq bażi ad hoc, mill-inqas darba f'sena u skond kif il-membri tagħha jqisu meħtieġ, fuq l-istedina tal-Presidenza tal-Kunsill, li għandha tieħu wkoll kont tax-xewqat ta' l-Istati Membri li n-Network jiltaqa'.

Artikolu 7

Post tal-laqgħat

1.   Il-laqgħat jistgħu jsiru fil-bini tal-Kunsill fi Brussell, skond id-dispożizzjonijiet stabiliti fir-Regoli ta' Proċedura tal-Kunsill.

2.   Madankollu, jistgħu jsiru laqgħat alternattivi fl-Istati Membri sabiex ikun possibbli li l-punti ta' kuntatt ta' l-Istati Membri kollha jiltaqgħu ma l-awtoritajiet ta' l-Istat ospitanti minbarra mal-punti ta' kuntatt tiegħu u jżuru korpi speċifiċi f'dak l-Istat b'responsabbilitajiet fil-kuntest tal-koperazzjoni ġudizzjarja internazzjonali jew tal-ġlieda kontra ċerti forom ta' kriminalità serja.

Artikolu 8

Kontenut ta' l-informazzjoni disseminata fi ħdan in-Network Ġudizzjarju Ewropew

In-Network Ġudizzjarju Ewropew għandu jagħmel disponibbli l-informazzjoni li ġejja għall-punti ta' kuntatt u għall-awtoritajiet ġudizzjarji kompetenti:

(1)	dettalji sħaħ tal-punti ta' kuntatt f'kull Stat Membru bi, fejn meħtieġ, spjegazzjoni tar-responsabbiltajiet tagħhom fil-livell nazzjonali;

(2)

għodda ta' l-IT li tippermetti lill-awtorità emittenti ta' Stat Membru sabiex tidentifika l-awtorità kompetenti ta' Stat Membru ieħor li għandha tirċievi u tesegwixxi t-talba tiegħu għal koperazzjoni ġudizzjarja, inklużi l-Mandati għal Arrest Ewropej, il-Mandati Ewropej għal Provi, l-ordnijiet għall-iffriżar ta' assi u t-talbiet għal assistenza ġuridika reċiproka;

(3)	informazzjoni ġuridika u prattika konċiża li tikkonċerna s-sistemi ġudizzjarji u proċedurali fl-Istati Membri;

(4)	it-testi ta' l-istrumenti ġuridiċi rilevanti u, għall- konvenzjonijiet attwalment fis-seħħ, it-testi tad-dikjarazzjonijiet u r-riżervi.

Artikolu 9

Aġġornament ta' l-informazzjoni

1.   L-informazzjoni mqassma fi ħdan in-Network Ġudizzjarju Ewropew għandha tiġi kontinwament aġġornata.

2.   Għandha tkun ir-responsabbiltà ta' kull Stat Membru individwali li jivverifika l-preċiżjoni tad-data li tinsab fis-sistema u li jinforma lis-Segretarjat tan-Network Ġudizzjarju Ewropew immedjetament hekk kif ikun meħtieġ li tiġi emendata d-data dwar wieħed mill-erba' punti msemmijin fl-Artikolu 8.

Artikolu 10

Għodod tat-telekomunikazzjoni

1.   In-Network Ġudizzjarju Ewropew għandu jiżgura li:

(a)	l-informazzjoni prevista taħt l-Artikolu 8 tkun disponibbli f'websajt b'aġġornament kontinwu.

(b)	jiġi stabbilit network sigur ta' telekomunikazzjonijiet għall-ħidma operattiva tal-punti ta' kuntatt tan-Network Ġudizzjarju Ewropew

(c)	in-network sigur ta' komunikazzjoni jagħmel possibbli l-fluss ta' data u tat-talbiet kollha għal koperazzjoni ġuridika bejn l-Istati Membri, kif ukoll bejniethom u l-membri nazzjonali, il-korrispondenti nazzjonali ta' l-Eurojust u l-maġistrati ta' kollegament maħturin mill-Eurojust.

2.   In-network sigur ta' komunikazzjoni msemmi fil-paragrafu 1 jista' jintuża wkoll mill-korrispondenti nazzjonali, il-korrispondenti nazzjonali għal materji terroristiċi, il-membri nazzjonali ta' l-Eurojust u l-maġistrati ta' kollegament maħturin mill-Eurojust għall-ħidma operattiva tagħhom. Huwa jista' jkun marbut mas-Sistema tal-Ġestjoni ta' Każijiet ta' l-Eurojust imsemmija fl-Artikolu 16 tad-Deċiżjoni 2002/187/ĠAI.

Artikolu 11

Relazzjoni bejn in-Network Ġudizzjarju Ewropew u l-Eurojust

1.   In-Network Ġudizzjarju Ewropew u l-Eurojust għandhom iżommu relazzjonijiet privileġġati ma' xulxin, abbażi ta' konsultazzjoni u komplementarjetà, speċjlament bejn il-membru nazzjonali ta' l-Eurojust, il-punti ta' kuntatt tan-Network Ġudizzjarju Ewropew ta' l-istess Stat Membru u l-korrispondenti nazzjonali ta' l-Eurojust u tan-Network Ġudizzjarju Ewropew. Sabiex tiġi żgurata koperazzjoni effiċjenti għandhom jittieħdu l-miżuri li ġejjin:

(a)	L-Eurojust għandu jkollha aċċess għal informazzjoni ċentralizzata min-Network Ġudizzjarju Ewropew skond l-Artikolu 8 ta' din id-Deċiżjoni u għan-network sigura ta' telekomunikazzjoni stabbilita taħt l-Artikolu 10 ta' din id-Deċiżjoni.

(b)

mingħajr preġudizzju għall-Artikolu 13 tad-Deċiżjoni 2002/187/ĠAI dwar l-Eurojust u skond l-Artikolu 4(4) ta' din id-Deċiżjoni, il-punti ta' kuntatt tan-Network Ġudizzjarju Ewropew għandhom, abbażi ta' każijiet individwali, jinfurmaw lill-Eurojust dwar każijiet li jinvolvu żewġ Stati Membri u dwar il-qasam ta' kompetenza ta' l-Eurojust: — f'każijiet fejn x'aktarx ikun hemm konflitti ta' ġurisdizzjoni jew — f'każijiet ta' rifjut ta' talba għal koperazzjoni ġudizzjarja, inklużi l-Mandati għal Arrest Ewropej, il-Mandati Ewropej għal Provi, l-ordnijiet għall-iffriżar ta' assi u t-talbiet għal assistenza ġuridika reċiproka

(c)	il-punti ta' kuntatt tan-Network Ġudizzjarju Ewropew għandhom jinfurmaw ukoll lill-Eurojust, abbażi ta' każijiet individwali, dwar il-każijiet kollha li jaqgħu fil-qasam ta' kompetenza ta' l-Eurojust u li jinvolvu mill-inqas tliet Stati Membri.

(d)	il-membri nazzjonali għandhom, abbażi ta' każijiet individwali, jinfurmaw lill-punti ta' kuntatt tan-Network Ġudizzjarju Ewropew dwar il-każijiet kollha li jqisu li jiġu ttrattati l-aħjar min-network.

(e)

is-Segretarjat tan-Network Ġudizzjarju Ewropew għandu jifforma parti mis-segretarjat ta' l-Eurojust. Għandu jiffunzjona bħala unità separata u awtonoma. Għandu jkun kapaċi juża r-riżorsi ta' l-Eurojust li huma meħtieġa għall-prestazzjoni tal-kompiti tan-Network Ġudizzjarju Ewropew. Ir-regoli li japplikaw għall-persunal ta' l-Eurojust għandhom japplikaw għall-persunal tas-segretarjat tan-Network Ġudizzjarju Ewropew kemm-il darba dawn ikunu kompatibbli ma' l-awtonomija operattiva tas-segretarjat tan-Network Ġudizzjarju Ewropew;

(f)	il-membri nazzjonali ta' l-Eurojust jistgħu jattendu għal laqgħat tan-Network Ġudizzjarju Ewropew fuq l-istedina ta' dan ta' l-aħħar. Il-punti ta' kuntatt tan-Network Ġudizzjarju Ewropew jistgħu jiġu mistiedna abbażi ta' każijiet individwali sabiex jattendu l-laqgħat ta' l-Eurojust.

2.   In-Network Ġudizzjarju Ewropew għandu jkun appoġġat mill-Amministrazzjoni ta' l-Eurojust. L-ispejjeż operattivi tan-Network Ġudizzjarju Ewropew għandhom ikunu jistgħu jiġu koperti mill-baġit ta' l-Eurojust skond l-Artikolu 33 tad-Deċiżjoni 2002/187/ĠAI.

Artikolu 12

Rappurtar lill-Kunsill u lill-Kummissjoni

Id-Direttur Amministrattiv ta' l-Eurojust u l-Presidenza tal-Kunsill, għandhom jirrapportaw lill-Kunsill u lill-Kummissjoni bil-kitba kull sentejn dwar l-attivitajiet u l-ġestjoni, inkluż il-ġestjoni baġitarja, tan-Network Ġudizzjarju Ewropew. Għal dak il-għan, il-Presidenza għandha tħejji rapport bi-annwali dwar l-attivitajiet tan-Network Ġudizzjarju Ewropew u dwar kwalunkwe problema ta' politika kriminali fl-Unjoni enfasizzata b'riżultat ta' l-attivitajiet tan-Network Ġudizzjarju Ewropew. F'dak ir-rapport, in-Network Ġudizzjarju Ewropew, permezz tal-Presidenza, jista' jagħmel proposti għat-titjib tal-koperazzjoni ġudizzjarja f'materji kriminali. In-Network Ġudizzjarju Ewropew jista' jippreżenta wkoll kwalunkwe rapport jew kwalunkwe informazzjoni oħra dwar l-operat tan-Network Ġudizzjarju Ewropew li jistgħu jkunu meħtieġa mill-Kunsill jew mill-Presidenza.

Artikolu 13

Baġit

Il-baġit ta' l-Eurojust għandu, skond l-Artikolu 35(1) tad-Deċiżjoni 2002/187/ĠAI, jinkludi parti speċifika dwar in-Network Ġudizzjarju Ewropew sabiex dan ikun jista' jwettaq il-kompiti tiegħu.

Artikolu 14

Applikazzjoni territorjali

Fir-rigward tar-Renju Unit, id-dispożizzjonijiet ta' din id-Deċiżjoni għandhom japplikaw għar-Renju Unit tal-Gran Brittanja u l-Irlanda ta' Fuq, iċ-Channel Islands u l-Isle of Man.

Artikolu 15

Valutazzjoni ta' l-operat tan-Network Ġudizzjarju Ewropew

Kull erba' snin, il-Kunsill għandu jwettaq valutazzjoni ta' l-operat tan-Network Ġudizzjarju Ewropew abbażi ta' rapport imfassal mill-Kummissjoni, f'koperazzjoni man-Network Ġudizzjarju Ewropew.

Artikolu 16

Tħassir ta' l-Azzjoni Konġunta 98/428/ĠAI

L-Azzjoni Konġunta 98/428/ĠAI hija b'dan imħassra.

Artikolu 17

Dħul fis-seħħ

Din id-Deċiżjoni għandha tidħol fis-seħħ fil-jum tal-pubblikazzjoni tagħha fil-Ġurnal Uffiċjali ta' l-Unjoni Ewropea.

---

(1)  ĠU L 191, 7.7.1998, p. 4.

(2)  Id-Deċiżjoni tal-Kunsill 2002/187/ĠAI tat-28 ta' Frar 2002 li tistabbilixxi l-Eurojust bil-għan li tiġi msaħħa l-ġlieda kontra l-kriminalità serja (ĠU L 63, 6.3.2002, p. 1).

(3)  ĠU L 105, 27.4.1996, p. 1.

---