—

għal Raytek GmbH u Fluke Europe BV, minn I. Humby, consultant, u V. Sloane, barrister,

—

għall-Gvern tar-Renju Unit, minn J. Beeko, bħala aġent, assistita minn R. Hill, barrister,

—

għall-Kummissjoni Ewropea, minn B.‑R. Killmann u L. Flynn, bħala aġenti,

1

It-talba għal deċiżjoni preliminari tirrigwarda l-validità tar-Regolament tal-Kummissjoni (UE) Nru 314/2011, tat-30 ta’ Marzu 2011, dwar il-klassifikazzjoni ta’ ċerti prodotti fin-Nomenklatura Magħquda (ĠU L 86, p. 57).

2

Din it-talba tressqet fil-kuntest ta’ rikorsi ppreżentati minn Raytek GmbH u Fluke Europe BV (iktar ’il quddiem, rispettivament, “Raytek” u “Fluke”) kontra deċiżjonijiet tal-Commissioners for Her Majesty’s Revenue and Customs (iktar ’il quddiem il-“Commissioners”) relatati mal-klassifikazzjoni tariffarja ta’ kameras termali bir-raġġi infrared.

3

Il-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta’ Oġġetti (iktar ’il quddiem is-“SA”), konkluża fi Brussell fl-14 ta’ Ġunju 1983, u l-Protokoll li jemendaha, tal-24 ta’ Ġunju 1986 (iktar ’il quddiem il-“Konvenzjoni dwar is-SA”) ġew approvati f’isem il-Komunità Ekonomika Ewropea permezz tad-Deċiżjoni tal-Kunsill 87/369/KEE, tas-7 ta’ April 1987 (ĠU Edizzjoni Speċjali bil-Malti, Kapitolu 2, Vol. 2, p. 288).

4

Skont l-Artikolu 3(1) tal-Konvenzjoni dwar is-SA, kull Parti Kontraenti timpenja ruħha li n-nomenklaturi tat-tariffi u statistiċi jkunu inkonformità mas-SA, li tuża l-intestaturi u s-subintestaturi kollha tagħha, mingħajr żidiet jew modifiki, flimkien mal-kodiċijiet relattivi tagħha u li ssegwi s-sekwenza numerika tal-imsemmija sistema. L-istess dispożizzjoni tipprovdi li kull Parti Kontraenti timpenja ruħha wkoll li tapplika r-Regoli Ġenerali għall-interpretazzjoni tas-SA (iktar ’il quddiem ir-“Regoli Ġenerali SA”) u n-noti kollha tat-taqsimiet, tal-kapitoli u tas-subintestaturi tas-SA, u li ma temendax il-portata ta’ dawn tal-aħħar.

5

Il-Kunsill ta’ Kooperazzjoni Doganali, li sar l-Organizzazzjoni Dinjija tad-Dwana (WCO), stabbilit permezz tal-Konvenzjoni Internazzjonali li tistabbilixxi l-imsemmi Kunsill, konkluża fi Brussell fil-15 ta’ Diċembru 1950, approva, bil-kundizzjonijiet stabbiliti fl-Artikolu 8 tal-Konvenzjoni dwar is-SA, in-noti ta’ spjega adottati mill-Kumitat tas-SA, istanza li l-organizzazzjoni tagħha hija rregolata mill-Artikolu 6 tagħha (iktar ’il quddiem in-“noti ta’ spjega tas-SA”).

6

Skont in-nota ta’ spjega relatata mar-Regola Ġenerali għall-interpretazzjoni tas-SA 3:

“[...]

Regola 3 a)

[...]

Regola 3 b)

[...]”

7

In-Nomenklatura Magħquda, li tikkostitwixxi l-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), kif emendat bir-Regolament tal-Kummissjoni (UE) Nru 861/2010, tal-5 ta’ Ottubru 2010 (ĠU L 284, p. 1, iktar ’il quddiem in-“NM”), tinkludi fit-Taqsima A tat-Titolu I tal-Ewwel Parti tagħha, sett ta’ regoli ġenerali għall-interpretazzjoni ta’ din in-nomenklatura (iktar ’il quddiem ir-“regoli ġenerali NM”). Din it-taqsima tipprovdi:

“Il-klassifikazzjoni ta’ oġġetti fin-Nomenklatura Magħquda għandha tkun irregolata mill-prinċipji li ġejjin:

[...]

[...]

8

Fit-Tieni Parti tan-NM, intitolata “Skeda ta’ dazji tad-dwana”, il-Kapitolu 85 huwa dwar “Makkinarju u tagħmir elettriku u partijiet tagħhom; strumenti li jirrekordjaw u jirriproduċu l-ħoss, strumenti li jirrekordjaw u jirriproduċu stampa u ħoss tat-televiżjoni, u partijiet u aċċessorji ta’ dawn l-oġġetti”. Inkluża f’dan il-kapitolu, l-intestatura 8525 hija fformulata kif ġej:

“Tagħmir ta’ trasmissjoni għax-xandir bir-radju jew bit-televiżjoni, kemm jekk fih u kemm jekk ma fihx tagħmir ta’ riċezzjoni jew tagħmir ta’ rrekordjar jew riproduzzjoni; kameras tat-televiżjoni, kameras diġitali u vidjowkameras li jirrekordjaw”.

9

Il-Komunikazzjoni tal-Kummissjoni Ewropea relatata man-noti ta’ spjega għan-NM (2011/C 137/01) tispeċifika li din l-intestatura tinkludi kameras għal imaging termali b’images infrared li jaqbdu radjazzjoni ta’ sħana u jibdluha f’immaġini li jirrapreżentaw it-temperaturi ta’ superfiċi jew oġġetti individwali f’intensitajiet differenti ta’ griż jew f’kuluri differenti, iżda li ma jistgħux ikejlu temperaturi jew jirrappreżentaw il-valuri mkejlin f’figuri.

10

Il-Kapitolu 90 tan-NM, intitolat “Strumenti u apparat ottiku, fotografiku, ċinematografiku, għal kejl, għal iċċekkjar, ta’ preċiżjoni, mediku jew kirurġiku; partijiet u aċċessorji ta’ dawn l-istrumenti jew apparat” jinkludi b’mod partikolari l-intestaturi 9025 u 9027.

11

In-nota 3 tal-Kapitolu 90 tistabbilixxi li d-dispożizzjonijiet tan-noti 3 u 4 għat-Taqsima XVI japplikaw ukoll għal dan il-Kapitolu. In-nota 3 ta’ din it-taqsima taqra kif ġej:

12

L-intestatura 9025 tan-NM hija fformulata kif ġej:

13

Fil-verżjoni bil-lingwa Franċiża, l-intestatura 9027 tan-NM hija fformulata u strutturata kif ġej:

14

Fil-verżjoni bil-lingwa Ingliża ta’ din l-intestatura, il-kliem “instruments or apparatus for measuring or checking of quantities of heat” jikkorrispondu għall-kliem “instruments et appareils [...] pour mesures calorimétriques [strumenti u apparat għal kejl jew iċċekkjar ta’ kwantitajiet ta’ sħana]” li jidhru fil-verżjoni bil-lingwa Franċiża tal-imsemmija intestatura.

15

In-nota ta’ spjega tas-SA dwar l-intestatura 9027 tistabbilixxi li huma esklużi minn din tal-aħħar, b’mod partikolari, l-“idrometri, termometri, igrometri u apparat ieħor tan-Nru 9025, anki jekk għall-użu fil-laboratorju”.

16

Ir-rata tad-dazji doganali fuq l-importazzjoni applikabbli għas-subintestatura 9025 19 20 hija ta’ 3.2 %, filwaqt li l-apparat li jaqa’ taħt is-subintestatura 9027 50 00 jibbenefika minn eżenzjoni mid-dazju.

17

Ir-Regolament Nru 314/2011 daħal fis-seħħ fl-21 ta’ April 2011. Dan ir-regolament jikklassifika l-kameras termali bir-raġġi infrared taħt il-kodiċi NM 9025 19 20, bħala termometri.

18

Id-deskrizzjoni tal-apparati kkonċernati li tinsab fl-Anness tal-imsemmi regolament hija fformulata kif ġej:

“Apparat (hekk imsejaħ ‘kamera termali bir-raġġi infrared’) biex taqbad immaġini ta’ radjazzjoni infrared permezz ta’ mikrobolometru u li turi dawn l-immaġini f’kuluri li jkunu jirrappreżentaw it-temperaturi differenti, b’dimensjoni ta’ madwar 26 × 8 × 11-il ċm.

L-appart huwa magħmul minn:

Il-mikrobolometru, peress li huwa sensur termiku użat bħala individwatur fil-kamera, jipprovdi 19 200 pixel f’kull immaġini fejn kull pixel tirrappreżenta r-riżultat ta’ kejl ta’ temperatura.

L-immaġini tintwera f’diversi kuluri li jirrappreżentaw il-kejl ta’ diversi temperaturi, flimkien ma’ skala vertikali li turi t-temperatura fin-naħa ta’ fuq u n-naħa ta’ isfel tal-firxa magħżula ta’ temperaturi u l-firxa ta’ kuluri li jmorru minn fuq għal isfel.

L-apparat huwa wkoll kapaċi jkejjel it-temperatura ta’ punt speċifiku u juri r-riżultat fuq skala ta’ temperatura.

L-apparat jintuża għall-manutenzjoni preventiva biex isib difetti fil-kostruzzjoni jew punti fejn ikun hemm issiġillar ħażin fl-insulazzjoni u fis-sħana.”

19

Fl-imsemmi anness, il-klassifikazzjoni tal-apparati kkonċernati taħt il-kodiċi NM 9025 19 20 hija mmotivata b’dawn il-kliem:

“Il-klassifikazzjoni hija ddeterminata mir-Regoli Ġenerali [NM] 1 u 6 [...] u tal-kitba fil-kodiċi NM 9025, 9025 19 u 9025 19 20.

Peress li l-apparat hu kapaċi li jkejjel it-temperatura u jirrappreżenta l-valuri mkejla f’ċifri, li hija funzjoni koperta mill-intestatura 9025, il-klassifikazzjoni taħt l-intestatura 8525 bħala kamera hi eskluża (ara wkoll in-Noti ta’ Spjegazjoni tan-NM għall-intestatura 8525).

Peress li l-iskop tal-apparat mhux dak li jkejjel jew li jivverifika kwantitajiet ta’ sħana iżda li jsib il-livell ta’ radjazzjoni ta’ infrared (kejl ta’ temperatura), il-klassifikazzjoni taħt l-intestatura 9027 hi eskluża.

Meta wieħed iqis il-karatteristiċi tiegħu, l-apparat għandu għalhekk jiġi kklassifikat skont il-kodiċi tan-NM 9025 19 20 bħala termometru.”

20

Raytek u Fluke jimportaw fir-Renju Unit kameras termali bir-raġġi infrared.

21

Fir-rigward tal-proprjetajiet ta’ dawn il-kameras, il-qorti tar-rinviju tispeċifika li dawn tal-aħħar huma kkostitwiti b’mod partikolari minn lenti li taqbad immaġini, li tiġbor l-enerġija infrared irradjata mill-mira u tikkonverġiha lejn individwatur infrared. Ir-radjazzjoni infrared tipproduċi rispons li jista’ jitkejjel mill-individwatur, li huwa sussegwentement ipproċessat elettronikament fil-kamera termali biex jiġi prodott termogramm, jew immaġini infrared, li fih id-diversi sfumaturi ta’ kuluri jikkorrispondu għad-distribuzzjoni tar-radjazzjoni infrared fis-superfiċi tal-mira. Din il-qorti żżid li mekkaniżmi ta’ kontroll, li jirrigwardaw varjabbli bħall-firxa tat-temperaturi, il-firxa u l-livell termali, il-firxa ta’ kuluri u l-fużjoni ta’ immaġini viżibbli u infrared, jippermettu li jitwettqu aġġustamenti elettroniċi biex tiġi ċċarata l-immaġini termali murija fuq l-iskrin.

22

Fir-rigward tal-użu tal-imsemmija kameras, il-qorti tar-rinviju tindika li huma essenzjalment intiżi li jsibu u jidentifikaw kuntatti elettriċi difettużi, tisħin żejjed ikkawżat minn eċċess ta’ elettriku, difetti fil-kostruzzjoni, difetti fl-insulazzjoni kif ukoll tnixxijiet tal-arja u tal-ilma.

23

Sussegwentement għall-pubblikazzjoni tar-Regolament Nru 314/2011, il-Commissioners informaw lil Raytek u Fluke, permezz ta’ ittra tal-14 ta’ April 2011, li l-informazzjoni tariffarja vinkolanti li kienet inħarġet lilhom qabel, li tikkonċerna l-klassifikazzjoni tariffarja tal-apparati li huma jimportaw fl-intestatura 9027, kienet waqfet tkun valida.

24

Fil-kuntest tar-rikorsi li huma ppreżentaw kontra d-deċiżjonijiet li jikkostitwixxu dawn l-ittri, Raytek u Fluke jikkontestaw il-validità tar-Regolament Nru 314/2011 fid-dawl tal-portata effettiva rispettiva tal-intestaturi tariffarji 9025 19 20 u 9027 50 00.

25

F’dawn iċ-ċirkustanzi, il-First-tier Tribunal (Tax Chamber) iddeċieda li jissospendi l-proċeduri u li jagħmel lill-Qorti tal-Ġustizzja d-domanda preliminari li ġejja:

“Ir-Regolament [Nru 314/2011] huwa validu f’dak li jirrigwarda l-kameras termiċi [kameras termali bir-raġġi] infrared skont il-Kodiċi NM Nru 9025 19 20?”

26

Permezz ta’ deċiżjoni tal-14 ta’ Jannar 2014, il-Qorti tal-Ġustizzja assenjat din il-kawża lill-Għaxar Awla, iddeċidiet li din il-kawża tinqata’ mingħajr konklużjonijiet u nnotifikat lill-partijiet sabiex jattendu għal seduta li nżammet fis-6 ta’ Marzu 2014, u warajha l-proċedura orali ngħalqet.

27

L-Għaxar Awla ddeċidiet, fit-2 ta’ Ottubru 2014, li tirrinvija l-kawża msemmija iktar ’il fuq quddiem il-Qorti tal-Ġustizzja sabiex tiġi assenjata mill-ġdid lil kulleġġ ġudikanti ikbar, b’applikazzjoni tal-Artikolu 60(3) tar-Regoli ta’ Proċedura tal-Qorti tal-Ġustizzja. Sussegwentement, il-Qorti tal-Ġustizzja ddeċidiet li tassenja din l-kawża mill-ġdid lill-Ħames Awla.

28

B’digriet tal-4 ta’ Novembru 2014, il-Qorti tal-Ġustizzja ordnat il-ftuħ mill-ġdid tal-proċedura orali u n-notifika tal-partijiet sabiex jattendu għal seduta ġdida li nżammet fis-26 ta’ Novembru 2014.

29

Sabiex tingħata risposta għad-domanda magħmula, għandu jiġi rrilevat li, fir-rigward tal-applikazzjoni tan-NM, il-Kunsill tal-Unjoni Ewropea ta lill-Kummissjoni, li taġixxi b’kooperazzjoni mal-esperti doganali tal-Istati Membri, setgħa diskrezzjonali wiesgħa sabiex tispeċifika l-kontenut tal-intestaturi tariffarji li għandhom jiġu kkunsidrati għall-klassifikazzjoni ta’ merkanzija speċifika. Madankollu, is-setgħa tal-Kummissjoni li tistabbilixxi l-miżuri msemmija fl-Artikolu 9(1)(a) tar-Regolament Nru 2658/87, bħall-klassifikazzjoni tal-merkanzija, ma tawtorizzahiex tibdel il-kontenut tal-intestaturi tariffarji li ġew stabbiliti abbażi tas-SA, stabbilita mill-Konvenzjoni dwar is-SA, u li l-Unjoni Ewropea, abbażi tal-Artikolu 3 ta’ din tal-aħħar, impenjat ruħha li ma tibdilx il-portata tagħha (ara, f’dan is-sens, is-sentenzi Franza vs Il‑Kummissjoni, C‑267/94, EU:C:1995:453, punti 19 u 20; Kawasaki Motors Europe, C‑15/05, EU:C:2006:259, punt 35, kif ukoll Dinter u Europol Frost‑Food, C‑522/07 u C‑65/08, EU:C:2009:663, punt 32).

30

F’dan il-każ, għandu għalhekk jiġi eżaminat jekk il-Kummissjoni, billi wettqet il-klassifikazzjoni ta’ merkanzija bħal dik deskritta fil-kolonna 1 tal-Anness tar-Regolament Nru 314/2011 fl-intestatura 9025 19 tan-NM minflok fl-intestatura 9027 50 tagħha, biddlitx il-kontenut ta’ dawn iż-żewġ intestaturi tariffarji.

31

F’dan ir-rigward, għandu jitfakkar li minn ġurisprudenza stabbilita jirriżulta li, fl-interess taċ-ċertezza legali u għall-faċilità ta’ verifika, il-kriterju deċiżiv għall-klassifikazzjoni tariffarja tal-merkanzija għandu jitfittex, b’mod ġenerali, fil-karatteristiċi u proprjetajiet oġġettivi tagħha, kif iddefiniti mill-kliem tal-intestatura tan-NM u tan-noti tat-taqsima jew tal-kapitolu (sentenzi Kawasaki Motors Europe, EU:C:2006:259, punt 38; Dinter u Europol Frost-Food, EU:C:2009:663, punt 29, kif ukoll Premis Medical, C‑273/09, EU:C:2010:809, punt 42).

32

Skont id-deskrizzjoni tagħha mogħtija fil-kolonna 1 tal-Anness tar-Regolament Nru 314/2011, il-merkanzija li dwarha jittratta dan ir-regolament hija “apparat (hekk imsejaħ ‘kamera termali bir-raġġi infrared’) biex taqbad immaġini ta’ radjazzjoni infrared permezz ta’ mikrobolometru u li turi dawn l-immaġini f’kuluri li jkunu jirrappreżentaw it-temperaturi differenti”. Dawn l-immaġini jinqabdu permezz ta’ mikrobolometru “kapaċi li jkejjel temperaturi minn [–] 20°C sa 250°C”, filwaqt li “kull pixel [tal-immaġini prodotta] tirrappreżenta r-riżultat ta’ kejl ta’ temperatura”, l-“immaġini tintwera f’diversi kuluri li jirrappreżentaw il-kejl ta’ diversi temperaturi, flimkien ma’ skala vertikali li turi [...] l-firxa ta’ kuluri li jmorru minn fuq għal isfel”. Fl-aħħar nett, l-“apparat huwa wkoll kapaċi jkejjel it-temperatura ta’ punt speċifiku u juri r-riżultat fuq skala ta’ temperatura”.

33

Minn din id-deskrizzjoni jirriżulta li l-apparati intiżi mir-Regolament Nru 314/2011 jaqbdu r-radjazzjoni infrared li toħroġ mill-mira u jikkostruwixxu, minn din ir-radjazzjoni, immaġini tal-mira li l-kuluri tagħha jirrappreżentaw temperaturi, li huma dedotti mir-radjazzjoni infrared maqbuda. Huma kapaċi wkoll li jkejlu t-temperatura f’punt speċifiku tal-mira, peress li dan il-kejl huwa wkoll dedott mir-radjazzjoni infrared maqbuda.

34

Għandu jiġi kkonstatat li, abbażi ta’ din id-deskrizzjoni, il-Kummissjoni setgħet tqis, kif ġie ddikjarat fil-motivazzjoni li tidher fil-kolonna 3 tal-istess Anness, li, “[p]eress li l-[imsemmi] apparat hu kapaċi li jkejjel it-temperatura u jirrappreżenta l-valuri mkejla f’ċifri, li hija funzjoni koperta mill-intestatura 9025”, u “[p]eress li l-iskop tal-apparat mhux dak li jkejjel jew li jivverifika kwantitajiet ta’ sħana iżda li jsib il-livell ta’ radjazzjoni ta’ infrared (kejl ta’ temperatura)”, huwa “għandu għalhekk jiġi kklassifikat skont il-kodiċi tan-NM 9025 19 20 bħala termometru”, billi s-subintestatura kkonċernata tikkorrispondi għat-termometri u għall-pirometri elettroniċi, mhux imħalltin ma’ strumenti oħrajn tal-istess intestatura.

35

Fir-rigward tal-intestatura 9027 tan-NM, li skont ir-rikorrenti fil-kawża prinċipali kellha tiġi adottata mill-Kummissjoni għall-finijiet tal-klassifikazzjoni tariffarja inkwistjoni, għandu jiġi rrilevat li hija tirrigwarda b’mod partikolari l-“[is]trumenti u apparat għal analiżi fiżika”, filwaqt li s-subintestatura 9027 50 00 tirrigwarda l-“[is]trumenti u apparat ieħor li jużaw radjazzjonijiet ottiċi”, fosthom ir-radjazzjoni infrared. Issa għandu jiġi kkonstatat li l-karatteristiċi u proprjetajiet oġġettivi tal-apparati deskritti fl-Anness tar-Regolament Nru 314/2011 ma jippermettux il-klassifikazzjoni tagħhom f’din l-intestatura. Fil-fatt, dawn l-apparati juru r-riżultat ta’ kejl ta’ temperatura mingħajr ma jwettqu analiżi fiżika oħra li tmur lil hinn minn sempliċi kejl ta’ temperatura, proprjetà iktar speċifika diġà koperta mill-intestatura 9025 tan-NM, li għalhekk għandha tiġi adottata skont ir-regola ġenerali NM 3(a).

36

Barra minn hekk, il-klassifikazzjoni tal-imsemmija apparati fl-intestatura 9025 hija kkorroborata min-noti ta’ spjega tas-SA dwar l-intestatura 9027 li skonthom huma esklużi minn din l-intestatura tal-aħħar, b’mod partikolari, l-“idrometri, termometri, igrometri u apparat ieħor tan-Nru 9025”.

37

Minn dan jirriżulta li, permezz tal-klassifikazzjoni fis-subintestatura 9025 19 20 tan-NM tal-apparati deskritti fl-Anness tar-Regolament Nru 314/2011, il-Kummissjoni ma biddlitx il-kontenut tal-intestaturi tariffarji 9025 19 u 9027 50. Għaldaqstant, l-eżami tal-imsemmi regolament ma twassalx biex jiġi konkluż li huwa invalidu.

38

Sabiex tingħata risposta utli lill-qorti tar-rinviju, għandu madankollu jiġi rrilevat li jeżistu indikazzjonijiet, fid-dawl tad-deskrizzjoni tal-apparati inkwistjoni fil-kawża prinċipali kif tidher fid-deċiżjoni tar-rinviju u kif imsemmija fil-punt 21 ta’ din is-sentenza, li jipprovdu li dawn l-apparati jistgħu ma jikkorrispondux neċessarjament għal dawk previsti mir-Regolament Nru 314/2011.

39

Hija l-qorti tar-rinviju li għandha tivverifika l-korrispondenza bejn il-kameras termali bir-raġġi infrared importati minn Raytek u Fluke u l-apparati deskritti fir-Regolament Nru 314/2011, u, b’mod iktar partikolari, jekk il-ġbir u l-kejl tar-radjazzjoni infrared fuq is-superfiċi tal-mira kif ukoll il-wiri ta’ immaġini li tirrappreżenta d-distribuzzjoni ta’ din ir-radjazzjoni jistgħux jikkostitwixxu funzjoni prevista mill-intestatura 9027 tan-NM, li tuża r-radjazzjonijiet ottiċi, fosthom ir-radjazzjoni infrared, li tmur lil hinn minn sempliċi kejl ta’ temperatura.

40

F’dan il-każ, għandu wkoll jittieħed inkunsiderazzjoni l-fatt, ammess mir-rikorrenti fil-kawża prinċipali, li l-apparati inkwistjoni fil-kawża prinċipali jistgħu jkollhom bħala funzjoni oħra li jkejlu t-temperaturi u jistgħu, minħabba f’hekk, jintużaw bħala termometru.

41

Għaldaqstant, konformement man-nota 3 tat-Taqsima XVI tan-NM, li, bis-saħħa tar-regola ġenerali NM 1, tikkostitwixxi regola mandatorja għall-klassifikazzjoni tal-merkanzija, dawn l-apparati għandhom jiġu kklassifikati bħala magni maħsubin bil-għan li jagħmlu żewġ jew diversi funzjonijiet differenti, alternattivi jew komplementari, skont il-funzjoni prinċipali li tikkaratterizza t-totalità.

42

Għaldaqstant, ir-risposta li għandha tingħata għad-domanda magħmula għandha tkun li l-eżami tad-domanda preliminari ma żvela ebda element ta’ natura li jaffettwa l-validità tar-Regolament Nru 314/2011.

43

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Il-Ħames Awla) taqta’ u tiddeċiedi:

L-eżami tad-domanda preliminari ma żvela ebda element ta’ natura li jaffettwa l-validità tar-Regolament tal-Kummissjoni (UE) Nru 314/2011, tat-30 ta’ Marzu 2011, dwar il-klassifikazzjoni ta’ ċerti prodotti fin-Nomenklatura Magħquda.