Kooperazzjoni xjentifika u teknoloġika bejn l-UE u New Zealand

 

SOMMARJU TA’:

Ftehim dwar kooperazzjoni xjentifika u teknoloġika bejn il-Komunità Ewropea u l-Gvern ta’ New Zealand

Deċiżjoni 2009/502/KE — konklużjoni tal-Ftehim dwar kooperazzjoni xjentifika u teknoloġika bejn il-Komunità Ewropea u l-Gvern ta’ New Zealand

X’INHU L-GĦAN TAL-FTEHIM U TAD-DEĊIŻJONI?

Il-ftehim jistabbilixxi qafas formali għall-kooperazzjoni, bl-għan li jħeġġeġ, jiżviluppa u jiffaċilita attivitajiet fl-oqsma tax-xjenza u t-teknoloġija għal finijiet paċifiċi.

Bid-deċiżjoni tiegħu, il-Kunsill approva l-konklużjoni tal-ftehim f’isem il-Komunità Ewropea (illum l-UE).

PUNTI EWLENIN

Attivitajiet imwettqa skont il-ftehim huma bbażati fuq il-prinċipji li ġejjin:

• kontribuzzjonijiet u benefiċċji reċiproċi u ekwi;
• aċċess reċiproku għal programmi jew proġetti ta’ riċerka operati jew ffinanzjati mill-parti l-oħra;
• skambju f’waqtu ta’ informazzjoni;
• promozzjoni ta’ soċjetajiet ibbażati fuq l-għarfien għall-iżvilupp ekonomiku u soċjali taż-żewġ partijiet;
• protezzjoni tad-drittijiet tal-proprjetà intelletwali.

Kooperazzjoni

Il-ftehim ikopri żewġ forom ta’ attivitajiet kooperattivi:

• attivitajiet kooperattivi diretti li jinkludu
  • laqgħat,, pereżempju, ta’ esperti
    • sabiex ikun hemm diskussjoni u skambju ta’ informazzjoni dwar suġġetti xjentifiċi u teknoloġiċi ta’ natura ġenerali jew speċifika u
    • sabiex jiġu identifikati proġetti u programmi ta’ riċerka u żvilupp li jistgħu jitwettqu fuq bażi kooperattiva;
  • skambju ta’ informazzjoni dwar attivitajiet, politiki, prattiki, liġijiet u regolamenti li jikkonċernaw ir-riċerka u l-iżvilupp;
  • żjarat u skambji ta’ xjenzati, persunal tekniku u esperti oħrajn fuq suġġetti ġenerali jew speċifiċi
  • forom oħrajn ta’ attivitajiet fil-qasam tax-xjenza u tat-teknoloġija, inkluża l-implimentazzjoni ta’ proġetti u programmi kooperattivi, forom oħrajn ta’ attivitajiet li l-Kumitat Konġunt dwar il-Kooperazzjoni Xjentifika u Teknoloġika jista’ jieħu deċiżjonijiet dwarhom;
• attivitajiet kooperattivi indiretti: kwalunkwe parteċipant* minn waħda mill-partijiet jista’ jieħu sehem fi kwalunkwe programm/proġett ta’ riċerka ffinanzjat mill-parti l-oħra skont il-liġijiet u r-regolamenti rispettivi tal-partijiet.

DATA TA’ DĦUL FIS-SEĦĦ

Il-ftehim daħal fis-seħħ fit-30 ta’ Jannar 2009 għal perjodu inizjali ta’ 5 snin. Dan se jibqa’ fis-seħħ sakemm waħda mill-partijiet ittemm il-ftehim billi tagħti notifika bil-miktub lill-parti l-oħra.

SFOND

Ir-relazzjonijiet bejn l-UE u New Zealand huma rregolati minn sensiela ta’ ftehimiet.

L-ewwel dikjarazzjoni politika ta’ kooperazzjoni bejn l-UE u New Zealand tmur lura għall-1999, bl-iffirmar tad-“Dikjarazzjoni Konġunta dwar ir-Relazzjonijiet bejn l-Unjoni Ewropea u New Zealand”.

Din ġiet sostitwita fl-2007 mid-“Dikjarazzjoni Konġunta dwar ir-Relazzjonijiet u l-Kooperazzjoni”, dikjarazzjoni politika aġġornata li tistabbilixxi programm dettaljat ta’ azzjoni għall-UE u New Zealand f’oqsma bħas-sigurtà globali u reġjonali, il-ġlieda kontra t-terroriżmu u d-drittijiet tal-bniedem, l-iżvilupp u l-kooperazzjoni ekonomika, il-kummerċ, it-tibdil fil-klima u x-xjenza u t-teknoloġija. Id-Dikjarazzjoni Konġunta enfasizzat ukoll l-importanza ta’ kooperazzjoni aktar mill-qrib sabiex jiġu ffaċilitati aktar ir-rabtiet bejn persuna u oħra u biex jiġu mħeġġa l-iskambji fl-edukazzjoni għolja.

F’Ġunju 2018, il-Kummissjoni Ewropea u l-Gvern ta’ New Zealand nedew b’mod uffiċjali negozjati għal ftehim ta’ kummerċ bejn l-UE u New Zealand.

Għal aktar informazzjoni, ara:

• New Zealand u l-UE (Servizz Ewropew għall-Azzjoni Esterna).

Għal aktar informazzjoni dwar il-kooperazzjoni fir-Riċerka u l-Iżvilupp (R&I) ma’ New Zealand, ara:

• Il-kooperazzjoni internazzjonali tar-R&I — New Zealand (il-Kummissjoni Ewropea)
• Pjan direzzjonali għall-kooperazzjoni UE-New Zealand tal-S&T (Kummissjoni Ewropea).

TERMINI EWLENIN

DOKUMENTI EWLENIN

Ftehim dwar kooperazzjoni xjentifika u teknoloġika bejn il-Komunità Ewropea u l-Gvern ta’ New Zealand (ĠU L 171, 1.7.2009, pp. 28-35)

Deċiżjoni tal-Kunsill 2009/502/KE tad-19 ta’ Jannar 2009 dwar il-konklużjoni f’isem il-Komunità tal-Ftehim dwar kooperazzjoni xjentifika u teknoloġika bejn il-Komunità Ewropea u l-Gvern ta’ New Zealand (ĠU L 171, 1.7.2009, p. 27)

DOKUMENT RELATAT

Ftehim ta’ Sħubija dwar ir-Relazzjonijiet u l-Kooperazzjoni bejn l-Unjoni Ewropea u l-Istati Membri tagħha, minn naħa waħda, u New Zealand, min-naħa l-oħra (ĠU L 321, 29.11.2016, pp. 3-30)

l-aħħar aġġornament 30.08.2019