Kumpaniji pubbliċi b'responsabilità limitata (PLCs) - protezzjoni tal-azzjonisti u tal-kredituri

Id-Direttiva 2012/30/UE tallinja r-regoli f'kull pajjiż tal-UE għall-istabbiliment u t-tħaddim ta' kumpaniji pubbliċi b'responsabilità limitata.

ATT

Direttiva 2012/30/UE tal-Parlament Ewropew u tal-Kunsill tal- 25 ta' Ottubru 2012 dwar il-koordinazzjoni ta’ salvagwardji li, għall-protezzjoni tal-interessi ta’ membri u oħrajn, huma meħtieġa mill-Istati Membri ta' kumpanniji fis-sens tat-tieni paragrafu tal-Artikolu 54 tat-Trattat dwar il-Funzjonament tal-Unjoni Ewropea, dwar il-formazzjoni ta’ kumpanniji pubbliċi ta’ responsabbiltà limitata u ż-żamma u t-tibdil tal-kapital tagħhom, bil-għan li jagħmlu dawn is-salvagwardji ekwivalenti (Riformulazzjoni)

SOMMARJU

Din id-Direttiva għandha l-għan li tipproteġi lill-azzjonisti u lill-kredituri ta' kumpaniji pubbliċi b'responsabilità limitata, billi tikkoordina regoli nazzjonali għall-ħolqien u għat-tmexxija ta' kumpaniji u żżid jew tnaqqas il-kapital tagħhom.

Id-Direttiva l-ewwel tiddefinixxi t-tipi ta' kumpaniji li tkopri - li l-ismijiet tagħhom ivarjaw minn pajjiż għal ieħor.

Eċċezzjonijiet għal din id-Direttiva

Il-gvernijiet nazzjonali huma liberi li jeżentaw lil kumpaniji ta' investiment b'kapital varjabbli u ċerti tipi ta' kooperattivi.

Regoli standard skont din id-Direttiva

• 1

  Rekwiżiti minimi dwar l-informazzjoni.

L-istatuti jew l-istrument ta' inkorporazzjoni ta' kumpanija b'responsabilità pubblika limitat għandu jkun fihom l-informazzjoni li ġejja:

• it-tip u l-isem tal-kumpanija,
• l-objettivi tal-kumpanija,
• l-ammont ta' kapital,
• ir-regoli li jirregolaw il-ħatra ta' membri responsabbli għall-ġestjoni, tħaddim u superviżjoni tal-kumpanija,
• it-tul ta' żmien tal-kumpanija.

Aktar informazzjoni għandha tiġi ppubblikata fl-istatuti, fl-istrument ta' inkorporazzjoni jew f'dokument separat, inkluż:

• l-uffiċċju rreġistrat,
• il-valur, numru u għamla tal-ishma sottoskritti (maħruġin mill-kumpanija),
• l-ammont tal-kapital sottoskritt (maħruġ mill-kumpanija),
• l-identità ta' dawk li ffirmaw l-istrument ta' inkorporazzjoni jew l-istatuti,
• l-ammont totali tal-ispejjeż kollha pagabbli mill-kumpanija jew debitati lilha.

• 2

  Standards oħrajn mal-UE kollha, li jkopru:

• il-kapital minimum meħtieġ biex tiġi reġistrata PLC - EUR 25 000. Din is-somma minima sejra tiġi eżaminata u possibbilment riveduta kull 5 snin fi-dawl tat-tendenzi ekonomiċi u monetarji tal-UE
• il-ħruġ u l-akkwist ta' ishma,
• id-distribuzzjoni ta' dividendi,
• għajnuna finanzjarja mogħtija mill-kumpaniji għall-akkwist tal-ishma tagħhom,
• iż-żieda u t-tnaqqis tal-kapital - b'mod speċjali sabiex jiġi żgurat li l-liġijiet nazzjonali jiggarantixxu trattament ugwali lill-azzjonisti kollha li huma fl-istess pożizzjoni u l-protezzjoni ta' kredituri li l-pretensjonijiet tagħhom ikunu ilhom jeżistu qabel id-deċiżjoni dwar it-tnaqqis,
• ix-xoljiment ta' PLC.

Din id-Direttiva tillimita wkoll il-possibilità għal PLC sabiex takkwista l-ishma tagħha stess.

Din id-Direttiva tirrevoka u tifformola mill-ġdid it-Tieni Direttiva dwar il-Liġi tal-Kumpaniji (Direttiva 77/91/KEE), li ġiet emendata sostanzjalment mill-1979.

l-aħħar aġġornament 21.03.2014