Id-dritt li tintesa fuq l-Internet

 

SOMMARJU TA’:

Referenza għal deċiżjoni preliminari — Protezzjoni tal-individwi rigward l-ipproċessar tad-data personali — Portata territorjali għad-dritt li tintnesa — Każ C-507/17 (2019)

Referenza għal deċiżjoni preliminari - Protezzjoni ta’ individwi rigward l-ipproċessar tad-data personali u l-ipproċessar ta’ data li tkun tinsab f’siti tal-internet - Responsabbiltà tal-operatur u d-drittijiet tas-suġġett tad-data - Każ C-131/12 (2014)

X’INHUMA L-GĦANIJIET TAS-SENTENZI?

Id-deċiżjoni fl-2014 tal-Qorti tal-Ġustizzja tal-Unjoni Ewropea (QĠUE) ikkjarifikat l-interpretazjoni tad-DIrettiva 95/46/KE kif ġej.

• Il-wiri ta’ riżultati ta’ mutur ta’ tfittxija jikkostitwixxi pproċessar ta’ data personali.
• L-operatur ta’ mutur ta’ tfittxija għandu r-responsabbiltà li jneħħi l-links għal informazzjoni personali mir-riżultati ta’ tfittxija f’ċirkustanzi speċifiċi, li jintroduċi b’mod effettiv id-dritt li tintnesa.

Id-deċiżjoni tal-QĠUE tal-2019 iċċarat l-iskop ġeografiku tad-deċiżjoni preċedenti tagħha fil-kuntest il-ġdid tar-Regolament (UE) 2016/679 (ir-regolament dwar il-protezzjoni tad-data ġenerali), li mmodernizzat u unifikat ir-regoli tal-protezzjoni tad-data madwar l-Unjoni Ewropea (UE) u ħassret id-Direttiva 95/46/KE.

PUNTI EWLENIN

Google Spain SL u Google Inc. v Agencia Española de Protección de Datos (AEPD) u Mario Costeja González (2014)

• Fl-2010, Mario Costeja González, ċittadin Spanjol, talab li l-operatur Google jneħħi jew jaħbi fir-riżultati tat-tiftix id-data personali fuqu stampata fil-gazzetta La Vanguardia f’Jannar u Marzu 1998.
• Hu kien tal-fehma li l-affari ssolviet ruħha bosta snin ilu u li r-referenza għalihom kienet saret irrelevanti.
• Il-Qorti sabet li operatur ta’ mutur ta’ tfittxija huwa responsabbli għall-ipproċessar tad-data personali li tidher fuq il-paġni tal-web ippubblikati minn sorsi oħra u jeħtieġ li jikkonforma mal-leġiżlizzjoni li tipproteġi l-individwi f’dan ir-rigward (Direttiva 95/46/KE).
• Il-Qorti ddeċidiet li f’ċerti ċirkostanzi, l-operatur ta’ mutur tat-tfittxija jista’ jkun obbligat li jneħħi links għal ċerti paġni web mil-lista ta’ riżultati li tidher meta ssir tiftixa għal isem partikolari (dan huwa magħruf bħala id-dritt li tintesa jew “tneħħija tar-referenza”), fejn l-informazzjoni hija kkunsidrata bħala mhux eżatta, inadegwata, irrilevanti, imma mhux sempliċement għax konvenjenti għall-persuna soġġetta.

Google LLC v Commission nationale de l’informatique et des libertés (CNIL) (2019)

• Fl-azzjoni li ttieħdet minn Google kontra l-awtorità Franċiża tal-protezzjoni tad-data, il-QĠUE intalbet li tiddeċiedi dwar l-iskop ġeografiku tal-applikazzjoni tad-dritt li tintesa.
• Fl-2016, ir-regulatur Franċiż immulta lil Google EUR 100,000 għax irrifjuta li japplika d-dritt li tintesa madwar id-dinja. Barra minn hekk, hija ordnat il-kumpanija li tapplika d-dritt li tintesa għall-ismijiet kollha tad-domen tal-Google, inkluż għal google.com. Fir-reazzjoni tiegħu, Google sostna li l-awtorità Franċiża għall-protezzjoni tad-data biss kellha s-setgħa li tordna li hija tapplika d-domen Franċiż google.fr.
• Fid-deċiżjoni tagħha, l-Qorti sostniet li d-dritt li tintesa ma kienx japplika għal links li jintwerew f’kull verżjoni ta’ mutur ta’ tfittxija fid-dinja kollha imma li tapplika għal muturi ta’ tfittxija b’ismijiet ta’ domeni assoċjati ma’ Stati Membri tal-UE — jiġifieri mhux biss google.fr imma wkoll google.it, google.de, google.nl eċċ.
• Operaturi ta’ muturi ta’ tfittxija tal-internet huma wkoll meħtieġa li jużaw, fejn meħtieġ, miżuri li jimpedixxu “effettivament jew, għall-inqas, jiskoraġġixxu” l-utenti tal-internet milli jaċċessaw materjal mingħajr referenzi meta jfittxu bl-isem minn Stat Membru.

SFOND

Għal aktar informazzjoni, ara:

• Il-protezzjoni tad-data (Kummissjoni Ewropea)
• “Id-dritt li tintesa” (GDPR.eu).

DOKUMENTI PRINĊIPALI

Sentenza tal-Qorti tal-Ġustizzja (Awla Manja) tal-24 ta’ Settembru 2019 — Google LLC vs Commission nationale de l’informatique et des libertés (CNIL). Talba għal deċiżjoni preliminari, imressqa mill-Kunsill tal-Istat (Franza). Referenza għal deċiżjoni preliminari — Data personali — Protezzjoni tal-persuni fiżiċi fir-rigward tal-ipproċessar ta’ din id-data — Direttiva 95/46/KE — Regolament (UE) 2016/679 — Muturi ta’ tfittxija fuq l-internet — Ipproċessar tad-data li tidher fuq paġni tal-internet — Portata territorjali tad-dritt għat-tneħħija ta’ referenza — Kawża C-507/17.

Sentenza tal-Qorti tal-Ġustizzja (Awla Manja) tat-13 ta’ Mejju 2014 — Google Spain SL u Google Inc. vs Agencia Española de Protección de Datos (AEPD) u Mario Costeja González — Talba għal deċiżjoni preliminari mressqa mill-Audiencia Nacional — Data personali — Protezzjoni ta’ persuni fiżiċi fir-rigward tal-ipproċessar ta’ din id-data — Direttiva 95/46/KE — Artikoli 2, 4, 12 u 14 — Kamp ta’ applikazzjoni ratione materiae u territorjali — Muturi ta’ tfittxija fuq l-internet — Ipproċessar tad-data li tkun tinsab f’siti tal-internet — Tfittxija, elenkar f’indiċi u ħażna ta’ din id-data — Responsabbiltà tal-operatur tal-mutur ta’ tfittxija — Stabbiliment fit-territorju ta’ Stat Membru — Portata tal-obbligi ta’ dan l-operatur u tad-drittijiet tas-suġġett tad-data — Karta tad-Drittijiet Fundamentali tal-Unjoni Ewropea — Artikoli 7 u 8.Kawża C-131/12.

DOKUMENTI RELATATI

Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ Data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, pp. 1-88).

L-emendi suċċessivi għar-Regolament (UE) 2016/679 ġew inkorporati fit-test oriġinali. Din il-verżjoni konsolidata għandha valur dokumentarju biss.

Id-Direttiva 95/46/KE tal-Parlament Ewropew u tal-Kunsill tal-24 ta’ Ottubru 1995 dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ dik id-data (ĠU L 281, 23.11.1995, pp. 31-50).

l-aħħar aġġornament 15.03.2022