Programm tal-UE għall-appoġġ tar-rappurtar finanzjarju u l-awditjar

 

SOMMARJU TA’:

Regolament (UE) Nru 258/2014 li jistabbilixxi programm tal-UE għas-sostenn ta’ attivitajiet speċifiċi fil-qasam tar-rappurtar finanzjarju u l-awditjar għall-perjodu 2014-2020

X’INHU L-GĦAN TAR-REGOLAMENT?

Dan jistabbilixxi programm tal-UE biex jiġu appoġġjati l-attivitajiet tal-korpi li jikkontribwixxu għall-kisba tal-għanijiet tal-politika tal-UE fir-rigward tar-rappurtar finanzjarju u l-awditjar.

PUNTI EWLENIN

Ir-regolament ikopri l-perjodu mill-2014 sal-2020 u jistipula regoli għal-allokazzjoni ta’ ammont inizjali ta’ EUR 43.18 miljun mill-baġit tal-UE sabiex jgħin l-iżvilupp internazzjonali tal-istandards ta’ rappurtar finanzjarju u ta’ awditjar. Ir-Regolament (UE) 2017/827 emenda r-regolament oriġinali, biex żied l-allokazzjoni finanzjarja totali tal-programm għal EUR 57.007 miljun.

Wara l-kriżi ekonomika u finanzjarja tal-2008, ħareġ biċ-ċar li l-kwistjoni tar-rappurtar finanzjarju u l-awditjar kellha tiġi indirizzata u saret kwistjoni ta’ importanza ċentrali għall-aġenda politika tal-UE. Regoli komuni ta’ rappurtar finanzjarju li jaħdmu sew huma essenzjali għal:

• is-suq intern tal-UE;
• il-funzjonament effettiv tas-swieq kapitali; u
• l-kisba ta’ suq integrat għas-servizzi finanzjarji fl-UE.

Il-programm huwa mfassal biex jikkontribwixxi għall-għanijiet li:

• jiżguraw komparabbiltà u trasparenza tal-kontijiet tal-kumpaniji madwar l-UE;
• jiżguraw l-armonizzazzjoni globali tal-istandards tar-rappurtar finanzjarju billi jippromwovi l-aċċettazzjoni internazzjonali tal-Istandards Internazzjonali ta’ Rappurtar Finanzjarju;
• jippromwovu l-konverġenza u l-kwalità għolja tal-istandards internazzjonali għall-awditjar fil-pajjiżi tal-UE.

Il-programm ikopri:

• l-attivitajiet għall-iżvilupp jew għoti ta’ input għall-iżvilupp tal-istandards;
• attivitajiet relatati mal-applikazzjoni, il-valutazzjoni jew il-monitoraġġ ta’ standards jew sorveljanza tal-proċessi li jistipulaw l-istandards bħala appoġġ għall-implimentazzjoni tal-politiki tal-UE fil-qasam tar-rappurtar finanzjarju u l-awditjar.

Il-benefiċjarji huma:

• fil-qasam tar-rappurtar finanzjarju:
  • il-Grupp Konsultattiv Ewropew għar-Rappurtar Finanzjarju (EFRAG) (EUR 23.134 miljun)
  • il-Fondazzjoni għall-Istandards Internazzjonali ta’ Rapportar Finanzjarju (IFRS) (EUR 31.632 miljun);
• fil-qasam tal-awditjar:
  • il-Bord tas-Sorveljanza tal-Interess Pubbliku (PIOB) (EUR 2.241 miljun).

MINN META JIBDA JAPPLIKA R-REGOLAMENT?

Ir-Regolament ilu japplika mill-1 ta’ Jannar 2014.

SFOND

Fl-2009, l-UE nediet programm biex jappoġġja l-attivitajiet fl-oqsma tar-rappurtar finanzjarju u l-awditjar. Il-benefiċjarji kienu l-Fondazzjoni IFRS, l-EFRAG u l-PIOB. Il-programm ġie estiż fl-2014 għall-perjodu 2014-2020 għall-Fondazzjoni IFRS u l-PIOB iżda, għall-EFRAG, il-Parlament Ewropew u l-Kunsill iddeċidew li jistennew sakemm isiru ċerti riformi għall-governanza tal-EFRAG. Dawn ir-riformi ta’ governanza kienu implimentati f’Ottubru 2014 u b’hekk wittew it-triq għall-UE biex iżżid il-kontribuzzjoni tagħha għall-EFRAG.

DOKUMENT EWLIENI

Regolament (UE) Nru 258/2014 tal-Parlament Ewropew u tal-Kunsill tat-3 ta’ April 2014 dwar l-istabbiliment ta’ programm tal-Unjoni għas-sostenn ta’ attivitajiet speċifiċi fil-qasam tar-rappurtar finanzjarju u l-awditjar għall-perjodu 2014-2020 u li jħassar id-Deċiżjoni Nru 716/2009/KE (ĠU L 105, 8.4.2014, p. 1-8)

L-emendi suċċessivi għar-Regolament (UE) Nru 258/2014 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

l-aħħar aġġornament 04.04.2019