Għajnuna mill-Istat għan-negozji f'diffikultà

Il-Kummissjoni Ewropea rrevediet ir-regoli tagħha dwar kif tivvaluta l-għajnuna mill-Istat (is-sussidji pubbliċi) tal-pajjiżi tal-Unjoni Ewropea (UE) biex tappoġġja kumpaniji f'diffikultà. Dan biex jiġi żgurat li l-flus pubbliċi jiġu mmirati fejn l-iktar hemm bżonn u li s-sidien tal-kumpaniji jħallsu s-sehem ġust tagħhom tal-ispejjeż tar-ristrutturar.

ATT

Komunikazzjoni mill-Kummissjoni - Linji gwida dwar l-għajnuna mill-Istat għas-salvataġġ ta' intrapriżi mhux finanzjarji f'diffikultà (ĠU C 249, 31.7.2014, p. 1-28).

SOMMARJU

Il-Kummissjoni Ewropea rrevediet ir-regoli tagħha dwar kif tivvaluta l-għajnuna mill-Istat (is-sussidji pubbliċi) tal-pajjiżi tal-Unjoni Ewropea (UE) biex tappoġġja kumpaniji f'diffikultà. Dan biex jiġi żgurat li l-flus pubbliċi jiġu mmirati fejn l-iktar hemm bżonn u li s-sidien tal-kumpaniji jħallsu s-sehem ġust tagħhom tal-ispejjeż tar-ristrutturar.

X'JAGĦMLU DAWN IL-LINJI GWIDA?

Għajnuna mill-Istat lil kumpaniji f'diffikultà tagħtihom vantaġġ fuq kompetituri iktar b'saħħithom u iktar effiċjenti li ma jirċivux l-għajnuna (jiġifieri, tista' tfixkel il-kompetizzjoni). Tista' dejjem isservi bħala brejk fuq it-tkabbir ekonomiku billi tiddevja l-flus ta' min iħallas it-taxxa lil hinn mill-użi alternattivi, potenzjalment iktar produttivi. Dawn il-linji gwida jistabbilixxu r-regoli li jirregolaw l-għoti tal-għajnuna mill-Istat lil negozji f'diffikultà, li jeħtiġuhom jissodisfaw kundizzjonijiet stretti.

L-għan tal-linji gwida huwa li jiżguraw li l-għajnuna mill-Istat mogħtija mill-pajjiżi tal-UE tkun ġenwinament fl-interess tal-pubbliku. Eżempju ta' dan jista' jkun is-salvataġġ ta' negozju li jipprevjeni s-sofferenza soċjali li tirriżulta minn għeluq f'żona li diġà għandha rata ta' qgħad għolja. Il-linji gwida fihom eżempji ta' sitwazzjonijiet li juru fejn l-għajnuna tista' tkun iġġustifikata.

Barra minn hekk, dawn l-għotjiet ta' għajnuna għandhom juru li l-għajnuna tagħmel differenza. Biex jagħmlu hekk, għandhom jippreżentaw paragun ma' xenarju alternattiv kredibbli li fih m'hemm l-ebda għajnuna.

Għajnuna għas-salvataġġ tippermetti lill-kumpaniji li jaffaċċjaw kollass imminenti biex jibqgħu fin-negozju għal żmien biżżejjed biex jippreparaw pjan ta' ristrutturar. Dan il-pjan għandu jkun fil-forma ta' appoġġ b’likwidità (self jew garanziji) u ma jdumux iktar minn 6 xhur.

Wara dan il-perjodu ta' 6 xhur, l-għajnuna għandha jew tiġi rimborżata jew għandu jiġi nnotifikat pjan ta' ristrutturar li għandu jiġi nnotifikat lill-Kummissjoni biex l-għajnuna tiġi approvata bħala 'għajnuna għar-ristrutturar'.

L-għajnuna għar-ristrutturar tista' tingħata darba biss fuq perjodu ta' 10 snin (il-prinċipju 'tal-ewwel u l-aħħar darba'*). Il-pjan ta' ristrutturar għandu juri kif il-vijabbiltà fit-tul tal-kumpanija se tiġi restawrata mingħajr iktar appoġġ mill-Istat.

Bħala prekundizzjoni għall-għoti tal-għajnuna għar-ristrutturar u biex jitnaqqas is-sehem tal-flus ta' min iħallas it-taxxi involuti, il-linji gwida jeħtieġu li t-telf tal-kumpanija jiġi allokat bis-sħiħ lill-azzjonisti eżistenti u lill-kredituri subordinati.

Il-kumpanija għandha taqbel ukoll kif tista' tillimita d-distorsjonijiet tal-kompetizzjoni li jirriżultaw mill-għajnuna (pereżempju, dan jista' jfisser il-bejgħ ta' partijiet profittabbli tan-negozju tagħha).

Ladarba tirritorna għall-profitabbiltà, kumpanija li rċiviet għajnuna għandha taqbel li tirritorna sehem tal-profitti lill-Istat.

META JAPPLIKAW IL-LINJI GWIDA?

Il-linji gwida japplikaw mill-1 ta' Awwissu 2014 sal-31 ta' Diċembru 2020. Dawn jissostitwixxu linji gwida simili adottati fl-2004.

SFOND

Komunikazzjoni mill-Kummissjoni Qafas Temporanju għal miżuri ta’ għajnuna mill-Istat biex jingħata sostenn lill-ekonomija matul it-tifqigħa preżenti tal-COVID-19

TERMINI EWLENIN

*Il-prinċipju 'tal-ewwel u l-aħħar darba': l-għajnuna tista' tingħata darba f'perjodu ta' 10 snin.

l-aħħar aġġornament 07.04.2020