EUR-Lex De toegang tot het recht van de Europese Unie
Dit document is overgenomen van EUR-Lex
Document 52012DC0072
REPORT FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS The application of Council Regulation (EC) No 1435/2003 of 22 July 2003 on the Statute for a European Cooperative Society (SCE)
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI L-applikazzjoni tar-Regolament tal-Kunsill (KE) Nru 1435/2003 tat-22 ta' Lulju 2003 dwar l-Istatut ta' Soċjetà Kooperattiva Ewropea (SCE)
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI L-applikazzjoni tar-Regolament tal-Kunsill (KE) Nru 1435/2003 tat-22 ta' Lulju 2003 dwar l-Istatut ta' Soċjetà Kooperattiva Ewropea (SCE)
/* COM/2012/072 final */
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI L-applikazzjoni tar-Regolament tal-Kunsill (KE) Nru 1435/2003 tat-22 ta' Lulju 2003 dwar l-Istatut ta' Soċjetà Kooperattiva Ewropea (SCE) /* COM/2012/072 final */
RAPPORT TAL-KUMMISSJONI LILL-PARLAMENT
EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U
LILL-KUMITAT TAR-REĠJUNI L-applikazzjoni tar-Regolament tal-Kunsill
(KE) Nru 1435/2003 tat-22 ta' Lulju 2003 dwar l-Istatut ta'
Soċjetà Kooperattiva Ewropea (SCE) (Test b'rilevanza għaż-ŻEE) WERREJ 1........... Introduzzjoni................................................................................................................... 4 2........... L-għan tal-Istatut............................................................................................................ 4 3........... Applikazzjoni tal-Istatut SCE:
L-inventarju tal-SCEs....................................................... 5 4........... fatturi pożittivi u negattivi
li jolqtu t-twaqqif ta’ SCE, skont il-konsultazzjoni pubblika........ 6 4.1........ Xejra ġenerali................................................................................................................. 6 4.2........ Stimuli pożittivi u
speċifiċi għall-kooperattivi għat-twaqqif ta' SCE.................................... 6 4.3........ Evalwazzjoni ta’ vantaġġi
oħra allegati............................................................................. 6 4.4........ Fatturi negattivi............................................................................................................... 7 5........... Raġunijiet għaliex
l-istatut ta’ SCE, relattivament, ma kellux suċċess................................. 7 6........... Il-kwistjoni tas-simplifikazzjoni........................................................................................ 8 7........... Xejriet fid-distribuzzjoni tal-SCEs................................................................................... 8 8........... Rappurtaġġ dwar
kwistjonijiet speċifiċi u emendi possibbli għar-regolament...................... 9 8.1........ Rappurtaġġ dwar
kwistjonijiet speċifiċi b'referenza għall-Artikolu 79
tar-Regolament........ 9 8.2........ Is-simplifikazzjoni tar-referenzi
għal-liġijiet nazzjonali...................................................... 10 9........... KONKLUŻJONI........................................................................................................ 11
1.
Introduzzjoni
Ir-Regolament dwar is-Soċjetà
Kooperattiva Ewropea (SCE mill-isem Latin tagħha Societas Cooperativa
Europaea) ġie adottat nhar it-22 ta’ Lulju 2003[1], sentejn
wara l-adozzjoni tal-Istatut ta' Kumpanija Ewropea (SE mill-isem Latin
tagħha Societas Europaea)[2].
Ir-Regolament tal-SCE huwa kkumplimentat bid-Direttiva tal-Kunsill 2003/72/KE
dwar l-involviment tal-ħaddiema fis-SCE (id-‘Direttiva SCE’)[3].
L-iskadenza għall-adattament tal-leġiżlazzjoni nazzjonali
għar-Regolament u d-Direttiva dwar l-SCE ġiet iffissata
għat-18 ta' Awwissu 2006.
2.
L-għan tal-Istatut
L-għan ewlieni tal-Istatut huwa li
jiffaċilita l-attivitajiet transkonfinali u transnazzjonali
tal-kooperattivi[4].
Bħall-Istatut ta’ SE, l-Istatut ta’ Soċjetà Kooperattiva Ewropea
(SCE) huwa strument legali fakultattiv. Għall-attivitajiet/operat
transkonfinali tagħhom, l-azjendi jistgħu jagħżlu li
jieħdu l-għamla ta' SCE jew ta’ kooperattiva nazzjonali. SCE tista’ tinħoloq fi kwalunkwe minn
dawn il-modi li ġejjin: ·
billi ssir il-konverżjoni ta’ kooperattiva
nazzjonali li għandha stabbilimenti fi Stat Membru ieħor; ·
permezz tal-fużjoni ta’ żewġ
kooperattivi jew aktar minn Stati Membri differenti; ·
minn ħames persuni fiżiċi u
kumpaniji ta' kull għamla legali ta' negozju jew akar li joperaw
f'pajjiżi differenti; ·
minn żewġ kumpaniji jew ħames
persuni fiżiċi residenti f'mill-inqas żewġ Stati Membri. F’dawn il-każijiet kollha hemm bilfors
element transnazzjonali, billi l-fundaturi jridu jkunu ġejjin minn
tal-anqas żewġ pajjiżi. L-għan tal-istatut ta’ SCE huwa li
jneħħi x-xkiel legali għall-ħolqien u
l-immaniġġjar ta’ gruppi kooperattivi minn Stati Membri differenti.
L-attivitajiet ta’ negozju transkonfinali tagħhom jixxekklu minn nuqqas ta'
qbil bejn il-liġijiet dwar il-kooperattivi li japplikaw fil-pajjiżi
differenti. Ir-Regolament dwar l-SCE jara li jrażżan dawn il-problemi
billi jippermetti lill-kooperattivi jirristrutturaw irwieħhom permezz ta'
fużjonijiet transkonfinali. Dan jippermetti li SCE tittrasferixxi
l-uffiċċju rreġistrat tagħha lejn Stat Membru ieħor
għajr dak fejn tkun ġiet stabbilita l-ewwel darba. Ir-Regolament
jagħti s-setgħa lil SCE li tagħżel is-sistema ta’
governanza korporattiva li hija l-aktar adatta għaliha. Tista’ tkun sistema
fuq binarju wieħed jew fuq tnejn; il-Bord tad-Diretturi jista’ jkollu jew
ma jkollux kumitat superviżorju. L-Artikolu 79
tar-Regolament dwar l-SCE jirrikjedi li l-Kummissjoni tippreżenta rapport
dwar l-applikazzjoni tiegħu ħames snin mindu jkun daħal
fis-seħħ. Dan ir-rapport għandu jinkludi, fejn jixraq, proposti
għall-emendar tar-Regolament. L-applikazzjoni tad-Direttiva, li tipprevedi
arranġamenti għall-involviment tal-impjegati fl-SCE, ġiet
reveduta fl-2010[5].
Biex tinġabar
id-dejta meħtieġa għal dan ir-rapport, id-Direttorat
Ġenerali tal-Kummissjoni Ewropea inkarigat mill-Intrapriżi u
l-Industrija (DĠ ENTR) ikkummissjona studju[6] estern, li nħareġ
f’Settembru 2010. F’April 2011, id-DĠ ENTR nieda konsultazzjoni
pubblika dwar ir-riżultati u r-rakkomandazzjonijeit ta’ dan l-istudju.
Fl-istess waqt, fl-Att dwar is-Suq Uniku[7], il-Kummissjoni stqarret li għandha
l-ħsieb tistħarreġ jekk ir-Regolament dwar l-SCE
jeħtieġx li jiġi revedut jew issimplifikat biex jaqdi aħjar
l-interessi tal-kooperattivi. Fil-Komunikazzjoni
tagħha dwar l-Inizjattiva tan-Negozju Soċjali – adottata nhar
il-25 ta’ Ottubru 2011[8]
– il-Kummissjoni qalet li, skont ir-riżultati tal-konsultazzjoni pubblika,
taf tipproponi s-simplifikazzjoni tar-Regolament dwar l-SCE, biex dan ikompli
jinqata’ mil-liġijiet nazzjonali u jsir faċli li jiġu stabbiliti
l-kooperattivi soċjali. Is-sejbiet
tal-konsultazzjoni pubblika nħarġu ftit wara, f'Novembru 2011[9]. Dan
ir-rapport issejjes fuq dawk is-sejbiet.
3.
Applikazzjoni tal-Istatut SCE: L-inventarju tal-SCEs
F'Novembru 2011,
24 SCE ġew irreġistrati fit-30 Stat Membru tal-UE/ŻEE, kif
ġej: ħamsa fl-Italja; seba’ fis-Slovakkja; waħda f’kull
wieħed minn dawn il-pajjiżi: Franza, il-Liechtenstein,
il-Pajjiżi l-Baxxi, Spanja u l-Isvezja; tlieta fl-Ungerija, tnejn fil-Ġermanja
u tnejn oħra fil-Belġju. Ir-Regolament dwar l-SCEs kellu jidħol
fis-seħħ fl-2006. Madankollu, maġġoranza kbira tal-Istati
Membri naqset milli tlaħħaq ma' din l-iskadenza. Sa Diċembru 2011,
tliet Stati Membri ma kinux għadhom ħadu l-passi neċessarji biex
jiżguraw l-applikazzjoni effettiva tar-Regolament. L-Anness ta’ dan ir-rapport fih aktar
informazzjoni dettaljata dwar l-inventarju tal-SCEs u l-karatteristiċi
tagħhom.
4.
fatturi pożittivi u negattivi li jolqtu
t-twaqqif ta’ SCE, skont il-konsultazzjoni pubblika
4.1.
Xejra ġenerali
Skont l-organizzazzjonijiet professjonali,
m’hemm l-ebda xejra ġenerali li tapplika għall-kooperattivi kollha.
Meta jiddeċiedu jekk iwaqqfux kooperattiva nazzjonali jew inkella SCE, jew
meta jistħarrġu dwar l-aħjar pajjiż fejn tiġi
rreġistrata SCE, waħda mill-aktar kwistjonijiet importanti li
jitqiesu hija t-tassazzjoni. L-Istatut tal-SCEs, madankollu, ma jirregolax
it-tassazzjoni, peress li din titmexxa permezz tal-liġijiet
tal-pajjiż fejn tkun ibbażata l-SCE. Għaldaqstant, it-tassazzjoni
fuq l-introjtu tal-kooperattivi u t-taxxa korporattiva, it-taxxa fuq
il-qligħ jew l-eċċessi f'idejn il-kooperaturi u t-tassazzjoni
tar-riżervi indiviżibbli għadhom ivarjaw bejn pajjiż u
ieħor. Wara t-tassazzjoni, il-kwistjonijiet
l-oħra li jitqiesu - b'tal-ewwel l-aktar importanti u tal-aħħar
l-anqas - huma r-rekwiżiti tal-liġi nazzjonali tax-xogħol, u
kemm tkun kumplessa u relattivament stretta l-leġiżlazzjoni
nazzjonali dwar il-kooperattivi. Meta jiddeċiedu fejn se jirreġistraw
kooperattiva, in-negozjanti jippreferu wkoll pajjiż li jkollu netwerks
tal-komunikazzjoni tajbin u ambjent amministrattiv mhux intimidanti
għan-negozju.
4.2.
Stimuli pożittivi u speċifiċi
għall-kooperattivi għat-twaqqif ta' SCE
Il-kooperattivi u l-organizzazzjonijiet
professjonali jgħidu li l-aktar benefiċċju importanti li
wieħed iwaqqaf SCE hu li jkollu immaġni Ewropea. Din l-immaġni taf tgħin lill-fundaturi
ta’ kooperattiva jippenetraw swieq fejn marka Ewropea tkun aktar faċli li
titqiegħed fis-suq b’suċċess minn waħda nazzjonali. Dan japplika l-aktar għal oqsma
bħall-provvediment ta' servizzi soċjali. Għadd ta’ organizzazzjonijiet jgħidu
wkoll li l-jedd li joħolqu SCE huwa ta’ vantaġġ
għall-operaturi ta' kooperattiva peress li dan jippermettilhom jisħqu
l-affiljazzjoni tagħhom mal-moviment tal-kooperattivi b’mod
ġenerali meta jiġu biex iwaqqfu xi sussidjarja f’pajjiż
ieħor, jew impriża konġunta transkonfinali. Xi partijiet interessati jaħsbu li l-Istatut
tal-SCEs għandu karattru simboliku, peress li jgħolli l-profil
tan-negozji tal-ekonomija soċjali. Il-kooperattivi
jsemmu li l-mudell tan-negozju tagħhom huwa differenti minn dak
tal-kumpaniji tradizzjonali msejsa fuq il-kapital. Kooperattiva sserraħ
fuq is-solidarjetà, il-governanza demokratika, il-parteċipazzjoni
tal-membri u l-prossimità mal-membri u l-konsumaturi – billi tfittex li sservi
l-interessi tagħhom aktar milli l-interessi tal-maniġers.
4.3.
Evalwazzjoni ta’ vantaġġi
oħra allegati
Il-biċċa l-kbira tal-partijiet
interessati ma jqisux il-karattru supranazzjonali ta’ SCE bħala xi
vantaġġ potenzjali meta jwettqu bidliet strutturali transkonfinali fi
grupp. Huma biss l-istabbilimenti finanzjarji kooperattivi kbar u
soċjetajiet tal-assikurazzjoni mutwa li jidhru interessati f’dik
il-karatteristika tal-SCEs, billi jqisuha bħala ta' għajnuna fir-riorganizzazzjoni
u s-simplifikazzjoni tal-istruttura tal-grupp tagħhom. Sa
Diċembru 2011, madankollu, l-ebda SCEs ta’ dan it-tip ma kienu
għadhom inħolqu. Il-possibbiltà li l-uffiċċju
reġistrat jiġi ttrasferit fi Stat Membru ieħor la titqies
bħala motivatur essenzjali u u lanqas ta’ vantaġġ komparattiv
reali għall-SCEs meta mqabbla ma' kumpaniji nazzjonali. Din il-kwistjoni
tqajment fil-konsultazzjoni pubblika, iżda ma kien hemm l-ebda risposti
għaliha. Fil-prattika, l-ebda SCE ma ttrasferiet l-uffiċju
reġistrat tagħha sa Diċembru 2011. Il-konsultazzjoni pubblika staqsiet ukoll
lill-partijiet interessati jekk dawn jagħtux valur lill-opportunità li
joħolqu SCE biex iwettqu fużjoni transkonfinali. Ħadd
fosthom ma qies dan bħala motivatur importanti. Sa Diċembru 2011,
il-Kummissjoni ma kellha l-ebda informazzjoni dwar xi operazzjoni ta’ dan
it-tip. Lanqas ma ħareġ fid-deher li xi
azjendi huma interessati li jikkonvertu kooperattiva nazzjonali f’SCE:
il-partijiet interessati ma kkummentawx dwar din l-għażla.
4.4.
Fatturi negattivi
Il-konsultazzjoni mal-partijiet interessati
żvelat diversi problemi fl-applikazzjoni tar-Regolament tal-SCE. Dawn
japplikaw kemm għat-twaqqif kif ukoll għall-operat ta’ SCE. L-aktar problema sinifikanti għat-twaqqif
ta’ SCEs hija n-nuqqas ta’ għarfien dwar l-SCE fil-komunità
tan-negozju. L-aktar motivaturi negattivi importanti huma l-ispejjeż tat-twaqqif,
il-proċeduri kumplessi li jridu jiġu segwiti (minħabba
l-għadd ta’ referenzi għal-liġi nazzjonali) u l-inċertezza
legali fir-rigward ta’ liema liġi tapplika f’kull każ. Għadd ta’ partijiet interessati jqisu
wkoll li r-rekwiżit ta’ kapital minimu ta’ €30,000 huwa ostaklu,
talanqas għall-persuni fiżiċi li jixtiequ li jwaqqfu SCEs
żgħar biex jikooperaw transkonfinalment. Madankollu, l-idea
alternattiva hija li kapital suffiċjenti jixhed li negozju jkun serju. Uħud iqisu r-regoli dwar l-involviment
tal-impjegati bħala motivatur negattiv billi, fl-opinjoni
tagħhom, dawn huma goffi u kumplessi. Dawn ir-regoli jitqiesu wkoll
bħala sproporzjonati meta jkunu kkonċernati biss ftit impjegati.
Madankollu, l-organizzazzjonijiet tal-ħaddiema u xi oħrajn ma semmewx
problemi f'dan il-qasam.
5.
Raġunijiet għaliex l-istatut ta’ SCE,
relattivament, ma kellux suċċess
Dawk
li rrispondew għall-konsultazzjoni argumentaw li l-istatut ta' SCE
relattivament ma rnexxiex mhux biss minħabba li huwa kkumplikat iżda
wkoll u aktar minħabba li l-azjendi li jagħżlu li jaħdmu
fl-għamla ta’ kooperattiva għandhom it-tendenza li jkunu ankrati sew
fit-territorju lokali tagħhom. Wara
kollox, l-għan ta’ kooperattiva huwa li sservi l-membri li
jipparteċipaw direttament fl-immaniġġjar demoktratiku
tal-azjenda. Il-maġġoranza
l-kbira tal-kooperattivi huma negozji żgħar li joperaw fil-limiti
tal-fruntieri nazzjonali. Għadd ta’
organizzazzjonijiet tal-partijiet interessati, għalhekk, jiddubitaw jekk
l-istatut ta’ SCE joffrix xi vantaġġ. Barra
minn hekk, dawk li jwaqqfu l-kooperattivi għandhom it-tendenza li
jiddependu fuq il-liġijiet nazzjonali tagħhom stess, peress li jkunu
familjari aktar magħhom. Xi wħud semmew ukoll li r-Regolament dwar
l-SCEs ġie implimentat tard wisq (tabilħaqq, wisq snin tard)
f’ħafna Stati Membri, anki f’pajjiżi bħal Franza, l-Italja u
Spanja fejn il-moviment tal-kooperattivi huwa b’saħħtu ħafna.
6.
Il-kwistjoni tas-simplifikazzjoni
Il-partijiet interessati kollha għandhom
it-tendenza li jemmnu li l-komplessità tal-istrument hija ostaklu
maġġuri għas-suċċess tal-SCEs. L-organizzazzjoni
Ewropea li tirrappreżenta l-federazzjonijiet nazzjonali u settorjali kollha
tal-kooperattivi fl-UE tgħid li l-liġijiet nazzjonali dwar
il-kooperattivi jidhru li huma aktar sempliċi u flessibbli. Skont
għadd ta’ partijiet interessati, il-komplessità tar-Regolament (bil-bosta
referenzi tagħha għal-leġiżlazzjoni nazzjonali) tgerrex
mhux biss lill-kooperattivi iżda wkoll tipi oħra ta’ azjendi li jafu
kieku jkunu interessati li jorganizzaw l-attivitajiet tagħhom permezz ta’
SCE. Il-partijiet interessati lkoll jaqblu li
r-Regolament dwar l-SCEs għandu bżonn ħafna li jiġi
ssimplifikat jekk irridu li jintuża aktar kemm mill-azjendi l-kbar kif
ukoll miż-żgħar. Minħabba l-bosta referenzi tiegħu
għal-liġi nazzjonali, dan it-tip ta’ Regolament ma joffri l-ebda
benefiċċju reali għall-kooperattivi. Fil-fatt, sa Diċembru 2011, l-ebda
wieħed mill-gruppi l-kbar tal-kooperattivi, li jopera, jew qed jippjana li
jopera, fil-livell Ewropew ma uża l-istrument tal-SCE. Grupp kbir
ħafna fis-settur tad-distribuzzjoni bl-imnut, li jiġbor fi ħdanu
kooperattivi nazzjonali li huma minn ta’ quddiem nett fis-swieq ta’
pajjiżhom, għażel li joħloq kooperattiva skont il-liġi
Belġjana minflok SCE. Bl-istess mod, fużjoni importanti
tal-kooperattivi tas-settur tal-biedja u l-prodotti mill-ħalib
fil-Belġju, il-Ġermanja u l-Pajjiżi l-Baxxi ma seħħitx
permezz ta’ SCE[10].
7.
Xejriet fid-distribuzzjoni tal-SCEs
M’hemm l-ebda korrelazzjoni pożittiva
bejn is-saħħa u l-importanza tal-moviment tal-kooperattivi f’xi
pajjiż partikolari u l-għadd ta’ SCEs f’dak il-pajjiż. Franza,
il-Ġermanja, l-Italja u Spanja huma eżempji ta' pajjiżi fejn
l-azjendi wrew interess baxx fit-twaqqif tal-SCEs, avolja l-awtoritajiet
nazzjonali jħeġġu b'mod attiv il-moviment tal-kooperattivi, u
l-organizzazzjonijiet nazzjonali jagħtu lill-kooperattivi appoġġ
tekniku u legali b'saħħtu. Barra minn hekk, għadd żgħir
ta’ Stati Membri jidhru li għandhom għadd ta’ SCEs inattivi jew 'fuq
l-ixkaffa', wara l-prattika simili ta’ SCEs ‘fuq l-ixkaffa’. Dawn huma
kumpaniji bla attivitajiet, maħluqa minn fornituri professjonali f’dawn
il-pajjiżi u mpoġġija għall-bejgħ. Jidher li
l-operaturi minn barra l-pajjiż jixtru SCEs minn fuq l-ixkaffa li jkunu
diġà ġew iffurmati, biex jiffrankaw il-ħin u l-ispejjeż, u
jevitaw il-proċeduri kumplessi tat-twaqqif u n-negozjati dwar
l-involviment tal-impjegati. Il-Kummissjoni ftit għandha informazzjoni
dwar xi jsir minn SCEs fuq l-ixkaffa hekk kif dawn jiġu attivati.
8.
Rappurtaġġ dwar kwistjonijiet
speċifiċi u emendi possibbli għar-regolament
8.1.
Rappurtaġġ dwar kwistjonijiet
speċifiċi b'referenza għall-Artikolu 79 tar-Regolament
Skont l-Artikolu 79 tar-Regolament dwar
l-SCEs, dan ir-rapport għandu jistħarreġ jekk jixraqx li
jiġi permess li uffiċċju ċentrali u uffiċċju
reġistrat ta' SCE jkunux jinsabu fi Stati Membri differenti. Għandu jqisu
ukoll jekk id-dispożizzjonijiet fl-istatuti ta' SCE għandhomx ikunu
permessi li jiddevjaw mil-liġijiet nazzjonali dwar il-kooperattivi jew
jikkumplimentawhom, anki meta t-tali eċċezzonijiet ma jingħatawx
lill-kooperattivi lokali. Dawn iż-żewġ kwistjonijiet
jitqajmu b’mod identiku permezz tar-Regolament dwar is-SE, billi għandhom
x’jaqsmu mal-funzjonament u l-operat kemm tal-Kumpaniji Ewropej u
tal-Kooperattivi Ewropej. Skont l-Artikolu 79, dan ir-rapport
għandu jikkunsidra wkoll jekk jixraqx li jiġu permessi
dispożizzjonijiet li jippermettu li SCE tinqasam f’żewġ
kooperattivi nazzjonali jew aktar, u jekk jiġux permessi rimedji legali
fil-każ ta' frodi jew żball meta tiġi rreġistrata SCE
permezz ta' fużjoni. Dawn iż-żewġ kwistjonijiet jirrelataw
speċifikament mal-SCEs, billi m'hemm l-ebda leġiżlazzjoni f'dan
il-qasam simili għat-3, is-6 u l-10 direttiva tal-liġi
tal-kumpaniji[11]
applikabbli għall-kumpaniji limitati pubbliċi. Il-Kummissjoni m'għandha evidenza
suffiċjenti fuq l-ebda waħda minn dawn il-kwistjonijiet biex tkun
f'pożizzjoni li tasal għal konklużjonijiet ċari. Dan
għax inħolqu daqstant ftit SCEs u għax ir-Regolament daħal
fis-seħħ tard ħafna fl-Istati Membri. Jispikkaw, madankollu,
il-punti li ġejjin: ·
Il-kwistjoni jekk għandux jiġi permess li
l-uffiċċju ċentrali jew l-amministrazzjoni ewlenija ta’ SCE tkun
tinsab f'pajjiż differenti mill-uffiċċju reġistrat
tagħha ma tidhirx li hija ta' tħassib għall-moviment
kooperattiv. Ma kien hemm ebda kummenti dwar dan il-punt mill-partijiet
interessati li rrispondew għall-konsultazzjoni. Il-kooperattivi huma
intrapriżi b’rabtiet qawwija mal-komunitajiet lokali u jeħtieġu
li jżommu relazzjoni b’saħħitha mat-territorji li joperaw fihom,
hekk kif jagħmlu l-kumpaniji kapitali tradizzjonali. ·
Il-kwistjoni jekk jiġix permess li l-artikoli
tal-assoċjazzjoni ta' SCE jvarjawx mil-liġijiet lokali dwar
il-kooperattivi hija waħda li tħasseb lill-partijiet interessati.
M’hemmx qbil dwar jekk l-SCEs għandhomx jingħataw aktar awtonomija
mil-liġijiet nazzjonali. Il-maġġoranza ta' dawk li ħadu
sehem fil-konsultazzjoni jemmnu li r-Regolament dwar l-SCEs għandu
jagħti lill-membri tal-kooperattivi l-flessibbiltà li jagħżlu
l-mudell u l-istruttura tal-governanza li taqdi bl-aħjar mod
l-għanijiet u l-ħtiġijiet tagħhom. Madankollu, għadd
ta' rispondenti esprimew riżervi serji, u stqarrew li din l-awtonomija taf
tippermetti li SCE tvarja mill-prinċipji u l-valuri tal-mudell tan-negozju
ta' kooperattiva. Ir-rispondenti qalu wkoll li l-SCEs m'għandhomx
jiġu eżentati mir-regoli obbligatorji dwar il-protezzjoni tal-membri
minoritarji jew l-jeddijiet tal-impjegati. ·
Il-kwistjonijiet dwar id-diviżjoni ta' SCE
f'żewġ kooperattivi jew aktar u dwar ir-rimedji jekk fużjoni
titħassar ma jidhirx li jħassbu lill-kooperattivi, almenu s'issa. Sa
Diċembru 2011, l-ebda SCE ma dehret li kienet inħolqot permezz
ta' fużjoni.
8.2.
Is-simplifikazzjoni tar-referenzi
għal-liġijiet nazzjonali
Ir-Regolament dwar l-SCEs issejjes parzjalment
fuq l-istatut ta’ SE li kien ġie adottat sentejn qabel. Għadd
kbir tar-regoli tal-SCE li huma ta' applikazzjoni ġenerali, u mhux
speċifiċi għall-kooperattivi, jirrepetu dispożizzjonijiet
simili għal dawk maqbula fil-Kunsill u l-PE meta ġiet adottata s-SE.
Dawn jinkludu r-regoli dwar il-fużjonijiet, dwar il-ġerarkija
tal-liġijiet applikabbli u dwar it-trasferiment tal-kwartieri
ġenerali ta’ kumpanija, kif ukoll ir-rekwiżit għal element
transkonfinali. It-test tar-Regolament dwar l-SCEs fih ukoll
bosta referenzi għal-leġiżlazzjoni nazzjonali sew dwar
il-kooperattivi jew dwar kumpaniji limitati pubbliċi b'kapital
konġunt. Pereżempju, SCE trid torganizza laqgħa ġenerali
tal-partijiet interessati tal-anqas darba fis-sena, sakemm il-liġi nazzjonali
dwar il-kooperattivi nazzjonali ma tistipulax laqgħat aktar spissi, jew
jekk ikun hemm fużjoni biex jitħarsu l-kredituri, din għandha
tiġi rregolata mil-liġi nazzjonali dwar il-fużjonijiet ta'
kumpaniji ta' responsabbiltà limitata pubbliċi. Barra minn hekk, ir-Regolament dwar l-SCEs fih
serje ta’ għażliet jew referenzi li jippermettu lill-Istati Membri
jiddettaw xi mġiba partikolari lill-SCE. Dawn spiss jibdew bil-kelmiet ‘Stat
Membru jista’ jipprevedi’. Pereżempju, f'każ ta' fużjoni,
Stat Membru jista' jadotta dispożizzjonijiet biex jiżgura protezzjoni
adatta għall-membri li jkunu opponew il-fużjoni. Xi oħrajn
jużaw kliem bħal ‘Meta l-liġijiet tal-Istat Membru tal-SCE
jippermettu hekk'. Biex jiġi ssimplifikat ir-Regolament,
l-Artikoli, li jgħoddu mat-30, li fihom għażliet u referenzi ta'
dan it-tip, jistgħu jinġabru fi tliet kategoriji ewlenin. L-ewwel,
hemm artikoli li jirregolaw kwistjonijiet li huma komuni għar-Regolamenti
tal-SCEs u l-SEs. It-tieni, hemm dispożizzjonijiet li jagħmlu
referenza diretta għal-liġi dwar il-kumpaniji limitati pubbliċi
(plc). It-tielet, hemm regoli li fihom referenzi u għażliet li
jirregolaw attivitajiet u kwistjonijiet speċifiċi
għall-kooperattivi. ·
Fil-każ tal-artikoli tal-ewwel kategorija,
il-Kummissjoni beħsiebha tipproponi emendi għal dawn
id-dispożizzjonijiet, jekk jixraq, b’mod konformi mar-riflessjoni li
tinsab għaddejja dwar emendi potenzjali għall-artikoli korrespondenti
fir-Regolament dwar l-SEs. Il-kwistjonijiet huma identiċi u s-soluzzjoni
għandha tkun l-istess għaż-żewġ Regolamenti. ·
Fil-każ tal-artikoli tat-tieni kategorija,
il-Kummissjoni temmen li għandha tikkonsulta bil-kbir mal-partijiet
interessati dwar jekk ir-referenzi għall-kumpaniji limitati pubbliċi
għadhomx neċessarji. Xi partijiet interessati stqarrew li dawn
ir-referenzi għandhom it-tendenza li jwarrbu l-leġiżlazzjoni
nazzjonali eżistenti dwar il-kooperattivi. Barra minn hekk, mhux l-Istati
Membri kollha għandhom leġiżlazzjoni speċifika
għall-kooperattivi. ·
Fil-każ tal-artikoli tat-tielet kategorija,
meta r-Regolament jistqarr li xi regola partikolari se tapplika biss
għall-SCEs jekk din tkun tippermettiha l-liġi nazzjonali,
il-Kummissjoni se tikkonsulta mal-partijiet interessati dwar metodi kif
ir-Regolament dwar l-SCEs isir aktar indipendenti mil-liġijiet nazzjonali.
9.
KONKLUŻJONI
B’segwiment għal dan ir-rapport,
il-Kummissjoni beħsiebha tikkonsulta mal-partijiet interessati dwar jekk u
kif se tissimplifika r-Regolament dwar l-SCEs. Għal dan
il-għan, qed tikkoospita żewġ konferenzi kbar biex tfakkar
l-2012 bħala s-Sena Internazzjonali tan-NU ddedikata lill-Kooperattivi.
L-ewwel waħda, f’April 2012, se ssir fi Brussell u se jattenduha
l-organizzazzjonijiet tal-partijiet interessati. It-tieni waħda se ssir
f’Settembru 2012, matul il-Presidenza Ċiprijotta, u se tiġbor fi
ħdanha r-rappreżentanti tal-Istati Membri. F’dawn il-fora, il-Kummissjoni se tistaqsi
lill-partijiet interessati jekk l-artikoli individwali għandhomx jiġu
ssimplifikati billi jitħassru u jiġu sostitwiti r-referenzi
għal-liġi dwar il-kumpaniji pubbliċi, u jekk ir-Regolament dwar
l-SCEs jistax isir aktar indipendenti mil-liġijiet nazzjonali. F’kuntest aktar wiesa', il-kwistjoni
tal-għamliet legali Ewropej, bħall-SEs u l-SCEs, u l-ħtieġa
tar-reviżjoni tagħhom, tifforma wkoll parti mir-riflessjoni li tinsab
għaddejja dwar il-ġejjieni tal-Liġi tal-Kumpaniji tal-UE.
Ir-riżultati ta’ din ir-riflessjoni se jgħinu lill-Kummissjoni sabiex
tevalwa n-neċessità u, jekk jixraq, l-istrumenti li għandhom
jintużaw biex id-domanda tan-negozji fl-Ewropa tiġi ssodisfata
ħalli jkun hemm kuntest ta' azzjoni aktar ekwu, regolamentazzjoni
aħjar u simplifikazzjoni. ANNESS L-applikazzjoni tar-Regolament tal-Kunsill (KE) Nru 1435/2003
tat-22 ta' Lulju 2003 dwar l-Istatut ta' Soċjetà
Kooperattiva Ewropea (SCE) 1. Introduzzjoni Dan l-Anness jakkumpanja r-Rapport tal-Kummissjoni dwar
l-implimentazzjoni tar-Regolament dwar l-SCEs. Dan jipprovdi inventarju u
deskrizzjoni tal-SCEs eżistenti. 2. Inventarju
tal-SCEs Skont l-informazzjoni li waslet permezz
tal-istudju[12]
u d-dejta fil-lista dwar l-SCEs eżistenti tal-Istitut Libertas
fil-Ġermanja[13],
sat-22 ta’ Novembru 2011, fl-Istati Membri tal-UE/ŻEE kienu
rreġistrati 24 SCEs. L-informazzjoni dwar in-numru ta' SCEs eżistenti nkisbet l-aktar
mill-esperti nazzjonali ingaġġati fl-istudju dwar l-SCEs. Dan
in-numru tqabbel mal-informazzjoni mill-Ġurnal Uffiċjali tal-UE
(ĠUUE, ara hawn taħt) u TED (Tender Electronic Daily). Fil-ĠUUE,
xi SCEs (tnejn minn 24) m'hemmx ħjiel tagħhom; 13 jidhru taħt
it-tikketta “SE”; tlieta (3) oħrajn jidhru taħt it-tikketta “EEIG”;
seba’ biss jidhru taħt it-tikketta “SCE”. Il-fatt li l-ĠUUE jonqos
milli jsemmi bosta għamliet Ewropej ta’ entitajiet legali huwa punt li
riċerkaturi oħra diġà qajmuh meta kienu qed jinvestigaw
l-implimentazzjoni tar-Regolament dwar l-SEs.[14] L-għadd ta' SCEs żdied mill-2006 sal-2009.
Fl-2010 u l-2011 inħolqu anqas SCEs milli fl-2009. L-għadd ta' SCEs
ġodda ffurmati kull sena mill-2006 sa Novembru 2011 kien waħda
(1) fl-2006, ħamsa (5) fl-2008, tmienja (8) fl-2009, sebgħa (7) fl-2010
u tlieta (3) fl-2011. 3. L-SCEs u l-karatteristiċi tagħhom 3.1. In-nazzjonalità tal-fundaturi Ftit ferm hemm informazzjoni dwar in-nazzjonalità tal-fundaturi
involuti fil-ħolqien tal-SCEs eżistenti. Ir-Regolament ma jirrikjedix
li din id-dejta tiġi ppubblikata meta tiġi rreġistrata l-SCE.
Skont l-Artikolu 13, l-avviż ta’ reġistrazzjoni tal-SCEs
għandu jiġi ppubblikat biss għal finijiet ta' informazzjoni
fil-Ġurnal Uffiċjali tal-UE, u dan ikun jikkonsisti fl-isem,
in-numru, id-data u l-post tar-reġistrazzjoni tal-SCE, id-data u l-post
tal-pubblikazzjoni fil-pajjiż rispettiv tagħha, l-uffiċċju
rreġistrat u s-settur tal-attività tagħha. Din id-dejta normalment
tingħadda lill-Uffiċċju tal-Pubblikazzjonijiet Uffiċjali
tal-UE mir-reġistru nazzjonali fi żmien xahar mir-reġistrazzjoni
tal-SCE f’pajjiżha. Skont l-istudju, fost il-ħames SCEs Taljani, waħda hija
maħluqa ma’ sieħeb Finlandiż u ieħor Spanjol, it-tieni
waħda ma’ mutwa Franċiża, u t-tielet ma’ kofundatur Malti.
M’hemm l-ebda informazzjoni dettaljata għajr dak mitlub mir-Regolament
fir-rigward ta’ disa' (9) SCEs (sitta Slovakki, waħda Franċiża,
waħda Ġermaniża u waħda Ungeriża). L-informazzjoni
nieqsa hija minħabba l-fatt li jew xi wħud mill-SCEs inkwistjoni huma
ġodda jew inkella xi SCEs irrifjutaw li jipprovdu l-informazzjoni rikjesta
lill-esperti nazzjonali meta sar l-istudju. 3.2. Mappa ġeografika Is-Slovakkja hija l-aktar pajjiż li
għandu SCEs rreġistrati miegħu - sebgħa (7), iżda
fl-istess waqt sitta (6) minnhom jistgħu jitqiesu bħala SCEs fuq l-ixkaffa,
peress li huma rreġistrati fl-istess indirizz u għall-istess
attività. L-Italja tiġi t-tieni, b'ħames (5) SCEs, li jreġi
l-fatt li l-Italja huwa pajjiż fejn il-kooperattivi huma żviluppati
sew u mħeġġa mill-Istat skont id-dispożizzjoni kostituzzjonali
tal-art. 45. L-assenza ta’ liġi ta' implimentazzjoni nazzjonali ma
żammitx lura lil dawk li riedu jwaqqfu SCE fl-Italja. Wara jiġu
l-Belġju u l-Ungerija. F’20 pajjiż (18 SM u żewġ (2)
pajjiżi taż-ŻEE), ma ġew stabbiliti l-ebda SCEs. 3.3. Metodi ta’ ħolqien Fir-rigward tal-14-il SCE li
dwarhom hemm dejta disponibbli dwar dan is-suġġett, ilkoll ġew
iffurmati ex novo (jew ex nihilo) skont l-ewwel, it-tieni u
t-tielet inċiżi tal-Art. 2, par. 1, SCE R., jiġifieri, (a) “minn
ħames jew iktar persuni fiżiċi residenti f'tal-anqas
żewġ Stati Membri”; (b) “minn
ħames jew aktar persuni fiżiċi u kumpaniji u azjendi
...residenti fi, jew immexxija mil-liġi ta' tal-anqas żewġ Stati
Membri differenti"; (c)
"minn kumpaniji u azjendi ...li huma mmexxija mil-liġi ta' tal-anqas
żewġ Stati Membri differenti. Biex inkunu aktar preċiżi,
sitt SCEs inħolqu skont (a) hawn fuq; Sitta oħra skont (b) hawn fuq;
u tnejn oħra skont (c) hawn fuq. Il-metodu tal-ħolqien tal-SCEs
l-oħrajn għadu mhux magħruf. Ma kienx hemm każijiet ta’ SCEs
maħluqa permezz ta' fużjoni jew konverżjoni. M'hemm l-ebda informazzjoni dwar
trasferiment ta' uffiċċju reġistrat. M’hemm l-ebda informazzjoni
dwar SCEs likwidati jew konvertiti għall-għamla legali nazzjonali
tal-SCEs. L-Artikolu 1, par. 2 tar-Regolament
jgħid li “l-ebda membru ma għandu jkun responsabbli għal aktar
mill-ammont li hu/hi jkun issottoskriva, sakemm ma jkunx stipulat mod
ieħor mill-istatuti tal-SCE meta tinħoloq dik l-SCE; Meta l-membri
tal-SCE jkollhom responsabbiltà limitata, l-isem tal-SCE għandu
jispiċċa b'’limited’”. Fir-rigward tal-għamla legali, 13
mill-24 SCEs huma rreġistrati bħala "limited":
sebgħa (7) fis-Slovakkja, tlieta (3) fl-Italja u tlieta (3) fl-Ungerija.
Madankollu, mhux fiċ-ċert xi grad ta' responsabbiltà għandhom
l-SCEs l-oħrajn. 3.4. Oqsma ta’ attivitajiet,
struttura tal-bord, kapital sottoskritt, għadd ta’ impjegati Skont l-informazzjoni disponibbli, il-biċċa l-kbira tal-SCEs
eżistenti jipprovdu servizzi. Seba' SCEs jistgħu jitqiesu bħala
"kooperattivi soċjali" jew intrapriżi soċjali fis-sens
tal-Iniżjattiva tan-Negozju Soċjali[15] u għandhom għanijiet
bħat-titjib tal-impjiegi għall-persuni żvantaġġati,
konsultazzjoni medika, u servizzi fil-qasam tas-saħħa. Seba’ SCEs
oħra huma involuti fl-attivitajiet tal-proprjetà, tnejn fis-settur
tal-bini u tlieta jipprovdu konsulenza għan-negozjanti. Fir-rigward tal-istruttura tal-bord, ħames (5) SCEs
għażlu struttura tal-bord fuq binarju wieħed[16] u
għaxra (10) għażlu struttura fuq żewġ binarji[17]. L-SCEs
Taljani kollha għażlu s-sistema fuq żewġ binarji. Ħmistax (15)-il SCE nħolqu b’kapital sottoskritt
ugwali jew qrib ir-rekwiżiti ta’ kapital minimu ta’ €30,000. SCE
waħda nħolqot b’kapital sottoskritt ta’ €110,000. Ma tistax tiġi
pprovduta karta tal-bilanċ medja għall-SCEs eżistenti minħabba
n-nuqqas ta’ informazzjoni. Il-fatturat nett huwa magħruf
fil-każ ta' żewġ SCEs: fl-2009 waħda minnhom kellha
fatturat nett ta' €1,000 u oħra ta' anqas minn €15,000. L-għadd ta’ impjegati fit-12-il SCE li dwarhom hemm dejta
disponibbli f'dan ir-rigward, jgħodd 32 b'kollox. Dawn il-persuni huma
impjegati fil-biċċa l-kbira minn żewġ SCEs (waħda
għandha 13-il impjegat u l-oħra 10). Sitt SCEs għandhom impjegat
wieħed jew tnejn biss. Erba’ SCEs iddikjaraw li ma jħaddmu l-ebda
impjegati. Tabella. L-SCEs eżistenti (sa 22.11.2011) Pajjiż || Għadd ta’ SCEs L-AWSTRIJA || 0 Il-BELĠJU || 2 IL-BULGARIJA || 0 ĊIPRU || 0 IR-REPUBBLIKA ĊEKA || 0 ID-DANIMARKA || 0 L-ESTONJA || 0 IL-FINLANDJA || 0 FRANZA || 1 IL-ĠERMANJA || 2 GREĊJA || 0 L-UNGERIJA || 3 L-ISLANDA || 0 L-IRLANDA || 0 L-ITALJA || 5 IL-LATVJA || 0 IL-LIECHTENSTEIN || 1 IL-LITWANJA || 0 IL-LUSSEMBURGU || 0 MALTA || 0 IL-PAJJIŻI L-BAXXI || 1 IN-NORVEĠJA || 0 Il-POLONJA || 0 IL-PORTUGALL || 0 IR-RUMANIJA || 0 IS-SLOVAKKJA || 7 IS-SLOVENJA || 0 SPANJA || 1 L-ISVEZJA || 1 IR-RENJU UNIT || 0 GĦADD TOTALI TA’ SCEs || 24 [1] ĠU tat-18 ta' Awwissu 2003 (L207): http://eur-lex.europa.eu/LexUriServ/LexUriServ.do?uri=OJ:L:2003:207:0001:0024:EN:PDF [2] Ir-Regolament
tal-Kunsill (KE) Nru 2157/2001 tat-8 ta’ Ottubru 2001 dwar
l-Istatut ta’ Kumpanija Ewropea (SE), ĠU L 294, 10.11.2001,
p. 1–21, http://eur-lex.europa.eu/smartapi/cgi/sga_doc?smartapi!celexplus!prod!DocNumber&lg=en&type_doc=Regulation&an_doc=2001&nu_doc=2157
[3] Id-Direttiva
tal-Kunsill 2003/72/KE tat-22 ta’ Lulju 2003 li tissupplimenta
l-Istatut ta' Soċjetà Kooperattiva Ewropea fir-rigward tal-involviment ta’
impjegati, ĠU L 207, 18.8.2003, p. 25 http://eur-lex.europa.eu/smartapi/cgi/sga_doc?smartapi!celexapi!prod!CELEXnumdoc&numdoc=32003L0072&model=guichett&lg=en [4] It-test propost mill-Kummissjoni fl-1992, flimkien
ma’ żewġ abbozzi oħrajn, wieħed fir-rigward ta'
Assoċjazzjoni Ewropea u l-ieħor fir-rigward ta' Soċjetà Mutwa
Ewropea ġew irtirati mill-Kummissjon fl-2006, minħabba nuqqas ta'
progress fin-negozjati fi ħdan il-Kunsill. It-tliet proposti kollha kienu
parti minn pakkett dwar il-promozzjoni tal-intrapriżi tal-'Ekonomija
Soċjali'; l-abbozzi kkostitwixxew ir-risposta għat-talbiet
tal-'ekonomija soċjali' sabiex tingħata l-possibbiltà li toħloq
għamliet legali Ewropej proprju għaliha , biex b'hekk tiżgura kundizzjonijiet
ugwali ta' kompetizzjoni mal-kumpaniji tradizzjonali tal-kapital. . [5] Rapport mill-Kummissjoni lill-Kunsill, il-Parlament
Ewropew, il-Kumitat Ekonomiku u Soċjali Ewropew u l-Kumitat
tar-Reġjuni dwar ir-reviżjoni tad-Direttiva
tal-Kunsill 2003/72/KE tat-22 ta' Lulju 2003 li
tissupplimenta l-Istatut ta' Soċjetà Kooperattiva Ewropea fir-rigward
tal-involviment ta’ impjegati (COM(2010)0481 ta’ 16.9.2010) [6] Studju dwar l-implimentazzjoni
tar-Regolament 1435/2003 dwar l-Istatut ta' Soċjetà Kooperattiva Ewropea
(SCE). Sommarju
eżekuttiv u l-Parti I: Sinteżi u rapport komparattiv: http://ec.europa.eu/enterprise/policies/sme/files/sce_final_study_part_i.pdf u
l-Parti II: Rapporti Nazzjonali: http://ec.europa.eu/enterprise/policies/sme/files/sce_final_study_part_ii_national_reports.pdf [7] COM(2011) 206: http://eur-lex.europa.eu/LexUriServ/LexUriServ.do?uri=CELEX:52011DC0206:EN:NOT
. [8] COM(2011) 682: http://ec.europa.eu/internal_market/social_business/index_en.htm . [9] Sommajru tat-tweġibiet: http://ec.europa.eu/enterprise/policies/sme/files/public-consultation-files/summary_replies_en.pdf
[10] Coopernic (COOPérative Européenne de Référencement
et de Négoce des Indépendants Commerçants) Scrl hija
kooperattiva Ewropea tax-xiri ffurmata minn kummerċjanti u bejjiegħa
bl-imnut indipendenti (Centres E. Leclerc, Colruyt, Conad, Coop u Rewe).
L-għan tal-alleanza huwa li jippermettu
lill-bejjiegħa bl-imnut indipendenti jiskambjaw l-għarfien, u jnaqqsu
l-ispejjeż tal-katina tal-forniment. F’Diċembru 2007, Fiesland
Foods u Campina ħabbru li beħsiebhom jingħaqdu, Sena wara,
f'Diċembru 2008, irċevew l-approvazzjoni tal-awtoritajiet
tal-kompetizzjoni Ewropej biex saru Friesland Campina. [11] http://ec.europa.eu/internal_market/company/official/index_en.htm#directives
[12] It-Tabella fl-Appendiċi 4, il-Parti I
tal-Istudju, tippreżenta l-aktar dejta rilevanti li tikkonċerna
l-SCEs eżistenti: http://ec.europa.eu/enterprise/policies/sme/files/sce_final_study_part_i.pdf [13] Libertas – Europäisches Institut GmbH: http://www.libertas-institut.com/de/EWIV/List_SCE.pdf
[14] Eidenmüller, Engert, Hornuf, Incorporating under
European Law: The Societas Europaea as a Vehicle for Legal Arbitrage, 10th
European Business Organisation Law Review (2009) [15] COM(2011) 682: http://eur-lex.europa.eu/LexUriServ/LexUriServ.do?uri=COM:2011:0682:FIN:EN:PDF
[16] Struttura ta’ bord b’bord
amministrattiv wieħed biss. [17] Struttura ta’ bord b’bord maniġerjali u bord
superviżorju.