MEMORANDUM TA’ SPJEGAZZJONI
1.KUNTEST TAL-ATT DELEGAT
Din id-Direttiva Delegata tal-Kummissjoni temenda, għall-finijiet tal-adattament għall-progress tekniku, l-Anness III tad-Direttiva 2011/65/UE tal-Parlament Ewropew u tal-Kunsill dwar ir-restrizzjoni tal-użu ta’ ċerti sustanzi perikolużi fit-tagħmir elettriku u elettroniku (tfassil mill-ġdid) 1 (id-Direttiva RoHS 2) fir-rigward ta’ eżenzjoni għal applikazzjonijiet speċifiċi li fihom iċ-ċomb.
Id-Direttiva RoHS 2 tirrestrinġi l-użu ta’ ċerti sustanzi perikolużi fit-tagħmir elettriku u elettroniku, kif previst fl-Artikolu 4 tagħha. Daħlet fis-seħħ fil-21 ta’ Lulju 2011.
Is-sustanzi ristretti huma elenkati fl-Anness II tad-Direttiva RoHS 2. Filwaqt li r-restrizzjonijiet fuq iċ-ċomb, il-merkurju, il-kadmju, il-kromju eżavalenti, il-bifenili polibromurati u l-eteri tad-difenil polibromurati huma diġà fis-seħħ, ir-restrizzjonijiet fuq il-ftalat tal-bis(2-etileżil) (DEHP), il-ftalat tal-butilbenżil (BBP), il-ftalat tad-dibutil (DBP) u l-ftalat tad-diisobutil (DIBP) jibdew japplikaw mit-22 ta’ Lulju 2019 jew aktar tard. L-Annessi III u IV tad-Direttiva RoHS 2 jelenkaw il-materjali u l-komponenti tat-tagħmir elettriku u elettroniku (EEE) għal applikazzjonijiet speċifiċi eżentati mir-restrizzjoni fuq is-sustanzi skont l-Artikolu 4(1) tad-Direttiva RoHS 2.
L-Artikolu 5 jipprevedi l-adattament għall-progress xjentifiku u tekniku (l-inklużjoni, it-tiġdid, l-emendi u r-revokar tal-eżenzjonijiet) tal-Annessi III u IV. Skont l-Artikolu 5(1)(a) l-eżenzjonijiet iridu jiġu inklużi fl-Annessi III u IV biss jekk l-inklużjoni tagħhom ma ddgħajjifx il-protezzjoni tal-ambjent u tas-saħħa li jagħti r-Regolament (KE) Nru 1907/2006 2 u meta tkun issodisfata kwalunkwe waħda mill-kundizzjonijiet li ġejjin: it-tneħħija jew is-sostituzzjoni tagħhom permezz ta’ bidliet fid-disinn jew fil-materjali u fil-komponenti li ma jeħtieġu l-ebda materjal jew sustanzi elenkati fl-Anness II mhijiex prattikabbli mil-lat xjentifiku jew tekniku; l-affidabbiltà tas-sostituti mhijiex żgurata; jew it-total tal-impatti negattivi fuq l-ambjent, is-saħħa u s-sikurezza tal-konsumatur ikkawżati mis-sostituzzjoni x’aktarx li jkun ogħla mit-total tal-benefiċċji għall-ambjent, is-saħħa u s-sikurezza tal-konsumatur.
Barra minn hekk, l-Artikolu 5(1) jipprevedi li l-Kummissjoni Ewropea (il-Kummissjoni) għandha tinkludi materjali u komponenti tal-EEE għal applikazzjonijiet speċifiċi fil-listi tal-Annessi III u IV permezz ta’ atti delegati individwali f’konformità mal-Artikolu 20. L-Artikolu 5(3) u l-Anness V jistabbilixxu l-proċedura għall-preżentazzjoni ta’ applikazzjonijiet għall-għoti, għat-tiġdid jew għar-revoka ta’ eżenzjoni.
2.KONSULTAZZJONIJIET QABEL L-ADOZZJONI TAL-ATT
Mill-pubblikazzjoni tad-Direttiva RoHS 2, il-Kummissjoni rċeviet għadd sostanzjali 3 ta’ talbiet mingħand l-operaturi ekonomiċi, skont id-dispożizzjonijiet fl-Artikolu 5(3) u fl-Anness V, kemm għall-għoti ta’ eżenzjonijiet ġodda kif ukoll għat-tiġdid ta’ dawk eżistenti.
Il-Kummissjoni rċeviet talba għal eżenzjoni ġdida tal-Anness III għall-użu taċ-ċomb fl-istann tas-sensors, fl-actuators u fl-unitajiet ta’ kontroll tal-magna (ECUs) li jintużaw biex jimmonitorjaw u jikkontrollaw sistemi tal-magni li jinkludu t-turbochargers u l-kontrolli tal-emissjonijiet tal-exhaust ta’ magni b’kombustjoni interna użati f’tagħmir li mhuwiex maħsub biex jintuża biss mill-konsumaturi fid-29 ta’ Ġunju 2017 (it-talba nru 2017–7). L-eżenzjoni ntalbet għall-kategorija 11 4 .
Sabiex issir evalwazzjoni tal-applikazzjoni għal eżenzjoni, il-Kummissjoni nediet studju biex titwettaq il-valutazzjoni teknika u xjentifika meħtieġa, li kienet tinkludi konsultazzjoni online u miftuħa ta’ sitt ġimgħat mal-partijiet ikkonċernati 5 dwar l-applikazzjoni. Waqt il-konsultazzjoni mal-partijiet ikkonċernati wasal kontribut wieħed.
Ir-rapport finali li fih il-valutazzjoni tal-applikazzjoni ġie ppubblikat 6 ; u l-partijiet ikkonċernati ġew notifikati b’dan.
Sussegwentement, fid-29 ta’ Ottubru 2018 waqt laqgħa tal-esperti, il-Kummissjoni kkonsultat grupp ta’ esperti tal-Istati Membri għall-atti delegati skont id-Direttiva RoHS 2. Iċ-ċarezza tat-test propost għal din l-eżenzjoni ġiet diskussa mill-esperti. Il-kliem rakkomandat ġie emendat sussegwentement; b’mod partikolari, il-kelma “stann” ġiet miżjuda mat-test. L-esperti qablu mal-proposta ppreżentata mill-Kummissjoni, b’maġġoranza kbira ta’ membri li ma ddikjarawx il-fehma tagħhom. F’konformità mal-Linji Gwida dwar ir-Regolamentazzjoni Aħjar, l-abbozz tad-Direttiva Delegata ġie ppubblikat fuq il-Portal tar-Regolamentazzjoni Aħjar għal perjodu ta’ erba’ ġimgħat sabiex jinġabru r-reazzjonijiet mill-pubbliku. Ma waslu ebda kummenti. Twettqu l-passi kollha applikabbli relatati mal-eżenzjonijiet mir-restrizzjoni tas-sustanza skont l-Artikoli 5(3) sa 5(7) 7 . Il-Kunsill u l-Parlament Ewropew ġew notifikati dwar l-attivitajiet kollha.
Ir-rapport finali saħaq l-aktar fuq l-informazzjoni u l-valutazzjoni tekniċi li ġejjin:
·Il-kundizzjonijiet esperjenzati fil-magna u fl-exhaust u qribhom fil-kamp ta’ applikazzjoni tal-eżenzjoni mitluba jistgħu jkunu severi ħafna b’temperaturi u b’livelli ta’ vibrazzjoni elevati li jistgħu jikkawżaw falliment bikri tal-legaturi tal-istann. Kull magna hija ddisinjata b’tipi speċifiċi ta’ sensors (kif ukoll ta’ attwaturi u ta’ ECUs) li jridu jiġu ttestjati bir-reqqa biex jiġi żgurat li jkunu affidabbli u li l-magni jissodisfaw il-limiti tal-emissjonijiet skont ir-Regolament (UE) 2016/1628 dwar ir-rekwiżiti relatati mal-limiti tal-emissjonijiet ta’ inkwinanti gassużi u partikolati u l-approvazzjoni tat-tip għall-magni b’kombustjoni interna għal makkinarju mobbli mhux tat-triq.
·Attwalment, għall-applikazzjonijiet ikkonċernati, jenħtieġ żmien addizzjonali għall-ittestjar sabiex tkun żgurata l-affidabbiltà ta’ alternattivi disponibbli mingħajr ċomb.
Ir-riżultati tal-evalwazzjoni għall-Kategorija 11 juru li l-eżenzjoni speċifika ma ddgħajjifx il-protezzjoni tal-ambjent u tas-saħħa li jagħti r-Regolament (KE) Nru 1907/2006 (REACH), f’konformità mal-Artikolu 5 tad-Direttiva 2011/65/UE. Barra minn hekk, mill-inqas wieħed mill-kriterji rilevanti speċifikati fl-Artikolu 5(1)(a) huwa ssodisfat permezz tat-talba għal eżenzjoni: Billi llum għall-applikazzjonijiet ikkonċernati, għad m’hemm ebda alternattivi affidabbli disponibbli, jew li mistennija jidħlu fis-suq dalwaqt, l-għoti tal-eżenzjoni b’perjodu massimu ta’ validità ta’ ħames snin, li jibda mit-22 ta’ Lulju 2019 8 , huwa ġġustifikat. Billi għad m’hemmx sostituti affidabbli disponibbli, tul dan il-perjodu mhu mistenni ebda impatt soċjoekonomku negattiv tas-sostituzzjoni. Lanqas il-perjodu ta’ validità mogħti mhu mistenni jħalli impatti negattivi fuq l-innovazzjoni.
3.ELEMENTI ĠURIDIĊI TAL-ATT DELEGAT
