7.5.2010

MT

Il-Ġurnal Uffiċjali tal-Unjoni Ewropea

CA 119/1

---

AVVIŻ TA' REKLUTAĠĠ PE/123/S

DIRETTUR

(Grupp ta' funzjoni AD 14)

SERVIZZ ĠURIDIKU — DIRETTORAT GĦALL-AFFARIJIET ISTITUZZJONALI U PARLAMENTARI

(2010/C 119 A/01)

1.   POST VAKANTI

Il-President tal-Parlament Ewropew iddeċieda li jniedi l-proċedura biex timtela l-kariga ta' direttur (AD, grad 14) fis-Servizz Ġuridiku tiegħu — Direttorat għall-Affarijiet Istituzzjonali u Parlamentari, skont l-Artikolu 29(2) tar-Regolamenti tal-Persunal għall-uffiċjali tal-Komunitajiet Ewropej (1) (minn hawn 'il quddiem ir-“Regolamenti”).

Din il-proċedura ta' għażla, li għandha l-iskop li tagħti lill-Awtorità tal-Ħatra għażla akbar ta' kandidati, se tiżvolġi fl-istess waqt li tkun għaddejja l-proċedura interna u interistituzzjonali ta' reklutaġġ.

Ir-reklutaġġ se jkun għall-Grad AD14 (2). Is-salarju bażiku huwa ta' EUR 12 967,74 fix-xahar. Flimkien mas-salarju bażiku, li huwa suġġett għat-taxxa Komunitarja u eżenti mit-taxxa nazzjonali, jistgħu jiżdiedu ċerti allowances f'ċirkostanzi stabbiliti mir-Regolamenti.

Billi d-Direttorat għandu persunal f'postijiet tax-xogħol differenti, dan l-impjieg jeħtieġ flessibilità u jinvolvi vvjaġġar ta' spiss lejn il-postijiet varji tax-xogħol, kuntatti frekwenti interni u interistituzzjonali, u mal-Membri tal-Parlament Ewropew.

2.   POST TAX-XOGĦOL

Il-Lussemburgu. Dan l-impjieġ jista' jiġi ttrasferit għal xi wieħed miż-żewġ postijiet tax-xogħol l-oħra tal-Parlament Ewropew.

3.   OPPORTUNITAJIET INDAQS

Il-Parlament Ewropew jimxi fuq politika ta' opportunitajiet indaqs u jħeġġeġ kandidati nisa u rġiel ikkwalifikati biex japplikaw, mingħajr diskriminazzjoni.

4.   DESKRIZZJONI TAL-IMPJIEG

Uffiċjal għoli responsabbli għad-dmirijiet li ġejjin, fil-kuntest tal-orjentamenti u d-deċiżjonijiet stabbiliti mill-President u mis-Segretarju Ġenerali (3):

—	jiżgura l-funzjonament tajjeb ta' dipartiment speċjalizzat fis-Segretarjat Ġenerali li jikkonsisti f'diversi unitajiet li jkopru l-oqsma tal-kompetenzi tad-Direttorat;

—	jimmaniġġja, imexxi, jimmotiva u jikkoordina tim wieħed jew aktar — japplika bl-aqwa mod ir-riżorsi tad-dipartiment biex jipprovdi servizz ta' kwalità tajba (organizzazjoni, immaniġġjar ta' riżorsi umani u riżorsi tal-baġit, innovazzjoni, eċċ.) fl-oqsma ta' attività tiegħu;

—	jagħti pariri lill-Istituzzjoni u lill-entitajiet tagħha fi kwistjonijiet ta' natura ġuridika;

—	jirrappreżenta l-Istituzzjoni bħala uffiċjal fi proċeduri ġudizzjarji importanti;

—	imexxi l-ħidma ta' għajnuna ġuridika relatata ma' kwistjonijiet istituzzjonali u tal-Liġi Parlamentari jew kwistjonijiet oħra li jkun inkarigat minnhom il-Ġurikonsult;

—	jassisti lill-Ġurikonsult meta jitolbu, jew fin-nuqqas tiegħu, jissostitwixxih fil-laqgħat tal-entitajiet parlamentari;

—	jirrappreżenta lill-Parlament Ewropew fil-kuntatti interistituzzjonali.

5.   ELIĠIBILITÀ (il-profil mistenni)

Din il-proċedura hija miftuħa għall-kandidati li, sad-data tal-għeluq għat-tressiq tal-applikazzjonijiet, jissodisfaw il-kundizzjonijiet li ġejjin:

a)   Kundizzjonijiet ġenerali

Skont l-Artikolu 28 tar-Regolamenti tal-Persunal għall-uffiċjali tal-Komunitajiet Ewropej, il-kandidat għandu:

—	ikun ċittadin ta' wieħed mill-Istati Membri tal-Unjoni Ewropea (4);

—	igawdi d-drittijiet kollha bħala ċittadin;

—	ikun issodisfa kull obbligu impost fuqu mil-liġijiet dwar is-servizzi militari;

—	jippreżenta referenzi xierqa dwar il-karattru li jiggarantixxu l-ħiliet meħtieġa għax-xogħol mistenni minnu.

b)   Kundizzjonijiet partikolari

i)   Kwalifiki u esperjenza professjonali

—

Livell ta' edukazzjoni li jikkorrispondi ma' ċiklu sħiħ ta' studji universitarji ta' mhux anqas minn erba' snin iċċertifikati b'lawrja fil-liġi, jew livell ta' edukazzjoni li jikkorrispondi ma' ċiklu sħiħ ta' studji universitarji ta' tal-anqas tliet snin iċċertifikati b'lawrja fil-liġi flimkien ma' esperjenza professjonali xierqa ta' mill-inqas sena (5), jew livell ta' edukazzjoni li jikkorrispondi għal ċiklu sħiħ ta' studji universitarji ta' mill-inqas tiet snin iċċertifikati b'lawrja kif ukoll kwalifika professjonali għall-eżerċitar tal-kariga ta' avukat, flimkien ma' tal-anqas sena esperjenza professjonali xierqa (5).

—	Tal-anqas ħmistax-il sena esperjenza professjonali wara l-kisba tal-kwalifiki msemmija fl-ewwel paragrafu, li tal-anqas tmien snin minnhom ikunu ta' esperjenza f'funzjonijiet maniġerjali.

ii)   Għarfien meħtieġ

—	Għarfien tajjeb dwar il-Parlament Ewropew, l-Unjoni Ewropea u l-istituzzjonijiet tagħha, kif ukoll dwar it-trattati u l-leġiżlazzjoni tal-Unjoni Ewropea;

—	ħila eċċellenti fitl-kitba ta' testi, rapporti u opinjonijiet ġuridiċi dwar l-integrazzjoni Ewropea u l-evoluzzjoni tal-Unjoni;

—

għarfien tajjeb tal-Liġi Istituzzjonali u Baġitarja tal-Unjoni Ewropea, tal-kompetenzi esterni tagħha kif ukoll tal-Liġi Parlamentari tal-Unjoni (Regoli ta' Proċedura tal-Parlament Ewropew, Statut tal-Membri tal-Parlament Ewropew, aċċess għad-dokumenti tal-Parlament Ewropew, protezzjoni tad-dejta personali, eċċ.);

—	esperjenza professjonali f'waħda mill-istituzzjonijiet tal-Unjoni Ewropea;

—	kapaċità tajba b'rabta mal-għarfien amministrattiv meħtieġ għall-qasam ta' attivitajiet ikkonċernat (riżorsi umani, immaniġġjar, baġit, finanzi, IT, qasam ġuridiku, eċċ.);

—	kapaċità eċċellenti relatata mal-metodi ta' mmaniġġjar tat-timijiet;

—	ħila eċċellenti fit-tħejjija ta' dokumenti;

—	kapaċità eċċellenti ta' espressjoni fil-pubbliku.

iii)   Għarfien ta' lingwi

Għarfien eċċellenti ta' lingwa uffiċjali waħda tal-Unjoni Ewropea (6) u għarfien tajjeb ħafna ta' lingwa uffiċjali oħra tal-UE.

Il-Kumitat Konsultattiv jikkunsidra l-għarfien ta' lingwi uffiċjali oħra tal-Unjoni Ewropea.

iv)   Ħiliet

—	Sens ta strateġija;

—	ħiliet maniġerjali;

—	kapaċità ta' ppjanar bil-quddiem;

—	kapaċità ta' reazzjoni għall-avvenimenti;

—	approċċ metikoluż;

—	ħiliet ta' komunikazzjoni.

6.   PROĊEDURA TAL-GĦAŻLA

Biex jassisti lill-Awtorità tal-Ħatra fl-għażla tagħha, il-Kumitat Konsultattiv għall-ħatra ta' uffiċjali għolja se jistabbilixxi lista ta' kandidati u jirrakkomanda lill-Bureau l-ismijiet tal-persuni li għandhom jissejħu għal intervista. Il-Bureau se jadotta l-lista, filwaqt li l-Kumitat se jagħmel l-intervisti u jissottometti r-rapport finali tiegħu lill-Bureau għal deċiżjoni. F'dan l-istadju, il-Bureau jista' jintervista lill-kandidati.

7.   APPLIKAZZJONIJIET

Il-kandidati huma mitluba jibagħtu l-applikazzjoni tagħhom fl-indirizz muri hawn taħt (u jikkwotaw l-“Avviż ta' Reklutaġġ PE/123/S”), u jinkludu stqarrija personali u curriculum vitae tal-Europass (7):

Monsieur le Secrétaire Général

Parlement européen

Bâtiment Konrad Adenauer

2929 Luxembourg

LUXEMBOURG

L-applikazzjoni trid tintbagħat bil-posta rreġistrata sa mhux aktar tard mill-21 ta' Mejju 2010, bit-timbru tal-posta bħala konferma tad-data.

Jinġieb għall-attenzjoni tal-Kandidati li jissejħu għal intervista (8) li, sad-data tal-intervista, għandhom jipprovdu, permezz biss ta' kopji jew fotokopji, dokumenti li jikkonfermaw l-istudji kif ukoll l-esperjenza professjonali tagħhom u l-attività tagħhom li jeżerċitaw attwalment. Dawn id-dokumenti ma jingħatawx lura lill-kandidati.

---

(1)  ĠU L 124, 27.4.2004, p. 1.

(2)  Mar-reklutaġġ, l-uffiċjal jitqiegħed fi grad skont l-Artikolu 32 tar-Regolamenti.

(3)  Ara l-anness għad-dmirijiet prinċipali.

(4)  L-Istati Membri tal-Unjoni Ewropea huma: l-Awstrija, il-Belġju, il-Bulgarija, ir-Repubblika Ċeka, Ċipru, id-Danimarka, l-Estonja, il-Finlandja, Franza, l-Irlanda, l-Italja, il-Ġermanja, il-Greċja, Spanja, il-Latvja, il-Litwanja, il-Lussemburgu, Malta, il-Pajjiżi l-Baxxi, il-Polonja, il-Portugall, ir-Renju Unit, ir-Rumanija, is-Slovakkja, is-Slovenja, l-Isvezja u l-Ungerija.

(5)  Din is-sena ta' esperjenza ma titqiesx fil-valutazzjoni tal-esperjenza professjonali meħtieġa fil-paragrafu segwenti.

(6)  Il-lingwi uffiċjali tal-Unjoni Ewropea huma: il-Bulgaru, iċ-Ċek, id-Daniż, l-Estonjan, il-Finlandiż, il-Franċiż, il-Ġermaniż, il-Grieg, l-Ingliż, l-Irlandiż, il-Latvjan, il-Litwan, il-Malti, l-Olandiż, il-Pollakk, il-Portugiż, ir-Rumen, is-Slovakk, is-Sloven, l-Ispanjol, l-Isvediż, it-Taljan u l-Ungeriż.

(7)  http://europass.cedefop.europa.eu/

(8)  Dan ma japplikax għall-kandidati li jkunu qed jaħdmu għall-Parlament Ewropew fid-data tal-għeluq tat-tressiq tal-applikazzjonijiet.

---

---