Taħriġ vokazzjonali

L-edukazzjoni u t-taħriġ vokazzjonali (VET) jistgħu jgħammru lill-istudenti b’ħiliet prattiċi għal impjiegi speċifiċi u kompetenzi trasversali meħtieġa kemm għall-iżvilupp personali kif ukoll għas-suq tax-xogħol.

L-Artikolu 14 tal-Karta tal-UE dwar id-Drittijiet Fundamentali jagħti lil kull persuna d-dritt għall-edukazzjoni u d-dritt li jkollha aċċess għal taħriġ vokazzjonali u kontinwu.

L-Artikolu 166 tat-Trattat dwar il-Funzjonament tal-Unjoni Ewropea jirrikonoxxi li l-pajjiżi tal-UE huma responsabbli għall-kontenut u l-organizzazzjoni ta’ VET nazzjonali u li r-rwol tal-UE huwa dak li tikkumplimenta l-azzjonijiet tagħhom. Għaldaqstant, il-politika tal-UE tfittex li tindirizza sfidi komuni bħat-tixjiħ, in-nuqqasijiet fil-ħiliet u l-kompetizzjoni globali, bil-għan li jittejbu l-impjegabilità u l-ħiliet.

Kif enfasizzat fir-rakkomandazzjoni tal-Kunsill tal-24 ta’ Novembru 2020, il-VET għandhom rwol ċentrali biex jikkontribwixxu għall-kompetittività sostenibbli, il-ġustizzja soċjali u r-reżiljenza għat-tħejjija taż-żgħażagħ biex jibdew b’suċċess il-ħajja tax-xogħol tagħhom u għall-ħtiġijiet tat-titjib tal-ħiliet u tat-taħriġ mill-ġdid tal-popolazzjoni fl-età li jaħdmu, sabiex kulħadd jingħata s-setgħa permezz tal-għarfien, tal-ħiliet u tal-attitudnijiet biex jirnexxi fl-iżvilupp professjonali, soċjali u personali tiegħu.

Il-programm Erasmus għall-2021–2027, immexxi mill-Aġenzija Eżekuttiva Ewropea għall-Edukazzjoni u għall-Kultura u l-aġenziji nazzjonal tal-Erasmus+, għandu l-għan li jtejjeb il-kwalità tal-VET madwar l-UE u joffri opportunitajiet għal kollokamenti u l-iżvilupp professjonali barra mill-pajjiż. Dan iħeġġeġ ukoll is-sħubiji bejn organizzazzjonijiet tal-VET u negozji u partijiet ikkonċernati oħrajn.

Korpi tal-UE oħrajn attivi fil-qasam tat-taħriġ huma:

• iċ-Ċentru Ewropew għall-Iżvilupp ta’ Taħriġ Vokazzjonali (Cedefop), f’Tessaloniki (stabbilit fl-1975);
• il-Fondazzjoni Ewropea għat-Taħriġ, f’Turin (stabbilita fl-1993 u operattiva mill-1994);
• il-Kumitat Konsultattiv dwar it-Taħriġ Vokazzjonali, stabbilit sabiex jassisti lill-Kummissjoni fit-twettiq tal-politika tagħha;
• il-laqgħat tad-diretturi ġenerali dwar il-VET, magħmula minn rappreżentanti ta’ livell għoli mill-ministeri responsabbli mill-VET f’35 pajjiż.

ARA WKOLL

• Il-Karta tad-Drittijiet Fundamentali
• Il-kompetittività
• Id-distribuzzjoni tal-kompetenzi
• L-Edukazzjoni
• Aġenziji tal-Unjoni Ewropea
• Żgħażagħ
• Kooperazzjoni fl-edukazzjoni u t-taħriġ vokazzjonali (sommarju)
• L-iżgurar tal-kwalità fl-edukazzjoni u t-taħriġ vokazzjonali (sommarju)
• Iċ-Ċentru Ewropew għall-Iżvilupp ta’ Taħriġ Vokazzjonali (sommarju)
• Fondazzjoni Ewropea tat-Taħriġ (sommarju)
• Tagħlim tul il-ħajja – Kwalifiki Ewropej (sommarju)
• Il-politika tal-UE fil-qasam tal-edukazzjoni u t-taħriġ vokazzjonali (il-Kummissjoni Ewropea)