L-involviment tal-UE fi sforzi biex jiġu unifikati r-regoli tad-dritt internazzjonali privat

 

SOMMARJU TA’:

Id-Deċiżjoni 2006/719/KE — l-adeżjoni mal-Konferenza tal-Aja dwar id-Dritt Internazzjonali Privat

X’INHU L-GĦAN TA’ DIN ID-DEĊIŻJONI?

• Din ippermettiet lill-Komunità Ewropea (illum l-Unjoni Ewropea) taċċedi għall-Konferenza tal-Aja dwar id-Dritt Internazzjonali Privat (HCCH)*.
• L-għan tal-HCCH huwa li taħdem għall-unifikazzjoni progressiva tar-regoli tad-dritt internazzjonali privat* fil-pajjiżi parteċipi.

PUNTI EWLENIN

• L-UE tipparteċipa fl-HCCH bħala membru sħiħ. Din id-deċiżjoni ma torbotx lid-Danimarka, li għandha esklużjoni fakultattiva mill-ispazju ta’ libertà, sigurtà u ġustizzja u tipparteċipa għal rasha.
• L-UE ddepożitat dikjarazzjoni ta’ kompetenza (Anness II), li tispeċifika f’liema oqsma ġiet ittrasferita l-kompetenza għaliha mill-pajjiżi tal-UE (ħlief id-Danimarka). Dawn huma miżuri fil-qasam ta’ kooperazzjoni ġudizzjarja fi kwistjonijiet ċivili li jkollhom implikazzjonijiet transkonfinali u huma meħtieġa għall-funzjonament tajjeb tas-suq intern. Barra minn hekk, l-UE għandha kompetenzi esterni — uħud minnhom esklussivi — kif ikkjarifikat mill-każistika tal-Qorti tal-Ġustizzja tal-Unjoni Ewropea. Konvenzjonijiet tal-HCCH, pereżempju fl-oqsma tal-ġurisdizzjoni, ir-rikonoxximent u l-infurzar ta’ sentenzi fi kwistjonijiet ċivili u kummerċjali, jistgħu jaqgħu taħt dawn il-kompetenzi.

• F’dikjarazzjoni oħra (Anness III), l-UE impenjat ruħha li teżamina jekk ikunx fl-aħjar interess tagħha li tissieħeb fil-konvenzjonijiet tal-Aja eżistenti f’oqsma fejn għandha kompetenza.

MINN META TAPPLIKA D-DEĊIŻJONI?

L-UE ilha membru tal-HCCH mit-3 ta’ April 2007.

SFOND

• Fit-28 ta’ Novembru 2002, il-Kunsill awtorizza lill-Kummissjoni Ewropea biex tinnegozja l-kundizzjonijiet u l-modalitajiet tal-adeżjoni mal-HCCH.
• L-istatut tal-HCCH kellu jiġi emendat biex jippermetti lill-UE — organizzazzjoni reġjonali għall-integrazzjoni ekonomika — taċċedi. F’Ġunju 2005, il-konferenza diplomatika tal-HCCH adottat l-emendi neċessarji b’kunsens.
• Wara n-negozjati b’suċċess mal-HCCH, il-Kummissjoni ressqet proposta għal din id-deċiżjoni tal-Kunsill dwar l-adeżjoni tal-Komunità Ewropea (illum l-Unjoni Ewropea) mal-HCCH. Il-Parlament Ewropew ta l-kunsens tiegħu f’Settembru 2006.
• 82 pajjiż u l-UE huma membri tal-HCCH.

TERMINI EWLENIN

DOKUMENT EWLIENI

Id-Deċiżjoni tal-Kunsill 2006/719/KE tal-5 ta’ Ottubru 2006 dwar l-adeżjoni tal-Komunità mal-Konferenza ta’ l-Aja dwar id-Dritt Internazzjonali Privat (ĠU L 297, 26.10.2006, pp. 1-14)

l-aħħar aġġornament 04.12.2017