Eżenzjoni għal ċerti akkordji bejn il-kumpaniji marittimi tal-linja (“konsorzji”)

 

SOMMARJU TA’:

l-Artikolu 101 tat-Trattat dwar il-Funzjonament tal-Unjoni Ewropea (TFUE)

Ir-Regolament (KE) Nru 906/2009 dwar l-applikazzjoni tar-regoli tal-kompetizzjoni tal-UE għal ċerti kategoriji ta’ akkordji, deċiżjonijiet u prattiċi miftiehma bejn il-kumpaniji marittimi tal-linja

X’INHU L-GĦAN TAR-REGOLAMENT U TAL-ARTIKOLU 101 TAT-TFUE?

L-Artikolu 101(1) tat-TFUE jipprojbixxi l-akkordji kollha bejn in-negozji u l-prattiki kollha miftiehma li jistgħu jolqtu l-kummerċ bejn l-Istati Membri tal-Unjoni Ewropea (UE) u li jkollhom l-għan li jipprevjenu, jillimitaw jew ixekklu l-kompetizzjoni fi ħdan is-suq uniku tal-UE.

Madankollu, l-Artikolu 101(3) tat-TFUE jippermetti ċerti każijiet fejn l-Artikolu 101(1) jista’ jiġi ddikjarat inapplikabbli fejn l-akkordji jista’ jkollhom ċerti benefiċċji soċjali jew tal-konsumatur, li jirriżultaw f’effiċjenza akbar u ma jxekklux il-kompetizzjoni.

Ir-regolament jikkonċerna l-konsorzji* li jipprovdu servizzi ta’ trasport marittimu internazzjonali* servizzi bejn il-portijiet tal-UE u jeżenta l-akkordji, id-deċiżjonijiet u l-prattiki speċifiċi tagħhom mir-regoli tal-kompetizzjoni tal-UE.

PUNTI EWLENIN

Akkordji eżentati

L-attivitajiet ta’ konsorzju li ġejjin huma permessi:

• l-operazzjoni konġunta ta’ servizzi tat-trasport marittimu tal-linja;
• aġġustamenti tal-kapaċità b’rispons għall-fluttwazzjoni fl-offerta u d-domanda;
• l-operazzjoni konġunta ta’ terminals ta’ portijiet u servizzi bħal servizzi ta’ burdnara (burdnar huwa ħaddiem bl-idejn fuq ix-xatt li jkun involut fit-tagħbija u fil-ħatt ta’ vapuri, trakkijiet, ferroviji jew ajruplani);
• attivitajiet anċillari oħra għal dawk elenkati hawn fuq, li huma meħtieġa għall-implimentazzjoni tagħhom, bħal li l-membri ta’ konsorzju ma jitħallewx jassenjaw jew jinnoleġġaw spazju lil trasportaturi oħra li joperaw bastimenti fl-istess suq sakemm ma jkun hemmx il-kunsens minn qabel tal-membri l-oħra tal-konsorzju.

Restrizzjonijiet iebsa

L-eżenzjoni t’hawn fuq ma tapplikax għal konsorzju li, direttament jew indirettament, waħdu jew flimkien ma’ fatturi oħra taħt il-kontroll tal-partijiet, ifittex li:

• jiffissa prezzijiet meta s-servizzi ta’ trasport marittimu tal-linja jinbiegħu lil partijiet li ma jkunux membri tal-konsorzju;
• jillimita l-kapaċità jew il-bejgħ ħlief meta jitħalla bħal hawn fuq;
• jalloka swieq jew klijenti.

Kundizzjonijiet għall-eżenzjoni

Sabiex jikkwalifika għall-eżenzjoni, is-sehem fis-suq ikkombinat tal-membri tal-konsorzju fis-suq rilevanti li fih jopera l-konsorzju ma jridx jaqbeż 30% ikkalkulat b’referenza għall-volum totali ta’ merkanzija ttrasportata mill-membri fi ħdan jew barra l-konsorzju. Biex jikkwalifikaw għall-eżenzjoni, il-membri tal-konsorzju jeħtiġilhom ikollhom id-dritt li jirtiraw mill-konsorzju, soġġett għal perjodu massimu ta’ avviż ta’ 6 xhur, mingħajr ebda penali finanzjarja jew penali oħra. Fil-każ ta’ konsorzju li jkun ferm integrat il-perjodu massimu ta’ avviż jista’ jiġi estiż għal 12-il xahar.

MINN META JAPPLIKA R-REGOLAMENT?

Dan ilu japplika mis-26 ta’ April 2010. Il-validità tiegħu, oriġinarjament sal-25 ta’ April 2015, ġiet estiża sal--25 ta’ April 2024.

SFOND

Dan ir-regolament jissostitwixxi r-Regolament (KE) Nru 823/2000 li skada fil-25 ta’ April 2010. Għalkemm il-ġustifikazzjonijiet għal eżenzjoni ġenerali* għal konsorzji tal-bastimenti tal-linja għadhom validi, ir-Regolament 906/2009 jiżgura konverġenza akbar ma’ regolamenti oħra ta’ eżenzjoni ġenerali għall-kooperazzjoni orizzontali filwaqt li jitqiesu l-prassi tas-suq attwali fl-industrija tal-bastimenti tal-linja.

Għal aktar informazzjoni, ara:

• Antitrust: Il-Kummissjoni testendi l-validità tal-eżenzjoni ta’ kategorija għall-konsorzji tat-trasport marittimu tal-linja — stqarrija għall-istampa (Kummissjoni Ewropea).

TERMINI EWLENIN

DOKUMENTI EWLENIN

Verżjoni konsolidata tat-Trattat dwar il-Funzjonament tal-Unjoni Ewropea — It-Tielet Parti — Politika u azzjonijiet interni tal-Unjoni — Titolu VII — Regoli komuni fuq il-kompetizzjoni, fuq it-tassazzjoni u l-approssimazzjoni tal-liġijiet — Kapitolu 1 — Regoli li jirregolaw il-kompetizzjoni — Taqsima 1 — Regoli li japplikaw għal impriżi — l-Artikolu 101 (ex Artikolu 81 TKE) (ĠU C 202, 7.6.2016, pp. 88-89)

Ir-Regolament tal-Kummissjoni (KE) Nru 906/2009 tat-28 ta’ Settembru 2009 dwar l-applikazzjoni tal-Artikolu 81(3) tat-Trattat għal ċerti kategoriji ta’ akkordji, deċiżjonijiet u prattiċi miftiehma bejn il-kumpaniji marittimi tal-linja (konsorzji) (ĠU L 256, 29.9.2009, pp. 31-34)

L-emendi suċċessivi għar-Regolament (KE) Nru 906/2009 ġew inkorporati fit-test bażiku. Din il-verżjoni konsolidata għandha valur dokumentarju biss.

l-aħħar aġġornament 23.09.2021